اذا تشتوا نعرض اتفاعلوا

البـارت 1 •°

السر_المدفون ❤️

في المدرسة 🏫...

روزيل.. بطلة قصتنا ذات ملامح جذابة عسلية العيون 👁️ طويلة الرموش عيونها فيها لمعه قووية تلفت نظر كل اللي يبسروها والشعر البني الغامق بيضاء البشره ومعاها غمازه في خدها اليمين.. ماسكه بناتها في يدها 👭 اول يوم لهن في المدرسة

الأستاذة واقفه في حوش المدرسة: يووه ماشاء الله 😍 هذولا بناتش قمريات مثلش أيش أساميهن

روزيل إبتسمت إبتسامه خفيفه ☺️ وبانت غمازتها: تسلمي الله يحفظش عيونش الحاليه.. وأشرت بيدها 👈🏻 هذه إسمها يولاند وهذه هيلانه..

الأستاذة بإستغراب 🤔 يولاند وهيلانه: أول مره أسمع هذه الاسامي من سماهن أيش معناهن..

روزيل ضحكت: هههه 😂 والله انها هذه ردة الفعل اللي أبسرها دائما وهذا نفس السؤال اللي انسئل به دائما ..

يولاند معناها زهرة البنفسج وهيلانه اسم قديسه كانت عايشه زمان ولو تسأليني ليش سميتهن هكذا شاقلش هو أبوهن اللي سماهن أصلا يعجبه يقرأ كتب عجيبه غريبه واختار اساميهن حتى أنا اسمي وزوجي غريب

الأستاذه: يوووه 🤭 هههه ليش إيش اسمش واسم زوجش ..

روزيل رمشت عيونها 👁️ وإبتسمت: قصتي طويله جي نجلس في الكرسي وأحكي لش ...

أنا اهلي سموني سحر بس مره خرجت الحوش حقنا وعمري ٣ سنين كنت بين العب وبعدا دخلت وفي يدي تفاحه ادتها لها واحده عجوز في الشارع ومرضت وجلست أبكي ومرضت وعالجوني ومانفعش وكنت واصل بكاء لما مره كنت في حضن أبي في الشارع بين ابكي 😭 وابسرني واحد عجوز وقال لأبي بنتك أكلت تفاحة ومرضت ادي لها من هذا الماء تشرب وهي عتفتهن وغير إسمها روزيل لأنها وردة جميلة🌹

أبي حاول يعرف منه مادراه ومن هو الرجال فلت ورحله وبعد ماشربوني من الماء افتهنت فرجعوا غيروا اسمي روزيل وكنت سحر ...

الأستاذه بإستغراب: 😨 لو مشو أنتي اللي بتحاكيني بنفسش ما اصدق أمانه قصه غريبه .. وزوجش بسمه ...

روزيل حطت رجل ع رجل: زوجي طبعا أصوله مش عربيه اسمه نشروان بس اهله عاشوا في شرق آسيا وهو يحب يسافر ويتعرف ع الدول وجاء عندنا وعجبته بلادنا واستقر هانا واتزوجنا...

الأستاذه: ماشاء الله والله ان أنتوا أسامي وقصه غريبه بس حلو تكونوا مميزين حتى بناتش جمالهن ماشاء الله يجنن الله يجبرش وفرصه سعيده إن انا تعرفت عليش ولاتقلقيش ان شاء الله البنات يتعودين ع المدرسه شكلهن ماشاء الله اجتماعيات ومش مزعجات...

روزيل: تسلمي انا فدالش 😊 اليوم شجلس عندكم في المدرسه علشان لو يبكين..

الإستاذه: لو تشتي نصيحتي روحي علشان يتعودين انهن يجلسين وحدهن وحطي لي رقمش لو بكيين 😭 شتصلش وتجي تروحيهن ...

روزيل: طيب خلاص تمام وهذا رقمي سجليه 📱 والبيت اصلا قريب شقدر اجي بسرعة..

روحت روزيل وبدأت تنظف البيت وتجهز الأكل وتطبخ ...

روزيل في المطبخ بتجهز الغداء 🍵 سمعت صوت كشكشه في الحوش طلت من الطاقه تبسر وإنها دمه 🐱 بتلعب تحت الشجره.. رجعت تكمل طبخ سمعت صوت الباب فتح ..

نشروان.. بطل قصتنا شاب طويل مفتول العضلات عيونه سوداء 👁️ ذات نظره حاده وشعره اسود طويل وسيم جدا كل اللي يبسره يقله شكله مختلف يضحك ويقلهم أصلي آسيوي

فتح الباب 🚪 بيداعي روزيل انتي هانا

روزيل حطت الملعقه من يدها 🥄 وخرجت من المطبخ: هاه حبيبي أيووه روحت البنات ماشاء الله عليهن تأقلمين بسرعة

نشروان إبتسم 🙂: اكيد شطورات مثل امهن ...

روزيل: مسرع روحت من الشغل عاده بدري

نشروان مسك يدها وباسها 😘: قلت لش ألف مره شغلي اتحكم فيه بمزاجي أروح وقت ما اشتي ...

روزيل لفتت له بدلع بتتفرجه بعيونها 👁️ وترمش: طيب يا اللي بتتحكم به وضحكت 🥰...

نشروان وقف بيتأمل عيوونها 👁️: فديت العيون هذه اللي سحرتني وقلبت حياتي رآسا ع عقب وغيرت كل موازين حياتي وبعت الكل علشانها ..

روزيل استحت وغمضت عيونها ☺️: ليش دائما تجلس تقلي ان عيوني قلبت حياتك وماقصدك ببعت الكل ..

نشروان مسك رآسها وباسه 😘: عتفهمي في الوقت المناسب ذلحين جي معي نسقي الشجرة الكبيره اللي فالحوش 🌲...

روزيل نفخت 😤: اووف احنا وهذه الشجره مش انا داريه ليش تجلس تسقيها وتهتم بها وماتشتيش تيبس مع انه شكلها مشو حالي كبيره وجذورها طوال ولا بتطلع اي ثمره مش انا داريه مافايدتها خلينا نقطعها ونزرع بدلها حاجة ثانية...

نشروان بنظره حادة 😠: إنتبهي قطعي شجر الحديقه كلهن الإ هذه الشجره ماتفكريش تقربي جنبها حتى بناتنا لما يكبرين ويعجزين وصيتي لهن محد يبعدها هذه الشجره شي مهم بالنسبة لي ..

روزيل هزت رآسها: طيب تمام يعلم الله مامعك وسطها والله لو وسطها كنز ماتهتم بها هكذا شدخل ادي لك ماء تسقيها ...

نشروان: قصدش نسقيها الاثنين قلت لش مليون مره إشتيش أنتي اللي تسقيها بيدش وانا معش علشان تتعود عليش ...

روزيل...

🌹 meme_abdalgaleel

البـارت 2 •°

السـر المـدفون ❤

روزيل هزت رآسها: طيب تمام يعلم الله مامعك وسطها والله لو وسطها كنز ماتهتم بها هكذا شدخل ادي لك ماء تسقيها ...

نشروان: قصدش نسقيها الاثنين قلت لش مليون مره إشتيش أنتي اللي تسقيها بيدش وانا معش علشان تتعود عليش ...

روزيل ضحكت 😂: قلك تتعود عليا محسسني انها بتحس وعتعرفني لحد يسمعك ويضحك عليك...

