206 ⛱



ملاك : جالسه فوق كرسي السفره ضابحه من ياسر وطارحه يدها في خدها واليد الثانيه ماسكه تلفونها ...

سماسم قروب المدرسه فالفيس يسلموا عليش .

سميه: 😄 صدق سلمي عليهم قدنا فاقده لهم .

ملاك: قالت سندس وربيع هيا سجلي السنه الجايه لوكملت الحرب عندنا .

سميه: ماعد ينفعش بعدا عيمتحنوني الوزاري قسم إنجليزي قد مدرستي عربي أسهل .


ياسر: بيشرب شاهي🍺 وبيتفرجهن دخل لملاك للوتس .


منهو ربيع يابرنسيسه 😡.

ملاك: قريت الرساله وطنشته ودخلت الفيس بتتجابر مع قروب المدرسه وتجابر سميه .

ياسر: ارتفع ضغطه وابسرها بغرق ورسل لها ( هذه إسمها قله أدب لما تطنشي رسالتي أنا قلت منهو ربيع 😡).


ملاك : ( شكرا أول طز وذلحين قله أدب تسلم ☺.

ياسر: ( ملاك لاتستفزينيش ربيع ولد فالمدرسه صح .

ملاك: (مدام داري ليش بتسأل .

ياسر: إشتي اتأكد كم هو الباسورد والايميل حق الفيس حقش .

ملاك:ليش 😤.

ياسر: الآن ترسليه قبل ماتمسحي شي .

ملاك: ( وليش شامسح مابش معي شي اخاف منه وبعدا بابا وماما واخوتي معي فالفيس بس أنت مريض ومعقد وشكاك .

ياسر: تمام معقد اديه الآن .

ملاك: اوكي هذا الايميل والباس /***/*/****

بس شكرا ع ثقتك فيني وغلقت الوتس .


ياسر: فتح حسابها لقي صور أيديها هي وصاحباتها وتعليقات ومزح وواحد إسمه برنس العصر كاتب تعليق ( لفين أيديكن يد ملاك ضيعتكن ) قرحين فيوزه.

واصل البعسسه لقي لها منشور كاتبه لاتبحث عن السمراء فالشقراء أجمل مثلي طبعا 😜 وفاعله صوره لعيونها .

وبرنس معلق عليها أحلى عيون ربي يخليك لي .

وملاك : ردت عليه ولايحرمني منك .

وتعليق جنبه لأم ملاك بإسم نجلاء وملاك فاعله لها أم دري انه حساب أمها كاتبه ولايحرمكم من بعض يا أحلى اثنين وفاعله صوره قلب .


ياسر: رسل لملاك ع طول بصراحه أنا فكرت اني وحدي الي بتحبيه بس شكل المعجبين خيرات وماشاء الله عليش مش مقصره برضا أمش وإيش هذه التفاهه فاعله صور ايديش وبواتي انتي وصاحباتش وهبالتكن بصراحه أنا شكلي تهورت وحبيتش أنا في عالم وأنتي في عالم ثاني .


ملاك: مقفله الواتس ماقريتهاش .



@qesasanani

207 ⛱



أنيسه : بتتصل لعبدالله تتطمن ع يسرى .


عبدالله : والله إنها بخير إطمنوا ايذها حاكوها.



يسرى: هآه ماما كيف انتوا أنا بخير شاخلي عبدالله يرسلكم صوره محمد بالوتس .

أنيسه: سميتوه محمد 😄 الله يبارك لكم فيه ويحفظه .


ملاك: مقهوره من كلام ياسر قامت ترقد وماعد فتحتش النت .

ياسر: 😔دخل يرقد ممدد مقهور وحاسس إن ملاك بتكلم غيره بيجابر نفسه أنا أيش خلاني أحبها البنت متحرره زياده لالثمه ودلوعه وكل شي أبوها بيديه لها أنا شكلي تهورت وكان حبي لها غلطه وكلام أمي صح شكلها داريه بها أكثر مني لأنهن نسوان وبتختلط بها .

هاني: يييه يييه ... واليد ياولد يارجال يامره يا أصنج .

ياسر: مطنن ماسمعش هاني .


إبراهيم: ماسك تلفونه فارح بيتراسل هو وساره حب جديد ❤وعادهم بيتعرفوا ع بعض ماقدبش بينهم مشاكل .


هاني : سحب الوساده من تحت ياسر .

ياسر: خفع رآسه .. ضابح 😤لفت لهاني بطل خباله وهزر الوساده من يده وطرحها فوق وشه وقفى.

هاني:.😱 يوووه مالك انا بينداعيك وانت سارح قلت أصافدك.

ياسر: لاتصافدني ولا أصافدك وقفى وشه يرقد.

هاني : قرب لاعند إبراهيم بيحاكيه دلا ماله هذا .

إبراهيم: مشغول مع ساره بيأشر له مش وقتك .


نجي لغرفه ملاك وسميه .


ملاك : مغطيه وشها وبتبكي لاتسمعهاش سميه .

سميه : مبتسمه وبتلعب بشعرها بتتراسل هي وأسامه وبيهديها أغاني ..

سميه : ملاك ذاهنه أو راقده .

ملاك: يعني .

سميه : أمانه افتحي تلفونش أرسلش الأغاني الي رسلي أسامه حاليات إسمعيهن .

ملاك : رسليهن وشسمعهن بعدا .

سميه : مابلا ذلحين هياقوى.

ملاك : فتحت الوتس وصلت رساله ياسر قريتها ونزلت دموعها😭😭 رسلت له
(لاهذه الدرجه شايفني بنت لعابه وبينكلم شباب غيرك ونادم ع حبك لي فعلا يا ألف خساره ع حبي لك ياياسر ذلحين ولاتزعل نفسك إعتبر ملاك من اليوم ماضي وإنتهى سامحتك لماخطبت غيري بس ماشاسامحكش ع شكك فيني .



@qesasanani

208 ⛱


ساره: طيب ليش أنا والبنات خيرات وزيد اختى دايما بتخطى معي .

إبراهيم: مدري انتي الوحيده الي حسيت تجاهها بهذه المشاعر ودايما شاغله تفكيري.

ساره: هاني إحلف إنك مش ناوي تلعب عليا .

عبدالله : والله ياساره وبغلاتش عندي إني شاريش وأشتيش زوجه بس الحرب خربت كلشي وناوي أكلم أبي .


ملاك: كل شوي تفتح تلفونها تبسر ياسر رد او لا وانه غيرمتصل رجعت ترقد .



الحمدلله رقدوا ومريم ماعد رجعتش .


..... الصبح

ياسر: قري الرساله رد عليها أحسن ومشتيش حتى أذكرش .



عبدالله : نزل يسرى يبسروا النونو وبيتحيلوله .

الدكتور: لاتقلقوش صحته تمام بس نخليه زد اسبوع نتأكد .

يسرى: اهم شي إنه بخير الحمدلله.



حنان : سارت الحمام هي وخواتها وبنات الجيران وصاحباتها .

أبوحنان وأمها: خرجوا يشتروا لها الذهب وبقيه الحاجات .


ملاك : قامت شفايفها حبوب ومريضه قهر من ياسر.

سوسن : بتدعيهن صبوح .

ملاك: مارضيتش .


ياسر: قام بياكل ويزبج بيحانكها .

