كنت ماشي على أساس إنو معزوم قهوة، فجأة لقيتها معاي في نفس الطاولة..

ما كنت عارف إنو صحبي إتقصد يعزمها برضو..
طيب ما مشكلة..

جريت صحبي بالجنبة كدا..

شنو يااه..
ما كلمتني إنك عازمها لشنو...

يا عمك لو كلمتك ما كان جيت..
أقعد إتخجل كدا لحدي ما يخطفوها عينك عينك من قدامك..

منو القال ليك أنا بخجل منها..

هديك ليها قدامك كلمتين ذي الناس ما قلتهم ليها..
حتقعد تحبها من بعيد كدا لمتين..

فجأة كدا بقينا إتنين..
بسم الله الرحمن الرحيم صحبي فجأة إختفى في ظروف غامضة..

خمسة دقايق بدون أي حوارات..
عيون كانت على أي حاجة إلا عيونها..

صراحةً ما بقدر أعاين ليها مرتين..

"يمكن دي أكبر فرصة تجيك لحدي عندك يا محمد، الكورة في ملعبك أفتح معاها الموضوع المعين داك.."

محمد في حاجة..!!
عايز تقول حاجة..

لالالالا..
قصدي أاي أيوااا..
البتاعة العاملاها تحت الطرحة دي حلوة شديد عليكِ..

يمكن لأول مرة إتمالك نفسي و أعاين ليها جوة عيونها و هي مبتسمة إبتسامة خفيفة كدا بعد سمعت كلامي..

دا من ذوقك..
إسمها بندانة، بعدين بتثبت الطرحة وما بكون شايلة هم من فكرة شعري البيطلع برا بدون ما أحس..
عندي منها بألوان كتيرة على فكرة

أيوااا عارف..

كنت عارف حرفياً كل حاجة عنها..
لونها المفضل، الموسيقى ونوعية الأغاني البتحبها، ونمط الكتب البتحب تقراه..
و فيلمها المفضل..
اصحابها القراب منها، الحاجات البتبكيها و الحاجات البتسعدها...

"ما جربت إحساس تحب حد من بعيد و إنت حرفياً عارف تفاصيل حتى القريبين مش عارفنها..!

وفي نفس الوقت ما عندك الشجاعة تمشي تكلمو بالجواك..
ببساطة لإنك بتضعف قدامو..! "

يا سلوى..
بتعرفي شنو عن الحب المن طرف واحد..

والله...
عارفة إنو حيكون مؤذي ما لم تصارح الطرف التاني إنك بتحبو..
علشان في الحالتين حترتاح يا إتقبلك يا لالا عشان ما تكون عايش على وهم ساي..

شايفة إنو الأفضل في كل الأحوال إنك تصارح و تبوح بالجواك، بغض النظر عن البحصل..

أيوااا لإنو المشاعر دي ما حاجة بكتموها على فكرة..

"للحظة من كلامها حسيتها هي فاهمة كويس كلامي..
وفاهمة ليه نحن الإتنين برانا، بغض النظر عن إنو موعد مرتب ليهو مسبقاً دون علمنا طبعاً.."

ردة فعلك شنو لو قلت ليكِ إني بحبك..

"سكتت مُسافة و ضحكت ضحكة خفيفة كدا..."

حأكون مصدومة طبعاً، دي ما حاجة الواحد ممكن يسمعها كل يوم..
لالالالا دقيقة من اسألتك دي...
إنت قاصد....

لالا أبداً ما قصدي أي حاجة كان مجرد سؤال..

في نفس اللحظة صحبي جا من مشوارو الوهمي..
أها الحصل شنو..

والله يا صحبي ياهو بنتونس..

عاين لي مسافة كدا...
كالعادة ما قدرت تبوح ليها بمشاعرك..

لالا دقيقة يا مان ما تجيبا طاخ..

عايني يا سلوى من الآخر كدا محمد دا بحبك..
لا من الليلة لا من أمس..
وفشلت اي محاولة إنو نخليهو يجي و يكلمك بمشاعرو، طالما كان إنسان خجول و كتوم من الصعب يقيف قدام بت..

طيب ما أنا منتظراهو من قبيل قالها لي بكل الطرق إلا يقولها بصوتو..

طيب أهو عرفتي، و إتكلم بالنيابة عني..
ما عارف بس، قدامك بفقد حواسي، عديت ليالي كتيرة و أنا بدرب في نفسي على أمل أجي أقيف قدامك، و أقول ليكِ بحبك و عايزك تكوني معاي ونعمل بيت و نعيش في جنة..

"بعد ٦ شهور من الإعتراف.. "
___

خطوبتنا تمت وأهلها وافقوا إنو يدوني ليها، وعرسنا على بعد أقل من شهر.. "

#عند_المُفترق..

مافي أي خسارة من فكرة إنك تجي تبوح للإنسان الإنت بتحبو أول ما إتأكدت من ماهية مشاعرك تجاهو..
أي حاجة بتتحمل التأجيل إلا الحب بنبوح بيهو في وقتو.
كل ما طال الحب كل ما زادت إحتمالية إنو يأذيك و يدمرك كلك..


#محمد_ورق

مع إختلاف العلاقات يبقى رابط الصُحبة دا أجملهم..