نشروان إبتسم 😁: طاااايب عتفهمي كم ما جلستي يله بسرعه ادي الماء ...

......... ......... .........

في المدرسه 🏫...

هيلانه بتلعب مع البنات👭 وعجبتها المدرسه ..

يولاند جالسه وحدها في الطرف ضابحه😤 ماعجبهاش الوضع تشتي تروح ..

الأستاذه سارت جلست جنبها مالش: يايولاند ماتلعبي مع صاحباتش ابسري مااحلاهن كيف بيلعبين وهيلانه بتلعب معاهن

يولاند: أصلا بيبلعبين لعب عادي وانا اشتي العب مثل ما العب انا وبابا ..

الأستاذه ابتسمت 🙂: خلاص علميني كيف بتلعبي انتي وبابا والعب أنا وأنتي ...

يولاند فرحت 😃: صددق يعني عتطيري معي بابا يلاعبني في الحوش واطير انا وهو بس هو سر لاتقليش لماما ..

الأستاذه ضحكت هههه 😂: تطيري ماشاء الله ع خيالش يايولاند خلاص قوومي نلعب في المدرهه واطيرش بها ...
.
.

بعد يومين ....

في بيتهم 🏡

هيلانه دخلت وهي بتضحك 😂: ههه عيس تستاهل ..

روزيل سمعتها👂قربت لعندها: مالش بتضحكي من هي اللي تستاهل ...

هيلانه فارحه 😁: بنت الجيران كنا بنلعب في الحوش حقنا أنا ويولاند وهي راجمتنا من الطاقه حقهم بحجار وتقلنا اسكتين 🤫 صوتكن بيزعجني اشتي أرقد وأنا ضبحت منها وقلت لها شانكعش من الطاقه لو تزيدي تراجمي وهي تليقنت عليا قالت للمه أو أنتي ساحره أتحداش وانا قلت لها لاتتحديش مارضيت وانا خليتها تتعلق في الطاقه ورجعت رحمتها وفلتها...

يولاند ع دخلتها من الباب 🚪 سمعتها مسكت يدها تسكتها وغالطت: ياماما جاووعه اشتي أكل ....

روزيل بإستغراب وخوف😨: راعي انتي مش وقت الأكل ولفتت لهيلانه ماهو خليتيها تتعلق في الطاقه سرتي بيتهم ورجمتيها ...

هيلانه سكتت وتلخبطت 😅: هاااه ماشي بين اضحك بس انا شليت حجره ورجمتها ووقعت في رآسها وانا ضحكت وقلت عيس تستاهل ...

روزيل بهررت 😠 وبتصيح فوقها: اخر مره تفعلي هذه الحركات ولو حتى هي راجمت تجي تشتكي لي وأنا أكلم امها ماتفعليش هكذا مره ثانيه يله ادخلي غرفتش معاقبة

يولاند خطيت مع هيلانه 👭 للغرفه وبتحاكي هيلانه بصوت واطي: والله لا أقل لبابا يبطل يعلمش حاجه أنتي هبلاء كنتي عتقلي لماما وهو قلنا هذه الألعاب سر بيننا وبينه ....

.......... ........ .........

الليل 🌒...

في غرفتهم ....

نشروان: مالش ضابحه 😤 من حين روحت وبين احسش متضايقه..

روزيل: بناتك شكلهن عيبدأين مشاكل مع بيت الجيران انا قلت لك لاتكنش تخرجهن يلعبين في الحوش قد معاهن العابهن في غرفتهن مدري مامعك هذه الفتره انت والحوش

نشروان: بيت الجيران ليش ماحصل ..

روزيل بتحكي له ماحصل ...

نشروان ضحك 🤭 وغطى فمه بيده يخبي الضحكه ..

روزيل خفعته بيدها ✋🏻 في رجله: عادك بتضحك هااااه بدل ماتقوم تصيح فوقهن ...

نشروان إبسر يدها ومسكها: فين خاتمش 💍 ...

روزيل: 😅 هاااه يمكن لو هو في المطبخ لما غسلت الصحون

نشروان قام بسرعة من مكانه للمطبخ بيدوره لقيه محطوط فوق الدولاب تنهد: اوووف الحمدلله شل الخاتم💍 بسرعه ورجع للغرفه ...

روزيل بتضحك عليه 😂: والله انك مجنون تقوم هكذا تدوره اين عيسير هو وسط البيت ...

نشروان مسك يدها بضبح 😤 ولبسها الخاتم 💍: روزيل آخر مرة أقلش هذا الخاتم ممنوع يبتعد من يدش مهما كان ايش ماحصل يحصل ماتبعديه أبدا هذا الخاتم شي مهم وغالي قووي بالنسبه لي مفهوووم ..

روزيل ☹️ وطت راسها بزعل: خلاص طااايب بدون صياح آخر مره نسيت وبعدته لما غسلت الصحون ..

نشروان رفع راسها بيده وبيتفرجها بإبتسامه 😊: آسف زعلتش بس اوووعديني وعد ان هذه آخر مره تبعديه من يدش ..

روزيل: خلاص وعد ما أبعده من يدي طول عمري مهما يحصل ..

🌹 meme_abdalgaleel

البـارت 3 •°

السـر المـدفون ❤️

مر أسبوع ...

روزيل بتحس في حركه غريبه في البيت كأن في أحد معاها وبدأت تحس بخوف 😖 وسمعت صوت حاجه في الغرفه انكسرت خرجت للحوش وبتبكي 😭 جالسه مراعيه لنشروان لما يروح ..

نشروان دخل من الباب🚪 ابسرها استغرب 😱: يووه مالش هانا وليش بتبكي ...

روزيل وقفت ومسكته بخوف 😖: مدري من به داخل في البيت والله ان به احد كنت احس بظله وبه حاجه اتكسرت في الغرفه شكل بيتنا قد فيه جن 👿 والله ماعاد أدخل ..

نشروان يشتي يخفف عنها الخوف: جن مه من اين عيجوا قد اكبر جني معش ماعاد صداهم وضحك😂 هههه ...

روزيل مخبايه وراه خفعته بيدها في ظهره ✋🏻: بطل هذا الكلام والله إن انا بين افتجع ...

نشروان مسكها من يدها ولف ظهره .. بيتفرجها: روزيل لو أطلع أمير بس جني👿 عتفلتيني

روزيل صيحت 😠: نشررروان بس بطل بين اقلك هذا الكلام بيخوفني وأنت بتزيد تعاند والله لا اموت رعب قلك أمير جني والله لأفلتك ...

نشروان إبتسم ☺️: ماعاد تقدريش تفلتيني أنا نصيبش وقدرش وأحبش وعشقتش من وعمرش ٣ سنين خلاص ملكي ونصيبي ..

روزيل إستغربت 😨: كيف وعمري ٣ سنين أين كنت أصلا نشروان بطل محانكه هيا أدخل أبسر من به في البيت إشتي أدخل قبل مايروحين البنات من المدرسه مافعلتش اكل ...

نشروان: طيب خلاص خليش هانا يافجاعه شدخل أبسر وأوريش إنه كان يتهيألش بس ومابش أحد ...

