ደረቅ ቆሻሻን መልሶ በማልማት ስራ ላይ የተሰማሩ ማህበራት ከ1 ነጥብ 5 ቢሊየን ብር በላይ ገቢ ማግኘታቸው ተገለፀ

ደረቅ ቆሻሻን መልሶ በማልማት ስራ የተደራጁ ማሕበራት ባለፉት 6 ወራት ብቻ ከ1 ነጥብ 5 ቢሊየን ብር በላይ ገቢ ማግኘታቸውን የአዲስ አበባ የጽዳት አስተዳደር ኤጀንሲ አስታወቀ።

የኤጀንሲው ምክትል ዋና ዳይሬክተር ሙላት ተገኘ በመዲናዋ ደረቅ ቆሻሻን መልሶ በማልማት ሥራ ዙሪያ ከ2013 ዓ.ም ጀምሮ ትኩረት ተሰጥቶ እየተሰራበት መሆኑን ጠቅሰው በዚህም ለበርካቶች የስራ እድል መፍጠር እንደተቻለ ተናግረዋል።

በአሁኑ ወቅት ከ4 ሺህ በላይ ዜጎች ከ400 በላይ በሚሆኑ ማሕበራት በመደራጀት በዘርፉ ተሰማርተው ገቢ እያገኙ መሆኑንም ጠቁመዋል።

ምክትል ዳይሬክተሩ፤ በተያዘው በጀት ዓመት ባለፉት ስድስት ወራት ብቻ እነዚህ ማህበራት ከ1 ነጥብ 5 ቢሊየን ብር በላይ የሚሆን ገቢ ማግኘታቸውን ለኤፍ ኤም ሲ ተናግረዋል።

በተጨማሪም የፕላስቲክ ቆሻሻዎችን ወደ አዲስ ምርት በመቀየር ሥራ ላይ የተሰማሩ ወጣቶች የገበያ ትስስር እንዲያገኙ እየተሰራ መሆኑን ጠቁመዋል።

የተለያዩ ደረቅ ቆሻሻዎች በወንዞች እና ሌሎች አካባቢዎች ላይ እየተጣሉ አካባቢዎችን ሲበክሉ እንደነበር የገለጹት አቶ ሙላት፤ ነገር ግን የጽዳት ሥራ ከተጀመረ ወዲህ ደረቅ ቆሻሻዎች በአግባቡ የሚሰበሰቡበት እና አካባቢን የማይበክሉበትን ሁኔታ ለመፍጠር ተችሏል ብለዋል።

የ #አሜሪካ ምክትል ውጭ ጉዳይ ሚኒስትር እና የአሜሪካ አፍሪካ ዕዝ አዛዥ በኢትዮጵያ አየር ኃይል የተዘጋጀውን ዓለም አቀፍ የአቭዬሽን ኤክስፖ ጎበኙ

የአሜሪካ ምክትል ውጭ ጉዳይ ሚኒስትር ክርስቶፎር ላንዳው እና የአሜሪካ አፍሪካ ዕዝ አዛዥ ጄኔራል ዳግቪን አንደርሰን በኢትዮጵያ አየር ኃይል የተዘጋጀውን ዓለም አቀፍ የአቭዬሽን ኤክስፖ መጎብኘታቸውን መከላከያ ሠራዊት አስታወቀ።

በኢትዮጵያ በኩል የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ በጉብኝቱ መሳተፋቸውም ተገልጿል።

በዚህ ኤክስፖ አየር ኃይልን ጨምሮ የመከላከያ ኢንጅነሪንግ ኢንዱስትሪ ግሩፕ ፣መከላከያ ሠራዊት ፋውንዴሽን ፣ የመከላከያ ዩኒቨርስቲ እና ሌሎችም አለም አቀፍ ደርጅቶች ምርቶቻቸውን ለዕይታ አቅርበዋል ተብሏል።

በኤክስፖው የቀረቡት ወታደራዊ ቴክኖሎጂ ውጤቶች የኢትዮጵያን የረጅም ዘመን ስኬት የሚያሳዩ ስለመሆናቸው መከላከያ ሠራዊት መረጃ አመላክቷል።

የአሜሪካ ምክትል ውጭ ጉዳይ ሚኒስትር ክርስቶፎር ላንዳው ከጉብኝቱ በኋላ ለተደረገላቸው ደማቅ አቀበባል ምስጋና አቅርበው፤ ኢትዮጵያ በመገኘታቸው ክብር እንደሚሠማቸው ገልፀዋል። በኢትዮጵያ እና አሜሪካ መካከል ያለው ግንኙነት ተጠናክሮ እንደሚቀጠልም ተናግረዋል።

የአሜሪካ አፍሪካ ዕዝ አዛዥ ጄኔራል ዳግቪን አንደርሰን በበኩላቸው ለቀጠናው ሰላም በተለይም እንደ አልሸባብ እና አይኤስኤስ ያሉ ሽብረተኞችን ለመከላከል እና ለመደምሰስ በጋራ እንሰራለን ማለታቸውን መከላከያ ሠራዊት አስታውቋል።

#ኢትዮጵያና #አሜሪካ ብሔራዊ ጥቅማቸውን ለማስጠበቅ በጋራ ለመስራት መስማማታቸው ተገለፀ

የመከላከያ ሚኒስትር ኢንጂነር አይሻ መሀመድ በዛሬው ዕለት የዩናይትድ ስቴትስ የአፍሪካ ዕዝ አዛዥ ጄኔራል ዳግቪን አርኤም አንደርሰንን በቢሯቸው ተቀብለው ካነጋገሩ በኋላ የጋራ መግለጫ ሰጥተዋል፡፡

