البـارت 50 •°

السـر المـدفون ❤️

ضرغام بصياح: بس كيف قدر ملهم يتغلب ع الجن الأحمر 👺 قلت لك يارخ أكيد له دخل في الموضوع لازم نعرف..

رئيس الوزراء: بس يامولاي الكل مشغول بحفل تتويجك بكرة..

ضرغام: بس لازم نحمي حجر المغناطيس 🧲 لأنه عيختل توازن الأرض لو إسترق بس من عنرسل يحميه مابش أحد أقوى من الجن الأحمر 👺 وانت مااقدرش أستغنى عنك انت يدي اليمين..

رئيس الوزراء: إذاً مابش معانا حل غير إن احنا نرسل القعقاع ومعه كتيبه من الحراس وبعدها عنتوجه ولي للعهد بعد ما نكمل حفل تتويجك..

ضرغام: هذا احسن حل لما نعرف مافعل يارخ..

رئيس الوزراء إستأذن وخرج من عنده ودخل غرفته وخرج من يده كيس ملان دم 🩸 كان الدم اللي فيه دم يارخ وسكبه في حوض 🛁 وضاف له بعض السوائل ودخل تمدد وسط الحوض وبدأ يحرك يده ويطقطق اصابيعه لما تشكل الدم ع هيئة رجال مائع..

سأله رئيس الوزراء ماهو الشي اللي صنعه يارخ؟؟؟
تشكل الرجل المائع ع شكل سيف 🗡.. رجع رئيس الوزراء يسأله طيب هذا السيف قوي..

الرجل المائع هز رآسه أيوه..

رئيس الوزراء: طيب لمن صنعه؟؟

الرجل المائع تشكل ع هيئه ذئب 🐺..

رئيس الوزراء إستغرب ذئب 🤔 جلس يفكر شويه ورجع يسأله: طيب نشروان موجود في ارض الجن..

الرجل المائع هز راسه ماشي..

رئيس الوزراء إرتاح وحط رآسه ع حافة الأرض مادام نشروان مش موجود هذا أهم شي كل شي خططنا له عيمشي ع مانشتي وبعدها ندور من هذا الذئب...

....... ....... .......

الساعه ١٢ بعد نص الليل 🕛..

نشروان اخيرا وصل لبيته في ارض الإنس..

ملهم: أعتقد هذا هو أنسب حل..

نشروان: اصلا مادام ناسيه موضوع الجن👹 كله والأحداث اللي حصلت معانا مابش داعي نذكرها فيه ع الأقل حاليا وهانا امان لها خاصه إنهم يحسبوا إن احنا مسجونيين في السلحفاه 🐢..

ملهم: ايوه محد عيفكر إنها هانا يله حطها في سريرها نرجع بسرعة مابش معانا وقت..

نشروان حطها في سريرها ومسك يدها وباسها 😘 وتأكد إن الخاتم 💍 في يدها وجلس يتأمل وجهها الجميل المنهك من التعب بعد كل اللي حصل معها..

ملهم مسك يده: قلت لك ياصاحبي من البداية هذه الرقه مابش لها مكان في عالم الجن 👹..

نشروان تنهد بزعل 😔: كان خطأ كبير لما تزوجتها وعرضتها للخطر كان المفروض أسمع كلام الملك ديمان وانفذ أمره مسكينه روزيل كما عانت بسببي وتعرضت لهذا كله علشان تساعدني..

ملهم: مسكينه روزيل عتعيش في عذاب الفراق ياصاحبي 😔..

نشروان تنهد بقوة: يارب تجلس فاقدة للذاكرة وماتتذكرش اي شي من الأحداث اللي حصلت معانا نزلت دموعه من عيونه 😭 وقرب باسها في رآسها وهو بيتأملها الوداع يا أحلى شي حصل معي في حياتي الوداع ياحبيبتي وزوجتي وأم بناتي وطار بسرعة..

روزيل كانت راقده 😴 ولاحاسه بشي من كثر التعب والإرهاق..

بدأت تحلم حلم غريب فراشات 🦋 بتطير فوق رآسها وهي بتلاحقها في غابه ملان ياسمين 🌸 وفجاة ظهر وطواط 🦇 يشتي ياكل الفراشه وهربت لمغاره وروزيل دخلت بعدها المغاره وبتحس إنها مألوفة كانها تعرفها بتحاول تتذكر وكل ماتتذكر تنسى..

وصلت الفراشه 🦋 لصندوق زجاجي ملانه ورود 🌹 ودخلت وسطه وتحولت الفراشه لامرأة جميلة قربت منها روزيل تبسرها وهي فتحت عيونها وبتبتسم لها وقالت لها اسمها نارين انتبهي لها جاوبت روزيل بإستغراب من هي 🤔 وسمعت صوت الزجاج بيتكسر وقامت من نومها..

روزيل فتحت عيونها 👁️ كان حلم قامت من النوم بتدور نشروان وبناتها مالقيتهمش: اووه شكله نشروان قام قبلي وشلهن المدرسة قربت للطاقة تفتحها تدخل الشمس للبيت 🌞 إبسرت بنت صغيره قدام البيت بتسحب عربيه صغيره ملانها ورد 🌹 ونكعت عليها في الأرض زجاجه ملان ورد بتلقطهن بحذر طننت شويه 🤔 هذا هو الصوت اللي قيمني من الحلم خرجت بسرعة من الباب والبنت إبسرتها وبتهرب داعتها نارين..

البنت وقفت بتتفرجها 😳: من نارين أنا إسمي زينه..

روزيل إبتسمت 😁: الله اسمش حلو مابتفعلي من الصبح..

زينه: بين اساعد أمي بتشتري امي الورد🌹 من مزرعة ونبيعهن في السوق بسعر أغلى..

روزيل: عمل حالي وسهل 🤩 كم احب الورد..

زينه: بس الناس بطلت تشتري ورد🌹 مادام بتحبيه مارأيش تشتري مني وتزرعي في حديقتش..

روزيل ضحكت: هههه انتي بنت ذكية تشتي تبيعي لي طيب معش ياسمين 🌸...

زينه: إكتسرت مني زجاجة الياسمين 🌸 بس باقي ورد منهن صحتهن جيده أبيعهن لش بسعر رخيص موافقه..

روزيل بدات تركز في الزجاجة وورد الياسمين 🌸 كأنها إبسرتهن وتعرفهن..

فجأة صوت بيصيح 😡 من وراهن: زينه مابتفعلي هانا....

🌹meme_abdalgaleel

البـارت 51 •°

السـر المـدفون ❤️

زينه: أنا آسفة نكعت عليا زجاجة الياسمين سامحيني..

ام زينه مسكتها وسحبتها بقوة 👭: انا قلت لش ماتقربيش جنب هذا البيت يله من هانا..

روزيل: لحظة احاسبش قيمة الياسمين 🌸..

ام زينه إبسرتها ولفت وجهها وخطيت..

روزيل جلست في الأرض بتجمع ورد الياسمين 🌸 وحطت وردة منهن في شعرها ودخلت للحديقه قريبة من شجرة التفاح 🌳 تحاول تزرع الورد سمعت صوت زينه وأمها من وراء سور الحديقة..

ام زينه: كم قلت لش ماتقربيش جنب هذا البيت وهذه الساحرة..

زينه: بس شكلها طيبة مش شريرة مثل ماقلتي لي..

أم زينه: أصلا الكل بيقل إنها قتلت زوجها وبناتها ودفنتهم في الحديقة..

روزيل حملت بسرعة لعندهن بتصيح: انتي الساحرة انتي والمجنونة زوجي وبناتي داخل راقدين 😴 أنا ماقتلتش احد وبتصيح بقوة وتلحقهن وتبكي..

ام زينه إفتجعت منها مسكت بنتها وبتهرب: قلت لش إنها ساحرة مجنونة..

روزيل دخلت للبيت وهي بتبكي 😭 بتدور زوجها وبناتها مثل المجنونة وبتصيح هن في المدرسة اكيد نشروان شلهن ابسرت قدامها فرو أحمر فوق الكنب🛋 فيه قطرات دم متخثر 🩸اول مرة تبسره وفوق الماسه كتب 📖📕 مرجومه عن الجن والشعوذة بتتفرج جسمها وملانه جروح وخدوش صاحت بصوت عالي وهي بتبكي 😭 معقولة صدق إن انا ساحرة وقتلت زوجي وبناتي بس ماهو هذا فينهم وماهو هذا اللي فيني وليش شكلي تاعب ومتغير هكذا جلست في الأرض وبتبكي..

