جديد نزال بشيخ الانصار حبيب ابن مضاهر
--------------
سجل اسمي ياحبيب ويه خدام الحُسين
*
ياحبيب ابن مضاهر هايشـيخ الـمرجله
بدفتر الخدام ريتك اسمي كون اتسجله
(ليّتني كُنتُ) بركابك من دخلت الكربله
ونـذبـح ويـه جنودك ونرمي ابحر الفله

ويه اصحابك اكون. ويه عابس ويه جون
خادم ازغير التُرابك ياحبيب العارفين
سجل اسمي ياحبيب ويه خدام الحُسين

*****
سجل اسمي ياحبيب وكون تقبل خدمتي
وانه ادري گطره گطره انته تجمع دمعـتي
بلالطم وبلا بواچـي ظلـمه تصـبح دنـيـتي
وانه من هاي المجالس بيها صارت هيبتي


امنيه عندي ورجاء. ابقى خادم بالعزاء
عمري اخلصنه انوح وكون اموتن بالونين
سجل اسمي ياحبيب ويه خدام الحُسين

***
ياحبيب وانته تدري حسين يستاهل عشگ
كل عشگ اصبح خرافه وعشگ ابواليمه صدگ
انطانه دُور انعيش بيها وخيّم اخته تحترگ
حسين ابوگلب الحنين بخيل گلبه ينسحگ

ايلبّس الخادم حرير. وهوه عاري بالهجير
حسين يستاهل نِكون. بالمجالس عابسين
سجل اسمي ياحبيب ويه خدام الحُسين

*********
خادم الخدامه سجله اسمي لـ اصغر الخدم
حسين سلطان اليخدمه شايل احساس وقيم
ولبچه ابمجلس عزائه ينحسب طفّه الخيم
كون أشبع اسياط متني حته اواسيها الحرم

موفقط ابچي دِموع . باللطم اكسر ضِلوع
مثل مادست الخيل بصدر الحسين الحنين
سجل اسمي ياحبيب ويه خدام الحُسين

بداعت الشَيّبه الكَريمه اكتب اسمي بالسجل
عـبـد خـليـنـي الـرقـيه واربـط بچفي الحبل
عالـجـمر حافـي ادوسـن لـو انامـن عـالرمـل
مااوفي خطوه وحده من مشت فوگ الهزل

تعثر الناگه وتطيح. آخ يابويه تصيح
تصيح ماتسمع جواب بنت امير المؤمنين
سجل اسمي ياحبيب ويه خدام الحُسين
***
الشاعر عمار حسن الدراجي محرم1440

https://tttttt.me/ssgadAl

#الى_انصار_الحسين_ع



لو ينگضي الليل ــ وتتجمّع الخيل
وين ابن ابوه وين
اليتدنّه لحسين

أنصارك احنه .. وانت اتعرفنه
ما تحچي الأفواه .. واليحچي دمنه
بليلك يمظلوم .. يلمع نجمنه
جوه اسمك نريد .. نحفر اسمنه
شما يكثر الجيش .. لتظن يهمنه
لو عبّس الموت .. يضحك عزمنه

يحسين الاعمار ــ درعك بالأخطار
ونتمنه عمرين

•••••

طلگنه البيوت .. والدنيا والمال
وجينالك اسيوف .. وابهيئة ارجال
بس أشّر أجبال .. نهدمهه الجبال
وانوگّف الريح .. ابثوبك اذا عال
واحدنه لو داس .. بالحومه زلزال
ومن يرعد السيف .. تتطشّر آجال

عشنه الهليام ــ لجلك يضرغام
انوفيلك الدين

••••••

من ضاگت اعليك .. زاعلنه الافراح
وبلسم اجيناك .. وانداوي الجراح
لو شفنه عالگاع .. دينك هوه وطاح
نركض على السيف .. انمد چف الارواح
لو ينگضي الليل .. وصوت الحرب صاح
عنك بالصدور .. نشگفهه الرماح

ولو خلّص الدم ــ نگوم ومنهتم
وانعجّب البين

••••••

لو شفنه يحسين .. جندي امن اميه
يتگرّب ايدوس .. فوگ الثنيه
نقسم وحگ ثار .. ضلع الزجيه
بجفوف السيوف .. نشربه المنيه
لو صرنه طشار .. بالغاضريه
اهون ولا انشوف .. دمعه لرقيه

بالرايد ايعيل ــ نسوي الصبح ليل
وانطرّه انصين

••••••

خل يسمع الجيش .. من عدنه كلمه
دين الله الحسين .. وآمنه باسمه
دم سيد الأكوان .. يجري ويه دمه
وبس طاهر الذات .. يگدر يفهمه
والرايد بسوء .. يتدّنه يمه
والمحسن اليوم .. بيه نثكل امه

والرايد يموت ــ يتدّنه وايفوت
يم مهجة الدين

••••••

من غادر الليل .. طر فجر الاحزان
ومن كبّر السيف .. فرض الحرب حان
أنصار الحسين .. وگفوله بنيان
وصاحوا فرد صوت .. يا آل سفيان
كل مشرك اليوم .. يگرب للإيمان
من دمه الطفوف .. نسويهه طوفان

ضربوا للاجيال ــ بالتضحيه امثال
نسمعهه كل حسين

•••••••

الشاعر الحسيني
✍️احمد هادي الشمري✍️

https://tttttt.me/ssgadAl

نبقى الانصار بفخر === . حد ظهور المنتظر . يبواليمة
،،،،،،،،،،،،،،،،،،،،،،١
نبقى انصارك يغالي . نبقى حد يوم الحشر
مانعوفك يبو الأكبر . انته مفتاح النصر
خلنه نتگطع بحبك . فدوه الك كل العمر
صرنه نتمنه الشهادة . صرنه نسحگ عالجمر


البايعك يعني انتصر==== . حد ظهور المنتظر . يبواليمة
،،،،،،،،،،،،،٢
مثل جون ومثل عابس . دوم ترجع كربله
من حبيب ابن مظاهر - تبقى هاي القافله
ذوله انصار العقيدة . علمونه المرجله
مانخاف من المصاعب . احنه اهل المعظله


حب الحسين استقر ==== . حد ظهور المنتظر . يبواليمة
،،،،،،،،،،،،،،،٣
من برير اصل البطوله . بالشدايد ماخظع
وصولت الحر الرياحي . بيهه كل واحد سمع
ونافع الضحه بوريده . وللظلم لا ماركع
لحد يوم المهدي ثوره . المهدي نفرح لوطلع


