نزلة. ... في رثاء مسلم بن عقيل عليه السلام


نعِم الولي .. عمك علي .. شِدّ العزم
............

يالله يامسلم اجوك اهل الغدر
آنه طوعه ورد احشمك يابـدر
گوم سل سيفك عليهم ونتصر
انت عمك حيـدر المـايـنـكـسـر

يومك گرَب .. هاي الحرب .. افني الزلم
....................

يالله راويـهــــم عـلي لمّـن يـهـد
عيد صولات الوصي بوقعة احد
وانـه كـل طبــره انـاديــلـك أعـد
بسيفك المهيوب احصدهم حصد

حان الوعد .. وانت الأسد .. ما تنهزم
.....................

گلـها ياطـوعـه شريفـه مئصّله
انتي من شيعة علي عقد الوله
وانه مسـلم بيّه كـل المـرجَــله
اليوم يومي وكت الملاگه حله

وين المفر .. يهل الغدر .. راح انتقم
........................

نزل مسـلم بيـهـم وصار القتـال
شردت الفرسـان وشبـاه الرجال
طوعه صاحت ياهلا بهذا النزال
بس جثث خلاها توگع عالرمـال

لمن غضب .. سوّه العجب .. شاع الإسم
.................

عسكر ابـن زيـاد من خوفه شرد
عـلي صاحـوا هذا مو مسلم ابـد
الطار راسه والبقه نص من جسد
چن حَجر سجّيـل سيفه بل اشـد

صار الأجل .. بيده ونزل .. محّد سلم
..................

ها يطوعه يگلها چا وين الصفوف
اي يمسـلم والنّعِم صاحـت اشـوف
شردت الفـرسـان من سيفـك ألوف
چن عصه موسى وبلع كل السيوف

يالهاشمي .. ما تنثني .. انت الشهم
....................

والنّعِـم گـالـتـله يامسـلم وفيـت
زلـزلتــها الكـوفـه وبثارك خذيت
عالي راسك سيدي وثابت بقيت
عـمّـك الـكـرار وبـحـجـره ربيــت

بيك الفخر .. اسمك كبر .. لهل العلم

سيد زيد الفحام
_____________________________

https://tttttt.me/ssgadAl

قصيدة في رثاء مسلم بن عقيل عليه السلام


متيتّـمـه بفـرگـاك. مسلـم يغالي
سهرانه ولملـگــاك. احسب ليالي
بـديـار البعيــده
ماتدري بحميده. مسلم يغالي


منين ابدي الحچي ويّاك مسلم بويه محتاره
عفتني بلا فكر لا راي طفله ودمعـي يتجاره
من يوم الغبت لليوم شخصك ضاعت اخباره
لا ردّيـت الي وارتـاح ولا ودّيـت الي بشــاره
عايفني بين جروح. گلبـي وعذابه
يابويه والمـجـروح جـارح عتـابه
بالونّه الشديـده
ماتدري بحميده. مسلم يغالي



عزيزة گلبك وروحك حميدة شلون تنساني
الطفله بلا ابوها تموت تظلّ بحيره وتعاني
شحلاته من يسـلّيـها مـا يتـعــوّض ابثـاني
تشـعـــر بالأمــان ويـاه وانـه بـلا ابـو آنـي
سـهـرانه طـول الليل. آنه وعبـاتك
ودموعي بويه تسيل. وي ذكرياتك
يالعطفك اريـده
ماتدري بحميده. مسلم يغالي



من كثر البواچي عليك اثر خلّه الدمع بالخد
يمسلم بويه ليل نهار حزينه وبس عليك انشد
عفتني بدنية احزاني يتيـمـة ولابسـة الاسـود
الصبر ملّيته چا يمته تجيني وبين اديك اگعد
يمته الفرج وتعود. ليه واشوفك
ارحمني يالمفگـود. مابيه اعوفك
والكلمة الاكيده
ماتدري بحميده. مسلم يغالي



للكوفه السفـر گـالـوا يبويه ومعتـنـي ليها
اهل الكوفة ناس اشرار تعرف بويه ماضيها
ماتملك امـانه وديـن بس حقـد وغـدر بيها
كل خـوفـي يغــدرونـك مـا ترحــم اهاليـها
اهل الطمع والخوف تغــدر اهلـها
ما تنصف المـعـروف. واضح فعلها
والموقف تعيده
ماتدري بحميده. مسلم يغالي



رحت يم عمي ابوالسجاد اسئله بحالك وحالي
گعـدت يمه وجـرت عيني گلتله عمـي يالغالي
ابويـه طـوّل غيــابـه يعمّـي ومنّـشــده بـالــي
سمعنـي وسـالـت دموعه وعليك تحسّر گبالي
يبنيتي صاح بصوت. آنـه ابّـداله
مسلـم خـذاه المـوت. ادّه الرساله
ياروحه السعيده
ماتدري بحميــده. مسلم يغالي



سمعت من عمي اخبارك يمسلم والدي غدروك
من سطح القصر للگاع يبويه بلا رحم ذبّوك
حميدة آنه وگمت ابچي ليش بياذنب قتلوك
من بعد الچتل بحبال يمسلم والدي سحبـوك
مصابك اشد مصـاب. ياليتّـمـتـنـي
من عمري نورك غاب. بالهم عفتني
ياتـاج العـقـيـده
ماتدري بحميـده. مسلم يغالي

خادم السيدة حميدة بنت مسلم عليها السلام
سيد زيد الفحام
_____________________________

https://tttttt.me/ssgadAl

نزلة ميمر ..... في رثاء مسلم بن عقيل عليه السلام


مسلم غريب الدار طب الكوفه
حامل رساله من السبط بچفوفه
مايدري بالكوفه بغدر معروفه
غدرته وظل وحده هناك مسلم يدير افكاره


من بعد مابايعت ردت نقضت
ضد مسلم اهل الكوفه كلها انجمعت
تركته ولَبِن زياد بالذّل تبعت
ومسلم صفه بلايه انصار غدرت جميع انصاره


بس هاني وفّه بالعهد ماخانه
وي مسلم وثابت بقه بأيمانه
شامخ لحدّ اليوم ظل برهان
ما ساوم الذل والعار وي مسلم اعلن ثاره


ظل مسلم بلا ناصر بلايه معين
عد طوعه ضاف ويجري دمعات العين
يبچي عله بن عمه الغريب عله حسين
ما عنده مرسول يروح لحسين يحچي اخباره


غداره اهل الكوفه اجت بالاسياف
يردون مسلم يخضع يذل ويخاف
يردونه لَبِن زياد وبأيده چتاف
ما دروا مسلم لو ثار يفـنـيـهــم ابتّــاره



ليهم طلع مسلم وبيده البتّار
ضرباته تشبه بالحرب للكرار
خيل وزلم سوّاها مسلم طسّار
والكوفه ضجّت بالموت والمأتم بكل حاره



ما گدروا بوجه لوجه يثنونه
صنعوا مكيده وصاروا يغدرونه
بالحفره طاح وبالنبل يرمونه
طاح الشهم وتولّوه برمي الحجر اشراره