محمد: مال حبيبي مافي فمش مالش .

ملاك: إفتجعت بعد ضرب أمس بابا إشتي أسافر حتى لو بر موافقه إشتي أسير عند ماما.

ياسر: أيوه سفروها حرام الحرب حبستها حرام .

محمد: مش فاهم قصد ياسر تخايله انه خايف عليها



@qesasanani

209 ⛱


فوق الصبوح ...

علي: هيا إقطبوا اصتبحوا الي عيجي معانا المستشفى ينجز .

محمد: أيوه اقطبوا لأنه عاد معي مشوار أنا وعلي .

هاني: إسهل سيروا وأنا شاشلهن .

سوسن: طرحت اللجع من يدها اوذا شاقوم البس إخطى معاكم قد فعلت لها معصوبه أشلها دافيه.

ملاك: بتتفرجهم ساكته في عالم ثاني 😔😔 .

محمد: بيضحك هههه معصوبه مه يامره أخي هي والده بعمليه أكلها عادهو عصاير وشرب.

سوسن: يوووه ياعيبتي عيجعجعوها وهي والده.


كلهم ضحكوا عليها 😄😄.

سميه : وأنا معاكم هيا ملاك نلبس نسير نبسر النونو.

ملاك: سيري أنتي تاعبه شبسره لما يخرج أنا شطلع غرفتي 😔.


ياسر: ياهاني إبسرت صاحبنا هذاك الي فالجامعه طلع مش بسيط صدق تحت المدني ألف جني 😈.

هاني: منهو مادريتش مافعل؟.

ياسر: تم اصتبح وجي أقلك .

ملاك: حبست دموعها وإكتبدت وطلعت .


محمد: بيدعي سميه .. سميه مالها ملاك مشي عاجبه لي .

سميه: وأنا مثلكم والله مالي علم .

محمد: أنا شطلع أبسرها أمد ماتلبسين .

ياسر: في نفسه هو ماتمها إلا الدلع هذا خلاها تلعب بمشاعر الناس وكل شي تشتيه تعودت تشله .. وقام يلبس عيسير بيتهم .

.....

حنان : في الحمام الخارجي .. أمانه بس يكفي سعم إني شابيض من كثر الكياس .

أخت حنان: أوووص انتي غر حريوه قلي حاضر .

حنان : ههههه هيا ناهي عتهيب نسيتي إني أكبر منش .

أخت حنان: إسهل الحريوه تسمع .

البنات : بيزفين ويحجرين .

الحماميه : يابنات قوى إنجزين لاتجي الطيارات ولاشي .

....


أنيسه : هيا شرق قوى نطلع صنعاء.

زوج أنيسه : هيا غر مراعي لأبن أختي قال عيطلع معانا .

أنيسه : قوى اقطبوا والله ماقد غمضت لي عين إشتي أبسرها .

زوج أنيسه: هو سار ينفعني يشتري حاجات مابندي بيدنا ع بنتي.

أنيسه: يله تمام .



@qesasanani

210 ⛱


محمد: طلع بيدق باب الغرفه ع ملاك .

ملاك: ممدده فوق السرير بتبكي 😭سمعت أبوها مسحت دموعها وقامت تفتح له الباب.

محمد: 😱 يوووه مال حبيبي مالش بتبكي .

ملاك : جلست في حافه السرير تعبت من الحرب ماعد قدرتش أتحمل وبكيت 😭 اشتي أسافر فاقده لماما وأخوتي .


محمد: والله إني بيندور أي فرصه بس مغلقين علينا كل الدول إلا بفيزه ومابش معانا سفارات مابلا بر وبيتحاربوا في منفذ الطوال وتفتيش وبهذله قد بيقلوا يمكن يفتحوا الطيران لو فتحوا والله مانجلس .

ملاك: قوى يابابا ماعد أشتيش أجلس هانا .

محمد: حبها في رآسها 😘 وحضنها وياسر نفلته فالحرب وضحك ههه .

ملاك: أنا أهم شي عندي أنتوا وبس .

محمد: أمس جاء موضوع يسرى والمستشفى ماعد دريتش أنتي موافقه ع ياسر .

ملاك: ماتشتيش تحسس أبوها بشي غالطت ... أصلا ماقد ينفعش أوافق بدون رأي ماما خلوا الحرب تكمل وبعدا كل شي من وقته .

محمد: ماما عليا لاتقلقيش أهم شي انتي مبدائيا موافقه وأنا متأكد وإبتسم .

علي: بيداعي محمد من الدرج ... هيا محمد شرق علينا .

ياسر: خلوه يتم يتشيخط للبرنسيسه حقه 😏.


علي: والله انه صدق بيدلعها قوى لكن قدهو أخبر .


هاني: سحب ياسر جي كذا مالك بينحسك بترزوعها بالكلام من أمس وبعدا منهو صاحبي .


ياسر: إخطى معي للبيت وشاحاكيك .


......


كملين يتحممين وروحين .

أم حنان : روحت هي وأبوها قد إشتروا الذهب .
لقيت جارتها قالت لها: به مغنيه حاليه لوتشتيها عتتصلها تجي بعد الغداء .

أم حنان: لكن ماحلفناش ع أحد ولافعلنا حسابنا قلنا غطوه وبس .


جارتها: ماراس ماله الكعك حاصل وشاجي أعاونش واتصلنا للأهل واتصلي لأهل زوجها عادوا حين خلينا نفرح بها .

أم حنان: خلاص تمام .



.....

سلطان : ذلحين يا أمه قد عماتي وخالاتي عيجين أومع اتصلتوا لهن.


جده رهف : أيوه قد عيجين عصر وزد حلفت ع الجيران يجين يسمرين غطوه .

سلطان: خلاص شدي المصروف العشي ماناش داري ماطلع لكم نفعل غداء غطوه .


جده رهف: قدو ولو يابني ماندخلها سكته مايسبرش .

رهف: سمعتهم بيتجابروا كانت راقده قامت سارت تجلس في حضن أبوها بتصافده .

سلطان : بيتحيلالها هيا خلاص إفتهنتي عتجي ماما حنان عندنا .

رهف: أيوه😃 ويقع معي ماما ساع البنات كلهن.

سلطان : إبسر أمه وتنهد آح يا أمه قلبي مفطور ع أمها ماناش متخيل مره ثانيه تجي بدلها .


جده رهف: الله يرحمها ويعوضك ...ذلحين أيحين عتملكوا .

سلطان : سدينا احنا وعمي عنسير بعد المغرب نعقد فالجامع.


.......

ملاك : إتصلت لأمها فاقده لها ومن قهرها بتبكي .

نجلاء: قوى ياملاكي لاتفجعينيش عليش .

ملاك: ياماما ليش تسافروا فلتوني شاموت هانا تعبت من الحرب .

نجلاء: بكيت هيا مه من هذا الكلام والخباله قلك عتموت أنتي داريه أقلش حاجه عتفرحش أنا موافقه ع ياسر .


ملاك : ماهو 😳 كيف .


نجلاء: بابا قلي وأنا موافقه هيا بطلي بكاء هيا واخر مره أسمعش تقلي عتموتي .

ملاك: تمام بس كن اتصلوالي كل شويه .




@qesasanani

211 ⛱


حنان: وصلت البيت إستقبلنها بمحجره وتثوير ومزاهر شداب ضحكت وفرحت وخزيت حست إحساس غريب .

