📜قصیدة: [ سر الحياة ]

🎤أداء الملا قحطان البدیري
🖊الشاعر علي البصيصي
📆 محرم ١٤٤٣ هـ.
ــــــــــــــــــــــــــــــ

مادام النفس بیّه
دمعة عیني ماتنشف

و من تسألني عنواني
خیمة زینب البالطف

سِر هاي الحیاة اثنین
تربة کربلا و الچف

صدرك موطن العشّاگ
چان امن النسیم أترف

ذوّبني الغرام اویاه
أنسی اعیوني ما أنساه

لو هذا العشگ لو لا
تسکت کلها لو سولف

و أسکت من یلوموني
ماهم لو حچه اللایم

بادي بوجهك المتعوب
و ابنار الخیم خاتم

و بس المحترگ بالشوگ
یعرف لوعة الهایم

یم غیرك مُلُك مارید
یمك أرضی لو خادم

شمسوي الغرام اویاي
یا شهگة غصن عالماي

القصاید و المشاعر هاي
و الحب بس الك راهم






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10799

📜قصیدة: [ ورد ذبلان ]

🎤أداء الملا قحطان البدیري
و الشيخ حسين الأكرف
🖊الشاعر وسام الشويلي
📆 محرم ١٤٤٣ هـ.
ــــــــــــــــــــــــــــــ

المستهل:

ورد ذبلان بالصحراء
و نهر مگطوع مایجري
یعني انگول مات الماي
و العطشان مایدري
درب غربه و سبیه
عطش شوگ ابرقیه
نهر مگطوع مایجري
ــــــــــــــــــــ

قصیده اجروح قوافیها
یتیمه ادموع لیالیها

أگول اشجایب الورد ابوسط صحرا
و أثر جمره ابغصنها
حظن بستانها و وین ورد یابس
عتب تارس حظنها
رقیه هذي معقوله فلا ترهم
ضرب ورّم متنها
تدور عن وطن ضایع جمر فرگه
اشوکت تلگه وطنها

بلا صوت حچي الموت حچیها

الترافه اشلون داست شوك
الأثر بالگاع صار أحمر
درب تمشیه جر احبال
اتگوم ابسوط من تعثر

زغیره اعله الأذیه
عطش شوگ ابرقیه
و نهر مگطوع مایجري
ــــــــــــــــــــ

مشت لا وین و لا تدري
تعال اتصیح أیا عمري

عگب حضنك ظهر ناگه یصعدوني
و یشدوني ابحبالي
اذا عنك ردت اسأل
أشو مبعد سیاط اترد سؤالي
أطیح و أبقه بالصحرا علیك أشگ
أصیح الحگ یغالي
حنین و دمعة اعیوني عتب صبت
أنا ابحسرة دلالي

عتب روح و الجروح ولتني

یجي الجمّال بیده السوط
بویه و حیل یضربني
اگله اشبیك لیش اویاي
هسه ایعود الیحبني

و اگلها اشسوه بیه
عطش شوگ ابرقیه
و نهر مگطوع مایجري
ــــــــــــــــــــ

الگبل ترتاح علی چفّه
صفت عالگاع اذا تغفه

خرابه و بیها سجنوها
العزیزه اتون منو الیسکن خرابه
رقیه اتنام مهظومه اویه دمعتها
و وسادتها ترابه
یجیها ابطیف و اتنادي
اجه الغالي اجه الوالي هلا به
شکت و اتگله بغیابك یضربوني
علی اعیوني ییابه

چنت وین ضوه العین أخذته

تفز تلگه طشت بي راس
و المذبوح والدها
نومة موت ويه احسین نامت
و اشیگعدها

خذت کاس المنیه
عطش شوگ ابرقیه
و نهر مگطوع مایجري





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10801

📜قصیدة: [ ابوي اهنا ]

🎤أداء الملا قحطان البدیري
🖊الشاعر علي البصيصي
📆 محرم ١٤٤٣ هـ.
ــــــــــــــــــــــــــــــ

