👇🏼👇🏼👇🏼👇🏼
القصه دي حكتها لي بنت صاحبتي 😍😍
#شرر البلية ماايضضحححك😂😂😂

يلا زمان كان عندنا ديوان الرجال دة خطط اححمممر .. بس بنخشو نغير الملايات وننضفو ونطلع
ممنوووع نقعد فيهو
يلا اخواني كانو مافي قمت مشيت الديوان وفتحت التلفزيون وانشرحت نسيت نفسي
بس فجأة اسمع ليك باب شارعنا الجنب الديوان انفتح واخوي يقول لي زول اتفضل اتفضل ..ولو جريت برة مالابسة طرحة واخوي صعب شدييد ح يقول لي الجاابك هنا شنو
يلا ولاا كضضبتاا تووش انحشرت تحت السرير ..والسرير كراب سيور بلاستيك ..اخوي دخلو والضيف لسوء حظظي قعد في السرير الانا تحتو 😢
وشكلو سميين ومدغلب 😂 بالله مع قعدتو كدة الحبال اتشبكو في شعري وكان اتحركت بحس بي 😵
بس بقيت صاامدة وكاتمة نفس ..واخوي جا قال ليهو ياخ ماتقعد كدة اخد راحتك
وهو كمان مااصددق وقاال كدي رقد ..وانا بي تحت زاااتي رقدتا 😂 وانتهزت حركتو فكيت شعيراتي بقيت نيش نيش زي الطاقاني كهرباء بالله..وشوف عيني البلاستيك لما اتفك من شعري عمل شرارة
اها بس اخوي جاب الضيافة وقال ليهو عليي حظك الليلة عندنا خدرة كااربة ..الليلة وووب فيها غداء كمان ..الليلة يافيحاء اتورطتي تب
يلا راااقدة والضهر اتعسم وجو نملتين اتشاكلو جنبي وقرصوني بي زهجن داك واصصلي ماسألتهم..عاد اكتلن عشان يكتشفوني ويكتلوني ..لكن ختيتا ليهن ..وحدة من النملات كانت ليها فقرة كدة والتانية راسا مدردم ..عاد تحت السرير ح اسوي شنو غير اتأمل النمل 😂
اها ما المشكلة هنا المشكلة الضيف اتاريهو بتاع تمباك(صعوط) والساعة الرفع الملاية دي فووق وقال كدي جدع ليك فيني السفة ..بالله لما وشي بقي ابيض بي اسود ..وكنت طبعآ فاتحة خشمي اتنفس بيهو عشان ما اعمل صوت.. النخرة عشان بتشخر..اها في حبة صعوط بعد طقش نخرتي انحدر لداخل الخشم وديك كانت اول مرة اسف😂😷
اها..
# يتبع
اها الزول دة النوع العندو متلازمة عدم الثبات السريري 😂 بالله يتقلب ويفرفر ..وانا منبطحة بي تحت وكرعي نملن بس الحمد لله لي خير بقيت ماحاسة بقريص الاخوات ديك
اها اظنو علي حس انو جهز شعورو للخدرة المفروكة بقي يجهز في محل الطربيزة وقاال كدي دخل جزماتو لزاهم تحت السرير ..واااااي لكن
بلااعة لاا
فار ميت لاا
كجييك لاا
تصريف صحي لاا
دة شنووو 😐😐😷😷

المووهم اخلطو كل الروائح المزكورة اعلاه😂 يلا دي كانت ريحة جزمتو
اها بقينا انا والجزمتين نعاين لي بعض ونشم في بعض بي تحت
#يتبع
وراسي دااش وبقيت شايفة طشااش والله يستر من الطرااش😂
اها جا اخوي جاب الصينية وانا من قام قعد عشان ياكل(..ياكل الاكلتو سعاد حماها المشي والقعاد اب سفة )..طوالي بقيت في وضع السجود عشان اريح جسمي شويية
اها بقيت في هم انو بعد الخدرة دي اكييد ح يكون ماشي الحمام وح يدنقر يشيل جزمتو ام صناح دي😂
#يتبع
اها بعد اكلو جات امي سلمت عليهو والونسة جررت وانا في وضع السجود داك وبقيت آخد لي دعوات كمان
يا الله يمرق برة
يا الله يمشي
وقريت ليهو اشتاتآ اشتاتآ
وتاني فترتا اتمديت طوييلة رقدتا وهم في الشايات والجبنااات ..والنملتين شكلهن اتصالحن جن قعدن في بطني لقوها سااقطة من عرق الكتمة اتخيلوها نجيلة ولعبو سك سك وانا مافي طريقة انفض طبعآ😢
بس امي مشت وقال لي اخوي داير المصلاية ..انا دي فرحت فررح..لكن اتزكرت حيلبس جزمتو بقيت اررجف ..لكن اخوي الظريف طوالي اداهو سفنجة شايفاو بي تحت لبسها وقال ليهو شكرااان
اها بس مرق كدة وانا طواالي مرقت راسي اكوس في الهواء المافيهو ريحة جزمة ...بس اسمع ليك زولكم جا يحنحن بس طواالي دخلتا راسي راجع
دة اتوضأ متيين اسي
حمام مافي شكيتك علي الله
#يتبع
اها ما المشكلة هنا المشكلة اليوم داك انا كنت فاطرة بدرريي وجعت جووعة والبطن اشتغلت تكوورك ولييكم تتخيلو الأصوات 😂😂😂
مسكت بطني عصرتها شديييد عشان تسكت وقالت كدي بطني صرخت من الجوع وييييو .جياااو ..وهو كان وطي التلفزيون عشان يصلي ..وقاعد في المصلاية بس بقيت عارفااهو ح يكون بعاين بي تحت زحفتا مشيت اتلصقتا في الحيطة ..والبطن شغاالة
واااي
واااي 😂
# يتبع
اها بعد صلي بقو يتونسو هو واخوي مسااافة كدة وعندنا كديسة بتريدني شدييد اظن جابتا ريحة الجزمة وجاتني ليك بي تحت وياحليلها اظنها قايلاني ميتة شافتني مابتحرك كدة
وبقت تكورك
نااااااو
نااااو
وتاني تجيني جنب وشي تشمني وتقول ناااااااااااو ..بس برااحة خمشتها من ضنبا عشان تمشي المابتتسوك قرفتني😂 والساعة القالت نعااااااااااو والزها وتجيني تاني بس اخوي بقي يقول ليها بس
بس
بس
يلا براا
الله ينعلك يا الماعندك عشرة ..تاني كان اديك لبن انا يا ام وش اصبري لي بس😂
اها لي اسي مستوورة
بس اسمعو ليك قال لي اخوي اهااا بعد كدااا استأذن انا عشان لاحق المشوار الكلمتك بيهو قبيل
اخوي قال ليهو ياخ والله لو ما موضوعك دة كنا مسكناك
طبعآ انا بي تحت حسيت بي انو ضربني هواء باارد وبقيت اتبسم براي من الفرح
بس يافرحة ماتمتش اتزكرتا موضوع جزمتو الجنبي دي...وقبل ما اتخلع

