.

البــارت 130 ○


الثــروة الـمنسيـة 🍀

للكـاتبـة: عبيـر الكبسـي

👌🏻👇🏻 😍
📚 @rewayatyamania  🇾🇪


في القرية..
امه طلعت لاعنده بتسرع: يا عمر لو تبسر ماقال اخوك

عمر بيشوفها

امه: ايمن شل مرته وكل شي وخطي خلاص من هنا يعني عترجع انت بدل ابوك

عمر قام جلس: منش صدق

امه سمعوا صوت السياره شافت الطاقه: والله هيا ابسر

عمر قام وقف شاف من الطاقه خرجته ولفت لها: يعني هو قال عيرجع؟

امه: ايوه وعادو بيتويقح ويتليقن بتقلده بمسخره عنبسر ابنش هذه المره ماعيفعل.

عمر: عنبسر اذا ماقلعته من كل فلس هو وامه مااوقع ابن الشيخ

امه: واتزوج يا ابني لاتجلس تراعي لمرتك ترجع من الحنقه طز فيها كما تزوجت ووقعت شيخ هي عتجي من نفسها تتمسكن لك

عمر: بدون كلام هذا الوقت اللي مالقيتها جنبي وقت الصدق وفلتت وسارت مااشتي بها وانا قدني شيخ.

@rewayatyamania المصدر الأول للروايات

في المدينه..
سالم فتح الباب ودخل

مرته: يعني قلدك الله لاذلحين ! وانت داري كيف خرجت

سالم: خرجت برجلي قلك كيف خرجت

مرته: بغير لقانه ياسالم رجعني القريه لوما تنقلع بنتك ييت زوجها

سالم دخل وشاف البيت مرفوس رفس: ليش مارفعتي البيت ماهو هذا الجنان

مرته: هذه بنتك بتخرج الجن حقها فوقنا

سالم بعصبيه مسكها من يدها: لكن بطلي لش الجنان والتذراب ودوار المشاكل وتتبلي ع البنت يكفي ماقد فعلتي بها وهي جاهله اتقي الله في روحش معش جهال يامره

مرته هزرت يدها ودهفت يده ومعصبه: أسألها وبطل تجلس تصدق لمدلازتها ومسكنتها مالي دخل يا انا يا هي هذه المره

سالم: اسمعي يا هرمه انتي والجنان حقش مااقدر افتح الا بيت واحد عتجلسي جلستي ماعتجلسي وتشتي تسيري القريه الله معش سيري وحدش مع الجهال البقيه خليهم مدرسه.

@rewayatyamania المصدر الأول للروايات

ثاني يوم.. دخلت مع صديقاتها لمحل انترنت قسم البنات

بلقيس بتقطع كرت: نص ساعه بس

صاحبتها: عيكفي نص ساعه بتشوفي كم مراجع واي حين تلحقي تلخصيهن

بلقيس: نجرب نص ساعه وبعدا نزيد سهل انا عن نفسي باقي لي قليل لخصت كل شي بقيت لي بعض اشياء

صاحبتها: انا عن نفسي شاجلس هنا ساعتين

بلقيس جلست قدام جهاز وبدأت البحث وتكتب وتلخص حنبت في سطر مافهمته قامت وشافت صاحبتها: يا شهد شوفي هذا ايش يعني

شهد مش مركزه معها ومندمجه بتكتب ومبتسمه

بلقيس شافتها ايش بتكتب: مالش ليش بتضحكي

شهد ضبحت نزلت الشاشه: ايش الهباله هذه امانه زيدي اجلسي بقعتي جابري انتي

بلقيس: عفوا بس استغربت ليش بتبتسمي وانتي بتبحثي ماكنت عارفه بتكلمي حد تعرفيه

شهد وطت صوتها: ماعد الا تزيدي تحاسبيني اعرفه او ماعرفهش رجاء لاتتدخلي المهم ماتشتي

بلقيس: تصدقي نسيت الله يهديش بس حلقتيها ومابش شي

شهد بتسمع الرسايل بتوصل للجهاز استعجلت: تصدقي احسن انش نسيتي

بلقيس ضبحت من تصرفها اول شي تقلب فوقها وبعدين تضحك وكأنه مافي شي.. استغربت ونفسها تسأل كيف بتراسل شخص بالكمبيوتر..

ردت ع تلفونها وبعد ماقالت له فين هي

بلقيس: مااعرفش كيف افعل طيب لامعي جهاز ولا معنا نت في البيت ولازم

انس: قلت لش الف مره شي تشتيه تكلميني انا ابحث لش

بلقيس: يا انس مية مره اقلك مش كل شي انت.. البحث مادراك ايش الموضوع وايش من مراجع اذا بحثك انت خليت واحد يفعله لك

انس: خلاص شاخلي واحد يجهز لش كامل ويطبعه

بلقيس: مااشتيش هكذا بين استمتع مع القراءة والبحث ومافيها مالك قالب انا قسم بنات كلنا بنات

انس: ولوووو انتي مانتيش داريه بشي

بلقيس: الوقت عيكمل عليا اتم واكلمك

انس: همش الوقت والبحث ونفسش وبس مع السلامه.

بلقيس تنهدت وجلست زاعله من كلامه شافت صاحبتها الي دخلت تسمع اغاني وتلعب بطه وتجابر وشافت نفسها بتحاول وتجاهد تدرس وترضي ابوها وتتفهم خطيبها وتداري ع نفسها.. كملت طبعت الورق وخرجت

انس اتصل: وين انتي روحتي؟

بلقيس: في الطريق للبيت شاحاكيك بعدا

انس: ليش؟؟

بلقيس: لأنك عارف مايعجبني اتكلم في الشارع.. باي

انس قفل وجلس سارح يظن.. ويفكر.. وتمر قصص ومواضيع وجمل من اصحابه اللي ساكن وعايش معهم وجوهم ومراهقتهم... رسل لها: فين انتي طيب اجي لش؟

بلقيس شافتها وجلست تفكر بينها وبين سؤالها ايش قصده فين انا وعاد هو قفل اروح عند زهور وياويلها هذه المره تقل لي غيرة او حب او...

الباص مسك بريك وطرق لها بقووة

بلقيس نسيت كل شي من الفجعه اللي وقعت لها كان الباص بيصدمها ..! وصلت الجامعه واتصلت لها

زهور: تعالي انا في الكليه جي نتجابر شويه جالسه مع البنات.

بلقيس دخلت الكليه

انس بعد كلامها حس بتأنيب ضمير قرر يروح يشل موضوع من الدكتور عشان البحث

خرج المندوب وشافها: بلقيس ممكن دقيقه كلمه بخصوص البحث.

بلقيس واقفت: في شي ضروري !

المندوب: ايوه...


https://tttttt.me/rewayatyamania/51250



📚 @rewayatyamania  🇾🇪

.

البــارت 131 ○


الثــروة الـمنسيـة 🍀

للكـاتبـة: عبيـر الكبسـي

👌🏻👇🏻 😍
📚 @rewayatyamania  🇾🇪


خرج المندوب وشافها: بلقيس ممكن دقيقه كلمه بخصوص البحث.

بلقيس واقفت: في شي ضروري !

المندوب: ايوه الدكتور قال تغيروا البحث رجعت مجموعتش توزعت الآن بقيتي انتي ارجعي اسأليه الموضوع وناقشي معه

انس واقف في الطابق الثاني شافها واقفه وبتتكلم مع واحد... بيتصل ويرسل مابترد وتكنسل

نزل

بلقيس كملت تتكلم مع المندوب ومشيت لاعند البنات في الكافتيريا

انس بعد مانزل مش موجودة جلس يدورها اتصل مره ثانيه

بلقيس: ها انس الآن وصلت الكافتيريا وقدرت اجاوب عليك خير ايش في للاتصالات هذه كلها ! مالك اليوم؟؟

انس: من اللي كنتي واقفه بتتكلمي معه وايش يشتي؟

بلقيس بنبره بفرحه: انت في الجامعه ؟

انس: ايوه مالش خفتي ! ماتوقعتي صح اكون في الجامعه واتصل وتكنسلي زي كل مره

بلقيس: ايش من كل مره وبعدين ايش اسلوب المراقبه هذه ! ليش بتتكلم معي هكذا!

انس: جاوبيني من هذا !

بلقيس: المندووووب يشتي نغير البحث

انس: وليش مارديتي عليا ايش فيها لو جاوبتي وهو جنبش

بلقيس: لانه بيتكلم بسرعة معاجل ومشي وبعدين ايش شاجلس ابرر لك أشياء مافيها يا انس !

انس: فيها ان انتي تغيرتي ولو تفكري ان انا قد انا في المدينه شاسكت ع اشياء بتفعليها غلطانه عاد انا ابن القريه اللي بيغير ويجنن

زهور بتهازرها: هيااااا ساعه في التلفون

بلقيس: طيب اكلمك لما اروح وتكون هدأت

انس: لاتتعذري بهدوئي انتي خلاص قد همش الا نفسش وبس

بلقيس: وانت مش معناه خطيبي تعاملني بهذا الأسلوب وايش دخل الكلام على المدينه والقريه عرفتني يا انس من الجامعه وفي المدينه مش في القريه واخترتني وعادك مش داري من انا لذلك مابش داعي الآن لهذا الكلام

انس: رجاء اخر مره تتصرفي هذا التصرف

بلقيس ضاابحه وبتهززز رجلها

انس: تمام؟؟

بلقيس: المشكله مش دارية ايش هي اول ولا آخر مره اللي غلطت فيها

انس: هي هنا المشكله انش مش داريه بشي خلاص غلقي الموضوع وانا الغلطان زياده حبي لش وخوفي عليش ماتوقعت تزعلش لهذه الدرجه.