أثر خطوات أبوي اهنا
وجهه اهنا صوته اهنا
أبوي اهنا
ــــــــــــــــــــ

و أثر سجادته و عطره
و سبحته و عِمته الخضره
و رساله انخطت ابیمناه
أبوي اهنا

کتب بیها النهر عنوان
و الحیطان و البیبان
صرخت ما مشیتي اویاه

اهنا آخر عتب و أول وداع ایصیر
مابین أمنیاتي و بین ضعن اجفاه
اهنا أکبر جرح عشته
أبو و ایودع ابنیته
و عم یمشي و تظل بالآه

یاخذ اویاه کل حلم بعیوني ساکن
تستفزني بروحته اعیون الأماکن

حنینه و ماگدرت انساه
أثر خطوات أبوي اهنا
أبوي اهنا





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10804

📜قصیدة: [ مشتاقلك ]

🎤أداء الملا قحطان البدیري
🖊الشاعر علي مخيلف
📆 محرم ١٤٤٣ هـ.
ــــــــــــــــــــــــــــــ

المستهل:

مشتاگلك گد البچي و گد الراح
أتمنی لو عندي اجناح مشتاگلك
اهوایه السوالف یا ضریح البیه
یومیه أموت و أحتیي یومیه
مشتاگلك
ــــــــــــــــــــ

یا لهفتي شوگي یکبر دمعي ینزل
کلي حیره
یا لهفتي گلبي ضامي و جرحي دامي
و روحي أسیره
یا لهفتي صمتي موتي و خنگه صوتي
و حزني دیره
یا لهفتي لزینب أمشي فدوه عمري
للأمیره

أشتاگلك و اللیل یخلص خنگه
دوّر اعیوني السافرت للملگه
غیر المدامع یا ضریح اشتلگه
وي زینب امتعبتني حیل الفرگه

أحتاجك شوگ و مشاعر ملیان
عازة نفس للغرگان أحتاجك
أحلامي کلها ازیارة العلویه
یومیه أموت و أحتیي یومیه
مشتاگلك
ــــــــــــــــــــ

یا حسرتي بگلبي جمره و عیني حمره
امن المدامع
یا حسرتي الدنیا هیمه و حزني غیمه
امن المواجع
یا حسرتي امن المشاعر جرحي شاعر
و آنه ضایع
یا حسرتي للزیاره یبقی دمعي
بخدي طابع

بالدمعه و الیاریت متعذب
التمن علیه و گابلاني المغرب
شلال بالفرگه و جبتها امحدِّب
آنه اللي خلص عمره بسمك یندب

محتاملك گد الهوه و گد الناس
گد الوفه العد عباس محتاملك
من الطفوله و نیتي هاي النیه
یومیه أموت و أحتیي یومیه
مشتاگلك





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10815

📜قصیدة: [ شهر الأحزان ]

🎤أداء الملا قحطان البدیري
🖊الشاعر المرحوم كاظم منظور الكربلائي
📆 ليلة ١ محرم ١٤٤٣ هـ.
ــــــــــــــــــــــــــــــ

المستهل:

شهر الأحزان أحزان
بیّن اهلاله
صاب الحسین ابسهم
صاحت الإنس و جان
بیّن اهلاله
۱/ــــــــــــــــــــ

اهلال لاچن من یهل
یهل دمع العین و تثگل الحسره
عالگضوا بالطف چتل
لانتصار الدین و الحیوا أمره
اهلال بمصاب الطفل
یرجن الکونین و یفجع الزهره

و الرضیع اعله الماي
عینه همّاله بالدهر مالاحظت
اهلال مثله ماشفت
ما یراعی العطشان
بیّن اهلاله
۲/ــــــــــــــــــــ

اهلال بیه الفاجعه
شحنت الدارین و علل مخفیه
و اشکسر عالمشرعه
کسر ظهر احسین من مرامیه
و چم عقیله امودعه
ابگطعة الچفین مشت مسبیه

عیّن اوصاب و صاب اسهام چتاله
اهلال لاچن رَمیِته
ابگلب زینب نابته
فصّل او نبل اوزان
بیّن اهلاله
۳/ــــــــــــــــــــ