.ازيكم ❤
عايزة احكي ليكم قصتي اسمي تماضر عبدالله بكري متزوجة و عندي 3بنات و ولدين ساكنة في الحتانة .
اهلي ساكنين الحاج يوسف الردمية امي شغاله عامله في مدرسه اساس و ابوي كان نجار الله يرحمو و اخواتي متزوجات و عندي اخو واحد اصغر واحد فينا ترتيبنا كالاتي : تماضر ، هاجر ، ايمان ، خولة ، اخوي بكري دا اصغر واحد فينا .
عايزة احكي ليكم قصة حياتي و كيف انا اتحرمت من امي و ابوي و اخواني و اهلي لمده 24سنه و اخبارم انقطعت مني و افتكروني إتوفيت و عملو لي بكاء و فرشو علي و لغايه ما ربنا سهل لي و لقيتم تاني.
خالتي كانت ساكنة في السجانه كان عندها طهور ولدا ، مشينا انا و هاجر اختي مع امي باقي اخواني لسه ما اتولدو الزمن داك .
ركبنا يوم الخميس مع انا و امي ربنا يديها الصحه و العافيه و هاجر اختي و مشينا ناس خالتي قبل الطهور ب يوم.
رقدنا نمنا و تاني يوم الصباح كان واقع يوم الجمعة يعني يوم الكرامة زاتا بتاعت الطهور ، بتذكر خالتي نادتني قالت لي تعالي يا تماضر امشي الاوضه التانيه بتلقي الصحان قاعدات تحت في الفضيه جيبيهن مشيت الاوضة عشان اجيب الصحان لقيتم كتار قلت خلاص بشيلم كلهم عشان ما اجي مرتين و ارجع و بعد ما شلتهم فجاءة وقعو من يدي في البلاط و اتكسرو، خالتي جاتني بالشباك قالت لي دا شنو السويتيهو دا الليله بكتلك اصبري لي لمن اجيك بالدرب بس بقيت خايفه شديد و قلت معناها ما ح تخليني و حتدقني بس طلعت سريع من الغرفة و جريت ب الزقاق البدخلني علي صالون الرجال و منو طلعت الشارع و بقيت جاريه و خايفه و ما عارفه انا ماشه وين بس فجاءة لقيت روحي في السوق الشعبي بتاع الخرطوم و لقيت الباصات السفريه البسافرن الاقاليم و كنت لابسه لبسه سمحه و ركبت الباص و بقيت قاعدة مع الناس ، فجاءة واحدة من الناس الراكبين في الباص سالتني قالت لي .....
#يتبع
القصة طويله و انا بكتب قدر الحاجة البقدرني عليها رب العالمين ، لكن بكره بحاول بقدر الامكان اختصرا ليكم مع اني عايزة احكي ليكم بالتفصيل و ما عايزة افوت عليكم جزء من القصه
.المرة قالت لي يا بت انتي ماشه وين ، قلت ليها معاي امي راكبه ب قدام عشان حامل تاني ما اتكلمت معاي الباص اتحرك و بقي ماشي مسافه بتاعت قريب ال3ساعات و انا ما عارفه هو ماشي وين بالضبط ، في الفترة دي في ناس كانو بنزلو في محطات معينه المهم اخر محطة و الباص وصل اكتشفت اني وصلت مدني .
لمن نزلت مع باقي الناس بقيت لافه ساي في السوق ل قريب العصر او المغرب و كنت جيعانه لقيت لي مطعم كلو رجال مشيت ل سيد المطعم قلت ليهو انا جيعانه قال لي انت اهلك وين بقيت ساكته ساي ما قادرة انطق و خايفه لمن حس اني خايفه طوالي قام جاب لي كرسي و قعدني و جاب لي فول و الله لغايه اسي متذكراهو و قال لي اكلي و اشبعي و ما بتجيك عوجة .
بعد اكلت جاني كم واحد كدة بقو يسالو فيني اسمك منو و جايه من وين و انا ابيت اتكلم معاهم . طوالي واحد منهم قال البت دي اهلا بكون فتحو بلاغ ب اسما احسن تودوها القسم ، طوالي ركبوني في عربيه و ودوني القسم . لمن وصلت القسم فجاءة بقيت قاعدة ابكي ، الجماعه حكو ل ناس القسم الحاصل بي و قالو خلاص يقابلو بيها الضابط المناوب ، لمن ودوني للضابط مشي جاب لي حلاوة و بارد و قال لي ما تخافي و بترجعي ل امك و اهلك .
المهم سالني اسمك منو و ساكنه وين و جايه من وين ما لقي مني اجابات ، في واحدة شرطية كانت شغاله معاهم في القسم زاتو بتاع مدني و بيتا قريب شديد من القسم رسلو عسكري مشي جابا عشان يخلوني امشي ابيت معاها في بيتا لغايه ما الواطه تصبح و يشوفو البحصل شنو لمن جات لقيتا ليك مرة تخوف و شكلها شين خفت منها خوف شديد و بقيت ارجف لمن قعدت ابكي عاينت لي كدة قالت لي انطمي و اسكتي و انا بقيت زايدة زيادة في البكا قالت لي و الله ما تسكتي الا اقرصك في وركك لمن يجيب الدم . قام الضابط القبيل جاني تاني قال حتمشي مع الزوله دي و الصباح بتجيبك معاها انا قلت ليهو ما عايزة امشي معاها خليني معاك هنا قال لي انا ورديتي انتهت لكن و جاب لي مويه قال لي غسلي وشك قلت ليهو سوقني معاك ما تخليني مع المرة دي ، قال للشرطيه خلاص انتي ارجعي بيتك و البت دي بسوقا معاي للصباح ما بخليها في القسم تبيت براها مع العساكر ، و طوالي ركبنا العربيه بتاعت الشرطه و ركبني معاهو و انا نمت في العربيه عشان كنت تعبانه و مرهقه و مشينا مسافه حتي وصلنا بيتم .
لمن وصلنا ما صحاني شالني و دخلني جوة البيت و نمته للصباح و لا حاسه ب روحي ، لمن صحيت الصباح لقيت البيت ما شاء الله فيهو مرة كدة كبيرة اكبر من امي و تاني معاها راجل طلعو ديل ابو الضابط و امو .
امو قالت لي امشي الحمام اتسوكي و بولي و تعالي اشربي الشاي معانا ، مشيت الحمام و جيت جابو لي شاي لبن في كبايه كبيرة ب خبيز و ابو الضابط بقي يتونس و يلعب معاي "ضباح كسرة ب ملاح دي العجيله ...." و انا اضحك و اتبسطت معاهم .
الضابط الامس جاء الصباح سلم علي امو و ابوهو و قال لي ازيك سلمت علي

هو و بقيت اتونس معاهو ، قال لي انت جايه من وين قلت ليهو و الله ما عارفه بس ركبت الباص و نزلني في السوق قال لي اسمك منو قلت ليهو اسمي تماضر ، قال لي خلاص انتي خليك مع امي و ابوي هنا و انا ماشي الشغل لو زول جا قال عندو بت ضايعه بجي اسوقك قلت ليهو حاضر .
ابو الضابط قال لي مع السلامه انا ماشي السوق بقينا انا و ام الضابط قلت ليها انت اسمك منو قالت لي انا عزيزة و راجلي دا اسمو الصادق و ولدي الضابط دا اسمو علاءالدين . الباب بتاع الشارع دق قالت لي اجري افتحي الباب لمن مشيت فتحت الباب جات واحدة داخله سلمت علي قالت لي انتي منو قلت ليها انا تماضر خشت جوة سلمت علي امها طلعت دي اخت الضابط شغاله في المستشفي ممرضه و كانت بايته جات الصباح اسمها رحاب ، سالت امها مني و ورتا قصتي ، قامت امي عزيزة قالت لي ارح نمشي التكل عشان اعوس كسرة الغداء لانو ماشه لي دستور و بسوقك معاي طوالي .
لمن مشيت معاها بقيت الز ليها في الحطب و اتونس معاها و انتهينا من العواسه قالت لي عندنا بت اختي قدرك اسما حنان بمشي اجيب ليك منها لبسه و بجي انتي اقعدي اكلي الكسترد دا ، لمن مشت و جات قالت لي تعالي النحميك و البسي الهدوم دي عشان نمشي الدستور قبل يبدأ.
لمن مشيت الحمام و بقت تحمم فيني قالت لي انتي ما مطهرة لييه ، قلت ليها ما عارفه .
مشيت لبست اللبسه الجابوها لي من البت و مسحتني و سرحت لي شعري و ساقتني معاها ركبنا الكارو بتاعت الحصان و قعدتني جمبها و وصلنا محل الدستور ، قعدنا قريب 4ساعات و تاني رجعنا البيت امي عزيزة رقدت نامت و لقيت رحاب بقيت اتونس معاها قلت ليها انت عندك اخوان تاني قالت لي عندي اختين معرسات واحدة في اربجي و التانيه في بورتسودان و عندي 3 اخوان علاء الدين دا اصغر واحد و في حذيفة دا في نيالا و حسن ساكن براهو معاهو مرتو و بتو .
ابوي الصادق جا من السوق جاب لي معاهو فول و تسالي و قعدت اكل و مبسوطه معاهم و بالليل جا علاءالدين امي عزيزة سالتو ما لقيت خبر عن اهل البت دي قال ليها و الله ماف اي خبر .
قعدت معاهم قريب ال7شهور اتعودو علي و اتعودت عليهم و بقو اهلي و بقيت بتهم و يشهد الله ما قصرو معاي في حاجة .
في الحاج يوسف اهلي ما خلو مكان ما فتشوهو المستشفيات و الاقسام و اي مكان و كل مرة يقولو ليهم في مكان يمشو يلقوني ما انا. في الكدرو طفحت جنازة في البحر ل بت في عمري و نفسي اوصافي و شالوها و سبحان الله نفس الفستان اللابساهو كان عندي زيو الفترة ديك كان طالع موضه بس قالو خلاص دي البت الرايحه و كلمو اهلي و قالو ليهم نحن دفناها عشان ما كانت بتستحمل تنتظر و كدة اهلي عملو لي بكا و الوحيدة و امي بس الكانت حاسه اني عايشه ما غرقت.
في مدني هنا انا بقيت واحدة من ناس البيت و حبه حبه بديت انسي اهلي الحقيقيين حتي اسم امي و ابوي نسيتو عشان كنت صغيرة و بدو يتلاشو من ذاكرتي الا بس كسرت الصحن و ركوبي في الباص ما نسيتم .
جات المدرسه و دخلوني المدرسه ساقتني امي عزيزة السوق اشترت لي الشنطة و الكراسات و بقيت اقول ليها امي و ل ابوي الصادق بناديهو ابوي.
و دخلوني المدرسه وقريت و في المدرسه بسالو من اسم الامهات بقول ليهم اسم امي عزيزة و حتي في الكراس بكتب تماضر الصادق عطا.
لمن جات الاجازة بتاعت العيد بتاعت رمضان جات خنساء المن بورتسودان و اول مرة اشوفا و يوم الوقفه جا حذيفة من نيالا و كلهم اول مرة اشوفم بس بسمع بيهم و والله عاملوني كاني اختهم الصغيرة.
قامت امي قالت لي انا دايرة اطهرك في الاجازة ، لمن جات الاجازة عملو لي دعوة عديل و حننوني و النسوان فرحانات و يزغردن لي .
بعد الطهور بقن النسوان يدوني في القروش و انا فرحانه و مبسوطه و بقيت معاهم علي الحال دا قريب ال19سنه ، رحاب اتزوجت و حذيفه اتزوج و علاء الدين اتزوج و الحمدلله اسي ب اولادم و بناتم .
انا قريت لغايه المتوسطه و الثانوي و ما قريت جامعة .
#يتبع
معليش يدي وجعتني و الله بعدين بوريكم الصدفة الخلتني وصلت ل اهلي الحقيقين .