أم حنان: حضنتها وبكيت مبروك يابنتي .

حنان: الله يبارك فيكم.

جارتهم: هيا انجزي اتغدي عنغرف لش وحدي قد اتصلنا للمغنيه وحلوفنا عتجي ذلحين الشارعه تلبسش .

حنان: يوووه يمه تسلموا لي وحبت راسها 😘.


بنت خاله حنان: وأنا قد اتصلت لأهل سلطان ياخاله ع ماقلتوا لي .




..... فوق السياره .


هاني : ذلحين عتقلي مالك أوماشي .

ياسر: آح ياهاني طلعت ملاك كذابه 😔.

هاني: 😱 بطل خباله ليش ماحصل.

ياسر: حكى له .



.... فالمستشفى ..


سوسن : يووه ياربي محلاه أيحين عيخلونا نروحه .

محمد: هههه مستعجله ياجده عادهو لما يتم السادس إبسري سعمنو صغير .

علي: عيكبر كما جلس الحمدلله إن صحته بخير .



في غرفه يسرى :

الدكتوره: الحمدلله صحتها أحسن بكره تقدر تخرج .

عبدالله: طيب يادكتوره ينفع نشل الولد عنفعله ساع حق زمان في عطب وشاش لمايتم شهره .

سميه : ههههه خلي ابنك يفتهن ياعطب وشاش .

الدكتوره: مستعجل عليه لوتحبه ضروري يجلس علشان الاكسجين .

عبدالله : حاضر تمام بس بينقلق مع القصف .



....

هاني: بطل خباله مشهي ملاك من هذا النوع وبعدين مدام عمتي علقوا عليه لاهو أحد يقرب لهم .

ياسر: انا قلت انه ابن خالها الي تشتي امها الأمريكي هذك للزواج وغنى ساعهم وانا تلعب بي أصلا قد قريت رسايله كان يتصلها ويرسل والكل.


هاني: الصدق أنا مش مقتنع ولوهو تشتي تلعب ماعتضيفش عمي عندها .

ياسر: شفتح حسابها واوريك لمانوصل البيت .



إبراهيم : إول يوم يتصل لساره مارضيتش تجاوب بتكنسل . رسلها لوسمحتي خليني أسمع صوتش بس وأقفل .


ساره: ماشي قدنا ميته خزا عادنت تشتي أحاكيك .

إبراهيم : رسل لها وأنا زاعل منش لما أسمعه .



ياسر: وصل بيتهم وانه أجواء عرس ومحجره وجنان دري ان قدهو عرس حنان إتصلها يبارك لها.


هاني: سبحان الله لوشي ان قدهو عرسك.

ياسر: شكل ربي عاقبني إني فلتها وخلى ملاك تلعب بمشاعري هكذا .


جلسوا وفتح الفيس حق ملاك يوري هاني التعليقات والمنشورات حق ملاك .


هاني: إسكه افتح صفحته ندخل نبسر مامعه .


ياسر: أيوه قد قلت هكذا .


هاني: اوذا معاهم أصدقاء مشتركين هيا إدي نفتح نبسر منهم .


ياسر: أمها وعمي محمد وأخوها سمير .


هاني : شكله صدق عيطلع ابن خالها مدام مشترك معاهم ومنشورات انجليزي والكل هيا ادي نبعسس في صفحته لوهو صدق والله إني تفاجائت من ملاك خاصه تعليقها عليه الي كتبت وحشتني مووت والله يصبرني ع فراقك .





معقوله ملاك بتلعب ع ياسر وبتحب يزن أنا مصدومه 😱


@qesasanani

212 ⛱



حنان: يووه ماهو مشتيش ألبس هكذا عيقع شكلي شوعه .

الشارعه : يوووه يابنتي هن هكذا يليسين الحراوي قبيلي يوم الحمام شعرش عنفعله فير ولبسناش القناع .


حنان: مدرى الصدق بينحس نفسي شاقع خبلاء .

الشارعه : خليني أتم أمكيجش وألبسش وعتبسري .


.....

رهف : هي هيه يعني عنسير عند ماما حنان ذلحين .

عمه سلطان : حجاب الله ويسن قدهي ماما وعادهي في بيتهم إسمها خاله هي مره أبوش مش هي أمش .

رهف : حنقت وبكيت نزلت تشتكي لاعند أبوها .


.....
ملاك : راقده مارضيتش تنزل تتغداء معاهم .

محمد: إتصل للسواق يخرج يشتري لها شي من خارج لاهي عتاكل .

ياسر: فصل الثري جي عنده وماقد إبسر إلا صوره في صفحه برنس صوره كان فيها سامي وسمير ويزن فزاد شكه إنه يزن .😁


هاني: هيا قوم نتغدا فالسوق ونرجع نخزن في بيت عمو ونفتح النت قد تلفوني 📱طافي ولاعنفتح من عندي .



ملاك: ذكرت إن الباسورد عند ياسر قامت غيرتها .



ياسر: روح أنت بس أنا ماعد شرجعش خلاص يكفي احراجات للناس شاجلس هانا .

هاني: بتبسر كيف الزجاجات مكسره وكودهم بيضربوا عندكم .

ياسر: ماعيقع شي الناس كلهم في بيوتهم قوم نتغدا ونرجع نخزن هنيه ع صوت المغنيه خلينا ننسى الحب والهرم .



....

أنيسه : وصلت طريق المستشفى هي وزوجها .

سوسن : عند يسرى جالسه يووه حيا جيتوا .

أنيسه: مقدرتش أرقد قد قلبي بيفور .

يسرى: بتسلم ع أمها وتبكي .

أنيسه: يووه ربي ينتقمهم فجعوش الحمدلله انه خرج بخير وأنتي بخيره .

زوج أنيسه : سلم ع يسرى وخرج هو وعبدالله يبسروا الجاهل .


أنيسه: ذلحين ياختي مدام عتخرج الصبح مارأيش أشلها عندي عاد بيتي أمان شويه لافعلنا لها ولاد كما كان .

يسرى: مع ياماما مشتي أفعل ولاد تاعبه وزد حرب مابش فيني للنسوان .

أنيسه: قدهو ماعذر يابنتي يشتين عماتش بنات أعمومش والجيران يجين يبسرنش وخزا انتي في بيت خالش .

سوسن : وأنا قد قلت ساعش الناس كلهم بيولدوا ويتزوجوا محد معبر للحرب قد قلت شاحاكي علي نرجع البيت .

أنيسه: لاعد يغثى محمد إسهل خليها تخرج وبعدا عنقرر .



ياسر: خرجوا يتغدوا وشحن تلفونه جاء يفتح الفيس كلمه المرور غير صحيحه حاول مابش فايده ...

هيا إبسرت ياهاني غيرتها قلتلك مانا خلاص والله مازد أعبرها تخلي يزن ينفعها ياألف خساره ع زعلي مع أمي قد كانت أخبر بها بس الحب أعمى .



هاني: ياسر لاتتسرعش وتخسرها للمره الثانيه إسمع منها لاتحكمش عليها .


ياسر: بدون ما اسمع كل شي واضح .




@qesasanani

213 ⛱



محمد: سميه جي طلعي الأكل لملاك كلين وغصبيها .

سميه : تمام حاضر .