سمعت صوت كلب 🐕 بينبح حست إنه بيذكرها بشي حملت بسرعة تبسره وإنه كلب خاطي في الشارع بتتفرج الحديقة وورد الياسمين 🌸 وشجرة التفاح 🌳 اللي شكلها كأنه مختلف صااحت أبالا هذه أبالا صح وبدأت تحس الشجرة كأنها بتبعد منها وصداع قوي ودوار في رآسها كأنه بدات الغمامة تبعد من عيونها👁 وبتحس بتعب في جسمها
حملت بسرعة للحمام فتحت الماء البارد للمغسلة 🛁 غمضت وحطت رآسها وسط الماء البارد يمكن يخف الصداع ويخف والدوار حست بحرارة ونار 🔥 قدام وجهها بعدته وفتحت عيونها ابسرت قدامها خيال شبح مخيف ☠️ بأسنان بارزة شهقت بقوة وصاحت😱 ورجعت لوراء بسرعة وخفعت رآسها بتبسر الحوض من بعيد 🛁 هذا حوض صغير مايكفيش الإ وجهي مابش فيه حاجه اكيد قربت لجنبه وصاحت بدون ماتحس الدلهاب هذا نوع من الجن يعيش في البحر بس شكله مثل الإنسان بس بدون ملامح وجهه اخضر وفمه كبير اسنانه مثل القرش يتعرض للمراكب ويرجم اهلها في البحر 🌊..

حست قلبها عيوقف ❤️ لما سمعت نفسها بتقل هكذا بدأت تتذكر..

أبالا.. الحية.. الدلهاب.. الشق.. السعلاه.. الوطواط كابوس.. الأجهش.. حجر المغناطيس.. الذئب.. السلحفاة.. البركان.. هيفيا.. الجن الحمر.. يارخ.. قصر الجنيات السبع.. بناتي.. ملهم.. القلعة.. نشروان.. المعركة تتويج ضرغام جن جن 👹👺 لوآح زوجة الأجهش هي اللي جتني في الحلم اكيد هي اللي ادت لي الاسم..

بدأت تتذكر كل شي بناتي في قصر الأميرات السبع اليوم تتويج ضرغام المعركة اكيد نشروان هو اللي اداني لاهانا يحميني ويشتي يواجه المعركة وحده ماشاسامحش إحنا تعاهدنا نعيش مع بعض او نموت مع بعض لازم اتصرف بسرعة مابش وقت

حملت لبست الفرو الاحمر حق الذئب 🐺 ووقفت قدام شجرة التفاح 🌳 بتداعي ابالا ابالا ساعديني أبالا مابش معي وقت أدخل من جديد في الممر وأقطع كل المسافات واقايض الدلهاب وادخل البحر والصحراء ماشوصل إلا وقد كملت المعركة ساعديني..

شجرة التفاح ابالا 🌳 ساكته ولا بترد..

روزيل: انا داريه إنش بتسمعيني بس أنتي الخسرانة دخلت بسرعة للبيت إدت سائل قابل للإشتعال🧴 ورشته عليها تحرقها..

أبالا بتصيح: ارجوش طفيني روزيل ساعديني..

روزيل سكبت فوقها ماء وطفتها: يله ساعديني بسرعة مابش معي وقت كيف بيقدر نشروان يتنقل بسرعة بين عالم الإنس والجن 👹..

أبالا: انتي داريه ماينفعش أحاكيش..

روزيل: مابش معي وقت ولا معش لللعب معي تشتي انقذش وتخلصي من الحريق دليني بسرعة ع طريق مختصر لازم أوصل قبل المعركة..

ابالآ: مابش طريق مختصر بس في كل معبر بين أرض الإنس والجن ممر خاص للإنس وممر خاص للجن 👹 بس ما انصحش بممر الجن لأنه خطير ع البشر..

روزيل: مابش معي خيار لازم اخوض هذا الخطر..

أبالآ: الخيار خيارش انتي حرة اطلعي لأعلى غصن فيني وابدئي اخطي عليه بإمتداده في الهواء لما توصلي لعالم الجن 👹..

روزيل طلعت الشجرة وبدأت تخطى ع الغصن وحطت رجلها في الهواء وفعلا بدأت تخطى في الهواء ورجلها ترتفع في الجو وبيتها بدأ يصغر..

الناس بدؤوا يتفرجوها ويأشروا عليها ويصيحوا ساحرة قتلت زوجها شكلها جميل مايوحيش إنها ساحرة..

روزيل بدأت ترتفع اكثر وأكثر وصوت الناس أختفى وبيتها وكل شي في الارض..

🌹meme_abdalgaleel

البـارت 52 •°

السـر المـدفون ❤️

روزيل ماكانتش مهتمة بكل الكلام اللي بيقلوه عليها كل همها إنها توصل بسرعة قبل مايحصل مكروه لزوجها وبناتها فجأة فلتت رجلها ونكعت في السماء..

الناس بدأت تصيح وهم بيبسروها بتنكع بس روزيل إختفت في السماء..

........ ........ .........

في عالم الجن 👹..

قلعة ديمان 🏰..

كان جنود وقبيلة ديمان مقهورين وزاعلين والألم والوجع باين عليهم متجمعين في ساحة القصر وهم بيتفرجوا جنود ضرغام بينهبوا ويسلبوا ممتلكاتهم 😔..

الملك ديمان مربطة ايديه وأرجله بالسلاسل في طرف خنزير 🐗 وفمه مربوط وأثار التعذيب باينه عليه بيتفرج ضرغام والخونة بقهر وحسرة ع اللي حصل له وحصل لابنه ومملكته..

ضرغام واقف فوق المنصة وجنبه رئيس الوزراء وأخزم رئيس وزراء نشروان الخاين ومجموعة من الجن 👹 اللي سلموا بيتفرجوا جنود نشروان المخلصين وهم مكلبين بالسلاسل والقيود ووراء كل واحد منهم مارد 👺 ماسك سيف منتظر الأمر يقطع راسه وبقية الجنود محاوطين بالقلعة تحسب لأي شي يحصل قبل مراسم التتويج..

ضرغام رفع صوته: ياقووم عليكم مبايعتي وتقديم الولاء والطاعة بعد مااسرت ملككم وامرت بقتله وسجنت أميركم واللي يرفض عينظم لجماعة نشروان اللي عيعدموا واللي يفكر انه يتحداني او ينقلب عليا يواجهني مثل ماجرت العادة بين اجدادنا واللي يقدر يقتلني يكون ملككم..

عم السكون ومحد صدي يتحاكى شعب مهزوم مخذول وقائده اسير والثاني محبوس في سلحفاة 🐢...

كان القهر باين عليهم ونفسهم يقتلوه ويقتلوا الخونه اللي واقفين جنبه وهم مربطين بالسلاسل ومحد قادر فيهم يقل كلمة 😭..

عيقم بيتفرجهم بكل احتقار وسخرية بعد مارجع وأمن البركان وحجر المغناطيس 🧲 ابتسم ورفع صوته 😁: يله أقطعوا رؤوس الخونة..

بدأ الجنود يقتلوا أعوان نشروان المخلصين واحد بعد الثاني..

أخزم تقدم في المنصة ورفع صوته: ياقوم احنا تكبدنا خسائر فادحة وعانينا من الحروب سنين طويلة بسبب الملك ديمان والآن واجب ع كل واحد فيكم يبايع الملك ضرغام ونرجع الأمان للمملكة بايعوه تسلموا خلاص ولي عهد الملك ديمان ونشروان اللي خالف العهود وتزوج إنسية وتخلى عن المملكة وعن مسؤوليته واليوم لازم نتخلى عنه عهد ديمان ونشروان خلاص إنتهى للأبد..

تعالت اصوات ابواق 🎺🎷 للتنصيب..

حراس الأسوار بدؤوا يصيحوا بصوت عالي: نشروان نشروان ايوه نشروان

وقفز واحد من الحراس بسرعة لعند عيقم: سيدي نشروان فوق الجسر في طريقه للقلعة 🏰..