اسم الحسين انتشر .====== حد ظهور المنتظر . يبواليمة
،،،،،،،،،،،،،،،،،،،٤
ربنه طول الزمن خله – انصار الك يبن الولي
غصبن اعله احفاد اميه . دوم نصرخ ياعلي
راية العباس عدنه . وكل مصيبة تنجلي
ابو صالح لو لزمهه . على العالم تعتلي



نسحگ دروب الخطر ====== . حد ظهور المنتظر . يبواليمة
،،،،،،،،،،،،،،،،،،،،٥
مايهمنه الحاربونه . احنه انصار الشهم
حسين علمنه الشجاعة . وصرنه بالحومه زلم
دوم منتصرين نبقى . احنه ابد ننهزم
حسين حبه بدمنه يجري . ونشتعل غيره وعزم


نراواي للعالم صور ===== . حد ظهور المنتظر . يبواليمة
====%==============

حيدر موسى الرميثي

https://tttttt.me/ssgadAl

حماسية للأنصار
*************
أحنه كلنه انصار        ويّه ابو الأحرار
ادمونه ترخص أله  انطيح دونه بكربله
**********
أحنه كلنه انصار ونحس بالفخر
نفدي ما نملك لابن سيد البشر
عدنه أحله امن الشهد حز النحر
صحنه باعله الصوت    نهوه حَر الموت
نحمي اعياله وهله    انطيح دونه بكربله
********
راينه واحد ولا بينه الرجع
عن طريق حسين وبغيره انخدع
لون نتوذر فلا ندري ابوجع  
بينه حَدّ السيف     چنه گاصد ضيف
للحرب نتوسّله   انطيح دونه بكربله
********
نكتب ابدمنه مجدنه ابهالأرض
كعبة هيه انطوف بيهه عن فرض
حب اهل هالبيت نشعر بيه نبض
للگلب معلوم      للممات ايدوم
سهلة عدنة المسألة  انطيح دونه بكربله
*******
نسمع ابن الزهره يندب لا معين
اليوم عندي وأحنه لاجله امحزمين
ابيا صحيفة انلاگي خير المرسلين
من يگول اشلون     عفتوا سيد الكون
هالأمر ما نجهله    انطيح دونه بكربله
********
انشد عزمنه ابخدر زينب لو نخت
وين أهل المرجلة وبينه انتخت
نحچي هاي الكلمة كلنه وعن بخت
انگول وعيونگچ         عامرة اضنونچ
يا بنت عقد الوله   انطيح دونه بكربله
******
ننتظر هذا الصباح امن الأزل                   نعلم الدين ايتعلّه ابهالمحل
حرّفوا بيه بغضاً الخير العمل
ننزل الميدان           نفدي هالشبان
أمر ربنه نقبله    انطيح دونه بكربله
*******
ألشاعر قاسم الساعدي المندلاوي

https://tttttt.me/ssgadAl

شيـــخ الأنصــار رمـــز الثــــّوار
سلامــا يا حبيب سلاما يا حبيب
****
ألك رايـــة فخـــر وحســين ذاخـــرها
هالرايه مـن ابــو الحسنين مصـدرها
حبيب انته ابطفوف حسين تنصــرها
ومـــن دم الشهــاده ابــزود أطـــرها
ناصــر لحسين وافيـــت الَدَيـنْ
سلاما يا حبيب سلاما يا حبيب

****
أبفخــر رفعّــتْ يمينه الرايـه وبهمـه
وهــزاهـا حبيــب اگبـال ابـو اليمــه
مثل قطــب الرحــى الأنصــار ملتـمه
دونْ حسـين واحـدهم رخّــص دمــه
دمهم قربــان لجل العطشان
سلاما يا حبيب سلاما يا حبيب

****
يـا عـمْ يــا حبيــب يخاطبــه الأكبـــر
ســلامْ مـن العقيله الحـره بت حيــدر
بچــه وهلــت دمـوعــه ودنـگ وكبّر
تگــلك ســاعتـك بالطـــف يالمــشكر
دون المظلــوم أفنيها الگـــوم
سلاما يا حبيب سلاما يا حبيب

****

حمل صوب الأعادي معصــب اجفونه
مثــل ليــث ايتلاهــب غيـض بعيــونه
فــارس بالحــرب كـلهــم يهـــابونــه
العهد بالـــدم جـــدد والله مضمــونه
وافه أبــوعــده جـــدد عهـــده
سلاما يا حبيب سلاما يا حبيب

****
تمنـــه ابسيــف عـــدوانـه ألـف مره
يتگطـــع دون أبو الأحـرار والعتـره
أبدمه السال وافــه وي بني الزهـره
گبــل حسين جسمــه أتــوسد الغبره
دون الإبــــرار شيــخ الأنصار
سلاما يا حبيب سلاما يا حبيب

****
بــاب حسـين الله البــاري اختــاره
يسجــل أبــدفتــره أسمـــاء زواره
يمّــه مــا تظــل الـــروح محتــاره
يگضي الحاجــه للي يلـوذ بكتـاره
يمّــه أبدمعــات تگضي حاجات
سلاما يا حبيب سلاما يا حبيب
****
الشاعر
موسى البديري

https://tttttt.me/ssgadAl

نعم الأنصار حيــرو كـــل المــــلا
نعم الأنصار يـــوم عاشــر كربله
خطو أعهود الولاء * والله من فيض الدماء
****
نظره للطف عن درايه ننظر احنه من البدايه ونعرف الصار
من گصد الحسين طفه للظم مــا مــدها چفــه وصافح أشرار
يدري لو ما مـدها أيده لازم يضحــي بـوريده ويرفض العـار
ولــذلك خــط نضـــالـه عالبغي وأهل الضـلاله بهاي الأنصار
نعم الأنصار بدمه خطو عهد
نعم الأنصار منهم أبداً منوجد
يـــوم عاشــر كربــلاء خطو أعهــود الـــولاء