هل الهلال و فجع
رمله بجسام و ثگل اهمومه
ابصارم الأزدي انصرع
انشرگ منه الهام و فاضت ادمومه
چم گلب بالطف گطع
من گبل بسهام غدر مسمومه

و چم گلب من ولیاه گطع آماله
آیذبحة کربلا
آیسبي العایله
و الگطع بالولیان
بیّن اهلاله
٤/ــــــــــــــــــــ

هل الهلال و مُرَد
گلب لیلی و آه معلن بنوحه
والده اتشوف الولد
من نزیف ادماه و یجهد ابروحه
راح الأکبر و انذبح
گلب البرجواه تنزف ادمومه

و العطش للمصیوب فطر دلاله
و گلب لیله گطّعه
موت الأکبر وزّعه
شهر صاب النیشان
بیّن اهلاله
۵/ــــــــــــــــــــ

صبر الحسین اشصبر
مو صبر ایمان للگلب جنه
ایشاهد ابطعن و طبر
طاح بالمیدان چم ولد منه
ورع صابر عالأمر
و مصرع الشبان ثگل الونه

و فگد الأکبر وافاه و مادهش حاله
و شهر عاشور اعتده
شمل بالطف شتته
و الهدم چم صیوان
بیّن اهلاله





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10834

📜قصیدة: [ ما دام النفس بيه ]

🎤أداء الملا قحطان البدیري
🖊الشاعر علي مخيلف
📆 ليلة ٢ محرم ١٤٤٣ هـ.
ــــــــــــــــــــــــــــــ

المستهل:

مادام النفس بيه
ماتتغیر النیه
عشتگك عشگ فطري
لگیتك نهر یجري
ماتتغیر النیه
۱/ــــــــــــــــــــ

یالتعرف شکو ابروحي، لگیتك اول اجروحي
عقلي ابلا وعي و لامعرفه ابکیفك ملکته
امعطشني و صرت ضامي، أنام و انت بحلامي
حبك بالگلب و العاطفه و ابراسي شلته
عنك مایمنعوني، مجنونك یسموني
بجنوني افتخر یالمنذبح حبك عرفته

یالمافارگت عیني
طاري اسمك یبچیني
لأنك ضوه ابگبري
لگیتك نهر یجري
ماتتغیر النیه
۲/ــــــــــــــــــــ

سلطان و أمیر الدم، کلما یگرب امحرم
أبچیلك دمع مثل الطفل عالخد حِلاله
و أمي اشگد حزن بیها، تبچیني بنواعیها
علیك ابکل محرم تنطبگ مثل الرساله
بس انت انسأل عنه، نوحك ما أمِل منه
عندي اشگد حلو هذا الحزن ماکو بجماله

أحبك لیش أحب ثاني
أضیع و انت تلگاني
خدمتك روت صبري
لگیتك نهر یجري
ماتتغیر النیه
۳/ــــــــــــــــــــ

مثلك یا بشر شایف، نحرك بالعشگ نازف
انت مو بشر لا بل فرض من الله نازل
موسی و عنده هارونه، و انت العندك اشلونه
یذب اچفوفه اذا صحته یخویه یابوفاضل
من ایسولف احساسه، و ایدخن غضب راسه
سکینه اتگله یا عمي یحلال المشاکل

ذل العلگمي و مایه
و لسه اترفرف الرایه
تگله انجبر کسري
لگیتك نهر یجري
ماتتغیر النیه
٤/ــــــــــــــــــــ

اختك من تمر یمك، و انت امخضب ابدمك
متگطع وذر و انت بطفوفك عثره صایر
جسمك یاهو یدناله، تلعب فوگه خیاله
و زینب لمتك تتعثر ابین الحوافر
صدرك ترسته اسهامك، تکسر خاطر ایتامك
ما سالم کتر منك بقت بس المشاعر

طفوا بالأرض صبحك
واصل للسما جرحك
أموت بخدمتك نذري
لگیتك نهر یجري
ماتتغیر النیه
۵/ــــــــــــــــــــ