لو ما غدرهم مسلم الصل ما طاح
يحسين يابن عمي بدموعه صاح
رد لا تجي للكوفه رد بالارواح
لا تامن الكوفه اوصيك الكوفه اصبحت غداره

خادم مسلم بن عقيل عليه السلام
سيد زيد الفحام
______________________________

https://tttttt.me/ssgadAl

قصيدة في رثاء مسلم بن عقيل عليه السلام


دمعتي. تشرح مصابي الجره
جمرتي. بالـگلـب مـتـوجّــــره
بويه يامسلم هدم حيلي الغياب
طفله وتنطر تجيني وگلبي ذاب


بويه يامسلم زغيره ويتمتني
آنه يامسلم حميـده الدلـلتني
ليش عني رحت بويه وفارگتني
شفكّرت ياوالدي وعدمن عفتني
شگد تنيت. وزرع بدربك ورد
ما اجيــت. بويه عذّبني البُعد
تقبل ابقه بحيرتي وهذا العذاب
طفله وتنطر تجيني وگلبي ذاب



بويه گالولي رحت للكوفه وحدك
ادري بالكوفه واهلها ما تودّك
خوفي يامسلم يبويه تصير ضدك
لا عمام ولا اهل يابويه عندك
لا تــروح بويه يامسلم تعـال
والجروح حفرت بگلبي سؤال
هم تجيني واحسب لجيتك حساب ؟
طفله وتنطر تجيني وگلبي ذاب



بويه منهو يجيب اخبارك اليّه
غبت عني وغيبتك طالت عليّه
كل صباح انشد عليك وكل مسيه
خوفي يامسلم يغدروك آل اميّه
بـالأنيــن. ادعي ترجعلي بأمان
انت وين. مختـفـي وبيـامكــان ؟
بويه كافي من الهجر والاغتراب
طفله وتنطر تجيني وگلبي ذاب



گاعده وانطر مجيئك بالثواني
ساعة لن عمي ابوالاكبر دعاني
بحجره من خلاني حسّيت باماني
ياحميده بدال ابوچ يگلّي آني
گـلّـــي راح. والدچ وسفه انچتل
حيلي طاح ما بقــالـي كـل امـل
ياحميده يگول اصبري بهالمصاب
طفله وتنطر تجيني وگلبي ذاب



عمي ابوالاكبر حچالي عالجرالك
عن شجاعة موقفك بويه وقتالك
وحدك وغير الله ناصر ما بقالك
من بني هاشم ولا واحد اجالك
حاوطوك. وحدك وبين الألوف
حــاربـوك. بالـرمــاح وبالسيوف
بويه يامسلم وعرفك ما تهاب
طفله وتنطر تجيني وگلبي ذاب



صوّبوك بنار وسهام وحجاره
ولَبِن مرجانه خذوك بكل جساره
ومن رموك وطحت من قصر الاماره
بويه دمك عالارض سال وتجاره
دمعي سال. من سمعت مصيبتك
حالي حال. يتمـتـنـي بغـيـبـتــك
لا تظن جرحك يبويه بگلبي طاب
طفله وتنطر تجيني وگلبي ذاب

خادم السيدة حميدة عليها السلام
سيد زيد الفحام
_______________________________

https://tttttt.me/ssgadAl

نزلة ... لاستشهاد مسلم بن عقيل عليه السلام


يمسلم ..... ياشهيد المعتقد
يمسلم ..... ماخنت دينك ابد


تشهد الكوفه واهلها موقفك موقف شرف
قاتلت اهل الضلاله لحد ما دمك نزف
مثّلت دين الله انت والعلم بيدك يرف
سيفك الرجّف جمعهم وانت گلبك مارجف
يمسلم ..... والعرش لجلك شهد
يمسلم ..... ماخنت دينك ابد


ضدك الكوفه واهلها وانت وحدك قاتلت
صولة الكرار بيهم بالحرب لمن صلت
شردت الفرسان كلها ياعلي لمن گلت
تحصد بسيفك رگبهم تطلب الثار ونلت
يمسلم ...... ما رجع منهم احد
يمسلم ...... ما خنت دينك ابد


من علي وارث شجاعه بالحرب ماتنهزم
من تصول عله الكتايب ماتضل يمك زلم
تگبل عله الموت فارس للمنايا تبتسم
هاشمي ولو ما غدرهم ماطحت اقسم قسم
يمسلم ..... بالحرب انت الأسد
يمسلم ...... ما خنت دينك ابد


ياثقت ثالث امام وياسفيره وناظره
ستشهدت دون الحسين ودمك الطاهر جره
ماخنت عهدك يمسلم موقفك نذّكّره
بس ابواليمه اميري يبقه دنيه وآخره
يمسلم ...... قاتلت اهل الحسد
يمسلم ..... ما خنت دينك ابد


وين ابن مرجانه وينه لا مزار ولا اثر
والسفك دمك يمسلم آخره ودنيه خسر
وانت يامسلم مزارك خالد بطول الدهر
مرقدك قبه ومناره غطّت نجوم السحر
يمسلم ...... خالد ليوم الوعد
يمسلم ...... ما خنت دينك ابد


هذا عهد الرافضيه مانعوف زيارتك
شيعتك احنه يمسلم وانت تدري بشيعتك
احنه نتحدّه النواصب نبقه دوم بخدمتك
الدنيه ما تمنعنه كلها من نجيك لحضرتك
يمسلم ...... نعتنيك ومانرد
يمسلم ..... ما خنت دينك ابد

خادم مسلم بن عقيل عليه السلام
سيد زيد الفحام
____________________________

https://tttttt.me/ssgadAl

نزلة ... في رثاء مسلم بن عقيل عليه السلام


ضوه العين. يوالدي
رحت ويـن. يوالدي


طفـلتـك ناسيـنـي. هجرك مأذّيني
تجري دمعة عيني. بدارك مخلّيني
ياوكـت حـاچينـي. ترجع تواسيني


والــدي يالغــالـي مادريت بحـالي
طفـلـه وبلا والي. بويه من يبرالي
بيتك الظل خالي. والله ما يحلالي


عن حميدة تخبرك دمعتي وتنتظرك
بويه طوّل هجـرك. ادري غـادر دهرك
عمري فدوه لعمرك. خوفي گطعوا نحرك


بويه مسلـم وينـك. عيني تربي لعينك
عهدي بيني وبينك. ترجــع متـانـيـنـك
مـن شـرار سنينـك. ادعـي الله يعينـك


بويه ادري الكـوفه. بالغـدر موصوفه
شخصك منتشوفه. ما ترد مـعــروفه
لچـتـلـتـك ملهـوفه گلبي زايـد خوفه


عهـدك ينقـضـونه. دمـك يسفـكــونه
راسـك يگطـعـونه. جسمك يجرحونه
من القصر يرمونه. عالثـره يسحبـونه

طورها ملا باسم ... يروّاي. يابالفضل ...

