السيدة زينب تخاطب كفّين ابي الفضل العباس ((ع)) .... { أبوذيه }



طحتن ليش يچفوفه.. شمرچان
السبب شنهي وعله الشاطي.. شمرچان
اليرجف من يمر اسمه.. شمر چان
عگب عينه الشمر حداي اليه
÷÷÷÷ ÷÷÷÷ ÷÷÷÷
✍ بقلم خادم الحسين ع
الشاعر رعد الجريخي

https://tttttt.me/ssgadAl

نعي لسان حال السيده زينب مع العباس ع مفجع


ادري جفوفك بكتــرك وحالك هذا اشوفنــه
بس الضيـم جابانـــي غيرك ياهو افزعنــه
غيور واعرف بطبعـك وجرحك راح الجمنه
واكلك ضربو سكينـــه وعلينه حركو خيمنه

اجيتك حافيه واركض وانت اتكفلت بيــــــه
النار الحركت الخيمات جوت حيل رجليــــه
عمري يقارب الستيــن زحمــه انكاد مسبيه
ويعرفوني عزيزة كوم هاي التصعب عليــه

كدام الزلم والخيـــــل اركض والجدم حافـــــي
واسياط الشمر والنــار حركت ثوبي واجتافــي
اسولفلك هضم دنيــاي واحجي الصار لو كافي
رقيه تناطر الجـــودك وانـــت بنومتك غافـــي

اخت عباس يدرونـــي راسي بهيبتك عالــي
شلون اجناب تنضرني وانا مخدر اخيالــــي
عمري ارخيص يالكافل تدري والخدر غالــي
عيون الناس تطعنــــي وتجرح حيل دلالــــي

جنــت امخدره ويـــاك كلي شلون ما تصعب
بعباتي النار مستعـــره واكبالي الشمر يكرب
شمتاني يراعي الجود اختك فرت المعصـــب
اطلبك يالجبتني بديــن كوم و وفــي بالمطلب


ترضاهــه انـــربط بحبـــال وانا مخدرت عدنـــــــان
لو ترضى انضرب بالسوط و واكف وانشتم وانهان
مـــو عـــــاده لبني عدنان وحدهن تطلع النســـوان
كـــون المــــوت ياخذنـــي وكـــون موسده التربــان

عفتهه بمدمع واجيتـــك رقيه ويابسه الشفـــــه
ذبلت بالعطش والخوف عزيـــــزة كلبك الترفـــه
شكلهه اتعذرج عبـــاس وحبك يالاخـــو تعرفــــه
لو اكلهه البكه براســج على الشاطي انكطع جفه

احــــاول اقنـــع رقيـــــه وكلبهه يهود ونينـــه
بس شلــون يالغـــالــــي عذري يصير لسكينـه
تشوف ادموعي عالخدي وتسالني الكمر وينـه
مـــا اكــدر اكلهه بهـــاي دامي ونبلتـــه بعينه

نــــام مهنه بالنومــه ادري بحجــي اذيتــك
سويت الكبل ما صار وابقى اتفاخر بصيتـك
اعذرني وعتبت عليك وبدمع الجفن جيتـــك
الله ويــاك يعيونـــــي سفره بنيتـي ونيتـــك


✍الشاعر رعد الجريخي✍

https://tttttt.me/ssgadAl

نعي السيده زينب اتخاطب العباس ع

اجيتـك جيــت مسيره يمك ارد ابــث شكـواي
باچــــر تطول الفرگه واعوفك يا نظر عيناي
باچر كون ترخصني اروحـــن والزلم ويــاي
*---------------------*---------------------*
اخاف دگول مــا گلتي اجيتك وي ظلام الليل
اسولف عالسفر وياك واردد كلمة الياويـــل
شفت الهزل بعيونـــي وعــدو للمسير الخيل
*---------------------*---------------------*
ادري بــغـيــرتــــك انــــت وتحرص عالخدر وتخـاف
ما ترضى انضرب بالسوط واوكـــف وانشتم وانشاف
ومــا تـــرضى الزلم ويـاي وبچتفي الحبـــل يلتـــــاف

*---------------------*---------------------*
خويه معذور ادري وفيت وكفيـت
خويه معذور حتى لو يمك شكيــت
خويه معذور بهايه اكللك اجــيـــت
خويه معذور يـــالي بچفوفك وفيت
خويه معذور اليمنه واليسرة نطيت
خويه معذور يالگمر ما قصريـــــت
خويه معذور اعتذر يمك بچـيــــت
خويه معذور اندفن دونك يـــريـــت
خويه معذور بس جسد تنزف بقيت



