📜قصیدة: [ فأرحموا هذا الرضيع ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ١٠ محرم ١٤٢٩ هـ.
ــــــــــــــــــــــــــــــ

المستهل:

أن لَم تترِکوني أو لَم تَرحَموني
فأرحَموا هذا الرضیع
۱/ــــــــــــــــــــ

طفل عطشان و اعیونه إلي تربه
و أریده یرتوي و أطفي جمر گلبه
أخاطب کل شجاع الیأمن ابربه
علیه هالحرب طفلي شنو ذنبه

و لیسَ البُطوله في قَتلِ الطُفوله
إنّهُ جُرمٌ شَنیع
فأرحَموا هذا الرضیع
۲/ــــــــــــــــــــ

طفل هذا رسول الله النبي جده
و ملائکة السمه تتوافد للمهده
یأرباب الحقد والله انفطر چبده
أرحموا دمعته التتفایض ابخده

في دَمعهِ الجاري عَتبٌ بِإنذارِ
إحذَروا سَخطَ الشَفیع
فأرحَموا هذا الرضیع
۳/ــــــــــــــــــــ

أنا غصن النبي و هذا الطفل فرعه
و مجدنه بالمکارم ما یجف نبعه
اذا صوت الطفل أهل السمه اتسمعه
تجیله الحور تروي گلبه و اترضعه

أملاكُ السَماءِ إن تَسمَع نِدائي
غادَرَت عَرشَ السَمیع
فأرحَموا هذا الرضیع
٤/ــــــــــــــــــــ

أنا کفّي یلف العالم و یطوي
و إلي اراده الجمعکم لو أرید أروي
لچن صابر علی حکم السمه العلوي
و أکابر و أدري طفلي حسرته تچوي

نَحنُ الکِبریاءُ في کَفِّنا الماءُ
إنّمَا قَلبي مُطیع
فأرحَموا هذا الرضیع
۵/ــــــــــــــــــــ

یعاتبها و یخاطبها أبوالیمه
و ابن کاهل یسدد عالطفل سهمه
رمه نحر الرضیع و ماخطه المرمه
و نزف دمه صدر هالصوت من دمه

باللهِ ما ذَنبي أشکوکُمُ ربّي
هکذا قالَ النَجیع
فأرحَموا هذا الرضیع





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10683

📜قصیدة: [ صاحب نخوه ]

🎤أداء الملا قحطان البدیري
🖊الشاعر ميرزا عادل أشكناني
📆 ليلة ٧ محرم ١٤٤٣ هـ.
ــــــــــــــــــــــــــــــ

المستهل:

أربع احگوگ إلي یمك و انت صاحب نخوه
سهر لیلي و الکفاله و البخت و الخوه
و الیوم توفیلي الدین
یا روح زینب و حسین
۱/ــــــــــــــــــــ

آنه اختك یابوفاضل و آنه المربّیتك
حگي مثل أمك علیك
یا فرع غصن أبوطالب أعلم ابتربیتك
ماکو حاجه و انتخیك

حگي الأول سهر لیلي و شیلك اعله امتوني
و أمك الثانیه ابزغرك چانوا ایسمّوني
مثل سهري اعلیك ردتك تسهر اعله اظعوني
خایفه و لایذه بیك

ترجف اعظامي یخویه و العساکر یمنه
لاچن ابظل رایتك روحي أحس امأمنه
ردتك عالمخیم عین
یا روح زینب و حسین
۲/ــــــــــــــــــــ

تذکر اوصیّة علي حط یمنتي بیمینك
لو أذکرك باللي صار؟
و انت عرگ الهاشمي طگ و نُبَض بجبینك
گتله تم، ابعیني، صار

و الیوم یوم اللي توفیني الکفاله ابزودك
و تگحم المیدان و اتشد معصبي اعله ازنودك
تنفض العلگمي من جرفه و تجیبه ابجودك
العطش وج ابگلبي نار

یاکفیلي و حگي الثاني تروّي اغلیلي
مَـ انت من بین اخوتي اخترته یکون اچفیلي
و مثلك بعد یحصل وین
یا روح زینب و حسین
۳/ــــــــــــــــــــ

أبو راس الحار مثلك دومه صاحب غیره
للذي یوگع ابضیج
و الطلع من ظهر حیدر أدري یوصل خیره
للعدو گبل الصدیج

یگصر السانه الیگول آنه ابعتب و ابّختك
لاچن احسبني غریبه ماني حسبة اختك
إلي حگ حرمه اعربیّه یالجبتها ابّختك
لدارها ابعید الطریج

اشلون لو بنت الحموله تدخل ابدیوانك
یمن ماتنطي ابدخیل و تنطي ابذرعانك
حگ البخت بالچفین
یا روح زینب و حسین
٤/ــــــــــــــــــــ

الخوه رابع حگ علیك و ما أوصّي أمثالك
و منو مثلك وفي ذات
خویه من الوطن جینه امدلّلات ابجالك
و من نرد امدلّلات