حیّرت السما بجرحك، للغیم ارتفع رمحك
یالشاهك عطش فدوه لنحر بالطف تنذره
لا یوم المثل یومك، عاري و سلبوا اهدومك
گطعة خنصرك و المحبس الناقصته شذره
کل هذا و لا مهتم، یالفایض ضوه اویه الدم
گد ما فاضت اجروحك دمه و بالحمد و تقره

گد ما داسك الحافر
احتار اشیکتب الشاعر
اسمعك تون ظهري
لگیتك نهر یجري
ماتتغیر النیه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10837

📜قصیدة: [ مفجوعه الروح ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٩ محرم ١٤٢٩ هـ.
ــــــــــــــــــــــــــــــ

المستهل:

مفجوعه الروح یولیدي اتنوح
۱/ــــــــــــــــــــ

أنوح و صورتك بعیوني مطبوعه
دمع عیني نشف یولیدي ینبوعه
دلیلي ما رِکَد بعدك علی اضلوعه
أهید اشلون و آنه البیك مفجوعه

هیهات أنساك و الروح اویاك
۲/ــــــــــــــــــــ

یالأکبر لحظه لو أهده و یخف نوحي
امن أصدن للشباب ایهیجن اجروحي
خذت ویاك گلبي و مهجتي و روحي
یموح العین بعیوني انطفه موحي

یا موح العین عامیني البین
۳/ــــــــــــــــــــ

عسه چف الزمان انشلت ایمینه
و عسه الصابك تصیب النایبه عینه
أنا ابفگدك شسوي بعمري و اسنینه
و عَلَي قوس الکدر صوّب نیاشینه

قوس الأیام ترمیني اسهام
٤/ــــــــــــــــــــ

صرت لسهام رمیات الدتر مِکوَر
اذا تنساك روحي گلبي یتذکر
و أشد حاله تخلي ادموعي تتفجر
اذا نشدوني وینه ابنچ الأکبر

تسألني الناس أنزف إحساس
۵/ــــــــــــــــــــ

سؤال الناس یشعل جمرة احساسي
و یعزیني الشموخ و صبري الیواسي
لَوَن راید تشوف الثکله شتقاسي
تعال و شوف نارك شیّبت راسي

دلالي شاب مفجوعه بشاب





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10682

📜قصیدة: [ اللهم اشهد ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٩ محرم ١٤٢٩ هـ.
ــــــــــــــــــــــــــــــ

المستهل:

اللهم اشهد علی هؤلاء القوم
هذا شبیهُ المصطفی أحمد
رباهُ یا رباه رباهُ یا رباه
۱/ــــــــــــــــــــ

ودّع أبوالیمه علي و الدمعه تحفر خده
و ناده یا ربي اشهد علی أهل الکفر و الرده
هذا عزیز اللي برز للحومه یا رب وحده
جسم و رسم، خلط و خُلُق یشبه محمد جده

کُنّا إذا اشتقنا إلی وجهِ رسولِ الله
ننظُرُ فیهِ المصطفی الأمجد
هذا شبیهُ المصطفی أحمد
رباهُ یا رباه رباهُ یا رباه
۲/ــــــــــــــــــــ

چنه نشوف المصطفی لمن نصد للأکبر
و ننظر جلاله و هیبته و طلعة نبینا الأطهر
ابعزم و شجاعه و الصبر یا ربي یشبه حیدر
و اثمنطعش عام ابعمر أم الزچیه عَمّر

نَحنُ البُدُورُ في سَما الإسلامِ یا رباه
فینا عليُّ الأکبرُ فَرقَد
هذا شبیهُ المصطفی أحمد
رباهُ یا رباه رباهُ یا رباه
۳/ــــــــــــــــــــ

یا ربي بالحومه علي و اعیوني اله شبّاحه
و انظر جموع أهل الغدر دارت علیه بالساحه
هالجیش ما یرحم علي و لو سل علیه اسلاحه
نفقد یا ربي المصطفی روح النبي الوضّاحه

انصُرهُ یا رباه و اجعَل هولاء القوم
اعجازُ نخلٍ جمرَهم یَرتَد
هذا شبیهُ المصطفی أحمد
رباهُ یا رباه رباهُ یا رباه
٤/ــــــــــــــــــــ