ملاك: بتسمع أغاني وجالسه تبكي 😭.

سميه: دقت الباب ودخلت يووه مالش ماذلحين أمانه ولاتكذبيش عليا .

ملاك : ياسر .

سميه : ماقد فعل.

ملاك : بتحكي لها .

سميه : 😡 طز فيه هو الخسران والله مايلقى مثلش أصلا يحمد ربه إنش فكرتي فيه وحبيتيه أنا شاعلمه الأدب .


ملاك: مع لاتاحكيه خليه هكذا بس يموت بقهره .

سميه : قد خطب ورجعتي له وعادهو عيدلع لو أنا بش حاكي يزن بس وقرحي قلبه .


.......

حنان : بين النسوان المغنيه بتزفها وقدهي خازيه ☺ .


رهف : جالسه جنب حنان وفارحه بها .

أم حنان : بتبسرها وتدمع .

أخت حنان : هيامه أنتي تشتي تزوجيها للمه البكاء 😭.


أم حنان : هي دموع الفرحه الله يسخر لها قلبه .




هاني: يييه بسك جننتني فوق النت من حن وصلنا خلينا نسمع صوت المغنيه نأنس سوى .

ياسر: أيوه مابه عليك مشي حبيبتك الي بتلعب بك والله لأطلع صفحته وادرى منهو وأربيه .

هاني: يووه ذكرتني اتصلها اليوم أنا عرضك ماقد سمعتش صوتها من الصبح .



.......
نجلاء: قلبي بيأكلني ع اختكم ماقد حسيتهاش ضعيفه هكذا وخايفه تموت .


سامي : اذكروا الله الله يحفظها .


سمير: ياماما خالو اتصلوا نجي عندهم اليوم .




ياسر: حرك يده 💪🏻 يس يس أخيرا لقيت صفحته أطلب له صداقه ذلحين وبعدا عنتفاهم .


هاني: هيا أعقل من الخباله قلتلك أسألها هي وإفهم منها .


ياسر: أيوه علشان تكذب وتستمر في كذبها .

ورسل لملاك ( خلاص كذبش كله عيبان يا.... برنسيسه ).



ملاك: قريتها وغلقت التلفون .



@qesasanani

214 ⛱


ساره : بترسل لعبدالله هيا لكن من الزعل والحنوقه .

إبراهيم : قلتلش أسمع صوتش وأغلق بس .

ساره: طيب كلمه بس .

إبراهيم: تمام وعد وشاغلق ع طول.


......


ياسر: ماقدرش يخزن مراعي لبرنس يوافق ع طلب الصداقه .


هاني: بس يكفي دحس أذكر الله واتصل لملاك إعتذر منها .

ياسر: والله ماعتذر ع ايش اعتذرلها ع خيانتها لي .

هاني: الصدق أنك زيدت بها قوى ياياسر الناس تفهم مش هكذا يكفيك وقفه عمي جنبك ولوملاك لعابه ماعتدخلش أبوها فالموظوع .


ياسر: كل شي عيبان .


......


ملاك: خرجت هي وسميه الحوش ضابحه .

محمد: مخزن هو وعلي .

سوسن : جالسه عندهم ... ذلحين يسرى عتخرج الصبح قد أنيسه بتقل عتشلها عندها قلتلها مع نخرجها لابيتنا .

محمد: 😳 يوووه أنيسه جت ولا حاكتني .

علي: ولا حاكتني انا والكل الله يهديها ماتجي صلينا تتغدا.


سوسن: والله ان قد تراشيتها جلست فالمستشفى بدلي عند يسرى وخلتني اروح وزوجها مارضيش معه ابن اخته روحوا .

محمد: هيا اتصلهم ياعلي وبعدا ماقصه تشل يسرى ولاتسيروا بيتكم.

سوسن : أصلا ماذلحين ولاد والرجل ماعتخفش من البيت النسوان عيجين يتفرطين قدهو نروح البيت .

علي: ولاد مه من قله عقلكن الدنيا حرب وانتين حسكن عند التفاريط .

سوسن: قدهو ماعذر حتى من الأهل عيجين يفرحين لها .

محمد: بزعل 😔 ليش بتحسسوني اني غريب وهذا مشو بيتكم بتتحانبي أنتي وأنيسه من يشلها وبيوتكن في بقعه خطيره بس الصدق شاخليكن براحتكن تفعلين الي تشتين .


سوسن : يوووه ياعيبتك والله ماهو قصدي لكن قلت من النسوان والازعاج .

علي: يييه بطل خباله مالك البيت واحد تعرف بعسسه النسوان وبعدا الكلمه كلمتي لاكلمه أنيسه ولا سوسن.



.....

سميه :.ملاك بس بطلي خباله تقهري نفسش هكذا والله انه هو الخسران .

ملاك: جرحني قووي 💔.




@qesasanani

215 ⛱


حنان : يووه أيحين عيروحين النسوان تعبت .

صاحبه حنان: يووه مسرع وغطوه ماعتفعلي .


رهف: ماما حنان شكلكم حالي هكذا 😃.

حنان: 😃 أنتي الحاليه أنتي .

رهف:.صدق ياماما قالت عمتي هذك الي لابسه أزرق ان انتوا ماعتقعوش ماما وتحبوني انتوا خاله وما اسميكمش ماما.

حنان: إبسرت عمه سلطان ورجعت تحاكي رهف لاتصدقيش أحد أنا ماما وشاحبش خيرات .

رهف: فرحت وبتصفق مع الأغنيه 👏🏻.



ملاك : غيرت صورتها فالوتس وفعلت حالتها من باعك لاتبيعه بيعه في سوق الحراج 😜.


إبراهيم : اتصل لساره ألووو .

ساره : خازي😊ه قلبها بيدق مقدرتش تجاوب ساكته.


إبراهيم: يووه جبر الخازيه هيا تحاكي ولا عتطلعي عجماء وتخدعيني وضحك ههههه .



ساره: ردت بصوت واطي يله خلاص غلق .

إبراهيم: ههههه طلع معش لسان وبتتحاكي قلك أغلق خليني أول اسمع صوتش سوى .

ساره: أنت قلت كلمه بس يله غلق.


سمر: بتحارس لساره لحد يجي هيا ساره بس بينسمع خطيه .

ساره: يله مع السلامه مدرى من جاء .


إبراهيم: رسلها الله محلى صوتش هذا معي كروان إيش هذا الصوت الي يجنن .

ساره : يييه بس قوى لاتخزيش بي ☺.


سمر: هيا طابت نفسش حاكيتيه .

ساره: بتضحك هههه صوته حالي مثل شكله .

سمر: دهفتها هيا اخطي نفعل العشاء ياجوليييت ههه .

.....



هاني: هيا شرق قوم نروح قدو وقت مريم هانم ✈.


ياسر: أنا ماشرجعش خلاص شاجلس هانا ماعيقع بخلق الله عيقع بي .

هاني: هيا من الخباله قووم نخطى.

ياسر: ماشي والله رحلك بس .

هاني: كان مشتيت خاطرك وبطل شك .

ياسر: الليله سمره لاراس صاحبها نبسر منهو .

هاني: الله يعينك ع خبالتك .



@qesasanani

216 +217 ⛱




يسرى : ياماما قوى مشتيش افعل ولاد .

أنيسه : يابنتي عادهو البكر نفعلش كما كان .