...مرة جاتنا رحاب اختي و قالت لي يوم الاحد نمشي " العزيبة " عشان نعزي جارتنا امها ماتت العزيبة دي قريه جمب رفاعة و لازم نقطع بالمعدية او البنطون الزمن دا ماف كبري .
يوم الاحد مشيت ل رحاب في بيتا في الدرجة و طلعنا سافرنا لمن وصلنا الحصاحيصا و بقينا منتظرين عشان البنطون في الجهة التانيه .
في اثناء نحن منتظرين في واحد جأ و سلم علينا قال لي ازيك يا إيمان !!!
قلت ليهو شكلك مشبهني ساي يا اخوي انا اسمي تماضر ما اسمي ايمان ، قال لي انت ما ساكنه في الحاج يوسف ؟! قلت ليهو لا لا انا ساكنه في مدني قال لي سبحان الله في واحده تشبهك شبه الخالق الناطق انتي بس فولة و اتقسمت نصين . قلت ليهو بقولو الما لقي شبهو الله قبحو ، قال لي صدقتي و لمن عرفنا قاطعين الشرق ب هناك حلف الا نركب معاهو و الايلم ديك بتذكر ايام نميري كان في ازمة بنزين ، قمنا ركبنا معاهو و في الشارع قال لينا انا من تمبول و عندي محل كلف في سعد قشرة و وصف

حكاية بالعامية السودانية

#قروي_بهرته_اضواء_المدينة

✏ تاليف احمد صلاح سوان

▪الحلقة الأولى1⃣

#البندر

هارون بعد ماجا من زراعتو في العصرية لقا صاحبو يحي بستف ملابسو عشان صباح باكر يركب اللوري للمدينة وبعداك يركب القطر للمدينة الكبيرة(البندر)
هارون جدع طوريتو والقرجة بفزع وسأل يحي وهو مندهش قال يا يحي يا اخوي ماشي وين وبتلم في هديماتك كدي؟
يحي بعد اتافف قال لهارون انا ماشي البندر
ماشي لاولاد الحلة الشغالين هناك. ناس حسن ود ريسة ، وخالد آب جاكومة ، وكوكو الاغبش ، الشباب الكرهو قعاد الحلة دي وفاتو البندر
والله ياهارون انا كرهت حاجة بقولو ليها زراعة وسرحة بالبهائم ، داير اشوف المدينة بدل ما نعاين ليها في تلفزيون دكان حاج عبدالله الاريلو مكسور وبجيب الصورة ابيض واسود
ياخ داير اشوف ناس البندر ديل هم غبش زينا كدي والوانهم اسود وابيض زي مافي التلفزيون ؟
داير اقرأ في مدارسهم البناياتا كبيرة ذي مخازن العيش ما زي مدارس القش والقصب والعويش حقتنا دي
داير اركب الطوطحانيات الكبيرة البقولو عليها سايقة دي (ساقية)
هارون قال ليحي والله يا اخوي الما في بيت ابوك بخلعك بس كدي قول لي اها وزولتك فطومة بت النور الجزار راضية بسفرك دا؟
يحي قال ياخ سيبك منها انا لو مشيت البندر بلقا واحدة مغزية وشاربة ببسي قالو النصيبة دي بتنفخ البنات وبتخليهن ناعمات ومملسات ذي بطيخ الروسمن ، مش زي بنات الحلة هنا الباكلن عصيدة الدخن بملاح الويكة واللوبة عاملات ذي التبش الداقاهو شمس .
هارون عاين ليحي باشمئزاز كدا وقال تمر بلدنا ولا بلح الشام ، لكين يا اخوي امشي الله معاك ويعدلا عليك ، بس عليك الله خلي تورك في حواشتي مع بقراتي يحرسن ويعشرهن انت عارف زريبتي مافيها تور غير العجل الياداب برضع دا،
يحي قال خلاص ابيعو ليك، المثل بقول اكلو اخوان واتحاسبو تجار ... هارون قال ليهو ياىاخوي انا كن عندي مابقصر وبديك حق السفر سااااي كدي لله... ... لكين ما مشكلة اسي بمشي ابيع غنماياتي وكم كيلة عيش واردب فول واجي اشترى التور .....
في باقي الليل داك هارون باع حاجاتو وجا اشترى تور يحي ، والصباح يحي ركب اللوري وسافر ولسان حالو بقول جيناك يا البندر والشوق دفرنا.
وهارون ركب حمارتو وساق بقراتو وفرحان بالتور في نص البقرات بغني ساي

عيال احمد ماتو عشرة
تحت الشجرة
توري فحل بقري
طقيتو في قرنو
قرنو بكب الدم
كلب كافر مابنجم
اولاد العم قسمو الهم.
#يتبع ⏪⏪

حكاية بالعامية السودانية.

#قروي_بهرته_أضواء_المدينة

تأليف : احمد صلاح سوان
الحلقة التالتة
#الكفتريا
في الصباح كل واحد فات محل شغلو وخلو يحى براهو في بيت العزابة قالو ليهو الليلة زبط لينا حلة كاااربة واخد راحتك وبعد بكرة نشوفو ليك طريقة شغل. .... كوكو الاغبش قال ليحى عليك الله اظبط لينا حلة زي ايام زمان لامن نكون في الزراعة ، يدك طااااعمة خلاص يا اخوي في الاكل يحى قال خلاص كويس أبشروا..... تجو تلقوني عملت ليكم ملاح بامية سمحة جبتها معاي من البلد من زراعة هارون ،ّ
مع المغربية جو راجعين ولقو يحي ظبط حلة البامية ، بعد صلاة العشا ختو الاكل واي واحد بشكر في يحى ويقول يا سلاااام ياخ امانة ما ملاح وعصيدة العيش مااااكنة تسند البطن ، والله خالد أب جاكومة قال والله دي دايرة ليها شاي صاموتي كافر مشى شدة براد الشاي وجا يحصل قيم الضمنة ، وأثناء الونسة حسن ود ريسة قال ليحي يازول باكر تمشي تنزل شغل في كافتريا الجامعة االشغال فيها انا ، كلمت ليك سيدا ، بس ما تشرط عينا ، يحى قال ابشر يا زول حررررم بشرفك انت بس سلمني الشغل و خلي لي باقي الكلام....
والصباح بدري طلع يحي مع ود ريسة واستلم شغلو بالكفتريا اللي هو جرسون بترابيز الكفتريا ، ده انسب شغل ليهو بالكفتريا كقروي، مستحيل يقدر يمسك شغل الطباخ ، مهما كانت ايدو طاعمة في الطبيخ ، لانو اكل البندر ما زي القرية ولا هو حلة جنقو .
بنهاية اليوم جا ود ريسة طلع مع يحي رجعو بيت العزابة عشان يحى جديد بالمدينة وخايف عليهو يروح ، رجعو البيت زي اي يوم ما بختلف الروتين كتير ، اتعشو وعملوا واجباتهم وقعدو يلعبو ضمنة ، يحي ختة سفة تمباك ورقد يستعد للنوم ، بس قبل ينوم بدا يسرح في جو الشغل والطلاب الطالبات الجميلات المنعمات المسرفات في ادوات التجميل ، طبعا يحى ما بعرف في ادوات تجميل النسوان غير الودك والدلكة وزيت الكركار .
#يتبع

