#ፌዴራል_ፖሊስ በዋናው መስሪያ ቤቱ ያደራጀውን የድሮን ፓይለት ማሰልጠኛ ማዕከል አስመረቀ

የኢትዮጵያ ፌዴራል ፖሊስ በዋናው መስሪያ ቤቱ ያደራጀውን የድሮን ፓይለት ማሰልጠኛ ማዕከል በትናንትናው እለት ስራ አስጀመረ። በተጨማሪም ኮማንድ ኮንትሮል ያለው ዘመናዊ መንገድ የሚዘጋ ተሸከርካሪም ተመርቆ ስራ እንዲጀምር ተደርጓል ተብሏል፡፡

የፌደራል ፖሊስ ኮሚሽነር ጀነራል ደመላሽ ገ/ሚካኤል በድሮን ፓይለት ማሰልጠኛ ማዕከሉ አዲስ የገቡት ድሮኖች ከከተማ ፀጥታ ቁጥጥር ባሻገር የቦርደር ሴኪዩሪቲን ጨምሮ የኮንትሮባንድ እና ሕገ-ወጥ የሰዎች ዝውውርን በቀላሉ መቆጣጠር የሚያስችል ዕድል የሚፈጥሩ መሆኑን ገልጸዋል።

ኮሚሽነሩ በሀገሪቱ ፖሊስ ታሪክ ውስጥ የመጀመሪያ የሆነው የድሮን ቴክኖሎጂ ማዕከል፤ ወጣት የፖሊስ ኦፊሰሮች የቴክኖሎጂ ስልጠና አግኝተው የተሻለ የፖሊስ አገልግሎት እንዲሰጡ የተፈጠረ ነው ሲል ጠቅሰው አሁን ላይ በተቋሙ ያለው የድሮን አቅም በፖሊስ የወንጀል መከላከል ሰርቪላንስ እና የምርመራ ስራ ከፍተኛ እገዛ አለው ብለዋል።

በተጨማሪም እንደ አፍሪካ ህብረት የመሪዎች ጉባኤ ያሉ መድረኮች ሲኖሩ ለተወሰነ ጊዜ መንገዶችን ዘግቶ ቪአይፒዎችን ለማስተናገድ የሚያስችል የራሱ የሆነ ኮማንድ ኮንትሮል ያለው ዘመናዊ ሮድ ብሎክ (መንገድ የሚዘጋ) ተሸከርካሪም ተመርቆ ስራ እንዲጀምር ተደርጓል ተብሏል፡፡

https://web.facebook.com/AddisstandardAmh/posts/pfbid02zdynN9ckoLC9nzty6Z7BKVzhYzUyNmLLrgGkp55imWx7BrvfJKGJcNLjgR8fAXAzl

ፖሊስ የባለሀብቱን በመግደልና በማስገደል ወንጀል የተጠረጠሩ ግለሰቦችን ይዞ ምርመራ እያጣራ መሆኑን አስታወቀ

የአዲስ አበባ ፖሊስ አቶ ቢረሳው ምናለ ፈንታ የተባሉት ባለሀብትን በመግደልና በማስገደል ወንጀል የተጠረጠሩ ሶስት ግለሰቦችን ይዞ ምርመራ እያጣራ መሆኑን አስታወቀ።

ፖሊስ ትናንት ባወጣው መግለጫ ባለሀብቱ ታህሳስ 21 ቀን 2017 ዓ/ም በአዲስ አበባ ከምሽቱ 2:00 ሰዓት ከስራ መልስ ወደ ቤታቸው በማምራት በራቸው ላይ ቆመው የመኪና ጥሩምባ እያሰሙ በር እስኪከፈትላቸው እየጠበቁ በነበረበት ወቅት ማንነቱ ባልታወቀ ግለሰብ በተተኮሰባቸው ሦስት ጥይት ህይወታቸው ማለፉን ገልጿል፡፡

ከወንጀሉ ጀርባ ያሉ ግለሰቦችን ማንነትና ምንነት ለመለየትም ከአዲስ አበባ ሐዋሳ እስከ ሞያሌ ጫፍ የደረሰ መረጃና ማስረጃዎችን የማሰባሰብ ተግባር ተከናውኗል ብሏል።