خادم مسلم بن عقيل عليه السلام
سيد زيد الفحام
___________________________

قصيدة مقدمة مجلس في رثاء مسلم بن عقيل عليه السلام

مسلم الكوفه گصدها
غدرته وخانت عهدها
.............................

هـذا مسلم والــده الطيّب عقيل
وعمه حيدر صاحب السيف الثجيل
عـن طريق الحـق ابــد لا يميـل
ومايهادن عالظلم لا مستحيل
غايته يثبت رشدها
غدرته وخانت عهدها
............................

ختاره ابواليمّه لمهمّات السفير
بهالمهمّه غير مسلم ما يصير
يدري مسلم بالنهايه وبالمصير
اتعنّـه للكوفه بأمر من الأمير
كون توفيله بوعدها
غدرته وخانت عهدها
.............................

طلع مسلم حامل اكتاب الحسين
وصل للكوفه وخطب بالحاضرين
آنه جيت بأمر من شبل الأمين
تبايعون حسين بخلاص ويقين
لبيعته چفينه مدها
غدرته وخانت عهدها
............................

ناس معروفه بخيانه وبغدر
ولمن ابن زياد طب ليها بمكر
نقضت البيعه وعهدها بلا عذر
وحّده مسلم صفه بهذا الامر
نكرت البيعه وسندها
غدرته وخانت عهدها
..............................

تجمّعوا ضد مسلم وضد ثورته
بالسيوف تعنّوا لحز رگبته
طلع مسلم والصقيل بيمنته
غيرة الكرار حيدر غيرته
بسيفه عدوانه حصدها
غدرته وخانت عهدها
...........................

هوه واحد والعدو ينعد ألوف
خضعت لسيفه وثنت كل السيوف
وصبحت فرسانها تزحف زحوف
وبالدمه روس وجثث ظلت تطوف
لو هجم بيده يردها
غدرته وخانت عهدها

سيد زيد الفحام
________________________________

https://tttttt.me/ssgadAl

قصيدة مقدمة مجلس رثاء مسلم بن عقيل عليه السلام


صرخة ارفعها بيقين. لا حياة بلا حُسين
_____________

آنه مسلم رابي ببيوت الامامه
والله ما تسوه الحياة بلا كرامه
حسين امامي وغيره مااسمع كلامه
واليخالف امره يخسر بالقيامه
آنه جيت بأمره ونطاني مقامه
يالله يهل الكوفة رشحوه للزعامه

والسمع يحسبها زين. لا حياة بلا حُسين
_____________

وصلت آلاف الرسائل خط اديكم
للأمام حسين تردونه يجيكم
وآنه مبعوثه واجيت بأمره ليكم
آخذ البيعه وتطيعونه عليكم
وينه يهل الكوفة گلّولي حچيكم
ولو نعلم بالغدر مغروس بيكم

طيعوا بن طه الأمين. لا حياة بلا حُسين
______________

ابن ابو سفيان ظالم لا تطيعوه
فاجر وكافر يزيد الطاغي عوفوه
حسين جاي من المدينة يالله نصروه
انتم الرتّوا يجيكم ليش خنتوه
آنه مسلم احچي عنّه وصوتي سمعوه
انچان ما تردونه بالطف لا تأذّوه

اصبر واللّه المعين لا حياة بلا حُسين
_____________

صاحوا احنه بأمرة ابن زياد كلنه
وانـت يامسـلم وحيـد استسلمنه
لو تبـــايـع لو نـقـتـلـك اتّـفـقــنـه
احنه لبـن زيــاد ويزيـد اتّـبـعـنـه
سحب سيفه وصاح مسلم موتي جنّه
علـى يـزيــد وعاليتبعــه الف لعنه

ثورة ضد الظالمين. لا حياة بلا حُسين
____________

چن علي الـكـرار مسـلم من اجـاهم
بسيفه يحـصـد بيـهــم ونــزّل لواهم
حيّر العـــــــدوان بفـنـونه وغـــزاهم
تجري ارض الكوفة گامت من دماهم
والنّعِـم من مسـلم ابسيفـه فنــاهم
من عـلي متعـلّم ومـو مستــــواهم

والشعـار بكلمتين. لا حياة بلا حُسين
__________

عكب ما عجزوا وشردوا من قتاله
غـدروا بمسلم غـدر اهل الضلاله
استشهد وماعاف ابو الأكبر محاله
مسلم بدم نحره ادّاها الرساله
يشبه العباس بفعاله وخصــاله
للحبيـب حسيـن نادر بمتثـــاله

صرخته طول السنين. لا حياة بلا حُسين

سيد زيد الفحام
________________________________

https://tttttt.me/ssgadAl

كل ساعه انشدك وينه
شو ما رجع يحسينه
لو ما يرد من سفرته البعيده
يا عمي ياهو اليرحم بحميده
____________؛
آه لو تدري شكثر محبوبه عنده
چان من ايريدني يگلي يورده
گلبي لاچمني و دمع عيني تبده
ومن كثر ما ابچي ظلت عين وحده

طمني ريح بالي
هم راح اشوف الغالي
اخبار ما وصلت الك جديده
يا عمي ياهو اليرحم بحميده
_____________؛
گلي ما اتأخر و داعة الزهره
وهاي اكثر من شهر ماشفته مره
آنه اخافن هم تدوسه خيول عشره
وخاف هم يمه شمر يگطعله نحره

خاف الضمه يشل حاله
وتلتم علي خياله
ولا سامح الله ينگطح وريده
يا عمي ياهو اليرحم بحميده
_____________؛
والدي مسلم يعمي شنسه منه
انسه طيبة گلبه لو انسه المحنه
حضنه بي كل الامان و چنه جنه
لو توديني اله لو يرجع النه

مشتاگه اشم ثيابه
و يگلي اهلا يابه
ولديار اهلنه ايردني وايدي بيده
يا عمي ياهو اليرحم بحميده
_____________؛
كل ابو لو راح اولاده تشيعه
ويفرح بلمة بناته و يمه تنعه
وانه حته اوداع ما اگدر اودعه
واشتعل راسي مشيب وعمري سبعه


دليني درب الكوفه
مشتاگه عيني تشوفه
الفاگدله والد دمعه ما يفيده
يا عمي ياهو اليرحم بحميده
_____________؛
گلهه راح احزام ظهري و سال جرحه وحته بالاحلام ما ممكن نلمحه
انطيني راسچ خل اشم عطره و امسحه

و بعده ثغرچ ما تمر اعليه فرحه
ما يرجع النه الغالي
عيشي بهضم للتالي
خلي اعله مسلم ونتچ شديده
يا عمي ياهو اليرحم بحميده
_____________؛
آه لو يدري بحميده شصار بيهه
ضيعت خوانهه و مسلبيهه
تبچي وتحن وينه مسلم ما يجيهه
و ينظر اشلون الحبال تگص بديهه

عالناگه لو صد ليهه
وصوط العده امأذيهه
وترجع تصيح اليوم ابوي اريده
يا عمي ياهو اليرحم بحميده
_____________؛