البميز الصُحبة عن الحُب و الروابط الأُسرية هي إنو في تفاصيل ما بتقدر تشاركها إلا مع أصحابك...
لولا الملامة لقلت إنو في أصحاب عارفين تفاصيل عن أصحابهم أكتر من أهاليهم ذاتو، لدرجة إنو الأهل بستعينو بالأصحاب حتى في التفاصيل الصغيرة..

أسمع فلانة ديك عاجباني يا عمك..
فلانة هينة بس شوف صحبتها لو قبلت بيك بالأول..

أسمع إتشاكلت مع أبوي و حالياً أنا برة البيت..

أسمع تعالني طوالي بتلقى الديوان فاتح و أنا مسافة السِكة و أكون معاك..

أسمع أمشي حاسب لو معاك قروش..

أصلاً حاسبت قبيل..

الأصحاب عندهم لغة خاصة لا بتحتاج إشارة ولا كلام ولا تلميح..
بس فجأة كدا بتلقاهم بشاركو أي حاجة و بركزو في أدق التفاصيل.

لما الحب يقفل في وشنا بنلاقيهم..
لما نتشاكل مع ناس البيت بنلاقيهم..
و لما نتشاكل معاهم بنلاقيهم برضو..

بيعرفو كيف يلاقوك و يوصلو ليك في الوقت البتكون قافل فيهو كل السكة..

بنتشاكل مرة..
بس بنتصالح...
بنغيب عن بعض...
بس بنتلاقى...

أهلي بدفعو قروش عشان أمشي الجامعة و أقرأ، بس ما عارفين أنو لولا أصحابي ما كنت صمدت يوم واحد في الجامعة..

أهلي ما عارفين إني بصرف على أصحابي و بصرفو علي برضو..😂💚.

في أخر المطاف..
الصُحبة النضيفة و الخوة الفي الله دا الملجأ الرباني لما الدنيا تقفل في وشنا..

بنلاقي قصص الصحابة أكبر مثال على الصحبة النضيفة..
رسولنا الكريم و سيدنا أبوبكر...

يا بخت المحاط بأصحابو..

#على_سبيل_الجمال

‏"أؤمن أن الأصدقاء يبقون للأبد، لذا جميع من ذهبوا لم يكونوا أصدقاء."

‏• أرسطو
#محمد_ورق.

إنتَ ما النُص، إنتَ الكُل.. 💚.

لو لقيت نفسي بيوم بنافس علشان أوصل ليك بنسحب و بخليك وبمشي حتى لو بحبك.."
ما غرور مني بس ما بحب الحاجات الكُل الناس بتحبها..

و ما بحب أخش في جو منافسة عشان أخلي زول يختارني من وسط ناس كتيرة..
إتعلمت إتخارج من أي حتة ما بتديني قيمتي..
ما بحب أكون خطة بديلة في حياة أي زول سواء كان حبيب أو صاحِب..

عمري ما خليت نفسي تبقى حاجة ثانوية في حياة أي إنسان..
أنا زول بياع إتعلم يخلي راحة نفسو و مشاعرو في أولوية..

لإني عارف مافي مشاعر بشحدوها أو بترجوها..
و مافي إهتمام بطلبوه..
ومافي حقوق بنتظروها..

الحاجات دي لو ما كانت ليك من البداية مافي داعي تنافس عشانها..
خليك مالي مركزك وين ما تقيف الصف يبدأ منك.

#عند_المُفترق..

إتعلم تكون أناني في حق نفسك..
بيع الكون و أشتري راحتك و سلامك النفسي و الداخلي..
الزول صح سواء كان صاحب أو حبيب عمرك ما بتنافس علشان توصل ليهو..


#محمد_ورق.

سبحان الله وبحمده.

مهما ضاق بك الحال لا بد له من انفراجة، ومهما ثقل فيك القلب لا بد له من يوم فيه يتخفف، ومهما تعبت وتألمت لا بد لك من يومٍ فيه ترى كيف يكون الجبر..

يا أخي
هات قلبك، وأعطني سمعك، ودقق بعينك على قول حبيبنا صلى الله عليه وسلم:" إذًا تُكفى همك، ويغفر لك ذنبك"

أي شيء يتعبك
أي شيء يجرح روحك
أي شيء يثقلك
أي شيء يجعلك باهتا
أي شيء يؤذيك
أي شيء.. أي شيء

وكل شيء يدخل تحت بند الهم.. تُكفاه يا عبد الله!
بالصلاة والسلام على رسول الله صلى الله عليه وسلم

تب لله من ذنبك الذي أثقلك
وانو بالصلاة عليه _حبيبنا_ كفاية الهم الذي أوجعك
وارحم عقلك من التفكير
وأغلق عينك عن كل تفسير
فقط.. استمتع بكونك عبد للطيف الخبير


صل عليه وأكثر
وتضرّع بذاك لربك وأبشر❤️❤️


#محمد_علام

الخواجات ديل عندهم حاجات غريبه خلاص… الزمن بتاعهم بمشي شكله بطئ الصباح ما زينا …

الخواجه يقوم الصباح الساعه ٦ …. يلبس هدوم الرياضه و يمشي الجيم يتريض و يجي راجع يستحما … و يعمل فطور … و ما فطور ساي فطور فطور كم صنف… و يغسل الصحون و يعمل قهوه و يشربها بمزاج و يقرأ الجريده بعد كده يفتح اللاب توب و يرد علي الإيميلات … و يجهز و يكون قاااشر …. و يقول لنفسه ده حا يكون يوم عظيم…و يمشي الشغل و يصل الساعه ٩…. !

