#قصيدة_العليله

اعله حسك عايشه يابعد العيون
لاتحسبني عدله من تروحون

لقني يبويه وجهز الناگه
مالي حيل اضلن عمري مشتاگه
لاتحسبني عدله من تروحون
--------------------------------------
تمشي اتريد كونك امشي وياك* لو بالحسره اهمن
عليله الروح وجملني بفراگ *وحيده ابقى عدمن
اعاين للهوادج بويه وختاض *هضمه ابگلبي رسمن
لو عذرك عليله وبقى بالدار *عليلك ماشي المن


لاتتعذر اوماريد اعذار
اقره الفاتحه لو عني تندار

نار الهجر تدري بويه حراگه
مالي حيل اضلن عمري مشتاگه
لاتحسبني عدله من تروحون
--------------------------------------------------
حملتو الهوادج كل المتاع *وانه بالتمني
ها بلكت تگلي گومي وياي *وحزني ايروح مني
حط عينك ابعيني ارد احاجيك* ليش اتصدهه عني
ما واحد نشدني منكم وگال *اولا واحد سألني


لاواحد نشدني وگلي تمشين
بس بعيونكم اقراهه تبقين

طرت گلبي حسره وفاضت اشواگه
مالي حيل اضلن عمري مشتاگه
لاتحسبني عدله من تروحون
-------------------------------------------------------
لو غربت عني ولجفه صار* وضعنك سار ومضه
لاتتوقع ارضه ابليمت ايعود* بس بالموت ارضه
لاتحسبني عدله جثه بالدار *وعمري انطاك فرضه
مايحضه اليفارگ خله وعزاز* بس بالنوح يحضه


گلي وليفارگ مثلك اشلون
ماتكفي ه لو يعميهه العيون

ماتشفي الجرح بس جلمت املاگه
مالي حيل اضلن عمري مشتاگه
لاتحسبني عدله من تروحون
-------------------------------------------------------
هوه الشوك لو بس شوف العيون* بويه اعميهه عيني
بس حاچيلي كلبي لمن تغيب.* شيسكن ونيني
تاخذ كلشي من تروح وياك *وتموت حنيني.
اعله باب الدار ازرع كلشي بي شوف* وانتظرك تجيني


لو تندار وتعاين لمگفاك
تلگه شوف عيني رايح وياك

ياحلمي العشگته ولهجر باگه
مالي حيل اضلن عمري مشتاگه
لاتحسبني عدله من تروحون
-------------------------------------------------------
عليله ولعليل ايزيد بال اه *واني رافجتهه
مصباحي نوايب ولمسه ادموع* الفرحه ودعتهه
إيهزك حنينك لمن اتغيب *اوتنشد عل العفتهه
هم بالك يگلك باجر اشلون *العليله البارحتهه


هم مثلي تون لو جاك الغروب
ابقى الياوكت اتنطر ادروب

شوگ اعزاز هذه ويكتل افراگه
مالي حيل اضلن عمري مشتاگه
لاتحسبني عدله من تروحون
-------------------------------------------------------
شودع منك انه وانته الوحيد* ماتتودع اوداع
سر وداعت الله انته يحسين *بوجه السافر بساع
ياماي الوجود الكلشي بي حي. *ارش ياماي عالكاع
يادرب الانطره لمن اتروح* هوه الكون شو ضاع


ياطارش تدزه حتى اتناه
صوغه امن السفر دزلي وياه

انفاس اليفراگ بويه خناگه
مالي حيل اضلن عمري مشتاگه
لاتحسبني عدله من تروحون
---------------------------------------------------
علي سليم الحسناوي