بلقيس: على هكذا انت فاهم الحب غلط.

انس: طيب يا بلقيس خير ان شاءالله .. يله انبسطي مع صاحباتش اسير احرق دمي لحالي احسن

بلقيس: مع السلامه.. قفلت

زهور و2 بنات صاحباتها بعد ماسمعنها جلسين جنبها: خير ايش

بلقيس: رجاء مواساه ونصايح مااشتيش ، جاوعه اكلتين؟

زهور بسفاط خربشت لثمتها بيدها: مراعيه لش.

بلقيس: ايوه خليش هكذا احسن لش شغل المحاماه حقش سيري المكتب طبقي عندهم مش عندي

ضحكين وجلسين ياكلين.

@rewayatyamania المصدر الأول للروايات

في طريقه للبيت وضابح وحاسس انها متغيره ومستقويه عليه ايش غيرها.. كيف كانت طيبه وبريئة وليش قدها هكذا مره واحده !

معقول شايفه حد احسن مني معقول في حد مهتم بها اكثر مني.

انا شكلي زيدت للأفكار الهبلا هذه مش كل اللي بين اسمعه صدق وبعدين هذه غير اعرفها واعرف طيبتها.. يا الله بس ع غباء شكلي زعلتها مني.
.
.

في #القرية..
شاف المزارعين تمردوا وغيروا في الارض الزراعه اللي بيعمر بيت مثل انس واللي فاعل حدود لارضه..

عمر : ايش في مالهم هولا ومن عمر هذا السور؟

المزارع اللي بيشتغل معه: انس

عمر: ومن اين للمسكين هذا زلط وهو بياع قراطيس وقوارير معدني

المزارع صاح: من هووو ماشاءالله عليه بيشتغل وخطب بنت سالم وزلط وبيدرس قلك قوارير.

عمر تفرج وضبح رحع وبيكلم نفسه (( ايمن جاء بيع وسرق الزلط وفلت الارض لهم ساع الغنم بيرتعوا كل من بيعمر من راسه انا اوريك يا ايمن اذا ماندمت انت وياهم وانس بس شويه عليكم عشان تحسوا حجم الخساره ووجعها مثلي ))

دخل البيت دهف الباب وغلق بعده وطلع..

ام عمر بتضحك ع حركاته المتعجرفه وبتتحيلا له: جبره سبحان الله قلدكن الله مايشبه الشيخ الله يحفظ ابني ويشفي خالد

ام ايمن: يشبه الشيخ في ايش ! في الطبايع حقه

ام عمر: مسرع قلبتي هذا وانتي الاولى قد طبايعه مابتعجبش

ام ايمن: ماعجبتني تربيه ابنش والا ما الشيخ قد عشنا ودارينا والله يختار له خيرته.


في الغرفه بعد مانبش كل شي ماعد لقي الا بصيره بس حق البيت وبقية بصاير الارض مع اخوه.

دخل لاعند ابوه وجلس يشكي له من انس وان عيال القريه بيعايروني به آخرتي مع انس ياريت وانت حبسته والا قتلته من جيز اللي انقتلوا..

الشيخ بيتفرج له بنظرات قهر ع تربيته له وحسره ان انس خرج بهذا كله بعد معاناه وعياله ولافلحوا بشي

جلست دموعه تنزل من طرف عينه

عمر مسك اصبع ابوه وخلاه يبصم ورا البصيره

أبوه كان يحاول يصيح ويضيع صوته مع الشحبه وعجز فمه عن الحركه والكلام المفهوم ودموعه بس تنزل ويتنفس بسرعه.

عمر فلت يد ابوه: خلاص بس ها هي الا بس بصمه وبقية الكلام عليا انا لاتقلق... مالك عترجع...




📚 @rewayatyamania  🇾🇪

.

البــارت 132 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


عمر مسك اصبع ابوه وخلاه يبصم ورا البصيره

أبوه كان يحاول يصيح ويضيع صوته مع الشحبه وعجز فمه عن الحركه والكلام المفهوم ودموعه بس تنزل ويتنفس بسرعه.

عمر فلت يد ابوه: خلاص بس ها هو الا بس بصمه وبقية الكلام عليا انا لاتقلق.. مالك عترجع ساع الجاهل يا شيخ هيا مه.. قد ابنك قش كل شي شفط الدنيا لابطنه هو وجهاله عادك عتبكي ع بصيره لاخليتني اصيع ولا خليتني اعيش واتمشيخ انت والجهال اللي رصيتهم وجودهم وعدمهم سوا..

@rewayatyamania المصدر الأول للروايات

في المدينه..
جالسه في غرفتها بتلعب بدبلتها وسارحه في تصرفات انس رن تلفونها ردت وملامحها عادية مافيها اي لهفه من اللي كانت فيها

انس: انا آسف لو زعلتش اليوم

بلقيس: وبعدين

انس: ولاشي تفهميني بس

بلقيس: اتفهمتك بس قدو خيرات اكثر من هكذا مااركنكش يا انس

انس: ايش قصدش؟؟

بلقيس: شاقلك بصراحه يا انس بعد اللي حصل كم قد سامحت !!

انس: طيب يا بلقيس ايش افعل وانا قدريني يوم تقلي لي ابن عمي وخطفني ومش داريه ولحقني وطلع معي وقصه ويوم تلفونش مشغول قلك صاحبتش ربع ساعه معها!

بلقيس بضبح: انسسس رجاء تغير اسلوبك هذا معي ، صدقني لو يستمر شكك قصدي غيرتك ماعنكون لبعض.

انس بصدمة: الله المستعان.. هكذا يابلقيس

بلقيس: مني صدق هكذا ايوه مش انت داري كيف بتجرحني وبتأثر فيني تصرفاتك وبتكرهني فيك

انس: وانا اقول مالش متغيره وانه قد داخلش هذا كله.

بلقيس: انت السبب تغيرت كثير كيف كنت معي في البدايه مهتم بي بتحبني عمرك ماكنت هكذا والآن كل كلامنا وتواصلنا تحقيق

انس: اوعدش آخر مره ولا عاد لي دخل منش تفعلي مافعلتي خلاص يابلقيس دلع انتي بتستغلي حبي لش وتتدلعي عليا المره الجايه لو زعلتش بكلمه ارجمي الدبله في وشي.

بلقيس: طيب يا انس

انس: المهم وحشتيني قوي

بلقيس: انس ليش ماعد بتداوم زي اول والبحث مافعلته عليه نص الدرجه المفروض تغطي درجه الحضور!

انس: مشغول يابلقيس مشغول في راسي الارض حقي الآن كل يوم واتصلوا لي جننوني اتم اتطمن واهجع واجي الاختبارات.

بلقيس: المهم لو تشتي شي قل لي تشتي افعل لك البحث انا شفعله اختار الموضوع مع الدكتور

انس: خلاص تمام عتساعديني فيه

بلقيس: اكيد..
.
.

في القريه...
عمر شل الورقه وطرحها في الكوت ولبسه ونزل.

امه: اين عتسير قد بيأذن مغرب صلي وعنتعشى

عمر: اسير اشل لي من البقاله وارجع تشتوا شي؟

امه: يله اقطب لاتتأخر مانشتي شي.

عمر خرج وجالس بيفكر


في غرفه ابوه..
ام ايمن طلعت وهي تاعبه تشوفه ماعد حد بيهتم به غيرها ادت ماء وجلست: عتصلي ياشيخ؟

بدأت تمسح يده بالماء: سامحني ماعد فيني قوه اتحملك تتوضا في الحمام وجهالك الله يهديهم بس.. من بقعتك تيمم بالماء.. مسكت يده شافت في اصبعه الحبر حق البصمه استغربت اتصلت تسأل ايمن..

ايمن: كيف مزرق ساع ماكان في المستشفى؟

امه: ماشي يا ابني ساع الطبعه حق البصمه في اصبعه

ايمن شك: كان عمر عنده؟؟

امه: ايوه حتى ماعد جهزه للصلاة

ايمن تذكر ان الاوراق حق الارض معه: طيب خير خليه يجنن

امه: يا ابني انا تعبت ونسوانه واخوتك ولافي حسهم منه

ايمن: وانا ماافعل يمه ان رجعت وقعت مشاكل وان سرت قلتوا ابوك وابوك

امه: خيرة الله الله يهديكم بس.

@rewayatyamania المصدر الأول للروايات

في البقاله وقف السياره ع الخط الرئيسي خارج القريه ونزل ..