یا ربي تسمع دعوتي و ابني رجع من حربه
لاچن دلیله امن العطش جمرة ضمه ملتهبه
مني یرید الماي أنا مثله أحن لشربه
و گلبي یا ربي من العطش یسعر و أحر من گلبه

قَلبي بهُ مفجوعُ إنّي مثلهُ ضَمآن
نَارَینِ دونَ الماءِ لا تَبرَد
هذا شبیهُ المصطفی أحمد
رباهُ یا رباه رباهُ یا رباه
۵/ــــــــــــــــــــ

ناداني بویه امن العطش ماتنطفي نیراني
ارویني و أرجع للحرب و أهجم علی عدواني
گتله یالأكبر هیجت نار و جمر وجداني
خلي لسانك یا علي یولیدي فوگ الساني

إنَّ لساني یابِسٌ کالصَخرةِ الصَمّاء
یسقیكَ من حوضِ الهَنا تَبرَد
هذا شبیهُ المصطفی أحمد
رباهُ یا رباه رباهُ یا رباه
٦/ــــــــــــــــــــ

ودّعته للحومه و رجع لاچن کسیر الخاطر
و رغم العطش خلّه العده کافر یلوذ بکافر
و بَدّد جمعهم و الأجل ینظر اولیدي و ناطر
و لاح الأجل من صوّبه ابسیفه الرذیل الغادر

أردیٰ علیّاً سیفَ ذاكَ الغادرُ السفّاك
لإبني بسیفُ الغدرِ قد مَدّد
هذا شبیهُ المصطفی أحمد
رباهُ یا رباه رباهُ یا رباه
۷/ــــــــــــــــــــ

یا ربي اشهد عالعده الخلوني بالطف وحدي
و اگطع رحمهم للذي گطعوا علي من چبدي
صابوني بأعظم فاجعه و أعظم فجیعه العندي
بذبحة شبیه المصطفی مرتین ذبحوا جدي

اللهم اشهد علی هؤلاء القوم
هذا شبیهُ المصطفی أحمد
رباهُ یا رباه رباهُ یا رباه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10682

📜قصیدة: [ من تگلي ليش تبچي ]

🎤أداء الملا قحطان البدیري
🖊الشاعر ميرزا عادل أشكناني
📆 ليلة ٢ محرم ١٤٤٣ هـ.
ــــــــــــــــــــــــــــــ

المستهل:

من تگلي لیش تبچي
کون اگلك لیش أعیش
دمعتي یعني حیاتي
و الحیاة مابیها لیش
عایش اعله النایحه
و الأمور الوضحه
مابیها لیش
۱/ــــــــــــــــــــ

یالّذي تسألني و اترید الجواب
لا تَسَل عَن المُحال
من تگلي لیش تتنفس شگول
هوَ هذا هم سؤال؟

طَبُع دلّه ایفور گلبي و أنطفي ابلایه جمر
و اعله نیران المخیم خدرن اسنین العمر
و من تکول اگطع ونینك هالأمر نفس الأمر
أمر أقرب للخیال

محد ایگل للشمس یا شمس بطلي امن الضوه
و البشر محد یگله لیش تحتاج الهوه
ماکو داعي نشرحه
و الأمور الوضحه
مابیها لیش
۲/ــــــــــــــــــــ

الدنیا درب اطویل و آنه ابهالمسیر
ضیّعیت المشیتین
لاني أدري امنین جاي و هسه وین
و مدري تالیها لَوین

لو شفت غرگان راید یمد چفه للحبل
هم تلومه عله فعله لو تنشده اشهالفعل
هوه هچ آنه اغرگت و انشدت عن حبل الوصل
و الحبل دمعي لحسین

احسین حبل الله المتین و دمعتي اعلیه الأمان
و الـ علیه نشفن ادموعه هذا میت من زمان
اعلیه اقره الفاتحه
و الأمور الوضحه
مابیها لیش
۳/ــــــــــــــــــــ

صِبغة الله و فطرته للکائنات
تختلف حسب المقام
و البشر مایوصل لحد الکمال
لو طلع عن هالنظام

