#وفاة_أبي_طالب
#(٧)_شهر_رمضان
#مؤمن_قريش

*يا درع الرسـالة و الإمــامة*
*بعد عينك علي و طه يتامى*

----
(١)
يبو طالب نعزي اليوم شبلك
ذاك اللي انأمر بيده يغسلك
و الما يتبـع المختـــار يهـــلك
*حجة عالخلگ لا شك كلامه*

----------
(٢)
ينعاك النبي والكعــبة واللوح
و الينعاه محمــد شآنه يلوح
من بعدك يتيمك ظل مجروح
*و مثل الليل مُسوده أيامه*

-------
(٣)
و إذا كان النبي محــزون لجلك
و بعام الحزن امسمي فصـــلك
معناته العقل ما يحصي فضلك
*يا عم النبي الـ عالي مقـــامه*

--------
(٤)
ما نگـدر يبو طالب نوصــفك
بس الله و حبيبه اللي يعرفك
مثل نهر الكرم يالغـالي كفك
*و بطول الزمن تارك علامه*

-------
(٥)
يبو طالب حمــلت أعظـــم مُهمــــه
و اليحـــمل مُحمـــــد گاعـه قمــــه
بعـــد عينك صبـــــح بالدين ثُلــمه
*و لا يسّد الشمس طيف الغمامه*


--------
(٦)
على صدرك ربى دين الجــلاله
و من غيرك كفل وحي الرسالة
او تالي ما رعــوا أجر الكفــاله
*و كل حاقد عليكم سل سهامه*

----------
(٧)
قالـــــوا يبو طــالب چنت كافــــر !
و أنت اللي چــنت للهــادي ناصـر
و قبل حســان بأشعــارك يفاخـــر
*و على جيش الكفر شعرك حسامه*

------
(٨)
صافــي يبو طالب در نبعكــم
لكـن عالكفــر يرهــب فزعكـــم
قلت والله ما يوصل جمعكــــم
*ولا يمس النبي نسمة ظلامه*

----
(٩)
و من شعـــرك يبو طالب عـرفنا
بِأن الدين النبي هو ديــن ربنـا
و على دربك يبو الأطهـار سرّنا
*ندين الله تعــالى بإســلامه*

----
(١٠)
يا مؤمن قريش الـ ضحـــى للدين
على دربك مشى عباس و حسين
وما قصر شبيهك ضحـــى ليدين
*عبــاس الگــمر ليث الكـــرامه*

----
(١١)
و بعدك يبو طالب ما جــرى دم
و ظل خــير الورى طــه مُكـــرم
و بعد عباس صار الكــون مأتم
*و دخلت بت علي مجلس ملامه*

وزن النصاري - رباعي


🖋 عبد مُحمد وآل مٌحمد / #مُفضل_حبيب



الناشر عباس التميمي:
قصائد حسينيه مكتوبه لمجموعة من الشعراء اضغط هنا 👇👇👇👇👇
https://telegram.me/aabas78
تريد كروب للقصائد الحسينيه وألحان منبريه مختلط اضغط هنا 👇👇👇
https://tttttt.me/joinchat/AAAAAD7f0FNmkN2JjlNIBw
__
للاستفسار على المعرف 👇👇👇👇
@Abas747