السلام عليكم

🚫 تنبيه 🚫
طبعا حبيت اوضح لكم ولكل القراء أن في شخص أسمه يوسف النونو بياخذ قصصي وينشرها ينسبها له ويقوم بحذف إسمي من كل بارت ويكتب مكانه إسمه وطبعا الي بيسويه حرررام أنا أكتب واتعب وهو يسجلهن بإسمه فطالبه منكم طلب أنه تنشروا هذا البوست وتوضحوا للكل أن هذه قصصي وطبعا القصص الي كتبتها هي :

1_حب تحت القصف
https://tttttt.me/qesasanani/2

2_عوده الماضي
https://tttttt.me/qesasanani/253

3_ضحايا القدر
https://tttttt.me/qesasanani/424

4_بيت جدي
https://tttttt.me/qesasanani/690

5_ وجع السنين
https://tttttt.me/qesasanani/1240

وكل من معه قروب قصص ياريت يرسل هذا البوست وهذه بعض الصور من قروبه واسمه ع قصه ضحايا القدر الي هي قصتي فالأصل ..

meme_abdalgaleel🌹

‏"لعله خير لك"
عبارة ابعدت الحَزن ، وأغلقت منافذ الالم ، اللهم اجعل كل ما اوجعنا خير لنا وكل ما احَزننا خيَر لنا وكل شيء منعته عنا خير لنا
✨جمعه مباركه✨🌹

كم عدد المشتاقين لقصة جديدة نشوف عدد اللايكات والمتفاعلين لو اقل من ١٠٠ عنأجلها 😜😜

#انـتـظــرونــا ومـع روايـتـنــا سأكتفي بك حلماً ابتداءً من يوم السبت

سأكتفي بك حلما💔
بارت ١

روايتنا هذه المره ستكون مختلفه عن سابقاتها فهي تحمل الكثير من الأحداث والتضحيه ...

نتعرف ع أبطال قصتنا :

*روان : بطله قصتنا .. خريجه طب عام 👩‍⚕ يعني بطله قصتنا دكتوره ... جميله ع قول كل من شاهدها عيونها 👁 واسعه ملونه بيضاء البشره شعرها بني قصير للكتف ملامحها مرسومه صاحبه إبتسامه جميله 😍..
علاقتها بوالدها قويه جدا بحكم قربها منه بعد توفي والدتها أثناء ولادتها .. دلوعه وناعمه تحب تساعد الكل وقلبها مايعرف القسوه ..

*العم عادل : أبو روان ... مهندس يملك شركه مقاولات .. بعد وفاه زوجته تفرغ لتربيه روان وعمله .. يحب روان وصديقها المقرب ويسمع لها دايما ....

*سمر : صديقه روان الصدوقه وبئر أسرارها متوسطه الجمال بيضاء البشره متزوجه من دكتور زميلهن معاها بنت عمرها سنه ...

....... ........ ......

*نادر : بطل قصتنا 😍 إبن عم روان طويل عيونه عسلي 👁 عريض المنكبين شعره أسود خريج صيدله بيشتغل مندوب مبيعات في شركه أدويه متزوج ومعه نور ويوسف أنسان مكافح متسامح خدوم وحبوب ..

شيماء :زوجه نادر ..جمالها عربي عيونها 👁 سوداء وشعرها أسود قمحيه البشره .. مجامله متقلبه المزاج عصبيه تكره عائله نادر تحب التملك والمشاكل ...

هذه ابرز شخصيات والشخصيات الباقيه عتتعرفوا عليها خلال القصه ...

🌹meme_abdalgaleel



@qesasanani

سأكتفي بك حلما 💔

بارت ٢

في بيت🏬 الجد قاسم :

النسوان : في المطبخ بيغرفين الغداء 🍱🍘🍚يقربين اليوم فاعلين عزومه بمناسبه رجعه نادر من السفر ..

الجد قاسم : كبير الأسره رجل ستيني 👨🏼‍🦳 محبوب من اولاده واحفاده ومقرب من روان وطباعه مرحه .. لفت لعند خديجه .. هيا مه عتغدينا عتبسري البنات ولا قدش عجوز أسير أدي مره وضحك 😁 هههه..

الجده خديجه : في يدها يوسف إبن نادر بتأكله 👶🏻 .. إبسرته بضبح 😤 والله ماعجوز الإ انت من عاد عترضى بك وبعدا لاقد روان ولانادر جو ..

هاشم : أبو نادر الإبن الكبير للجد قاسم رجل صارم نوعاً ما يحب التعامل بالنظام ومعه معايير عكس اخوه عادل ... ضحك هههه 😂 شيبتوا الاثنين وجالسين بتدحسوا ع الزواجه ...

عادل : في يده التلفون 📱بيحاكي روان .. مالش اتاخرتي اين قد أنتي ...

....... ...... ......

في الحوش :

روان : بتوقف السياره 🚗 هاه بابا آسفه قدنا فالحوش الان داخليه بس كان معي حاله قفلت تلفونها ونزلت بتقفل السياره ...

نادر : دخل بسيارته 🚙 من باب الحوش بيجنبها ..

روان : لفتت بتبسر وانه نادر حست دقات قلبها 💗 زادت وطت راسها للأرض كانها بتربط صندلها 👠 و اخذت نفس عميق اووووف علشان تحاول تمسك نفسها 😅 ...

نادر : نزل من سيارته وبيخطى لعندها 🚶🏻 إبتسم 🙂 هذه روان ومده يده يسلم عليها ..

روان : حست بإرتباك 😅 بس ماحاولت تبين له مدت يدها بكل ثبات 🤝🏻 أيووه روان كيف حالك . وحمدلله ع السلامه ..

نادر : بإبتسامه 🙂 الله يسلمش بس ع فكره ماتغيرتيش جالسه مثل انتي معنه قدلي منش سنين ..

روان : مش قادره تبسر في وجهه بتغالط .. حتى انت ماتغيرت وبعدت يدها بسرعه 🤝🏻 هيا ندخل تأخرنا عيصيحوا قدهم جاوعين واحنا اخرناهم ودخلوا ..

🌹meme_abdalgaleel


@qesasanani

سأكتفي بك حلمآ💔

بارت ٣

في المطبخ :

أزهار : بنت الجد قاسم مطلقه معها ولد واحد مزوج ساكنه عند أبوها هي وعلي ابنها ...في يدها المقلى 🥘 حق العصيد بتمكن آيه مره علي هاه بنتي دخليه قد سمعت صوت السياره وابسرت من الطاقه وان قد روان جت ونادر وادعي شيماء تجي تقرب معانا والبنات ..