للعشـگ شـادّو مـدارس والغرام أستاذه عابس طالــع وشوف
رسم لوحــه مــن دمائـه للحبيب اثبــت ولائــه وفنّه معــروف
لوحــه والينظــر عليهـا حگه مـن يحتار بيها ويبقه مشغوف
من رسمها أبطف محرم لــوناها أبقاني الــدم مــنْ السيــوف
نعم الأنصار جامعة عـز وفخــر
نعم الأنصار أتأسست وي النحر
من نــزِف ذيــچ الدماء خطــو أعهود الولاء
*
عن حبيب اقره وجهاد أصبح اطروحه وشهاده ابطـف الحسين
حيّــر الكـــون بنظــاله بالشجاعــه وبالبســـالـه وعمره تسعين
من علي مذخوره رايه امطــرزه أبــدم الولايــه كـــَرَت الـعيــن
ضحــه الها دم وريــده وهــذا بالطــف اليـــريده للميــــامــيـــن
نعم الأنصار وقعـــو عهــد الــــدمّه
نعم الأنصار دون ابن حامي الحمه
دون شبـــل الأتقيــاء خطــو أعهـــود الولاء

*

مـــوقف الهم ظل علامه غيّــر الكـــون ونظــامـه ابطف الأمجـاد
لَــوّن نقتــــل ألــف قتله ونحترگ لحسين سهـلّه ونصبح أرمـاد
ونرجـــع لدنيانه هـــايه نعتني الطــــف والمنايـا والهـا ننــعــاد
دون ابو اليمه وغرامـه نضحي من اجل الامامه أرواح وأولاد
نعم الأنصار ضحو أولاد ونفس
نعم الأنصار قدموا أعظـم درس
درس بالحب والوفاء خطــو أعهـــود الولاء

*

عن وعي وحكمه ودرايه غازلــوا حــد المنــايــا بذيــچ السيوف
أصبحوا رايــه ومنـــاره تاجـرو بأعظم تجــاره سحگو الخـوف
رخِصَــوا أرواح ومناحر شمس صارو يوم عاشر بيهـم أنشـــوف
ابــد مــا دنگو هــــامـه كشفو الجور وضـــلامه بيوم الطفــوف
نعم الأنصار دون سبط المصطفى
نعم الأنصار جاهدوا عــن معرفه
من اجل دين السماء خطــو أعهـــود الولاء


الشاعر
موسى البديري
1440هــ

https://tttttt.me/ssgadAl

استهلاليه الأنصار تقرا تراث على طريقة حمزه الزغير الله يرحمه

تنــاخــوا للمجــد أنصـــارك بهمّــه
نضحي أرواح گالوا دون أبو اليمه
*
تنـاخــو للمجــد أنصــــارك السبعيـن
نضحي أرواح گالو والله دون حسين
دَينْ الحــب واجينه نوافي هذا الدَّينْ
ونوافي اليوم عهد الطاعه والخدمّه
*
عهد الطاعه هذا أنقدمه ألك هل اليوم
لون فوگ الأرض تتخذم انــه اجسوم
محّـد يوصلك عـاهدنــه يـل المظلــوم
ألا وكــل فـــرد متغســل أبـدمّــــــــه
*
ألا وكل غيور أعلى الأرض مصروع
عهد بالدم نخّطه مـــو بفيض أدموع
ودونك هل نحر فوگ الترب مگطوع
ويضمنّــه الطــف ولا دلالك يضمّـــه

*

يضمنه أتراب طفك وانته سالم كون
ومو عابس فقط يا سيدي المجنـون
حبيب آوياه برير ونافـع آوياه جون
كــل واحـــد تمّنه الخــذمو جسمّـــه
*
انتخذم دون شخصك ما نطـخ الهام
يــا روح النبي ويــا علّـة الإســلام
شما جارت عليك شما قست الأيـام
موقف ثابت ألنه وبالدمه أنرسمه
*
نــرسمـلك مــواقف بيهـا نتـشـرف
وتشهد ألنه هذا اليوم ارض الطف
دونــك للمنيه نصف ألك فـدْ صَـفْ
وتَرَابْ الطف تحت اجدامك أنلثمه

**
الشاعر
موسى البديري
1440 هـــ

https://tttttt.me/ssgadAl

منهاج محرم الحرام ١٤٤٠ هجري

ليلة أَنصار الحسين عليهم السلام


خل يطمئن گلب العقيله

سبعين أبد لا مو قليـــله

أنصارك إحنه ونفتخر بيك

غيرك فلا عدنه وسيـــله
…………………………………………………………………………………………

من المدينه الكربله
خطينه وياك العهد
يحسين أنصارك نظل
لا ما نعوفك للأبد
بالدم نعاهد يالسبط
الله على الموقف شهد
ميهمنه ميدان الحرب
يبن الولي وإنته المدد

نسحگ على درب المنايه

بيد الگمر مرفوعه رايه

نرفع شعار بيوم عاشور

غيرك فلا عدنه وسيـــله
…………………………………………………………………………………………

حقهه وتنشدك يالشهم
مولاتنا بنت الولي
يحسين دگّلهه الصدر
گللهه يختي اتدللي
آني حبيب وهالزلم
بيهه المصاعب تنجلي
إنشد الحزم بالمعركه
لمن نــنــادي يا علـــي

من نندب بإسم الصميده

كل الجره بخيبر نعيده

يا سيدي زامط بالانصار

غيرك فلا عدنه وسيـــله
…………………………………………………………………………………………

شيخ الآنصار إتشرفت
يا سيدي بهذا اللقب
بعمري المضه والي يجي
عد عينك يهون التعب
خادم العتره الطاهره
ما يوم أردّلكم طلب
هنيالي أحظه بهالشرف
يحسين والفطره السبب

سجّلت بسمك كل حياتي

من مولدي الساعت مماتي

كل الانصار بهذا الاحساس

غيرك فلا عدنه وسيـــله
…………………………………………………………………………………………

جون وزهير وخادمك
ونافع وخوّان الگمر
عائذ وسوّار ووهب
ونخبة بني هاشم فخر
كلمن سمع أمرك وجه
طلّگهه دنـــيــاه وحضر
موعدنه بالطف عاشرك
موقف شرف هذا صدر

هيهات منّا الذله هيهات

إي والرفع سبع السموات

ما عدنه أغلى امن الشهاده

غيرك فلا عدنه وسيـــله
…………………………………………………………………………………………

يا جيش أُميّه ويا عطش
يرهبنا يا والي النعم
باچر بميدان الوغى
عباس لو رف بالعلم
ننزل اليوث الحومتك
والليث ميهاب الغنم
ياغالي واغله امن النفس
خط أحمر حدود الخيم