✍الشاعر رعد الجريخي✍

https://tttttt.me/ssgadAl

اهازيج الى حامل لواء الحسين ووزير دفاعه ابي الفضل العباس عليه السلام

*
رفــع رايــة علي الكــرار بالطــف ساعِد العبـاس
ارتجت بالجيوش الگاع والعسكر خبــط واحتاس
رفيــف الرايــه بيمينه يگطــع للعــدو الأنفـــاس
(( والعسكر مكطعوه أنفاسه ))

*
كض بيده الهوه أعلى الجيش يــوم ألــي رفــــع راســه
وصدْ للجيش عـرض أبطـــول أبو فاضــل طفـــح بـاسه
الهوه موجود يوم الطف بس الجيش راحت منه أنفاسه
(( وبكيفه أيطلعه من الريه ))

*


يا صلّ يا سبع يمخيف يا صگر وعلّه الصيده
حيــدر چنــك ابصيده تستنكي الـــذي أتريــده
وحيدر يــا شبــل حيــدر ميـــدان الحرب عيده
(( وبالطف رديت أبصولاته ))

*
المثلك گمطت يا حيد هاي أمأصله وحره
لفّتْ بيدها القطبين يمينــك والله واليسره
تگمط بيك وتگلك نــذر يوليدي للـزهـره
(( وبالطف يا حيد توافيني ))

**
الشاعر
موسى البديري
1440 هجري

https://tttttt.me/ssgadAl

أنعصر حتى الهوى من برز چفالي
بيك تشيمت ياخويه يالغالي
يمتعلگ بروحي وگلبي وبالي

( الريشه براسك شافوها
والروس أگبالك ضموها )
-------
رجال الحرب بس انت رجاله
طبلهم گمر خلاهم وشاله
هنيال المهر عباس هنياله

( چه شايل مثلك بالحومه
والجيش شبي ذب هدومه )
---------
يانخوت أخوي حسين من ينخه
يحزام الضهر ماينفل ويرخه
ريشه الگوم وأنت تكتل بنفخه

( من تنفخ محشر حل بيها
اولها يضيع وتاليها )
---------
راكب عالزلم والمهر مرتاحه
يبو عطور الغدت بالحومه فواحه
انت الجيش كله وانت مفتاحه

( عباس انت المامش غيره
المايشبه واحد تصويره )
---------
يطاعون الكتايب خويه المرتب
يبو طاس المريش خويه ومذهب
حسين يصيحلك حي الله أخو زينب

( حي الله حزامي ونوماسي
ياعباس ورفعت راسي )
---------
ها ياشارب الكرار المعدل
عالعيله تنام الليل ماتقبل
السمه گبل الارض عباس يالتندل

( يالتندل كل مخفي ومخفي
والدنيه الجدمك ماتكفي )
-------
يالمركض الخيل بساعة الهده
يانور الگمر وشويه من خده
أخوي ومعصبي وهم حيلي من عنده

( يازينب روحي التبرالچ
أعمي عيونه الشاف خيالچ )
-------
النخل ظل ينحني من شاهد الكافل
النهر گام اعله طوله وصاح ابوفاضل
انه بخدمتك بس كونك القابل

( أمشيلك للخيمه بروحي
ميخالف لوتجري جروحي )




عبد زينب
محمد الابراهيمي

https://tttttt.me/ssgadAl

بسم الله الرحمن الرحيم
نعي قريض (للعباس عليه السلام)
شدوا رحالَ الحزنِ والزادُ البكى وابكُوا على العباسِ نبراسِ الهدى
أبكى حسيناً قتـــــلُهُ في كربــــلا والقلــــبُ ينعاهُ حزيــــــــناً واجدا
جنبَ الفراتِ ظهرُهُ منحــــنــــياً إذ قـــمرُ الأسحـــــــــارِ دامٍ قد بدا
كأنَّ سبطَ المصطفــى قالَ لَهُ أخـي لقــــــد أبكــــيتَ عيـنَ أحمدا
بعدكَ من لي يا أخي في غربتي وها أنا وحدي ومابيـــــــنَ العدا
ماذا أقولُ للعـــــطاشى والنسا وهل أقــــــــــــولُ الضيغـــــمُ ممدا
ودون كفيّهِ وماءُ جـــــــــودهِ يسقي الثرى كــــــــما دِماهُ قدْ غدا
قد شَمُتَ الأعداءُ ياابنَ والدي قمْ للخــــــيامِ عدْ معــــــــي مجددا
فزينبٌ يرنو إليكَ طَرْفُهـــــــا ومن لهــا بعدكَ يأتيــــــــني الردى
كأنَـــني أسمعهـــــا تندبنـــــي وتستـــــغـــــيثُ راحلاً مستشـهدا
**********************************************
تمت بعون الله وتوفيقه والحمدلله رب العالمين وصلى الله على محمدٍوآله الطاهرين
حيدركريم جارالله الكربلائي