علي الابراهيمي

https://tttttt.me/ssgadAl

والله مسلم جنناني صعب وي روحه العشگ
يحرگ الما يحترگ من عشگي ما نام
اهلي وسئلوني اسهر لگوني
من عشگي ما نام

......................
بسمك تتبيض النيه
ويتبده حنيه شايل وفه
من جرحك عشگته
رسمك نص الورد گاعد
وي ورده متواعد جرحك وطن
وبروحك دمعتك

شما اريد اتصورك تتسائل المسئله
انت بالكوفه نعم بس شفتك بكربله
چه ابو فاضل تحبه بنفسك تبادله

ويه الگمر تگعد سويه
عله التل يبدي الدمع
وانه احسن استمع وگليبي محتام
وتسمع ضنوني اسهر لگوني
من عشگي ما نام
٠٠٠٠٠٠٠٠٠٠٠٠٠٠٠٠٠٠٠٠٠
واضح مثل الشمس امرك
ابيض وجه سرك عندك امر
تحمل رسايل
سارح كل فكرك ضعونك
تدري ويغدرونك اهل الغدر
چم لوعه شايل

الكوفه بير وانت يوسف ونوخذ حته الدلو
ترسم بصفحة خيالك امنيه عندك اخو
حتى نسمات التمرك تلتفت تصرخ منو

غربتك مثل الصميده
بلا لسان وتنحچي
بلايه عين وتنبچي ما توصف احلام
مسلم عيوني اسهر لگوني
من عشگي ما نام
....................
جرحك شايل دمه العتره
يا بسمت الزهره يالوعتك
صارت بدايه
صبحك ليل وترى تحسه
ضلمه واضن شمسه من غدرتك
صارت نهايه

والرسايل شگوگهن صعد دخان الغدر
طاحوا بهويه خفيفه سيف صارت مو عذر
والمناجل حضروهن وانحنوا يم الشمر

همه واحد من اجولك
وانت جيش وألويه
تهب ريحاً عاتيه جيش ورمه سهام
حبك جنوني اسهر لگوني
من عشگي مانام
٠٠٠٠٠٠٠٠٠٠٠٠٠٠٠٠٠٠٠٠٠٠٠
طبعك ما ينحزر ليلك
چم طوعه تدعيلك وين الصبح
خنجر ينطرك
دمعك يتجاره بخدودك
ناشف الم جودك تصلي وتون
وما طافي جمرك

مسلم عليمن تعاتب وللسقيفه صفگو
الناصي ناصي شما تعله نازلين من اعتلو
انته رايه اعله المناره وگلي همه شحصلو

يا عطر الله ورحمته
تنغدر والله وسف
مسلم وباب النجف يا چاسي الايتام
لونك يلوني اسهر لگوني
من عشگي ما نام
٠٠٠٠٠٠٠٠٠٠٠٠٠٠٠٠٠٠٠٠٠٠٠
صلفه عين الذي تعوفك
والتنكر جروفك انت العذب
چفك كريمه
ترفه عين المشت يمك
وتسولف بأسمك انت المحب
والد يتيمه

يالصفت عندك علامه مسلم وهمه انسبت
تحملت سوط ال اميه ونحبو هيه نحبت
شكثر صاحت بويه مسلم عليك يامه دورت

من الضعن طاحت رقيه
وهيه هم طاحت بعد
ضلت بلايه سند وهم طبت الشام
وياهن خذوني اسهر لگوني
من عشگي ما نام

٠٠٠٠٠٠٠٠٠٠٠٠٠٠٠٠٠٠٠٠
عبد زينب
محمد الابراهيمي

https://tttttt.me/ssgadAl

مسلم بالحرايب حيد ظل يتباها
انه المرتضى المعروف نخوة طه
انتم گنــــطرة والراد (خل) يدنه
وبعيوني الكمر عباس سيف الله

اذبح الجـيش نــذر الخــيام
لـــــــــو اودي ركــض للشام
الما يعرفــون عمي ابو الثام
قاضي وبزود اصدر احـــكام

من زودي ومن حيلي كل مـيه بدرب
وبســيفي اتبـــــختر للحومه واطب
بحيل الله افنـــــيكم بثــواب الخدر
للنــــــوگ المعـــموره افـتنيها الحرب

حي الله حي الله مسلم يا شهم
--------------------------
انــــه البالحــرب معروف نـــار بعيني
جندي وما اطخ الراس بس لحسيني
حـــب حـــسين بــالـعباس هم جنني
جابانــي العـــشگ يا ناس ويـوديني

العشــــگ كتال بـــي معانات
بي عطش ماي بــي مسافات
غربه وجـروح واليحب مات
دمــع الخدود مـــو تفـاهات

المايگــــدر يتــــــــكتر عالحب والعشگ
الما مچوي اعله جروحه لا يرسم حرگ
بس مسلم بـــالـكــــوفه ديوان الحجي
جم خيمه بــدمـــعاتـه ومعروف الصدگ

حي الله حي الله مسلم ياشهم
------------------------
المايدري بصفنتي شلون وبحسراتي
عافيتي احـسها تطيح وي دمـــعاتي
مــسلم وحّده وعطشان من نـضراته
گلبــي الغربته مجــروح من ونــاتي

الكوفه وجروح وغـــربتك ليل
ضعــــــن والآه والـــدمع ويـل
وحـدك شلون بهـــدت الخيل
وانت عطشان وما يضل حيل

تتبــــاوع لجروحك بس طبعك شهم
دمــعاتك مــن نزلن لضــــعونك تــهم
بس انت حــَّي الله ذليـــت القـــــصر
حاصـرته وتعـــبتــه وركـتـضت الزلـم

حي الله حي الله مسلم يا شهم
-------------------------------
دست اعله المنايه بشوك دوست حاير
ملهـــوف وتــدير العــين فــكرك طـاير
ياهــو يــروح يم حـسين ياهو يــــگله
گلــوله تـــراهو وحــيد هـذا الــــصاير

مــتسلم بضيم كـــونك تشـــوف
وحتدّه وجيش ونـــبل وســيوف
بضهره يـرمون وضهره مكشـوف
ويــتن عــباس خل يجي يشوف

مــا شــفنه بوصـافك حـــاير ترتجل
چــــم مره يضربونك عاشك ما تمل
بس طوعه لتــكبيرك صــارت مأذنه
بس طوعه الحـالاتك مــدمعهه يهل

حي الله حي الله مسلم ياشهم
----------------------------------
صعدت اعله القصر والنور منك هاله
كلـــهه تصــيح هــذا المــوت للخياله
دفعوك وطحت ضنوك جرحك عافك
جرحك بالـضعن وحسين ضل ينعاله

عـــيالك تحوم وشابحه العين
تســأل علــتيك ويــــن ما وين
ومشوا لحسين وعـالي الونين
وبالصـدر حيل ضـمهم حسين

ضـــماهم لجروحه وزادت ونـته
وبخدوده چم مره نزلت دمــعته
يــــــتلوه من الامه والطف بـينت
يا مسـلم يـــــابويه صاحت عيلته