2 شباب كانوا بيتلفتوا شافوا السياره واقفه والطاقه مفتوحه مابش مفتاح السياره لقيوا تلفون ومسدس في صندوق السياره والكوت معلق في الكرسي قلعوا المسجلة  شلوهن بسرعة ومشيوا

عمر رجع من البقاله ماركز مشي ونص الطريق بيضغط بيده ع المسجله حس بشي غريب شاف بعينه مابش مسجله... استغرب وبيسأل نفسه من قلعها حد سرقها من حوشهم !! لا لا ذكر وجاوب نفسه انا متأكد انه كانت شغاله لما مشيت وطفيتها لانه وقت اذان وصلاة.. غريب !!

لف السياره ورجع نفس المكان تلفت مابش حد الا البقاله وجنبها محل اتصالات.. نزل جلس يلوي دخل مره ثانيه  مالقي شي.. ضبببح وواصل الطريق: الحمدلله ان المفتاح معي سرقوا المسجله بس والا كانت طارت السياره.

وصل له اتصال من ايمن شاف الرقم وطنش..

بعد ماوصل البيت نزل يشتي يلبس الكوت مش موجود !!!

دوره في كل مكان طلع السيارة ورجع للبقاله مره ثانيه وهو معصصصصصب بعد مادور ومالقي شي.. كان يسوووق بعصبيه وصدم..
.
.

في المدينه ( المعرض)
انس: الحمدلله واخيرا اول مره اشل راتب كامل

المحاسب: لاتزيد تقل سلفه من حين جيت وتخصصك سلف وهدايا وخصم من الراتب

انس ضحك: صاحبك معه جمعيات للعرس وعاد رمضان جاي ولازم سلفه نتصرف للاهل

المحاسب: الله يعينك





📚 @rewayatyamania  🇾🇪

.

البــارت 133 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


في بيتهم..
سالم فتح باب غرفتها: البسي نخرج نتمشى ونتصرف

بلقيس كانت ضابحه: تمام واشتي اطبع هولا الورق على الطريق

سالم: اين الورق

بلقيس ماسكه الفلاش ميموري: هنا..

سالم: اول مره ابسرها هذه تمام هيا اسرعي

بلقيس شافت رنه منه كنسلت ورسلت له: انا مع ابي خارج.

انس: رد لها طيب لما تروحي رسلي لي معي لش خبر مهم قوي

بلقيس: ماعه رسل لي الآن ماهو

انس: تقريبا شاستلم الجمعيه قريب وبين افكر استأجر بيت ونتزوج

بلقيس: طيب لما اروح نتناقش.

وصل انس السكن وجلس مع اصحابه وبيسمع قصصهم حق كل يوم وصاحباتهم ووو.. ضبح وقام غرفته تم يصلي وجلس يحسب..

فكر يتواصل مع الاجانب اللي لقيهم ويدرس خطه كيف يبيع لهم اجود انواع البن ويزيد الدخل عنده امد مايكبرين الشجر اللي زرعهن ويكون تجارته الخاصه.. لبس وخرج لمحل انترنت..

@rewayatyamania المصدر الأول للروايات

فوق السياره..
بلقيس شافت ابوها نزل للمحل حق التلفونات يكلم علي بتسأل اخوها: مالها امك سارت البلاد؟

اخوها: قالت ضابحه منش ماتشتي تجلس معش

بلقيس: احسن

اخوها: ليش بتكرهي امي وتكرهينا

بلقيس: مابين اكرهكم ولا انتوا اخوتي هي امك اللي ماتحبني

اخوها: هي ماتحبش لان انتي قتلتي اخي هو صدق؟

بلقيس استغربت ان عاد خالتها مصدقه الموضوع سكتت ودمعت..

طلع ابوها بيكلمها شافها بتبكي: مالش؟

ابنه: قلت لها ان هي اللي قتلت اخي بكيت

سالم: ومن قال انها قتلت اخوك؟

ابنه: امي قالت لنا... جلس يحكي له.

@rewayatyamania المصدر الأول للروايات

ثاني يوم في القريه..
مرة سالم لقيت ام انس وعرفت انها عمه بلقيس: كيف خطبتي ابنش لواحده مجنونه وفيها جن !

ام انس صاحت: يا ساتر استر على ابني.. وانتي مادراش؟؟

مرة سالم:  كيف مادراني وانا عايشه معها نفس البيت ادت لنا الجنان كانت تجابرهم وتحبس نفسها في غرفتها

ام انس: هو انتي خالتها مرة ابوها؟

مرة سالم: ايوه يعني اسمعي الكلام مني

ام انس: هو حين هو منش تراجعت والا كانت بطوني في الماء

مرة سالم: مافهمت

ام انس: يعني يااختي احنا داريين كيف كنتي معها وماتحبيها وحاقده على البنت من يوم ماغرق ابنش

مرة سالم: قصدش اتبلى عليها؟؟

ام انس: كان ماهو ايش من جن والبنت ابسرتها بعيني ادب واخلاق وجمال ومتعلمه رغم ماقد فعلتي بها الا طايعه والديها ورجعت تعيش معش..

مرة سالم بضبح قامت: الحجه عندي بين احاكيش بتدافع عليها ومش هي داريه.. بريت ذمتي قبال الله ارجعي بعدا اندمي سوا وغوري ملان القريه.

ام انس: يسدوا ... هو اللي يشتيها يتحمل.. وانتي ماجلستش هنا وزوجش في المدينه او تزوج عليش.

مرة سالم شافتها ونكرت.. وجلست ضابحه وابليس يلعب بافكارها لايتزوج سالم عليها.. قررت ترجع

بعد مارجعت بلقيس البيت وبيتكلموا مع بعض

انس: في كل الاحوال للعرس شاستلف ليش اخر الوقت ماعتتجمع زلط صدقيني مابلا توقع دين وبعدا اسدد.

بلقيس: ليش يا انس مستعجل مش قلت بعد سنتين عتتخرج وتكون اثمرت شجرة البن عتبيع وتعرس

انس: واجلس اراعي سنتين بعقلش نتزوج وربش كريم عنسدد من حال الارباح

بلقيس: والدراسه قلنا نتم اول

انس: نتمها مع بعض مش احسن ما نسرق شوفتنا مع بعض في الجامعه سرقه ونخاف من كل الناس ولاحظ يبسرنا ووو...

بلقيس: تمام

انس: غريبه والله توقعتش تفرحي مثل مانا فارح بس مدري ليش حاسس ماعد انتي مثل اول ماعد بتحبيني مثل مابين احبش

بلقيس: اكيد شافرح بس مااشتيش تتكركب ديون اما قصة حب كيف مااحبك وليش اتواصل معك لومابين احبك.

انس: بس انا بين احبش اكثر.. وانتي ركنتي على حبي لش تدلعتي عليا

بلقيس: يا الله من اين بتدي الاحساس الغلط هذا مابلا انت ماعد بتحس بي مثل اول.

انس: لذلك من محانبتنا واصل خلينا نتزوج ونخلص

بلقيس : مالي دخل سد انت وابي.

انس: تم..

في الطريق زي المجنون يروح ويعيد الطريق ولو شاف حد ينزل ويتفرجه ويتفاقد حد لابس مثل الكوت حقه او لا.. لوقت متأخر والشارع فاضي رجع وضااابح.
.
.

يوم الجمعه..
امه: مالك لك 3 ايام وانت مش انت سوا او فيك شي

عمر: مابش شي

امه: اخوك غثاك بشي؟

عمر: عاشر مره تسألي نفس السؤال ماشي قلت لش

امه: مارأيك يا ابني به شيخ ماشااء الله عليه اسير ابسر مافيك عين او سحر جالس في مشكله قفا مشكله

عمر: مدري مالي اوقات احس انه به جن معي

امه: اعوذ بالله.. يو ياالله سترك ع ابني.. خلاص انا شاحاكي واحده هنا تشلنا عند شيخ ماشاءالله عليه

عمر تأفف وجالس يفكر كيف يفعل بالمصيبه هذه..
كيف يضيع بصيرة البيت

امه: قوم نزل ابوك يتشمس شويه الحوش حرام قدو قاعف جلسه

عمر بعصبيه: تمام ناهي اي حين يموت نفتهن تعبنا شلوه اطرحوه شلوه اطرحوه.. جنان وهو بخير وهو مريض

امه  شافت ام ايمن: ...


https://tttttt.me/+Ecxq_OzMYh40M2E0



📚 @rewayatyamania  🇾🇪

.

البــارت 134 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


امه: قوم نزل ابوك يتشمس شويه الحوش حرام قدو قاعف جلسه

عمر بعصبيه: تمام ناهي اي حين يموت نفتهن تعبنا شلوه اطرحوه شلوه اطرحوه.. جنان وهو بخير وهو مريض

امه  شافت ام ايمن: اتقي الله يا ابني انت ماعد انت بحسك ابدا امانه ان حد فاعل لك سحر احنا داريين اللي بيكرهوك من

ام ايمن: لاتبرري له مسحور او فيه عين حد يتحاكا على ابوه هكذا!! جزاته اللي ادا لابنش كل شي وثق فيه ماانجلط الا من تحت راسش انتي وهو سيري تعالجي انتي بدله خرجي الجن اللي معبين قلبش حقد علينا.

عمر طنشهن وطلع ينزل ابوه.