https://tttttt.me/ssgadAl

🔴رابط قناة الشاعر👇👇
@haiderkarem

(هوسات العباس عليه السلام)

القوافي تنحني العباس بعتابه
وابحور الشعر من هيبته تهابه
وتتنومس بزوده وغيرته احبابه
ولعيونه املاك اتهوس
*************************
الفواطم حيدر تكفلهه بالهجره
والعباس بالطف كافل الحره
يعني ابو فاضل حيدر بزغره
ايوصفونه حيدرنه الثاني
************************************
تمت بعون الله وتوفيقه والحمدلله رب العالمين وصلى الله على محمدٍوآله الطاهرين
حيدركريم جارالله الكربلائي

https://tttttt.me/ssgadAl

🔴رابط قناة الشاعر👇👇
@haiderkarem

🏴مجموعة في رحاب الحسين🏴
⭕️برنامج محرم1441هـ/2019م⭕️
#قناة_الشعراء

◼️◾️▪️ اليوم السابع ▪️◾️◼️

💠 رابط القصائد ⬇️ 💠
https://tttttt.me/ssgadAl/5285
••••••••••••••••••••••••••••••••••••••

💠 رابط النعي والأبوذيات ⬇️ 💠
https://tttttt.me/ssgadAl/5344
••••••••••••••••••••••••••••••••••••••

◼️ برنامج محرم 1441هـ / 2019م ◼️
#محرم_1441هـ #2019م
🔺 قصائد اليوم الثامن 🔺

الليله الثامنه
1 قصيده بحق القاسم عليه السلام

اني ادري هالشهاده الكلهه تتمناهه
عنهه ياليتنا كالو واني بيهه اتباهه

من الشهد عالكلب احله 
للحسين تصير سهله       كطعيني يابواتر كطعيني 
......................

افضل الاعمال ببنادم جهاده
قربتاً لله يامحله العباده
كلبي فرحان واحس كله سعاده
فرحه مو مالت عرس مالت شهاده

امنيات هواي عنده كل بشر يتمنه
واني امنيتي الوحيده دمي يصبح حنه

هل نصر لازم احمله
للحسين تصير سهله        كطعيني يابواتر كطعيني
......................

موقف يبجي الصخر والحاله صعبه
شفت عمي حسين حاير بين  غربه
ناس ماعدهه رحم تكسر بكلبه
وهوه كلب حسين منهو الشال حبه

محد بهاي البريه يحمل امن اوصافه
ياحسافه يموت ضامي مفطرات شفافه

بيده ماي الكون كله
للحسين تصير سهله        تطعيني يايواتر كطعيني
 ........................

اشموعي مايطفن يضلن مستمرات
صارت بصينيتي من الله الكرامات
يعني جاسم للقيامه عدل مامات
المشه بدرب حسين حصل على الزينات

رفعه واجلال وكرامه وينذكر لتالي
ياهو غير حسين كلي يخلي راسك عالي

واليخدمه مايمله
للحسين تصير سهله
.........................           كطعيني يابواتر كطعيني

الشهاده الناس عدهه كرت العين
كله تركض علمنايه وهالدرب زين
شلت روحي ودمي كله على الجفين 
اني موتي صار خصيصاً للحسين

مااجامل والي بيده روحي والمعموره
لازم بطف المصايب ارسم اجمل صوره

ومن دماي اللون اكحله
للحسين تصير سهله        كطعيني يابواتر كطعيني
.........................

بالتشابيه الحضر ويأدي دوري
اعتنيله بأيدي شايل ورده جوري
سجلتهم بالسجل كلهم حضوري
شوفت الخدام من داعي سروري

الدك على صدره وذكرني ولجلي تدمع عينه
يعتنيله حسين غادي يلزمه من يمينه

هل كرم ياهو الوصله
للحسين تصير سهله        كطعيني يابواتر كطعيني
....................