بدأت الفرحه والدموع 🥺 في عيون الملك ديمان وجنود نشروان..

ضرغام صاح بقوة 😡: يا أغبياء أنا كنت شاكك إنه هرب..

رئيس الوزراء بيصيح أرموه: بالرماح والأسهم 🏹 ماتسمحوش له يوصل للقلعة..

نشروان بيمشي وكله ثقة فوق السور هو الوحيد اللي يوم بمقدوره قلب كل الموازيين اليوم هو الوحيد اللي قادر يرجع مملكته وعرش ابوه وأجداده مصير المملكة في يده..

ملهم واقف خلفه وسلاحه في يده يحميه..

بسرعه اجتمعت ٣ كتائب من جنود عيقم فوق السور وبدؤوا يرجموا نشروان وملهم بسهام

٦ ألف سهم🏹 بدأت تطير بإتجاههم مرة واحدة كأنها ضربة قاضية..

نشروان رفع عين الذئب 🐺 ووجهها للأسهم 🏹 وتجمعت كلها بسرعة لعنده وعكس السيف وهن بيلفين بعده ووجههن تجاه الجنود وانطلقين بسرعة جبارة وبدأت تطير بشكل سريع تقتل من قتلت وتغرس في صدورهم وفي سور القلعه كانها مطر الموت.. مطر اسود ظلمت السماء بسببه..

بعد هروب الكتائب لوسط ساحة القلعة بدأت الفوضى والصياح بين جنود ضرغام والفرحة في صفوف جيش نشروان انه اميرهم رجع بهذه القوة..

بدأت تتجمع كتيبة جديدة وترمي نشروان بأسهم 🏹 ورماح..

نشروان حط السيف 🗡 وراء ظهره وحجر المغناطيس 🧲 بدأ ينفر الرماح وتنكع في السور والجنود مستغربين من اللي بيحصل..

بدأت كتيبة جديدة تتجمع مكونة من ألف مارد 👺 بسيوفهم ودروعهم وأسلحتهم منهم من يطير ومن يزحف ومن يركض لمحاربة نشروان وقتله..

نشروان مسك سيفه 🗡 وفصل الأنياب وبدأ يلفها في الهواء بسرعة رهيبة ووجهها للجنود وخرج منها زوبعة قوية (زوبعة الأجهش وداخلها أسلحة الكتيبة اللي قتلها الأجهش لما كان يلاحق نشروان)

بدأت اصوات الصياح والخوف والاستغاثة من داخل الزوبعة مع صوت قرع السيوف 🗡 كأنه عذاب جهنم يهز كل من داخلها..

وقفت الزوبعة وتساقطت جثث جنود ضرغام فوق السور ودماءهم 🩸متطايرة في الهواء..

بدأ جنود ضرغام اللي داخل القلعه 🏰 يهربوا..

ضرغام واقف مذهول 😱 مرعوب: ذلحين دريت هذا أكيد سلاح يارخ اللي صنعه ضروري أقتل نشروان واضم هذا السلاح لباقي أسلحتي..

........ ....... .......

في السماء..

روزيل نكعت في السماء بس السماء هذه شكلها مختلف ولونها بنفسجي مصفر كانت تتفرج يمين شمال تأكدت انها خلاص دخلت عالم الجن

🌹meme_abdalgaleel

البـارت 53 •°

السـر المـدفون ❤️

روزيل نكعت في السماء بس السماء هذه شكلها مختلف ولونها بنفسجي مصفر كانت تتفرج يمين شمال تأكدت انها خلاص دخلت عالم الجن 👹

بدأت تفكر في كل الطرق اللي ممكن تساعدها لأنها عتواجه مخاطر ولازم تنسى الخوف لانه كل شي وله حل بدأت تمد نفسها وتحاول تسلم نفسها للريح تسحبها بهدوء وتنزلها للأرض

إبسرت قدامها شكل سحابه ☁️ بس لما ركزت طلعت شبكة عنكبوت كبيرة 🕸 لاصق في سحابه حاولت تبعد بجسمها ماتوصلش لعندها بس فكرت انه ليش شبكه عنكبوت 🕷 في السماء اكيد به سبب نكعت لافوقها وماحست بنفسها الا بتنكع من شبكه 🕸 لشبكه🕸 لشبكه 🕸 لما لقيت نفسها وسط شبكة كبيرة كأنها فريسة لعنكبوت وسط السحاب☁️ وسط السماء حاولت تتحرك مابش فايدة..

سمعت صوتها من وراها لفتت تبسر طلعت عنكبوت كبيرة 🕷معاها ٨ ارجل و٦ عيون كأنهن مطموسات عين واحدة بس بارزة..

العنكبوت🕷: أهلا بش في سماء سرآب أين عتسيري..

روزيل أبسرتها بدون بخوف بس مستغربة😳: عنكبوت في السماء مابتفعلي هانا بتصطادي فرايسش..

العنكبوت🕷: انا حارسة معبر السماء لأرض الجن 👹..

روزيل: كيف بتحرسي عالم الجن انتي جنيه ؟؟؟

العنكبوت🕷: مش شرط كل اللي في ارض الجن يكون جن.. طيب وانتي والكل جنيه..

روزيل: 😅 هاه صح..

العنكبوت🕷: ايش اسمش من انتي؟؟

روزيل كانت عتقلها اسمها بس ركزت في آخر لحظة علشان ماتنكشفش: انا عابرة سبيل عبرت في سلام..

العنكبوت🕷 قربت منها بتحاول تتفرجها وتركز: أنتي روزيل صح زوجة نشروان..

روزيل سكتت مش هي دارية هذه العنكبوت 🕷 عدوه والا صديقة..

العنكبوت🕷: انتي زوجته انتي روزيل خاتم نشروان 💍 في يدش..

روزيل جاوبت بشجاعة وحاولت تكون قوية وردت بحزم 😠: ايوه انا زوجة أمير الجن يعني أنا الأميرة روزيل..

العنكبوت🕷 تفرجتها وضحكت ضحكة خفيفة: انتي داريه ليش العنكبوت بتبني شباك في السماء..

روزيل حست بخوف 😨 بس حاولت تكابر وماتبينش: علشان تبني لها بيوت..

العنكبوت🕷 ضحكت: هههه ماشي علشان نصطاد فرايسنا نبني الشبكة 🕸 ونجلس نرتاح لانه رزقنا عيوصل بس احلى شي إن الزمن دوار واللي يذهب لابد مايرجع..

روزيل إستغربت 🤔: مافهمتش..

العنكبوت🕷: ههههه كان زمان حبيبش نشروان يتسلل لأرض الإنس كل يوم يتفرجش ووصلني أوامر من الملك ديمان إن انا أمنعه يعبر لأرضكم ولما منعته حصلت بيننا معركة وفقع عيوني بسيفه🗡 ماعاد خلى لي إلا عين واحدة ورجعت بعدها بطلت أمنعه يجي لعندش لأن انا متأكدة إنه عيجي اليوم اللي أنتقم منه والزمن اداش لعندي علشان انتقم منه فيش وأقهره..

روزيل يدها لاصقه في الشبكه 🕸 بدأت تتفرج يمين شمال يمكن تلقى شي يساعدها وتقدر تهرب..

العنكبوت🕷: هههه مابتدوري مابش مجال تهربي لاتحاوليش شفقع عيونش الجميلة 👁 اللي سحرت نشروان وبعدها أرسلش له..

روزيل: طيب انا معش لش حق تنتقمي منه لأنه فقع عيونش 👁 بس انا ماذنبي لكن مارأيش تشليني لفوق القلعة وتنتقمي منه تفقعي عيوني قدامه تنتقمي منه وتقهريه..

العنكبوت🕷 بإستغراب 🤔: ليش هذا الطلب تشتي تخدعيني..

روزيل نزلت دمعة من عيونها 🥺: علشان أبسره لآخر مرة قبل ماتفقعيهن ويكون آخر شي أبسره..

العنكبوت🕷 حست بكمية الحب اللي في قلبها لنشروان: ذلحين دريت ليش باع الكل علشانش بس لا ماشاخليش تبسريه شاشلش لافوق القلعة 🏰 وافقع عيونش 👁 وأقتلش وارجمش يبسرش مقتولة يموت قهر ويبرد قلبي إن انا إنتقمت منه حتى لو يقتلني بعدها..