@rewayatyamania المصدر الأول للروايات

في الارض..
انس وصل بعد مااتصلوا له اصحابه ان عمر قال لهم ولا سور يبتني وترجع الارض ساع اول تنزرع قات وتوصل ليده وهو يقسم بينهم حقهم

المزارع: عمر في البيت قلنا نحاكيك قبل مايفعل شي هذه اليومتين رجع مجنون عادو تضارب مع ناس وشل ارضهم صميل ماشتي تدخل معه في مشاكل اللي حاول يقتل اخوه عيقتل غيره

انس: يقتل من امانه باغر لهم هولا بيت السرق قال ابن الشيخ.. وصل بيدقدق الباب بقوة..

عمر في الحوش مع ابوه بيصلح العربية حق ابوه

ابن كنز فتح الباب للاخير

عمر بعصبيه وصياح يرفع رجل ابوه بمهازره

انس انصدم كيف بيفعل بابوه: دلا على ابوك ياعاصي والديك

الشيخ سمع انس وجلس متأثر بيدمع وبيحاول يتكلم

عمر فلت العربيه بضبح ووقف قدام انس: نعمم!!! من يقولوا لك تجي لاوسط بيتي تعلمني كيف اتكلم مع ابي وانت مادخلك

انس: اقلك كلمة قسما بالله لو يفتتح باب الارضيه حقي وتعس ورقه واحده من الشجر لاقبرك راس الجبل واخليك عبره لاهل القريه يرموك كل يوم بشباشبهم القديمه بتسمع

عمر معصصصصب بيمشي خارج لاعنده

انس بعد من قدام الباب

عمر تكحول بالحجر اللي قدام باب بيتهم وفلت..

انس: هذا ولاشي درس بس عشان تتعلم كيف تحترم اللي جاي يحاكيك بالأدب لاباب بيتك ولو انت تشتي مقاتلة حيا بك حرام ماافلت حقي وحق ابي
وكل ماقد وقع بنا من تحت راسكم بتسمع.. ابوك قدو لاحول ولاقوة له البلاء بك انت لو عتعيد غلطته.

عمر: طيب يا انس بيننا هذه الهنجمه اذا ماخليتك تندم على اسلوبك هذا بس مش الآن احنا مشايخ ونفهم في الاصول ماشعتدي عليك باب بيتي شاقلك جهز كفنك.

انس ضحك وهو بيمشي لفت لاعنده بمسخره: اشتري لي وشارجع احاسبك والا اقلك احسبها من حال اللي قد اكلتها من ارضي.

عمر دخل لاعند ابوه خرج ضبحه: بسببك خليت ايمن يفعل كل شي ادالهم وش وخرب النظام كله اللي تعبت فيه قوى اهل القريه عليا وانا اوريهم كلهم.

الشيخ عاجزززز عن اي رد بس داخله نددددم بيشوف ابنه طلع اخسسس منه والولد اللي تمسخر به ونقص من مقداره هو وابوه اذكى واطيب من عياله حس انه عاجز مش بس بالحركة انه من وقت ماوقع شيخ لهذه اللحظه خرب كل شي.

انس قفل باب ارضيته ورجع المدينه نفس اللحظه.. شاف علي ابن عمها مع واحده بتمشي بعده نفسسسسس البالطو والشنطه حقها نفس طولها!!! عصب وقف التكس ونزل ومع السيارات مسرعه ماقدر يقطع كان يتصل وماترد وبعد ماردت

بلقيس في الغرفه والباب مفتوح ابوها في الصاله بصوت واطي: انس شاكلمك بعدا تمام

انس: ليش خرجتي معه وحدكم ومطعم !! ايش عذرش هذه المره يا بلقيس؟

بلقيس: من هو؟

بتسمع أبوها بيتكلم جنب باب غرفتها مع اخوها

انس: اللي بين اسمع صوته الان.. جاوبي

بلقيس: مش فاضيه لجنانك هذا ابي مااقدر اتكلم الآن مع السلامه

انس: كذابه تشتي تجننيني ابسرتش خاااارج نفس شنطتش نفس بالطوش ومع علي..نزلت تأكدت خطيت ساع المجنون في الشارع.. فهميني ايش بيحصل

بلقيس: قلتها بنفسك جنان

انس: يعني مواصلة تنكررري

عصب زبط الشجره الرصيف: بلقيس اخر مره اسال

بلقيس عصبت منه  قفلت التلفون لاوشه

انس عاد الاتصال

بلقيس كنسلت

ابوها واقف في باب الغرفه: تقدري يابنتي تفعلي لي شاهي

بلقيس: تمام

ابوها خرج من عندها

انس اتصل مره ثالثه

بلقيس طفته ورجمته البطاريه والغلاف والتلفون  في شنطتها وخرجت.. كان الماء يفور ساعه جنبه واقفه وهي مصدومه في انس لافين وصلت افكاره وشكوكه


انس جالس واقف جنب المطعم يروح ويرجع ويمشي ويرجع منتظر علي يخرج يتأكد من معه

من كثر توترره وعصبيته وهو بيمشي ويشوف الارض

علي خرج ومشي وطلع السياره هو وياها

انس شاف قد له ساعه ومن كثر مااتصل بها طفي تلفونه وكملت البطاريه قرر يدخل..

جلس يلوي ع الماسات في قسم العوائل بعد ماكذب ع المباشر ان اخته داخل.. ولا لقي حد

خرج للحوش حق المطعم شاف في باب ثاني خلفي شك انها خرجت منه عشان لايشوفها... وزادت عصبيته اكثر

ابوها دخل للمطبخ: مالش يابنتي نص ساعه في المطبخ على قلص شاهي؟؟ اشتي اخزن شرق

بلقيس مسحت دموعها: تمام الآن

ابوها: مالش بتبكي فيش شي

بلقيس مسحت دموعها بسرعة: ...





📚 @rewayatyamania  🇾🇪

.

البــارت 135 ○


الثــروة الـمنسيـة 🍀

للكـاتبـة: عبيـر الكبسـي

👌🏻👇🏻 😍
📚 @rewayatyamania  🇾🇪


ابوها دخل للمطبخ: مالش يابنتي نص ساعه في المطبخ على قلص شاهي؟؟ اشتي اخزن شرق

بلقيس مسحت دموعها: تمام الآن

ابوها: مالش بتبكي فيش شي

بلقيس مسحت دموعها بسرعة: مابلا فقدت لامي

سالم: اترحمي عليها يابنتي لاتبكي في الجنه ان شاءالله.

بلقيس: يا اباه انت كنت تحبها؟

سالم: كانت مرتي الله يرحمها

بلقيس: بس كنت ماتهتم بها مثل خالتي مابتفعلها كل ماتشتي

سالم: كنت منشغل مع الشيخ وزمان غير الآن يابنتي

بلقيس: الله يرحمها ويسامحك بس.

سالم شل الشاهي ودخل الديوان..

بلقيس دخلت غرفتها وشافت كل حاجه في الغرفه بتذكرها ب أنس ، هداياه بلوزتها المعطفه جلست تتذكر كل المواقف اللي كان فيها يحاسبها ويشكك بكلامها ويكذبها.. حست باحساس غريب لنفسها.. تتخيل كيف بيكون حياتها معه بعدين !

وكل شي بتشوفه بيزيد وجعها وجع لفت كل الهدايا في اكياسها.. واخر شي الدبله والمحبس طرحتهن في علبتهن.. جلست ممدده وتلفونها مقفل غلبها النوم

انس جلس معصب وتصايح مع اصحابه في السكن ورجع العمل العصر وهو بياكل نفسه ليش مقفله تلفونها ومتهربه تتكلم معه ايش مخوفها منه ! ايش مخبيه عنه؟

@rewayatyamania المصدر الأول للروايات

ثاني يوم في الجامعه كان من الصبح منتظر عند البوابه شافها تأخرت فكر انها جت قبله دخل يدورها في الكليه

بلقيس وصلت وفي يدها الأكياس ع طول في المكتبه وفتحت التلفون واتصلت له..

انس حب يبرقطها زي مافعلت له كنسل

بلقيس عادت الاتصال

انس كنسل مره ثانية

بلقيس رسلت رساله: انا في المكتبه تعال الآن ضروري

انس لقيها فرصه مناسبه يشوفها ويتكلم معها ويفهم منها كل شي

بلقيس كانت ماسكه نفسها بالقوووة وبتتساءل اللي بفعله صح او غلط ! اديت له فرص كثيره بس زاد اكثر واخاف ادي فرص اكثر ويزيد خلينا نف...

دخل قاطع افكارها بالغضب اللي في وشه وتكشيرة حواجبه ووشه غير كل مره مش مبتسم!

انس وصل وبنبره ضبح: عتخليني ع مزاجش اي حين ماتشتي تتصلي واي حين ماتخافي اسألش سؤال تتهربي فهميني ايش في؟

بلقيس شلت الاكياس من الارض طرحتهن فوق الماسه وخرجت العلبه من شنطتها وطرحتها فوق الماسه
وخرجت من بين الكراسي ووقفت قدامه: انس كانت معرفتنا ببعض والصدفه اللي جمعتنا احسن شي حصل بحياتي ، والحمدلله توفقنا ومشيت امورنا ع خير ماتوقعت ربي يسهلها هكذا كنت احس ان فرحتي في الدنيا هذه مستحيله

بس مااعرفش ليش انت تغيرت وكرهتني في اشياء كثيره في نفسي خليتني استحقر نفسي بنظري من كثر غيرتك وشكوكك فيني ولو تطورت علاقتنا عتزيد غيره وشك ويموت الحب اللي بيننا

انس: بلقيسسس

بلقيس: خليني اكمل كلامي وبررنا وتفاهمنا وتسامحنا كثير.. بس اخر شي حصل بيننا لااااا مااسمح لك لو احبك واموت فيك انك ترجعني واحده رخيصه انا تشك فيني وكذب!!