 محمد هادي العقابي

https://tttttt.me/ssgadAl

الليله الثامنه
2 قصيده بحق القاسم عليه السلام


بالرويه اجاني والدي وحاجاني
بالجنه عرسك بويه بين احضاني

جسام ياماي العين   بّدماك حني الجفين
......................

يابويه جاسم هالعمر     ماتنعرف ساعاته
وصدرك الشايله گلب    ماتنظمن دكاته
لو رايد اتعيش بذكر     ماتنتهي احجاياته
درب العدل والتضحيه   باقي وترف راياته

فاني العمر يابويه لا تتمنه
عرس الشهاده ماكو اجمل منه

  منذور عمرك يالزين    جسام يانور العين
..................

ابنادم يعيش بدنيته         مره ويضل يتحسر
يوليدي من يلفي الاجل     عالرجعه ابد مايكدر
اني اريدن موتتك            مهيوبه بيك ارد افخر
عوف الزفاف وفرحتك     بالجنه يبني تبّشر

عمك إنصره بشدته والامه
طايح اريدك يالولد كدامه

ديّن وتوفيلي الديّن    جسام يانور العين
....................

راسي ترفعه لو شفت. عالرمح رافع راسك
والعمك انزفهن سوه  جروحك وكل احساسك
يوليدي وبذاك الوكت   نوما سي من نوماسك
حتلو ذبل ياس العرس .  بالجنه ورد ياسك

لامت حرب خليت الك يوليدي
وبوس ايد عمك بيهه ريحت ايدي

وخلي الجثث عالصوبين   جسام يانور العين
.....................

انزل بميدان الحرب   ورتجز وحجي بسيفك
يوليدي فز من نومتك   حقق العمك طيفك
رايد مثل جدك علي   تزعل وتاخذ حيفك
وكفه انه اريدن موتتك  وتموت كون بكيفك

يبني النزل حب الحسين بكلبه
يستانس بكل طعنه وبكل ضربه

ايعرفوهه خدام حسين    جسام يانور العين
......................

وفزيت من حلمي وبقه      صوت الابو بذاني
واحجي ويه گلبي ياگلب   من دنيتي شئتاني
من عمي انه استّذنت       محسوبه هل ثواني
بسيوف كاصدني الاجل    بطف الحزن لكاني

وعالكاع من كل كتر سايل دمي
عمري ختمته بتضحياتي العمي

ايناديني عمي بكل حين   جسام يانور العين


محمد هادي العقابي

https://tttttt.me/ssgadAl

الليله الثامنه 
3 قصيده بحق القاسم عليه السلام



كل فرح يايمه ماريدك تناطر
فرحتك خلهه لشهاده يوم عاشر
لاتهم بيه وتعاني
امشي وي زينب تراني
...........................

يمه لليفرح تره تبين علامه
على دوره وجهه تلكه الابتسامه
ماتتم الفرحه اذا راحو عمامه
لتحق يبني بقافلة حب النشامه


انته وي حسين روح اعله المنيه
وانه ايد بئيد امشي ويه السبيه
راضيه بقسمة زماني
امشي وي زينب تراني
...............

صح رحت يايمه ودموعي تجاره
لجن هاك استمع مني هل عباره
لاتظن انساك يالطولك مناره
بكل صلاتي الواجبه اقرالك زياره


السلام اعله الشهيد الماتحنه
زفته سيوف المنايه ووذرنه
دهري بسهامه رماني
امشي وي زينب تراني
..............

اه لو تعلم بحالي ياوليدي
ايدي كام تحكني محد بايس ايدي
احس دمي وكف مايسري بوريدي
زيدي نوحج عالولد ياروحي زيدي


بعد شتنطرين ياروحي من اذيه
عايشه لجل الولد راح من اديه
مامصدكه ابني جفاني
امشي وي زينب تراني
...................

الك صوره بالي ابد مافاركتني
اعله ضحكاتك الحلوه عودتني
تدري برباك شكثر متعوب متني
ويه روحي وبيهه احسن شاركتني


تدري ارتاح من انام وانته يمي
صار بعدك اكبر من الدنيه همي
ياهو يستاهل حناني
امشي وي زينب تراني
....................