حي الله حي الله مسلم يا شهم




عبد زينب
محمد الابراهيمي

https://tttttt.me/ssgadAl

غربه وجرح والنوب چملها المصاب
وتهضمني وآنه وحيد ياوگفت الباب

غربه ودرب شمات والطارش بعيد
والكوفه خنگت روح مامش أجاويد

كَفهَ جروح والغربه بكفاه
الزمن جراني للغربه بكفه
وحيد ولا أخو يمي بكوفه
ولا ذيچ الصوارم الاحمديه

غريب وحاير وتدير عيوني
وحسبت ايامي وتخيب ضنوني

آه آه ......... يامسلم
----------------------------------
مكتوبي يمّ حسين ياهو اليوديّ
كله الهوى من يفوت همّ يلتف اعليّ

حتى الهوى يحسين هم كطعته الناس
عشرتنه صارت موت مالاگي عباس

فراگ حسين والغربه ترك بين
دليلي علة بصحره ترك بن
وي ضعونهم روحي تركبين
لو تحدين وحدچ للمنيه

وحيد بروحي الدرب ماشوفه
عليّ مگلوبه بهلهله الكوفه

آه آه ......... يامسلم
----------------------------------
گلوله يوسف مات چه وكته مكلوب
لا ينتظر قمصان خل يعمه يعكوب

گلوله ماشي وياك ودوم اعله ممشاك
يتهنى مسلم كون يتلاكه وياك

العسل بالريج بفراكك يمرمر
الهوى شيبني لو منك يمر مر
فراگك والضعن خويه يمرمر
گلبي ودمعتي بغيرك سبيه

دمعتي بعيني مثل مسبيه
وجرح دلالي وهواكم بيه

آه آه ......... يامسلم
---------------------------------
دارت عليه الناس حتى النساوين
بس همي مو للناس همي اعله الحسين

كلبي بعطش والنار تغلي بلهاته
الخلفي صلو ليش كلهم شماته

يَموتّ وناوي تلفيني وشمتان
تعال ابيوتهه الكوفه وشمتن
(بيه) وحيدر بصفي وشمتين
تعال الجنه لقدومك زهيه

علي متانيني الرسول متاني
ودمعتي بخدي تظل لخواني

آه آه ......... يامسلم
----------------------------------
من القصر يحسين واسمع صلاتي
بكل ركعه دمعي اعليك ياعم بناتي

يالتسوه بيه الروح لا كون الف روح
وسفه انته فوگ الكاع هم تبقى مطروح

الزمن وياك يابس حيل مالان
اعله نحرك والسيوف اشلون مالن
بناتك من سياط الشمر ملن
حميده اطيح مسلوبه رقيه

حميده وانه فده لعيونك
حسين بروحك واظل ممنونك

آه آه ......... يامسلم
----------------------------------
عبد زينب
محمد الابراهيمي

https://tttttt.me/ssgadAl

قصيده بدايه عزاء الي سفير الحسين عليه السلام مسلم ابن عقيل سلام الله عليه


بالكوفه البدايه
وبالطف النهايه
أسرار وخفايه
بمصاب السفير

رسول او وحيه حب دينه وامامه
مبلغ بالصلح لجل الكرامه
رساله لكل مماليك الظلامه
مثل عمه اعتنه ينشر سلامه
والكوفه بضلاله
رفضوها الرساله
وما قبلو هدايه
بحقد ضلت تسير

يمسلم يالخذت اطباع عمك
حكم ضالم ابد لا ما يهمك
سلامه أبو اليمه جان همك
رساله وكتبتها بفيض دمك
يا اول ضحيه
لجل روح الزجيه
يل بيك الكفايه
يأول والأخير


صرت اية عشگ والكل يرتلك
يأول عاشگ ومحد يجهلك
يمسلم والملك كلها تحسدك
سفير حسين عالي يبقى مجدك
غيره حيدريه
اسمك بالهويه
موالي للنهايه
وصرت بالحب أمير

يألول من حيه نهج الشعائر
رفعت رأيه علي فوگ المنابر
وحيد وما الك واحد مناصر
وعلى أهل الكوفه بأيمانك تكابر
سلطان بخلودك
يالباقيي بوجودك
خطيت الروايه
من دم الضمير

لأنك رافضي محد يودك
رفضت أهل البدع صارت تضدك
وعلى طول الدهر ضل يزهي مجدك
وحب حسين هوه السند عندك
يا اول موالي
يبن عم الغوالي
ضوه النور بسمايه
من عندك تنير

عليك اتحالفو گوم الحقاره
الوكت وياك عاكس ضل مساره
مثل عمه يخط دمه انتصاره
ورمو جسمك وسف من الاماره
عليك الكون ينحب
دموع دموم تنصب
يا باب المنايه
حسين بلا نصير

الشاعر سيد علي الموسوي الكربلائي

https://tttttt.me/ssgadAl

محرم الحرام / ١٤٣٩ هجرية
الليلة الخامسة
ليلة (سيدي مسلم بن عقيل عليه السلام)

القصيدة الأساسية

نبراس الحق ... دمك حقق
نصرك يا مسلم
دمك فكره ... صارت ثورة
بالطف يا مسلم
للحق نصير .... نِعمَ السفير
……………………………………………………………………………
سفير حسين كعبه وشوگك يطوفه
نائب عن إمامك صرت للكوفه
عهد عندك وابد هالعهد متعوفه
ابوكت چانت لسنهه الناس مچتوفه

نعم الناصر ... مجدك زاخر
مضرب للأمثال
بغيرة عمك ... تنذر دمك
يلبيك الآمال
مثل الأمير .... نِعمَ السفير
……………………………………………………………………………
وادم تبعتك وافتهمت الفكره
كلنه اوياك صاحت اعلن الثوره
لكن من يأمن ابنادم وغدره
خصوصا لو طمع بالمال والشهره

تتبع أمرك ... رادت نصرك
بس معدن هالناس
ما يتأمن ... لا تتطمّن
غاويهه الوسواس،
عقلك چبير .... نِعمَ السفير
……………………………………………………………………………
نفس الوافتك يا مسلم ارتدت
لأبن ازياد يا حيف ووسف شهدت
عليك اليوم مو ويّاك من هدّت
والدرب الضلاله بلا وعي ردّت

الجانت يمك ... تطلب دمك
وانغرّت بالمال
كلشي اتغيّر ... كلشي امقدّر
ميظل نفس الحال
دهرك عسير .... نِعمَ السفير
……………………………………………………………………………
جيش الوحدّك لمّن وگفت الهه
فارس ما تذل والغارت اتذلهه
اجوك بغدر والصعبات تندلهه
ردت مأمن حذر مو خوف أوّلهه

طوعه المأمن ... لو ليلك جن
هذا الصح بالإيد
هيه تحشمك ... تذكر عمك
حيدر نعم الحيد
لمّن تغير .... نِعمَ السفير
……………………………………………………………………………
راويت العده الما چان يتصور
كلهه اتخيلتك لمن غرت حيدر
تلمهه بسيفك وبالخوفه تتطشر
لوما الغدر ياهو الصولتك يگدر