أنا حاولت اعمل كده زمان اول ما جيت البلد دي قلتا أقلد الخواجات ديل… الحصل اول تجربه لي فطرت بعد صلاه الظهر و نمتا تاني من التعب… و جاني شد عضلي غريب ذاته ….جسمي ما استوعب موضوع من السرير للجيم دي….

و صحيت العصر جعان تاني بسبب الرياضه اتغديت …..رخمتا فاخذت لي قيلوله كده لقيت المغرب جاء …

يومي حرق مره واحده… قلتا لنفسي ده يوم (……..) ساي…

و الكلام الفوق ده ما شربت القهوة و لا قريت جريدة و ما فتحتا اللاب توب ذاته و ما مشيت الجامعة أصلا…

مخي ما قادر كان يستوعب كميه المهام العملتها الصباح لانه متعود دي حاجات عاده بعملها في اسبوع …

اسع لي كم سنه بقيت زي ما اتعودت جيناتنا بصحي الصباح و بشرب شاي و مرات ما بشربه ذاته و بمشي الشغل نعسان و جري عشان احصل…

اي احسن كده أنا بقول لنفسي… الحاجات البعملوها الخواجات الصباح دي كله برستيج و شو و حاجات دنيا ساي ما حاجات ضروريه يعني …

الواحد ما يعصر علي نفسه شديد يا جماعه كمان و يركز علي الاخرة.

#محمد_الكرنوكي

على سيرة البوست الحايم من كم يوم في تيملاين البنات ومحتواه بيقول:

"يا جماعة أنا هسي جاني سؤال حيرني والله، الأولاد ديل بطبطبوا لبعض ذينا..؟ يعني الواحد بجي لصحبو يقول ليهو أنا مضايق وصحبو يقول ليه ما تزعل يا سيد الأولاد الدنيا دي ما مستاهلة وإنت حلو شديد..؟"

نحن كرجال بطبعنا مشاعِرنا مكبوتة وصعب نظهرها للعلن، ومهما كانت الدنيا عاصفة بينا بنظهر وبندعي الصلابة، يمكن لإنو إتربينا على مبدأ الرجولة إنو الراجل كائن خشن وإنو الأنثى كائن رقيق..

بس الحقيقة هي نحن كرجال بنفهم بعض ومواساتنا مختلفة فعادي تجي تقول لصحبك أنا متضايق بسبب الموضوع الكذا أو زعلان..
فالردود المتوقعة بتجي على هيأة إنت لسة ما شفت شيء😂..
أو رد غالباً هزلي جدًا، أو هي يشكي ليك كأنو بالمقابل بتحداك بس في نفس الوقت بنكون فاهمين بعض وفاهمين حجم المعاناة للسبب دا بيكون مختصر أو هزلي ضاحك وتلقائي الموضوع بتغير لضحك وونسة وهظار والذي منو..

نحن معشر الرجال الواحد عندو القدرة يتحمل أكبر ألم وخذلان ممكن ويضحك في حين سبب ساي يخليهو يضحك مافي..

الواحد بيكون عاطل وماري بمشاكل أسرية ودراسية والضغط عالي وبتلقاهو قاعد على القهوة أخر ضحك وروقان نادر جدًا يبوح لراجل ذيو عن حاجة ماري بيها..

أعتقد نفسياً دي حاجة ما كويسة بس نحن المجمتع صنع مننا العقدة دي، الإنسان محتاج يشارك ضعفو ووهنو مع صحابو الرجولة ما عندها علاقة بإني أكتم..
التراكمات بتخلي الإنسان جاف وصعب يتواصل وممكن يصل لمرحلة هو نفسو ما عارف يعمل شنو..
ولفي بينا يا دنيا

#محمد_ورق

من التفاصيل الحزينة جدًا اللفتت إنتباهي في حلقة " أولاد حيدر " من بودكاست " شاي لبنْ " ..
أحمد وهو بيحكي واحدة من المواقف أيام المدرسة قال:

في واحد من المرات دق الجرس وأخوه الأصغر منو كان معوق في رجلو فما قدر يحصل الفصل في الوقت المناسب فقام الأستاذ نازل عليه ضرب عنيف بدون ما يراعي للإصابة الكانت سبب في إنو ما يلحق..

فقام زعل من الأستاذ عشان ضرب أخوه فمشى ليهو في المكتب وإتكلم معاه بلهجة حادة، ومن الزعل مشى ضرب ود الأستاذ الكان معاه في نفس الفصل بسبب أبوه..

المدرسة عملت إستدعاء ولي أمر وجا أبوهم..
فقال لما دخلت المكتب وشفت أبوي قدامي كان عندي ثقة إنو أبوي حيقيف معاي، لإنو تصرف الأستاذ ما كان سليم..
فحكيت ليهو القصة كلها من الألف للياء..