یا سگف خیمة خواتك یاهو عگبك الهن
و یاهو لو صعدن عله الناگه الذي اینزلهن
الظعن لو مال ابمسیره من یشد محملهن
و انت مرمي اعله الفرات

الإخت تتوچه اعله أخوها من تطیح ابکلفه
و الإخوان ابچفه کلهم و آنه أخوي ابچفه
و ابخوتك ماکو اثنین
یا روح زینب و حسین
۵/ــــــــــــــــــــ

دخّن العبّاس چتفه و گلها أوّفي ابدیني
ابشرط متطیح الزنود
عله راسي و عله عیني لَوَن تسلم عیني
و راسي میصیبه العمود

الهوه ما ایمر بیچ مادام الهوه ابأنفاسي
و حتّی لو طر السهم عیني و تطشر راسي
للخیم أرجع بجودي و أفخر ابنوماسي
لَوَن یبگه عندي جود

ابلایه جود الخجل یمنعني أرد لخیمّي
و ماي گصتي و الوعد عندي أهم من دمي
گالتله والله و نعمین
یا روح زینب و حسین






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10996

📜قصیدة: [ يا عون ]

🎤أداء الملا قحطان البدیري
🖊الشاعر: ميرزا عادل أشكناني
📆 محرم ١٤٤٣ هـ.
ــــــــــــــــــــــــــــــ

جبتك سند یا عون
للما بگاله عون
أمك زینب و أریدك
لخالك تفدي دم وریدك
و لمثلك ماینراد أحزمه
و أشدله عزمه
و انت ابن اخت عبّاس
ــــــــــــــــــــ

یگلها لا تحزمیني
یا یمه لنصر خالي
و آنه العید عندي الموت
لا بالموت مابالي
من أثبت عالکحیله
فنّه الیثبت اگبالي

عالمنیه یغلي دمي
لا توصیني
و اعله خالي طبعي کله
مو ثلثیني

و حگ اللي الچ دگ بیده الصدر
و حگ چفوفه
احسین ابغربته
لحد آخر نفس ما أعوفه

گالت کفو و نعمین
یالطالع علی حسین
حین الکمّلت بچیها
اویه امحمد بدت حچیها
گالتله الشهاده گصدي یثاني ولدي
یا معصبي البالراس
ــــــــــــــــــــ

محمد گلها یا یمه
گرّي العین و ارتاحي
ابسوگ الحرب زارع موت
روس أحصد ابأرباحي
حوم و أفني کل جیمه
اعلیها امن أصفگ اجناحي

خالي هذا و إعله خالي
ماظُم حیلي
رایح آنه للشهاده
بس ادعیلي

وي ذاك السلف جسام و علي
ابدربي ماضي
لو سیف العده ایگطعني وذر
بموتي راضي

زینب رضت و اهناك
گالت وفیت ارباك
و التسعه اللي بیها جبتك
توفیها بگطع رگبتك
یولادي انعرف دربکم و آنه عگبکم
تسبیني گوم أرجاس






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10999

📜قصیدة: [ ندفن مهجة الزهره ]

🎤أداء الملا قحطان البدیري
🖊الشاعر حسين العامري
📆 ليلة ١١ محرم ١٤٢٩ هـ.
ــــــــــــــــــــــــــــــ

المستهل:

اجت یم العلیل و گالت الحره
اخذني اویاك ندفن مهجة الزهره
۱/ــــــــــــــــــــ

أنا زینب یعمه و لاتخلیني
اخذني اویاك أباریك و تباریني
و أنا بالکوفه ماعندي الیحامیني
بس انت البگیت و آنه متیسره
۲/ــــــــــــــــــــ

أخاف اتروح یا عمه و بعد متعود
نحیل و لو شفت جثته اتطیح اردود
الیسر یاذیك الدمع جاري الگلب ممرود
و أخافن تنهظم یا عمه بالسفره
۳/ــــــــــــــــــــ

أنشدك أرد أروح أدفن هلي ویاك
خلص من الصبر مگدر أظل أتناك
حفرت الهم جفن عیني بعد عیناك
نرش فوگ الگبور ادموع بالحسره
٤/ــــــــــــــــــــ

علی جسم السلیب الـ من گفه مذبوح
اخذني اویاك یا عمه الگلب مجروح
أدلیك اعله جسمه العالثره مطروح
علامه عندي یا وین انهشم صدره
۵/ــــــــــــــــــــ

و اله گبر ابضمیر احشاي صَوّرته
وسط گلبي لحد دامي أنا احفرته
و اله شباچ وسط اعیوني أنا ارسمته
و اله ملحوف کافوره دمه نحره
٦/ــــــــــــــــــــ

اخذني اویاك یا عمه الگلب مهظوم
أدلیك اعله طفل البالسهم مفطوم
حتی اندفنه یم صدر الأبو المظلوم
گضه ضامي اختفه صوته انگطع نحره
۷/ــــــــــــــــــــ

