Ахборот 24 | Наманган вилоятида ер майдонларини расмийлаштириб бериш билан боғлиқ коррупциявий ҳолатлар фош этилди

Вазият 24 | Қашқадарё вилояти

Бош прокуратура ҳузуридаги Департаментнинг Наманган вилояти бошқармаси томонидан ўтказилган терговга қадар текширувда фуқаро Ш.Ш. Чуст тумани, “Бофанда” МФЙ ҳудудидаги новвойхонада газ тармоғига тижорат мақсадида ўзбошимчалик билан уланиб, 532,6 млн сўмлик табиий газдан ноқонуний фойдаланганлиги аниқланган.

Шунингдек, Департаментнинг Мингбулоқ тумани бўлими томонидан ўтказилган терговга қадар текширувда “B.G.” ва “G.Z.” фермер хўжаликлари масъул шахслари умумий фойдаланишдаги электр тармоғига тижорат мақсадида ўзбошимчалик билан уланиб, жами 540 млн сўмлик электр энергиясидан ноқонуний фойдаланганликлари аниқланган.

Департаментнинг Навоий вилояти бошқармаси томонидан ўтказилган терговга қадар текширувда “M.N.” МЧЖ масъул шахслари Навоий шаҳар, "Кимёгарлар" МФЙ ҳудудидаги иссиқхонада электр тармоғига ўзбошимчалик билан тўғридан-тўғри уланиб, 286,9 млн сўмлик электр энергиясидан ноқонуний фойдаланганликлари аниқланган.

Бош прокуратура ҳузуридаги Департаментнинг Давлатобод тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “D.F.” МЧЖ раҳбари О.Д. (муқаддам судланган) “Орзу” МФЙ ҳудудидаги ишлаб чиқариш цехида қонунга хилоф равишда дори воситалари ва биологик фаол қўшимчалар ишлаб чиқариш билан шуғулланиб келганлиги аниқланиб, ундан умумий баҳоси 502,9 млн сўмлик 9 турдаги 138 031 қути дори воситалари ва дори тайёрлашда ишлатиладиган бошқа хом ашёлар ашёвий далил сифатида олинган.

Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш, шунингдек таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) билан жиноят иши қўзғатилиб, тергов ҳаракатлари ўтказилмоқда.

Бош прокуратура ҳузуридаги Департаментнинг Когон тумани бўлими томонидан ўтказилган тезкор тадбирда “A.P.” хусусий корхонаси савдо дўкони сотувчиси А.Р. умумий баҳоси 57 млн сўмлик турли номдаги 730 дона қалбаки акциз маркали алкоголь ва 50 қути тамаки маҳсулотини сотувга қўйганлиги аниқланиб, ушбу маҳсулотлар ашёвий далил сифатида олинган.

Бош прокуратура ҳузуридаги Департаментнинг Андижон шаҳри бўлими ходимлари томонидан ўтказилган тезкор тадбирда фуқаро М.С. "Куйганёр бозори" олдидаги савдо дўконида фуқарога 290 қути хорижда ишлаб чиқарилган акциз маркасиз тамаки маҳсулотини 4,9 млн сўмга сотган вақтида ушланиб, ушбу савдо дўконидан ҳеч қандай ҳужжатсиз умумий баҳоси 39,2 млн сўмлик жами 2 331 қути акциз маркасиз тамаки маҳсулотлари ашёвий далил сифатида олинган.

Мазкур ҳолат юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари ўтказилмоқда.

Бош прокуратура ҳузуридаги Департаментнинг Шўрчи тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаролар Х.Ж. ва А.Р. фуқаро М.Х.га “гашиш” гиёҳвандлик воситасини 12,5 млн сўмга сотган вақтида ушланиб, тадбир давомида улардан 28,74 грамм гиёҳвандлик воситаси ва “Регапен” номли кучли таъсир қилувчи дори воситаси ашёвий далил сифатида олинган.

Департаментнинг Самарқанд вилояти бошқармаси томонидан ўтказилган тезкор тадбирда телеграм мессенжерида канал-бот ташкил этган шахслар кучли таъсир қилувчи, психотроп ва гиёҳвандлик воситалари савдоси билан шуғулланиб келиб, фуқарога таркибида гиёҳвандлик моддаси бўлган 0,9 грамм “SK White” номли воситани 1,1 млн сўмга сотишга келишиб, пулни бошқа бир фуқаронинг номига очилган пластик картага ўтказиб олиб, гиёҳвандлик воситасини Тошкент шаҳридаги Жанубий темир йўл вокзали ёнидаги қурилиши битмаган бино ёнига кўмиб қўйганликлари аниқланган.

Департаментнинг Чортоқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида “Хавфсиз ва соғлом юрт” кенг қамровли тезкор-профилактик тадбирлар доирасида ўтказилган тезкор тадбирда фуқаро А.Н. “Дўстлик” МФЙ ҳудудига 1,75 грамм “гашиш” гиёҳвандлик воситасини ўтказиш мақсадида олиб келган вақтида ашёвий далиллар билан ушланган.

Бош прокуратура ҳузуридаги Департаментнинг Косон тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаро Т.Б. “Янгиобод” МФЙ ҳудудидаги хонадонида яширин цех ташкил қилиб, қўлбола алкоголь маҳсулотлари ишлаб чиқариш фаолияти билан шуғулланиб келганлиги аниқланиб, ундан 575 дона қўлбола алкоголь, 90 литр спирт, 2 725 дона елим қопқоқ, бўш шиша идишлар, қалбаки акциз маркалар ва ишлаб чиқаришда фойдаланилган бошқа товар моддий бойликлари ашёвий далил сифатида олинган.

Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари ўтказилмоқда.