دم الينزف ... يكتب موقف
تاريخك مشهور
مشعل زاهر... يوم العاشر
بالأمجاد ينور
ربك مجير .... نِعمَ السفير
……………………………………………………………………………
وبهذا الزمن نستدل عن نصرك
گبتك والمناره الخلدت ذكرك
لجل الدين يامن قدمت عمرك
ربك عوّضك عن تعبك وصبرك

روحك آيه ... عندك غايه
غاية نصر الدين
كل وكت المر .. مجدك يكبر
من اللّه التمكين
دك نذير .... نِعمَ السفير
……………………………………………………………………………

خادم الحسين عليه السلام
عمار هليل الواسطي
محرم الحرام /١٤٣٩ هجرية

https://tttttt.me/ssgadAl

منهاج محرم الحرام ١٤٤٠ هجري

ليلة سيدي ومولاي مسلم بن عقيل ع


شوفتك صارت بعيده
روحي بغيابك وحيده

إرجع وإرحم گلب بنتك حميده
………………………………………………………………………………………

وحشه بعيوني الليالي والدمع يبرالي
روحي تسألني يغالي وين راح الغالي
طفله ما أحمل غيابك الله يدري بحالي
بكل كتر بالبيت بويه إنته تتراولي

والله يعيوني هضيمه
أبقه من زغري يتيمه

إرجع وإرحم گلب بنتك حميده
………………………………………………………………………………………

بالضعن وشصار بيه وزاد حزني وهمّي
كل أبو حاضن بناته واني محّد يمّي
عمي گلي آني أبوچ وگتله تسلم عمّي
شافني ونشّف دمعتي گلي لا تهتمي

سيدي ومولاي يحسين
گتله لكن والدي وين

إرجع وإرحم گلب بنتك حميده
………………………………………………………………………………………

تچوي دمعاتي اعله خدي بنار گلبي الذايب
يالخذك مني زماني وما دريت إشجايب ؟
طفله من تريد أبوهه حقهه من اتعاتب
وآنه طفله وشاب گلبي وإنته بعدك غايب

عالدرب مشبوحه عيني
لو تجي لو ما تجيني

إرجع وإرحم گلب بنتك حميده
………………………………………………………………………………………

ظاميه الروح وتناطر يلي نبعك صافي
لشوكت يالغالي أصبر بويه إرجع كافي
جفني ما يغمض براحه عالمدامع غافي
كلسع أسأل ليلي عنك وين حضنه الدافي

صعبه من دونك حياتي
عذبتني ذكرياتي

إرجع وإرحم گلب بنتك حميده
………………………………………………………………………………………

تخيّلت وياك أحچي وچنّك توادعني
رايح وما ظن تجيني فدوه لا تفجعني
هالزمن ما رحم بيه وبالهجر لوّعني
ما خفه عنك ونيني ريت لو تسمعني

يالقدومك عُمُر ثاني
خايفه تموت الأماني

إرجع وإرحم گلب بنتك حميده
………………………………………………………………………………………

بالدمع يخلص نهاري وساهره كل ليلي
لحظه من دونك تمرني بويه تهدم حيلي
طيف لو منك أشوفه چم أمل يبنيلي
چن بعد لا طيف أشوفه هالهجر يوحيلي

ينهدم حيلي وكياني
واللّه عذبني زماني

إرجع وإرحم گلب بنتك حميده
………………………………………………………………………………………

باچر وشتشوف عيني امن المصايب باچر
كربله وبيهه بمحرم شعدنا يوم العاشر
وين عنك يا أماني ذبني دهري الغادر
ريتك بهاي الليالي يا حبيبي حاضر

حاضر ونلتم سويه
حلم يالغايب عليه

إرجع وإرحم گلب بنتك حميده
………………………………………………………………………………………

خادم الإمام الحسين عليه السلام

عمار هليل الواسطي

محرم الحرام / ١٤٤٠ هجري

https://tttttt.me/ssgadAl

محرم الحرام / ١٤٣٩ هجرية
الليلة الخامسة
ليلة ( سيدي مسلم بن عقيل عليه السلام)

قصيدة النزلة

يغالي ... بويه طالت غيبتك
………………………………………………………
…………………………
آنه يا بويه حميده ما سمعت اخبارك
وين كل هالغيبه گلي وحشه ظلت دارك
ظلمه كل عمري بغيابك ما شفت انوارك
ودعتني ولوّعتني وما خلص مشوارك

غريبه ..... بدمعي أناطر جيّتك
يغالي ... بويه طالت غيبتك
…………………………………………………………………………………
گلي عمي حسين اصبري والبعد أذّاني
صار حزني ودمع عيني ياشهم عنواني
گتله ياعمي يغالي هالزمن جافاني
بدمعة اعيونه يگلي آني أبوچ الثاني

مصيبه .... والله وحشه وحشتك
يغالي ... بويه طالت غيبتك
…………………………………………………………………………………
من اباوع عالبنات وكلمن ووالدهه
بويه احس روحي يتيمه والزمن ضاهدهه
تدري البنيّه غريبه لو أبو ما عدهه
من ينشف ادموع عيني روحي من يسعدهه

يتيمه .... بويه رد لبنيّتك
يغالي ... بويه طالت غيبتك
…………………………………………………………………………………
من يجن الليل گلبي بالحزن يتكطع
أسأل انجوم السمه يايوم ابويه يرجع
جمرة احزاني بدمعتي وشوف نار المدمع
روحي كل لحظه بغيابك ياحبيبي تطلع

أكابر ..... يا منيه اختارتك ؟
يغالي ... بويه طالت غيبتك
…………………………………………………………………………………
مو حمل هاي المصيبه والدي يالغالي
إرجع وباصر حسرتي وشوف بعدك حالي
انه عمري امن السعاده عكب هجرك خالي
اصبر وانطر واتاني والدمع يبرالي

وحيده .... بيّه دارت دنيتك
يغالي ... بويه طالت غيبتك
…………………………………………………………………………………
يا أعز من روحي عندي يادليلي الصابر
يگظي يومي وآنه اگولن خل اتاني الباچر
ريت لو يرجع زماني يمي اشوفك حاضر
بدنيه ما بيهه يشوفك كون يعمه الناظر

حزينه .... كل حياتي بفرگتك
يغالي ... بويه طالت غيبتك
…………………………………………………………………………………

خادم الحسين عليه السلام
عمار هليل الواسطي
محرم الحرام / ١٤٣٩ هجرية

https://tttttt.me/ssgadAl

منهاج محرم الحرام ١٤٤٠ هجري

ليلة سيدي ومولاي مسلم بن عقيل ع

قصيدة (( نزلة ))