آيه : مره علي متوسطه الطول شعرها اسود قصير وعيونها سود 👩🏻‍🦱 شلته من يدها 🥘 وخطيت وهي بتحطم داخلها بضبح 😤 ياهذه روان الي الكل بيحبها وماعينزل لهم الغداء الا لماتجي ..

سندس : اخت نادر طويله وبيضاء وشعرها طويل 👱🏻‍♀ جميله خريجه تجاره ..مسكت بيدها المقلي 🥘 يييه مالش انتبهي كنتي عتحرقيني أين أنتي مطننه ..

آيه : ابسرتها وقفت وشها طنشتها وخطيت 🚶🏾‍♀ ..

أزهار : إبتسمت ومسكت بيدها ع كتف سندس .. ابردي يابنتي إمسحيها في وجهي أنا قدش داريه بها ...

سندس : مسكت يد عمتها وحبتها 😘 ماعزكم وغلا ياعمتي اسهل قدنا متعوده عليها هي مجنونه وضحكت هههه ..

أزهار : مانقل قد كانت سابره كله من تحت راس شيماء مره اخوش الله يهديها سارت تقلها إن علي كان يشتي روان وبيحبها وانها كل ماتسمع ان روان هانا تقتلب طباعها.
سندس : الله يهديهن الثنتين ابردوا منهم .. هيا نقرب قبل ماجدو يصيحوا..
.... .... ....
في الديوان ..
روان:دخلت بتسلم عليهم بداءت بجدها قاسم سلمت عليه وحبته في راسه 😘 وخطيت تسلم ع جدتها .سامحوني تاخرت عليكم.
هاشم :ماكلفش الله يابنتي لهذا التعب ماتتزوجي لش وتهجعي من كثر العمل هذا ولاتجلسي فالبيت ساع بنات عمش ولاهذا التعب ..

عادل : إبسره😄 وابتسم.الله يهديك يا أخي دكتوره وتشتي تجلسها فالبيت وبعدا بنتي مفتهنه هكذا ماتشتيش تتزوج تشتي تجلس عند أبوها.
روان :قربت تحضن أبوها وباسته 😘 أيووه صح من عندي غير بابا حبيبي أوبه لهم.
حوريه:مره هاشم أم نادرحبوبه ودمها خفيف وطيبه قوي .. .كانت فالصاله بتتجابر مع نادر ع دخلته وبتصيح فوقه ليش اتاخر.
قربين الغداء 🥘🍚🍛الكل جالس بياكل ويتجابروا ومبسوطين الإ شيماء وآيه طول الوقت بيحشين سكته ع الكل.
روان :بالصدفه كان مكانها قدام نادر.كانت قدر الأمكان تحاول تخلى عيونها فالأكل علشان ماتبسره بس قلبها ❤ غصبا عنها بيخليها كل شويه تسرق نظرات وتبسره بس لما ركزت في ملامحه حسته كانه ملامحه تاعبه ومنهك.
نادر:أكل لقمتين وماعاد قدر قام ع طول للحمام يرجع الأكل .
حوريه : لفتت لشيماء 👀 عادش هانا قومي ابسري زوجش ماله.
شيماء : ولافيه شي هو هكذا من حين جت له الجرثومه حق المعده من وعادحنا مسافرين بس هو وصل وتهيور فوق الأكل قدهو فاقد لأكل صنعاء..
روان : شافتها لامباليه تبرقطت 😠 في نفسها عليه وبصوت واطي بتحاكى غاده أخت نادر ..نادر تاعب من ايحين .
غاده : اخت نادر بتدرس جامعه قمحيه البشره عيونها عسلي 👁علمي علمش سمعته مره بيقل لأمي فالتلفون أن معدته بتوجعه.
روان :ماعاد قدرت تاكل قلقه علي فعلت نفسها شبعت وقامت تتعذرتغسل يدهاعلشان تشوف لوافتهن اوجالس تاعب.

🌷meme_abdalgaleel


https://tttttt.me/qesasanani/3374

سأكتفي بك حلمآ💔

بارت ٤ ..

روان : واقفه فالصاله بتتفرج باب 🚪 الحمام من بعيد مراعيه له يخرج تتطمن عليه بس بدون ماتحسسه ..

شيماء : خرجت تبسره أبسرتها واقفه 👀 .. هيا مالش واقفه هنيه ..

روان : 😅 ارتبشت .. هاه وبتقلب ايديها مابلا قلت اغسل يدي ..

شيماء : عصرت عيونها .. للمه أو مابش حمام الإهذا مسنبه البيت ملان حمامات ..

روان : طنشت كلامها .. ورفعت راسها لعندها .. شيماء ماله نادر إيش بيوجعه سمعتش بتقلي ان عنده جرثومه فالمعده.

شيماء : واقفه وحطت يدها عرض الجدار.. يستاهل محد قله يخبص فالأكل هو داري ان معدته وجيعه ساع الناس كلهم بس هو ليش يتهيور وياكل خيرات ..

روان : بتتفرجها بإستغراب 😕 لأنها بتتكلم هكذا .. كيف يستاهل مالش هكذا. وبعدين نادر شكله مش تمام كأنه نحفان ووجهه شاحب كيف ساع الناس كلهم أيحين فحص أخر مره ...

شيماء : إبسرته خرج من الحمام خطيت لعنده 🚶🏾‍♀ دعممتها ...

روان : إبسرتهم واقفين مع بعض وشيماء بتصيح فوقه ليش أكل ..فلتت وخطيت🚶🏼‍♀ سارت تغسل يدها ...

كمل اليوم والكل كان مبسوط بجمعتهم وروان ماحاولت تبين قلقها ولا حتى تحسس أحد بالخوف الي في قلبها ❤ وبتتعامل معه ومع الكل طبيعي لحد يحس بشي ..

........ ........ .........

☀ ثاني يوم الصبح ..

في المستشفى 🏥...

سمر : دخلت للمكتب مبتسمه 😊 .. صباح الفل يافل حطت شنطتها وبتلبس البالطو الأبيض ..

روان : جالسه فوق المكتب مطننه 🤔 ماسمعتها ...

سمر : قربت لجنبها وخفعت المكتب بيدها 👏🏻 يييه من بينحاكي انا ...