والزينبك أمّن خيمهه

هالمعركه إحنه زلمهه

منك يبو الأكبر عزمنه

غيرك فلا عدنه وسيـــله
…………………………………………………………………………………………

باچر نصفّن كربله
وليل العطش نطلعله ضي
مو إحنه نضعف بالظمه
يالشوفتك تروينه مي
لو كلهه ضدنه اتحالفت
جور وضماير كلهه غي
لو كلنا نحيا بثورتك
لو موته وحده وإنته حي

دنيانه ما تسوه بدونك

أنصارك وگرة اعيونك

عونك يروح الهادي وياك

غيرك فلا عدنه وسيـــله
…………………………………………………………………………………………

اشيسوه العمر يا سيدي
من غيرك وانته النبض
وأرواحنه فدوه الك
يالعاشرك سادس فرض
الأمر أمرك بالطبع
عد عينك وما نعترض
واشيكتب الباري بعد
سمعاً وطاعه ننتفض

لا ما نساوم ما نسامح

دين الله يبقه ويبقه راجح

برّد گلب زينب والعيال

غيرك فلا عدنه وسيـــله
…………………………………………………………………………………………

خادم الإمام الحسين عليه السلام

عمار هليل الواسطي

محرم الحرام / ١٤٤٠ هجري

https://tttttt.me/ssgadAl

مقدمة ليلة الانصار
.
.
.


لا مـــانــركــع .. ياموت اسمع
انصار حسين ايسمونه

----------------------

عانقـت رايــاتــنه چـــبد الســــماء
واحنه مـن عــدهه اخذنه الكبرياء
اذنـت بچفـوفنـه اسيـوفنه الـولاء
وفــزعت اويانـــه تــــقاتل كـربلاء

لازم تــقـــنــع .. ياموت اسمع
انصار حسين ايسمونه

----------------------

عين هـمه واحــنه حاجب للحـسين
وعلى الحاجب ابـد لا مـاتعـله عـين
الـراد يوصــلنــه تگــله اتــريــد وين
السالفـه اعـليه نختــصرهه بكلمـتين

ثـق مانخـضع .. ياموت اسمع
انصار حسين ايسمونه

----------------------

لمن گالو عابـس وجـــون وحــبيب
الموت مر بس وي ابو اليمه يطيب
وينـه فــنه اليــدنه لخــيـام الغريب
گــبر يحـفـرله وچــفن وياه يجــيب

يالمــاتـــنفع .. ياموت اسمع
انصار حسين ايسمونه

----------------------

بالشـجـاعه البيــنه مـضروب المثال
ما نــدنـگ روســـنه بيــوم الــــنزال
الحومه ماشاهــدت مگـفانـه محال
إي يمـوت ودومــنـه انگـــلك تــعال

للحـق نفزع .. ياموت اسمع
انصار حسين ايسمونه

----------------------

جيوش اميه ماتــهمـنه اشما تزيد
صايمين وعـدنه يـوم الملــگه عيد
ولــذالك هـمه ميــــصمدون اكــيد
خاف يـوم النــــهروان احـنه نعيد

خافو يرجع .. ياموت اسمع
انصار حسين ايسمونه

----------------------

حسين لمن گال حي اعله السيوف
چنهه نزلت صاعقه فـوگ الصفوف
والطفوف تخلبصـت كلهه الطفوف
حيره مدري اشـصاير ابهاي الالوف

اشبيه هالمجمع .. ياموت اسمع
انصار حسين ايسمونه
&&&&&&&&&&&&&&
لخادمكم حيدر تركي الكربلائي

https://tttttt.me/ssgadAl

قصيدة ليلة الانصار
.
.
.


بنصارك اضرب مثل .. واحدنه چنه الجبل
لـتبــالــي لـتبــالــي
يــرخـصلك الــغالي
بنصارك اضـرب مثل

--------------------------

اعلينه نصــرتك ســـيدي مفصله تفصال
وماخاب ضنــك يالــذي سميـــتنه اجبال
احچايه وضروري سيدي كل وكت تنگال
الـماعــنده غيره عليك مايتـــــسمه رجال

انت التسمي رجل .. ايسمونه گول وفعل
اي والله يالوالي
يرخصلك الغالي
بنصارك اضرب مثل

--------------------------

هالحـومه اذا انـته تـشم من عدهه عطاب
معـناهه نار اتــوجـرت بگلـوب الاصــحاب
قد قامــت الساعه تـره وقـد قام الحساب
امن اتراب اصـــلهم سيدي ونـردهم اتراب

اشر تشوف العجب .. انسوي الدمه للركب
حچـايتنه للتالي
يرخصلك الغالي
بنصارك اضرب مثل

--------------------------

بكل خطوه الك يابو علـي وبكل شبر عون
للـــــموت اخـذنه براحـتك لا تـسال اشلون
صح جيشهم سبعين الف ولو يترس الكون
كافـــي عليـهم سيدي بـس عابـس وجــون

بنظرة الجمع اججه .. مسلم ابن عوسجه
ميدانـهم خالـي
يرخصلك الغالي
بانصارك اضرب مثل

--------------------------

لجـــلك يغــالي بالـحـرب طـشينه الارواح
لا ينشــــــغل بالـك ابـد خلــــــــيك مرتاح
السبعين الف راس وعلي بحيل الله تنلاح
الجيش ال اميه من العرگــ منخلي سباح

برايه حبيبي الترف .. كل خفگه تكتل الف
لحساب الاجمالي
يرخصلثك الـغالي
بنصارك اضرب مثل

--------------------------

عــزريــل باچــر سـيدي يفــتر عــالصفوف
وجوه الزلم هالصـوفرت وعيـونك اتشوف
تشهد اذا صار الصـبح نخــلات ألاطــفوف
تخرس زلم توگع زلـم من تحچي السيوف

الراس الذي ينگطع .. يشهد عليه كل جذع
وهالفعل متوالي
يرخصـلك الغالي
بنصارك اضرب مثل

--------------------------

هيه الــشجاعه بالـزلم من الله اطـــــباع
شماتعصي في سوح الحرب ثق تنهي بساع
عــندك زلــم لـو زمجــرت تتمـــايل الـــگاع
آمــن يبــو اليــمه الرجــال العــندك اســباع

شاهد وجه كربله .. تعرف شنو المساله
بهالوضع الحالي
يرخصلك الغالي
بنصارك اضرب مثل
&&&&&&&&&&&&&
لخادمكم حيدر تركي الكربلائي

https://tttttt.me/ssgadAl

نزلة ليلة الانصار
.
.
.