ارد احلفك بالحليبه الي ارضعتهه
الي هم تشتاك لو امك عفتهه
تجري عيني اعليك ابد ماسكتتهه
ماتعرف امك لون هسه شفتهه


رسوم وجهي تغيرت يالولد يبني
امشي وايد اعله الظهر والظهر محني
حيلي بعدك فاركاني
امشي وي زينب تراني
..................

يمه ياجاسم سهر ليلي الك جان
بالفرح اكضي ولا همن بالاحزان
انته واحد بس اشوفك عشره خوان
يبني من كد ماتحبني وتكثر إحسان

تحسن الامك جنت يااغله محبوب
هسه مشدوهه وادور بين الدروب
راحت وياك الاماني
امشي وي زينب تراني


محمد هادي العقابي

https://tttttt.me/ssgadAl

طور حمزه الزغير  دهري ذبني


يوليدي يا جسام انه امك وجيت
يوليدي رد وياي ضل فارغ البيت

ردلي يبني      جاسم يبعد امك صحت وينك
.............................................................

ما بيه ارد للدار يبني وحبيبي
شيطفي نار احشاي يسعر لهيبي
جنت امرض والكاك انت طبيبي
من الله ما مقسوم تبقه نصيبي

ردلي  يبني     جاسم يبعد امك صحت وينك
............................................................

يا يمه عرسك وين جنت احسب ايام
كلت افرح وما صار عرسك يجسام
يوم الرحت لليوم وعيوني متنام
راح الفرح وياك عرسك صفه احلام

ردلي   يبني      جاسم يبعد امك صحت وينك
............................................................

يوحيدي ليش تعوف امك وحيده
والكلب نص الليل كلي شيهيده
صحت عله زينب وين جاسم اريده
مشتاكه امشي وياه وبيدي الزم ايده

ردلي  يبني    جاسم يبعد امك صحت وينك
............................................................

اسود البسه عليك حتى بمماتي
بدنيه انت ما موجود شلي بحياتي
كلما اصلي الليل ادعي بصلاتي
يا رب اخذ هل روح كرب وفاتي

ردلي  يبني    جاسم يبعد امك صحت وينك
............................................................

امك يبعد الروح بعدك حزينه
وانت ادره يا جسام بروحي الحنينه
بعدك تصير شلون طبتي المدينه
وشخبر ييمه الناس التسالني وينه

ردلي  يبني   جاسم يبعد امك صحت وينك



خادمكم  حسين ابو عباس الكعبي

https://tttttt.me/ssgadAl

مصيبه القاسم وسكينه ص💔

حركو حنه القاسم ..
وذبحو كل نياشينه
والتذبحني فوك النوك
صارت زفت اسكينه
خذو بت عمه مسبيه خذوها 😭
وذبحو جاسم وذبحو ابوها 💔
رمله اتصيح يمه اوليدي عريس 💦
وحركو كلب سكنه وركضوها🔥
يوليدي يوليدي يا جسام يوليدي
****
رملة خيطت لسكنة🙏
ثوب الزفه وانطتها💧
ومن احتركت الخيمه🔥
دافو حتى بدلتها
لبت عمه الولد عاده يزفونه ...........
بس جسام نايم سهم بعيونه .........
اجانه ابدمه ناكع والنحر محزوز.......
عريس الولد جابو يشيعونه .............
يوليدي يوليدي يا جسام يوليدي
******
بت عمك ترة اتاني
وما مش صوت من حسك
نايم ليش علتربان
اول ليله من عرسك
امك ماتت اهية من بواجيها ..............
على افراكك يجاسم والله ما بيها ........
المصيبه من اجت اخبارك اهنانه .........
كالو مات واسكينه انغمة اعليها ..........
يوليدي يوليدي يا جسام يوليدي
**********
ابو تتمنى جنت اتصير
بس اتبده نيشانك
طفل ماكو اسمعت يحجون
سهم يتربه بأحضانك
ذبحو كلشي بيك وحتى احلامك ........
وبت عمك سبوها يمه كدامك ............
والشيبت راسي من صدك هايه ..........
ذباحك شفت كاشخ بقمصانك ...........
يوليدي يوليدي يا جسام يوليدي
*****
فديت ابنحرك لعمك
ابو امريتك وابو اجروحك
ومهر نحرك نطيته الهم
ونطيت اويه المهر روحك
متمنيه جنت بصواني ازفنك ............
لجن مذبوح صعبه شلون اشوفنك .......
من كد الذبح متغير اوليدي ............
اول تالي يمه ما اعرفنك ..............
يوليدي يوليدي يا جسام يوليدي