حكاية بالعامية السودانية...
#قروي_بهرته_أضواء_المدينة

الحلقة الرابعة
#فضفضة

يحى قضىى الأسبوع الأول بالشغل وكان كل يوم بنبهر بمظاهر المدينة الظاهرة في طريقة لبس طلاب الجامعة واسلوبهم في التعامل .
في الشهر التاني اتقرب يحى لزميلو بشتغل معاهو في الكفتريا مهدي ود الحاجة. شاب ظريف وملحلح طول بالشغل في كفتريا الجامعة ، ، يحي جا الصباح وبنضف الكفتريا مع ود الحاجة وبرتبو اساس الكفتريا عشان يبدو يوم جديد ، وأثناء شغلهم بتونسو ، ود الحاجة قال ليحي شايفك من ما جيت تبحلق ساااااي في البنيات الداخلات ومارقات ، خبارك يا زول ما عندكم نسوان في حلتكم ،
يحى قال ليهو عاد زي ما قال لي هارون الما في بيت ابوك بخلعك .
ود الحاجة سأل هاروون ده منو يا يحى ....؟
يحى اخد تنهيدة واتذكر البلد وقرن حواجبو بحنين وقال هارون ده زولا كلس خلاص وكااارب ، صحبي شديد وأخو إخوان في الحلة هناك ، ما بتعرفو انت لأنك ما من حلتنا ، هارون ده انا بعت ليهو توري عشان اركب اجي البندر .
ود الحاجة قال الترابة في خشمك ، في زول عااااقل كده ببيع بهيامو ويجي البلد الخربانة دي غايتو اتلومت يا اخوي يا يحى ، انا لو كان عندي ديك ساي املكو حقي انا ما كان جيت البندر ،إلا ابوي راجل فقيييير وورثنا الفقر مات وخلا لينا عنقريب رجلو مكسورة وامو العجوزة اللي هي حبوبتي ومرتو الكرهتني العيشة ، قمت شردت وجيت البندر ، اخخخخ يا يحى قلبت علي المواجع.
يحى قال لود الحاجة يازول ما ترمي بلاك علي اسي انا قلت ليك اتذكر ولا احكي لي ما برااااك البديت.
ضحكو الاتنين سوا ، ضحكوا والايد في الجرح ضحكوا والوش منطرح ......... #يتبع

حكاية بالعامية السودانية
#قروي_بهرته_أضواء_المدينة

تاليف: احمد صلاح سوان

+ الحلقة الخامسة. +

#التلاتة_بنات
بدا الدوام عادي زي اي يوم طلبات سندوشات وعصائر وطلاب موزعين على ترابيز الكفتريا ، يحي وو د الحاجة بلمو الاكياس وينضفو بواقي الاكل .
جو تلات بنات داخلات الكفتريا ، فجاة الناس صنو ، وهدوء مفاجئ عمى المكان ، يحى انتبه للحاجة دي ، وطوالي سال ود الحاجة منو ديل البنيات السمحات الدخلن ديل ، أول مرة اشوفهن ، قال ليهو التلاتة بنات ديل صحبات وما بتفارقن بقولو عليهن البلابل ، يحى نططت عيونو وقال عليك الله ياهن البلابل البغنن عشة صغيرة كفاية علينا وبغنن نحنا فرشنا السكة ورود...؟
قاليهو هوي هوي يا الغبيان ديل ما هن بس سموهن عليهن ساي عشان بمشن سوا وما بتفارقن كتير ، المهم الطرف ديك القصيرونة دي منال ساكنة بالداخيلة واهلا في الاقاليم بيقولو ليها خمس سنين بتقرا في تانية جامعة بليييدة ولطخة ساي ، والتانية دي نعمات الفكي مافي زول عارف عنها شي غير انها تاجرة قدر ظروفك لاي حاجة تخطر ببالك زولة شيطانة خلاص بس طيييبة ، واما البنية النجفة الاخيرة دي اسما غادة محمد ابوها محمد الكردي طبيب عايش في النمسا مع امها بدرية جرجس امها اصولا قبطية وهي ناشطة في حقوق الإنسان شغالة بمنظمة في النمسا ، غادة محمد بت زوات مدللة كل طلباتا مجابة، لو طلبت لبن العصفور بجبوهو ليها ، بتقرا في السنة التانية بالجامعة .
يحى اندهش للباك راون الاداهو ليهو ود الحاجة ، قال ليهو انت ما دام عارفن كدا كويييس ياخ ما تلم ليك في واحدة وتعرسا ، ود الحاجة ضحك وقال يا اخوي ديل ما توبنا ولا بعاينن لينا وزي ما قالو جربان بياكل بعينو ،البنات اكلن سندوتشاتهن سريع سريع وفاتن على المحاضرة ، ود الحاجة قال ليحى ارح ارح نلم باقي حاجاتن الاكلوها دي ... ، مشو مسحو التربيزة ود الحاجة شال النفايات وداها وخلا يحى بمسح التربيزة ولما يحى بمسح شاف حاجة بتلمع تحت التربيزة ، دنقر رفعا لقاهو حلق دهب رفعو وقال هلا هلا يا الدهب المجمر الفي الضلمة بريقو شالو ختاهو بحيبو ......
يحى بقا اليوم كلو شغال وسرحان في البنيات التلاتة واجسامن المليانة ، وجضومن المنتفخات وفيهن البدرة وخافي العيوب تقول زلابية بسكر مسحون ، اليوم انتهى يحى رجع بيت العزابة وكغير العادة بقا سااااكت وسرحان
كوكو الاغبش جاهو وسالو مالك يا يحى الليلة ما عوايدك سااااكت التقول ضاربك شيطان ، يحي قال ليهو ...
ﺍﻟﺘﻼﺗﻪ ﺑﻨﺎﺕ ﻻﺑﺎﺳﺎﺕ ﺗﻴﺎﺏ ﻭﻣﻘﻨﻌﺎﺕ
ﻭﺍﺍﺍﺍ ﻋﺰﺍﺑﻲ ﺍﻟﻠﻴﻠﻪ
ﺷﻐﻠﻦ ﻗﻠﺒﻲ ﻟﻤﻦ ﺑﺎﺹ ﺍﻟﺮﻭﺻﻴﺮﺹ ﻓﺎﺕ
ﺍﻻﻭﻟﻰ ﻃﺎﻟﻌﻪ ﺯﻱ ﺍﻟﻨﻬﺎﺭ
ﻭﺍﻟﺘﺎﻧﻴﻪ ﺑﻲ ﻟﻮﻥ ﺍﻟﺼﻔﺎﺭ
ﻭﺍﻟﺘﺎﻟﺘﻪ ﺑﻲ ﻟﻮﻥ ﺍﻟﺨﺪﺍﺭ
ﺣﻠﻮﺍﺕ ﺭﻣﻮﺷﻦ ﻳﺠﺮﺣﻦ
ﻭﻓﻲ ﻗﻠﺒﻲ ﺍﻣﺴﻦ ﻭﺍﺻﺒﺤﻦ
ﻭﺍﺍﺍ ﻋﺰﺍﺑﻲ ﺍﻧﺎ ﺍﻟﻠﻴﻠﻪ .
كوكو الاغبش ضحك بأعلى صوت لامن بقية العزابة البلعبو الضمنة لاحظو قالو ليهو ضحكنا معاك يا الاغبش ، قال ليهم صاحبكم شاف بنيات البندر المملسات ومنعمات ومخو اتلحس بقا بهضرب بيهن ، الجماعة ضحكو ضحكة جماعية لامن يحى انزعج منها وقال لي كوكو اصلك زول فضيحة من ما قمتة الله ياخدك ياخ ، يحى دردم سفة تمباك ختاها رقد نام .
#يتبع

حكاية بالعامية السودانية

#قروي_بهرته_اضواء_المدينة

✏تاليف: احمد صلاح سوان

. الحلقة السادسة
"بياض نية"