مسكت روزيل ولفت عليها خيوطها 🐛 ولفتها كأنها يرقه ماعد باين فيها الإ راسها من خارج وبدأت تقفز من سحابه ☁️ لسحابة بسرعة بإتجاه القلعة..

روزيل بتبكي 😭 بتحس خلاص إنها نهايتها مابش مجال تتخلص من هذه العنكبوت خاصة انها مش دارية ماحصل مع نشروان وقد تتوج ضرغام والا لا..
.
.

في القلعة 🏰..

نشروان دخل القلعة وهو كله ثقة وقوة 💪 وسط هيبة وهتافات من جنوده واعوانه بعد ما خلصوا جنوده المخلصين قبل اعدامهم..

تجمع جنود نشروان وراه وبيحموه من كل جهة..

نشروان وصل لعند المنصه يشتي يتكلم مع ضرغام..

اخزم يشتي يقاطعه يبرر مافعل..

نشروان مسك سيفه 🗡 وضربه ضربه قسمته نصين: هذا جزاء كل خائن في مملكتي..

الملك ديمان بيتفرجه مبتسم 😃: هذا ابني البطل عشت يا سندي وولي عهدي..

نشروان إبسر أبوه وإبتسم 😊 ولفت لعند قومه: أتمنى إن انا وصلت في الوقت المناسب ومحد فيكم قد بايع هذا الطاغية شادافع عنكم لآخر لحظة في حياتي..

بدأت أصوات الجنود ترتفع أميرنا نشروان إحنا معك لآخر لحظة وكلنا فداء لك وللمملكة..

ملهم قفز بسرعة وفك السلاسل المربط بها الملك ديمان وهو زاعل عليه 😔: سامحني يامولاي ماقدرتش اساعدك كل اللي قدرت افعله أبلغ نشروان باللي حصل ينقذنا..

الملك ديمان حط يده ع كتفه🤚: انت فعلت الصح لانه محد عيقدر ينقذنا غيره..

نشروان إبسر الملك ضرغام...

🌹meme_abdalgaleel

البـارت 54 •°

السـر المـدفون ❤️

ملهم قفز بسرعة وفك السلاسل المربط بها الملك ديمان وهو زاعل عليه 😔: سامحني يامولاي ماقدرتش اساعدك كل اللي قدرت افعله أبلغ نشروان باللي حصل ينقذنا..

الملك ديمان حط يده ع كتفه🤚: انت فعلت الصح لانه محد عيقدر ينقذنا غيره..

نشروان إبسر الملك ضرغام بتحدي وغضب 😡: إنتهت الحرب ياضرغام اليوم نهايتك وشعوبنا عاشت في حروب بسببك ولازم تنتهي قتلك سهل عليا بس انا شحترم قوانين عالم الجن 👹 وكالمعتاد اي ملك يتوج جديد يتحدى أي خصم يكون ند له وانا اليوم خصمك وند لك والفائز عيتوج ملك للمملكتين..

ضرغام كان خايف😰 بس حاول يظهر أنه قووي: عليك اللعنة وصلت بك الجراءة تتحداني انت وسيفك هذا 🗡 انت جني غير مؤهل للحكم اول شي تزوجت إنسيه وخالفت قوانين عالمنا وبعدها سرقت قطعة من حجر المغناطيس 🧲 وعرضت الجميع للخطر من انفجار البركان وهجوم الذئاب ودخلت عين الذئب🐺 عالمنا انت جني متعجرف صبياني ماتنفعش للحكم..

نشروان: فعلت هذا كله علشان اتخلص من حاكم ظالم مثلك صح يمكن تصرفاتي غلط بس انا حاكم عادل ماقتلتش شعوب ودخلت شعبي في حرب سنين لأسباب خاصة بي كل جرايمك وحروبك لأن انا رفضت الزواج من بنتك صوهيماء..

الملك ضرغام: خلاص يله بنا نسير للجبل 🗻 حسب العادات واللي ينزل منه منتصر هو اللي عيحكم..

كان به جبل 🗻 طويل في وسط القلعة..

طاروا الاثنين لقمة الجبل 🗻 محد يبسرهم واللي عينتصر وينزل منه هو اللي عيحكم..

......... ........ ........

نشروان مسك سيفه 🗡 وبيتفرج ضرغام بغموض يعلم الله اي حين آخر مره بارز فيها ضرغام أحد أعتقد قبل ما أولد فرصة أستغل هذه النقطة بس لازم ما اتساهلش لأنه معه ٣ أسلحة من أقوى الأسلحة رمح الظلام وسيف اللهب وسيف الصاعقة🗡..

ضرغام طقطق أصابيعه ✊️ وخرج منهن ٣ ضرغام يعني قدهم ٤ واحد ماسك سيف اللهب وواحد رمح الظلام وواحد سيف الصاعقة وواحد مطرقة يارخ 🪒..

نشروان تفاجأ 😳 ماهو هذا ٤ عيقم هذا سحر بس من فيهم الحقيقي لفت له وصآح: هذه مطرقة يارخ 🪒 ياحقير..

ضرغام: ههههه ضحكوا الأربعة قتلت هذك الخاين وشليت كل أسلحته السخيفة للأبد..

نشروان: أنت مجرم سفاح دمرت وقتلت كل شي في ارض الجن حتى يارخ المسكين قتلته لازم اتخلص منك ومن شرك..

ضرغام حاوط الأربعة الضراغم بنشروان عن يمينه وشماله وامامه وخلفه وغرز واحد منهم سيف الصاعقة🗡 في الأرض وخرجت منه موجات رعدية..

نشروان قفز بسرعة علشان لاتصيبه..

ضرغام قفز ضرغام اللي ماسك المطرقه 🪒 وضربه في رآسه..

نشروان ارتجم للأرض..

ضرغام قفز ضرغام اللي ماسك سيف الصاعقة وضرغام اللي ماسك سيف اللهب وكان عيطعنوه..

نشروان رفع سيفه🗡بسرعة وجذب السيفين🗡🗡 لعنده بسرعة والتصقوا بسيفه ورفعه تنافروا وطاروا بعيد..

رجع الأربعة يحاصروا نشروان من جديد..

نشروان بدأ يفكر كيف يتخلص منهم أكيد ان به نقطة ضعف لازم اعرفها هو ضرغام واحد والباقي مزيفيين لازم أركز ع الأسلحة بدأ يركز ع الأسلحة أكتشف ان ضرغام مابيقدرش يهجم بال٤ اسلحة مرة واحدة بيهجم بسلاحين بس ويهجم يعني انه اللي بيتحكم فيهم هو ضرغام الحقيقي بس اين هو منهم جلس يتفرج ويركز ع الضربات بس يدافع عن نفسه مابيهجمش ابدا بعد تركيز حس ان ضرغام اللي ماسك رمح الظلام مابيضربش إلا لو كان بعيد او ممكن اصيبه شكله هو الحقيقي لازم اجازف..

ضرب ضرغام اللي ماسك سيف اللهب وبعده ضربه ضرغام اللي ماسك سيف الصاعقة ومن وراه ضرغام اللي ماسك المطرقة 🪒..

نشروان قفز بسرعة وفك انياب الذئب 🐺 ورجمهن بإتجاه ضرغام اللي ماسك رمح الظلام ولصقه في الرمح وسحبه هو وضرغام لعنده وخفعه بقوة في صدره واختفى ال٣ ضرغام المزيفيين وبقي ضرغام الأصلي مرجوم في الأرض هو وأسلحته..

نشروان: كنت تحسب إنك عتخدعني ياغبي بهذه السخافة..

ضرغام قام وهو ضابح والشر بيتطاير من عيونه 😡 دخل يده في كيس مربوط في خصره وخرج منه خمس كرات ملتهبة 🔥 رجمهن وتحولوا ل٥ جن احمر 👺 ضخمين بسيوف ضخمة🗡..

نشروان إستغرب 😳: هذولا الجن حراس البركان كيف أداهم لاهانا بس أجساد بدون رؤوس رؤوسهم مقطعة..