لحسين لحسين ارواح نــفديها
والماتــصير ابكـربله انـســويها

----------------------------

الماتجي بــيدينه .. انجـــــيبهه بالگوه
كـربــله موصيتنه .. بـهاي مــاكو مروه

شعره من شعراتنه .. مـا يهز هالمجمع
تره اقل مـن صوله .. الزلمه بيهم يركع

باچــر ايشـــوفونه .. لــو بـده ملـگاهم
نــينوى اوديــانـهــا .. ماتلــم مـوتـاهم

نشعلهه احنه واحنه النطفيها
والماتــصير ابكـربله نـسـويها

----------------------------

الرايدين ارواحهم .. كربله ايــعوفونها
روسهم بجسامهم .. تــره مــايــلگونها

كربله العطشانه .. تغرگ امن ادمومهم
ينــدم الــوداهـم .. والـيـدور اعـلومهم

مـحــد اينجيـــهم .. والحكــم بـــيدينه
لــو تجـي مـشايه .. الدنــيه مــترضينه

نفنيـها احنه ونگـدر انخليها
والماتــصير ابكـربله نسويها

----------------------------

نزلـــو هاماتهـــم .. هــمه ويـنه اوينه
الگـال انه الــقائد .. فــنه يــرفع عينه

جيشهـم يتراجـف .. من جميع اكتاره
الخوف لاعب بيهم .. هـاي گبل الغاره

شـلون لو هــديـنه .. وابو اليمه الــقائد
والله من اجيوشهم .. فنه يصمد واحد

والموت الاحمر باچر انراويها
والماتـــصير ابكـربله نسويها

----------------------------

اتضاربت ارائـهـم .. هذه كله انشوفه
الاكـثــريـه گــالــو .. ننســحب للكوفه

مانريد ارواحـنه .. امگابليـــن احيوده
اعمارنه مريوده .. الشرده هم مريوده

مدد ماجابــلهم .. الشمر مـن رد وحده
بيــنت بعيونهم .. هـمه طــاري الشرده

نخبطت زلمهه واحنه النصفيها
والماتـــصير بكــربـله انســويها

----------------------------

البالجـمع يتبــختر .. شــويه خل يتهده
گــبل مادم نــحــره .. عـــالارض يتـبده

واليمـــس احـسيـنه .. حــته لو بحچايه
خــل يحـَضر گــبــره .. جايتـــه الـوفايه

وحته لو ضـــم راسه .. احنــه هـم نندله
والحچه خل يصمد .. في مكانه احسنله

هالكلمه يتحملهه من يحچيها
والماتــصير ابـكربله انســويها

----------------------------

حسـين المربيــنه .. ونـفخــر ابـــتربيته
والــذي يـتــــماده .. ناقـصه شخــصيته

الثقه عنده بنفسه .. ماتــهــزه امـــثالهم
وجيشهم ميهزنه .. ولا تهـــزنه ارجـالهم

الحومه والمابيــهه .. ماتـــخوف اگلوبنه
امن الارض نمحيهه .. من اجل محبوبنه

سبعين الفهم مانفـكر بيها
والماتـصير بكربله نسويها
&&&&&&&&%%&&&&&
لخادمكم حيدر تركي الكربلائي

https://tttttt.me/ssgadAl

الليله السادسه
1  قصيده بحق الانصار عليهم السلام



لايك النه الممات
مانريد الحياة
مايزول العشك من كلوبنه
والشهاده اختصت لمحبوبنه
..............

اسمه وزعنا على كل الشراين
ونعرفنه بالعشك صرنه مجانين
حسين من ثبت علينه العقل والدين
كلوبنه توكف اذا ماتذكر حسين

احله من الشهد
وغله من الولد
بيده ابو السجاد شال اذنوبنه
والشهاده ختصت المحبوبنه
...............

عفنه لجله كلشي غالي ومايهمنه
ركض رحنه اعله المنايه انطينه دمنه
ولطريق العدل بجفوفه لزمنه
وكال تالي الهلدرب كلهه اتمنه

اسمه درب الشهيد
عنه ابد مانحيد
راح نتلكاه وابيض ثوبنه
والشهاده اختصت المحبوبنه
.................

العنده مثل حسين يبقه راسه عالي
لايهم اشما قست بيه الليالي
للخدم دين الله وانطى كلشي غالي
لاتزل عن دربه تخسر ياموالي

للحسين انتمي
حيدري فاطمي
منو منكم يجي ويانه بصوبنه
والشهاده اختصت المحبوبنه
...............

للحبيب نظحي وبرهن الاشاره
عالوفه علمنه واصبحنه غياره
وبثغر تاريخنه هاي العباره
على السيف انتصر يامحله انتصاره

بالذبح مبتشر
ملك يوم الحشر
وحنه كلنه ويا ابد ميعوفنه
والشهاده ختصت المحبوبنه
................

شما نسولف عنه منوفي النريده
يعجز الينطي وصف لبن الصميده
عيني عل اصحاب كلمن لازم ايده
يحس بيهه حسين دم يسري بوريده

لون كلبه نعصر
حسين يعني بخطر
هيج عالمحبوب صاير خوفنه
والشهاده ختصت المحبوبنه
....................