روان : نكزت 😅 هاه .. مالش فجعتيني ..

سمر : ضحكت 😂 ههه فجعتش جبر المطننه هيا ماقد معانا قدلنا خيرات من هذه الطنانه ...

روان : حطت راسها ع الكرسي وارتزحت وبتنهيده 😔 امس إبسرت نادر بعد كل هذه السنين ..

سمر : فتحت عيونها 😳 قصدش نادر نادر ...

روان : بإبتسامه حزينه 😞 أيوه نادر نادر بس لوتبسري ياسمر كيف قدهو شكله تاعب مشهو نادر الي تعرفي حتى الأكل ماقدر ياكل ولما سالت مرته قالت معدته ..

سمر : سحبت الكرسي جلست جنبها ولفتت لها 👀... أيوه وإحنا ماعلينا مش قد قفلنا هذا الباب مازد فتحه ..

روان : مابش شي فتحه إطمني أنا قد قفلته من يوم ماتزوج واختار حياته وربي وحده العالم كم بيندعيله وأتمني ربي يسعده مع مرته خاصه لما ادرى ان بينهم مشاكل بس زعلت لما حسيت انه مريض شكله مش عاجب لي 😔 ..

سمر : ببهرره 😠 مش لازم يعجبش وبعدا الشعب كله فيه المعده ماعلى هذا عتبكي ع الشعب كله وبدل ماتجلسي تبكي ع الأطلال قومي إبسري حقش المرضي الي يشتوا علاج بدل الطنان ولا ارحمي قلوب الي قد موتيهم قهر من كثر مابتقلي لهم مع وتكسري قلوبهم 💔 علشان الحج نادر الي عايش حياته ..

روان : إبتسمت 😊 حاضر يادكتوره شاقوم ابسر المرضي وأعالجهم وقامت تلبس البالطو الأبيض تنزل تتفقد المرضى هي وسمر ...

🌹meme_abdalgaleel



@qesasanani

سأكتفي بك حلمآ💔
بارت ٥ ..
بعدها بإسبوع ..
في بيت العم هاشم 🏚..
نادر : بيغلق باب الغرفه 🚪 لايسمعوش أهله ... أنتي مجنونه صح طبعا لا..
شيماء : واقفه ومربعه يدها بتتحاكي بضبح 😤 وليش بتقفل الباب مافيها لوسمعوا أنا مابينقلش شي غلط أنا أشتي تخرجني بيت وحدي أنا مش مرتاحه مع أهلك ولا بيعجبني خواتك ..
نادر : بإستغراب 😳 ليش مالهن خواتي وليش مش مرتاحه مع أهلي ماقد فعلوا بش ماقدلش عندهم الإ أسبوع وشايلين لش من ع الأرض شيل دلع ومنتبهين لعيالش ...
شيماء : نفخت اوووووف 😤 هكذا أنا حررره مشتيش وبس عتخرجني ولا لا ..
نادر : بعد يده من راسه ... استغفر الله العظيم اليوم شكله دبور من الصبح عادحنا بنعتجن في الوظيفه هذه ماقد استقريتش عادنا مضيع بعد السفر وأنتي بدل ماتهدأي عاد أمورنا ملخبطه بتدوري لش بعسسه .. وفتح الدولاب يخرج له ملابس ...
شيماء : وقفت قدامه و مسكت باب 🚪 الدولاب بيدها .. وبعصبيه 😡 ما قصدددك ..
تشتي تقل اننا دبور صح يله قلها قلها لاعاد تتعذرش أنت أصلا هكذا انسان مايقدرش يقدر النعمه الي معه قد حفيوا بعدي نص شباب صنعاء علشان أوافق عليهم وأنا الخبلاء الي جيت اوافق عليك علشان تقل أننا دبور ...

نادر : حس بدوخه مسك راسه .. فلتها وبيخطى🚶🏻 جهه الباب يفتحه يخرج ..
شيماء : مسكته من وراه 😡 بطل دعممه جاووب .. من الدبور والله محد مدبر الإ أنا ..
نادر : بعد يدها ... وصاح 😠أنا الدبووور أنا افتهنتي خرج من باب الغرفه وصرعه وخرج من البيت ...
..... ..... .....
في بيت الجد قاسم🏬 ..
أزهار : أمانه لوما جلست ياعادل قد الغداء جاهز بدل ماعاد تروح البيت وتتغداء انت وروان وحدكم ..
عادل : إسلمي يا أختي الله يحفظش قدش تعرفي بنت اخوش عتروح تاعبه تشتي ترتجم من تعب المستشفى🏥 ماعترضاش تجي قدنا ششتري اكل ع رواحتي ..
الجد قاسم : لفت له 👀 أجلس بس ماعليك وروان شاسد أنا وياها ماصداها تقل لجدها ماشي شتصل لها ..
عادل : إبتسم 🙂 كان ماعليا سدوا أنتوا وبنتكم وهذه جلسه ..
الجد قاسم : خرج تلفونه 📱 وبيتصلها .
أزهار : قامت للمطبخ تكمل تجهز ..
آيه : لحقت بعدها بضبح 😤 وبصوت عالي ليش ماتخلوهم يروحوا .. سعم انحنا مخاطبين بروان هانم تسير تشتغل وتجي للغداء جاهز ..
علي : ع وصلته سمع كلامها 👂. وقف باب المطبخ وحط يده لعرضه ... وببهراره 😳 ماقد بتصرفيش عليها من جيبش عادهو بيت جدها وابوها لو انتي بيت جد زوجش واخر مره ازيد اسمع لش كلمه ع روان ويله الان كملي عملش والحقي بعدي اديلي لده ..وفلتها وخطي🚶
آيه : سكتت وبتحطم في نفسها .. أيوووه بيصيح ماعنده حجه حبيبه القلب ❤ القديمه لكن إذا ماخليتها تبطل جيه هذا البيت ما أنا آيه.
.... ..... ......
في الطريق .
نادر : بيسوق سيارته 🚙 ضابح 😤 كل شي ملخبط من رجعته من السفر ماقد حس انه أستقر وعمله الجديد وشيماء زد وفتها تشتي تخرج بيت وحدها
صاحب المتر : خطي من قباله 🏍 وبيصيح يييه كن سوق سوى جاء يتعلم هاناسيرالسبعين مش عندي كنت عتصدمني.