#محرم_الحرام

https://telegram.me/aabas78
قصائد لكل ايام محرم اشترك بالقناة

#مهد_عطشان_قصيدة_عبد_الله_الرضيع


قصت طفل من الطف عبد الله يسمونه
ناس اختفلت ابأمره اتذبحه لويشربونه

شرب لو گطعوو نحره
روايه مسنده اتذكره
عبد الله يسمونه
-----------------------------------------------------
قصه من روات الطف طفل عبد الله جان اسمه
عِطش من جان غالي الماي عگب كافل وگع يمه
طفل بجه السمه امناغا ومحني والده ابهمه
قصمه منين نرويهه تفت گلب الصخر امه


مضمون الروايه ابعيد حجيهه ايهزهز السبعه
يبس كلشي جره اعله الگاع من ماگدرت اترضعه

غيم اتبره من مطره
روايه مسنده اتذكره
عبد الله يسمونه
----------------------------------------------------
ابمضمون الروايه انطب وتبدي الطفل سالفته
گمر ذبلان بيد امه صوب حسين ماخذته
سكت كلشي ابضجيج الطف اعلى امن الحرب ونته
وهتاف امن السمه ناداه يحسين الطفل سكته


الحيره اكبر امن الطف ابوجه حسين مرسومه
يتركه العطش يفتِك بي خياره الثاني للحومه

يدري اسهام تنتضره
روايه مسنده اتذكره
عبد الله يسمونه
-----------------------------------------------------
رف جنح الترافه اگبال ابوه وضمه الصدره
اسماعيله خذا للموت وهاجر بقت منتضره
عزيز اخيامنه هذه تگله اعلينه لتأخره
ماتدري المنايه اليوم ترسم فاجعه ابنحره


خذاه وكلشي راح وياه نفس عبد الله جان الهم
ماتدري اليتاني موت اوما يرجع عدل الهم

الحره اتصبر ابحره
روايه مسنده اتذكره
عبد الله يسمونه
-------------------------------------------------------
وگف ولحيره بعيونه وعاين بالمصيبه اهواي
ماذنب الطفل ناده ماكو للعطش شراي
شي گالت طفل نروي وشي گالت امنعو الماي
بين الگال ولما گال نحره لاعبه الرماي


اسم الله من اجاه البين وبلل رگبته دمه
حس باله اجاه الماي مايدري انذبح حلمه

عطش قابض على ثغره
روايه مسنده اتذكره
عبد الله يسمونه
------------------------------------------------------
إلمثَلث شبك روحه وفز رغم العطش حيله
الوجع هز كل كتر جسمه وسهمه ضل يلوليله
دللول السهم گله يقره ابنحره ترتيله
لم دمه ابجفوفه حسين رساله الربه يشكيله


لم دم الطفل بيده الربه يرفع الشكوى
ان يرضيك هذه خذ تقبل مني هالقربى

عجيبه ياصبر صبره
روايه مسنده اتذكره
عبد الله يسمونه
------------------------------------------------------
رجع امهبط الهامه وضهره منجسم نصين
يبجي بس دمع ماكو عجيبه العطش واصل وين
بين اجفوفه در مذبوح ورباب اتعاين اعله حسين
ساكت ابني اشوفنه رويته ها ينور العين


گلهه اي شرب نبله مايضمه بعدهه ابنج
ولا ونه تسمعيله اقري الفاتحه الصبرج

الترافه ماتت بهجره
روايه مسنده اتذكره
عبد الله يسمونه
---------------------------------------------------
علي سليم الحسناوي
#محرم_الحرام


https://telegram.me/aabas78
قصائد لكل ايام محرم اشترك بالقناة

(( #يا_هلال))  #محرم_الحرام
……………………………………………………………

ياهِلال  . من تهل دمعي يهل
يا هِلال . ابعيني الك مية شكل
مره اشوفنك جسد و بلا رداء
ومره راس اعالرمح يمطر دماء
يا هِلال .. ياهِلال

……………………………………………………………


چني اشوفنك مره و تلزم كسرها
ومثل شكلك بالظبط حدّب ظهرها
امخليه المسلب قميصه ابنص حجرها
احمر و من البجي احمر نظرها

