#هلال_محرم
#الليلة_الأولى
#نعي
#عاشوراء_١٤٤٠
#محرم_١٤٤٠
#قصيدة_يا_بن_شبيب

-----------
*يا بن شبيب آنا الرضا و گلبي مكسور*
*أبچي أون مدمي الجفن بهلال عاشور*

------
(1)

يا بن شبيب هذا الشهر للحسره ولآه
وهذا هلاله المنخسف يبچي اعلى مولآه
وكل العوالم تنتحب وتصيح ويلآه
*لجل الجرى في كربلا الفت لصخور*

------
(2)

يا بن شبيب أهل الحگد ما عدها رحمه
وهذا الشهر بيه القتل الحرمه حكمه
ذبحوا عزيز المصطفى سفكوا له دمه
*وراسه على راس الرمح يـاوسفه مشهور*

------
(3)

يا بن شبيب اللي جرى بچّى الأرآضين
وخلا السما تمطر دما وتصيح يحسين
وبس من يهل هذا الشهر يزداد لونين
*ويصبح گميص احسين بالافلاك منشور*

------
(4)

يا بن شبيب ابهالشهر هل دمعك أحمر
گبلك ترى حتى الحجر دمه تفجر
و أحضر مجالس للعزا أشعث وأغبر
*حالك مثل حال الملك تلطم بلصدور*

------
(5)

يا بن شبيب اللي جرى أقرح جفنا
لا يوم مثل الصار بحسين انفجعنا
ذبحوه مثل ذبح الكبش الـ كان عزنا
*ودخلت خواته باليسر مجلس للخمور*

------
(6)

يا بن شبيب ثوب الحزن خلّه شعارك
و أرفع يثارات الحسين بأعلى دارك
ونادي يمهدي بالعجل لا تنسى ثارك
*ثار الذي راسه انگطع والصدر محفور*

------
(7)

يا بن شبيب اجري الدمع بالجنة تفوز
وكل دمعه لجل احسين اضعافها تحوز
و عنك ترضى فاطمة وما يصيبك العوز
*وگبرك تحضره تعتني والضلع مكسور*

------
(8)

يا بن شبيب بس من تهل أول دموعك
انوي تزور ابن النبي بدمعة خشوعك
و گلّه أنا يا سيدي بأمرك وطوعك
*و كل غالي لجلك والنفيس يحسين مدخور*

-------
(٩)
يا بن شبيب قوم ارتدي ثوب الخدامه
وأنسى التعب أنسى الألم أنسى الملامه
وألعن يزيد ابكل وگت جيشه ونظامه
*يوم الذي اتصب العذب وتصيح مأجور*

الوزن فائزي - رباعي


🖋 عبد مُحمد وآل مٌحمد / مُفضل حبيب
------


الناشر عباس التميمي:
قصائد حسينيه مكتوبه لمجموعة من الشعراء اضغط هنا 👇👇👇👇👇
https://telegram.me/aabas78
تريد كروب للقصائد الحسينيه وألحان منبريه مختلط اضغط هنا 👇👇👇
https://tttttt.me/joinchat/AAAAAD7f0FNmkN2JjlNIBw
__
للاستفسار على المعرف 👇👇👇👇
@Abas747