بدأ الجن الأحمر 👺 يقربوا اكثر من نشروان ويحاوطوا به..

ضرغام ماسك في يده سيف اللهب🗡 بيحركه شكله بيتحكم فيهم..

نشروان قفز بسرعة وطعن واحد من الجن 👺في صدره ونكعه للأرض..

بدأ جني ثاني يهجم 👺 ع نشروان..

نشروان قفز بسرعة سحب السيف 🗡 من صدر الجني الاول يطعن به الثاني لكن الاول قفز بعد ماسحب السيف من صدره 😱..

الجني الثالث وجه ضربه قويه بسيفه 🗡لنشروان..

نشروان بدأ ينزل وينسحب للأرض من ثقل قوة سيف المارد ومسك سيفه هزه بسرعة وبتأثير حجر المغناطيس 🧲 طار سيف المارد من فوقه لما رجع لوراء وطعن جني احمر 👺..

🌹meme_abdalgaleel

البـارت 55 •°

السـر المـدفون ❤️

ضرغام واقف بيتفرج ويضحك 🤣 ويهز سيفه يحركهم..

نشروان فهم حركة ضرغام وخطته قفز بسرعة وفك ناب من انياب الذئب 🐺 وغرسه في صدر جني 👺 وسحب السيف وبدأ يحركه وخرج منه الزوبعة 🌪 لما بدأ الجن الأربعة يدوروا حولها وسحبهم لعندهم بحجر المغناطيس 🧲 ومن ثقل أسلحتهم بدأت تنغرس في صدور بعضهم بدون مايركزوا واحد مغروز فيه الناب والاربعه مغروز فيهم السيوف كان شكلهم مثل السلسلة الثابتة اللي مش قادره تتحرك..
مسك نشروان الناب الثاني 🐺 وقفز به وضرب به سيف اللهب حق ضرغام وإختفوا الجن الحمر 👺 مثل الغبار..

ضرغام نكع ضرغام للأرض بس حاول يقوم بسرعة قبل مايهجم عليه نشروان..

نشروان واقف بشموخ وقوة 💪: مايكفيش لعب ياضرغام قدك مثل البهلوان الملك يواجه بشجاعة مش بخدع وغدر..

ضرغام ضحك بسخرية: هههه 🤣 كنت بين اتسلى بطفل مثلك بس الآن عتبدأ معركتنا رجم سيف اللهب للهواء وسيف الصاعقة وبدأين يدورين حول بعض⚔️ ،مسك رمح الظلام 🏹 وغرسه في الجبل لما ظلمت الدنيا كلها كأنه ليل دامس 🌑 ومسك مطرقة يارخ 🔨 وبيتحرك لعند نشروان..

نشروان قرب لعند ضرغام ووجه عين الذئب 🐺 لعنده كانت خطته يخليه يثبت مكانه بعين الذئب ويقطع رآسه..

ضرغام بيتفرجه ويضحك 🤣 ما أثرتش عليه..

نشروان وقف مستغرب 😱 ليش ماتأثرش وعين الذئب تسمر أي جن مكانه..

ضرغام بسخرية: ههههه 🤣 فعلا طلعت غبي وأغبى جني عرفته انا بشر مش انا جني 👹..

نشروان بصدمة 😳😱: أييييش..

ضرغام: أنا ساحر عظيم من سحرة البشر كنت من اقوى السحرة والمشعوذين وقتلت ضرغام زمان وأنتحلت شخصيته..

نشروان: قصدك إنك إنسان من بني البشر 😳..

ضرغام: المفروض انت آخر واحد تستخف بالبشر لأنك مزوج بإنسيه وإبسرت كيف فعلت روزيل وساعدتك لما قررت أنا من زمن طويل تعلمت أقوى أنواع السحر والشعوذة من مئات السنين وركزت كل قوتي أتخلص من الجن وأغلبكم..

نشروان: وماعتستفيد لما تتخلص مننا 🤔 ياحقير..

ضرغام: لو قدرت أسيطر عليكم وقتها شاسيطر ع العالم كله قد تخلصت من مردة وملوك بالمكر والخديعة وشليت ملكهم واسلحتهم حتى هجرس لما قتلته في المعركة كنت متعمد لأنها فرصة الكل يحسب انه إبني ومحد عيصدق إن انا قتلت إبني متعمد وقتها تعمدت أخلي الدنيا ظلام واقتله واشل سلاحه واخلص منه ومن صوهيماء حتى الخاتم 💍 اللي كنت ملبسه له وفهمته انه عيحميه انه من خواتم أجدادنا كان فيه سم يخليه يفقد السيطرة ع نفسه وقت المعركة باقي معي انت وأتخلص من أقوى الجن..

نشروان واقف مصدوم من كلامه 😱: كيف وصلت لهذه المرحلة من الشر كيف قدرت تحكم هذه السنين ومحد إكتشف امرك..

ضرغام: لأن انا لما أقتل جني 👹 أتحمم بدمه واخلط معه مادة للتحنيط فتفوح رائحته ع رائحتي والجن محكومين بروايحهم وزيادة بعد ماقتلت ضرغام وتشكلت بشكله محد عاد يقدر يعرفني لان سحري قوي محد كان داري إلا هذك العجوز يارخ لأنه كان صديق مقرب لضرغام..

نشروان: يارخ 🤔 داري بس ليش ماتكلم..

ضرغام: لأنه كان مغرور ويومها لفت لي بإحتقار وقلي مابش إنسان عيقدر يتغلب ع الجن 👹 كان وقتها عيقدر يقتلني لأن انا ماكنتش أمتلك هذه القوة كلها واللي حصل بيننا كان تحدي إبسرت كيف إنسان قدر يفعل كل هذه المشاكل والحروب في أرض الجن لسنين طويلة هههههه...

نشروان بغضب 😡: أنت احقر إنسان عرفته..

ضرغام: ههههه 🤣 قصدك أشطر واذكى إنسان باقي لك اقتلك واتخلص منك وبعدها قضيت ع اقوى ملوك الجن..

نشروان بتحدي وعيونه شرر 😠: قصدك انا اللي شقتلك وأتخلص منك ومن شرك للأبد..

مسك سيفه🗡 وبدأ يلوح به في السماء..

ضرغام بدأ يلوح بسيوفه⚔️ ورمح الظلام🏹 والمطرقة بسرعة اكبر وسط الظلام ماعد بش شي ظاهر في السماء إلا برق ولهب..

اتجمعت السيوف مع المطرقة وتشكلت كتلة واحدة من اللهب والصواعق 🔥⚡️ وبدأت تتوجه بضربة قاضية لنشروان..

نشروان خرج زوبعة 🌪 قوية من سيفه ارتطمت بالكتلة النارية الرعدية⚡️🔥 لكن ماصمدتش خيرات تطايرت وضربت الكتلة نشروان بقوة لما رجعته لوراء..

نشروان اختفع في صخرة كبيرة لما أهتز الجبل 🗻..

كل اللي في القلعه 🏰 سمعوا الهزة اللي بدأ يبكي من الخوف واللي فكر يهرب واللي بيدعي لنشروان..

نشروان انغرست السيوف ⚔️ في كتفه وعين الذئب 🐺 نكعت تحت رجله وضعفت قوته ماقدرش يقوم من قوة الضربه...

ضرغام قرب لعنده وفي يده المطرقه 🔨 وبإحتقار: ياريت وانا ماقتلت يارخ يبسر بعيونه وأنا بين اقتلك وأوريه نهايتك وإنه كان غبي لما إستخف بي وقال إن انا شقتل بسلاح من صنعه هذا الغبي لصق لي عين ذئب 🐺 ما تأثرش فيني في حجر مغناطيس 🧲 ويحسب إنه صنع أقوى سلاح قدام سحري وشري مسك المطرقة ورفعها عيضرب بها رآس نشروان..

🤔 معقولة طلع ضرغام ساحر شرير من عالم الإنس وسيطر ع ممالك الجن 👹 كيف الشر موجود في كل العوالم ...

🌹meme_abdalgaleel

البـارت 56 •°

السـر المـدفون ❤️

في شدة المعركة والقتال وصلت العنكبوت 🕷 وروزيل لفوق القلعة 🏰..

العنكبوت🕷: وصلنا لقضاش خلاص يا إنسيه موتش قررب..