من غير مقدمات أداني كف قدام الناس..
وعنفني وقال لي كيف الكلام ودا غلط..
كعقاب إجبرني وقتها يوميًا أمشي قبل الزمن وإعتذر ليهو لمدة إسبوع..
بالرغم من إنو دا تصرف الأباء يعتبر عفوي وردة فعل متوقعة، أكيد ما مقصدو التقليل.

الجانب المظلم من الكوميديا السوداء دي، إنو العُقد النفسية وضعف شخصية الإنسان في بعض الأحيان مصدرها الأول البيت..
بغض النظر عن غلط ولدك إتعامل وإدارك الموقف بحكمة بدون ما تقلل منو قدام الناس.

دي واحدة من الأسباب البتخلي الأطفال مجرد ما يسمعوا أبوهم جا من الشغل أي واحد بيجري على سريرو وبلم نفسو..
حتى لو كان قاعد بيلعب أو بيضحك بخلي أي حاجة في محلها..

إلا أمهم تقول ليهم أمشو سلمو على أبوكم أو أمشو جيبو ليهو موية..
بتلقى الأب ديمة قالب خلقتو قدام أطفالو..
اقل غلط بتلقاهو مستخدم العنف بدل اللين والكلام السمح..

منها الطفل بتربى على الخوف والرهبة وممكن يتحول لشخص عنيد وجاف وصعب التفاهم معاه..
أو إنسان بيواجه صعوبة إنو يتكيف مع المحيط بتاعو ويعمل إجتماعيات..

في تفاصيل خفية من الطفولة أثرها بمتد لآخر العُمر وأثرها النفسي صعب يزول..

عشان كدا بيقولوا لو أولادك ما جرو عليك وإنت داخل جاي من الشغل وهم حاضنينك وشايلين الأكياس من إيديك راجع نفسك..

التربية بالحُب واللين لا بالعقاب القسوة، حب أطفالك وخليهم يستشعروا المحبة، ولما يكبروا خاويهم وأبقى صاحبهم👌🏻.
#محمد_ورق

في الليِّل الهادي أنا ليهو بنادي..🌍💚!.

في أول ليلة لينا مع بعض في بيتنا الأشتريناهو سوا من تعبنا..
هي كانت رافضة فكرة الدلال داك وإتفقنا إنو أي حاجة في البيت نتقاسمها بالنص وبالتساوي..

هي بتضنف جوا، وأنا بهتم بالجنينة برا..
هي بتغسل وأنا كُنت بكوي..
هي بتختار ديكور البيت وأنا كُنت بنسق الألوان..

حتى في الأكل فأي واحد كان بيطبخ الأكلة الهو شاطر فيها وبنتحدى بعض مين بيخلص أسرع..

هي كانت بتظبط قهوة بتروقني جدًا، وأنا كنت بعمل شاي بالنعناع ظريف شديد..

آخر الشهر بنطلع نتسوق سوا فهي كانت بتنسق هدومي و بتعرف أنا عايز شنو بالضبط، ولا حصل إتناقشنا في ذوقها..

هي أصلاً ذُوقها حلو كفاية إختارتني..

كُل خميس متفقين نتعشى برا، والجمعة بنقضي اليُوم في بيت أهل أي واحد فينا..

عملنا صندوق و قسمنا المرتب على قسمين..
القسم الأول دا لمصروفات البيت ومصروفاتنا الشخصية..

والقسم التاني إسمو عشان مُستقبلنا..

جمعنا قروشنا شهر ورا شهر لحدي ما أشترينا عربية من مصروفنا الشخصي و الحمدلله.
كل يوم جنبها كان إنتصار عظيم..

رتبت حياتي كُلها، بتعمل سبرايز لأهلنا وبتعزمهم يتعشوا عندنا..
وبتشتري ليهم هدايا من مرتباتنا..

وأيام الكُورة كانت بتطلب من أعزم صحابي كلهم على البيت و بتعمل لينا أحلى قهوة في الدنيا وبتظبط أطعم أكل..

و كانت بتقدس مُناسباتنا الشخصية و بتهتم بالتواريخ جدًا..

أول مرة إتلاقينا..
تاريخ إرتباطنا..
تاريخ خطوبتنا..

تاريخ كتب كتابنا..
عيد ميلادي...

كُنت محظوظ جدًا بيها، ومحظوظ لإنو إتقبلتني بكامل عُيوبي، وخلتني أبطل أشرب سجاير، وخلتني إنتظم في صلاتي كمان...

وبدينا نفرغ وقت ونحفظ فيهو قرآن والحمدلله بقيت مُستقيم بفضل ربنا وهي..

حقيقي أنا بقيت نسخة لطيفة، جميلة و حياتها ملونة ومليانة حُب وفرح بسببها هي..

#عند_المُفترق..