ኢንጂነር አይሻ በዚሁ ወቅት ሁለቱ ሀገራት ከዚህ በፊት የቆየ ግንኙነት እንዳላቸው ጠቅሰው፤ አሁን ላይ እያደገ የመጣውን ከፍተኛ የዲፕሎማሲና ወታደራዊ ግንኙነት ወደላቀ ስታራቴጂካዊ የሥራ አጋርነት በማሳደግ የሁለቱን ሀገራት እኩል ተጠቃሚነት ለማረጋገጥ መስማማታቸውን ተናግረዋል፡፡

በተጨማሪም በሰላምና በፀጥታ ጉዳዮች በጋራ ለመስራት መግባባት ላይ መድረሳቸውን ገልፀው፤ የሁለቱንም ሀገራት ብሔራዊ ጥቅም ለማስጠበቅ እና ሽብርተኝነትን በጋራ ለመዋጋት ከስምምነት ላይ መደረሱን ተናግረዋል፡፡

የዩናይትድ ስቴትስ የአፍሪካ ዕዝ አዛዥ ጄኔራል ዳግቪን አርኤም አንደርሰን በበኩላቸው የኢትዮጵያ አየር ኃይል 90ኛ ዓመት የምስረታ በዓልን ለማክበር ወደ ኢትዮጵያ መምጣታቸው ታሪክን ለማሰላሰልና የወደፊት ትብብርን ለማጠናከር ትርጉም ያለው አጋጣሚ እንደሆነ ገልፀዋል።

አክለውም የኢትዮጵያ ጉብኝታቸው በኢትዮጵያ አየር ኃይል አከባበር ላይ ለመገኘትና ለመሳተፍ ብቻ ሳይሆን በኢትዮጵያና በዩናይትድ ስቴትስ መካከል ያለውን የረጅም ጊዜ ግንኙነት እንደገና ለማየትም ዕድል እንደሰጣቸው በመግለጫቸው ላይ ጠቁመዋል፡፡

በተለይም የጋራ ቀጠናዊ የደህንነት ተግዳሮቶችን ለመፍታትና የአጋርነት ዕድሎችን ለመጠቀም እንዲሁም የሁለቱን አገሮች ግንኙነት እንደገና ለማጠናከር ትልቅ አጋጣሚ መፍጠሩን መናገራቸውን ከኢፌዴሪ መከላከያ ሰራዊት የተገኘው መረጃ ያመለክታል፡፡

ተጨማሪ ለማንበብ: https://www.facebook.com/share/1C1JPYK1q3/

ዜና: በኢትዮጵያ በወርቅ ማልማት ተግባር የተሰማራው የካናዳው አላይድ ጎልድ በ4 ቢሊዮን ዶላር ለቻይናው ዚጂን ጎልድ ሊሸጥ ነው

በኢትዮጵያ ውስጥ ግዙፍ ፕሮጀክቶችን በማንቀሳቀስ ላይ የሚገኘው የካናዳው የወርቅ ማዕድን ኩባንያ አላይድ ጎልድ በቻይናው ዚጂን ጎልድ ኢንተርናሽናል መገዛቱን ፋይናንሺያል ታይምስ ዘግቧል። ግዥው በሙሉ በጥሬ ገንዘብ የሚፈጸም ሲሆን፣ ዋጋውም በግምት 4 ቢሊዮን የአሜሪካ ዶላር ነው ተብሏል።

በሆንግ ኮንግ የአክሲዮን ገበያ የተመዘገበው ዚጂን ጎልድ ኢንተርናሽናል፣ አላይድ ጎልድን በ5.5 ቢሊዮን የካናዳ ዶላር (4 ቢሊዮን የአሜሪካ ዶላር) ለመግዛት ተስማምቷል። ፋይናንሺያል ታይምስ እንደዘገበው፣ ይህ ግዢ ሊፈጸም የቻለው የወርቅ ዋጋ በዓለም አቀፍ ገበያ ከፍተኛ ደረጃ ላይ መድረሱን ተከትሎ፣ በማዕድን ዘርፉ ውስጥ ያሉ ኩባንያዎች እርስ በርስ በመጣመር አቅማቸውን እያጠናከሩ በመሆናቸው ነው።

አላይድ ጎልድ በኢትዮጵያ፣ በማሊ እና በኮትዲቩዋር የማዕድን ማውጣት ሥራዎች አሉት። ኩባንያው በስምምነቱ መደሰቱን የገለጸ ሲሆን፣ በዚህ ግዢ የአንድ አክሲዮን ዋጋ 44 የካናዳ ዶላር እንዲሆን ተደርጓል። ይህም ስምምነቱ ከመታወቁ በፊት ከነበረው የ30 ቀናት አማካይ የአክሲዮን ዋጋ ጋር ሲነጻጸር የ27 በመቶ ጭማሪ አለው ተብሏል።

ይህ የዋጋ መናር የወርቅ ዋጋ በዓለም ገበያ በመጨመሩ ምክንያት ባለሀብቶች በማዕድን ሀብቶች ላይ ያላቸው ከፍተኛ ፍላጎት ማደጉን ያሳያል።

ተጨማሪ ለማንበብ:- https://www.facebook.com/share/1FBCWxygmK/