روزيل بدأت تحرك جسمها بتحاول تفك الرباط بس ماقدرتش بعد عدة محاولات اقدرت تخرج يدها 🖐 وبدات تحرك اصابيعها تنكع الخاتم من يدها 💍 لأنها متأكدة ان نشروان اكيد قد وصل للقلعة واول مايبسره عيجي ينقذها..

نشروان كان موطي رآسه مستسلم 😔 بعد ما طعنه ضرغام والسيوف ⚔️ في كتفه بدات قوته تضعف وفجأة حس بضيق في قلبه ❤️ وبيدق بسرعة حس إن روزيل بعدت الخاتم 💍 رفع رآسه للسماء إبسر فص احمر بيلمع في السماء كانه نجم بيلمع ركز نظره بقوة 👀 ع الخاتم 💍 وبدأ يتحرك لعنده بسرعة لما نكع تحت رجل ضرغام وإنفجر بقوة..

ضرغام طار بقوة لبعيد من قوة الإنفجار..

نشروان حس بالأمل ومد رجله بسرعة يسحب سيفه🗡..

ضرغام قام بسرعة ورفع رآسه للسماء إبسر العنكبوت 🕷 وحجمها الكبير مسك رمح الظلام 🏹 ورجمه لعندها بقوة كان بيتهيأ له إنها بتساعد نشروان..

العنكبوت🕷 ماسكه روزيل بقوة ويدها موجهة لعيون 👁 روزيل تفقعهن..

روزيل مغضمه عيونها ومستسلمه للي عيحصل لها..

وصل رمح الظلام 🏹 وإنغرس في صدر العنكبوت 🕷 طيرها بعيد..

روزيل نكعت وبدأت تطير بتنزل ومش هي دارية مابيحصل نازل بين نشروان وضرغام..

ضرغام مسك مطرقة 🔨 وبدأ يخطى لعند نشروان وإبسر حاجة بتنكع من السماء ركز وبيبسر صيح بغضب 😡: هذه الإنسيه من جديد كان المفروض أفكر إنها ممكن ترجع من جديد ، رفع يده ✋️ للسماء ووقفها..

روزيل بدأت تتحرك بسرعة لعنده غصب عنها ووقفت تعلقت في الهواء بتبسر لعنده مستغربه 😳 مش قادرة تتحرك إبسرت نشروان صاحت ببكاء 😭: حبيبي مالك مافيك..

نشروان: مش وقتي أنا ليش جيتي لاهانا..

روزيل بتصيح: فلتني ياشرير وبتحاول تتحرك 😔..

ضرغام بإستهزاء وضحك: هذه المرة عتموتي أنتي وحبيبش ياغبيه 🤣..

نشروان رفع صوته 😠: معركتك هي معي ياحقير فلتها في حالها اصلا ماعتستفيد شي من موتها..

روزيل فكرت في سحر عيونها 👁: باقي معاها هذا السلاح بدأت تتفرج لضرغام وتركز في عيونه بقوة..

نشروان: روزيل حبيبي لاتتعبيش نفسش هذا إنسان خبيث ساحر مش جني 👹 عيونش ما عتأثر فيه..

روزيل إتفاجأت وإنصدمت بقوة 😱: مااااااهو ضرغام إنساان كيف إنسان..

ضرغام بدأ يضحك 🤣 بصوت عالي ومد يده ✋️ يسحب روزيل لعنده بسرعة..

روزيل بتنسحب بسرعة لعنده وبدأ شعرها يتطاير من قوة السحب وخيوط العنكبوت 🕸 تتفكفك من جسمها وطارت بقايا من زهرة الياسمين 🌸 اللي كانت في شعرها..

ضرغام دخلت الياسمين 🌸 انفه وحس برعشة قوويه وأنتفض وتسمر مكانه كأنه متشنج او حصل له شلل اعصابه مشدوده ماقدرش يحركهن..

روزيل نكعت للأرض ومستغربة من اللي بيحصل: ماله ضرغام..

ضرغام بصوت متقطع حزين بيحاول يكتمه: ااااا...اااام...أااامي..

روزيل بتتفرجه 😳 مستغربة..

ضرغام: أااامي أنا بنتش..

روزيل: 😱 معقولة هذا هو نفسه الساحر اللي كان عيقتل لوآح زوجة الأجهش وتلبسته بنت الأجهش ومارضيت تخرج منه خايفة لو يقتل أمها وذلحين هي بتحسب إن انا أمها بس ياربي أيش كان أسمها 🤔 أيش أيييش ، أيوووه نارين فكرت في خطة بسرعه وردت عليها
نارين بنتي أنا امك..

ضرغام: مش هي امش ياغبيه يله إرجعي لسباتش..

روزيل: نارين بنتي ساعديني ساعدي أمشش لوآح لاتخليه يتحرك يشتي يقتلني ساعديني..

ضرغام بيصيح: لا لاااااا فلتيني لاتصدقيش بدأ يتشنج ويتجمد كأنه شجرة يابسة بيحرك عيونه بس لعند روزيل وفمه مفتوح ويرتعش..

روزيل مسكت المطرقة 🔨 حق يارخ وحاولت ترفعها ثقيلة قووي تلفتت يمين شمال حملت لعند نشروان تشل سيف عين الذئب 🐺 بس كان ثقيل والكل ع جسمها..

نشروان: حاولي ياحبيبي حاووولي..

روزيل حاولت ترفع السيف 🗡 مابش فايدة مدت يدها تسحب السيوف ⚔️ المطعونه في كتف نشروان..

نشروان صيح: مااااشي لاااااا..

روزيل كانت قد مسكت السيوف ⚔️ صعقت يدها اليمين وانتشر اللهب 🔥 في يدها الشمال وطارت بسرعة لاوراء..

نشروان بعد ماروزيل مسكت السيوف ⚔️ تحركت من مكانها وقدر نشروان يبعدهن من كتفه حمل بسرعة يشتي يمسك روزيل بس إنتبه إن نارين قد خرجت من جسم ضرغام وبتتحرك لعند روزيل دري إن ضرغام تخلص منها مسك سيف عين الذئب 🗡🐺 وطار بسرعة يطعن ضرغام في بطنه..

ضرغام صيح: مستحيل دخلت الطعنه من بطنه وخرجت من ظهره حاول يمسك نشروان بيده..

نشروان ركله برجله بقوة وارتجم للأرض وبدأ الدم يتطاير🩸من جسمه ومش قادر يتحرك..

بدأت حاجة كبيرة تنكع من السماء..

روزيل رفعت رآسها للسماء وصاحت: العنكبوت🕷 وحملت تحضن نشروان حبيبي حبيبي إحميني تشتي تقلع عيوني 👁..

نشروان حضنها وخباها ورآه: لاتفتجعيش يا أميرتي انا فقعت عيونها زمان لأنها حاولت تمنعني أبسرش واليوم شازيد أفقع لها الثنتين اللي خليتهن لها لأنها فكرت تأذيش مسك سيفه 🗡ومراعي لها توصل..

🌹meme_abdalgaleel

البـارت 57 •°

السـر المـدفون ❤️

نكعت العنكبوت 🕷 لفوق ضرغام وهو بينازع وأختلط دمها البنفسجي بدمه الأسود وبدأت تتفرج لنشروان بقهر وحسرة وتحرك أيديها تشتي توصل له..

نشروان مسك رمح الظلام 🏹 وفقع عيونها الباقية وماتت ع طول..

ضرغام صااااح بصوت قوووي😡 لما إهتز الجبل 🗻 من قوة صووته: هزمتني ياحقيرررر..

روزيل إفتجعت من صوته 😱بتبسر بخوف نظرة لعنده 👁 ونظرة لعند نشروان..

نشروان حضنها بقووة: خلاص إهدئي ياروحي قتلته ماات خلاص خلصنا منه ومن شره وعيسود الأمان المملكه أنتي بطلتي اللي ساعدتني وأنقذت المملكه إنقذتيني من صوهيماء ودخلتيني عالم الجن لما وصلتيني للقلعة 🏰 وذلحين رجعتي تنقذيني وتخلصيني من ضرغام ، احبش يامجنونه ياعنيدة ❤️..