اللحن @Alifat98

ش//علي العبادي

https://tttttt.me/ssgadAl

بندريه للقاسم ص

فاتحه ابدال العرس منصوبه
وحنتك يوليدي شو مكلوبه
حنت القاسم ..يبست علجفوف
بلكبر نايم .. عريس الطفوف
ما تمت هلفرحه
سكنه اتون يم رمحه
متأذيه ومنذبحه ... واتصيح
يا جسام .. مو وكت النومه اليوم .. ويلا
عمك شو كله ادموم .. ويلا
عاري وما عنده اهدوم ..
عريس عريس
*******
جانت امنيتي اشوف اوليدك
بيد سكنه ومرة اشوفه بأيدك
ذبحو امنيتي .. وحنتك ماتت
اسكينه من سمعت .. خرت وطاحت
واشموعك طفوها
والخيمه هجموها
واسكينه طلعوها .. علنووك
يا جسام .. ما بينه نركض حيل .. ويلا
ظلمه ونعثر بليل .. ويلا
خافن تسحكنه الخيل .. خافن تسحكنه الخيل
عريس عريس
*******
اسكينه بس اتباوع اعلى انفاسك
خاف من الرمح يفلت راسك
رمله اشكد بجت .. وذبلت حنته
لطمت علوجه .. لمن شافته
عريس اشمحلاته
زفنه عماته
وراحن بي زتاته .. بتابوت
يا جسام .. ابجسمك ليش ايمثلون .. ويلا
بعدك شاب ازغيرون.. ويلا
صعبه انشوفك مدفون .. صعبه انشوفك مدفون
عريس عريس
*******
شفت صوب الخيم ترهف عينه
عين الية وعين صوب اسكينه
شو عشك سكنه .. نام اعلى الترب
علوجه طايح .. ويلي ومنكلب
صحبانه ايزفونه
بوساده ايلمونه
مفتوحات اعيونه .. وذبيح
يا جسام .. كلب امك شو مخنوك .. ويلا
وينك صعدت علنوك .. ويلا
باجر تدخل للسوك .. باجر تدخل للسوك
عريس عريس
******
اكبال عمك يبني رافع صيتي
ابكبر واحد نندفن امنيتي
وابدال الفرح .. نصبو جادرة
وزعو علخلك .. اخيام اموجرة
واشفافك ذبلانه
واسكينه نحلانه
عماتك عطشانه .. للماي
يا جسام .. يمضحي بكل اعضاك .. ويلا
ما رد جسمك وياك .. ويلا
شلون اتحمل فركاك .. شلون اتحمل فركاك
عريس عريس
اللحن @Alifat98

ش//علي العبادي

https://tttttt.me/ssgadAl

....
الامام القاسم

......

هالساعه تكرار دورك يكرار

مثلك يحيدر من تطب عراء
هالساعه جاسم يفني كربلاء

....
جاسم جاسم
....

خندق .بدر .صفين خيبر احدها
بارض المنيه اليوم بالحنه اردها
روحي على ارض الموت انثر وردها


محله الجفوف التنترس دماء
هالساعه جاسم يفني كربلاء

جاسم جاسم
....


من ناصرا من صاح الحسين اجيته
ارجع يجاسم كل وانا رتجيته
وصاني ابوي هواي وسمع وصيته

افدي الحسين ولبي مايشاء
هالساعه جاسم يفني كربلاء


جاسم جاسم
....

عزريلي اجاني بخوف كتله انه شتريد
اسمحلي كلي ارجوك كتله ارجع بعيد
بالغاضريه اليوم وي العرس عيد

بالحومه ...لمن اعلن الفداء
هالساعه جاسم يفني كربلاء

جاسم جاسم
.....

امي جزاها الخير طيبه برباها
غالي الضنه وتنطيه فدوه لحماها
هلهللت من الراس برمح اجاها

رادت عليها تنحني السماء
هالساعه جاسم يفني كربلاء

جاسم جاسم
.....

كون الجسم ينهال بصحره اعله بتار
ولاطفله من حسين تسحك على النار
ولادمع زينب كون شايل عتب حار

ولا تنسبي من يوكع الواء
هالساعه جاسم يفني كربلاء

جاسم جاسم



....
الشاعر علي السعيدي

https://tttttt.me/ssgadAl

......
زفة حرب... القاسم .. عليه السلام
....