مافيش داعي ازيد واعيد الله يوفقك ويسعدك تستاهل كل خير بس نصيحه اتغير لانك عتتعب وتخسر في حياتك كثير لو تجلس هكذا
وانت اللي وصلتنا لهذا كله.. فلتت ومشيت

انس رجع لاعندها لحقها مسك شنطتها: لحظه بلقيس

بلقيس هزرت الشنطه لبستها في الجهه الثانيه وخرجت

انس لاحظ اللي حولهم بيتفرجوا  رجع للماسه شل الاشياء وخرج مصدوم منذهل اللي فعلته! ليش؟ باعته بسهوله! يعني فعلا معقول في حد بحياتها؟

بلقيس خرجت منتظره تنزل دموعها منتظره تنهار ليش هكذا! حاسه انها ماعد بتحس بشي ناحيته راحت اللهفه ونظرات الخجل والحب بينهم؟

مستغربه انها وصلت لمرحله عدم مبالاه بأي شي يحصل معها يمكن من كثر اللي مرت به؟؟ دخلت المحاضره وجلست كان الدكتور يشرح واللي جنبها يكتبين وهي بتتذكر انذهاله ونظراته لها.. بتسأل نفسها وتواسي نفسها ماتسرعت صح لا ماتسرعت هو زيد بها هو اللي كذبني وبيشوفني مثل البنات اللي بيشوفهن ويسمع عنهن.. هو اللي تغير صح حرام هو وقف معي وكان سندي في ايام صعبه بس ليش تغير ليش ماكان شكاك هكذا من اول

اللي جنبها دكمتها: مالششش ساعه اقلش ادي لش دفتري تكتبي

بلقيس كان حسها عند الباب بيدخل او لا ومش مركزه للي جنبها: لا عادي مش لازم

صاحبتها: طيب براحتش اكمل وشلي صوريه

بلقيس حست الجمله اللي سمعتها ذكرتها به لفتت لها: طيب

شافت نفسها مش فاهمه شي مشيت وروحت البيت


انس بعد ماشل الاكياس وصل لبيته رجمهن في غرفته وامتد جلس يفكر في كل اللي حصل وكأن المشاعر اللي كانت بينهم مؤقته او كذابه او مش قوية كم تعبوا وصبروا يكونوا لبعض وكيف مواقف بسيطه فرقتهم بسهوله باقل من 5 دقايق

@rewayatyamania المصدر الأول للروايات

في البيت..
سالم : ليش رجعتي بدري مابش محاضرات او كيف

بلقيس: الا بس كنت تاعبه روحت

سالم: خير فيش شي؟

بلقيس كانت متحمله داخلها ثقل بتتناساه ماقدرت تتحمل اكثر بكيت


https://tttttt.me/+Ecxq_OzMYh40M2E0




📚 @rewayatyamania  🇾🇪

.

البــارت 136 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


في البيت..
سالم : ليش رجعتي بدري مابش محاضرات او كيف

بلقيس: الا بس كنت تاعبه روحت

سالم: خير فيش شي؟

بلقيس كانت متحمله داخلها ثقل بتتناساه ماقدرت تتحمل اكثر بكيت

سالم: مالش يابنتي خير!
من امس وانتي صورتش مش سوا

بلقيس: اقلك شي يا اباه

ابوها: ايوه تحاكي

بلقيس: ماعد اشتي الخطوبه هذه افسخها

سالم: ليش حصل شي ضايقش بشي ماوقع

بلقيس: ولاشي بس انا ماعد اشتيش مش مرتاحه له ولا اشتي

سالم: بيدرس معش وكنتي موافقه وفارحه ماحصل

بلقيس: مدري المهم حاكيتك يجي يشل شنطته حق الخطبه

سالم بيصفق بضبح بيده: لاحول ولاقوة الا بالله.
انتي اخبر هذه حياتش وانتي حره.

بلقيس دخلت الغرفه واتصلت لزهور تجي لاعندها

انس رسل لها رساله: يعني الآن انتي مرتاحه؟؟

بلقيس شافت رسالته طنشت

انس: كنتي تختصري وماتلعبي بمشاعري وتقلي لي بصراحه، يا انس  معي شخص احسن منك

بلقيس منجرحه منه وبيجرحها اكثر بكلامه كأنه بيريحها ع القرار اللي اتخذته

انس: خلاص والله ماازيد ارسل حرف ولا عاد ازعجش والله يسعدش ويوفقش باللي اخترتيه

بلقيس عصبت واتصلت له: واصل يا انس واصل استمر في اللي بتقوله كرهني فيك خليني اقتنع باللي فعلته معك.. هو مابش معي حد بس الآن اي حد يتقدم لي صدقني لاوافق ، الحب مش اللي بتفعله معي انت تغيرت وغيرتني بسببك لانك جرحتني

انس: وانا مااتهددش يا بلقيس تصرفاتش كلها كانت مستفززززه بتجننيني بتتعمدي تستفزي غيرتي ليش اوقات مانا معصب ماتجاوبي ليششش بيعجبش تحرقي دمي

بلقيس: خلاص كل اللي بتقوله حصل وتم ومن الآن ارتاح.. مع السلامه.. قفلت

@rewayatyamania المصدر الأول للروايات

بعد شهر...
ومشارعه ومشاكل انس مع المزارعين يبلغوه ايش فعل عمر قرر ياخذ اجازه من عمله مفتوحه ويرجع القريه يستقر فيها يرجع بس يختبر آخر الاترام.

كانت بلقيس كل يوم تتلفت وتشوفه ما داوم ولا بيحضر !

كانت تمر بأيام صعبه بعد ماكانت ذكرياته في كل مكان.
.
.

في القريه..
انس جلس يستفيد ويتجابر مع المزارعين اللي كانوا يزرعوا البن استفاد من خبراتهم والاخطاء اللي قاموا بها اثناء الزراعه والقطف والتحميص للبن ايش اللي كان يخلي البن يفقد جودته!

ايش سبب عدم الطلب عليه فعل دراسه وبحوث وبدأ يستفيد عشان موسم الحصاد والقطف لايغلط ويجهز افضل نوعيه بن..
.
.

في الجامعة..
اهتمت بدراستها ومحاضراتها ودخلت مع جمعيات تعليم الفتاة وحقوق المرأه .. تعرفت على صديقات وناس دعمت بحوثها في تطوير التعليم في المناطق الريفيه..

بعد مارجعت متحمسه للبيت ناقشت ابوها في الموضوع اللي انطرح عليها

سالم: يعني ماهو؟؟

بلقيس: يعني كلفوني انزل وافعل احصائية في القريه حقنا كم به طلاب وكم عددهم وكيف المدرسه يعني يا اباه عيتعاونوا معي ويرمموا المدرسه ويوفروا النقص ويرسلوا مدرسات

سالم: وماعتستفيدي؟

بلقيس: كيف ما استفيد شاساعد اللي ماقدروا يواصلوا دراسه او تغطيه النقص

سالم: ماعد بش يابنتي معي عمل في القريه مااسير افعل

بلقيس: وانا معي جامعه بس الربوع عطله وخميس وجمعه يكفي

سالم: تمام

بلقيس بفرحه: تمام تسلم

خالتها: بتتعذري باللي بتقليه امد ماتسيري عشان ت..

سالم: ماهو؟

خالتها: مدري بس حين خطيبها رجع القريه من مره ماسيرتها هانك

بلقيس: سيرتي قد قلت لابي سببها اولا وثانيا بطلي الافكار هذه انا فسخت برضايا وابي داري

سالم شاف مرته: قلنا مالش دخل انتي بشي

بلقيس استغربت منها انس رجع القريه! انقطعت عن اخباره وليش رجع؟ وكيف عرفت خالتها !

سالم: وانتي مادراش بانس واخباره

مرته: عند ما رجعت الاسبوع اللي سار اعزي خالتي لقيت امه وحاكتني وقالت بتدور له بنت تخطب له

سالم: الله يوفقه انس مابش مثله ويسخر لبنتي

بلقيس قامت غرفتها

سالم لحقها: يا بنتي او غثيتي حين قلت الله يوفقه؟ للآن مادريت السبب حق الفسخ وكان انس غاثي قوووي حين رديت الشنطه اشتي افهم مالش قررتي هكذا فجأة!! عتخليني اصدق انه فعلا فيش شي

بلقيس: مافيني؟

سالم: بين اقل لو فيش شي بتتخيلي اشياء او ع ماقالت خالتش حين قلتي لها فيش جن قلت يمكن حد فعل لكم سحر

بلقيس: من عيفعل لنا سحر ياباه دكتور الجامعة؟ مالكم بتصدقوا للخرافات هذه ماعد احد جالس اخر الناس في كل شي الا اللي بيعيشوا على المواضيع هذه

سالم بعصبية: وليش فجأة فسختي تحاكي؟

بلقيس: فهمته غلط وماعد اشتي ارتبط به خلاص مش مناسبني ماعد بش راحه للموضوع

سالم: براحتش وعادها تشتي ترجع تسود وشي قبال خلق الله رجعتي بعد فسخ وللآن الوحيده اللي ماتزوجت في القريه ويكفي ماقد وقع بي بس ماذلحين تحملي انتي كلامهم مانا ماشرجعش

بلقيس: تمام

ابوها: يعني عترجعي!.