ﺇنتِ ﻭﺃﻧﺎ ﻭﻣﻦ ﺣﻘﻨﺎ..
ﻧﺴﻜُﻦ ﻓﻲ ﺍﻟﻜﻮﺍﻛﺐ ﻓﻲ ﻗﺼﺮ لغيرﻧﺎ أﺑﺪﺍً ﻣﺎ إﻧﺒﻨﻰ..
ﻧﺴﺎﻣِﺮ ﺍﻟﻨﺠُﻮﻡ ﻭﻳﺰُﻭﺭﻧﺎ ﺍﻟﻘَﻤﺮ ﺍﻟﺤﺘﻰ ﻟﻮ ﺟﺎﻓﺎ ﺍﻟﻈﻬﻮﺭ ﻣﺎ ﺑﻐﺒﻨﺎ..
#محمد_ورق

والله مُشتاقين والشُوق بحر ، طولتَ وين ياخ تعال هِنا الشُوق فترْ..💚🌎.

الجانب الحلو من الشُوق إنو بخليك تعرف الجانب الخفي من الإنسان الإنت بتحبه..
تأثيرو عليك حتى في غيابو..

كيف تفاصيلو الكُنت بتقول عنها تافهة، فجأة بتهواها وتحبها..
حتى كلامو المزعج الكنت بتجبرو إنو يسكت..
بيخليك تبتسم لا إرادياً لما تتذكرو..
حتى الأغاني البحبها وتسمعها بالصُدفة بيسرقك لحنها وبغرقك في الشوق أكتر..

الإشتياق شعور حلو حتى لو الإنسان ما ليهو وجود في حياتك..
بوريك إنو سفاسف الأمور قيمتها كبيرة ما ذي إنت كنت فاكرها.

مرات بتكون خايف، داخلك شعور ما تمام وحالك باهت، لحدي ما تلاقي حاجة بتذكرك بالإنسان الإنت محتاجو..

كأنو بطبطب عليك وبقول ليك أنا هنا..
وكل حاجة حتبقى ذي الفل ما تشيل هم..
بتحس بآمان كأنو تفاصيلو بتخاطبك وبتحتويك..

للسبب دا بحتفظ بكل تفاصيل الناس البحبهم..
إساور، خواتم، قُصاصات، وتفاصيل كتيرة..
في وقتها بتتشاف تافهة..
بس كل حاجة قيمتها بتبين بالزمن..
وهدي بي يا شُوق هدي..💚.

#على_سبيل_الجمال.
مُشتاق ليك يا جميِّل يا رائع، ولأحلام الزمن الضايع..💚.
#محمد_ورق.

يا جماعة ربو عيالكم !!
لاقاني قبيل فيديو متداول لطفلة صغيرة سنها في حدود الخمسة سنة تقريباً وزعلانة عشان بتحب ولد وهو ما شغال بيها..

الفيديو قد يبدو لطيف وعفوي ومضحك ولإنهم أطفال في الآخر..

بس عمومًا أنا ضد فكرة الطفل يعيش أو يعمل حاجة أكبر من سنو..

معروف الأطفال بحكم عقليتهم الصغيرة بحفظو الأشياء عن ظهر قلب وبتبقى جزء منهم، الحاجة الإنت شايفها مضحكة وعفوية عادي، هو حيتعود عليها بحكم أهلو مشجعنها عليه وهو بشوفها دي حاجة كويسة وبمرق بيها للمجتمع..

مافي حاجة إسمها دا شافع وما عارف حاجة..
في حاجة إسمها دا طفل والمفروض يتعامل معاه كانه طفل وبتشال على حسب عقلو..
لو شفناه بيعمل حاجة "للبالغين" طوالي نغير نظرتو ونخليه يعيش حاجة مع عمرو..

الفيديو بالنسبة لي ما مضحك نهائي..
كيف الأهل بخلو اطفالهم يقوموا بالعقلية دي وكمان بواسو فيها نظام هو فعلاً غلطان في حقها ومصورنها فيديو..

التربية ما ساهلة، نتاج تربيتكم بنشوفو في الشارع..
أبعدو الأطفال من المسلسلات والافلام وابعدوهم من السوشيال ميديا عموماً..
ويمكن بحدود في حال التعليم..

لما تضحكوا معاهم وتشجعوهم على اشياء اكبر منهم حتفقدوا السيطرة فيهم وما حتقدروا تتحكموا فيهم بعدين لما يصلوا لسن الرشد.

#محمد_ورق

مافي اتنين بيتزوجوا بعض وهم مناسبين لبعض أو متوافقين بالكامل ..
دي إفتراضات وأوهام مراهقة وهرمونات ساي.

"التوافق" مشوار بيقطعوه الزّوجين سوا، جوة البيت.
وبيحتاج شجاعة، وتواضع وتفكير وتواصل شفّاف ومستمر.

لو بتحِب زول واخترته شريك لحياتك، ما تعتبر الزّواج ختام ونهاية سعيدة وخلاص الموضوع انتهى وحقّقنا أحلامنا وكل عاشق عقباله وبتاع.

الموضوع يادوب ابتدأ..
فخلّي جواك حسن نيّة، وطاقة للسعي والنّقاش والخلافات والتّنازلات والتفاهم والمساومة حول الأمور المادّية والجنسيّة والعاطفيّة والنّفسيّة والاجتماعيّة.

الزواج قصة جديدة، ما نهاية القصّة.

والمودّة (المحبة) مجرّد بداية.
أمّا الرّحمة (التنازل وحسن النوايا والتواضع والرِّفق) هي المتبقّي والضّامن لنجاح واستقرار الشراكة دي.