🌹meme_abdalgaleel



@qesasanani

سأكتفي بك حلمآ💔


بارت ٦..

نادر : خرج راسه من الطاقه .. العفو منك يا أخي وجلس يلوي بالسياره وفكر يسير بيت جده 🏬 قدهو يبسرهم ويتجابر مع جده لأنه مخنوق .
روان : بتحاكي جدها فالتلفون 📱 طيب حاضر ياروح روان كم جدو عندي انا الآن فوق السياره 🚗 خلاص شادور واجي عندكم ماسخاني اقلكم لا.
... ... ...
في بيت العم هاشم🏡 ..
في المطبخ ..

غاده : دخلت عادها روحت من الجامعه ...بتفتح الأكل أممم مابه معانا من غداء قدنا جاوعه وبتلقط لها وتاكل ..
حوريه : بتصيح فوقها 😠 جالسه أنتي وهذه الطبيعه واللقاط بكره وقدش في بيت اهل زوجش بدل ماتوصلي تقربي تعاوني أختش من الصبح فالمطبخ قدها تاعبه ..
غاده : مرتزحه عرض الجدار وفي يدها جزر🥕 ليش وشيماء فينهي ليش ماتساعدها.
حوريه : تنهدت 😔 بس حاولت ماتبين إسهل يابنتي عادهم جو من السفر تفتهن وبعدا بدل المجابره إطلعي إدعي أخوش ومرته غداء وهيا جي قربي مع أختش..
غاده : مابحدهو أخي إبسرته ع رواحتي فالشارع وهو خارجي من البيت وشكله ضابح قوي لاهم قد تقالعوا ..
حوريه : فلتتها وخرجت من المطبخ بتداعي ياسندس يييه اسكه جي اتصلي لي لأخوش أبسر أينهو.
... ..... ......

في بيت الجد قاسم 🏬..
الجد قاسم : جالس فالديوان هو وعادل وحدهم لفت لعنده أنت داري من جاء أمس الليل لاعندي ومايشتي .
عادل : بإستغراب 😳 خير من مابه ..
الجدقاسم : أحمد إبن عبدالمحسن يشتي روان لإبنه قال إن كان معاهم مرض فالمستشفى وإبنه أبسر روان وإعجبته ويشتوا يتقدموا .
عادل : طنن شويه 🤔 والله ما أقلكم الإ خير قد أنتوا داريين وتعرفوا بنتكم لو أفتح معها هذا الموضوع مابلا عتحنق مني وتزعل وأنا الصدق مشتيش أغصبها ع شي.
الجد قاسم : وأنا إشتي أفرح ببنتي وأزوجها وأبسر عيالها وعادنا بخير قبل ماأموت ..
عادل : البنت عندكم سدوا أنتوا وياها..
باب البيت بيجرس 🚪..
أزهار : فتحت إبتسمت 😀 حيا حيا جيت في وقتك ماقد تغديناش وينهي مرتك جت معك ..
نادر : شكله ضابح 😤 جيت وحدي أفتهن لي ضابح ضيق قلت مامعي الإ هنيه أجي أفتهن ..
أزهار : مسكته بيده 👫 أدخل أدخل جعله الضيق من بيضيق عليك أوذك جدك وعمك عادل داخل فالديوان .
نادر :رن تلفونه 📱بيجاوب سندس وخطي لعندهم .
بعدها بعشر دقايق .
روان : وصلت،دخلت وفي يدها البالطو الأبيض 🥼معلق في يدها بتصيح من الباب الله محلى شم طبخ عمتي أسلم ع جدو بسرعه واجي ياعمتو أقرب ودخلت للديوان وهي بتداعي مبسوطه😀 ياحج قاسم ياشيبه ...
الجد قاسم :سمع صوتها وإبتسم😁 لفت لعند نادر هذه البنت حياه أمانه إن مشاغبتها بتنسيني المرض.
نادر : إبتسم 😀 الله يحفظها حلو لما واحد يكون طبعه حالي.
روان :دخلت من باب الديوان مبتسمه 😊 يووه ع مززه لقيت لكم اليوم ياجدو فالمستشفى بس لايسمعوني جده وبتضحك ههه. إبسرت نادر قدامها سكتت وتسمرت بقعتها 😲
نادر :ضحك 😂😂 وتزوجي جدش تسخي ع جدتش.
الجد قاسم :لفت له شكلي شتزوج أنا وياها وضحك 😂ههه قد جالها زوج لاعندي أمس وبيأشر لها جي نتجابر.


🌹meme_abdalgaleel


https://tttttt.me/qesasanani/3374


@qesasanani

ساكتفي بك حلمآ💔


بارت ٧

روان :ماعادهاش مركزه معاهم بتحس نفسها ضايعه نادر قدامها وزد موضوع عريس رجمت شنطتها 👜 والبالطو حقها لافوق الفرش أسير أساعد عمتي فلتت وخرجت.
عادل :لفت لأبوه إبسرتوا قد بينقلكم أن الموضوع هذا عيضبح بها 😞
الجد قاسم : ماعليك أنت هذه المره أخرج منها وبس.

في غرفه علي ..
علي : قدام التسريحه بيمشط شعره ويتعطر .
آيه : بتتفرجه بضبح 😤 سبحان الله يوميه بتقرب فوق الغداء بلداتك الي بتروح بهن واليوم بدال وتعطار ..
علي : إبسرها 😠 بضبح إستغفرك ياربي وأتوب إليك أخطى قربي عاوني أمي وفلتها ونزل.
.... ..... ....

في المطبخ ....