وحنه كل لحظه التمرنه يكبر الهم
هم مثلكم ننتظر عاشر محرم
نريد نحضر بالعزه وانسوي مأتم
ونهدي اجره للصدر ذاك التهشم

نلطم اعله الصدر
من محرم يمر
تحظر الزهره بمصابه تشوفنه
والشهاده ختصت المحبوبنه


 محمد هادي العقابي

https://tttttt.me/ssgadAl

قو بنا نُصلي صلاة العاشقين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
شيخ الانصار .. ناده ياهل الغيره
الفرض حان ... ومايصح تأخيره
الدمعه محراب ... والعشق تكبيره
أشهدُ أنّ ... العقيله ابحيره

رؤوسنا أن تُقطع نظل واقفين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
عوفو الاصفوف ... والرگب ساووهه
والصلاه هاي ... تنذكر خلوهه
آية الشوگ ... والعشگ رتلوهه
الجنه خطوات ... وكلكم اتنولهه

الذلُ كأس خمراً والعشق سجدتين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
هذا عباس ... أتوضه من احساسه
وذاك جسام ... بيده شمعة وياسه
والاكبر اشتاگ ... برمحه يصعد راسه
والطفل ذاك ... وذيچ اخير انفاسه

قِماطهُ حرير والمهدُ من لُجين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
كبّر احسين ... گومو ياخدامه
الماي اتركوه ... واتيممو بجدامه
خلي عابس ... ايلبي خلف ايمامه
حيّ عالموت ... وحي عالطامه

تمام ليس قصراً نُقيم مجلسين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
صاحو أمرك ... يازعيم الرايه
نزحف أنروح ... للحرب مشايه
كوثر الحوض ... ينتظرنه ومايه
وحيدر أيصيح ... هله بالوفايه

الجنه ادخلوها ياقوم آمنين
خَـلـفَ مـولانا مـولانا الحُـسـيـن
ــــــــــــــــــــــــــــــــــــــ
عدهم ارواح ... مؤمنه وثوريه
ما يموتون ... الطلبو الحريه
ثورة احسين ... ثوره اخلاقيه
ثورة اصلاح ... ورحمه انسانيه

فأنما الشهيد يعيشُ مرتين
خَـلـفَ مـولانا مـولانا الحُـسـيـن

#العبدالحسيني_محمدالجماسي

https://tttttt.me/ssgadAl

ياهلا إبهالشيبه المباركه
ملك چنه من الـملائكه
واحد وتسعين عمره
عوزه بس أعوام عشره
ايصير تسبحة الزهره
شيخ الأنصار
ــــــــــــــــــــــــــــــــــــــ
طلع الشيخ علينا من ثنيـــات النجف
راكب الناگه الچبيره وفوگه محمل من سعف
وصل يم خيمة رقيّه وشمر خاچيته وزحف
واحد أمن الفتيه چنه النامو ابوسط الكهف

مولده ابعاشوراء اومقتلهة
والهوه البنفاسه من كربله
والحسين ايشوفه حاير
گله يا ابن مظاهر
راح القبك يوم عاشر
شيخ الانصار
ــــــــــــــــــــــــــــــــــــــ
أبنيه لو زهراء عنده چان سميته نبي
طوله يم عبد الله يزغـر چنه تلّ الزينبي
بالصلاة يوميه يدعي ربي احلفك بالعبي
ربي سويني عليل وحتى اروحن للسبي

قل هوَ الماضاحك صار اشكثر
يبچي عالمظلومه وذاك الكسر
بيت الأحزان ابضميره
اجروحه هم مثله چبيره
استقبلو شيخ العشيره
شيخ الأنصار
ــــــــــــــــــــــــــــــــــــــ
مثـل ماسوّه محمد من رجع من الـمغيب
احسين يالانصار گلهم (إنّما النَصرُ قَريب)
وين ماتبرك الناگه ابنو صيوان الحبيب
هذا عمّي اللي أحبه هذا جرحي والطبيب

غالي شابگ غالي ابرقه وحنين
اويمكن الهالساعه متشابگين
مو نبي وشايل رساله
بس رجل كلّه عداله
من حواري النبي وآله
شيخ الأنصار
ــــــــــــــــــــــــــــــــــــــ
ابخيمة العباس ترّب لحيته وباس العلم
عرگت اچفوفه ودمعته..چلّبت مثل السهم
گلّه ياعباس يلّـلي تـارس الدنيه خيم
انته أكبر من محرم طاخ راسك بالقمم

كربلاء ازغيره وطولك جبـل
ياحلاته ابعينك هذا الزعل
انطيني چفك خل اشمه
البـــي عطر كل الائمه
طيب وبالطف تسّمه
شيخ الأنصار
ــــــــــــــــــــــــــــــــــــــ
راح يتبــرك ابزينب والعقيله اتلگته
ياهله أبريحة اهلنه وهـــله ابشيبة لحيتّه
گلهه يامولاتي عبدچ بس اقبلي طاعته
النار من توصل الخيمه اعليهه اذب فصل الشته

بركاتـچ زينب ماتنحصي
عالمه وعلويه وبنت الوصي
ومن عباتچ خيط واحد
الله سوه اشگد مراقد
وبأسمچ اول مَن يجاهد
شيخ الأنصار
ــــــــــــــــــــــــــــــــــــــ
ابكربلاء صلّو جماعه اوياهم الحُر التحق
انصعقو أبنور الامامه مثل موسى أمن انصعق
من أجه عزريل صاحو (إنَ وعدَ اللهِ حق)
وچم يزيد وشمر منهم يرجف وعاش ابقلق

من نختهم زينب شوف اشحِدث
گامو أمن الحومه بس الجثث
من جديد انولد عابس
ابيض ومثل النوارس
وينذكر ظل بالمجالس
شيخ الأنصار

محمد الجماسي

https://tttttt.me/ssgadAl

صوت اﻻنصار الفجر ...
سولف اباسم العمر…
أنموت ويعيش الحسين**ونكتب ابدمنه النصر
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ماندگ والرگاب العدنه حارسهه الضمير...
ﻻن بيهه البيعه ذمه وعهد من يوم الغدير...
أنموت بس كون ابكرامه الدمنه مشتاگ المصير...
نلوي چف الحومه بأيد* *أنقرر أحنه اشمانريدوعالقدرنكتب نشيد**
...أنطشر انفاس الأنين...أنموت ويعيش الحسين...ونكتب ابدمنه النصر...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
هوسو بأسم الشهاده وحيل فرحة كربله...
أباب زينب والقوافي مطر مطرة مرجله...
وابوفاظل سمع بيهم صوته ظهظب وأعتله...
أباب صوته أنحط وري* *دودمه بيه حسرة رعيدأله احط خوفه أبيزيد**
...وسيفي يكتب عالسنين...أنموت ويعيش الحسين...ونكتب ابدمنه النصر...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
گيد أنفاسه بخدرهه وكتب عاشت خيمتچ...
ألوي جيدأعيونه بيدي الگال زينب وحدچ...
ويذبح أحﻻم الخويه وانه أخوچ او كافلچ...
ودمع زينب خط أكي* *دبيك چم هيبت وعيداحچايتك تلوي الحديد**
...وسرنه خافضته الجبين...أنموت ويعيش الحسين...ونكتب أبدمنه النصر...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ودفنو انفاس السوالف بارض داسها الشرف...
وابن ظاهر وگع طوله وصوته من لونه أنعرف...
يدعي بالناصر عباده ايچفنه بس حب النجف...
الهدم أصنام العبيد* *الچفه مايعرف بعيدالبصﻻه أصبح شهيد**
...أبدم غديره اشگديقين... أنموت ويعيش الحسين...ونكتب ابدمنه النصر...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
وعابس العاش أبأميره أجنون بس قصة عشگ...
الحومه بيهه أسيوف عطشت حيل عطشت لصدگ...
وهوه شايل درعه غيره بصدره ابواﻻكبر يدگ...
شمااموتن عندي عيد* *وحيه شايل من جديدابعشگ ابواﻻكبر سعيد**
...وفاتحة أم البنين...أنموت ويعيش الحسين...ونكتب ابدمنه النصر...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
خادم أهل البيت..ع..
أبوحسين السرگودي...
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
https://tttttt.me/ssgadAl
________
لمن يجد صعوبة بالحن اطلبه من
@moatmed1