بلقيس: ايوه

ابوها: خلاص كما جهزتي حاكيني اشلش

بلقيس: تمام




📚 @rewayatyamania  🇾🇪

.

البــارت 137 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


في القريه..
امه: مالك فلت القرايه ورجعت للارض ياابني ماحصل لك

انس: والله يمه لافعلهن كلهن عتبسري في بالي شي بس لو يسبر

امه: والبنت اللي حاكيتك عليها

انس: شاخلي الزواج بعدا

امه: كيف بعدا وانا مراعيه لليوم اللي يرزقني الله بابنك قبل ما

انس: لاتكمليش ماعيقع شي وماشتزوج الآن يمه

امه: ليش

انس: ماتم اللي في راسي

امه: الله يصبرني عليك يا ابني

انس خرج ولقي الشباب اللي بيشتغلوا جمعهم وبدأوا يساعدوه ويدي لهم اجر يومي بسيط..

واحد منهم: ارضك كبيره لو استغليتها من زمان ان قد اشتريت القريه كلها بدل ماسرقها الشيخ

انس: عادي وذلحين عنشتريها

ضحك: قوي مصدق نفسك مش انت داري ان القرى اللي جنبنا زارعين اكثر منك

انس: مش هو على الكثره هي ع الجوده يا خبير

@rewayatyamania المصدر الأول للروايات

بعد يومين..
كان عمر بيلوي ويطرح اوامره للي عادهم بيخافوا منه عرف ان في واحده عتجي تطور التعليم في القريه حب يطرح نفسه في الصوره قدام الناس لعل وعسى يرضوا عنه شويه.

بعد ماوصلت كانت في المدرسه ومع عمال بيعلقوا تعليم مجاني ، نخبه من المدرسين.. الخ ودعايات اعلانيه

عمر وصل وشاف تجمعات نسوان القريه وقف وبيكلمهن: هيا مه اعجبكم واعرفوا امور عاد انا شاطور واطور القريه اكثر

فلتين بلقيس وجلسين يدعين له

بلقيس لاحظت في شي قامت وقفت بباب المدرسه وتسمع فرقتهن وخرجت

بلقيس: من هذا اللي بيتفلسف !!

عمر شافها: من هذا ! جايه قريه ماتعرفي من شيخها

بلقيس: هااا قل لي هكذا عندكم السلبطه بالوراثه

النسوان ضحكين وبدأين يقلبين ويشكين ويتكلمين مع بعض وحصلت دوشه وصياح

انس واللي بيتفق معهم بيمشوا صادف قرب من المدرسه مافهم ايش بيحصل قرب واقف بيتفرج النسوان مشين بعضهن شافها نزل راسه ورجع .. سمع عمر

عمر: هولا شكلهم ادوا لنا شويه جهال ولقانه معي انا تعلمي منهن كيف المره تكون مره ساع اسمها تغلق فمها وتحترم نفسها قلك جايه تعلمهن

بلقيس: هو واحده منهن سارت تتعلم امد تجي تعلمهن كيف يتحاذقين مع امثالك انت والسرق اللي كانوا قبلك

عمر: ياالله خراجك احنا والمكالف حق اليومتين هذه

انس: والا ماعيقع !

عمر: انت خليك في حالك وسير اتخبى قفا السور حقك وانتي مره شعرف كيف اتصرف معش

انس عصب وراح لجنبه هزره من الكوت حقه: شوف هذه المره شاعتبرك قبالي انسان لاتقلي شيخ ولا الشبح حق ابوه.. المره الجايه والله لانفحرك ونوريك كيف تتكلم مع خلق الله ع ايش بتهينهم بزلطهم ياسارق يا جاوع اكلين الحرام من حق خلق الله وجاي تتفلسف على المكالف

عمر دهفه: ماعد الا يجي واحد مثلك يتحاكى معي

انس باستفزاز قرررب منه قدام وشه وبيدق صدر عمر بيده: والااا ماعتفعل وريني !! هاااا اسكه

عمر مسك يده: اشهدوا عليه ياخبره..

بلقيس فلتتهم ودخلت جالسه خايفه داخل من اللي حصل وبتشوفهم من ورا الباب

انس: ليش يشهدوا عادهم عيعاونوني عليك هزر القلم اللي في جيبه ورجمه للارض.. هذا من حقهم ، وهزر الساعه وهذه بزلطهم... والشال نتفه ورجمه للارض وهذا اللي فاعلك شيخ عليهم بعرقهم وشقاهم بين الشمس ياشيخ السرق

اتشجعوا المزارعين.

@rewayatyamania المصدر الأول للروايات

عمر دهفه ونزل يشل ادواته: قسماً بالله لاوريك لاخليك تحلم بالنفس حلم

انس: اول سير اتعلم كيف توبه ع نفسك وبعدا احرمني النفس يا سمخ

ومشي وتفرقوا الناس بدأوا ينحازوا ويتمسكوا بأنس اكثر يشكوا له ويتقووا معه.. قدر يقنعهم يوسعوا البن ويزرعوه ويكون المشرف عليهم كلهم واحد مختص وفاهم.

بعد مامشيوا شويه رجع للمدرسه.. انس واقف وهي خارجه وماسكه استمارات وبتكلم اللي نزلت معها من الوزاره

شاف البنت اللي معها ممكن اكلم الاستاذه لوحدها

البنت بسرعة سمعته ومشيت

انس: بلقيس

بلقيس طنشت ومشيت

انس: ليش بتلاحقيني! جيت انساش هنا ليش تجي

بلقيس: لو فاعل لنفسك دراما تطمن جيت اغير شي كان نفسي اغيره وراجعه.. خرجت ومشيت مع البنت

البنت: يو يابلقيس اي حين نتم ونرجع الصدق هنا العيشه صعبة وتعب

بلقيس: ماعنعيش هنا نتم نرتب مع الجهة اللي عتدعم بس ونجهز استمارات تثبت العدد الكافي اللي يتكلفوا بالمشروع

البنت: مستغربه واحده مثلش بطيبتش واناقتش قادره تعيش هنا

بلقيس: يا صديقتي انا كنت يوم من الايام هنا عايشه والصعوبات اللي عشتها ولقيتها هي اللي غيرتني وخلتني اوصل للي انا فيه ومن فتره لفتره نحتاج نغير محيطنا ووضعنا وننزل ونتعايش مع الاقل مننا عشان نفهم احتياجهم واللي محرومين منه

البنت هزت راسها: طيب ماعتغدينا!؟ ملينا كل يوم لحم ورز

بلقيس: احمدي الله بيميزوش تلاقي وضعهم صعب بس ذبحوا لنا يتجملوا معنا لاتغنجيش

البنت ضحكت وجاوبت تلفونها


https://tttttt.me/+Ecxq_OzMYh40M2E0




📚 @rewayatyamania  🇾🇪

.

البــارت 138 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


بلقيس دخلت البيت وخلت الباب مفتوح تكمل تتكلم وتدخل

صديقتها: والله ان انا مرتاحه تطمن ولحالي مافيش في البيت حد الا هي لاتقلق وتجلس تاكل روحك وبه حكا خيرات شاقلك لما ارجع.
.
.

في القرية الثانية..
وصلوا اللي كانوا مع انس بيسمعوا خططه للمسؤول ع اراضي البن: اقلك الولد متعلم وبيفعل خطط مدروسه انصحك تزيد انتاجك احس قريه انس عترجع ساع اول كانت اضخم قريه تصدر بن قبل مايقلعها الشيخ الله لاوفقه

المسؤول: عاد هو يشتي له وقت لما تثمر وتيبس وتتحمص ويكون له اسم خليه يجلس يهدر بس عيتعب ماله في الموضوع هذا

صديق انس: انا كلمتك اضمن نفسي عندك لو خسر وانقل لك كل اخباره

المسؤول خرج رزمه زلط من جيبه: وهذا حق تعبك.
.
.

في البيت..
صديقتها: ماشاءالله عليش يا بلقيس من يصدق انش من هذه القريه مختلفه قوي وعاقله ومثقفه والوحيده اللي ماتزوجت قاصر

بلقيس ضحكت: ذلحين بتقلي ماشاءالله وعاجبش وهم بيعايروني عانس

صديقتها: ماعندهم نظر والله انش تجنني

بلقيس تنهدت وتذكرت موقفها مع انس.
.
.

بعد ايام كملت تجهز اوراق الطلاب اللي بيسجلوا في المدرسه ورجعت للمدينه تكمل معاملة المدرسه والمعلمين..