دخل البيت ماحس بوجود أي شي غريب دخل الغرفه بيدور ايش اللي قالت سمعته إنكسر بيتلفت مالقيش شي لفت للمرايه 🪞 شاف عليها كتابه إنقذنا ضرغام هجم ع المملكه وإستولى ع الحكم والملك ديمان سجين...

تغيرت ملامح نشروان 😨 حس بقلق وتشتت أفكاره حس نفسه في حيره الكلمه الوحيده اللي قالها.... ملهم أكيد هذا ملهم ....

روزيل بتصيح له من خارج: نشرروان مالك تأخرت أيش في ...

نشروان سمع 👂🏻صوتها حاول يمسك نفسه ويسترجع قوته لفت بسرعه بعيونه 👁️ للمرايه ومسح الكلام المكتوب.. خرج بسرعه ويحاول يبتسم 😊: مالش ياخوافه مابش شي مسك يدها ودخلها 👫 هيا أدخلي وبطلي تتهيأي هذه شكلها دمه دخلت من الطاقه وانتي كبرتي الموضوع بس...

روزيل هدأت بعد ماتأكدت إن مابش شي ودخلت تصلح الأكل🍵🥣 قبل مايروحين البنات ....

نشروان دخل الغرفه وغلق ع نفسه جالس يفكر 🤔 في الكلام اللي قريه واذا الملك ديمان فعلا سجين لازم يتخذ قرار وينقذه لكن روزيل 🤔وردة فعلها..
بناته ووضعهن تنهد بقوه وخرج ع طول للشارع جالس يمشي🚶🏻‍♂️يفكر ...

........ ....... .......

في الليل 🌒 ....

روزيل كملت تنيم البنات 😴 خرجت للغرفه بتدور نشروان مابحد ابسرت باب البيت مفتوح 🚪 قربت لعنده ابسرت نشروان واقف تحت الشجره 🌲 وبيتكلم .. يوووه ماله هذا بيحاكي نفسه شكله أصحاب هو وهذه الشجره بيسير يشكي لها همومه أسير اسمع مابيقلها لو بيشكي لها مني 😅 مشيت دلا دلا علشان مايحس فيها ......

نشروان حس بوجودها .. سكت ولفت لعندها 👀 بسرعه قبل ماتوصل: مالش خرجتي ...

روزيل ابسرت ورق من الشجره🌲 تطاير كأن احد طار افتجعت 😨: يوووه اعوذ بالله من الشيطان ماطير الشجره هكذا وبعدا مادراك ان انا خرجت قد بين اخطى دلا دلا 🚶‍♀️أجي اسمع مابتشكي للشجره حقك ...

نشروان حس بالخوف في وجهها حاول يهديها إبتسم 😊: بين اشكي لها منش وكيف بتخليني أحبش كل يوم اكثر ويزيد تعلقي فيش وفي العيون👁️ هذه اللي سحرتني ...

روزيل ضحكت ☺️: يعني مابتشكيش لها ان انا بين اجننك وان انا خوافه وما احس بالأمان الإ لو انت جنبي ....

نشروان مسكها بيده الثنتين وطبطب ع كتفها ✋🏻: بس انتي قوويه وحتى لو انا مش موجود عتعرفي تحمي نفسش بس مثل ما أتفقنا الخاتم 💍 هذا ماتبعديه من يدش والشجره هذه تسقيها ع طول واشتي الآن تدخلي تدي ماء وتجي تسقيها...

روزيل: يوووه منك انت والخاتم 💍هذا والشجره🌲 جننتني يعلم الله ماهو سرهن طيب شدخل ادي ماء وأسقيها ...

كملوا يسقوها ودخلوا يناموا وجلس نشروان صاحي طول الليل ماقدر ينام 😴 يتفرج روزيل ويفكر في الكلام اللي جاء ملهم وقاله له عند الشجره ....

ياترى من هو ملهم وأيش قصة الكلام اللي عند المرآيه وأيش السر اللي وراك يانشروان 🤔...



🌹 meme_abdalgaleel

البـارت 4 •°

السـر المـدفون ❤

ثاني يوم الصبح 🌞

روزيل فتحت عيونها ملان نووم بتتقعم 🥱 تلفت جنبها مابحد نشروان.. بتحاكي نفسها الله لو قد قام قبلي وجهز البنات للمدرسه بدل ما اقووم وأنا ملان نووم

نزلت من فوق السرير وخرجت من الغرفه بتداعيه نشروان دخلت غرفه البنات ومابحد لانشروان ولا البنات استغربت يووه اين جوا ماقدهوش موعد الباص🚎 يجي لهن بتدور في الغرف الباقيات والمطبخ وتداعيهم مابحد

فتحت الباب تبسرهم لو في الحوش مابحد 😧 افتجعت يووه أين ساروا يمكن خرجهن وساروا يشتروا صبوح أكيد مابش غيرها دخلت للغرفه إبسرت ظرف ✉️ فوق التسريحه مسكته بتتفرجه ورجعت تفتحه ...

تغيرت ملامح وجهها 😨 ورجعت ع ظهرها جلست ع حافه السرير تكمل تقراها ...

حبيبتي وزوجتي وكل شي في حياتي روزيل ❤️....

وقت ماعتكوني بتقري هذه الرساله ✉️ ماشاكونش موجود معش لأن انا شليت البنات واضطريت أرجع للمملكه ...

روزيل حبيتي وصديقتي والعشق اللي بسببه تركت كل شي وانطردت من مملكتنا ...

روزيل أنا متأكد أن دموعش الآن بتنزل ومصدومه 😭 من كلامي بس لازم تعرفي الحقيقه

ملاكي نشروان زوجش وحبيبك مش بشر أنا جني 👿 من مملكه عالم البحار أو بالأصح أنا أمير إبن الملك ديمان حاكم المملكه وكان المفروض اتزوج بالأميره صوهيماء بنت الملك ضرغام ملك مملكة النار بس في يوم تسللت لعالمكم من الشجره 🌲 اللي دائما أهتم بها وأطلب منش تسقيها بيدش لأنها الطريق بين عالمنا وعالمكم ...

يومها كنتي طفله عمرش ٣ سنين وتعلق قلبي❤️ فيش وقررت انه انتظرش تكبري وصوهيماء بدأت تحس ان انا اتغيرت وكثرت هربتي لعالمكم وعرفت انش السبب فقررت انها تقتلش وهي اللي تنكرت بعجوزه وادت لش التفاحه المسمومه وأنا الشيخ العجوز اللي جيت ونقذتش من الموت وطلبت من ابوش يشربش الماء ويغير اسمش ...

ملكة عمري انا حاسس فيش والصدمه اللي أنتي فيها 😱 حاولت اكثر من مره ألمح لش إن انا جني بس عقلش ماكان قادر يستوعب وكنتي تقلي لي عتفلتيني لو اطلع جني وأنا كنت أتردد أقلش الحقيقه لأنه خايف من ردة فعلش بس الوضع اللي إستجد أجبرني إن انا أحكي لش الحقيقه لأن انا اضطريت أرجع للمملكه لأنه من بعد زواجنا كثرت الخلافات بين أبي الملك ديمان والملك ضرغام بعد مارفضت الزواج من بنته وطردوني من المملكه وكثرت الخلافات وشبت الحرب بين المملكتين هذه المره والملك ضرغام هجم ع مملكتنا وحبس أبي ولازم أنقذ باقي القبيله وأسترد المملكه وطبعا شليت يولاند وهيلانه معي علشان أقدر أحميهم محد يأذيهم لأنه ممكن يوصلوا لهن في عالمكم وأنا مش موجود ...