الصباح قام بدري شديد لقا خالد ابجاكومة قاعد في مصلايتو بعد صلى الصبح ماسك سبحتو بيقول في اوراد الطريق ... لا اله إلا الله والله اكبر وسبحان الله ، يحى صبح عليهو وقال ليهو الله يقبل ، شيخ خالد قال امين يارب ، قال ليحي الليلة مالك طالع دغش كدة ...؟ قال والله ياشيخ خالد ضحك الجماعة فيني امس ده ما دايرو يحصل مع الصباح ويعكر مزاجي مابنتظر حسن ود ريسة امشي معاهو سوا ، بقيت عارف درب المشية والرجعة ، واصلا بايت زعلان وما داير ود ريسة يتكلم معاي بالموضوع ويكمل سخرية امس فيني شيخ خالد قال ليحي تعال تعال اقعد في المصلاية جنبي اسمع كلامي وبعداك امشي ...يحي جا قعد ، شيخ خالد لمة سبحتو بعد ما مسح وشو وقال دعاهو ، قال شوف يا يحى يا اخوي اسمع نصيحتي دي ، البندر بلد لامة خلق الله القلوبهم وسخانة ونضيفة اعمل حسابك ، ما تغرك الدنيا بنعيما ما دايرك تبقا الفقران الخلعتو النعمة .... يحي سمع كلام شيخ خالد ومرق فات،
وصل كفتريا الجامعة وبدا دوام شغلو عادي ، لغايت ما جا زمن الفطور بقا مخلي بالو على الباب كل ما يجن بنات داخلات بعاين ليهن وتاني بواصل شغلو ، فجاة أثناء مراقبتو للباب جات غادة داخلة متالقة زي الصباح الشمس طالة ومشرقة زي وردة طلت بي عبيرا ورونقا ، يحي تقول صبت فيهو مطرة قلبو وقف وخشمو نشف وريق يا الله بلاهو ... ، غادة قعدت براها بنفس التربيزة الكانت فيها امس ، قعدت وسارحة بتداعب خصلة من شعرا المتدلية على وشها ، واخينا يحى متابع حركاتا وسكناتا ، قعدت وجسما مالي الحتة ويحي بقول في نفسو يا أرض احفظي ما عليك ، مشا عليها وقال ليها يا الاخت سلام عليك ، غادة رفعت عيونا شافتو لابس مريلة خضراء ملكعة ، ردت عليهو باسخفاف أهلا خير .. ؟ قال ليها معليش على الازعاج بس امس لقيت الحلق ده واقع تحت التربيزة دي لامن كنت بنضف بعد مشيتي مع صحباتك ، شوفيهو لو ده حقك او حق واحدة من البنات الكانن معاك ...؟ شالت الحلق وقالت ليهو شكرا ...!يحى العفو لا شكر على واجب فات واصل شغلو عادي وبقا ملاحظ ليها قاعدة بمكانا لا طلبت شي ولا جاها زول ....! بس مستمرة في مداعبة خصلة شعرا وسارحة ، بعد شوية جا شاب وجيه وانيق قعد جمبها بدون ما يسلم غادة ملامحا اتغيرت للأسوأ وظهر عليها الانزعاج ، وقبل مايسلم عليها الشاب بقت تتكلم بانفعال ... انا من الصباح منتظراك ياخ ليه اتاخرت علي ، الشاب سااااكت وهادئ كانو ما بتتكلم معاهو ، قال ليها اها شربتي حاجة ولا اكلتي ، قالت ليهو ما عايزة اتسمم ، اطفح انت براك ...قام من حتتو مشا جاب اتنين عصير برتقال اداها واحد قال اشربي العصير وروقي ، غادة شالت بقتين من العصير وقالت ليهو يلا اشرب عصيرك ده يا هشام وخلينا نمشي ... هنا يحى من متابعتو للحوار عرف اسم الشاب اسمو هشام بس ما عرف المشكلة شنو بينهم ، لسان حالو بيقول عليك الله دي بنية بزعلوها ، غادة وهشام طلعو من الكفتريا بس غادة من انشغالا نست الحلق تاني بالتربيزة...!
يحى جا رفع الحلق تاني و واصل يومو عادي وبعد الدوام رجع بيت العزابة ، رويتين بيت العزابة ما بختلف كتير كل الايام والصباحات والليالي شبه بعض ، ضمنة كوتشينة وفتة فول ، بس يحى بقا عندو عالمو المنبهر بيهو بقا بسرح كل مساء بعد يتعشا ويخت سفة التمباك لامن ينوم... !
⏪⏪ #يتبع

حكاية بالعامية السودانية

#قروي_بهرته_ضواء_المدينة

✏تاليف: احمد صلاح سوان

. الحلقة السابعة⏬
تاني يوم فات شغلو وبدا الدوام وكعادة يوم امس بقا مراقب الباب منتظر ست البنات تجي داخلة عشان يديها الحلق للمرة التانية ، بس اليوم توقعو خاب ، جات داخلة نعمات الفكي ومعاها امال ، يحى بدون ما يشعر جا عليهن وسالهن غادة وين الليلة ، البنات اي واحدة بقت تعاين للتانية باندهاش ، نعمات قالت ليهو يا زول قول بسم الله كدي وسلم قال ليهن السلام عليكم معليش بس قبل كم يوم جيتو هنا وفي حلق وقع منكن اديتو لغادة امس بس جاها وليد كدي طلعو وتاني نستو ، امال همست لنعمات بكون ده هشام الكريه ، خلاص خلاص يا اخينا جيبو نحنا بنديهو ليها ، اداهن الحلق وبقا راجع يواصل شغلو ، وهو ماشي نادتو نعمات سالتو انت اسمك منو .... ! قال ليها انا يحى قالت ليهو شكرا ليك يا يحى .
فات منهن وبقن يتسالن ، نعمات قالت الزول ده عرف اسما من وين ومالو مهتم كده ، امال قالت هو الزمن ده في زول بلقا ليهو حلق دهب ويرجعو يا اختي ديل ناس البلد غبيانين ساي ، نعمات بحركة غياظة قالت لامال طيب يعني انتي غبيانة مش برضو الجابك البندر زي ما بقول في البلد، جابتك القراية .... امال اتغاظت وقالت خلاص خلاص شوفي موضوع تاني عبيطة دي ، وهن قاعدات بتناقرن ويتناقرن جات داخلة غادة قعدت بدون ما تسلم نعمات قالت نحنا بايتين معاك شنو سلام الله كتير علينا ، غادة قالت يا نعمات عليك الله انا ما ناقصاك الفيني مكفيني ، امال حبت تلطف الجو قالت كدي سيبك من جو التعاسة العايشاهو ده ، وورينا حكاية حبيبك الجديد ده شنو ، غادة اندهشت وبتمتمة قالت حبيبي حبيبي منو الجديد، نعمات قالت ما قاصدين هشام الكريه بس قاصدين الجاب الحلق .
غادة.. حلق شنو وانتو بتتكلمن عن شنو بطلو لولوة ،امال طلعت الحلق من شنطة نعمات وادتو ليها ، وحكت ليها قصة يحي من ما جو قعدو لغايت ما جاهم وفات ، غادة قالت هو بالله البلد دي لسة فيها ناس رجال وامنين كده ، بعد ما فقدت الامل فيهم .
في قعدتهم ديك جا يحى ماري ماش ينضف تربيزة قاموا منها ناس ، طوالي نادت غادة يحى .. يا يحي يحي ، اخينا سمع اسمو وكانو نادهو بلبل، بالله الصوت زي رنة وتر الربابة ، أول مرة يحى اسمو يحلا ليهو . جاها وكلو حنية ، قلبو الخفيف برف وبغني اقابلك وكلي حنية واخاف من نظرتك ليا ..... يحى قرب ليها وقال نعم يا ست البنات ، قالت ليهو أنعم الله عليك ياخ . حابة اتشكرك على امانتك، امس مع الاستعجال واللخمة نسيت الحلق تاني بس ادني ليهو صحباتي ديل .... قال ليها العفو ياخ لا شكر على واجب ، وطوالي رجع واصل شغلو وهو مبسوط بكلام غادة ليهو ومسك الفوطة وبدندن بيقول .....
لابسة الطرحة وعاملة عطور
وشوفتك تجرح صيام الزول ،
المشاط في جبينك قايل قول
انتي فايتة المعاك في العرض والطول
زي فوتة المنقة للعجور .
دوام الشغل انتهى ، ود الحاجة قال ليهو الليلة تمشي تبيت معاي يا يحى قال ليهو جدا ماعندك مشكلة بس خلي اكلم حسن ود ريسة الشغال معانا هنا عشان اولاد الحلة العزابة الساكن معاهم مايقلقو ، مشا كلم حسن وطلع مع ود الحاجة.
#يتبع⏪⏪