@rewayatyamania المصدر الأول للروايات

بعد شهووور..
ابوها: يعني ايش حفل تخرج؟

بلقيس:  يعني كملنا الجامعه فعيفعلوا تكريم مع حفل

ابوها ضحك: بتزبجي وانا مادخلني اجي ياسعم ان انا قريت

بلقيس: ماشي بس لأنك ولي الأمر لازم تحضر وتشوف بنتك بتتكرم

خالتها: بنت من؟ ماذلحين فارحه تتكرم  نسيتي كيف بهذلتي بابوش وخرجتينا من القريه بسمعه سارت تقرا لحالها بنت

بلقيس شافتها: بين احاكي ابي .

اخوها بدأ يكرهها من كلام امه عنها: تحاكي سوا ماقالت شي غلط

بلقيس: وانت لك فتره نسيت الفرق بيننا واني اكبر منك تكلم بأدب

خالتها: يو يو اخوش قدو رجال وتحاكيه هكذا احترميه

بلقيس: صف تاسع وانا تميت جامعه من يحترم من

سالم: بلقيس انا معش في كل شي بس بين ابسر مابتحترميه صدق

بلقيس: لانه بيدخل في كل شي وضبحني اسئله وفلسفه ومصدق روحه يمنع ويتفيضل

سالم: اخوش وله كلمه عليش الرجال هو

بلقيس تأففت ودخلت غرفتها

خالتها شافت زوجها خرج مسكت التلفون وقربت باب غرفه بلقيس وبتتكلم: يو الف مبروك ماشاءالله على بنت محمود ماعتلقي انتي ولا انس مثلها

بلقيس سمعتها وجلست تسمع سكته

خالتها بصوت عادي: والعرس اي حين؟
ايوه صح قد كان جاهز مافايده التأخير
الله يسخرلكم ارجعي اعزميني ازفه واعرس له بعيني

مع السلامه.

بلقيس جلست تسأل نفسها ليش مهتمه وبيحرق قلبها الموضوع رغم انها فسخته بارادتها وماعد تتمناه بطباعه اللي فرقت بينهم... اتصلت لزهور وجلست تكلمها..
.
.

في حفل #التخرج..
اهل انس طلعوا من البلاد وخواته حضرين

بلقيس كانت متجهزه بس حاسه ناقصها شي..
( يمكن نقصتها الاحلام والتخيلات اللي رسموها مع بعض في اول ايامهم في الجامعه انهم يتكرموا سوا !! ))

بلقيس بتشوف صديقتها (في الحمله التوعويه للتعليم) جت مع واحد
شكله زوجها

صديقتها سلمت عليها وناولتها الورد: الف مبروك لش تستاهلي كل خير

بلقيس: الله يبارك فيش وليش خسرتي نفسش

صديقتها لفتت للكرسي اللي جنبها وهو جالس بيتفرج قدامه وييسمع كلمه الحفل: لاتخافي عليا ماخسرت هو مزلط ماعليه

بلقيس بتتلفت: وين جهالش؟

صديقتها: عند امي

بلقيس: ماشاءالله مناسبين لبعض احس بينكم شبه سبحان الله قلتي لي ابن عمش هو

صديقتها لفتت له: من هو؟

بلقيس اشرت عليه براسها: زوجش

صديقتها ضحكت: هااا ايوه زوجي ابن عمي بس هذا اخي


ملقي الحفل: بلقيس سالم

بلقيس ارتبشت سمعت اسمها قاطعتها وطلعت بسرعه

خالتها شافت الورد في يدها دكمت زوجها: يعلم الله من قد ادالها ورد ع قد عمر وع قد قرايه ساكت!

ابنها متعصب وضابح

سالم: ماقصدش

مرته: مدري انت اخبر اسألها من ادالها بين ابسر الشباب معهم ورد

ابنها: والله لو واحد ان انا لاجغص لها الحفل ع راسها

سالم: اهجع ابسروا كيف ادولها الشهادة

بلقيس نزلت وبتتكلم مع صديقاتها شافته كان واقف مبتسم بيتفرجها وكأنه فارح لها حست بنغزه في قلبها وكأنه وقف فجأة ورجع ينبض غالطت نظراتها عنه رغم انها بتسرقها كل ثانيه ودقيقه

ورجعت تتشكر من صديقتها ع الورد وعادت لها انه من اخوها فانحرجت: بس ماينفعش لا

صديقتها: مابش فرق اعتبريه مني تستاهلي كل خير يله انا ماشيه.

بلقيس ودعتها ولمحت اخوها كان مبتسم لها انحرجت

ودعتها وضبحت من الوضع كيف اقرب شخص رافقها المسيره هذه رجع مجرد ذكرى بالنسبه لها.. ومشيت لاعند ابوها: نروح كملنا؟

سالم: من ادالش هولا؟

بلقيس: صاحبتي

اخوها ضحك بقزازه ( مكشر): على غيري

بلقيس: بطل حركاتك هذه واحترم نفسك

ابوها: خلاص اخطوا سكته مش وقت





📚 @rewayatyamania  🇾🇪

.

البــارت 139 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


انس شافها خرجت من قدامه سار يسلم على سالم وتجابروا شويه،

بلقيس لمحتهم فلتت ومشيت عند صاحباتها


بعد ما رجعوا البيت..

انس عزم امه وخواته وراح يتغدا معهن في المطعم جالس يفكر تعامل سالم معه غير ليش بلقيس بعد هذه الفتره ماهدأت ولاتغيرت نحوه يمكن عشان مابادر ورجع يسأل عنها بعد فتره وانها كبنت مستحيل هي اللي تبدأ وترجع تسأل عنه

امه: نكمل نتغدا ونرجع القريه يا ابني

انس: تمام لان اشتي اشرف انا على العمال قطف وكل شي

اخته: واي حين عتسافر؟

انس: السفر تقريبا بعد شهر اسير وبعدا عنبسر من عنتفق معه

امه جلست تبكي وتدعي له

انس: خلاص هيا عاد انا جنبش ليش البكاء

اخته: انت داري ان بلقيس قد انخطبت

امه شافتها وضربتها ع يدها: خلي لابني حاله ماعليش

انس: مادراش؟

اخته شافت امها: خالتها قالت لنا

انس شاف امه: صدق يمه؟

أمه هزت راسها ايوه

اخته: هيا ماقررت تبسر حياتك وانت؟

انس: لما اقرر انا مالي دخل من حد

امه لاحظته متغير وجلست ضابحه وزاعله عليه بعد ماتكلمين نسوان القريه على انس وليش رفضته بلقيس

@rewayatyamania المصدر الأول للروايات

في البيت بعد ماوصلت ودخلين يجهزين الغداء

خالتها: احس مابش معش نصيب مسكينه غثيت عليش اليوم

بلقيس: ليش؟

خالتها: انتي داريه ان خطيبش عيسافر

بلقيس: ماعادوش خطيبي

خالتها: هي هذه المشكله انش دايما تنكري النعمه

بلقيس: انا اخبر هذه حياتي وحره فيها

خالتها: حين تعلمتي لش كلمتين قد عتزنطي مابتفكريش بعقل

بلقيس طرحت لها السلطه: بنقل نفعل فيش خير لكن عادش بروحش قوي
خرجت من المطبخ

خالتها بصوت عالي: قد رحمه ربي منش ولد مابه سخا

بلقيس دخلت غرفتها وقفلت جلست تبكي على اللي وصلت له هي وأنس
نظراته لها نفس نظراته اول مره بس ليش كرهها فيه ليش ماحاول يغير طباعه ويشتري الحب اللي كان بينهم ليش ماتنازل عن افكاره وغيرته الخاطئه لها

@rewayatyamania المصدر الأول للروايات

فوق الغداء
ابوها وصل وجلس يتغدا وضابح: ماوقع بينش وبين ابن الشيخ لوما رجعتي القريه

بلقيس حكت له اللي حصل

اخوها رجم الملعقه: وليش تتحاكي معه

بلقيس: انت لاتكون تقفز وتدخل كل شويه عادك جاهل

ابوها صاح: انتي قد زيدتي بها قوي انا شكلي شاغير اسلوبي معش واربيش من جديد ليش تفعلي هكذا مايكفيش تبداع دراسه وتميتي والآن جلسه في البيت لوما يجي نصيبش شاوافق ع اول واحد وماعد لش كلمه ولا رأي

بلقيس قامت ودخلت غرفتها حست ان الماضي بينعاد بصورة اقسى..
.
.

بعد يومين في الجامعة..

انس لقي زهور: كيف انتي

زهور بتتلفت ومستغربه ليش يكلمها: الحمدلله  ومشيت

انس: سؤال واحد بس لو سمحتي

زهور: ايش؟

انس: بلقيس انخطبت صدق؟

زهور: ماشي من قال!!

انس: ولا حد خلاص بس.. مشي وجلس يفكر وعرف انها مكايد من خالتها واخته عشان يخطب وينساها

يعني اسافر وارجع وتكون هدأت نفسيتها مني وعنجتمع في القريه مثل اول واخطبها واكيد ماعترفضني
.
.