روزيل بتحضنه بقوة وتبكي 😭: يعني خلاص خلصنا من كل التعب ماعد عيحصلش شي ثاني ولا شي يخوفنا وأقدر ذلحين أبسر بناتي..

نشروان حط يده في وجهها وبيتفرج عيونها 👁 ويمسح الدموع: خلاص خلصنا يا أميرتي يا اميرة مملكة البحار 🌊 أيش من بحار بس قدش زوجة امير مملكة الجن كلها بعد موت ضرغام..

سمعوا صوت من وراهم: ماما أنتي بخير..

روزيل لفتت تبسر إبسرت بنت صغيرة بعمر بناتها فيها شبه قوي منها: نارين أنتي نارين..

نارين بصوت حزين 😔: ماما أنتي بخير..

روزيل: أمش ماتت بسبب ضرغام هو اللي فعل كل هذا الشر بس من اليوم أنتي بنتي وروحي وحياتي لاتفتجعيش مسكتها وحضنتها..

نارين بكيت 😭: كان نفسي أبسرها بس..

روزيل: إبسري في عيوني 👁 عتبسريها..

نارين إبسرت عيونها 👁 وإبتسمت 😃: احبش ماما..

نشروان بيتفرجهم ويبتسم 😁: مااحلاكن ومااحلى طيبة قلبش يا اميرتي دريتي ليش حبيتش حبي لش مش من فراغ..

فجأة بدأت العنكبوت 🕷 تتحرك..

روزيل: أنت داري كانت تشتي تفقع عيوني👁 تنتقم منك وتقتلني..

نشروان تحرك مستغرب يشتي يهجم ع العنكبوت 🕷 قبل ماتقوم..

اقتلبت العنكبوت 🕷 ع قفاها وخرج ضرغام من تحتها ماسك في يده مطرقه يارخ 🔨 يهجم عليهم وفاتح فمه..

نشروان قفز بسرعة يحمي روزيل ونارين لان هجوم ضرغام جاء فجأة وهم يحسبوه مات..

ضرغام سال دم ضرغام 🩸 لفوق عصا المطرقه 🔨 وطلع منها صووت صفيرر مرعب وتحولت لرمح غرس في صدر ضرغام وارتجم للأرض يابس محنط وإختلطت دموعه بدمه...

نشروان وقف فوق رآسه ماسك سيفه🗡..

ضرغام بيلفظ أنفاسه الأخيرة: صدق يارخ لما قال لي عيقتلني بسلاح من صنعه هذا الحقير حتى وهو ميت انتصر عليا..

نشروان مسك راس ضرغام بيده وانتزعه من رقبته ورجمه 👺 من راس الجبل 🗻 ودمه الأسود بيتطاير في كل مكان ومسك باقي جسمه ودهفه برجله من راس الجبل بعد رآسه..

القوم كلهم نازل تحت الجبل 🗻 مش هم داريين مابيحصل كانوا يسمعوا أصوات السيوف 🗡 والرعود واهتزاز الجبل بس من المنتصر محد داري ...

ملهم اول ما إبسر رآس ضرغام بيدحرج من الجبل صااح بفرحه🤩: أنتصر بطلي فاز اميري واخي قتل ضررغام..

بدأت اصوات الفرح 🤩 والصياح تتعالى في القلعة 🏰.

نشروان غرز سيف عين الذئب 🐺 فوق الجبل 🗻 وعلق فوقه فرو الذئب نصب تذكاري وحضن روزيل ونارين وطار بهن ينزل من الجبل وتوجه للمنصة بكل هيبة وقوة 💪 ومعه روزيل ونارين..

روزيل حست بشوية خوف وهي 😨 بتبسر الجن بس بدأت تحس انها اقوى بعد ماقد إبسرت كل هذه الأهوآل اللي مرت عليها..

نشروان صاح بكل قوة وفخر 💪: أخيرآ ياقوم إنتصرنا وخلصنا من الشر وضرغام والطغاه كلهم نزل من المنصة ومسك بيده الملك ديمان وطلعه جلسه فوق العرش..

إرتفعت الأصوات يحيا الأمير نشروان يحيا الملك ديمان 🤩..

نشروان: هذا مشو ضرغام ملك مملكة النار 🔥 هذا إنسان ساحر شرير قتله وتشكل بهيئته وقتل ملوك وجن كان غرضه السيطرة ع العالم ونشر الشر والظلم لأغراضه الشخصية..

رئيس الوزراء حمل بسرعة لعند جثة ضرغام يتفرجها وقام ووجهه اسود غاضب 😡 والدموع في عيونه هذا الحقير كيف قدر يخدعنا كلنا ومحد ركز عليه انت متأكد إنه قتل الملك ضرغام..

نشروان: هذا اللي قاله لي..

رئيس الوزراء: يعني هذا الاتفاق باطل انت ماقتلتش ملكنا عاد معانا ولي العهد القعقاع هو المفروض تقتله علشان تحكمنا..

نشروان: لاتقلقش انا مااشتيش احكم مملكتكم انا أشتي نعيش في سلام لاتعتدوا علينا ولا نعتدي عليكم إذا وافقتوا والا حسمنا المعركه الآن..

رئيس الوزراء: مثل ماقلت خلصنا من الطاغية ومات واحنا مانشتيش اي حروب وأشر لبقية الجنود اللي معه والقعقاع وخرجوا من القلعة بخفي حنين..

اغلقت أبواب القلعة 🏰 والفرحة والرقص بعودة ملكهم ومملكتهم بس كان الجن 👹 بيتفرجوا لروزيل مستغربين وجودها..

اخيررررا خلصنا من ضرغام ومن شره بس أيش عيحصل الآن وهل عيتقبلوا قوم نشروان 👹 روزيل عندهم والا عترجع أيش عيحصل 🤔...

🌹meme_abdalgaleel

البـارت 58 •°

السـر المـدفون ❤️

نشروان حس انهم متضايقين من وجود روزيل 😔 زعل عليها وقف وبصوت عالي: ياقوومي أنا داري إنكم مستغربين وجودها ومتضايقيين بس هذه الإنسيه زوجتي وام بناتي وهي اللي أنقذتني وخاطرت بنفسها ودخلت عالم الجن 👹 ترجعني للقلعة وإنقذتني مرة ثانية وكان ضرغام عيقتلني في الجبل ولولا مساعدتها إن ضرغام قتلني وعيحكم مملكة عالم البحار 🌊 هذه أميرتكم روزيل..

بدأت الوشوشه بين الشعب والكلام بصوت واطي بيتناقشوا في كلامه ورجع الكل سكت ورجع هدوء مريب كأن المكان فاضي..

الجنى عجوز 👹: كان المستشار زمان للملك ديمان بيتحرك بصعوبه بدأ يمشي لعند المنصه يله قدر يوصل بصعوبه بدأ يتفرج روزيل..

روزيل نزلت عيونها بسرعة 👁 خايفة تسحره..

الجني العجوز 👹 لفت لعند الملك ديمان ورجع يبسر نشروان: أنت داري إن أبوك كان رافض زواجك من هذه الإنسيه وقرر إنه ينفيك ويخرجك من المملكة رغم إنك اقوى من يحكم..

نشروان زعل من كلامه ع روزيل 😔 يشتي يدافع عنها: هو اصلا مايعرفهاش..

الجني العجوز 👹 قاطعه: رغم إنك اقوى من يحكم بس انت ارتكبت ذنب كبير بزواجك منها ولولا هجوم ضرغام واسره للملك ديمان ماكنا عنحتاجك..

ملهم قفز للمنصة بسرعة وقف قدام الجني العجوز 👹: بس لو ماسرتش لعنده وبلغته باللي حصل كانت مملكتنا عتنهي وتتدمر المفروض محد يحاسبه ع شي ولايحاسبه ع قرار زواجه هذه حياته..

الملك ديمان بيتفرجهم ساكت 😐..

الجني العجوز 👹: بس وجودها بيننا مش مناسب..

روزيل مسكت يد نشروان بقوة 🤝 وبصوت واطي: هيا نشل بناتنا ونروح بيتنا تعبت..