حبيبتي إدعي لي أنتصر وأرجع المملكه وأخرج أبي من السجن وأرجع لش أنا والبنات وأنا متأكد إنش قويه وعتتحملي بعدنا هذا إذا ماكرهتيني😔

آخر شي بقوله لش الخاتم ثم الخاتم💍 إنتبهي تبعديه من يدش لأنه حارس يحميش من أي شر ممكن يحاولوا يأذوش ينتقموا مني ..
زوجك المحب نشروان ❤️...

😱😱 ياويلي يعني روزيل كانت عايشه ومتزوجه 👿 ...

لو أحد منكم فجأة يكتشف ان زوجه او زوجته من عالم آخر كيف عيتصرف وإيش ردة فعله وياترى كيف عتكون ردة فعل روزيل 🤔..
.
.

روزيل مصدومه 😱 ملامح وجهها متغيره عيونها مورمه من كثر البكاء مش قادره تصدق ولا تستوعب الكلام..

رجمت الرساله ✉️ من يدها وبتصيح بصوت عالي نشرووان بس بطل هذا المزح نشروان لاتخوفنيش 😨 هيا اخرج أنا داريه إنك متخبي أنت والبنات نشروان

بتصيح وتبكي 😭 وبتدور تحت السرير في الدولاب في الغرف ماخلت مكان جلست في الأرض وبتبكي وبدأت تتذكر مواقف حصلت معاهم وكيف كان أوقات يمزح معها ويتحداها يشل حاجه من يدها بدون مايمسكها واشياء كثير وكانت تحسب انه تعلم ألعاب خفه وكلام بناتها وحركاتهن اللي كانت أوقات تحسهن غريبه وتقول انهن لعب وتهيؤات أطفال...

حست بخوف كانت عيونها تتحرك يمين وشمال 👀 تذكرت انها سمعت اصوات وحركه في البيت وبعدها تغير نشروان واعترف لها وفلتها

خافت يظهر لها جن مسكت الخاتم 💍 وجلست تتفرجه ومحتاره تبعده والا تخليه بس نشروان قلها انه عيحميها محد يأذيها حست ببروده وقشعريره في جسمها وماقدرت تتحرك من مكانها من كثر الخوف مصدومة....

........ ........ .......

في مملكه عالم البحار 🌊...

في القصر 🏰....

نشروان جالس🤴 فوق كرسي العرش والحراس 👿👹 حووله ..

ملهم.. جني من عالم البحار 🌊 صاحب نشروان المقرب وفي نفس الوقت مساعد الملك ديمان في أمور الحكم... دخل بيكلم نشروان: خلاص سوينا اللي طلبت هيلانه ويولاند نقلناهن قصر الأميرات👸 عند الملكه وكثفنا عليهن الحراسه ومعاهن وصيفات يهتمين فيهن ...

نشروان بملامح زاعله 😔: ...



🌹 meme_abdalgaleel

البـارت 5 •°

السـر المـدفون ❤️

في مملكه عالم البحار 🌊...

في القصر 🏰....

نشروان جالس🤴 فوق كرسي العرش والحراس 👿👹 حووله ..

ملهم.. جني من عالم البحار 🌊 صاحب نشروان المقرب وفي نفس الوقت مساعد الملك ديمان في أمور الحكم... دخل بيكلم نشروان: خلاص سوينا اللي طلبت هيلانه ويولاند نقلناهن قصر الأميرات👸 عند الملكه وكثفنا عليهن الحراسه ومعاهن وصيفات يهتمين فيهن ...

نشروان بملامح زاعله 😔: كيف هن قدرين يستوعبين التغيير اللي حصل لهن كان نفسي مايدخلنش في هذا الصراع بس كان صعب أخليهن في عالم الإنس خوف عليهن ...

ملهم: لاتقلقش عيتعودين يولاند أحسها قويه مثلك ومتأقلمه بس هيلانه تحسها متخوفه شويه خاصه إنها بعيده عن أمها ...

نشروان تنهد بحزن 😔: رسلت الحراس اللي قلت لك يطمنوا ع وضع روزيل وكيف حالها..

ملهم: أيوه لاتقلقش قد في ٢ بيراقبوها بيتسللوا من الشجره بس وضعها مش مطمن من الصبح وهي بتبكي 😭 ومنهاره ...

نشروان زعل عليها وامتلت عيونه بالدموع 🥺: أنا خايف عليها أكثر من خوفي ع البنات لأن انا بعيد ماشقدرش احميها وحاسس بوجعها وصدمتها فيني اكيد إنها كرهتني وكرهت حبي لها.. حط يده ع راسه ونزل وجهه لايبسرش ملهم دموعه...

ملهم: لاتقلقش روزيل قويه وعتفوق من الصدمة أهم شي إنها في أمان المهم إنه نبدأ نجتمع مع كبار الوزراء والقاده ونرتب خطه لإنقاذ الملك ديمان..

نشروان: أطلبهم في إجتماع وبلغ الكل إن الأمير نشروان رجع ومسك المملكة لما يرجع الملك ديمان..

ملهم حاسس بقلقه ع روزيل .. لفت لعنده: شابلغهم وعلشان تتطمن اكثر ع روزيل أنا بنفسي شتسلل لعالم الإنس وأطمن عليها أنت أهتم بأمور المملكه بس وخلي روزيل والبنات عليا في حمايتي انا شخصيا..

نشروان هز رآسه: شكرا لك ياملهم فعلا انت صديقي اللي ماتخلاش عني أبدا حتى بعد ماطردوني من المملكه واثق فيك..
.
.

ثاني يوم الصبح 🌞....

روزيل ماتحركتش من مكانها من أمس منهاره بكاء وخايفه 😨 مش قادره تتحرك بتحس نفسها خلاص منهكه حطت رآسها ع الأرض ترقد 😴 ذكرت الخاتم 💍 ان عاده في يدها بعدته ورجمته خافت لو فيه جن..

من كثر التعب نامت نووم عميق وفجأة بدأت تحس بخنقه وكأن أحد كاتم ع نفسها كانت تتقلب وتفتح عيونها 👁️ بصعوبه وتبسر إنها في البيت وتقل شكله حلم من التعب ورجعت تغمض عيونها..

........ ........ ........

في مملكة عالم البحار 🌊..

نشروان مجتمع مع الوزراء حق المملكه اللي باقيين بعد هجوم ضرغام ع المملكه وبيفهم منهم تفاصيل اللي حصل وكيف قدروا يهجموا عليهم ويسجنوا الملك ديمان وبدؤوا في ترتيب خطه ينقذوه هو وبقيه الأسرى ويهجموا ع مملكه النار 🔥 واهم شي ان خبر رجعته ماينتشر لمملكه النار علشان مايأخذوا حذرهم..

وهم وسط الإجتماع دخل جني 👿 من المكلفين بمراقبة روزيل سحب ملهم وكلمه..

ملهم تغيرت ملامح وجهه وحس بقلق 😥: خلاص انا شتصرف لاتحاكيش الأمير..

نشروان فوق الكرسي حق العرش حس بملامح ملهم اللي تغيرت 😧 قلق اشر له يجي لعنده وطلب من البقيه يغادروا الإجتماع..