#محمد_دوشكا

بتعجبني الطريقة البعبر بيها عمار كمال عن محبته تجاه زوجته رغد عبدالرحمن..💚💍!!

لما وقع في حُبها لأول مرة كتب ليها:

أظن أن ما جعلني أحبك بشكل مفرط أنني لم أكن أتوقعك..
لم أخطط للقاءك ولا التورط فيك
لم أبحث عنك ولم انتظرك..

كنت مفاجئًا تمامًا كلحن رومانسي عُزف بشكل مباغت وسط سوقٍ مكتظ! ..

ولما جا يتكلم عنها وعن وقفتها معاه حتى وهو في أسوء حالاتو قال:

أحب كونك معي بعد كل هذه السنوات، لم تمل من مخاوفي ولم تنفرك مزاجيتي
سعيد بالخسارة على رهان رحيلك، وعدم أصابتنا بزيف أيام الصفاء الأولى.

ولما جا عيد ميلادها برضو كتب:

كمضاد للقلق والاكتئاب، احتفي بعيد ميلادك كل عام في نفس توقيت احتفال العالم بالصحة النفسية
لأسعد بأعظم اكتشافاتي، وأهم مكتسباتي..
التواريخ ترتيبات كونية واضحة، وربما صُدف يمكن استبعادها، لكني أؤمن بأني احتاجك، لأبقى بخير من الداخل..💚..

والليلة تاريخ 3/9 ذكرى زواجهم الرابعة رغد كتبت:

أربعة سنوات تحت سقفٍ واحد كانت كفيلة بأن تحول الزهرة إلى بُستان، والفراشة إلى سِرب
أربعة سنوات اختبرتنا فيها الحياة واختبرتُ أنا عشرتك في كل الظروف
تصفيقك لي في النجاح، يدكَ الممتدّة في التعب، دوائي في كل داء، حلمك عند الغضب، صبرك، وصفحك ومغفرتك في كل ذلاتي..
أربعة سنواتٍ لم يرتفع صوتك فيها إلا لمناداتي، لم أغفى يومًا وفي قلبي شَك، ولم استيقِظ وفي عيني دمع
كانت كلماتك تزيح الغبار قبل أن يتراكم، وتنفضه وترتِب كل فوضى، حتى التي لم تحدث بسببِك
أربعة سنواتٍ وانتصاري بِك لا يزال متصدراً سيرتي الذاتيّة، حيث أنه أهم إنجازاتي، وأكثر ما أود أن أُعرَف به
أحب من يناديني بإسمك، ومن يعرفني بمعرفتك، أُحِب الطريقة التي شاء الله بها أن نلتقي، احتفِظ بكل تفصيل في أعمق نقطةٍ في قلبي. 💚!

#محمد_ورق

قبل فترة دخلت على الإعلامية المتميزة "نجود حبيب" وطرحت عليها سؤال:
وسألتها كيف الإنسان بيقدر بيرجع الثقة في نفسو ومشاعرو من بعد خيبة خذلان..
ويقدر يحب من تاني..

ردها لي كان:
عشان ترجع ثقتك في نفسك إنت لازم تخلي مشاعرك الزعلانة بالتمدد والتمرد والصراخ أحياناً..

بمعنى كتمان الخذلان والخيبة والحزن دي حاجة بتزيد من حزنك وبتقفلك وبتخليك تحس كل البشر واحدة..
لازم تعود نفسك تستفيد من التجارب وتكمل حياتك..

الفرصة الحقيقية والشخص المناسب بيجي براهو لما يلقى الشبابيك والأبواب مزينة بالورد..

بمعنى إنك ما تدي التفاصيل الحزينة أكبر من حجمها وتخليها تحكم على باقي حياتك..
الحياة تجارب والتفاصيل الصح بتجي في الوقت المناسب💚.

#محمد_ورق

أنا عندي عادة بفقد الناس يمكن لإني زول بنتبه للتفاصيل لما يختفي شخص أنا بحبه بفتش وراه لحدي ما أصل ليهو..

ولما أشتاق لزول تلقائي بدخل الشات وبرسل أو بتصل ما بهتم لفكرة إنو يكون سافهني أو معلق لي مليون رسالة..

مؤخراً العادة دي بقت تتلاشى عندي ووقفتها وبقيت أسأل أنا ليه بدي التفاصيل أكبر من حجمها أحياناً، والناس أكبر من حجمهم..

الحصل لقيت نفسي جاي علي شديد، وإني صاحب كويس أكتر من اللازم، وإنا بعمل حاجات لناس ما بتستاهلها..
حالياً أنا ذي الفل لإني مركز على نفسي وبقيت ما مهتم إني أصنع صداقات أو أقوى صلاتي القديمة، وفي الحقيقة أنا مبسوط ومريح دماغي على الأخر لإنو نفسي هي أولوليتي دايماً وأبدًا💚..

#محمد_ورق

الحاجة الطلعت بيها من متابعتي اللصيقة للميديا إنها بتصور ليك الحياة المثالية في قالب معين، وتحديداً لما تبدأ تتابع الأنفلونسر والعاملين فيها مؤثرين وشخصيات عامة...