و اخذني یا علي یم خیّك الأکبر
تره جسمه یوسفه اعله الثره امطبر
أرید أجمع وذر جسمه البگه اموذّر
یریت الدفنته أمه تجي اتحضره
۸/ــــــــــــــــــــ

علامه عندي لو تاخذني یم جاسم
مستر ابزفافه و النحر باسم
و اله فوگ الظهر رمح العده جاسم
و اله حوفه ابلهیب النار مستعره
۹/ــــــــــــــــــــ

لَوَن تسئل علی الساقي و علی جوده
أرشدك عالکفیل العینه ممروده
و أدلیك اعله عبّاس و علی ازنوده
أروح اویاك أموت اهناك أظل کتره






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10684

📜قصیدة: [ يا خويه يا مذبوح ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ١١ محرم ١٤٢٩ هـ.
ــــــــــــــــــــــــــــــ

المستهل:

لو تعلم ابحالي اشجره
یا خویه یا مذبوح
ماتبگه نایم عالثره
یا خویه یا مذبوح
۱/ــــــــــــــــــــ

نمت فوگ الثره و طابت الك هالنومه یبن أمي
و أنا دلالي مرمه اسهام صار لهمك و همي
یریت اسهام صابتني و نزف فوگ الأرض دمي
و لا أبگه ابدیار الطف غریبه و لا ولي یمي

مثلك عساني امخضبه
یا خویه یا مذبوح
و لاچنت أظل متغربه
یا خویه یا مذبوح
۲/ــــــــــــــــــــ

غریبه ابگیت محتاره و أشوف عیون تهمل دم
رضعان و حرم و أطفال تزید اهمومي فوگ الهم
وحده اتصیح یا بویه ترضه ابزغري أتیتم
وحده اتنوح یا عمي چا وین أصبحت یا عم

ننحب نحیب الفاجده
یا خویه یا مذبوح
و بعدك تولتنه العده
یا خویه یا مذبوح
۳/ــــــــــــــــــــ

نحیب أطفالي یفجعني و أنا ابـ بلواك مفجوعه
لچن واجب أباریهم و أخفف عنهم اللوعه
أسکّت چم طفل یبچي و گبل ماتنشف ادموعه
تمر ارماح گدامي و علیها الروس مرفوعه

گلي اشأنشف یا دمع
یا خویه یا مذبوح
و اگبالي راسك منگطع
یا خویه یا مذبوح
٤/ــــــــــــــــــــ

أنشّف دمعة أیتامي و أخفف من هواجسها
و لهیب النار بخیامي چن روحي یلامسها
أصد لخیامي و أتذکر أخوي الچان حارسها
و أشاهد طفله مرعوبه و النار بملابسها

والله مثل حرگ الخیم
یا خویه یا مذبوح
گلبي التوه بنار الخیم
یا خویه یا مذبوح





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10684

📜قصیدة: [ ضيف السيف ]

🎤أداء الملا قحطان البدیري
🖊الشاعر: ميرزا عادل أشكناني
📆 ليلة ١٠ محرم ١٤٤٢ هـ.
ــــــــــــــــــــــــــــــ

المستهل:

هذا المسه یمکم ضیف
و باچر یضیفني السیف
امسافر أنا و عابر سبیل
آخر محطات الرحیل
باچر باچر
۱/ــــــــــــــــــــ

هالدنیه حسبة گنطره، و دار الخلود الآخره
و هذا مسیري
و تخلص سفرتي ابکربله، إنّي مِن الله و إله
راجع مصیري

طیحتنه من ظهر المهر معراج الأرواح
و اثنعش طبره ابمنحري تذبحني و أرتاح

مهما یظل الخطار
لازم یشیل امن الدار
و خطار أنا و یمکم نزیل
آخر محطات الرحیل
باچر باچر
۲/ــــــــــــــــــــ

هاللیله ضیف ابهالخیم، و باچر یضیفني السهم
ابدیوان نحري
امشابگ الخیط اویه الجرح، بالحومه أشابگ کل رمح
و أفتحله صدري

بوّابة المیدان.. بوّابة الفردوس
و أرتقي کلما خیلهم بضلوعي اتدوس

و کل جرح ینزف بدماه
ایقرّبني من عرش الله
یصعد ابروحي جبریل
آخر محطات الرحیل
باچر باچر
۳/ــــــــــــــــــــ

مَن الذي بابه احترگ، و شافه عله الزهره انطبگ
حزني تورّث
هاي الحیاه رحلة قهر، و آخر محطه ابهالسفر
سهم المثلث

لمّن أجرّه امن الظهر یبدي خلودي
ابدمي اعله قَربوس الفرس یصبح سجودي

و طبرات حاجبها العین
اتخلیني قابَ قَوسین
من محضر الربّ الجلیل
آخر محطات الرحیل
باچر باچر
٤/ــــــــــــــــــــ