በዚህም ወንጀሉን በመፈፀም የተጠረጠረውን መኮንን ይዋል ይፍሩ የተባለውን ግለሰብ እና አብዩ አይተነው ፈንታ ጨምሮ ለወንጀሉ መፈፀም አካባቢውን በመቆጣጠር ተሳትፎ የነበረውን አቶ ወርቁ መለሰ ካሴ የተባሉትን ሦስቱንም ተጠርጣሪዎች በደቡብ ኢትዮጵያ ብሔራዊ ክልላዊ መንግስት በጌዴዎን ዞን ይርጋ ጨፌ ከተማ ላይ በቁጥጥር ሥር በማዋል ምርመራ እያጣራ እንደሚገኝ የአዲስ አበባ ፖሊስ አስታውቋል፡፡

ተጠርጣሪዎቹ ከወንጀሉ መፈፀም በፊት በተቀነባባረ ሴራ በቂ ዝግጅት ሲያደርጉ የቆዩ መሆኑን የገለጸው ፖሊስ የግድያ ወንጀሉን የፈፀመው መኮንን ይዋል ይፍሩ የተባለው ግለሰብ በህገ-ወጥ መንገድ በታጠቀው ማካሮቭ ሽጉጥ የአቶ አብዩ አይተነው ፈንታ የግል ጠባቂ ሆኖ ሲያገለግል እንደቆየ ተጠቁሟል።

በቀጣይም በተጠርጣሪዎቹ ላይ የሚደረጉ የፍትህ ሂደቶች ውሳኔውን ተከታትሎ ለህዝብ እንደሚያቀርብ የአዲስ አበባ ፖሊስ ገልጿል፡፡

ምክር ቤቱ በ #አፋር ክልል በርዕደ መሬት የተጓዱ ዜጎችን መልሶ ለማቋቋም እየተደረገ ያለው ጥረት በቂ አለመሆኑን ገለጸ

የሕዝብ ተወካዮች ምክር ቤት አባላት በአፋር ክልል በርዕደ መሬት የተጓዱ ዜጎችን መልሶ ለማቋቋም እየተደረገ ያለው ጥረት በቂ አለመሆኑን ገልጿል።

በሕዝብ ተወካዮች ምክር ቤት ከጤና፣ ማህበራዊ ልማት፣ ባህልና ስፖርት እንዲሁም ከውጭ ግንኙነት እና የሰላም ጉዳዮች ቋሚ ኮሚቴዎች የተውጣጣ ቡድን ይህን ያለው በአፋር ክልል በርዕደ መሬት የተጎዱ ዜጎች ያሉበትን ሁኔታ መመልከቱን ተከትሎ ነው።

የምክር ቤቱ አባላቱ ከሰብአዊ እርዳታ ጋር በተያያዘ የመጠለያ፣ የምግብና ውሃ አቅርቦት እንዲሁም የጤና አገልግሎት አሰጣጥ በምን ደረጃ ላይ እንደሚገኝ ከተመለከቱ በኋላ፤ በቀጣይ መሻሻል ያለባቸውን ጉዳዮች አመላክተዋል ተብሏል።

ለዜጎች የሚደረገው ድጋፍ መጠናከር እንዳለበትና በየደረጃው ያሉ የክልሉ አመራር ለጉዳዮ ትኩረት ሰጥተው መስራት እንዳለባቸው የቡድኑ አባላት ማስገንዘባቸውን ከምክር ቤቱ የተገኘው መረጃ ያመላክታል።

የዞኑ የሥራ ኃላፊዎች በበኩላቸው፤ ጉዳቱ ቅፅበታዊ ድርጊት ቢሆንም በአደጋው የተጎዱ ዜጎችን ለማገዝ እየተሰራ መሆኑን አስረድተዋል።

በአፋር ክልል በተደጋጋሚ እየተከሰተ ባለው የመሬት መንቀጥቀጥ ከ58 ሺህ በላይ ዜጎች መፈናቀላቸው ይታወቃል።