هذا قانون الخلیقه ابکل زمان و ما اختلف
لاچن المغشوش دَرّه عن طریق الله انحرف
و المجد و الرفعه و العز و الکرامه و الشرف
حین تبچي اعله الإمام

اچبیره أفضال الحسین اشلون أشکر نعمته؟
غیر کون امن البواچي احترگ وي خیمته
البچي ربك مادحه
و الأمور الوضحه
مابیها لیش
٤/ــــــــــــــــــــ

اي نعم دنگت راسي بالدموع
علی امصاب ابن البتول
الماي لو مایجري من روس الجبال
ماکو قیمه للسیول

کل کیاني ابهالوجود و اعتباري و قیمتي
حین أنوح اعله الحسین و لیه تجري دمعتي
یا جزع یکفي المصیبه و آنه صاحب طینتي
داست اعلیه الخیول

آنه مثل اللي وسط خاصرته مغروسه الرماح
و من یلوم المنطعن لو لاج و ابآهاته صاح
الطف دلیلي جارحه
و الأمور الوضحه
مابیها لیش
۵/ــــــــــــــــــــ

یالّذي تسئل عن أسباب البکاء
بالعکس لازم یکون
آنه اسئلك لیش مانبچي علیه
المفترض تعمه العیون

لا مَدر عاشر محرم یرفعونه و لا حجر
إلّا حدره دم یفور اتگول ینبوع انفجر
الحجر یملك گلب ألیَن من اهواي امن البشر
لَوَن کنتم تعقلون

خل یراجع نفسه کلمن ما یواسي فاطمه
الما بچه مغبون بخته، الدمعه رزق امن السمه
ماکو داعي انصارحه
و الأمور الوضحه
مابیها لیش





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10859

📜قصیدة: [ ماعفتني ]

🎤أداء الملا قحطان البدیري
🖊الشاعر سيد معتز الحسيني
📆 استقبال محرم ١٤٤٣ هـ.
ــــــــــــــــــــــــــــــ

المستهل:

ماعفتني عدل میت
انت متفضل علیّه
دللتني امن المجالس
للگبر یبن الزچیه
۱/ــــــــــــــــــــ

من گلبي أرید اویاك أسولف یا بعد گلبي
و آنه بخدمتك یحسین بدیت و خلّصت عمري
نزلت لحفرتي مرتاح تجیني بوحشتي أدري
یضغطني الگبر معقول و أثر لطماتك بصدري

خلّصتني و بلقائك عندي یا محله المنیه
دللتني امن المجالس
للگبر یبن الزچیه
۲/ــــــــــــــــــــ

عشت عمري عطش و الماي من کل گلبي زاعلته
و طلعت روحي بس عاشور حتی بموتي ماعفته
اجیت لگبري خایف حیل و سبب کل خوفتي انت
خفت لا ألتقي ویاك جسد و الخیل ساحگته

خوّفتني خاف نحرك منگطع تحضر الیه
دللتني امن المجالس
للگبر یبن الزچیه
۳/ــــــــــــــــــــ

بگبري و للربع حنیت و اجت ابالي چم ذکره
مثل هذا الوکت کل عام چنه المجلس انحضره
الگبرمثل العمر یحسین و شفت الحلوه و المره
الما عنده علاقه اویاك الله ایساعده ابگبره

اتکفلتني من لگیت ادموعي باچیها لرقیه
دللتني امن المجالس
للگبر یبن الزچیه
٤/ــــــــــــــــــــ

محرم بالگبر موجود و تعیشه ادموعي یومیه
حمزه یجمع الأموات و یقره النه لطمیه
و اذا عد ربعي مجلس چان أحضره بلطمه مخفیه
بمکاني الخالي صوره انشاف و یحچون الربع بیه

خلدتني ألف شکراً یا غریب الغاضریه
دللتني امن المجالس
للگبر یبن الزچیه
۵/ــــــــــــــــــــ

بس خدامك امن اتموت أبد ماتنحسب موته
و یقره مجلس الأموات سید جاسم ابصوته
هنیاله القروله الناس لطمیه اعله تابوته
و اللي ما مشه ویاك فزعتك باچر اتفوته