لاتطمئنین لدهر، جار و ضلع أمنه کسر
ابأول عمرنه
و من عگب حیدر و الحسن، ایفر بینه دولاب الزمن
ایفرهد خدرنه

یا زینب و باچر نکمّل هالرزیه
آنه ذبیح اعله الترب و انتي سبیه

لاچن گبل لاتمشین
ابدرب المعاره اتمرین
اتودعینه و انتي اعله الهزیل
آخر محطات الرحیل
باچر باچر
۵/ــــــــــــــــــــ

مابیني و بین الأجل، إرادة العَزّ و جل
و هذي حکمته
باللوح قدّر هالأمر، خیر البشر بیده الشمر
یگطع رگبته

سبحان ربي ابهالمشیئه و هالإراده
وجه الله یمسي له الرمل باچر وساده

و لو أبگه عاري ابلا ثوب
راضي ابقضائه المکتوب
و ما رأیت إلّا الجمیل
آخر محطات الرحیل
باچر باچر







• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11037

📜قصیدة: [ ارجعلي ]

🎤أداء الملا قحطان البدیري
🖊الشاعر: بشار السامي
📆 محرم ١٤٤٣ هـ.
ــــــــــــــــــــــــــــــ

المستهل:

مو أغله من عندي النهر
طاح الرماد اعله النظر
الحگني یا خویه الگمر
تعال تعال
ــــــــــــــــــــ

عباس مِد روحك إلي
و افزعلي لو توصل دم
یالما یشبهك کل مطر
امن اتطیح أعرفك تلتم
کلما أصیح و ماتجي
یطلع الشیب ابروحي
ارماد الخیم مو جربتك
بلل یخویه اجروحي

عباس منك ماشفت
یا خویه بس دلال
الحگني شو هذا الشمر
جایب بدیه حبال
دخان هسه اتنفست
وي دمعي لونه سال
الماینچوي بنار الخیم
یتچوّه بالرمال

صحتك بصوت المختنگ
عباس بس لانفترگ
و بیّه الصدی ایگلي أعتذر
تعال تعال
ــــــــــــــــــــ

لحسین أنا اشما عاینت
شوف النظر یتوجع
کل وذره تلصف من بعد
شایف ضوه ایتگطع
اقماش الخدر کزبر وفه
لمن سمع بجروحك
حسیته مو ذاك الخدر
متغطیه چني ابروحك

بعیونك امثلث گعد
یعني انطفه ضواي
و اچفوفك انگطعن غدر
یعني انگطع هواي
عباس غیر انت الگمر
خویه اطلع ابسماي
الماي ماشربه چنت
چنت انت الیه ماي

حسینك رجعلي بحیرته
مثل المصوب خطوته
رد للخیم محني الظهر
تعال تعال





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11056

دمع الحیاری

📜قصیدة: [ علي و خصاله ]

🎤أداء الملا قحطان البدیري
🖊الشاعر واثق العيساوي
📆 ليلة ٩ محرم ١٤٤٣ هـ.
ــــــــــــــــــــــــــــــ

المستهل:

شایف نبي بجماله
وارث علي و خصاله
کامل بدر جماله
علي علي علي
من هاشم ماخذ ضیّه
جسّد معنی الحریّه
علي علي علي
۱/ــــــــــــــــــــ

لوحة حب ربانیّه، بعیونه العدنانیه
کلما أحچي ابطاریّه، لون الجنّه ایغار
أشبه هالناس ابجدّه، خُلق و أخلاق العنده
شمرة عبّاس ابزنده، لو سل البتّار
بالطف موقف خلاله، قدوه ایظل لأجیاله
هذا الأکبر بفعاله، نتعلّم ایثار

ماخذ کل الشجاعه
حیدر شفته بطباعه
ناده سمعاً و طاعه
علي علي علي
قدوه ابروحه الثوریّه
جسّد معنی الحریّه
علي علي علي
۲/ــــــــــــــــــــ

متربّي ابیت العصمه، وارث أخلاقه و علمه
من جدّه و أبوه و عمّه، متروّي الإیمان
الخطوه الیخطیها عباده، متعلّم من أجداده
هیبه و فرسان الساده، یا نعم الفرسان
و الحومه امن ایدخلوها، هُمّه ابسیفه ایدیروها
و ابدمهم من یرووها، ایموتون و شجعان

ساکت و ابعینه نظره
ترهب یاهو الینحره
أکبر و ابکبره قدره
علي علي علي
هیبة فارس عَلَویّه
جسّد معنی الحریّه
علي علي علي
۳/ــــــــــــــــــــ

احروف الإسم الأعظم، و إعجاز الباري المحکم
بالطف للراید یفهم، کل هاي الأسرار
لیش الأکبر ضحّه الدم، و أول واحد یتقدّم
ویّه الحق و ما مهتم، بالسیف و بالنار
شاب و بالغیره امحزّم، من ارتجز امن اتکلّم
صاح آنه علي و بیّه أعلم، أهل الحق و الثار

