О взятии столнаго Российскаго града Киева от Литовскаго князя Гедимина, и о прилучении княжения Киевскаго до Литовскаго.

Року от Рождества Христова 1320 воста Гедимин Витенесович великий князь Литовский, на князя Киевскаго, Станеслава, от колена перваго от Варяг князя Российскаго Рурика идущаго, и пришед на него со многою силою, победи его с Рускими и Татарскими вои, в шести милях или в тридесяти верстах от Киева над рекою Перною или Ирпенью. На том бою, убиены суть, князь Лев Данилович Луцкий, и князь Олег Переяславский, а князь Киевский Станеслав, побеже ко князю Резанскому, идеже потом бысть князем. Гедимин же по той победе, прийде к Киеву, и взя его в свою власть, и прилучи к Литовскому государству. Предложи же в Киеве наместника своего Миндова князя Голшанска[г]о, сына Голшового, племенника своего, иже бе окрестился в христианскую веру, и господствоваше в Киеве до Владимира Олгердовича. А сей Владимир Олгердович внук Гедимина князя Литовскаго, име в уделе от отца своего Олгерда, Киевское княжение, даже до Ягела короля Полскаго. Обаче от року Рождества Христова 1321, егда Гедимин князь Литовский взя в свою власть царственный град Киев, преславное самодержавие Киевское конечне уста: еже до объятия, или власти Гедиминовы, пребысть лет 431, под Литовскою же властию Киева держашеся даже до короля Полскаго Казимира Ягеловича, яко Стрийковский пишет, а Ягело король Полский Владимира Олгердовича князя Киевскаго в року от Рождества Христова 1392, премени, вместо Киева давши ем Копылье, Витолту же Киев по его воле пусти, а Витолд поступи Киев, и княжение его, Скригайлу брату Владимирову. По смерти же Скиргайловой постави Витолд на княжении Киевском от себе наместника князя Голшанскаго, Иоанна Алгимунтовича, в року от Рождества Христова 1396. И тако от Рождества Христова 1321, егда Гедимин князь Литовский взя в свою власть Киев, преславно самодержавие Киевского конечнее уста: еже до объятия, или власти Гедиминовой пребысть лет четыри ста три десят и едино, под Литовскою же властию Киев держашеся, даже до короля Полскаго Казимира Ягеловича.