حكاية بالعامية السودانية

#قروي_بهرته_اضواء_المدينة

تاليف✏: احمد صلاح سوان
الحلقة التامنة
¤ ضيافة ود الحاجة. ¤
ود الحاجة ساق يحى بيتو الساكن فيهو مع ود عمو الموظف ، وصلو بعد صلاة العشا هلكانين من ارهاق شغل النهار ومعافرة المواصلات ، ود الحاجة ساكن مع ود عمو بس بيتهم منفصل وود عمو موظف ومتزوج ...
ود الحاجة قال ليحي امشي اخد ليك حمام تمام واطلع لي ادخل وبعديها نمشو العشا ، بعد استحموا واخدو عشرة ونسة طلعو الاتنين على سوق الحلة ، ود الحاجة قال ليحى انت ضيفي الليلة وبعزك ، وفعلا عزاهو بعشوة ظريفة بمقياس البسطاء ، كوارع ضان وكمونية ، شربو موية باااردة بعديها يحى اترع وقال الحمدلله ، طلع كيس التمباك وكان فيهو اخر سفة ، نفض الكيس دردم سفة وختاها وجدع الكيس الفاضي ، ود الحاجة قال ليهو انت يازول لو ما خليت تمباكك ده حرم بنات البندر المفلهمات ديل ما بعاينن ليك ساي ، يحي قال ليهو يازول قول الله يهدينا بس ، ود الحاجة قال ليهو آمين ، شكلو تمباكك انتهى ورح في محل تمباك ظريف اخر السوق قالو لو ما فاطر ماتخاطر ، يحى قال يازول انا شبعاااان وبطني مستفة للحلق ، ضحكو ومشو اخر السوق ولما الليل قسم رجعو البيت ، اي واحد علق جلابيتو في مسمار ورقدو بسرايرهم الفي الحوش ، ود الحاجة قال ليحي خلينا نتونس اصلا بكرة الجمعة وماحنمشي الشغل ، قال ليهو ورانا شنو اي خلينا نتونس ساي ، اها يا يحي انت جيت البندر زي ما قلت لي اليوم داك وبعت تورك لهارون صاحبك ، بس ما قلت لي جيت البلد الكعبة دي لشنو ، يحي جدع السفة ومضمض خشمو وقال والله يا اخوي انا مرقت من البلد وجيت البندر قلت اتنور شوية بدل قاعد في حتة واحدة قلت اجرب الحياة برة الحلة امكن اتعلم لي حاجة تنفعني وكنت قاصد اقرا الا لقت قطر العلم فاتني والشغلانة بقت قاسية خلاص ، ود الحاجة قال ليهو انت قريت لغايت وين ، يحى قال نحنا ناس لوح ودواية ساي ، ياها قراية المسيد والخلاوي دي وزاتا ما كملتها ، من جزو عم رجعت الحلة وباريت الزراعة والبهايم والسرحة ، لو كان واصلت كان بقيت زي شيخ خالد اب جاوكومة ده ، ود الحاجة قال ليهو خالد اب جاكومة ده منو كمان ، يحى قال ده زول بركة ياخ زول الله ساي هو من اولاد حلتنا المعانا في بيت العزابة ، وكتو كلو بكون في مصلايتو وماسك سبحتو بقول اوراد الطريق ، ود الحاجة اتثائب وقال انا نعست والله بعد ده الننوم والصباح رباح ، يحى قال ليهو تصبح بخير ، طلع كيسو دردم سفة ورقد نام .
اصبحو الجمعة جا ود عم ود الحاجة الموظف بدق الباب صحا ود الحاجة والشمس كان ضارباهو مشا على الباب وبقش عيونو من النوم سلم على ود عمو وصبح ليهو لقاهو شايل صبارة الشاي ومعاها صحن زلابية ، شالهم ودخل لقا يحى صحا ودخل الحمام يتسوك ، شربو الشاي بعديها جا الموظف ود عم ود الحاجة شايل صينية الفطور المصلحة ختاها وسلم على يحي ، يوم الجمعة في بيت ود الحاجة انتهى مابين ضيافة فطور وشاي صباح وونسة مع ود عم ود الحاجة وتبادل اطراف الكلام عن مقارنة المدينة الكبيرة والحلة ، وصلاة الجمعة والسوق بالمساء..... يحى قضى يومين مع صاحبو والسبت نزلو الشغل بكفتريا الجامعة بروح طيبة ونفسيات متجددة .
⏪ #يتبع

👣حكاية بالعامية السودانية👣

#قروي_بهرته_أضواء_المدينة
✏تاليف: احمد صلاح سوان

الحلقة التاسعة
رجعة بيت العزابة
بدا الدوام بحماس بداية اسبوع نشاط وحيوية ونفسيات متجدده ، يحى كغير العادة بدون توهان وبدون مايسرح ويبحلق في الطلاب والطالبات المملسات ومنعمات الداخلين ومارقين زي نواب المجلس التشريعي ، قضى يحى يومو ، بنفس روتين العمل اليومي بس بحماس ونشاط ، ونهاية الدوام فات بيت العزابة ، قابلوهو العزابة وكانو غايب ليهو شهر ، بالليل يحى رقد في ناصية الحوش الخاتي فيها سريرو وبنصت لافكارو ويخت سفتو وينوم ، جاهو كوكو الاغبش وقال ليهو يحى ان شاء الله مانمت ، يحي قال لا لا صاحي بس مرخم خلاص ، كوكو قال يا يحي والله معليش انا اسف بالنسبة لليوم داك لما حكيت لي عن البنات الفي الجامعة وقمت ضحكت وباقي العزابة ضحكو، لامن اتعقدت انت، والله ما قصدي اجرحك ،بس جات عفوا ، اصلا نحنا في البندر بنفتش على الحاجة البتضحكنا ولو بالكذب فعليك الله ماتزعل مني ، يحى قال يازول امشي نوم وضميرك مرتاح انا الموضوع نسيتو والله بعد غيرت جو يومين بعيد من وشك الواحد ده ، وفتة الفول الفي طشت البلاستيك ، كوكو ضحك وقال اوع تقول البستحمن فيهو نسوان الحلة الوالدات ، يحى قال لا لا ما بقول ههههه يلا امشي امشي نوم يا كوكو والبينا عامرة .
اصبح وكالعادة كل واحد فات شغلو ، وكالعادة يرجعو نهاية اليوم عشا وكتشينة وضمنة ضحك وقرقرة .
يوم يحى بتونس مع ود الحاجة كالعادة وهم بمسحو ترابيز كفتريا الجامعة سالو ود الحاجة انت يا يحي اها الجامعة حتاجز الاسبوع الجاي لفترة شهر ونص حتسوي شنو في الفترة دي وحتشتغل ولا حتقعد ساي ?
يحى قال والله ما عارف بس بشوف لي اي شغلة أقضي بيها زمن لامن الجامعة تفتح ، قال ود الحاجة يازول كدي نشوفو لينا حاجة سوا ، قال خلاص سمح ،
أثناء ونستهم جات غادة داخالة سلمت عليهم ببشاشة ، سلاما نزل على يحي زي الموية الباردة في ريق صايم ، يحي جاب ليها موية وسالا كيف حالك قالت الحمدلله طيبة الا الامتحانات عزبتنا الايام دي غايتو الله يعديها وناجز قال ان شاء الله ، وبقا ماشي ، غادة نادتو جاها سالتو يا يحى انت في الاجازة حتشتغل وين قال ده نفس سؤال ود الحاجة لي اسي والله ما عارف بس بدبر لي حاجة ، غادة قالت خلاص لو ما عندك مانع انا ابوي مخلي لي مزرعة والراجل الشغال فيها قال داير يسافر اهلو تعال ابقا مسؤل منها فترة الاجازة لغايت ما اشوف لي زول امين ، قال ليها ابشري يازولة.
⏪⏪ #يتبع

حكاية بالعامية السودانية

قروي بهرته أضواء المدينة
✏تاليف: احمد صلاح سوان
"الحلقة العاشرة"
المزرعة السعيدة
ايام الامتحانات انتهت بالجامعة وفي اخر يوم جات غادة ساقت يحي بعربيتا وودتو المزرعة ، المزرعة قريبة من النيل في إحياء البندر الطرفية ، غادة عرفت يحي بعثمان الراجل المشرف على المزرعة ومسؤول منها ، عثمان قال ليحي خليك معاي يومين افهمك طريقة شغل المزرعة لغايت ما اسافر ، يحي قال خير يازول اصلا البهايم والزراعة دي حقتنا ، بس انتو ناس البندر عندكم شغلات تسووها ، تعرفوها براكم ، عثمان ضحك وقال يا اخوي العلم بجيه حتى البهايم اسي لو بهايم البلد بدل يسرحن في السهلة ساي وياكلن الاخضر واليابس ، بدل ده لو لموهن في مزرعة واكلوهن العلف المناسب واهتمو بيهن بنتجن حليب اكتر وبتكون فايدتن كبيرة ، مش زي انتاج البلد الحليب ما يملا جردل، هنا يا يحي البهيمة بتحلب ليها عشرين رطل ..... ! يحي نطط عيونو مندهش وقال ياخ معقول والله ماشاء الله .
يحي قعد اسبوع مع عثمان وفهم طريقة شغل المزرعة ، من علف بمواعيد وحليب بمواعيد وكميات معروفة حتى اتعلم الاسعافات الاولية البيطرية ، اصلو يحي زول مخو نضيف وبتعلم سريع .
يوم جمعة جات غادة الصبااااح ومعاها صحباتا وزملاء الدراسة جو عايزين يقيلو بالمزرعة ، يحي رحب بيهم ونضف ليهم المحل وضبح ليهم عتود صغير وكسرو , هم جو زي ستة منال ونعمات وهشام زيادة على غادة وبت وولد تاني و طباخ ، الناس اخدو راحتهم بالمزوعة وقيلو للعصرية ، اليوم قضوهو غنا ورقيص وهظار واستمتاع بجو المزرعة ، يحي بجي كل لحظة ويسال غادة اها دايرين حاجة ? غادة تقول ليهو لا لا تسلم يا يحي ، مع المغرب عملو قعدة ونادوا يحي يجي يقعد معاهم ، عملو دايرة وختو كرستالة عصير بلفوها كل مرة بتقيف في وش زول بيقول حاجة ، نكتة شعر، يغني ،المهم يقول ليهم حاجة .... لما جا دور يحي قال ليهم..
يا قاضي الغرام انا عندي ليك شكية
من قمرا دوام سارق منام عينية
هاك قلبي الدليل كسبني بيهو قضية.
#يتبع ⏪⏪

حكاية بالعامية السودانية
#قروي_بهرته_اضواء_المدينة

✏تاليف: احمد صلاح سوان
الحلقة 11
#قريفة
بعد المغرب غادة واصحابا لمو حاجاتهم وودعو يحي ركبو عربيتهم وفاتو وهم بيغنو في الطريق...