رجّع يمسلم هاليوم صولة علي بفقّاره

…………………………………………………………………………………

طوعه التحشمك وانته بيدك صمصام

دار الزمان وعكس تمشي الأيام

گدهه يمن عمّك الوالي الضرغام

بميدانك إدخل يا حيد والفخر انته أخباره

…………………………………………………………………………………

إنته الفخر يا مسلم وعزمك زاد

واعداك فرّت ضيّعت بالمشراد

والنعم منك يا سليل الأسياد

سيفك مثل ملك الموت يلي اتعرف اسراره

…………………………………………………………………………………

راويهه صولات الفحل راويهه

گدهه ومثل حود الغنم تحديهه

زلزال لا ترحم يمسلم بيهه

أهل المكر أهل الجور ذيول الزمن وأشراره

…………………………………………………………………………………

يربات سوح المرجله وكل ميدان

يا فارس اليدخل سجالك خسران

يبن الرساله والوحي والقرآن

جار الزمن آه يا حيف وبدنيته الدوّاره

…………………………………………………………………………………

حاشاك ترضه الذله من العاداك

والسيف يفرح من يصير بيمناك

هاليوم يومك ماكو چف اللاواك

موت أحمر اعله العدوان سيفك يطش أقداره

…………………………………………………………………………………

يهوى الرگب سيفك إذا يوصلهه

لا تهتم الهالناس والباطلهه

والترضه بالذله القتال يذلهه

مو وحدّك ربنا إوياك والظفر إنته إختاره

…………………………………………………………………………………

سويهم ذيول الفتن سالوفه

خليهه تشهد عالنزال الكوفه

يالغيرتك غيرة علي موصوفه

والنعم منك معلوم شمرة علي وبتّاره

…………………………………………………………………………………

خادم الإمام الحسين عليه السلام

عمار هليل الواسطي

محرم الحرام ١٤٤٠ هجري

https://tttttt.me/ssgadAl

محررررم 1440 هـ .. حميدة بنت مسلم .ع.

لتفكر ابحالي اهواي . عمي الحُسين آنه اوياي
ياوالدي اشمحلاته . اتريح الگلب نظراته
عمي الحُسين آنه اوياي

كافي تشغل بالك ابحالي ابسفرتك
اطمأن يابويه لتخاف اعله بنتك
آنه يم إحسين راح ابقى ابرحلتك
من ابوسه چني ابوسك في وجنتك

من اشبگه ابذن لچفوف . من گلبي يرحل كل خوف
اتلذذ ابوساته . اتريح الگلب نظراته
عمي الحُسين آنه اوياي
_
بويه هنيالي لأن إحسين يمي
لاتفكر بيه لا لتشيل همي
هو يصبح والدي والحره امي
يشبهك لمن ينادي إحسين بسمي

صار الأبو او كلشي اوياي . هو الهوى او هو الماي
ايفرحني بحچاياته . اتريح الگلب نظراته
عمي الحُسين آنه اوياي
__
ايداري بيه صار اكثر من رقية
او كله يبنيتي حميدة اينادي الية
والله هنيالي على روحه الوفية
اشگد حنين اشگد ترف ابن الزچية

اسأل علية لو بس راح . من اگعد ابصفه ارتاح
حلوه اشكثر گعداته . اتريح الگلب نظراته
عمي الحُسين آنه اوياي
_
ابكربله ماراح اعوفه لحظة وحده
ابصفه احط راسي على نفس المخده
يمه انام او هم احط خدي اعله خده
انطي ماي اعيونه اله من يظمه جبده

واظماه احسنه اظماي . اعصرله من عيني الماي
وآنه ارتوي ابدمعاته . اتريح الگلب نظراته
عمي الحُسين آنه اوياي
__
ويه ابو الأكبر يبويه الموت ردته
يمه اوگع لمن ايوگعون جثته
امسح ادماه التي تصبغ جبهته
وآنه اظم صبعه اللي يوگع من يمنته

من خده امسح لتراب . واشفي آنه جرحه الما طاب
وامسح بعد شيباته . اتريح الگلب نظراته
عمي الحُسين آنه اوياي
___
ويه زينب ابقى لو حرگوا خيمها
اعتبرها مثل امي وابقى يمها
ينچوي جدمي ابجمر ويه جدمها
النار توصل هدمي من توصل هدمها

وياها فوگ الجمرات . امشي آنه والمسبيات
وي عمي وابنياته . اتريح الگلب نظراته
عمي الحُسين آنه اوياي

حيدر الحلفي

https://tttttt.me/ssgadAl

محرم 1440 هـ .. حميدة بنت مسلم .ع.

طفله اعله فطرتها فطرتها فطرتها
عگدتها شيلتها شيلتها شيلتها
تدعي الألاه اتريد والدها . يومية تشتم بوسته ابخدها
واتهلها دمعتها دمعتها دمعتها

طفله ابتوالي الليل . مجروحه تنحب حيل
تبچي اعله ابوها الفارگاها
واتنادي يالمعبود . بلكت اليه ايعود
مسلم رمش عيني او ضواها
تدعي ابصلاة الليل . للرب اديها اتشيل
رجعلي دنياي او حلاها
ما ادري بي سهران . لو والدي عطشان
من يضمه يتوارد ضماها

مكسورة الخاطر الخاطر الخاطر
ماتصبر الباچر الباچر الباچر
كل طفله لو مرت تناشدها . يومية تشتم بوسته ابخدها
واتهلها دمعتها دمعتها دمعتها
___
ترسم عله التربان . بوسة ابوها الچان
ايقبلها يومية او يحبها
ترست مكانه ادموع . شعلتله احله اشموع
زرعت رياحين ابدربها
تتمنه لو خطار . مسلم يمر للدار
هالليلة وايريح گلبها
لمن تشم بالثوب . عطر الأبو المحبوب
يرحل حميدة كل تعبها

شيعوض الوالد الوالد الوالد
مهمومة واتناشد اتناشد اتناشد
بالدمعة تگظي الليل وحدها . يومية تشتم بوسته ابخدها
واتهلها دمعتها دمعتها دمعتها
____
عذبها حيل افراگ . والدها بس تشتاگ
او كلمن يمر بيها تسأله
ماشفت ابوي الراح . لو تدري خلني ارتاح
ماشاهدت مسلم تگله
مشتاگه فوگ ايديه . اغفه او اقبل بيه
او كل دمعي فوگ اثيابه اهله
مامرني ليش ابطيف . نسمة عشگ بالصيف
مامر الي او يومية احنله

شو حته بحلامي بحلامي بحلامي
ماشوفه گدامي گدامي گدامي
اتقبل چفوفه كل صبح ودها . يومية تشتم بوسته ابخدها
واتهلها دمعتها دمعتها دمعتها
_____
تشكيلة عمها إحسين . ياعمي مسلم وين
طول عليه او ما اجاني
بس لا تركني او غاب . ماردلي مادگ باب
بس لا يبو الأكبر نساني
الطف لَمن وصلوه . والدها بس ذكروه
يمكن يجي گالوا نتاني
صاحت حميدة ابصوت . بس لا يعمي الموت
واصل ابوي او فارگاني