شایل سیف الإمامه
مالك غیرة عمامه
ماظل فارس أمامه
علي علي علي
و بخطواته الثوریّه
جسّد معنی الحریّه
علي علي علي
٤/ــــــــــــــــــــ

لمّن طب ابمیدانه، و احتارت بي عدوانه
هذا الأکبر عنوانه، لو هذا العبّـــاس
منو هذا الموت القادم، فارس شاب و من هاشم
ابکل الإیمان ایهاجم، و امحیّر هالناس
یا فرسان الیوصلها، بسم احسین ایجندلها
هبّة ریح و یفصلها، بس جسد ابلا راس

قاهر جیش اعله إیده
کاسر ظهر الیریده
مو دم غیره ابوریده
علي علي علي
جسّد معنی الحریّه
علي علي علي
۵/ــــــــــــــــــــ

راح و ظل شایل همّه، یتنطّر یا گلب أمه
ظلت تدعي الله ایسلمه، و اولیدي أتلگّاه
وجه احسین امن اتغیّر، تدعي و تبچي و تتحسّر
الله الیحمیه امن الشر، و ایردلي أتمنّاه
ردلها و ضامي الأکبر، عطشان و گلبه اتفطّر
شیصبر الأم ماتگدر، عالدمعه و عالآه

راح و کُبر حزنها
تبچي لمصاب ابنها
جثّه رد لحضنها
علي علي علي
امخضّب بالدم تالیّه
جسّد معنی الحریّه
علي علي علي





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11060

📜قصیدة: [ أين ابنتي ]

🎤أداء الملا قحطان البدیري
🖊الشاعر: أحمد العلياوي
🖊الشاعر: كرار حسين الكربلائي
📆 ليلة ٣ محرم ١٤٤٣ هـ.
ــــــــــــــــــــــــــــــ

المستهل:

فاطمةٌ علیلتي غریبةٌ کغُربتي
یا حَسرتي أینَ ابنتي
۱/ــــــــــــــــــــ

أذکُرُها آهٍ لَها بِعَینها سؤالُ
ما نَطَقَت بِکلمةٍ فَدَمعُها المَقالُ
تَنظُرُ بنظرةٍ و حَوليَ العیالُ
کأنها قالت لنا هل نَفِذَ الوِصالُ
تَفَحّصت أوجُهَنا بانَ بها احتمالُ
إذا تَعودُ نُسوةٌ لن یرجعَ الرجالُ

و حینَ حانت رحلتي
جائت لِشَمِّ شیبتي
یا شیبتي أینَ ابنتي
۲/ــــــــــــــــــــ

یمي انحنت مثل الغصن ذابل ورد عمرها
بعیونها شفت العتب بس غطته ابصبرها
نوگ السفر من نوّخت دارت عَلَي نظرها
احچایة اصعدي بالظعن من عندي تنتظرها
من شافت الشیب اعتذر بنتي نست سفرها
و عفت الدمع مثل الصبح یتنفس ابقهرها

شبگتني سکته ابلا حچي
بشیبي اشکثر ضمت بچي
یا دنیتي أینَ ابنتي
۳/ــــــــــــــــــــ

آهٍ و لمّا أزْمَعَت لِتَرحلَ الرُکبانُ
و حمّلوا ما حمّلوا للسفرِ الوِلدانُ
و مُفرغٌ مِن أهلهِ مِن روحهِ المکانُ
لا عِطرَ في أرجائهِ و أنطفئَ الزمانُ
لاحَ بوجهِ فاطمٍ سؤالها الحیرانُ
تقولُ هل أبقی هنا و تذهبُ النسوانُ

لها جوابُ دَمعتي
هَلّت و بانت حسرتي
یا دمعتي أینَ ابنتي
٤/ــــــــــــــــــــ

خطواتي تاخذ بالنفس و بلا نفس عفتها
صح ماخذتها بالظعن بس بالگلب خذتها
بالدرب چم مرّه بحلم تبچي عَلَي شفتها
حد ما وصلت لکربلا دمعاتي مانستها
من صعد حافر عالصدر بضلوعي دورتها
الما تنچوي بنار الخیم نار البعد چوتها

ما ماتت ابشمة نحر
ماتت علیّه امن القهر
اتظل صیحتي أینَ ابنتي





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11062

📜قصیدة: [ أنا طوعه ]

🎤أداء الملا قحطان البدیري
🖊الشاعر: مهدي بارون
📆 ليلة ٥ محرم ١٤٤٣ هـ.
ــــــــــــــــــــــــــــــ

المستهل:

یمسلم لا یِهِم بالغربه گلبك
أنا لسِلمَك سِلِم حربي اویه حربك
أنا طوعه طوع التریده
۱/ــــــــــــــــــــ