ﺭﻳﺤﺔ ﺍﻟﻄﻴﻦ ﻓﻲ ﺟﺮﻭﻓﻨﺎ
ﻭﺍﻟﺘﻤﻴﺮﺍﺕ ﺍﻟﺒﻬﺒﻦ ﺩﻳﻤﺔ ﺭﺍﻗﺼﺎﺕ ﻓﻲ ﺣﺮﻭﻓﻨﺎ
ﻭﺍﻟﺪﻋﺎﺵ ﻭﺍﻟﻐﻴﻢ ﺭﺯﺍﺯﺍً ﻓﻲ ﺍﻟﻌﺼﻴﺮ
ﺑﺎﻟﻔﺮﺡ ﺑﻠﻞ ﻛﺘﻮﻓﻨﺎ
ﺃﻧﺤﻨﺎ ﺭﺍﺟﻌﻴﻦ ﻓﻲ ﺍﻟﻤﻐﻴﺮﺏ
ﻟﻠﺪﻳﺎﺭ ﻣﺎ ﺣﺪ ﻳﺸﻮﻓﻨﺎ ﻻ ﻧﺸﻮﻓﻮ ﻻ ﻳﺸﻮﻓﻨﺎ
نحنا راجعين في المغيرب المغيرب في المغيرب.

يحى بهناك اتبسط ومبتسم للضرس الاخير ، نضف الحتة وختة للبهايم العلف ربط ناموسيتو و دردم سفة ورقد نام.
الصباح قام نشيط بنعنويات متجددة وشغال مبسوط ، نص النهار جاهو ود الحاجة اتسالمو وقعدو يتونسو في ضل شجرة البان بنص المزرعة وصوت البابور بشفط الموية من البير وتجري في الجداول والجروف تسقي العلف ، صوت البابور خفيف تقدقدقدقدقدقدقد واصوات طيور الدبرك البتمارس الحب على فروع شجر البان ، زيادة على صوت خرير الموية الجارية ، الأجواء دي اوحت ليحى انو يبوح لصحبو ود الحاجة بالمشاعر الماواضحةالبدت تتكون عندو تجاه غادة ، يحي بعد شفط اخر بقة شاي صاموطي عملو على نار الحطب وختة الكباية مسك كيس التمباك وبدا يدردم سفة قال انت عارف يا ود الحجة .... !
ختة السفة دقار وواصل، بعد ود الحجة اشر ليهو براسو انو منتبه ، انت عارف يا ود الحجة حكاية جربان ياكل بعينو دي بقت مياكلة معاي جنبة والله ، ود الحاجة قال كييف...?
يحي بصق وقال ياخ ما ممكن عمرنا كلو نقعد كدي دة ندفن راسنا في الرملة ونخاف من حاجة تربطنا بالناس العيشتهم سمحة ديل ، نحنا في النهاية بشر ، ود الحاجة قال يازول استغفر الله انت ماتحسد الناس في نعمة الله الاداها ليهم وحرمك منها ، دي حكم الكريم ياخ ...
يحى جدع السفة وصنقر على حيلو ورفع صوتو بنبرة حادة قال شوف الغبيان ده انت يازول ماك نصيح داير تطلعني حاقد وكافر ....? انت مافهمتني ... انا بقصد ليه الواحد فينا ما يفكر يرتبط ليهو بواحدة من البنيات السمحات ومنعمات ديل ليه نحنا معقدين الامور كدي ...?
ود الحاجة قال هااااا انت قصدك صراع الطبقات الاجتماعية ...
يحي نططت عيونو وقال انت يازول كلام الناس المتعلمين ده لميت فيهو وين .... ود الحاجة ابتسم وقال انت يازول ناسي انا شغال جرسون لي كم سنة بكفتريا الجامعة اكيد بكون لقطت لي كم كلمة وجملة من ونسة الشباب البتونسو بالكفتريا ، وزي ما بقول مثلنا كن ما متنا شقينا المقابر ، يحي ضحك وقال والله تاريك يا اب رويس ماك هين .... ضحكو الاتنين سوا ، ود الحاجة قال ليحي والله يا اخوي ونستك السمحة دي سرقتنا عصر ما صليتو لامن المغرب جا كدي خلينا نصلو المغرب ونطلع بعد ده ، يحي قال ليهو يلا يازول لكين يوم تجي تبيت معاي....
صلو العصر والمغرب سوا وبعديها يحي ملا جردل لبن اداهو لود الحاجة وقال ليهو ده وديهو لود عمك القاعد معاهو ولي اولادو وبالله سلم عليهو....
ود الحاجة شال الجردل ومشا قال ليحي الله يعينك على قعدة براك وماتفكر كتير يازول عشان ما تجن ، قالو عدم الموضوع بعلم المشاط في الصلعة هههههههه .
يحي قال ما تشيل همي الله معاي ... ود الحاجة ودعتك الله.

#يتبع⏪

#قروي_بهرته_اضواء_المدينة

✏تاليف: احمد صلاح سوان

الحلقة12

#الريدة 💕
يحي بعد اتعود على شغل المزرعة اللي رجعو لذكريات القرية ، وريحة الزراعة واصوات البهايم ، يحي بقا منسجم مع جو المزرعة وسعيد ، بفرح بجية غادة ليهو كل فترة ، وزيارات اولاد اهلو من بيت العزابة ناس شيخ خالد ابجاكومة وحسن ود ريسة وكوكو الاغبش والشلة حقتو ديك .....!
بعد شهرين ونص الجامعة فتحت وعثمان الكان شغال بالمزرعة جا راجع من سفرتو للبلد ، الموضوع بقا قاسي على يحي انو يسيب شغل المزرعة ويرجع لشغل الكفتريا ، قال في نفسو ما تبقا قطاع ارزاق يا يحي احسن ارجع شغلي واسلم عثمان مسؤلية المزرعة ، عثمان جا قال ليحي يا اخوي والله ما قصرت اهتميت بالمزوعة زي ما انا موجود وامكن احسن ، ياخ حتى العجال بقت حافظاك هههههه ، يحيى اتذكر كيف لما اتخلا عن تورو وباعو في البلد لصاحبو هارون وهارون ساقو وفرحان بغني توري فحل بقري
طقيتو في قرنو
قرنو بكب الدم
اولاد العم قسمو الهم ...
يحي بقا مستاء من مفارقتو للمزرعة، ابتسم ابتسامة يائسة ابتسامة مودع وقال لعثمان يازول ودعتك الله، لكين بجيك كل فترة والتانية ، عثمان قال ليهو اي لازم لازم ....
تاني يوم طوالي يحي نزل شغل الكفتريا
بدأ مع مهدي ود الحاجة ينضفو الترابيز من الغبار ويرتبو حال المكان عشان تاني يوم حيبدو شغل ، اليوم ده الطلاب ما نزلو كلهم ، اغلبية الجو هم ساكنين بالمدينة ،
أثناء ما يحي شغال جات غادة سلمت عليهو وهو كالعادة بفرح بيها ، رد السلام ، غادة قالت ليهو كدي خلي شغلك وتعال عايزاك في موضوع ، عاينت لود الحاجة قالت ليهو معليش حاخد منك يحي شوية ويرجع ليك ، ود الحاجة قال ما مشكلة يا ببتنا ، ان شاء الله خير ... ? لو عندك حاجة عايزة تنزليها من العربية ممكن اجي اساعد يحي.... غادة قالت ليهو لالا شكرا ليك تسلم ما بتقصر ، بس دي حاجة بسيطة.....
يحي طلع من الكفتريا وركب العربية مع غادة ... قال ليها خير إن شاء الله...? غادة قالت خير يا يحي ... واصلت قالت يا يحي انت زول طيب والله قال ليها شكرا ليك، قالت انا قلبي ارتاح ليك من البداية .... هنا قلب يحى قرب يقيف وريقو نشف ما قدر يعلق ، خلاها واصلت
غادة قالت ليحي هسي يا يحى لو قلت ليك عرسني رايك بيكون شنو .....!
اخينا أفكارو جاطت وقنب يتلفت شمال يمين ، رغم انو عينو من غادة وعاجباهو بس نهائي ما جاب سيرة الموضوع بينو وبين نفسو .... يحى بعد اخد سكتة كده من هول صدمة السؤال المباغت ، قال ليها يا بت الناس ما تعشميني بالحلق تخليني اقدقد اضاني ، انا زول مسكين وعلى باب الله وانتي قدرك عالي ما بتدلى ، لكين ... ! قاطعتو غادة قالت يعني كلامك ده ما بتدورني ...! قال ليها كيفن ما بدورك ياالدهب المجمر الفي الضلمة بريقو بدورك بالحيل .
قالت غادة خلاص يا يحى انا دايراك تعرسني وجادة ما تقول بهظر ، قال ليها كدي قولي بسم الله وريني انا الكحيان الرمدان الجاي من البلد فيني شنو بخليكي تعرسيني دون الوليدات زملانك والقدرك ومتعلمين .، غادة قالت ليهو يا يحى المال ما كل شي انا دايراك سند وانت امين وخدوم ، مش بنت الرسول شعيب قالت لابوها خير من استاجرت القوي الامين ، وفي النهاية مش اتزوجا سيدنا موسى ..
يلا يا يحى انت آمين وطيب وانا ما عندي زول هنا اهلي كلهم برا ، عايزاك تكون امين علي ...وعلى املاكي
قالت ليهو يلا فكر في الموضوع ويومين اديني ردك ....يحي نزل من العربية وغادة دورت وبسرعة بقت ماشة، يحي واقف مكانو وشايفا زي السراب .
#يتبع ⏪⏪