أزهار : بتتحانب مع روان ..ماشي والله ماتفعلي شي قدش تاعبه من المستشفى 🏥 أدخلي بس عندهم ولا سيري قيمي في غرفتهم دخلوا يمتدوا شويه ..
روان : باين عليها الزعل 😔 مع خلوني هانا مشتيش أدخل جدو شكل معاهم عريس وقد بينهم ماعنفعل أنا وياهم ..
أزهار : مسكتها من كتفها .. مالش يابنتي إسكه قليلي ليش بترفضي مالش ماتشتيش تتزوجي ماهو السبب جابريني أنا عمتش ولاتتعذري لي وتقلي ما أشتيش أفلت أبي وحده قد قلش أبوش تجلسي عنده أنتي وزوجش.
آيه:واقفه باب المطبخ 🚪 سمعت كلامهن .. ردت ع طول وهي بتتفرج روان بربع عين😏ياسعم مش أنتوا داريين ليش ماتشتيش تتزوج باينه ساع عين الشمس عاجب لها الدلع والشخاطه الي بتدلعوها وجنان خلق الله عليها حتى وقدهم مزوجين يعجبها تتفرج بيوت خلق الله وهي بتتخرب بسببها لكن الله يزوجهاونفتهن منها ...
روان :زعلت من كلامها💔فلتت وخرجت سكته.
أزهار:بهررت فوق آيه😡وبتصيح فوقها
آيه :فارحه😀حست انها قهرتها ومطنشه لكلام عمتها
... ... ...
في بيت العم هاشم 🏡
فوق الغداء ..
هاشم :في حضنه يوسف إبن نادر بيأكله معه.
شيماء :لوسمحتوا لاتعودوه هكذا بعدايزيد الدلع وماعاد شاقدر عليه.
سندس:بأبتسامه😊اوذحنا معش عنكون نساعدش .
شيماء:لفتت لها بنخيط😏ليش من قلش انش عتجلسين معي أناقد قلت لنادريبسر لنابيت عنخرج وحدنا.
حوريه :يوووه😱بيت وحدكم ليش يابنتي أحدقدغثاش مننابشي وبعداإبسري سعمن البيت كبيرليش تخرجوا.
شيماء:بتعصر عيونها😏مابش أحلى من حياه الإستقلال وأنا أشتي أستقل أنا وزوجي وأعتقد هذا من حقي .
هاشم :بيتفرجها سكته😐لما كملت كلامها لفت لها😠واحنا مشحنا فارحين فيش كودش توكفي شنطش أمد مايلقى زوجش بيت لا تخايلش أنناشاخرجكم في بيت من حقي وفلت الغداء وقام.


@qesasanani

سأكتفي بك حلمآ💔


بارت ٨

في بيت الجد قاسم 🏬..

فوق الغداء 🥘🍲🍜..

كلهم جالسين بياكلوا الإ روان زاعله جالسه تلعب بالملعقه 🥄..

علي : لاحظ عليها الزعل لفت لعندها 👀 روان مالش مابتاكليش ..

آيه : دكمته بيدها وبهررت فوقه 😠..

روان : ابسرتها 😔 زاد زعلها بس حاولت ماتبين .. هاه تسلم شابعه وحطت الملعقه من يدها عتقوم ..

أزهار : مسكتها من يدها 🤝🏻 كيف شابعه وعادش وصلتي بتصيحي جاوعه مابش قومه ..

روان : مسكت يد عمتها وباستها 😘 تسلموا ياعمه بس شابعه وخرجت من عندهم..

عادل : لفت لأبوه 👀 هيا إبسرتوا أنا داري ببنتي قد بينقلكم لاتحاكوها من العريس ..

الجد قاسم : بهنجمه 😠 بس ماعدهوش قولها عنجلس نمكنها دلع إشتي أفرح بها وأبسر عيالها ..

نادر : وصلته رساله 📲 فتحها وانها من مرته (أبوك طردني من البيت عتجي تخرجني بيت وحدي ولا أسير بيت أهلي ).. قام ع طول من فوق الغداء وخرج للحوش يتصلها ..

شيماء : 📱ردت وهي بتبكي 😭 أنا بينقلك تخرجني من عندهم أنا مشتيش أجلس معاهم قلت أنا دبور هيا طابت نفسك طردونا وبتصيح ..

نادر : منفعل وضابح 😤 مااهو مابه ماقد فعلتي وكيف لوما ابي عيطردوش وانتي مشعبه اليوم من الصبح تشتي تخرجي وحدش ماقد فعلتي من فيلم هندي ..

شيماء : بتصيح 😡 آااااااها عادهو فيلم هندي تمام أنا شاسير بيت أهلي وكما قد معي بيت وحدي جيت لي أنا وعيالك وقفلت في وجهه..

نادر : نفخ اوووف 😤 حسبي الله ونعم الوكيل أنا والجنان هذا كله أيحين شرتاح ..

روان : كانت بالصدفه جالسه عند الشجره 🌳بتقطع اوراقها بعد ماخرجت من عندهم سمعته ..

نادر : إبسرها خطي لعندها 🚶🏻إبسرتي الجنان الي أنا فيه ..

روان : بتحاول تكابر وتخفي زعلها 😔 الله يعينك كل شي عيسبر إن شاء الله ويوفقك ..

نادر : ع الله .. وبعدا فلتي الغداء ليش.. زاعله لأن جدي يشتوا يزوجوش ..ليش بترفضي ياروان ولا قد مشاكل المزوجين عقدتش ..

روان : بتقطع ورق الشجر توترت أكثر ..و في داخل نفسها ردت ..لأني أحبك ❤ ومش قادره أحب غيرك ..

نادر : إبسرها ساكته ..عفوا شكلي ضايقتش بسؤال عفوا ..

روان : هزرت غصن الشجره🌿 كله لايدها ... لالا عادي مابش شي بس هو النصيب وبعدين لحضه إشتي أسالك أنت ليش مش مهتم بصحتك مالك قدك هكذا ابسر كيف وجهك شاحب وملامحك باهته وهذك اليوم لما أكلت رجعت ع طول هيا مه يادكتور هذا وانت صيدلاني ...

نادر : ضحك 😃 هههه قدوذا سمعتي بإذنش مالي معي مرض وسط البيت ..

روان : حست قلبها بيدق بسرعه ❤ لما سمعت ضحكته ونسيت زعلها .. حاولت تمسك نفسها وإبتسمت 😊 لاتتعذرش أصلا شكلك تاعب بس بتكابر مارائيك تمر للمستشفى عندي نفعل فحوصات نتطمن عليك ..

نادر : حرك يده 👋🏻 هيا ناهي لش يافحوصات عتزنط علينا الدكتوره هي شكلها المعده قد بينشرب علاج وافتهن ..

روان : جلست تصر عليه وتلح لما أخيرا إقتنع وإتفقوا إنه يمر لها للمستشفى 🏥..

......... ......... ........
العشي 🌚..

في بيت هاشم 🏡..

حوريه : يا ابني قوى اذكر الله وسير رجع مرتك إبسر كيف البيت ظلمي بغير عيالك ..

نادر : بضبح 😤 قوى خلوني في حالي هي سارت لوحدها ترجع لوحدها وخرجه من عندكم ماناش خارج وهي حره برضاها تفعل ماتشتي ...