یالفارگتهم هلك، بعیوني أستقبلك
بالکوفه ماظل خجل، لا گصّه عِرگت الك
ما تیّهیت الدرب، و لبیتي گلبك سِلَك
نیتي التجیبك إلي، بالما یحبك شِلَك

یعالي المنزله
اتشرّفني ریتك
هله و میّة هله
هالبیت بیتك
أنا طوعه طوع التریده
۲/ــــــــــــــــــــ

باللیل و جَیتك صبح، و ابهالضیافه ألِح
تعذرني لو قصّرت، و الغایه زاد و ملح
جاي ابرساله و ردت، عالکوفه تقره الفتح
معقوله و انت الدوه، شایل غربتك جرح

تره الباعك عشگ
مبیوعه ذاته
أقل شي چا صدگ
کمّل صلاته
أنا طوعه طوع التریده
۳/ــــــــــــــــــــ

یا مسلم المعذره، خجلانه منك تره
الشوکه بجمال الورد، خلاهه متخوصره
مو مثلي إبني طلع، وین الله و ایعثّره
العایفله جنّة علي، شیسوي بالآخره

یمسلم و إطمئن
و إسمع ندائي
رغم کلمة و إن
آنه ابولائي
أنا طوعه طوع التریده
٤/ــــــــــــــــــــ

سِرّ الهوا الـ بالسمه، منك صرت أفهمه
بالریّه تارس نِفَس، ریحة وِلِد فاطمه
من بیتي خل یبتدي، أوّل نزف للدمه
و بکربلاء النحر، یستکمل الملحمه

إذا منّي النحر
ما گام ینزف
أسجّل بالدهر
بالفزعه موقف
أنا طوعه طوع التریده
۵/ــــــــــــــــــــ

من تطلع إلنه الشمس، باچر تهون النفس
و ایبین اشگد فرق، بین الطُهُر و الرجس
اشسوه ابعربهم علي، یا مسلم و عید أمس
بالکوفه کل الطُرُق، خلها ابجثث تنترس

یِدَورون الهوه
لو لاح طیفك
قریت الـ قُل هو
آیه اعله سیفك
أنا طوعه طوع التریده
٦/ــــــــــــــــــــ

شایل رسالة حذر، یالوضّحت للبشر
منانه جنّة علي، و اهنانه تلهب سَقَر
لو قدّمت منحرك، باچر یجیك الخبر
یالحاربت بالعشگ، حُب الحسین انتصر

یمن گلبك یدگ
بسم أبو الأکبر
إذا تعطش عشگ
یرویك کوثر
أنا طوعه طوع التریده





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11064

📜قصیدة: [ اصحابي ]

🎤أداء الملا قحطان البدیري
🖊الشاعر: حسن مسلم العتابي
📆 ليلة ٦ محرم ١٤٤٣ هـ.
ــــــــــــــــــــــــــــــ

المستهل:

أصحابي ماتحویهم الفکره
علیهم لایگه العشره
خضار اتطشروا بصحرا أصحابي
۱/ــــــــــــــــــــ

ابزمن چان الوفه ممنوع، چانوا للوفه رایه
وادم ماتحب اتعیش، إجوا للموت شرّایه
و حگ ظلع أمي أباوعهم، بدیهم لایگه الرایه
واحدهم یغطي العین، واحد لکن اهوایه

أصحابي صح سبعین بس عنوان
إلي طاحوا انسان انسان
مواقفهم بقت عبره أصحابي
۲/ــــــــــــــــــــ

جمال أرواحهم شفته، گبلهم معتني لملگاي
کعبة عشگ طافوني، ابلبیك المناحر هاي
و من شافوا شمس فوگاي، إجوا اتحزّمولي افیاي
و عطشهم یختلف بي روح، عطاشه لوجهي مو للماي

أصحابي محد یبخل ابروحه
زلم بس زلم مملوحه
من وجهي إرتووا نظره أصحابي
۳/ــــــــــــــــــــ

أشاوس بالحرب کلهم، أنا احتار امن أوصفهم
إذا خزروا الجیش ایمیل، چا غیر آنه قائدهم
مابیهم زغیر اکبار، احسین احسین واحدهم
هدوء و معرفه و اخلاص، الترافه اتحیّر العدهم

أصحابي أنا بیهم یهنیالي
ظهر صاروا عله اخیالي
الحرب عدهم مثل سفره أصحابي
٤/ــــــــــــــــــــ

چنت من أختنگ مرات، أجیهم حتی أتنفس
و أشم ذاك الهوه الیسوه، یطب ریتي و أگولن بس
شسولف عالوفه البیهم، أقل شي کون یتقدس
سور اعله الخیم صاروا، مثل دایر شذر محبس

أصحابي أشم بیهم هوه الجنه
الأبد ماینشبع منّه
بقه ابصدري أثر عطره أصحابي
۵/ــــــــــــــــــــ