#قصيدة الانصار الجرح من يلتفت
°°°°°°°°°°°°°°°°°°°°°°°°°°°°°°°°°°°°°°°°°°°°°°°

خلينه نكتب عالجرح صار
ونذكر الغيره العد الانصار
ونرسم صورهم… وراية نصرهم
وبيهم تسرفن چف الايثار
•••••••••••••••••••••••••••••••••••••••••••••••
الجرح من يلتفت لحچايه مملوحه
الوجع يتحمله لويوگف ابروحه
لذالك گلنه صار الكلمه مذبوحه
الصور لمن تجيهه اتعيش مطروحه
ويلمع ذكرهم… وراية نصرهم
وبيهم تسرفن چف الايثار
•••••••••••••••••••••••••••••••••••••••••••••••
بأثر كل خطوه ألهم نلگه ناگه أوماي
الناگه اتشيل كل موقف يفهمه الراي
اواحدهم نهر شايل عطايه أهواي
الكرامه اتعيش بچفوف الصدگ حداي
وعشنه ابفكرهم…. وراية نصرهم
وبيهم تسرفن چف الأيثار
••••••••••••••••••••••••••••••••••••••••••••••••
وأذكرلك جرح شايل الموقف طول
وعرض لمن اجيه الگه الحچي المعدول
ابعصابه وحواجب شيبهن مشيول
شيگول امنسئله الجرح حگه ايگول
شيخ ابضعنهم… وراية نصرهم
وبيهم تسرفن چف الايثار
•••••••••••••••••••••••••••••••••••••••••••••••
وأبو الاكبر وگف وندگت الثايه
ويوزع بالمهام البيهه الاحچايه
وتسائل صار عطش كلشي بي غايه
وصاح الرايه أجت شيالت الرايه
وفرحّ نضرهم… وراية نصرهم
وبيهم تسرفن چف الايثار
••••••••••••••••••••••••••••••••••••••••••••••••
شكبرهم چانو او مادنگو بالطف
وفخر بيهم حسين وبعدهوه اعرف
خلو عالدروع أگلوبهم تنصف
وظل ايثارهم عايش شرف واشرف
وهالنبذه عنهم… وراية نصرهم
وبيهم تسرفن چف الأيثار
••••••••••••••••••••••••••••••••••••••••••
خادم اهل البيت.. ع..
أبوحسين السرگودي…🕊🕊🕊

https://tttttt.me/ssgadAl

يوم الانصار زينب ع تحشم حبيب ابن مظاهر على نصرة الحسين ع

هايعمي ياحبيب.. لاتخذلون الغريب
ضحوا لحسين ابدماكم
خدري مرهون ابلواكم
……………………………
نادت الحره وحبيب الها اعتنه
وسلم اباب المخيم وانحنه
وردت عليه السلام ومحزنه
تگله ياعمي تراني مدوهنه
تگله ياعمي اني اخاف.. يصير عالحق اختلاف
الله بحسين ابتلاكم
خدري مرهون ابلواكم
………………………………
عمي لتخلون اخوي ابلانصير
شلون لوبالطف وگف عينه تدير
يحشم ومامن شهم يفزع يجير
وحده بين اعداه واگف چن اسير
ينادي يااهل الشيم.. الگوم هجمت عالحرم
فزعوا يالنومه شجاكم
خدري مرهون ابلواكم
………………………………
شلون باچر گلي ياعمي حبيب
ينادي الا من ناصر وماكو مجيب
شلون لوطاح وغده بدمه خضيب
شلون رايك زينب اتكف النحيب
زحمه صوتي لوطلع.. گبالي لوشفته انصرع
ولوصحت اني وراكم
خدري مرهون ابلواكم
………………………………
شلون لوشفت الشمر يركض اجاه
ورجله حطاها عله صدره وعتلاه
شلون عمي لو على وجهه لواه
وگام راسه يحزه ويلي من گفاه
ساحگ برجله الظهر.. ومن گفه يحز بالنحر
وگام دم تمطر سماكم
خدري مرهون ابلواكم

………………………………
شلون عمي لوخيامي اتوجرت
والحرم من خوفها ابهيمه اركضت
شلون لوكل البنات اتسلبت
شلون لو امي الزچيه اتشتمت
شلون لوشتموا ابوي.. گبالي لو سبوا اخوي
ينشتم حامي حماكم
خدري مرهون ابلواكم
………………………………
مصيبه عمي والله لا ماتنحمل
لوخذوني لليسر فوگ الهزل
وناگتي يحديها ياعمي نذل
واني اصرخ خويه لايابا الفضل
نذل يحدي بناگتي.. شلون من عگب اخوتي
لليسر امشي ابلاكم
خدري مرهون ابلواكم

الشاعر عقيل الحسناوي..

https://tttttt.me/ssgadAl

محوم 1440 هجري
الانصار...نزله
رسالة شكر من الانصار للحسين ع
+++++++
متنه اويا… وعشنه اوياك
يبن فاطمه
+++++++
من حبيب او للحبيب احسينّه الفاضل
بسمي بسم انصارك وكلمن شرف حاصل
لا يسعني غير اقدم شكري متواصل
صار عالي اوياك صيته حاجبي النازل