يسرى: من عيجي وهي حرب وبعدا معوضه فالجاهل الثاني .


عبدالله : ذلحين اخرجي بالسلامه وبعدا اسهل .

أنيسه: قد سديت انا وأمك شاخرجها عندي .

عبدالله : إسهل للصبح وعنبسر قوموا اروحكم بساعتي قبل الضرب .

أنيسه: مع شرقد هانا ولاضربوا قدنا من جيزكم .




محمد: إتصل لأنيسه زاعل منها .

أنيسه: سامحني اشتدفت مع بنتي ونسيت .

محمد: أيوه عانتي تشتي تسيري بيتش بدل ماتوصلي بيت أخوش والله انش غثيتيني .

أنيسه : قلنا النسوان والولاد قدنت داري .

محمد: يله الي يريحش مشتيش أضغط عليش .


هاني: دخل وحده .

سوسن: وياسر وينهو .

هاني: مارضيش يجي جلس في بيتهم قال قدهو من جيز خلق الله .


محمد: ياناس أنا ولابنتي زعلناكم بشي مالكم كلكم ياسر روح وأمك تشتي تروح وأنيسه مارضيتش تجي .


سوسن : والله ماهو هذا يا أخي بالعكس والله إن جملك فوق رآسي محد غثانا ولا غر قلنا مع الولاد.


علي: كان فالحمام خرج ودرى ان ياسر ماروحش اتصله .

ياسر: تلفونه طافي طرحه فالشاحن من كثر ماهو فاتح له مراعي لبرنس .



سميه : سمعتهم حملت لاعند ملاك تقلها انه ماروحش .

ملاك: عاد الحنق له .

سميه: خليه يجلس هو حر .

ملاك: مع حرام بيتهم قريب من نقم عند الضرب .

سميه: اوذا قال هاني بيت عمه معرسين خليه يتعرس ماعيقع به شي وبعدا طز فيه هو الخسران .



.....

الحمدلله عدت الليله ع خير كانت هادئه ضربوا شويه قبل الفجر .



ياسر: أول مافتح عيونه فتح تلفونه يبسر برنس وانه قبل الصداقه فرح .


ملاك: راقده لأنها طول الليل سامره بتتفرج صفحه ياسر فالوتس لو عيدخل تتطمن عليه .


علي: بيدعي محمد يسيروا للمستشفى يسرى عتخرج .


سوسن : ذلحين عتخرج لاعند أنيسه ولا لاعندنا .


علي: 😡 لاعندش ولاعندها ماعتخرج إلا لاهانا البيوت مندشه وبيت أنيسه فاضي من قله الحياء حقكن وبيت اخي هو بيتي ولاجين نسوان لاهانا حيا بهن .


سوسن: افتجعت منه حاضر الي تشتي خلاص عنجهز لها المرتبه بس شاخلي ابراهيم يشلني للبيت ادي ملايات وحاجات .


محمد: سيري حاضر بس أول خلي ملاك توريش الي تشتي ولو مابش شي من الي تشتي سيري للبيت .

سوسن : والله ان قدنا محرجه منك ومن جمايلك الله يحفظك ويخليك لنا .

محمد: ناهي ياخباله خلينا نفرح ويقع في بيتنا ولاد .


... وصلوا المستشفي وتحانبوا مع أنيسه ووافقت تخرج يسرى عندهم .

محمد: اتصل للسواق سكته يشتري مصاريف الولاد وقهوه والده والدجاج والتتن والسود الخ.




زوج أنيسه : شل المصروف الي ادى .
علي : إتصل لهاني يتصرف .


هههههه شكل الخير عيعم كلهم بيتصرفوا 😁



@qesasanani

218 ⛱



حنان : قامت بحين مقدرتش ترقد .


أم حنان : يووه مسرع قمتي ارقدي انتي حريوه .

حنان : ماقدرتش أرقد خلوني أقوم اليوم أودعكم .


أخت حنان: سارت تدي لها الصبوح الكبده والعصير وبتعانيها حريوه.


حنان : شابعه مابش نفس .

أم حنان : هيا من الدلع كلي عيقع وشش شوعه .


........


سوسن : ملاك فين نفعلها مرتبه .

ملاك: هن عيجين نسوان صح .

سوسن: أيوه نفعلها كما كان .

ملاك: الدور الأول فيه 2دوواين اختاروا الي تشتوا والدور الثاني هو كله مفتوح ماما لما معاهم جلسات بيفعلوه طالع .

سوسن : مع يابنتي ماعنطلعش كبير قوى وهن غر 10أيام ومن حق النسوان لايمهدين قدش تعرفي جيراننا وابسري ع بيت معاكم ماشاء الله والله ان قدنا خازيه قوى غر مفعل لأبوش قد قلت شفعلها هنيه فالبدروم بس حجاب الله ويسن ع فراش فيه وتحف مشو بيتا ربع بدرومكم .


ملاك: اخص عليكم هو بيتكم ولو تخرب شي فداكم كم يسرى معانا.


سوسن : خلاص نخلي لها غرفه النوم الي فالبدروم تكن ترقد وتجلس الصبح ولحد جاء حيابه ونفعلها مرتبه في الديوان الي طالع للنسوان للعصر .


ملاك: تمام تشتوا ملايات للمرتبه وحاجات صح .

سوسن: قد قلت شاخلي العيال يشلوني للبيت ادي .

ملاك : إبسروا حقنا لوماينفعنش سيروا.

سوسن: في نفسها يوووه ع ملايات قدهن فساتين أمانه لو تبدي نجلاء وتبسر كيف قد بنستخدم حاجاتها لاتطردنا .


مع يابنتي هذولاء شكلهن غاليات وبعدا مع أمش لاتصيح .

ملاك : مع ياعمه والله اننتوا عتفعلوا منهن .




ياسر : قتح الوتس حق ملاك يشتي يرسلها انه عيتعرف ع حبيبها إبسر صورتها وحالاتها جنن غلق الوتس وقرر يتصلها يبرد قلبه❤ .



.......

السواق : نزل المصروف .

سميه وملاك بيعاونين سوسن بيجهزين بقعه يسرى .


الشغاله : ملاك بابا جاب حاجات كثير قال علشان النونو فين نحط .

ملاك: حاجات مه مدرى انزلوا ياعمتو انتوا ولو قدهو خزا اقلكم هكذا بس قدنتوا داريين بي😁.




سوسن :.يووه من أبوش هذا الله يهديه كيف بيحرجنا شكله تصرف للولاد .

بتنزل من الدرج ع دخله هاني بينزل المصروف .

سوسن : 😱😱 يووه وهذا ماهو .

هاني: قالوا بابا اشتريهن للولاد .

سوسن : قد عمك الله يهديه تصرف نزلهن لانازل نبسر ماعنفعل بهن .



ملاك : تلفونهابيرن أوووف .

سميه : مالش جاوبي .

ملاك : ياسر 😔.


سميه : جاوبي نبسر مايشتي .


ملاك: ألووو.

ياسر: سوق الحراج الي عتبيعيني فيه عنخليه لش انتي وحبيبش برنس أنا غالي ياملاك .

ملاك: نزلت دموعها 😭😭 حبيبي برنس ياسر حرام عليك ليش بتظلمني هكذا .

ياسر: انتي ظلمتي نفسش يله مع السلامه .