#قروي_بهرته_اضواء_المدينة

تاليف: احمد صلاح سوان
الحلقة13
#مدد
يحي اتحرك من محلو فات لي مهدي ود الحاجة ، ود الحاجة قال ليهو ان شاء الله خير البنية مالا....? يحي قال لا لا بس كانت عايزة تحاسبني حق شغلي بالمزرعة .... ! يحي سكت فترة و قال يا اخوي والله انا ما بقدر اكمل اليوم يا مهدي حاسي نفسي عيان شوية ، مهدي قال ليهو سلامتك يا زول ، والله ظاهر فيك المرض امشي امشي ارتاح ، اكل كويس ، فتة فول بيت العزابة دي لو باريتا والله تقع وقعة حيطة جالوص في الخريف ، فات يحى بيت العزابة اخد ليهو حمام ظريف وطلع سريرو في نص الحوش مع ضل العصرية وبيت العزابة فااااضي، كلهم في الشغل ما بجو الا بعد المغرب ، يحى لقاها فرصة وبدا يفكر بكلام غادة دردم ليهو سفة تمباك وختة راسو بالمخدة وفي حوار بينو ونفسو قال :قال هي بت الناس دي دايرة شنو غير السترة ، اكيد شافتني اني الراجل البحفظا ويصونا ، بغض النظر عن اني فقير وامي ... شن فايدة قريشاتا بدون راجل يسندا ، اكيد وليدات الجامعة الما تامين رجال ديل ما عجبوها .
وهو بفكر سمع كركبة في الباب قام فتح الباب لقاهو شيخ خالد ابجاكومة سلم عليهو ، قال مالك الليلة ان شاء الله خير جيت بدري يا يحى ، يحي قال والله شوية كده مرضان قلت اجي ارتاح . شيخ خالد قال ليهو سلامتك اخوي ، اها اسي كيف ، قال اخدت لي حمام وحاسي نفسي احسن ، شيخ خالد طلع جلابيتو والعراقي وشعقهم بمسمار ،قال خليني امشي اصلي واعمل اوراد الطريق واجي اكتب لي في اللوح واغسلو اديك محاية بتنفعك ، نحنا ماشيين بمشئة السر الالهي ، شيخ خالد زي ما قال ليحي مشا اتوضا وصلى وجاب ليهو المحاية قال ليهو قول بسم الله واشرب ان شاء الله اجر وعافية ، يحى شرب المحاية وقال لشيخ خالد انت زول فاهم والله وربنا اداك حكمة وخاتيك زي اخوي الكبير ، عشان كده عندي كلام داير اقولو ليك ، شيخ خالد قال ليهو احكي يا يايحي ان شاء الله خير يحى قال ليهو طبعا عارف غادة البت الاشتغلت في مزرعتا لامن الجامعة اجزت شيخ خالد قال اي اي بعرفا ، يحي حكى ليهو قصة غادة بتفاصيلا لغايت طلب غادة انو يعرسا ، شيخ خالد قال ليحي يا اخوي انا زي ما قلت ليك يوم داك البندر لامة خلق الله الكويسيين والكعبين ، بس انت استخير والبسوي الله كلو سمح ، انت جيت البندر تصلح حالك والله سخر ليك البنية ، اتذكر انو النبي اتزوج السيدة خديجة وعانتو بمالا ،،، يحى قاطع شيخ خالد وقام من سريرو واتنفض فرحان وقال ليهو الله يبارك فيك يا شيخنا ، يحي بقا ماشي علي المصلاية شيخ خالد قال ليهو ماشي وين ماكملت كلامي قال يحى ماشي استخير ... ابتسم شيخ خالد وقال ليهو اتوضا اول ، ما تبقا لفيف مستعجل زي طراش المريسة ، يحي قال الفقران بتخلعو النعمة يا شيخ خالد .
#يتبع

#قروي_بهرته_اضواء_المدينة

✏تاليف: احمد صلاح سوان
الحلقة14

#الشورى
يحي مشا اتوضا واستخار ، بعد المغرب بقية العزابة جو راجعين من اشغالهم وكالعادة عملوا الحاجات الروتينية ، عشا، ضمنة ،كتشينة ضحك وقرقرة ووو...الخ بس قبل اي زول يمشي سريرو ينوم يحي ناداهم ولماهم في الفرشة البصلو فيها صلاة جماعة ، كوكو الاغبش قال يا يحي خير الليلة لامينا مالك كدي الشمار كاتلنا ، ....! يحي قال ليهو اصبر ما تبقا شفقان .....
المهم يحي قال ليهم اسمعوني انا في موضوع داير الشورة فيهو وقبيل شاورت شيخ خالد بس كنتو مافشين انتو ,وزي ما بقول المثل بيت الشورى ما خرب، حسن ود ريسة قال يازول قول في شنو ...!
يحي قال ليهم غادة بدور تعرسني .....! حسن وكوكو عاينو لبعض وبصوت واحد قالو غادة منو.....?
يحي غادة بت الجامعة ست المزرعة ، اها الراي شنو..?
كوكو قال والله يا اخوي الراجل ما زي المرا انت عرسا كن نفعت معاك يبقا خير وبركة وان ما نفعت بيكون عندك فرصة تعرس تاني وبعدين دي عرسة جاتك من السما ، حاجة زي دي بحلمو بيها كل العزابة المفلسين المقحطين الجو شاقين الفيافي للبندر وانت جاتك لحد عندك ، اي زول بحلم يعرس ليهو مرا مقندلة ومرطبة ان شاء الله كن شينة ، وانت جاتك غادة سماحة وقروش .....
حسن ود ريسة قال يا يحي شوف انت الدايرو شنو ونحنا بنتمو ليك نحنا ناس لصيق راسين في الحلال سااااي ، شيخ خالد ابجاكومة قال يا اخوي انا قلت ليك استخير ، وبعد ده الخير فيما اختاره الله .
تاني يوم يحي مشا الجامعة وبقا منتطر غادة ، طبعا كلم صاحبو ود الحاجة وفرح ليهو شديد ، قال ليحي اتاري الحمى والفتر اليوم داك كان مرض حامد ههههه
فجاة غادة جات ، جات ﻣﺘﺄﻟﻘﺔ ﻭﺯﻱ ﺍﻟﺼﺒﺎﺡ ﺍﻟﺸﻤﺲ ﻃﺎﻟﺔ ﻭﻣﺸﺮقة
ﻓﺢ ﻭﺭﺩﺓ ﺑﺸﺖ ﺑﻌﺒﻴﺮﻫﺎ ﻭﺭﻭﻧﻘﺎ
ﻭﺇﻳﻨﺎﺱ ﺭﻗﻴﻖ ﻳﻨﺴﺎﺏ ﻣﻌﺎﻧﻲ ﻣﻨﻤﻘﺔ
ﻛﻠﻤﺎﺕ ﺗﻄﻮﻑ ﺑﻴﻬﺎ ﺍﻷﻣﺎﻧﻲ محلقة
ﻣﺘﺄﻟﻘﺔ ...
ﺟﺎﺕ ﻭﺍﻟﺼﺒﺎﺡ ﻧﺎﺷﺮ ﻏﻴﻮﻣﻪ ﻋﻠﻰ ﺍﻟﻤﺪﻯ
ﺍﻟﺮﻭﻗﺎ ﻛﻴﻒ ﺍﻟﺮﻗﺔ ﻭﺍﻟﻄﺒﻊ ﺍﻟﺸﻔﻴﻒ
ﺳﺎﻛﻦ ﻫﻮﺍﻫﺎ ﻣﺤﻨﺔ ﻓﻲ قلبو ﺍﻟﺮﻫﻴﻒ ..

اخينا بعد سلم عليها وقعدو قالت اها يا يحي قررت شنو....?
يحي قال شوفي يابت الناس انا بدورك بالحيل بس الا انا زول فقران وقدر حالي .... غادة قاطعتو وقالت ماتفكر كدا ولا تقيس الامور بالمال انا بشتري راجل .....!
يحي راسو كبر ونفخ صدرو وقال احم....
غادة قالت الموضوع بسيط انت بس جيب اولاد اهلك القاعد معاهم وانا زي ما عارف اهليي كلهم برة بس في زميلاتي وزملاء الجامعة بجيبهم ، وعم عثمان الماسك المزرعة زي ابوي بخلي يبقا ولي امري ،، ونعمل الماسبة زاتا بالمزرعة .....،
يحي الفكرة عجبتو وبردت حشاهو.
#يتبع⏪⏪