ملهم خطي لعنده وبيحاول يخبي ملامحه يشتي يتصرف هو بدون مايشغله..

نشروان: مالوجهك اتغير 😮 اكيد الاخبار اللي وصلتك مش مطمنه اتحاكى شي يخص الملك ديمان والا روزيل..

ملهم تلخبط في الكلام 😥: روزيل بعدت الخاتم من يدها 💍 والحراسه اللي رسلتها يحموها مابش عليهم سيطره رجعوا يبلغوني يعني روزيل الآن عتكون مكشوفه لصوهيماء لأن الخاتم كان بيحميها من شرها..

نشروان ضبح وخفع الكرسي بيده 🤛: كمل الإجتماع أنت وتابع امور المملكه ع ما ارجع ماشقدرش أصبر هانا لازم اتصرف..

ملهم مسكه من يده 🖐: بس ماينفعش ترجع لعالم الإنس في الوضع اللي إحنا فيه نشروان لاتتهورش..

نشروان: بس روزيل في خطر صوهيماء ما عتفلتهاش ليش بعدتي الخاتم 💍 ياروزيل ليش المملكه في حمايتك وبناتي ماشاطولش أحاول اتصرف بسرعه وأرجع...

........ ....... ........

روزيل راقده 😴 حست بالكتمه اللي في صدرها بتخنقها من جديد بس هذه المرة بقوة أكثر فتحت عيونها بسرعة ومش قادره تتنفس حملت بسرعه 🏃‍♀️ للحوش تشم الهواء يمكن تقدر تتنفس

جلست ع حافه الباب وكانت تأخذ نفس تستنشق الهواء بقووه بس مافيش فايده بتحس شي ماسك لها من رقبتها بيخنقها

وقفت تتحرك يمكن تقدر تتنفس تلفت لاوراها وقدامها قطه سوداء 🐈‍⬛ شكلها يخووف بتتفرجها وعيونها بتلمع قفزت لافوقها وبتمسكها بمخالبها في رقبتها

صاحت بقوه 😱 نشروان فين أنت وبتحاول تبعد القطة بس القطه كانت اقوى منها شرسه وبتعضها بأسنانها ورجمتها للأرض...

معقووله القطه السوداء 🐈‍⬛ يكون لها علاقه بصوهيماء وفكرت تأذيها..

ليش بعدتي الخاتم 💍 ياروزيل الله يسامحش بس..


🌹 meme_abdalgaleel

البـارت 6 •°

السـر المـدفون ❤️

روزيل بتحاول تبعد القطه 🐈‍⬛ من فوقها مسكتها من ذيلها بتسحبها وتصيح وقد يدها ورقبتها كلها مجروحه ودم🩸 ..

فجأة قفز من فوق الشجره🌲 نسر أحمر بجناحين كبيره 🦅 ومنقار طويل ومخالب حادة مسك القطه 🐈‍⬛ وبعدها من فوق روزيل ورجمها للأرض...

روزيل في الأرض بتسحب نفسها وترجع لاوراء تبعد من عندهم وبتتفرجهم بخوف 😰 وتتفرج جروحها وتبكي بتحاكي نفسها يارربي ماهو هذا معقوله لأن انا بعدت الخاتم 💍 وقفت ودخلت بسرعه للبيت بتدور الخاتم أين رجمته لقيته تحت الكرسي لبسته بسرعة في يدها وخرجت تبسرهم ..

القطه السوداء🐈‍⬛ قفزت بسرعه وهجمت ع النسر 🦅 وبتخربشه بأظافيرها ...

النسر الأحمر 🦅 حرك أجنحته بقوة بيضربها والتراب بيطاير من حركة جناحه ورجمها للأرض ومسكها بمخالبه وبيغرسهن في جسمها ولفت بعيونه لعند روزيل...

روزيل واقفه مسنوده عند باب البيت 🚪 والعرق مغطي وجهها 😰 من الخوف متبلده من اللي بيحصل لما ابسرت عيونه 👁 معقوله يكون هذا نشروان حس اني في خطر ليش حاسه انهن نفس عيوونه ...

القطه السوداء🐈‍⬛ استغلت انشغال النسر 🦅وهو بيتفرج روزيل عضته بأسنانها بقوة ومسكته بمخالبها من رقبته...

النسر الأحمر 🦅 كان يحاول يحرك جناحه بس القطه ماسكه له بقوة من رقبته ماقدرش يتحرك ...

القطه السوداء 🐈‍⬛ رجمته للأرض وهجمت عليه بقووه وعضته بأسنانها لما الدم🩸 بدأ يسيل من رقبته وأختفت ....

روزيل أول ما أبسرتها إختفت والنسر مرجوم ع الأرض مجروح 😱 نسيت خوفها صاااحت نشروان وحملت بسرعه 🏃‍♀️ لعنده كانت تحاول تسحبه من الأرض يقوم بس الدم بينزف بقوه منه 🩸مسكته من راسه وبتتفرج لعيونه 👁 وقلبها بيقلها أنه زوجها نفس نظراته وحست بنفس الأمان اللي كانت تحسه بقربه: لاتقلقش شاساعدك اتحمل بس اوثق فيني وحملت بسرعة لاداخل البيت 🏃‍♀️ سحبت شنطه الاسعافات حطت له علاجات وربطت له مكان النزيف مسكت راسه ورفعته وشربته ماء 🧋

جلست تفكر 🤔 كيف ترجعه لشكله الاول ذكرت انها مره كانت تتكلم مع نشروان وقلها ان الجن 👿 إذا أصيب في عالم الآنس وهو في شكل غير شكله لازم يرجع لعالمه علشان يتعالج مسكت النسر 🦅 وحطت راسه ع حضنها وتتفرجه نشروان قلي كيف ارجعك كيف اساعدك وهي بتبكي 😭 ..

النسر الأحمر 🦅 حرك راسه وبيتفرج بعيونه بإتجاه الشجرة 🌲..

روزيل تذكرت انه كان يتفرجها وهي طفله من الشجرة🌲 وانها الممر بين العالمين قامت لعند الشجره كانت تلف حولها تمسك اغصانها تدور أي شي فيها يوصلها لعالمها وترجع لعند النسر 🦅 نشروان ساعدني ما أفعل ..

نشروان جالس يتفرج بعيونه 👁 للشجره ..

روزيل رجعت مره ثانيه للشجرة 🌲 تدور ولالقيت شي تعبت جلست في القاع وحطت راسها ع الشجره: يارب ساعدني ..

معقوله يطلع النسر من صدق نشروان 🦅 والا روزيل بيتهيأ لها ...
.
.

بدأت الدنيا تظلم🌓 وروزيل مش عارفه ايش تسوي ولا كيف تتصرف الشي الوحيد اللي مطمنها إن نزيف النسر 🦅 وقف وغطته ببطانيه لايبردش بس خايفه لو يموت أو يحصل له شي مش عارفه كيف تتصرف ولا ايش تأكله كل اللي قدرت عليه شربته ماء 🧋 ...