ابسماء الطف گمر موجود، من ماي الفرات أترف
أباوع صاروا أصحابي، نجم یضوي ابسماء الطف
هدوء أصحابي وصّفته، فجر بي رتّلت مصحف
إلیٰ من صانوا العشره، الحچي بیهم فلا ینکف

أصحابي وگفوا وگفه قدسیه
نجم و ایضوي لیلیه
الیصد الهم کبر قدره أصحابي





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11096

📜قصیدة: [ مرمي ابخطة الحومه ]

🎤أداء الملا قحطان البدیري
🖊الشاعر المرحوم الشيخ ابراهيم الديراوي
📆 ليالي محرم ١٤٤٢ هـ.
ــــــــــــــــــــــــــــــ

أنا ماشفت الهنا یحسین
عگبك و العمر ما ضاع
و لا مر عله اعیوني النوم
حین النور وجهك غاب
١/ــــــــــــــــــــ

اشلون اتغمض اعیوني
و بالطف عفت جثمانك
مرمي ابخطة الحومه
و یمك هلك و اخوانك
غسلك من دمه نحرك
صُبَح و الذاري أچفانك
یا ریحانة الهادي
امصابك غطّه کل امصاب
٢/ــــــــــــــــــــ

امصابك ماجره یحسین
مثله و لا بعد یجري
السمه و الأرض یبن أمي
بچت لك و الهوه الیسري
مو حگي ابحزن و انیاح
أگضّي لخاطرك عمري
و لو گلبي صخر یحسین
بمصابك تلاشه و ذاب
٣/ــــــــــــــــــــ

إهي فرگه یبوالیمه
و أگولن تخلص الفرگه
و أرد اردود نتلاگه
و أگولن هله ابهالملگه
صدگ ردیت أنا لاچن
زماني اشخلّه و اشبگّه
أشوف الدار ذیچ الدار
لاچن کل هلي غیّاب
٤/ــــــــــــــــــــ

چنت أحچي اویه روحي اشلون
یا روحي امن أشوف احسین
شحچیله شسولفله
و أبدیله الحدیث امنین
أول ما أحب إیده
و أگله اگعد ینور العین
خل من وجهك أشبع شوف
یا ریحة هلي الأطیاب
٥/ــــــــــــــــــــ

و نوب اللي أگل روحي
یروحي من أرد لبن أمي
گبل لا أحچي ابضیمي
و أشرح محنتي و همّي
أحط راسي اعله ذرعانه
و أمزج دمعتي ابدمي
و أگله موش أنا زینب
لیش اتعوفني اویه أجناب
٦/ــــــــــــــــــــ

ما چنّي الربیت اویاك
خویه حسین ماچنّي
حدر أکناف أبونه الحید
بالعز من زغر سنّي
من عندي اشبده یحسین
یبن أمي و تصد عنّي
لو ما کربلا ماچان
راسي امن المصایب شاب
٧/ــــــــــــــــــــ

و نوب أصفن و أگل روحي
یروحي امن أرد للوالي
أخافن ینکسر گلبه
ما أحچي اشجره ابحالي
اشکثر صفنات تاخذني
و چم حسبه التجي ابّالي
و أرد لن ذیچ أنا زینب
الدولبها الدهر دولاب
٨/ــــــــــــــــــــ

و تالي أرجع لأبو الغیره
أخوي اللي کفل ضعني
أگله اگعد یبوفاضل
أرید أحچیلك اسمعني
و حگك ماخطر عالبال
تنساني و تضیعني
ابغُرب و المالها والي
ماتنحشم ماتنهاب
٩/ــــــــــــــــــــ

یروحي إن چان أنا زینب
بنت حیدر هلي چا وین
ذاك الخدر و العز راح
مني و وین أخوي احسین
چا وین الگمر عبّاس
أخوي البي تگر العین
لیس ابیسر خلّاني
و ألبس للهظم جلباب
١٠/ــــــــــــــــــــ

یا عبّاس لو تدري
اشجره ابحالي عگب عینك
انگطع رجواي من عندك
یخویه ابگطع چفینك
اطلعت و أعضاي تتراجف
و أصیحن یالولي وینك
یخو زینب مشت زینب
یسیره امچتفه اویه أجناب





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11105

📜قصیدة: [ عبدالله وينك ]

🎤أداء الملا قحطان البدیري
🖊الشاعر: واثق العيساوي
📆 ليلة ١٠ محرم ١٤٤٣ هـ.
ــــــــــــــــــــــــــــــ

المستهل:

عبدالله وینك بس رد علیه
آیلولد آیلولد آیلولد
۱/ــــــــــــــــــــ

یمه صوتك من اجاني
ما أشوفك متت چن بعدك یغالي
اتناغي لیّه بصوت ضامي
و بعدك اتفززني و أسهرلك لیالي
لو ضحکتك من أشیلك بین إدیه
بالحلم و أبچي اعله حالي
دوریتك مالگیتك
اي مکانك بعده بس یا یمه خالي
آیلولد آیلولد آیلولد
۲/ــــــــــــــــــــ