منخل صار . بيه اثار . الف و تسعميه
ابرض اضلوع . بيه مطبوع .  حافر اعوجيه
أمحنبه اعليه . وتشم بيه . عطر ابن الزجيه

يا قميص . عاري ظل وكت الضهر
يا قميص . شمس فوگه ومنصهر
يل اشوف اعليك دم تبجي السماء
ومره راس اعل الرمح يمطر دماء
يا هِلال .. ياهِلال

……………………………………………………………


مره تتراوالي جف و ماهو اصبعه
على مود المحبس ابـ خنجر يگطعه
هذا منظر يذبح بروحج يبضعه
موش عشره والبقن بجفوفه تسعه

ابرمل الگاع . غاص و ضاع . وي اشلاء جسمه
رجل الخيل .سحكت حيل .طحنت حتى عظمه
عشره اهواي . و مو بهداي . اعليه تركض ابهمه

والشفاه . صحره ما شافت مطر
والشفاه . الماي گلبه الها انفطر
يا هلال وهم جبت وياك ماء
ومره راس اعل الرمح يمطر دماء
يا هِلال .. يا هِلال

……………………………………………………………


ابعيني اشوفنك سهم ذابحله ورده
طفل ودميعاته تتجاره اعله خده
على ضحكاته البريئه ينوح مهده
عود يشرب بس ابوه مذبوح رده

طفل ازغير . سهم اجبير . يا مترف رگبته
مثل النار . بارد صار . من شوغة ذبحته
غمض عين . مات حسين . من طلعت شهكته

يا رضيع . يلي ما شابع حضن
يا رضيع . ابرمل فاير مندفن
چني اشوف انفاسك ادور هواء
ومره راس اعل الرمح يمطر دماء
ياهِلال .. يا هِلال

……………………………………………………………


جف اصدن بيك منه ايطيح مايه
جفوف طاحت لجن ضم ابصدره رايه
او جود يركض حيل و الاطفال غايه
اتبده و العباس اعلنها النهايه

كبل الموت . اخر صوت . ردد اسم زينب
مو للعين .  لا جفين . الخدر اخته تعذب
صح عطشان . بس بركان . كلبه لسكنه يلهب

ابلا جفوف . موقف ويعصر عصر
ابلا جفوف . طاح من فوگ المهر
ابوجه يتلگه الارض شيخ الوفاء
ومره راس اعله الرمح يمطر دماء
يا هِلال .. يا هِلال

……………………………………………………………


بيك ظلمه وليل وحشه وگاع هيمه
وحرم باتت عالتراب ابلايه خيمه
ذبلت اطفال ابعطش جوع و هظيمه
امدللين و صاروا الضرب و شتيمه

تدمي الروح . بيك تلوح . ترچيه رقيه
جدم ادموم . بيه ملموم . شوچ الغاضريه
بالجمرات . والعثرات . اشكد شبعت اذيه

والنساء . ليل و الدمعه اتهمل
والنساء . الهن اتحضر حبل
يا هلال وهنه اميرات الحياء
ومره راس اعل الرمح يمطر دماء
يا هِلال .. يا هِلال

……………………………………………………………


بيك صوره المهدي متعذب لجلها
مره تركض و الرمل يجوي ابرجلها
اصمله من تعثر و لا واحد يگلها
السوط و بكل ضربه ياذيها و يشلها

الكاع تگول . ما معقول . زينب وينه خدرج
اخت حسين . وتركضين .  بالخمسين عمرج
هزله النوگ . باجر سوگ . شجم فره تفرج

والحِبال . تحفر بأيدج جرح
والحِبال . اعليه دمعاتج ملح
راس ابو فاضل يصدلج بالبكاء
ومره راس اعل الرمح يمطر دماء
يا هِلال .. يا هِلال

……………………………………………………
✍️ ( سيد خضر الزاملي )


https://telegram.me/aabas78
قصائد لكل ايام محرم اشترك بالقناة