ممنونين..اي يحسين
يبن فاطمه
+++++++
حسين ماتحكم محبتك جاهل او عالم
حب طفل للام صفاته فطرة بالوادم
يالرحمتك ماتفرق سيد او خادم
والدليل ابجون گبره امجاور القاسم

جربناك...واعرفناك
يبن فاطمه
+++++++++
جون عبدك بس رضاتك غييرت لوني
خادمك لكن خليفه الناس نصبوني
اليخلص اكثر ياخذ اكثر بيك قلدوني
ابمجلسك اتمنه اخدم واهمل عيوني

اويه اليبچون…يصرخ جون
يبن فاطمه
+++++++
موته وحده شي قليل العابس وتدري
عقلي ساعه ازمان منجن واعتله قدري
امنيتي يحسين بمحرم لو يرد عمري
بمجلسك مو ثوب اشگّه بلطمي اشگ صدري

مو بچفوف...لطمي سيوف
يبن فاطمه
++++++++++
ماله هلگد قيمه دمنه انته شرفته
صرنه من ناسك قدرنه اهواي رفّعته
حته عاشورك مصابه اعلينه وزّعته
اتفضّلت سادس محرم النه خصصته

شمسوين...مبخوتين
يبن فاطمه
+++++++
مو حسد نغبط خدمته الضاف زوارك
اتصور اشكبره مظيفه موكب انصارك
الزاير الما مر علينه ومنه نتبارك
عابس المعروف طبعه شلون يتعارك

كل مشّاي …غالي اهواي
يبن فاطمه

ثائر الربيعي

https://tttttt.me/ssgadAl

الانصار( نزله)1
…………
حيهم الانصار صاحو حيهم ماكو واحد عدل يطلع منهم
صاح صوت ابن القين فدوه كلنه لحسين
حيهم الانصار صاحو حيهم
ـــــــــــــــــــــــ
ليلة العاشر عجيبه بيهه صارت حاله
ال هاشم ﮔـالو احنه نحمي عن عياله
صاحت الانصار نهجم اول الخياله
نحمي عن عترة محمد فدوه كلنه لآله
...............
مره صاحو واثنين .. فدوه كلنه لحسين
احنه عد عيناك نادو كلهم .. ماكو واحد عدل يطلع منهم
ــــــــــــــــــــــــ
من طلع مصباح عاشر دخلو لسوح الحرب
لبسو دروع المنيه عابس وجون ووهب
طاحت ﭼوام ال اميه نزلو عليهم غضب
فرت الفرسان منهم شافو الموت اقترب
............
زين عرفوهم زين .. كلنه فدوه لحسين
خلو عله الارض ساي دمهم .. ماكو واحد عدل يطلع منهم
ـــــــــــــــــــــــــــ
كبرو الله اكبر عابس انجن بالعشك
ضربه وحده من اجاهم مايثني من يطك
سيفه نار عله ال اميه والوصله يحترك
ﮔـال ادافع عن امامي الموت وي حسين حك
..........
صرخ مااريد العين .. فدوه كلنه لحسين
هذا عابس بالحرب جننهم .. ماكو واحد عدل يطلع منهم
ـــــــــــــــــــــــــ
زلزلو كربله ذوله ونوّخت برجالهه
شافو الحر اعتناهم وارتعب خيالهه
حر نزل ويصول بيهم هاك شوف احوالهه
ﮔـال وي حسين اموتن ﭼلمه والحر ﮔـالهه
............
صاح يطلبني بدين .. كلنه فدوه لحسين
ولجهنم وذرمن نزلهم .. ماكو واحد عدل يطلع منهم
ــــــــــــــــــــــــــــــ
والنعم حملة زهير جون منك والنعم
هله كون الموت اجانه للمنية مانهم
وعد ونوفيه حتماً زلم من توعد زلم
ﮔـال بالك عدل ترجع شهم ويوصي بشهم
............
وﮔفو وصاحو وين .. كلنه فدوة لحسين
صاحو ابشر والله من حشمهم .. ماكو واحد عدل يطلع منهم
ـــــــــــــــــــــــــــــ
وفو الانصار وفو كتبو بدمهم عهد
الموت وي حسين عدهم احله من طعم الشهد
خلد التاريخ بيهم وين اكو منهم بعد
صنعو وي حسين ثورة ابد ماخافو ابد
...........
منهم نجيب منين .. كلنه فدوه لحسين
عدهم التاريخ يوﮔف عدهم .. ماكو واحد عدل يطلع منهم
ـــــــــــــــــــ
سيد علي المدني

https://tttttt.me/ssgadAl

الانصار 2
………..
فزعو انصار اله .. فدوه احنه لهله
*********
مجنونين حبّك نفتخر بيهه
شنهي الروح لاجلك والله نفديهه
زينب هاي امانه وكون نحميهه
كل همنه الزچيه اليوم نرضيهه
............
زينب يمدللة .. فدوه احنه لهله
*********
گبل اهلك نضحي لو ردت يحسين
روح الروح انت وانت ماي العين
الك نفدي النفس ونضحي بالجفين
حسين نعرفه واحد ماكو منّه اثنين
……........
نگلبهه كربله .. فدوه احنه لهله
*********
احنه انصارك احنه كلنه وعيونك
والعاقل صبح يحسين مجنونك
شلون نعوفهم يحسين ياذونك
انصارك جهدهم كون يرضونك
……........
منهم صوت اعتله .. فدوه احنه لهله
*********
احنه بدون شخصك كلشي مانسوه
يالچنت لمحمد بالصغر سلوه
نهوه الموت لاجلك سيدي نهوه
بس اشّر عليهم واسمع النخوه
..............
حيهم صاح المله .. فدوه احنه لهله
*********
بس انطي الامر خل نگلب الحومه
شلون نعوف زينب تبقى مهمومه
من دونك حياة نعيش معدومه
ندريهه الشهاده اليوم مرسومه
…….........
ونطيح فوگ الفله .. فدوه احنه لهله
*********
مودع بالله آخر كلمه هاي وياك
ندري نموت لكن من يظل يرعاك
عدنه الموت هيّن مو مثل فرگاك
عندك گمر هاشم من گدر يدناك
……........
للموت صاحو هله .. فدوه احنه لهله
*********
سيد علي المدني

https://tttttt.me/ssgadAl