رد علیه یالعفتني
هذا انت البالمهد لو هذا حلمك
یمه مهدك من أشمه
حلم بي شفتك ییمه و حیل أضمك
هذا ثوبك من أگلبه
ینکسر گلبي امن أشوفن بیه دمك
اشتدري بأمك لو عفتها
تصبر اعله افراگ ابنها اشتدري بأمك
آیلولد آیلولد آیلولد
۳/ــــــــــــــــــــ

یمه سهمك من رگبتك
وخّروا قبل الدفن لو بعده یمه
مو یألمك مو یلچمك
ابني بعده زغیر وخروا لا یلچمه
ما یحمله هو ضامي
یا طفل مثله ارتوه من فیض دمه
بیّه سهمك ظل یغالي
یا گلب أم اعله ابنها اتعوف همه
آیلولد آیلولد آیلولد
٤/ــــــــــــــــــــ

اشظل الیّه یالعفتني
ابهمي أبقه و انت تدري اشظل الیّه
بس دمعتي و هم عبرتي
والله گلب الوالده اشیحمل خطیه
و اعله ابنها یبقه ونها
من یفارگها الولد تلگه المنیّه
فوگ همي من فگدتك
شوفتني الضیم أرض الغاضریه
آیلولد آیلولد آیلولد





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11107

قصيدة: ليش تبچي

📜قصیدة: [ أم الشعائر ]

🎤أداء الملا قحطان البدیري
🖊الشاعر: واثق العيساوي
📆 ليلة ٤ محرم ١٤٤٣ هـ.
ــــــــــــــــــــــــــــــ

المستهل:

أنا أم البنینِ و الشعائر
أنا صوتُ البُکاءِ في المنابِر
ناجیتُ یا ذُخري أنْ یَنقضي عُمري
في خدمةِ الحُسین
۱/ــــــــــــــــــــ

ابأول لحظه ابیت العصمه
من صرت ابذمّة حیــــدر
کلشي ابعمري انطیته هدیه
لأولاد الزهره و أکثر
کلمة أم اهوایه اعلیه
خدّامه و یاریت أزغر
و الیخدم أولاد الزهره
اشما یزغر بیهم یکبر

فَکانَ الدمعُ رَقْراقاً بِعَیني
و قَلبي صارَ مُلکاً للحُسینِ
و شاغلاً فِکري أنْ یَنقضي عُمري
في خدمةِ الحُسین
۲/ــــــــــــــــــــ

ابني احسین و أغله امن ابني
و بس الله ابگلبي الیعلم
الله امشرّفني ابمنزلتي
و بیها اشگد أدعي و أحلم
لو أبچیله و تعمه اعیوني
فدوه اعیوني و ما أندم
آنه انطیته أولادي و گلبي
ما مِهتَم بس بي مِهتَم

بهِ قَد صِرتُ رمزاً للوفاءِ
مِنَ الزَهراءِ في الحَشرِ جَزائي
وَکّلتها أمري أنْ یَنقضي عُمري
في خدمةِ الحُسین
۳/ــــــــــــــــــــ

شفته اگبالي ایجهّز ضعنه
و ظل محبوس ابصدري الصوت
شیصبّر گلبي و گدامي
اولیدي امسافر سفرة موت
گمت أدعي بدمعات اعیوني
و أدري ابدمع الأم مبخوت
کل خطوه الیبعد عن عیني
چن یشلع من گلبي ابتوت

مَضیٰ و القلبُ مکسورٌ علیهِ
و صارَ العمرُ رهناً في یدیهِ
دَعَوتُ یا صَبري أنْ یَنقضي عُمري
في خدمةِ الحُسین
٤/ــــــــــــــــــــ

آني أول تشبیه ابإیدي
سویته و گمت أبني اگبور
و أول مشّایه بدیرتها
لحسین ابدمعتها اتزور
و أنصب مأتم کلنه و نلتم
نبچي اعله اولیدي المنحور
و چنت ألطم حیل اعله امصابه
کلما اتذکّر عاشور

أنا مَن شارکَت أمَّ المصائب
لها مِن دَمعتي تُبنی المواکب
و مَنبَري خدري أنْ یَنقضي عُمري
في خدمةِ الحُسین
۵/ــــــــــــــــــــ

کل خادم مخلص ینخاني
ابکلمة مگضیه أتلگاه
و الیبچي اعله احسین ابدمعه
آني اشلون ابشدّه أنساه
و الیخدمنه ابصافي النیّه
هذا انظل للتالي اویاه
درب الخدمه ایعلّي أصحابه
ماشیته و أعرف معناه

أنا روحٌ تجلّت في المآتم
و لَن أنسی لنا مَن صارَ خادم
في العُسرِ و الیُسرِ أنْ یَنقضي عُمري
في خدمةِ الحُسین






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11110