بعد شهر..
بلقيس بتتفرج لخالتها منتظره تتكلم تعرف ايش تشتي: اباه اشتي احاكيك

ابوها: تحاكي

بلقيس: ممكن احاكيك لوحدك وخرجت لغرفتها

ابوها قام

مرته: عتصدقها؟

ابوها طنش ومشي

بلقيس: صاحبتي عزمتني عندها خطوبتها اسير؟

ابوها: من هي خبيرتش هذه

بلقيس: اللي حاكيتك عنها وسافرت معي القريه

ابوها: هاا تمام

بلقيس فرحت بعد مامنعها كل شي: اي حين عتشلني

ابوها: اي حين عتجهزي؟

بلقيس: ساعه اصلي عصر والبس واخطى

ابوها: خلاص لوما اسير المحل اشلش ع طريقي

بلقيس: تمام

فرحت ودخلت تختار من بين فساتينها لقيت فستان وردي انيق بطولها فيه ورد على جهه من الكتف اختارت معه اكسسوار انيق ولفت شعرها وقامت تصلي كملت وجلست تتصبغ وتلبس فعلت روج خفيف وردي وفتحت شعرها لفته ع جنب والجنب الثاني رفعته بورد من نفس شكل الورد اللي بفستانها ولبست اكسسوارها والعبايه وخرجت

خالتها شافتها خرجت ملثمه من غرفتها: يعلم الله كم قد فعلتي مكياج حين تلثمتي

بلقيس شافت ابوها خارج ردت عليها: وانتي مادخلش مش انتي امي.. وخرجت

في الطريق..
ابوها رد عليها: ليش اوقف ماتشتي قلتي الا اوصلش شاتأخر

بلقيس: ضروري اشل لها هديه عيب

ابوها: مابش معي زلط

بلقيس: انا معي

ابوها: ومالش ماتدي لخالتش لوما طلبتني ومابش معي

بلقيس: مادخلني منها

ابوها: انزلي انتي قلبش حاقد وأسود قوي

بلقيس انجرحت من اسلوبه وتغييره عليها نزلت واشترت وراحت لبيت صديقتها

استغربت كيف البيت ذوق وديكور وشي فوق الروعه وصاحبتها قبلت تجلس في بيتهم حق القريه قديم كل شي فيه حست بكمية التواضع اللي فيها وماحسستها وربطت صداقتهن بالمظاهر..

دخلت وجلست منتظره عرفت واحده بس من اللي كانت تشتغل معهم والباقي وجوه غريبه عليها بتتفرج لها وتبتسم لهم


https://tttttt.me/+Ecxq_OzMYh40M2E0



📚 @rewayatyamania  🇾🇪

.

البــارت 140 ○


الثــروة الـمنسيـة 🍀

للكـاتبـة: عبيـر الكبسـي

👌🏻👇🏻 😍
📚 @rewayatyamania  🇾🇪


بعد ماخرجت صاحبتها ولابسه وفتحين لها الاغنيه وتصورين معها الاهل وصاحباتها

بلقيس شافت الساعه وقت ابوها يجي لها قامت لعندها باركت لها وناولتها هديتها

صاحبتها حضنتها وبتعرف امها عليها: هذه بلقيس اللي كلمتش عنها

امها رجعت تسلم عليها من جديد: حيا بالقمر لش حياة الدنيا ماشاءالله كم تحبش ملاك وتحاكيني عليش

بلقيس انحرجت وابتسمت لهن جلست جنبها جابرتها شوية وعرفتها ببقية اسرتها وصلها اتصال من ابوها ومشيت روحت

في الحوش ع خرجتها وهو بيفتح الباب دخل..

اخو صديقتها شافها ونزل عيونه ودخل

بلقيس شافته وبتقارن في مخيلتها شبهه بصديقتها.. خرجت وطلعت السياره مع ابوها.

@rewayatyamania المصدر الأول للروايات

بعد الحفله الليل

ملاك: هيا ابسرت ماقالت امي وخواتك واسأل خالتك وعمتك كلهم اعجبتهم

اخوها: تمام بعدكم وانا قلت شي؟

اخته فرحت وحضنته: الله يتمم لكم ع خير

اخته: اي حين عتسيروا تخطبوا؟

امها: اول يابنتي نرسل حد لاعند ابوها؟ واسطه وبعدا نبسر ماعيقولوا

بنتها: ايوه تمام وانا ماشاتحاكاش معها خالص لاحرجها
.
.

انس وصل عدة دول في الخليج وتنقل فيها بعد معاناه ومشقه حصول الفيزه واكثر سبب سهل له كان العروض اللي معه لتصدير البن
حصل على موافقه من بعض شركات في الامارات لاستيراد حبوب البن خام بشروط ومعايير محدده والدوله تقوم بتعبئتها بس شرط عليهم يكون اسم العلامة التجاريه منسوبه له باسم ( بن الملكة بلقيس) وبعدها انتقل لبقية الدول..
.
.

بعد اسبوعين في المحل عند ابوها

سالم: اهلا وسهلا نعم انا من انت؟

جلس الرجال: والله انا يا اخي واسطه لبيت فلان طالبين القرب من بنتك

جلسوا يتكلموا في كل التفاصيل

الرجال في الاخير: بس مستعجلين على الزواج لأن يشتوا يعرسوا لابنهم مع بنتهم

سالم: خير اول نبسر البنت وبعدا مااقلك الا الله يتمم مافيه الخير

بلقيس رغم حبستها في البيت وابوها منعها من كل شي الا انه تغير النت وتطور البرامج التواصل الاجتماعي ساعدتها تتواصل مع صاحباتها ومشاركتهم العمل من مكانها ماحست شي وقف طموحها وتطوير معرفتها واهتمامها بالقرايه عن كل شي بيساعدها تغير من وضع التعليم في قريتها تواصلت مع منظمات متخصصه بالتعليم بالنت وراسلتهم التقارير..

اخوها جالس يتفرجها كل يوم بتلفونها: ما معش في التلفون واصل في يدش؟

اخته: مالك دخل

ابوها: اصاه ياولد

ابنه: بتبسر؟

ابوه: مابين ابسر؟

ابنه: مامعها للتلفون واصل في يدها من بتجابر؟

ابوه: خبيراتها وانت مالك ابسرت شي عليها؟

ابنه: بين ابسر التلفون واصل في يدها يعني ايش؟

ابوه: يعني مالك دخل عاد انا موجود وانا اللي اتصرف لو في غلط في البيت

ابنه: وانت مادراك وماتعرف تأنتر ولابتفهم فيهن

أبوه رجمه بالقاروره: قوم انقلع من وشي ياقليل الادب

قام اخوها حانق

خالتها شافتها وهي بتبتسم في وشه حناك: ابسر هي اللي بتستفزه ابسر كيف بتفعل

ابوها شافها: قومي للغرفه احاكيش في موضوع..

بلقيس دخلت الغرفه: خير؟؟

ابوها: تقدموا لش ناس والآن بين اقلش مابين اسألش واخيرش لو تأكدت ان الولد محترم شاوافق خليتش على مزاجش لوما زيدتي الغنج

بلقيس: من اللي تقدم ولا عارفه شي وتقلي مابتنتظر موافقتي

ابوها: اللي ابسره مناسب انا انتي مالش دخل خرج وقفل

بلقيس ضبحت جالسه معصبه تشتي تتصل لزهور

اتصلت لها صاحبتها اللي راحت للحفل: سلام كيف انتي ومالصوتش متغير؟؟

بلقيس: ولا شي تاعبه شويه بعد ماجاوبتها وتجابرين

صاحبتها: رحتي خطوبه ملاك؟

بلقيس: ايوه ليش ماجيتي

صاحبتها: ماقدرت والصراحه الآن قلت الحمدلله اني ماسرتش

بلقيس: ليش؟

صاحبتها: جلست استشيرها فيش واكلمها عنش وسبقتنا وقالت انهم تقدموا لش اشتي اتأكد منش صدق والا ماشي؟

بلقيس: يعني هي ملاك اللي تقدموا لعند ابي؟

صاحبتها: يو يعني صدق في حد تكلم عنش

بلقيس: مااعرفش ابي عادو حاكاني مش داريه من

صاحبتها: انا الصدق مضايقه وشازعل لو توافقي يا بلقيس لانه قبلها كنت اشتيش وحركتها سامجه قوووي.

بلقيس: انتي وياها تصدقين الموضوع مش بيدي وعادش لاحظتي تغيير صوتي هو بسبب هذا الموضوع

صاحبتها حست من كلامها انها موافقه: يلاه هو نصيب الله يكتب لش مافيه الخير.

بلقيس قفلت واتصلت لزهور تشكي لها وتبكي

زهور: اقلش شي يابلقيس وماتزعليش احسش نسيتي انس خلاص بس هو مانسيش انتي صدقتي كلام اهله وخالتش رغم انش تعرفيها اكثر منه بس هو ماصدق حد وجاء تأكد مني

بلقيس بكيت: طيب انا احبه ومانسيته بس واحنا مع بعض حبنا بيرجع وجع وبيكرهني فيه انتي ماجربتي حد يشكك فيش في اخلاقش تكرهي نفسش قبل ماتكرهيه هذا واحنا مخطوبين كيف لو عشنا مع بعض

زهور: طيب يمكن يتغير

بلقيس: ...


https://tttttt.me/rewayatyamania/51250



📚 @rewayatyamania  🇾🇪

☘

بـارتـات يومنـا الجمعـة 👆🏻😍

#انتظرونا غدا بإذن الله

   ومع آخر بارتات رواية

            الثروة المنسية



📚 @rewayatyamania 🇾🇪