هاشم : ابتسم 😁 رجع روحه ... أيووه هكذا أنا فداء ابني العاقل ساع أبوه ..

حوريه : عصبت 😠 عاقل مع بدل ماتعقل ابنك تزيد تشبجه ..

وبدأ النقاش والمراشاه بين مؤيد لرجعتها ومعارض ...

🌹meme_abdalgaleel



@qesasanani

سأكتفي بك حلمآ 💔

بارت ٩

بعد يومين ...

في بيت عادل 🏡.

عادل : خرج من غرفته عادهو قام من النوم 😴 بيتمطط بيشم ريحه حلوه جايه من المطبخ خطي لاهاناك ..

روان : رابطه شعرها ببندانه ومحمشه الأكمام وفي يدها ملعقه كبيره 🥄 مقفيه بتحرك الأكل ..

عادل : وقف عند الباب إبسرها وإبتسم 🙂 الله الله ع بنتي الحميش نفس وقفت أمش الله يرحمها وريحه أكلها ...

روان : لفت لعنده 😅😅 يووه يابابا فجعتوني مالكم الناس يتنحنحوا يقلوا صباح الخير ...

عادل : ضحك ههههه😂 حتى لقانه أمش أمانه الله يرحمها وبعدا مامعش فالمطبخ ومعش عمل ودوام ..

روان : الله يرحمهم ... اليوم اتصلت شليت إجازه قلت قد إسمكم عتجلسوا فالبيت اليوم أجلس أطبخ لكم وادلعكم قد أحنا كل يوم أكل مطاعم ولا طبخ الشغاله ، وأفتهن من دوشه المستشفى شويه ...

عادل : قرب لعندها يتفرج ماطبخت بيفتح الأكل 🥘🍛 .. أمممم شكله لذيذ هيا مارائيش لو نتصل لجدش وجدتش يجوا يتغدوا معانا ..

روان : ذكرت موضوع العريس 😅 هاااه مع خلوني أنا وأنتوا بس إشتي أشبع منكم ..

عادل : روان .. ممكن تقنعيني بس وتقليلي ليش رافضه تتزوجي أنا داري عتقلي لي مشتيش أفلتكم وحدكم بس هذا مش مبرر قلتلش عيكون شرطي تعيشي معي .. ليش ماتفكري فالعريس الي تقدم لش نفسي أفرح فيش وابسر عيالش قبل ما اموت أشتي أطمن عليش ...

روان : وطت راسها بزعل 😞 بعد الشر عليكم لاتقلوش هكذا الله لايحرمني منكم بس هو نصيب يابابا وقت ماربي يكتب نصيبي عتتسهل ..

عادل : حضنها وباسها في راسها 😘 الله يسهلش الخير كله ياروحي ...

روان : تشارغت عيونها بالدموع 🥺 وبعدت من حضنه .. وحاولت تغالط مابتدوروا أنا داريه تشتوا يحرق الأكل وتقلوا مشنا حميش يله سيروا تحمموا وتجهزوا وأنا أكمل أجهزه وأقرب نتغداء وبعدا أعزمكم ع محل بيبع حلويات ضخمه ونخرج نتمشى ...

....... ........ .........

في بيت هاشم 🏡...

سندس : بتتراشا أمها قوى حاكوه يسير يروح مرته علشان العيال قدنا فاقده لهم وزد هذه اليومين كل شويه بينسمع نادر فالحمام بيرجع شكله تاعب ولما أساله مالك يقلي ولاشي معدته شكله متبرقط قوي ومقهور من الي حصل ..

حوريه : تنهدت 😔 اااااح بس يابنتي مفعل أخوش عديم ولارضي يسمع قال قدهو تاعب مشاكل وأبوش الله يهديه بيزيد يشجعه مثل ماخرجت وحدها ترجع وحدها ..

غاده : أيوووه صح كلامهم صح وبعدا خلوها تجلس بس في بيتهم تتأدب شويه ونفتهن من حين جت وإحنا كل يوم مشاكل ...

سندس : هزت راسها ..سكته أنتي يافضوليه 🤥 مالو عليش لايطلقها سيري تراشيه قليله فاقده للعيال افعلي معروف في حياتش بدل الحطيم ...

🌹meme_abdalgaleel



https://tttttt.me/qesasanani/3374

@qesasanani

سأكتفي بك حلمآ💔

بارت ١٠

بعد العصر ...

في بيت الجد قاسم 🏬..

علي : جالس رافع رجل و مربع الثانيه ومدكي مخزن بيضحك هههه 😄 والله إنها رآس محد قدر يغصبها ع شي ..

الجد قاسم : بهرر 😠 عادك بتضحك وفارح أووومه بدل ماتقل ماعنقل للناس كودحنا بنردهم بسبب هذه العنيده ..

أزهار : لفتت لعند أبوها 👀 المفروض قد انتوا داريين بها ماعاد تكوني تفتحوا هذا الموضوع مع احد ومن حاكاكم تعتذروا منه ..

الجد قاسم : تنهد بزعل 😔 الله يسامحش ياروان نفسي أفرح بها قبل ما أموت لكن عنادها ورفضها هذا بيقهرني ..

الجده خديجه : في يدها القهوه ☕ بتشربها حطتها من يدها ... ولا تقتهر ولا كما جاء نصيبها عتخطى وبعدا هي مشي ساخيه في أبوها تفلته وحده ..

علي : توضع بالجلسه .. وإبتسم أديلكم حل تشتوا تزوجوا روان زوجوا خالي عادل وهي تركن إن قد معه مره وعتوافق بس لاقد عتزوجوها زوجوني أنا بها ..😅😅..

الجد قاسم : بهرر😠 و خفعه بعودي القات 🌿 قسما بالله لو ماتعقل وتغلق هذا الموضوع خلاص قد انهيناه وقدك مزوج ماعاد معك لذكره ...

علي : تنهد 😔 والله ماقدرت انسى هذا الموضوع لكن مانفعل خيره الله قلك أننا أخوها مشنا أخوها ...

أزهار : خفعته بقاروره الماء 🍾 قسما بالله لو ماتهجع وتسكت وتنسى عيب عليك قد معك مره لو تسمعك ماعتقل ..

علي : أشر بيده لامبالاه 👋🏻 أمانه أنه اخرج خلوها غر تسمع تدكم راسها وتدرى إننا متحمل لها بطباعها الزفت لاهي عتتسبر ...