الملك ديمان وقف وقرب لعند نشروان مسكه من كتفه وإبتسم 😊: أنا فعلا ماكنت راضي ع زواجك وانت خالفت تقاليدنا وقوانين المملكة ونفيتك من بلادنا بس الأحداث اللي حصلت أثبتت إنك فعلا الوحيد اللي قادر ع حكم المملكة من بعدي وانت اللي لازم تدير شؤون المملكة لأن انا كبرت ومعك هذه الإنسية اللي كلنا مدينين لها بالشكر لأنها ساعدتك وانقذتوا مملكتنا..

نشروان إبتسم لأبوه 😊 ومسك يده وباسها: بس في شخص ثالث لولاه ماقدرنا الاثنين ننقذ المملكة

مسك يد ملهم هذا البطل اللي غامر بنفسه وجاء لأرض الإنس يقلي اللي حصل وهو اللي ساعدني في كل خطوة وضحى بنفسه في البركان 🌋 وكان الاخ والظهر والسند الصاحب اللي ماقدرش يفلت صاحبه في كل خطوة ويحمي زوجتي هذا اللي المفروض يدير شؤون البلاد أنا إخترت طريقي من زمان طويل وروزيل هي حياتي الجايه هي وبناتي ومااقدرش أعيشهن في هذا الوضع..

بدأت الأصوات تعلى أنت قائدنا انت اميرنا كيف عتفلتنا..

روزيل بتتفرج اللي بيحصل ومتوترة😰 مش هي داريه أيش اللي ممكن يحصل ونشروان عيوافق او ماشي..

نشروان بيفهمها من نظرتها 👁 وحس بخوفها قرب لعندها حط يده ع كتفها وضغط بقوة وهمس في إذنها: معقوله عندش شك إن انا ممكن أقبل أتخلى عنش علشان احكمهم محد يتخلى عن روحه والهواء اللي بيتنفسه 😍 ولا حتى شأخليش تعيشي في هذا المكان أنا في نفسي قد بين افتجع منهم قد نسيت أشكالهم كيف ما انتي..

روزيل إبتسمت وفرحت 🥰: احبك..

نشروان قرب لعند ابوه يستأذنه إنه يشل روزيل ويسير يدي بناته من قصر الجنيات السبع..

طار نشروان وروزيل معه ونارين لما وصل قصر الجنيات السبع كان القصر 🏰 محاط بالازهار والأشجار 🪴🌲 وفيه بحيرة كبيرة محاطة بفراشات وورود ياسمين 🌸..

روزيل اول ما إبسرت المكان: نشروان قد ابسرت هذا المكان بس كيفه وانا ولا قد جيته ولا مرة..

نشروان: كنتي تبسريه في الحلم لأن الجنيات هن حلم أمهن والبنات كانين يظهرين لش يطمننش انهن هانا..

نارين فرحت بالمكان وبدأت تلقط ورد الياسمين 🌸..

روزيل بتتلفت يمين وشمال 👀: بس أينهن البنات..

نشروان جلس في الأرض: قد دخلوا يدوهن شويه وعيجين إجلسي..

روزيل جلست وسندت ظهرها لصدر نشروان وسارحة في البحيرة كأنها بتفكر في شي 🤔.. سمعت اصوات من وراها ماما.. ماما ..

حست برجفة في قلبها ❤️ كأنه عيطير من مكانه لفتت وبناتها بيطيرين لعندها حضنتهن بقووة وبتبكي😭..

نارين بتتفرجهن من بعيد ساكته بتتذكر امها 😔..

روزيل دعتها: نارين حبيبتي جي هذولاء خواتش يولاند وهيلانه..

هيلانه بتتفرج نارين: الله مااحلى شعرش 😍 طوويل وحالي..

نارين: لأن ماما كانت دايما تزينه لي بورد الياسمين 🌸 هيا جين نلعب ونجمع ورد..

🌹meme_abdalgaleel

البـارت 59 والأخير •°

السـر المـدفون ❤️

بدأت البنات تلعب عند البحيرة ويلقطين ورد 🌸وصوت ضحكهن ملان المكان..

روزيل بتتفرجهن وهي مبتسمة فارحه 🥰 حست كل التعب سار لفتت لعند نشروان..

نشروان بيتفرجها مركز في عيونها وكله حب 😍: روزيل حبيبة قلبي مااحلى عيونش ومااحلى كل شي فيش أخيرا اليوم أقدر أتغرل فيش براحتي..

روزيل إبتسمت ونزلت رآسها 🥰..

يولاند حطت فوق راسها طوق من ورد الياسمين 🌸: ماما هذا تاجش ورجعت تلعب..

نشروان مسك يدها وباسها 😘: ما احلى تاجش يا أميرة الجن..

روزيل ضحكت: ههههه..

نشروان: مالها حبيبتي بتضحك..

روزيل: بين اضحك ع حالي 😅 اميرة مربطه العيون في عالم الجن وساحرة مشعوذة في عالم الإنس مش انا داريه من أنا ولا كيف شاعيش ولا اين شاعيش..

نشروان حضنها بقوة ورفع دقنتها بيده وبيتفرجها: لاتقلقيش ياروحي كل شي عيتصلح الأهم إنه التم شملنا مع بناتنا، وإبتسم 😍 وحشتني عيونش...
إنسي الدنيا نخليها بمافيها..
لا جنها نرى ولانسمع بإنسها..

إرمي جراحك ع صدري وإنسيها.. أغمضي عينيك وارقصي فاك ..

وأجمعي يدانا ودعينا نرقص ع نهر فرات في ليلة دافئة بلحن غناك ..
بادليني الرقص بالحب ..

ودعينا نصعد في سماء سرآب ..
نتعانق ونطير ولا يغطينا أي جلباب..

دفئيني ودفئي السحاب حتى تدمع عيناه ويقول الله ما احلاك..
أمسكيني يا اميرتي ظلي ممسكه بيميني لست مغرقك ولاضير بأن تغرقيني..

إن كان عشقك عكس التيار فأرجوا أن تسحبيني كجنيه نهر اغرقت في هواها..
ماحاجتي لتنفس الهواء وقد غرقت في بحر هواك وسحرتني عيناكي..

روزيل نزلت دمعه من عيونها 👁 وهي بتسمعه..

نشروان مسح دموعها بيده: العيون هذه ماينفعش تبكي 👁 العيون هذه تسحر بس ..

روزيل إبتسمت 🥰: خلاص من اليوم عمرك ماعتفلتني صح إوعدني..

نشروان: أوعدك يا أغلى من عشقها قلبي ❤️...

بعد ما أقنع نشروان الملك ديمان والمستشاريين بتتويج ملهم ولي لعهد المملكة ودع والده وملهم وقرر الرجوع مع روزيل وبناته لعالم الإنس وإخفاء الحقيقه ع بناته يعيشين مثلهن مثل البشر ونقلوا مدينه جديده يبدؤوا فيها حياتهم بكل هدوء وحب 😍 ونارين اختارت تعيش في قصر الجنيات السبع..

هذه كانت نهاية قصتنا نشروان وروزيل اللي سحرته بجمال عيونها 👁 وتخلى ع قبيلته ومملكته وضحة بكل شي في سبيل حبه لها..

طبعا هذه المره قصتنا كانت مختلفه كليا يمكن البعض يتقبلها وتعجبه ويمكن البعض ينتقدها ويقل بالغتي فيها بس في الأخير هذه تظل قصة أتمنى إنكم تكونوا إستمتعوا ورجعت لكم بشي مختلف وياريت تكتبوا لي رأيكم فيها ..

وخواااتم مباااركة

مع تحياتي

🌹 meme_abdalgaleel

🌸 رواياتنا التي قد تم عرضها كاملة....

1- حب❤️ تحت القصف🔫💣🚀

https://tttttt.me/qesasanani/2


2- عودة الماضي👇🏻👨‍👩‍👧‍👧

https://tttttt.me/qesasanani/253


3- ضحايا القدر😢

https://tttttt.me/qesasanani/424


4- بيت جدي🏘🧓🏻

https://tttttt.me/qesasanani/690


5. وجع السنين💔

https://tttttt.me/qesasanani/1240


6. سأكتفي بك حلماً ❤️‍🩹

https://tttttt.me/qesasanani/3374


7. وشاءت الأقدار ❤️

https://tttttt.me/qesasanani/4825



🌸.......

8.السر المدفون

https://tttttt.me/qesasanani/6275