مايرجع الغالي الغالي الغالي
وامكانه ظل خالي ظل خالي ظل خالي
من عنده اخباره او يساعدها . يومية تشتم بوسته ابخدها
واتهلها دمعتها دمعتها دمعتها
_____
گضتهن الأيام . ابخيمة رقيه اتنام
كل ليلة وايباتن سوية
واتگلها لاتبچين . يرجعلچ او تنسين
باچر ابوچ او هاي هيه
اعرف صعب نسيان . ألفارگ الأوطان
لكن يردلچ بي مسية
اعرف صعب كتال . ليل الهجر لو طال
وشيحمله ليل الغاضرية

تتمنه للكوفه للكوفه للكوفه
توصلها واتشوفه واتشوفه واتشوفه
تتمنه توصله او يشاهدها . يومية تشتم بوسته ابخدها
واتهلها دمعتها دمعتها دمعتها
_
شافت مصاب إحسين . في كربله ابهالحين
او ضربوها هم اويه العقيلة
نامت عله التربان . ابلا والد او خلان
ابلا خيمة ظلت هيه ليلة
طفله او تشوف ارماح . ابصدر الحُسين الطاح
فوگ الترب محد يشيلة
تتخيل ابكل ساع . مسلم بقى ملتاع
ابلا ناصر او محد يجيلة

تتخيله إبحيره إبحيره إبحيره
متغرب إبديره إبديره إبديره
غير الأبو بالكوفه ماعدها . يومية تشتم بوسته ابخدها
واتهلها دمعتها دمعتها دمعتها

حيدر الحلفي
https://tttttt.me/ssgadAl

🔻رابط قناة الشاعر👇👇
تابعونا على قناتنا بالتلگرام على الرابط 👇
قناة الشاعر حيدر الحلفي
https://telegram.me/haidar_alhelfi

محررررم 1440 هـ مسلم بن عقيل .ع.

واحد ماظن اثنين . مسلم والغالي إحسين
كل واحد يشعر بالآخر . من ظلوا ويلي ابلا ناصر
مسلم والغالي إحسين

تشهد كل الدنيا ابسيرة خوتهم
كل ساعة الحبهم يتذكر عشرتهم
تتشابه بالكوفه او بالطف غربتهم
ابنفس اللحظات ايهلوها دمعتهم

مسلم قبله اعرف مات . بس ايحس ابلوعات
محبوبه او يعرف بالصاير . من ظلوا ويلي ابلا ناصر
مسلم والغالي إحسين
____________
خوتهم محلاها او اكثر من حلوه
إحسين او مسلم صاروا مضرب للخوه
عشرتهم عشرة ديوان اويه الگهوه
غير إحسين ابدن لا مسلم مايهوى

صارت مضرب امثال . خوتهم ماتنزال
اليوم او كل يوم او هم باچر . من ظلوا ويلي ابلا ناصر
مسلم والغالي إحسين
____________
مو بس عباس إحسين اشگد عنده اخوان
إحسين او مسلم صاروا خوان او خلان
ابگلب احسينه مسلم ندري خذله امكان
گلب إحسين ابمسلم دوم ايسولف چان

بالطف وايسولف بيه . مات او هم ما ناسيه
ماينساه اوبي متفاخر . من ظلوا ويلي ابلا ناصر
مسلم والغالي إحسين
____________
خوتهم اقسم ماتنقاس ابمقياس
حاير بيهم كل عاشگ يملك احساس
بالطف چان إحسين او تشهد كل الناس
من يشتاگ المسلم ينظر للعباس

ابعين العباس ايشوف . مسلم بس عنده اچفوف
مسلم غاب الكافل حاظر . من ظلوا ويلي ابلا ناصر
مسلم والغالي إحسين
___________
من يعطش مسلم يشعر بيه احسينه
مسلم ظامي ايگل البنته امخلينه
من يظمه إحسين اتهل مسلم دم عينه
وايگل الطوعه إحسين ادري امعذبينه

مسلم لو حل اظماه . يعطش لحسين اوياه
واحدهم يكسر چم خاطر . من ظلوا ويلي ابلا ناصر
مسلم والغالي إحسين
_____________
مو بس اعله الكافل بالطف كظ ضهره
كظ ضهره المسلم چيه ظل ابلا نصره
ماناسيه إحسين او ظل بس يتذكره
او كل ساع ايباوع لبنيته التنتظره

يبنية مسلم صاح . ميرد الوالد راح
دلالچ ليظل ايناطر . من ظلوا ويلي ابلا ناصر
مسلم والغالي إحسين

حيدر الحلفي

https://tttttt.me/ssgadAl

🛑رابط قناة الشاعر👇👇
تابعونا على قناتنا بالتلگرام على الرابط 👇
قناة الشاعر حيدر الحلفي
https://telegram.me/haidar_alhelfi

الكوفه بغدرها تـتـنطرك .... لازم تضحي دمْ منحرك
      ثوره وتوضح الثار .... أﮔﺼد طوعه للدار
                           ♣♣♣♣
            مسلم سفيرحسين برض السفاره
            ولـثـورة الـمـضـلـوم أول شـراره
            تنشد عليه اﻠـﮔـوم طـال أنـتضاره
            كتبو كـتـب لحسين ومسلم بشاره
مسلم تعنه منقذ بشير .... مصلح ﮔﺼدهم ضنو أمير
       ﮔﺎصد يصلح الصار .... أﮔﺼد طوعه للدار
                           ♣♣♣♣
            اهـل الـغـدر بـحـقـاد كـتـبـو ولاهم
            لاﭽـن أبـن سـفـيـان هوه الشراهم
            وضيع أصول الدين بحكم الدراهم
            مـسـلـم يـصـلـح الحال منقذ أجاهم
بسنة محمد مسلم يصيح .... وحكم الدراهم ضنو صحيح
        صارو عليه أشرار .... أﮔﺼد طوعه للدار
                           ♣♣♣♣
             طوعه أبلهف عالباب جيتك تراقب
             لـكـتـبو لـبـو الـسجاد أﺷﮔد مطالب
             ضنو قـدومـك هـاذ أعله المناصب
             مـسـلـم شبل معروف من الغوالب
عدهم خليفه أصبح يزيد .... للعمله صارو كلهم عبيد
        كلهم صفو كفار .... أﮔﺼد طوعه للدار
                        ♣♣♣♣
             


               بـديـرة غـرب وجناب محد يعرفك
              الكوفه أبذعر ونذار وينه اليضيفك
              سيـفـك يـصـلح الـحال لوﮔﻈﻪ ﭽﻓﻚ
              صارالضمه والجوع هوه اليضعفك
   دمك يمسلم من ينتصر .... لازم يـهـدم اهـل الـغـدر
            يصبح رمل وحجار .... أﮔﺼد طوعه للدار
                        ♣♣♣♣
                طـوعه تحشم ليه وصـلـتـك الكوم
                صول عله الكفار اليوم ألك هاليوم
                وزلزل أرض كوفان وعالساﭽر حوم 
                أبصدر الكتايب صير مـثـل حـيـدر ﮔـوم
ذكرها يبني أبفارس مضر .... غيضك يمسلم خل ينفجر
              أصلي العساﭽر نار.... أﮔﺼد طوعه للدار
♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣  
              للشاعر علي الفرطوسي

https://tttttt.me/ssgadAl