الجده خديجه : الله يهديك ياولدي ويهدي بنت خالك ..

......... .......... .........

في المول 🏢...

روان : ماسكه يد أبوها 👫 بيخطوا ..بتأشر له هيا هو هذا المحل الي قلت لكم ..

عادل : إبتسم 😊 شكله حالي اليوم دلع الدلع أوله غداء ضخم من يد بنتي وذلحين تدلعني بعزومه أحلي ..

روان : بدلع ☺ ... طبعا من عندي غير بابا حبيبي أدلعه ..

دخلوا المحل وجلسوا يأكلوا وهم بيتجابروا ويضحكوا وكمل يومهم تمشيه ووناسه ...

🌹meme_abdalgaleel



@qesasanani

سأكتفي بك حلمآ 💔.

بارت ١١

ثاني يوم في المستشفى 🏥..

سمر : جالسه ع المكتب بتقرى كتاب 📖..

روان :دخلت 🚶🏼‍♀ والشنطه معلقها في يدها صباح الخير ...

سمر : غلقت الكتاب 📓 وبتهنجم 🤨 صباح دكتورتنا الغايبه الان بسرعه تعترفي مامعش أمس غايبه ...

روان : ضحكت 😄 وسحبت الكرسي وجلست جنبها معي يووم حالي بابا جلسوا فالبيت وأنا قلت ادلعهم وبداءت تحكي لها كيف كان يومها قاطعهم صوت تلفونها بيرن 📱 فتحت شنطتها تبسر من بيتصل بتتفرج التلفون وساكته ..

سمر : بتأشر لها بيدها 🖐🏻 بتحركها قدام وجهها يييه مطننه حجه مالش جاوبي ...

روان : هااه 😅 الرقم مشو مسيف عندي بس البرنامج بيطلع لي إسم نادر هاشم ..

سمر : فتحت عيونها 😳 قصدش نادر نادر وهزرت التلفون من يدها وفتحت تجاوب بهنجمه ألووووه ..

نادر : صباح الخير .

سمر :مستمره فالهنجمه😠 من معي من انت ..

نادر : ضحك هههه 😂 طلعت زريه يابنت عمي أنا نادر وبعدا ماله صوتش فالتلفون شوعه مع إنه فالواقع أحلي ..

سمر : خزيت من صوتها 😅 أنا زميلتها دكتوره روان مشغوله إيش تشتي أبلغها ..

روان : بتأشر لها تمكنها التلفون تجاوبه وبيتهزورين وسمر تسحبه ..

نادر : طيب العفو منش لو سمحتي اول ماتفضى قلي لها نادر إبن عمش مراعي نازل فالمستشفى جاء ع ما اتفقتوا تفعلي الفحوصات ..

سمر : هااه 😁.. فحوصات طيب أنا شاسير ادعيها باي وغلقت ..

روان : بتخفعها 👊🏻 لييش ماتخليني ارد يمكن مريض مالش ..

سمر : بتتليقن وتحرك رآسها 😛 يووه فديت الي بتقلق عليه قلنا انسيه وبعدا حبيب القلب اوذك نازل قال هو مراعي لش علشان تفعلي له الفحوصات الي اتفقتوا وبتبهرر 🤨 ماقد سديتوا من ورايا..

روان : هزرت التلفون من يدها 📱 وبتخطي وهي بتتصله .. هاه نادر عفوا كان تلفوني عند صاحبتي وين انت ..

نادر : ضحك هههه😂 ايووه ذلحين صووت حالي صووت رواني بنت عمي مش صوت الشاقي صاحبتش وبيضحك ..

روان : حست كلمه رواني كأنها سهم وصاب قلبها ❤ كان يدق بسرعه .. سكتت شويه بس حاولت تمسك نفسها ... اين أنت بالظبط انا عند الدرج ..

نادر : خلاص خليش مكانش انا شاجي لعندش ..

....... ........ ........

في الجامعه 🏫...

غاده : واقفه وفي يدها الملازم بتتجابر هي وصاحبتها 👭🏼 ..والله ان البيت من غيرها يجنن بس الصدق فقدت للعيال..

صاحبتها : تشتي الصدق الغلط من عند اخوش المفروض يخلي له كلمه قويه ...

وهن جالسات يتجابرين خطيوا ٢ عيال ..

وائل : ابسرهن اوووف ع بنت محلاها 😅 ..

صاحبه : ضحك هههه 😄 هيا اخطى ونزل عيونك هذه غاده هاشم ال... المهنجمه حق الدفعه ماصدا أحد يقرب يحاكيها نصها مقارحه ..

وائل : الإسم طن في راسه .. قصدك بنت هاشم ال....

صاحبه : أيووه ليش اوتعرفهم ..

وائل : بنت خالتي مزوجه بأبنه نادر ..

صاحبه : هاه يعني عتطلع أخت زوج بنت خالتك طلعتوا أنساب ..

وائل : فلته وخطي لعندها 🚶🏻‍♂.. صباح الخير ..عفوا ع الفضول بس ممكن سؤال ..

غاده : ابسرت صاحبتها 👀 يا الله خارجنا من الصبح ..

وائل : أنت أخوش نادر هاشم ال...

غاده : إستغربت منين يعرف أخوها 🤔 أيووه أخي ليش منين تعرفه ماتشتي ..

وائل : اشتي سلامتش بس انا ابن خاله شيماء وقلت أقلش لو تحتاجي شي هانا فالجامعه تحاكيني قدحنا أهل ..

غاده : بضبح 😤 ابن خالتها يعني نفس اللغاجه والطباع الله يعيننا بس اسلم مااشتي شي وسحبت صاحبتها وخطين ..


صاحبه : بيضحك عليه 🤣 قلتلك هذه عسكري مشي بنت ..

وائل : ضحك هههه 🤣 بس مزه وعجبتني وخطي هو وصاحبه بيتجابروا ..

🌹meme_abdalgaleel



@qesasanani

سأكتفي بك حلمآ 💔.

بارت ١٢

في بيت أهل شيماء 🏡..

مره أخو شيماء : بتقيمها من النوم 😴 هيا قمر عتقومي ولا عتمكنيها رقده وفهنه .

شيماء : فتحت عيونها بتتقعم 🥱 مالش ماتشتي ليش تقيميني ..