يانجمة اسهيل. .. يمنور اليل

لوحل صباحي تعلن الغياب
بعدك اودع. زهرة الشباب

جاسم جاسم
....

سافر بدمي حنانك .. وحتواني بكل وريد
يالتريد الحنه دمك گلبي ما ادري شيريد

هااااي المني وهاي امك يجسام
بحضني بحضنها اختار لو رايد تنام

مكدر اسلمك بيدي للمصاب
بعدك اودع زهرة الشباب
جاسم جاسم
...

زايد السيف اعله طولك لايك المصحف عليك
من رحت جم سوره يبني جلبت وتبوس اديك

موسهله مني تروح ووداعك يصير
هاي السيوف كبار ماترحم زغير


امك تعيش بفركتك عذاب
بعدك اودع. زهرة الشباب
جاسم جاسم
......

الحسن مرسوم بجمالك طولك يحرسه الإله
عليك من العين اخاف ودمك الظالم جراه

يوليدي خاف السيف من يدنه جسمك
يشوف الجمال البيك ويحلاله دمك

وتخفي ضيائك ظلمة التراب
بعدك. اودع زهرة الشباب
جاسم جاسم
.....
الله وياك من اكلك كلبي يصرخ ماله صوت
عيوني اغمضها واودعك خاف كدامك اموت

يبني ويتعب رباي سهري ودلالي
جف الدعا مديت رد چفي خالي

والچبده ضامي يخدعه السراب
بعدك اودع. زهرة. الشباب
جاسم جاسم
.....
روحتك صعبه اعله امك ياحلم امك تعااال
ارجع وارجع كلتها وادري ماترجع محااال

يبني ارد اشبكك حيل ولصدري اضمك
ساعة وترد مذبوح عمك يحملك

عريس اشوفك حنتك خضاب
بعدك. اودع. زهرة الشباب
جاسم جاسم
....
الشاعر علي السعيدي

https://tttttt.me/ssgadAl

القاسم اذكر قصته ... دمعه فاح العمته
ياغريب ويذكر ايام الغريبه .. يامصيبه
*.............................*

عايش القاسم غريب اغلب حياته
ابين ناس اغراب بس عرفو غلاته
والغريب ايحن عله اهله من صفاته
وهوه يذكر زينب وسوط الشماته

امتون زينب اذته ... دمعه فاح العمته
يحس بالام السياط العل السليبه  .. يامصيبه

*.............................*

هيه موقصة غريب ودمعه هامل
ولا امر عايش وحيد اويل القبائل
شنو قصة حزنه يل عنه تسايل
جان يذكر زينب الفوك المحامل

لوتعلت حسرته ... دمعه فاح العمته
يبجي وعله ام الخزن يعله نحيبه. . يامصيبه

*.............................*

جان يسگي الماي لاجن هوه صايم
دمعه عل  وجنه  يصب تارك علايم
وعل الترايب لو يجن الليل نايم
حته ايعيش اكثر المر عل الحرايم

بجبده طالت عطشته  ... دمعه فاح العمته
يوزع الماي وذكر شيبه خضيبه .. يامصيبه

*.............................*

جان يلهج كل وقت بسم العقيله
وهوه مامذبوح  اخوه ولا خليله
وماكو عده حرمه محتركه الها شيله
وماكو فوگ اجفوفه احبال الطويله

ماكو گيد بيمنته  ... دمعه فاح العمته
ويدري بحبال اليسر كلش عصيبه .. ياغريبه

*.............................*

قصته ويل الدمعه هالقصه عجيبه
ايساهر الليل ابصلاته وبنحيبه
جمرة بين احشاه ماتطفه لهيبه
هاشميه اشلون مضروبه وسليبه

صعبه هاي واذته ... دمعه فاح العمته
تاخذه الحسبات والونه وتجيبه .. يامصيبه

*.............................*

مختصر هذه الذكرته حزنه اكثر
بمٲتم القاسم اكيد الحره تحضر
بين المعزين اخت عباس تفتر
تعرف امها بالمجالس ويه حيدر

اجت زينب عزته ... دمعه فاح العمته
صوت بالمجلس ونين امن النجيبه .. يامصيبه

*.............................*
للشاعر علي الفرطوسي

https://tttttt.me/ssgadAl

 قصيده لشهر محرم الحرام  . ليلة القاسم

.........   .....  ......  ...... .........