ملاك: لحظه لاتفهمش غلط برنس أصلا ...

طوط طوط طوط

ياسر: قفل التلفون 📱قبل مايسمع .



وصلوا من المستشفى ونزلوا يسرى ونزلوا .

سوسن: بتحجر ليسرى وكسرت لها بيضه .

سميه : كانت بتهدي ملاك بتبكي 😭سمعتهم .. ملاك قومي اغسلي وشش شكلهم جوا وطز في ياسر والله مايستاهل دموعش .




@qesasanani

219 ⛱



محمد: يا الله محلا شم الولاد في البيت .

ملاك: أيحين عيروحوا النونو.

عبدالله : عادهو لما يتم شهره .



الكل فارح بيسرى وقد جهزين غداء خيرات أنيسه وزوجها عيتغدوا عندهم .

هاني: بيحاكي ياسر .. قد بابا وعمو بيصيحيوا يله بسرعه غداء .

ياسر: ماشاجيش وبعدا قلهم عرس بنت عمي .

هاني: الله عيسمعك عيصدق انك عتخزن معاهم وتتعرس .

ياسر: يا أخي من الأخير مشتيش أبسر ملاك ماشمسكش أعصابي جي خزن عندي مراعي.


......


ساره : الحمدلله ع سلامتها قد خرجت .

إبراهيم : أيوووه قوى شاخلي سميه تعزمش وجي عندها وامش عند الولاد إشتي امي يتعرفوا عليش .

ساره: بس ماشاقل لأمي .

إبراهيم: عادي هي سميه أصلا صاحبتش .


......

بعد العصر ...

حنان : كملت تصلحها الكوافير فالبيت وقد بيتهم ملان نسوان وعرس .

جده رهف وعمات سلطان وخالاته وأهله بيلبسين عيسيرين العرس .

رهف : لبست فستان أبيض وطرحه تشتي مثل ماما حنان .




سلطان : مخزن هو وأعمومه وأخواله وأصحابه .



ياسر: مخزن هو وهاني وفتح النت يبعسس في صفحه برنس وبيجابر هاني انه اتصل لملاك .

هاني: تشتي الصدق زيدت قوى هذه بنت عمي يعني اختي انا الغبي أصلا الي سمحت لك تحبها وصالحتكم .

ياسر: ياليت وأنا ماحبيتها ولاعرفتها وهي عتقهرني هذا القهر كله .

هاني: والله مابتقهر إلا نفسك وملاك ماعتفعلش هكذا اسكه ادي تلفونك ابسر هذا البرنس حقك وابسر مابترسله .

ياسر: عادنا بينكتب له رساله أقله ذلحين منهو المخدوع فينا أنا ولا أنت ومنهو الي حبيبها صدق .

هاني: بغير جنان وهزر التلفون📱 من يده .

ياسر: إديه .

هاني: أول أبسر منهو سوى منشوراته انجليزي ومعه صور هو وعيال عمي راعي ندخل أصدقائه .

ياسر: خلاص واضحه انه يزن ابن خالها .


هاني: بيقلب لقي منشور قديم في صفحته 😱 يوووه مش معقوول .


ياسر: مالك 😳.







@qesasanani

220 ⛱


أنيسه : بتحاكي خوات زوجها وجيرانها فالتلفون بتأمر لهن أين البيت حق محمد قدهن فالطريق يبسرين يسرى.



سوسن : ههههه مابتفعلي ياملاك الناس يبخروا ببخور مش بعوده العوده للعيد .


ملاك : ماما يبخروا بعوده لما أحد يجي عندنا .

سميه : إتعلموا إتعلموا ياماما هههه .

سوسن : في نفسها بتتحاكى ماعندها حجه تبخر بعوده الزلط خيرات.




......

حنان : دخلت بين النسوان بيزفوها وبتحس قلبها عيخرج بتنتفض من الخزا .


رهف : حملت لاعندها وهم بيزفوها بتوريها الفستان حقها إبسروا ياماما حنان لبست عروسه مثلكم .

النسوان : مسكينه حنان شكلها عتوصل تبزي والله انها بنت طيبه لكن النصيب .




محمد: مخزن هو وعلي وعبدالله طالع .

عبدالله : تصدقوا ذلحين عرفت كيف الأب يقلق ع جهاله جالس وحسي عنده بينقلق عليه .


محمد: لابعد المغرب ونسير نبسره وأنا والكل قد بينفقد هذا اللجع والنص .


علي: ههههه مابلا بتتحيلاله لأنه بسمك .

محمد: يووه ذكرتني حق السمايه ( السمايه عاده شعبيه لما شخص يسمى نفس اسمك تشتري ذهب أو ملابس او أي شي للطفل).

علي: هيا ناهي لك ياسمايه قد كفيت ووفيت .



....

ياسر: 😳😳 ماهو مالك مابه مالقيت .

هاني: هآه إشبح التلفون وإبسر بنفسك 📱.


ياسر: شل التلفون وبيقراء .


المنشور كان : كل سنه وأنتي طيبه ياأحلى ملاك عقبال ميه سنه وحشتيني ووحشني عنادك ومحانبتنا ع بابا يا أحلى أخت فالدنيا...

ياسر: خفع رآسه بيده الله يلعني شكيت فيها ومااديت لهاش فرصه تشرح لي 😰.



هاني: والله لو ملاك ماعد تعبرك ولاتسامحك إنك تستاهل .



@qesasanani

221 ⛱



عمات يسرى:. يووه ماشاء الله ع بيت مع أخوش وع عمر وفراش .

أنيسه: ماشاء الله الله يدي رزقه.


جيران أنيسه : بيتصلين قدهن فالشارع مادرينش اينهو بالضبط .


أنيسه : شاخلي الحاري يخرج لكن.


جاره أنيسه : هذك الي كانت تشتي ملاك 😉 اول مادخلت من باب الحوش 😱 يوووه هذا بكله بيت قدهو قصر كان ماعندهم حجه رفضونا .

أختها: اووص بس ياختى لحد يسمعش ويقلوا بنحسدهم .



سميه وملاك: جالسات فالصاله بيتفرجين تلفزيون .


جاره أنيسه: دكمت أختها ومعاهم سراج والكل ولاكأنه حرب .


الشغالات : دخلين الشاهي الحليب وقد فعلين فوق الماسات ماء وكعك وحلويات وشوكلاته وبيبسي قد محمد اشترى كل شي وملاك رتبت فالصحون المذهب وكلشي يجنن .


سوسن : هيا مالكن بتخزين كلين .


واحده من النسوان: ياختي أمانه من أول اشتي أسئلش غر خازيه حن قمت للحمام إبسرت فيه شجر وتحف وشموع ومرتب قوى خزيت قلت أظاهر انه حمام زينه خرجت اشتي اسألش اين الحمام .

سوسن : ضحكت 😃 هههه الله يهديش هو الحمام مابش حمام زينه .


جاره أنيسه: عوجت فمها 😏 هيا سمعتي إسكه خلينا نقوم نبسر ذيه الحمام ونتبسر البيت سوى قد قلبي بيفور اشتي ابسر هذه الحاجات .

أختها: إبسرتي ع طلعتنا باين به مسبح نازل .



ياسر: مقهور وزاعل قووى 😔 ذلحين كيف أفعل ياهاني قوى حاكيها تسامحني .