روزيل رجعت تلف وتلف حول الشجرة 🌲 وتتفرج كل غصن فيها دخلت ادت ماء وسقتها ذكرت نشروان لما كان يقلها انا اشتيش أنتي تشقيها .. وقفت بتكلمها ياشجره أنا كنت دائما أسقيش واهتم فيش ونشروان كان يحبش وصديقش ساعدينا نشروان لازم يرجع لمملكة عالم البحار 🌊 والا عيموت ساعدينا كيف اعبر للمملكه من خلالش

جلست منتظره منتظره ولا اي جديد ابسرت حجره تحتها من الضبح خفعتها وطارت من مكانها إستغربت كيف حجره طارت أول مره تحس ان الحجره خفيفه شافت تحت الحجره ممر نزلت راسها منه وشافته نفق طويل فرحت 😁 وحضنت الشجرة🌲 شكرا لش ساعدتيني ألقاه

حملت 🏃‍♀️ بسرعة لداخل البيت شلت معاها شنطه ظهر 🎒 حطت فيها قاروره ماء🍶 وعسل 🍯 واتريك ضوء 🔦 وشموع 🕯 وكبريت 🪔 وحبل وحطت ادوات اسعافات علشان نشروان وخنجر 🗡 ...

إستجمعت قواها وشلت نفس عميق .... ورفعت يدها للسماء 🤲 يارررب ساعدني وقويني أنقذ زوجي وأرجع بناتي ..

خرجت من البيت ولفت النسر 🦅 بالبطانيه وحضنته وابسرت عيونه 👁 أوثق فيني يانشروان شانقذك أنا داخله للمجهول بس مش ممكن أتخلى عنك يا نعيش سواء أو نموت سواء ...

نزلت للممر وشنطتها ع ظهرها 🎒 وحاضنه النسر الأحمر 🦅 وبدأت تدخل وتخطى والعرق 😥 مغطي وجهها من كثر خوفها لأنها داخله ع مجهول ولا هي داريه ماهو العالم هذا ولا أيش الخطر اللي ممكن تواجهه خاصه بعد ماشافت القطه السوداء 🐈‍⬛ اللي هجمت عليها بس تذكرت انها محميه طول ماهي لابسه الخاتم 💍 خف توترها شويه ...


🌹 meme_abdalgaleel

البـارت 7 •°

السـر المـدفون ❤️

بدأ الضوء 🌔🌓🌒 يختفي تدريجيا داخل الممر والظلام يزيد 🌑 لما فجأة الدنيا كلها ظلام بدأت تحس بالخوف من جديد حطت النسر الاحمر 🦅 في الأرض وخرجت الاتريك 🔦 من الشنطه تضوي بتحركه يمين وشمال تبسر الطريق فجأة لقيت قدامها حيه 🐍 كبيره براسين صااحت 😱😱 ورجعت لاوراء ...

الحيه 🐍 بتتفرجها وتخرج لسانها وتقرب منها ..

روزيل كانت تقرب الضوء 🔦 لعيون الحيه تشتت نظرها عنها وتبكي😭 وبدأت تحس برعشه في جسمها: يارررب ساعدني ...

الحيه🐍 شمت الدم 🩸وبدأت تقرب من النسر الأحمر 🦅 ..

روزيل افتجعت عليه لو تأذيه فتحت الشنطه 🎒 بسرعة وخرجت الخنجر 🗡 ومسكته بقووه في يد والضوء 🔦 في اليد الثانيه وقربت بهدوء من وراء الحيه 🐍 تشتي تطعنها ...

الحيه 🐍 حست بها وراها لفتت لعندها بسرعة وبتخرج لها لسانها وتشتي تهجم عليها ...

روزيل افتجعت منها 😨 ورجعت بسرعه للجدار وهي بتتفرجها بعيونها 👁 ورجعت غمضت عيونها خلاص حست انها نهايتها مراعيه أي حين الحيه عتقتلها ..

ياخوفي عليش ياروزيل اين سرتي وليش خاطرتي بنفسش في مكان مجهول ...
.
.

النسر الأحمر 🦅 كان يحاول يرفرف بأجنحته يشغل الحيه ويبعدها عن روزيل ..

الحيه 🐍 حست بصوت رفرفه جناح النسر لفت براسها لعند النسر وبدأت تتحرك تجاهه وتخرج لسانها ...

روزيل لاصقه في الجدار بتفتح عيونها شويه شويه 👁 خايفه واطرافها مثلجه ابسرت الحيه بعدت منها وبتزحف تجاه النسر 🦅 افتجعت عليه وبدون شعور هجمت ع الحيه بسرعه من وراها وطعنتها بالخنجر 🗡 وهربت لاوراء والخنجر في يدها وهي بتبكي 😭...

الحيه 🐍 كانت تلف حول نفسها من الطعنه والدم 🩸بينزف منها ...

روزيل إستغلت الفرصة وقربت بسرعة حضنت النسر 🦅 وكانت تحاول تهرب بسرعة 🏃‍♀️ قبل ماتلحقهم الحيه لقيت قدامها فتحه فيها ضوء فرحت وخرجت منها وقفت بتتلفت يمين شمال ..

الجو كله غيوووم ☁️☁️ وشاطى رماله بيضاء وبحر كبير أمواجه عالية 🌊🌊 ولونه أزرق غامق وقفت محتاره 🤔 معقوله هذا عالم البحار يعني وصلت أرض الجن 👿 بس كيف هذا فاضيه مابش أحد فيها إلا أنا كيف أسوي كيف اتصرف

حطت النسر 🦅 ع الأرض وفتحت شنطتها خرجت الماء بتشربه اكيد قدك عاطش ...

النسر الأحمر 🦅 بيشرب الماء ويتفرج بعيونه 👁 لروزيل ويحرك رآسه ...

روزيل: قلبي❤️ بيقلي إنك نشروان إحساسي الآن هو نفس إحساسي وأنت جنبي وانقاذك لي من الدمه السوداء 🐈‍⬛ وعيونك اللي بتأشر لي للشجره 🌲 مش معقوله هذا كله يكون تهيؤات أنا خاطرت ودخلت عالم الجن 👿 علشان أساعدك خليك قووي وأتحمل ....

....... ....... ......

في البحر 🌊...

٣ قوارب🚤🚤🚤 محطوطه جنب بعض وبتهتز مع الرياح ...

روزيل لمحت القوارب 🚤 حست انهن مخرجها الوحيد مافيش أي حل معاها غير إنها تدخل البحر لأنه مافيش قدامها أي طريق غيره حضنت النسر الأحمر 🦅 وخطيت لعند القوارب وقفت محتاره أي واحد منهن تطلع وكيف عتجدف لأول مره ....

فجأة سمعت صوت عجوز 👴من وراها ....

العجوز: مالش واقفه محتاره فين تشتي تروحي ...

روزيل حست بخوف 😨 ولفتت بسرعة: من أنت ...

العجوز بيتفرجها بحده 🤨 وضحك بسخريه: ههههه أنا صاحب هذه القوارب وأكيد تشتي تدخلي عالم البحار ...

روزيل حضنت النسر 🦅 بقوة ومسكت الخاتم 💍 ...

العجوز: اذا تشتي تدخلي عالم البحار 🌊 مافيش معش حل الا هذه القوارب بس لازم تدفعي مقابل مافي شي بلاش ....

روزيل بخوف 😧: بس مافيش معي شي أدفعه لك أنا جيت من العالم الآخر ...

العجوز بيتفرج الشنطه 🎒 طيب أيش معش في الشنطه هذه فيها رائحة حلوه ...