وردت الياس   اشجاباها لطف
تحمل وحساس   خوفي تنشف
جله لخلق هالورده  تتفتح بكل سجده
    ***********
يبني اترف انته امن الورد  .. خليني ابوجهك اصد
                            ياجسام
بكل خيمه عطرك بيه نشم .. ورده وتفوح اجمل نسم
                             ياجسام
جاباني دهري لكربله .... اشفاك يبني ذابله
                            ياجسام
برعم تفتح بالحرب ... كل خوفي  يمه ينضرب
                             ياجسام
تسئل الناس      عن جمالك
ماشفت غير      من كمالك
يحفضك حُسين وجده  جله لخلق هالورده
    ***********
عمك وحيد بخيمته ... انصاره قله لنصرته
                            واويلاه
يوليدي قدرك خيرك   ... بين الزفاف ومقتلك
                             واويلاه
جسمك يبعد امك ترف ... تذبل ولاتحمل نزف
                              واويلاه
حته الخيم ترجف تون ... ومتوشحه بثوب الحزن
                                 واويلاه
كل الخيام        تبجي بوداع
تنطفي شموع   والفرح ضاع
جاسم مشه وشيرده  جله لخلق هل لورده
    ***********
يبني ويسلوة روحي ... مذبوح يامذبوح
                          بالحسرات
اشعلك العشره شمع ... عدنه فرح ألمن دمع
                           بالحسرات
بعد امك وثوب الفرح ... لكلبي ياجاسم جرح
                           بالحسرات
امحدبه اباب الخيم ... دلالي عصراه الالم
                            بالحسرات
عرسك اشلون     وذبحك اشلون
يوليدي جسام      والله شيهون
ذبحك كليبي ايمرده .... جله لخلق هل ورده
   ***********
وينك وين الحرب   ... ارباك شيب للكلب
                       بعدك شاب
ثوب الحرب مالاك الك ... معرس جنت اتأملك
                        بعدك شاب
ربيتك لوكت الكبر  ... اتنزلني بيدك للكبر
                         بعدك شاب
دهري فجعني بكربله ... ابني انذبح ونضر اله
                           بعدك شاب
حلمي شوصار    بيدي ادفنك
يمه اشلون         يل دافي حضنك
ويايه دهري اشعده .... جله لخلق هل ورده
   ***********
اشكر الاهي وحمده  .... من عدي يقبل هل فده
                           لجل حسين
كل عمري وابني فده ... ويسلم حسين امن العده
                              لجل حسين
دونه العمر مابيه ضوه ... بريتي يفتر كل هوه
                            لجل حسين
يوليدي وجهي بيضه ... كلب ام حسن بلكي رضه
                             لجل حسين
مروتك يجسام     أتبيضه وجهي
يم لحسين           افديته ابني
بيضت وجهي عده جله لخلق هالورده
   ***********
للشاعر علي الفرطوسي

 https://tttttt.me/ssgadAl

           قصيده ليلة الثامن محرم ليلة القاسم ابن الحسن عليه السلام
...........
ويلا يبن الحسن    ...    ويلا يبن الحسن
                            ..........
الليله ياجاسم نولّك بالدموع 
  من عضيم آمصيبتك نحني الضلوع
ونشعل بذكراك هاليله الشموع
 والمدامع دمّ هِلن
                            ..........
بحركه لونلطم عليك أحنه الصدور
منفجع بمصيبتك هذه الحضور
ونـذكـر آدمـّاك الـتـي بلـطف تفور
لابس اثياب الجفن
                            ..........
أنته شاب ومنحرم من الشباب
 بدل ثوب العرس لابس ياثياب
بـجـفـك نـشاهد تحنيك الركاب
 والسيوف اتحشدن
                            ..........
ليش سبعين الف سيف الزفتك
نحد ن بفيض الدماء ابركبتك
والـخـيـول أدوس كلها جـثتك
 والضلوع اتكسرن
                           ..........
هاي آمّك رمله أتدور عليك
ماتعرفك وين حته تعتنيك
كلب امّ وفاجده وهل تنتخيك
 يمك اتدير الجفن
                           ..........
هاذه ابوه الحسن خل  انشاركه
 الليله انعزيه لو انباركه
سمع عرس ابنه الذي بلمعركه
  ضالم اوياه الزمن
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
                    لخادمكم علي الفرطوسي 

https://tttttt.me/ssgadAl