مره أخو شيماء : إبسرتها بسخريه 😏 ما إشتي ... أشتي تقومي تشتحطي وتعاونيني ولا قالوا لش إننا الشغاله حقش وحق عيالش من يوم ماحنقتي وأنا كله فوقي ع الأقل خلي عندش شويه دم وساعديني ولا قومي اتصلي لزوجش وروحي لش غر بيتش والله ما أحلى للواحده الإبيت زوجها خاصه لاقدهي معوله ..

شيماء : ضبحت 😤 ونفخت اووووف كلام أهبل مثلش من الصبح وبعدا أنا أفتهن وأدلع وأرتاح هذا بيت أبي أنتي لو مش عاجبش خلي زوجش يبسرلكم بيت والله معش لكن طول ما أنتي في بيت أبي فعتخدميني غصبا عنش يله اخرجي وغلقي الباب ماقد شبعت نوم وسحب البطانيه غطت وجهها ورجعت ترقد 😴...

مره أخوها : ضبحت خرجت وهي بتحطم وتصيح 😠منها ..

....... ......... .........

في المستشفى 🏥...

روان : بتضحك عليه 🤣 طلعت فجاع هو سحب دم سعم مدري مافعلوا لك ..

نادر : رفع يده بعد ماسحبوا له دم ...ابتسم بإحراج 😅 مدري قدهي عقده من وأنا صغير مع انها ماتوجعش وعيضحكوا عليا ويقلوا حميت الرجاله ويخاف من إبره ..

روان : ضحكت 🤣🤣 تصدق حتى أنا بينفتجع من الإبر حتى وأنا دكتوره ..

الممرضه : دكتوره عتستكفي بفحوصات الدم بس ولا باقي حاجه ثانيه ..

روان : لالا باقي نفعله سونار ورنين وكملي بقيه الفحوصات اشتي تشيكب كامل ..

نادر : والله ياروان مابه داعي لهذا كله محسسه لي أن قدنا عجوز باقي له رجل والقبر قد عيموت هو وجع معده وشفتهن والله ماجيت اليوم الإ لأننا وعدتش ..

روان : بلهفه خوف عليه 😯 بعد الشر عليك أخر مره تقل هكذا هذا وانت دكتور صيدلاني وداري انه لازم الواحد يطمن ع صحته ماعاد خليت للناس الباقيه ..

نادر : إبتسم 🙂 فرح بإهتمامها لما خافت عليه من الموت إبسرها خلاص حاضر الي تشتيه شفعله ..

روان : خزيت لما ابسرها بإبتسامه ارتبكت 😅 هاه يله ننزل تحت نكمل بقيه الفحوصات ...


🌹meme_abdalgaleel


@qesasanani



https://tttttt.me/qesasanani/3374

سأكتفي بك حلمآ 💔.

بارت ١٣

بعد ٣ أيام ....

في بيت الجد قاسم 🏬..

أزهار : واقفه جنب السرير بتصيح 😡 مشو ع قولهم ياعلي قووم خطيهم المستشفى...

الجده خديجه : مريضه ممدده فوق السرير بتون 🤒 ماشي يابنتي مشتيش مستشفى ولا أنا شفتهن ..

علي : جالس فوق السرير بيفعل لجدته كمادات .. لكن ماينفعش هكذا ياامه جالسين محميين من العشي🥵 خلونا حتى نتصل لروان تجي تبسركم ..

آيه : ع دخلتها بالحليب والعسل 🍵 الحامي للجده سمعت موضوع الاتصال لروان من علي ضبحت 😤 حطته وخرجت وقلبها بيفور من كثر ماتكرها طلعت ع طول غرفتها تتصل لشيماء 📱 تشكي لها وتتطمن ع اخبارها مافعلت مع زوجها.

........ ........ ........

في بيت هاشم 🏡..

سندس : بتقرب الصبوح 🍱 يوووه كان راعي زيد اصتبح..

نادر :واقف في يده مفتاح السياره 🗝 مع إسلمي يا أختي والله ماله طريق شابع قدنا بينرتاح لما أجلس بدون أكل بتفتهن معدتي وبعدا مستعجل اسير ادي نتايج الفحوصات من عند روان.

حوريه : جالسه بتشرب بن ☕ بتتقهوى. هيا وقوى يا إبني وأنت مروح سير إدي مرتك وصلوا ع النبي قدنا فاقده للعيال ..

نادر : هز رآسه ... آها عنبسر كيف وفلت ورحله خرج...

...... ...... .....

في المستشفى 🏥..

روان : واقفه قدام المرايه بتبسر نفسها وتصلح الطرحه ..

سمر : دخلت ابسرتها وبتضحك 😄 ماقد معانا أو الأخ عيجي ..

روان : لفتت لها وخفعتها بيدها 👋🏻 بطلي هبل أنتي داريه أننا قد قفلت هذا الموضوع تماما من يوم ماتزوج وبعدا سعمنهي اول مره اصلح الطرحه حقي ..

سمر : إبتسمت 🙂 تصدقي والله اننا بيندعيلش كل يوم إن ربي يخرجه من قلبش وتقدري تحبي غيره وتقتنعي تتزوجي نشتي نفرح بش ..

روان : بضبح 😤 ناهي خاطرش شنزل ادي نتايج الفحوصات ..

سمر : قد لقيت الممرضه ع دخلتي قلتلها تطلعهن ..

قاطعهن صوت التلفون بيرن 📱...

روان : أهلا صباح النور وتغيرت ملامح وجها 😒 يوووه تمام الان جيه وغلقت ونزلت ع طول لقيت الممرضه شلت منها الفحوصات في الظرف وخرجت ع طول تسير لبيت جدها تبسر جدتها خديجه وهي فالطريق ذكرت نادر عيجي للمستشفى وهي مابحد أتصلت له 📱...

نادر : فالسياره 🚙 رد عليها ... أهلا يابنت عمي كيف انتي والله إننا فالطريق قدنا قرريب من المستشفى 🏥 شوويه وأوصل .

روان : يوووه قدك قريب أنا آسفه خرجت أتصل لي علي قال إن ماما خديجه تاعبين قوي طول الليل حمى وماقد افتهنوش قدنا فالطريق لاعندهم قلت أتصلك لاعد تجيش للمستشفى ذلحين ..

نادر : هااه خلاص اذا نلتقى هاناك شخطى ع طول الان لبيت جدي ..

🌹meme_abdalgaleel



@qesasanani