هاني: أنا تدخلت بينكم مره ورجعتها لك بس هذه المره اتحمل نتيجه غلطتك ملاك ماعتسمعنيش أنت جرحتها قووى .


ياسر: رسل لملاك ( أنا آسف ياروح قلبي ياعمري وحياتي أنتي بس الغيره قتلتني أنتي حقي وحدي).


ملاك : قامت تدي لهن كابتشينو .

سميه: تلفونش رساله.


ملاك: افتحيها .

سميه : قريتها حملت لاعندها تقلها .


ملاك: ( ردت عليه ... بل آسفك في الماء وإشربه ).


ياسر: مقهور بيتنهد هاني إبسر ماردت .

هاني: إبسره وهز رآسه تشتي الصدق ردها في محله تستاهل .

ياسر: رجم التلفون شخرج أشم هواء .

هاني: راعي لي شخرج معك .



......

أمل: بتتصل يوووه 😱 ولاتقلوا لي .

سوسن : يووه سامحينا انشغلنا ونسيت نسيش الموت .

أمل : هيا مكنوا يسرى التلفون أطمن عليها .

سوسن : مكنت يسرى وبيتجابرين.



ياسر: فوق السياره بيتصل لملاك .

ملاك: بتكنسل وبعدا قفلته .



@qesasanani

222 🌼


النسوان :بيلبسين عيروحين كم عتولدوا .

أنيسه: قلنا عنفعلها 10أيام حرب وجنان .

جاره أنيسه: للمه يختي عادهي البكر إبسري ع حلا وفهنه مانا شاجي يوميه .

أنيسه: حرب محد عيجي عنفعلها يوم مولد ويوم زياره ووفاء .



ياسر: فاتح المسجله بيتسمع أغاني وقف عند صاحب بقاله نزل يشتري كمران .

هاني: 😨 ومن أيحين بتشرب كن افعل الفعله وارجع ابكي .


ياسر: ياهاني قوى حاكيها والله اننا مستعد أبوس يدها وتسامحني أنا اقتهرت من حبي لها بينغير عليها مش بيدي .


هاني: به فرق بين الغيره والشك وأنت للأسف شكيت فيها .

......



أسامه : بيحاكي سميه الصدق قدنا مضايق ع الأقل في بيتكم كنت ابسرش لماتخرجي للمدرسه ماهذا حبس للطرف.

سميه : بتضحك وخازيه 🤗 إسهل علشان أوحشك .

أسامه : إطمني بتوحشيني قووى قدنا مراعي أيحين عتجي .


ملاك : بتسمعهم ذكرت ياسر ليش مايحبها هكذا دايما بيزعلها بكيت 😭.


سميه : هآه أسامه شتصلك بعد شويه وقامت تبسر ملاك .


سميه : خلاص سامحيه مدام بتحبيه هكذا .


ملاك: ماشي ياسميه ياسر هذه المره شك فيني وإتهمني إني خاينه ومدام الشك دخل قلبه وحتى ما اداليش أي فرصه ادافع ع نفسي خلاص خسرني .


سميه : أقلش شي وماتفكريش انه قصدي أفرقكم أو تذكري الموضوع حق هذك المره كنت خبلاء زمان ومراهقه جهال وداريه كم قد بينحب أسامه .

ملاك: أيوه تحاكي .

سميه : يمكن ربي مشو كاتب لكم تكملوا سوى أصلا انتي وين وياسر وين وطباعه غير طباعش أنتي متعوده ع الحريه والدلع وهو معقد ومحزق .


ملاك: 🤔 بتفكر صح كلامش صح .



@qesasanani

223 🌼


حنان: بيلبسنها العبايه المخرجين جوا ويبخرنها .

سلطان : ضابح مقهور ان عروسه عتدخل بدل مرته .


حنان: وصلت عندهم وخازيه .

سلطان : فتش له الطرحه وقري لها الفاتحه وهو ساكت ولا كلمه .

رهف : حنبت تشتي عندهم بكيت 😭.

سلطان: خلاص ارقدي انتي وهي شرقد فالغرفه الثانيه .

بعد إسبوع ...


عبدالله : سار يخرج محمد إبنه من المستشفى الحمدلله بخير بس يحافظوا عليه .

محمد: ذبح ثور وقسمه للمساكين بمناسبه خروجه بخير وسمايه للجاهل وأشترى له جلاله ذهب .


ياسر: كل يوم يتصل لملاك وتلفونها مغلق وبيتراشى هاني يتوسط له .


هاني: الصدق ماشقدرش سامحني هذه المره ملاك زاعله قووى .

ياسر: أنا شاوسط عمي علي اليوم يخطب لي ملاك .

هاني: مع ملاك زاعله قووى هكذا عترفضك خلينا ندور طريقه تصالحك .


سلطان : بيداعي يا أمه أين حقي الزنه الجديده .

حنان: حملت لاعنده تمكنه هذه .

سلطان : إبسرها وإبتسم 😄 شكرا قد بنشغلش أنا وبنتي .

حنان: أنت زوجي وهي بنتي .

سلطان: زوج بيرقد وحده أومه سامحيني .

حنان: مبتسمه 😊عادي أهم شي انك تكون مرتاح .

سلطان : يله تمام اطلع ابدل تسلمي ..( وبيفكر بينه وبين نفسه والله إنه حرام مسكينه هذه البنت ظلمتها معي شكلها طيبه قووى .



محمد: بيتصل لياسر .. هيا وين ابني هذا عادك مراعي تتشكم مع الحريوه أوكيف ماعد جيت ولاسمعنا لك حس إسبوع .

ياسر: هآه 😳 مابلا قلت خزا ولاد وزد خاله أنيسه عندكم من الاحراجات .

محمد: يله مراعيين لك بالغداء ذبحنا لأبن عبدالله .

ياسر: تمام حاضر.. وسار يشتري ورد أحمر🌹 خلى صاحب المحل يفعلهن في صندوق هدايا وكتب فيهن بورد أبيض كلمه آسف 🌼🌼🌼🌼.

وجمع لها أغاني اعتذار في سيدي وكتب لها على السيدي وحشتيني .



ملاك: الله يابابا من يوم ماجوا بيت عمو عندنا وبيتنا قدهو حياه لكن مدرى مالي اليوم قلبي مقبوض قوى ❤.


محمد: مابلا شكلش فاقده لماما اطلعي نتصل لها ونحاكي أخوتش ...



@qesasanani

224 🌼


منى: بتتصل لهاني .. كيف أنت .

هاني: أهلا بسلوه خاطري كيف أنتي .

منى: الحمدلله بخيره بابا قالوا تجي تخزن عندهم.


هاني: ههههه عيزوجونا شاجي ولاماشاجيش .

منى: ماعه مابش زواجه إلا بعد الجامعه .

هاني: هيا ناهي لش قلك لابعد الجامعه ولوما تكملش الحرب .

منى: أيوه ذكرتني قالوا عيفتحوا الدراسه ولو حرب يعني عنرجع ندرس .

هاني: مابش ولا ماشاخليش تسيري افرضي يظربوا نوقف لش القيد .

منى: كما فتحوا من وقته لاتنسى ماتجي قدهم فاقدين لك .

هاني: هههه هم وحدهم بس فاقدين لي وأنتي ماشي 😉.


منى : ههههه ضخكت 😊 يله باي .