روزيل ذكرت🤔 أن فيها عسل 🍯 شلته علشان تأكل النسر منه... معي عسل بس تشتيه وخرجته من الشنطة..

العجوز مد يده سحبه 🍯: هاتيه بس عتآخذي قارب بقدر قيمته اطلعي هذا المركب وأشر لها ع القارب اللي في الوسط ...

روزيل طلعت القارب 🚤 حطت النسر 🦅 وغطته جلست ومسكت المجداف ولفتت للعجوز: في أي جهه أجدف ...

العجوز دهف القارب برجله وضحك 🤣: ههههه اذا أصلا قدرتي تجدفي لمسافه بعيده القارب فيه ثقب يعني الماء شويه ويدخل لش وفجأة رفع ثوبه وأرجله أرجل حمار وأختفى ...

روزيل بتتلفت يمين شمال وتبكي 😭 من الخوف: هذا شكله جني وضحك عليا ياررررب ساعدني دلني ع الطريق مسكت المجداف وبدأت تجدف بقووه تهرب منه وقبل مايمتلي القارب بالماء 🚤......

العجوز كان يسمى الشق فصيله من الجن 👹 نصفه إنسان ونصفه حيوان يتعرض للمسافر إذا كان وحده ....

مسكينة روزيل فين سارت وأيش اللي عتواجهه 🤔

🌹meme_abdalgaleel 🌹

البـارت 8 •°

السـر المـدفون ❤️

بعد نص ساعة...

في البحر 🌊

روزيل ماسكه المجداف شويه تجدف بقوة وشويه تحاول تخرج الماء لأن الماء بيتسرب للقارب 🚤

النسر الأحمر 🦅 محطوط في طرف القارب 🚤 بدأ الماء يلامس اطراف جناحه بيحركهن..

روزيل أنتبهت على النسر قامت بسرعه لعنده🏃‍♀️ تحضنه قبل مايتبلل جناحه ويزيد مرضه والمجداف فلت من يدها وإنسحب مع الأمواج 🌊 حضنت النسر 🦅 وجلست في طرف القارب 🚤 في اعلى مكان فيه تحمي نفسها وتحميه من الماء

لفتت للسماء وبتحاكي نفسها يارررب أنا ماسويت بنفسي أين جيت وأيش منتظر لي ومعقوله يكون هذا النسر زوجي والا لا بس إحساسي وهو في حضني والدفئ اللي بين احسه هو نفس إحساسي لما كنت أحط رآسي ع كتفه يارب إحميني وإحميه واجمعني ببناتي..

بدأ الماء يزيد في القارب🚤 والجو بدأ يظلم والضباب كثيف 🌫 وفجأة القارب بدأ يلف بسرعة ودخل في دوامه 🌪..

روزيل حضنت النسر الأحمر 🦅 بقوة وبتصيح: يارررب إحمينا وفجأة حست بضربه قويه تحت القارب قفزتها من مكانها لوسط القارب 🚤 والنسر نكع من يدها لقاعه القارب..

بتحاول تتحرك لعنده علشان تمسكه رجعت الضربه بقوة أكثر هذه المره لما طيرتها من وسط القارب لداخل البحر..

....... .......

روزيل غمضت عيونها 👁 خايفه تبسر نفسها وهي بتغرق وأيش المجهول اللي داخل البحر بتحس ببرودة الماء وأطرافها بدأت تتجمد وبتحس إنها نهايتها خلاص تذكرت زوجها اللي مرجوم وسط القارب وبناتها اللي مش عارفه عليهن شي بدأت تفتح عيونها 👁 ببطء وبتبسر قدامها حاجه غريبه وشكل مرعب بيتفرجها رجعت تغمض وركزت فتحت بسرعة وبتحاول ترفع يدها وتأخذ نفس وتسحب نفسها لفوق مافيش خوف أصعب من الموت غرق في البحر 🌊 ودموعها الدافئه ممزوجه ببروده الماء وتختلط ملوحة دموعها بملوحة البحر..

بدأت تطلع شويه شويه إلا وتحس ضربه في جسمها بقوه طيرتها لما خرجت من وسط الماء ورجعت ترتجم وسطه وبتحس حاجه بتسحب رجلها لوسط الماء وهي بتحرك رجلها بقوه وترفس تشتي تتخلص من الشي اللي بيسحبها

مسكت بيدها حافة القارب 🚤 وضربت برجلها بقوه الشي اللي ماسكها وطلعت بسرعه للقارب حضنت النسر من وسط الماء اللي وصل نص القارب وأخذت نفس بقوووه لما شافته بيتنفس وجسمه دافي..

خرج الوحش من وسط الماء وكان جن الدلهاب يعيش وسط البحار 👽 صورته صورة إنسان بدون ملامح وجه أخضر وعيون كبيره مخيفه وبدون انف ومعه أسنان بارزه مثل أسماك القرش بس بدون فم ويتعرض للقوارب ويقذف أصحابها للبحر..

روزيل حضنت النسر الأحمر بقوة 🦅 وحست خلاص إنها النهاية كيف عتهرب منه القارب 🚤 شويه ويغرق الماء وصل أكثر من نصه والدلهاب قدامها يعني لا مفر من الموت بتكلم نفسها بصوت عالي أنا أيش سويت بنفسي ويمكن إن هذا النسر مايطلعش زوجي الله يسامحك يانشروان أيش سويت فيني وفي بناتك ليش هنت عليك وتخليت عني هكذا وفلتني خلاص أنا رميت بنفسي في التهلكه بدخولي مملكه الجن 👹 نزلت دموعها من عيونها 👁️ ونزلت دمعه لفوق النسر..

النسر الأحمر 🦅 حس بحراره الدمعه💧 حرك راسه وبيهزه ويحاول يحرك أجنحته يشتي يتحرك يطير..

روزيل انتبهت ع حركته حضنته بقوه خافت عليه😰 لو يجرح نفسه أكثر وهو مجروح حست وقتها او بالأصح تأكدت إنه سمعها ويشتي يساعدها وإن احساسها ماعيطلعش غلط وانه نشروان.. مسكته بقوه ورجعت لنهايه القارب 🚤 تحاول تحمي نفسها وتحميه..

الدلهاب قفز للقارب وجلس قرفصاء وبيتفرجها👽..

روزيل أطراف أرجلها بدأت تثلج من برودة الماء اللي داخل القارب 🚤 وبتحس بتعب من وزن النسر الثقيل..

الدلهاب نزل بأرجله لوسط القارب وبدأ يقرب لعندها وهو مكشر ع أنيابه 👽 وهجم عليها ومسكها بيده ورفعها مسكها براسها وبدأ يغطسها وسط الماء اللي في القارب 🚤..

روزيل فلتت يدها ونكع النسر الأحمر 🦅 من يدها..

بدأت تحس بالضعف وبتختنق ورأسها وسط الماء في قعر القارب كانت تحاول تقاوم بس الماء والدلهاب أقوى منها..

الدلهاب 👽 حاول يلف رجوله الأربع حول جسمها علشان تغرق أسرع..

روزيل كانت ترفس بأرجلها بكل قوتها علشان تحاول تتخلص منه لكن للأسف كانت ترفس النسر الأحمر 🦅 وهي تحسب إنها بترفس الدلهاب..