بختو ليك قوالب معينة للسعادة، قوالب معينة عشان تلاقي شريك حياة، بصور ليك إنو لازم تلبس الشيء المعين وتجاري الموضة المعينة وماركات و..و...

من هنا ثقتك بواقعك بتبقى مهزوزة وبتشوف نفسك ما كفاية، لازم أطلب الشيء الفلاني، لازم أعمل الشيء الفلاني..
هنا تاني ما بتحس بقيمة الحاجة العندك لإنو المقارنة بقت جزء منك..
عشان كدا عيشوا واقعكم وإنبسطوا بيهم مهما كانت حياتكم بسيطة..

ما تركزو مع وهم الميديا والنوعية البتدس السم في العسل..
النوع البصور ليك إنو الشخص البحبك لازم يجي شايل كل يوم بوكيه ورد ولازم يعزمك في المطعم الفلاني، أو لازم يعمل الشيء الفلاني..

دا كلو وهم ساي وأكل عيش لإنو في ناس بتطلع قروش من المحتوى دا..
ولفي بينا يا دنيا..


#محمد_ورق

لم تفهمي لُب الحكاية
أن الصرامة كاذبة، وأني برغم صلابتي في الجوف هش
وأني لطيفٌ لا مُخيف، وكم كفّي في جيبي ارتعش
كل الحكاية أنني ما اعتدتُ أن أرعى الورود ... وأني غيورٌ ربما فوق الحدود
قد أنسى يوماً أن أقول بألف خيرٍ تصبحين، لكني حاشاني أن أنسى الوعود
وأنني رغم العناد؛ ما كنتُ احتمل البعاد
هل تضجرين بكون أني لا أبوح ! وأن نطقي بالعداد !
فإن كان فاهي بالهوى دوماً بخيل، قسماً فإن القلب فيّاضٌ جواد
لم تعلمي أني اتخذتُ قرار أن أغدو حنوناً كي تعودي وتغفري
ما خلتُ يوماً أن حبي طاردٌ، وأني بعشقي قد جعلتُك تنفري أوشكتي أن تجني ثماراً من هواك بذورها ... و يا حسرةً لم تصبري
لم تفهمي لُب الحكاية 💙.
____
في مثل هذه الأيام كُتبت لب الحكاية للمرة الأولى
#محمد_عبدالرحمن

ما تحاول تجبر زول عليك!

المشغول عنك فاضي لغيرك، والبتقال عليك في الونسة، برد بالثانية والدقيقة في شات زول تاني..

ما ينفع تجبر زول عليك،ولا تلزم زول يفضي جزء من وقتو ولا يهتم بيك..

ببساطة لقيت وجودك ذي عدمو، أو الطرف التاني إنت شخص ثانوي عندو، أو ما ببادلك نفس الود والمحبة، أفصل نفسك وإتخارج..

بتكون مثير للشفقة وإنت بتشحد الإهتمام، وحتجبر الحواليك ينافقوا عشان يرضوك..
ريح دماغك وأبعد..
الدنيا مليانة ناس حلوة وخيارات سمحة..💚!!

#محمد_ورق

تعالوا أحكي ليكم موقف بطولي جدًا بطلتو واحدة من البنات وحالياً طالعة تريند وكل العالم بيتكلم عنها وعن شجاعتها..

المهم البت إسمها إبتهال أبو السعد مهندسة مغربية شغالة في شركة مايكروسوف في أمريكا..
وطبعاً من أكبر شركات التكنولوجيا في العالم..

في خلال مؤتمر صحفي تابع لشركة مايكروسفت وفي قدام كل الحضور والإعلام إتكلمت في 30 ثانية وفضحت دور الشركة مع الإبـ/ ـادة الإسرائيلية الحصلت مؤخراً..
وكيف الشركة وقفت مع الجيش الإسرائيلي من خلال دعمهم تكنولوجياً عبر الذكاء الإصطناعي بتاعها..
وقالت ليهم أكتر من 50 ألف إنسان فقدوا حياتهم وذنبهم في رقبتكم..
لإنكم تجار الحـ/ ـرب..
وقفو الذكاء الإصطناعي المستخدم في الإبـ/ ـادة دي..

طلعوها طوالي من المؤتمر..
بالمقابل طردوها من الشركة..
مع إنها يادوبها مهندسة صغيرة وبادية مستقبلها في أكبر الشركات وفي دولة متقدمة كمان..

وخسرت مرتب شهري 20 ألف دولار شهرياً ويمكن أكتر..
قفلوا ليها كل صفحاتها..
وحتلاقي مضايقات من اي حتة. ..
وما أظن في شركة تاني حتقبل توظفها..
حتتقاطع مهنياً..
وحتى باقي زمايلها إتبرو منها وقالوا شوهت صورتهم أمام الشركة..

تقبل الله منها، وعوضها كل خير..
فمن لم يستطع فبلسانه..
بت رجال والله🫶💚
#محمد_ورق

علاقة الأُستاذ طارق بإبنته تالين المفروض تُدرس في المناهج وتكون عِبرة للأباء والأجيال الجاية في إنك كيف تبني طفل وتخليهو في سن صغيرة يكون ذو فكر عالي وعقلية ناضجة جدًا بتعرف تتكلم وتعبر عن نفسها صح وبإريحية وتواجه العالم بكل ثبات وثقة..