.....

ملاك: بتتصل لأمها هي ومحمد.

نجلاء: يووه كم قدنا فاقده لكم .

محمد: مش أكثر مني ياروحي كيف دراسه العيال .

سمير: كان فالمطبخ سمعهم وصيح أيوه أيوه فاقدين للحب وإحنا مع .

محمد: ضحك 😄هههه جالس حق محانكه جي جي قدام الكام قدنا فاقد لك .

سمير: قرب يحاكيه وبيضحك الله الله ماهي هذه الوسامه يامحمد حالق ومسبوك عتحاكى المزه حقك 😉.

نجلاء: خفعته في رآسه وبتضحك هههه إستحي .

ملاك: وأنا مشنت فاقد لي ياشوعه .

سمير: اهلا بروحي كيف اختي حبيبه قلبي .

ملاك: ضابحه 😤 تاعبه إشتي اسافر .

محمد: أيوه ذكرتوني قالوا عيفتحوا رحلات جويه أول مايفتحوا عنحجز ع طول .

ملاك:.حضنت أبوها هيه الحمدلله .


محمد: أين إبنش الثاني مايجي نجابره .


سمير: راقد فالغرفه .

ملاك: سير قيمه اليوم فاقده لكم كلكم إشتي احاكيكم لما أشبع .


نجلاء: إسهل خليه يقوم وشاخليه يتصلش .

ملاك: ماشي ذلحين لو سمحتوا مدرى مالي مخنوقه إشتي نتجابر كلنا مثل ماكنا زمان وبكيت 😭 قدنا فاقده لهذك الأيام .

نجلاء: ملاك بس ياروحي مالش قدش هكذا بكاء وضبح .

سامي: قرب يحاكيهم وهو بيتمطط ملان نوم ..



المهم جلسوا يتجابروا وملاك وأخوتها بيتذكروا مواقف ومقالب كانوا يفعلوها .


يسرى: بتداعي ياماما محمد بيبكي جو إبسروه.

عبدالله : بيتليقن عليها ييه ياه ياخبلاء قدش أم وعادش جو إبسروه هههههه .

يسرى: هههه هيا قوم ابسره أنت ولا أب ع الفاضي😜.


عبدالله: مع ولا بتبسري سعمنهو صغير قوى مصداش عينكع .



@qesasanani

225 🌼


سوسن : إطلعي جاوبي يسرى .

أنيسه: إطلعي أنتي بينضرب الحلبه .

سوسن: الله يهديه محمد ماكنش به داعي للذباحه والله اني خازيه قووى إبسري ع ولاد وعمر وحلا .

أنيسه: يوووه ما محمد الله يحفظه جالس ماتغير علينا مع إن قدهو في هذا الغناء بكله .




علي: مالك يا إبراهيم مطنن هذه اليومتين قد كودك غر فوق تلفونك .

إبراهيم : تشتوا أقلكم الصدق ولا إكذب .

علي: مابلا الصدق .

إبراهيم : موطي رآسه بيحاكى أبوه وهو خازي 😊
إشتي تخطبوا لي .

هاني: ع دخلته من الباب سمعه ضحك هههه أيوه امانه اخطبوا له نهجع شغلته 😜 ولا ماقلت .

إبراهيم: شل الوساده حق المدكى وخفعه بها .


علي: بيضحك عليهم ههههه خلاص ناهي عنسأل أمك لاقبالها بنت .

إبراهيم : هإه وفتح عيونه مع مع لايبسروش .

هاني: ههههه ضحك وإبسر إبراهيم الصدق أخي عينه ع واحده وغمز له 😉.


علي: هز رآسه آها وأنا بينقل مارآس الطنانه حق أخوك من هي .

إبراهيم : قال لأبوه انها صاحبه سميه فالمدرسه إبسرها مره لما سار يوصل سميه .

هاني: بيتفرجه ويفعله حركات بيده يانزغه هههه أيوه أيوه هو غر ابسرها مره لما وصل سميه وعجبته .

إبراهيم : بيتحلف له بيده من قفى أبوه والله لأرويك .


علي: مالكم خلاص عنخلي أمك تسير تبسرها وتسأل عليها ولاهم سوى نتوكل ع الله .


إبراهيم: فرح 😃 ورسل لساره انه حاكى أبوه وعتجي أمه تبسرها.


ساره: فرحت 😃 وحملت لاعند سمر تقلها .




سميه : بتتحيلا للنونو وأمها بتبدله وتلاعبه .


عبدالله : يووه محلاه كنتوا تفعلوا بنا هكذا .

سوسن: مع أنت طلعت كبير من يومك هههههه .



سميه ويسرى: ضحكوا عليه .



@qesasanani

226 🌼


سلطان: بيتغدى وبيداعي حنان هيا عتجلسي .

جده رهف: والله يابني مارضيت قد تحانبت انا وهي لماقلنا بس مابلا تشتي تفعل الغداء وكنست الله يحفظها ع حماشه فيها .

سلطان: ليش والشغاله وينهي .

جده رهف : ماجتش مريضه وحنان ماخلتنيش والله إن ربي سخرها لك .

سلطان : بيبسر طيبتها وإبتسم وقام لاعندها للمطبخ كانت مقفيه دغدغها من وراها .(أول يوم يعاملها كزوجه كل يوم بيرقد وحده من أول يوم فالعرس).


حنان: لفت بسرعه إفتجعت إبسرته وضحكت بخزى 😊.


سلطان : هيا روحي عتتغدي .

حنان: وطت رآسها هيا تمام الآن .

سلطان: رفع رآسها بيده وإبتسم بتخزي مني أنازوجش 😉.

حنان : قفت وهي فارحه انه بداء يعاملها كزوجه .

سلطان: هيا نتغداء واليوم خلي رهف ترقد عند أمي 😉.



......

ملاك: غلقت المكالمه مع أمها وأخوتها وبتبكي 😭.

محمد: يووه 😱 ياملاكي بتبكي ليش بتزعليني هكذا خلاص هانت عنحجز أول مايفتحوا المطار .


ملاك: مدرى مالي مخنوقه قووي يابابا .

محمد: هيا ننزل نلعب مع إبن عبدالله الأطفال يبعدوا المرض ولو الدنيا هادئه ساع تيه اليومتين شاخرجش عصر انتي وسميه تشمين هواء.


ملاك: أيوه يابابا قدنا ضابحه وبعدا الحمدلله هذه اليومين هادئين نخرج .

محمد: الله يجعلهم هادئين هكذا ع طول .



......


ياسر: تحمم وبيبدل ويتصلح قدام المرآيه وفعل لشعره جل وبيرش العطر في كل بقعه فارح عيسير يتغدا ويعتذر من ملاك .



خرج لافوق السياره وشل الورد والسيدي وذكر الورقه الي شطها زمان من دفتر ملاك دخل يديها يوري ملاك ويوريها إلاسويره الي شلها عليهابدون ماتنتبه لما كان يذاكر لها يوريها انه محتفظ بهن .




علي: هيا ياجماعه عتقربين لنا الغداء .

سوسن: أيوه الآن شرق قبل مايجين النسوان .

محمد: هيا قربي أمد ما أتصل لياسر وين قدو .

سميه : ليش ياسر عيجي 😳.

محمد: أيوه فالطريق .


ملاك و سميه : تباسرين .



@qesasanani