النسر الأحمر 🦅 من كثر رفس روزيل إنفكت الخرقه اللي لفتها روزيل حول جرحه وبدأ الدم ينزل من جرحه 🩸..

روزيل بدأت خلاص تفقد السيطره ع أنفاسها وبدأ جسمها يضعف وحركتها تقل بتحاول تفتح عيونها بس خلاص الماء والدلهاب أقوى منها..

النسر الأحمر 🦅 بيحرك أجنحته بقوه وسط الماء ودمه بيسيل 🩸 لما بدأ يتغير لون الماء وسط القارب تدريجيا للون الأحمر..

الدلهاب بيضحك بصوت عالي 👽 ومستمتع بقتله لروزيل وهي بتلتقط أخر انفاسها وحركتها بدأت تخف وقلت مقاومتها..

أول ماتغير لون الماء للأحمر بالكامل بدم 🩸 النسر الاحمر 🦅 حصلت حاجه غريبة..

ياترى ايش الشي الغريب اللي حصل 🤔..

🌹meme_abdalgaleel 🌹

البـارت 9 •°

السـر المـدفون ❤️

فجأة الدلهاب👽 فلت رقبه روزيل وبيصيح بأعلى قووته وبدأت أطراف جسمه تذوب لما ذاب جسمه كله وبدأ يتبخر ورجع مثل الزبد فوق سطح الماء وبدأ الماء اللي في القارب 🚤 يقل بسرعة عجيبة...

روزيل خرجت راسها بسرعه من الماء 🌊 إتنفست بعمق بتحاول تستجمع قوتها ومسكت النسر الأحمر🦅 وبتبكي 😭 بقوة بتدور شنطتها 🎒 تخرج منه شاش وأدوات تربط جرحه..

....... ....... .......

بدأ الضباب 🌫 يتلاشى تدريجيا ويختفي وكأن الشمس 🌞 بدأت تظهر وتوقف القارب 🚤 ع الشاطئ ...

روزيل رفعت رآسها ويدها للسماء 🤲: الحمدلله يارب انقذتنا في الوقت المناسب شكلنا وصلنا

لبست الشنطه 🎒 ومسكت النسر الاحمر 🦅 ونزلت من فوق القارب بدأت تمشي🚶‍♀️بصعوبه من التعب اول ماحطت رجلها ع اليابسه وطت ع الأرض وسجدت لله شكرا ربي ..

بعدت الشنطة 🎒 وحطت النسر الأحمر 🦅 ع الأرض بتحاول تنشف ريشه من الماء بأشعه الشمس وتدفي جسمه بتتفرجه بكل حزن 😔 من انت قلي أنت دافعت عني من أول ماهاجمتني القطه 🐈‍⬛ وبتحاول تساعدني في كل لحظه وكنت عتموت علشان تنقذني أنا تعبت أكيد أنك نشروان صح والا ليش تحاول تموت نفسك علشاني بس اذا كنت نشروان ليش خبيت عليا هذا كله وليش عيشتيني هذه اللحظات ليش دخلت عالمي اذا كنت ناوي ترجع لعالمك في يوم من الأيام

بدأت تتذكر كيف كانت حياتهم سعيدة وبتقارنها بالرعب والخوف اللي هي فيه وبتتذكر بناتها وأيش مصيرهن وفين اختفين جلست تبكي بقهر وحرقه 😭 لما غلبها النوم ماعد حست بنفسها من كثر التعب .....
....... ....... .......

بعد ساعة...

فتحت عيونها من النوم 😴 قامت مفزوعه يارب يكون هذا كله حلم تلفتت حولها يمين شمال مافيش غير صحراء قاحله مش باين لها نهايه تأكدت وقتها إنها في حقيقه ومش حلم

وقفت اول شي سوته مسكت النسر الاحمر 🦅 تتطمن عليه وأنه عايش وبيتنفس لبست شنطتها 🎒 وحضنت النسر وبدأت تمشي وهي بتعرج ووجع في كتفها وصدرها وحاسه بعطش بس خلاص كانت تحاول تقنع نفسها بهذه الكلمه علشان تنسى تعبها وعطشها خلاص وصلنا أكيد شلقى أي أحد وأقله هذا نشروان وأسأله كيف نعالجه ويرجع لطبيعته ونروح انا وهو والبنات

أهم شي الآن فين أتوجه يمين والا شمال والا أمشي ع طول إبسرت لعند النسر الأحمر 🦅 بتحاكيه.. ساعدني لو سمحت دلني ع الطريق هذه بلادك أنت عارفها أشر لي بعيونك مثل ما أشرت ع الشجره حاول تدي لي أي أشارات وأنا شفهم ...

...... ....... ........

في هذه اللحظات كان الملك ضرغام 👹 جالس في قصره 🏰 ع عرشه مجتمع بالوزراء

دخلت عليه بنته صوهيماء وإبنه هجرس ...

صوهيماء.. بنت الملك ضرغام اللي كانت مخطوبه لنشروان هي اللي تشكلت بشكل القطه السوداء 🐈‍⬛ وهجمت ع روزيل ...

الملك ضرغام لفت لهم بنظره حاده 😠: أنا رسلتكم علشان تخطفوا روزيل الإنسيه وتدوها لها سجينه لأنه نقطه ضعف نشروان وكانت المهمه سهله عليكم لأنها بعدت الخاتم 💍 من يدها ...

صوهيماء ماسكه جرحها: أنا تضاربت معاها وكنت منتصره وشديها لك مربطه بسلاسل وانتقم منها ومنه بس نشروان تدخل في آخر لحظه وهجم عليا وجرحني بقوة🩸..

الملك ضرغام لفت بضبح وعصبيه لهجرس 😡: صوهيماء مجروحه وأنت ..

هجرس نزل راسه 😰؛ انا كنت واقف عند الشجره 🌳ماقدرتش اتحرك أكيد روزيل هذه ساحره ..

واحد من الوزراء: بس إسمها مش مسجل عندنا في قائمة السحرة ..

هجرس: بس اول ماشفت عيونها في شي غريب حصل لي قشعريره وضعفت قوتي وماعاد قدرت ع الحركة...

رئيس الوزراء كان من أذكى الجن ومعه شنب وحواجب كثيفه 👺 ضحك بقوه: هذا سحر العشق ..

الملك ضرغام لفت لعنده ورفع صوته بضبح: أيش تقصد 😤...

رئيس الوزراء: يعني إن إبنك عشق هذه الإنسيه ..

هجرس قاطعه: لالا هو بس عيونها 👁 فيها شي غريب يوقفك ع الحركه ويخليك تشتي تتفرجها وتضعف قدامها ...

رئيس الوزراء: هذا قدر لامحاله هذه سوء أعمالنا رجعت علينا ...

الملك ضرغام: أيش تقصد 🤔...

رئيس الوزراء: قبل سنين حصلت قصه في عالم الإنس لعيونها👁 او بالأصح القصه حصلت مع عيون أم روزيل لأنه جمال عيونها كان مختلف ومميز عن كل البنات اللي في منطقتها..

هجرس وصوهيماء فتحوا عيونهم بقوه 😳 يشتوا يفهموا ايش حصل وأيش السر والسحر اللي يقصده ...

الملك ضرغام عدل جلسته وحط يده ع وجهه بيسمع أيش القصة...



🌹meme_abdalgaleel 🌹