أُمبارح لفتني لقاء ليهم في برنامج إسمو " بالمحبة" بيجي على شاكلة أسئلة مكتوبة وأي واحد بيسأل التاني، فقام بابا طارق سأل بتو وقال ليها:

حاجة ما عاجباك فيني ونفسك تغيريها !؟

فردت البت بلا تردد وقالت:
العصبية الكتيرة، عارفاك إنك بتعصب لأسباب، مرات بحسها هي طبع فيك ومرات بحسها ردة فعل..

هو رد ليها وإعتذر ليها إنو حيتمالك نفسو ويغير منها وهي تساعدو..
دي السلسلة المفقودة في أغلب البيوت لإنو مافي ثقافة حوار البتخلي علاقة الأب بالإبن تكون كتاب مفتوح وتجي تقول لأبوك وتتناقش معاه وتنصحو وينصحك..

أغلب العلاقات بتكون قافلة جدًا ما فيها مساحة للتعبير والحوار وأتمنى لو كل الأباء إنو يركزو على جانب لما تدي الطفل الشجاعة من صغير إنو يعبر عن كل حاجة فأنت بتصنع منو شخصية شجاعة مستقبلًا والعكس.

رجع سألها تاني وقال ليها أنا ممكن أعمل شنو عشان أكون أب أفضل؟

ردت: عشان تكون أب أفضل إنت محتاج تتفرغ لي أكتر قصدي إنو يكون في وقت للكلام والنقاشات..
تحاول تبطل عصبية حتى لو ما قدرت أو عصبت بسبب ردة فعل مع بعض الناس حاول قُدر ما تقدر ما تكون عصبي معاي أنا بالذات..
أنا عارفة إنو ظروف البلد ممكن تكون أثرت فيك..
عشان أنا عندي حاجات كتيرة عايزة أحكيها ليك وكلام أنا داساهو منك عشان إنت أحيانًا بتكون حساس ومتضايق وأنا ما بحب أزيدها عليك.

_اللهجة الردت بيها ولغة الجسد خلتني أتأثر أكتر وأدمع ما عشان التأثير العاطفي عشان إنو البيت فعلًا بتبني بالمحبة وإنو القسوة الكتيرة بتنفر الأطفال والبيت بيكون باهت..
الأب الصح هو الأب المتزن البيعرف متين يكون أب ومتين يكون صاحب ومستمع جيد..
وأداني إلهام ودرس عشان إتعامل بيهو مستقبلاً مع أسرتي لو ربنا أداني عُمر

فرجع تاني وسألها بتنصحيني بشنو.؟!

ردت: صحي إنت بتقدر تشاركني وتقول لي كل حاجة لكن إذا في حاجات سبق وقلت ليك لو إنت متضايق أو حاسي بحاجة ما حلوة تعال أحكي وفضفض لي..

الجملة الشدتني وحركت فيني ساكن لما قالت ليهو:
إعتبرني أمك، أي إعتبرني أمك إنو أنا الشخص الإنت بتحس بالآمان لما تجي تتكلم معاه..

كلنا في حياتنا محتاجين شخص حنون لطيف مستمع جيد لما نجي نتكلم معاه ونحكي ليه كل حاجة حاصلة معانا..
فتبارك الرحمن كنت بسأل نفسي كيف إنو طفلة في سن 7 أو 9 سنوات بتجاوب بالإريحية والشفافية والوضوح دا..

فهنا إتأكدت تمامًا من مقولة صاحبو أولادكم وخلوهم قراب شديد بالنسبة ليكم، ودي حاجة قد تكون مفقودة في الوقت الحالي..

وفي آخر المطاف بسبب طفلة إتعلمت مفاهيم كتيرة، أتمنى في يوم من الايام أكون أب ذي طارق دا عشان ربنا يرزقنا بكائن لطيف ذي تالين دي💚.

#محمد_ورق

في هذا المِساء ❤️🌍!.

عارف!
عارف اللحظة البتحس فيها إنك وصلت لحاجة كنت بتجري وراها من زمن؟
الإحساس دا مافي شيء بوصفو..
كل سقطة كانت بتعلّمك، وكل وجعة كانت بتقويك، وكل مرة وقعت فيها، كنت بتقوم وفيك يقين أكتر إنك ماشي صح..

الحلم البدأ كان بعيد، بقى واقع..
لأنك صدقت، وسعيت، وتعبت، وواجهت إحباطات وسهام كتيرة،
لكن كنت دايمًا أقوى من الظروف، وأكبر من كلام الناس.

الفرحة دي، الفخر دا، الشعور إنك قدرت .. هو أكبر إثبات إنك تستاهل.

ف أوعك توقف، أحلم تاني، خطط تاني، واجري ورا هدفك تاني وتالت وعشرُمية..
كل خطوة بتقربك، وكل تعب بكبرك..
وربنا ما بضيع سعيك.. ولا بضيع تعب انسان كان بتعب ليل ونهار.. وبسعى طول الوقت ❤️

أجتهد.. وصدق.. وربنا كريم

@tabtaba_7

#محمد_حاتم.