طمنتني لمّن ایدك لزمت بدفني ادیّه
دللتني امن المجالس
للگبر یبن الزچیه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10862

📜قصیدة: [ دمع الحيارى ]

🎤أداء الملا قحطان البدیري
🖊الشاعر مهدي بارون
📆 ليلة ٣ محرم ١٤٤٣ هـ.
ــــــــــــــــــــــــــــــ

المستهل:

بعین الیسافر تکفي الإشاره
یکسر خواطر دمع الحیاری
نتوادع ابنظرات و اتسولف الدمعات
بالسکته صوت آهات دمع الحیاری
۱/ــــــــــــــــــــ

ودّعوني، ألّموني، شبیدي حیله
ابکل کتر أسمع وداعاً یالعلیله
تمشي دمعه، ابلایه رجعه، مستحیله
اهنانه تبدي و تنتهي الرحله الطویله

أسکت و ألتهي بحسرة بچاهم
و زادت علّتي بفرگه جفاهم
و اجروحي تگلي امشي وراهم
الموقف أکبر مني جدمي اشلون أشیله

إحساسي شسمه گالولي غربه
الما شاله جدمه یمشي اعله گلبه
و الوحده ظل بالدار شیسوي بالتذکار
ماظن یطفي النار دمع الحیاری
۲/ــــــــــــــــــــ

العاش یمي، و یشهگ اسمي، و ایدي بیده
سافَر و هالکلمه یم إذني جدیده
والله أسمع، کلمة ارجع، بس بعیده
بویه لا نمشي و نخلیها وحیده

أسمع کل گلب نبضاته حیره
و الكل بالحزن یسئل ضمیره
صدگ ویاها هاللحظه الأخیره
و الگلب یتمنه بس وین الیریده

حسبالي تالي بالطیف أشمّه
الیسهر لیالي ضایعله حلمه
من وحشة الغیّاب عشت العمر عالباب
شیرجع الأحباب دمع الحیاری
۳/ــــــــــــــــــــ

اشلون اگدر، أنسی منظر، ظال بیّه
و أشعر اسنین العمر تبخل علیّه
شفته یبچي، و راد یحچي، و شلت ادیّه
چي شفت عبدالله مد ایده إلیّه

أشوف ابّین ادینه اتطیح عبره
و أشوف أیامه کلها اتلمها نظره
بعده ازغیر بس ابعینه عِشره
العمره ست أشهر مایعرف منیّه

شو هیّه ساعه و ظل خالي دربي
دمعة وداعه کسرتلي گلبي
و البعده بالکاروك یسمع ألف مبروك
بس للحزن مملوك دمع الحیاری
٤/ــــــــــــــــــــ

ادموعي نزلن، و راح اظلّن، ابکل سنیني
ابلایه ما امسح و لا دمعه اعله عیني
راح أدوّر، جربه و أصبر، و ابونیني
یمکن العباس ینظرها و یجیني

الگمر لو غاب تبچیله اللیالي
و صارت دمعة اسکینه اعله بالي
أرسمله نهر و ایردلي تالي
الله یحفظله چفوفه الشایلیني

أحنیله ضلعي چي أدري وفّه
یومیه أدعي اسم الله اعله چفّه
عالراح و ماظن جاي عاش الحزن ویاي
بالجربه صار الماي دمع الحیاری
۵/ــــــــــــــــــــ

عني یرحل، و لسه یسئل، گلبي عنه
استمع ویه الهوه امن احسین ونه
خاف گلبي، و أدعي ربي، ایخیب ظنه
یبني عالدنیا العفه أسمعها منه

لا یا دهري لاتجرح حنینه
لتگلي علی الأکبر ونینه
الطایح عمره ماتنلم سنینه
و اللي یفگد ابنه عالموت ایتدنه

شکتب علیها سیرة حیاتي
و الباقي بیها بس ذکریاتي
و العایش اعله الآه بس ذکریاته اویاه
لتظن أبد واساه دمع الحیاری





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10883

📜قصیدة: [ نعش عيني ]

🎤أداء الملا قحطان البدیري
🖊الشاعر كرار حسين الكربلائي
📆 محرم ١٤٤٣ هـ.
ــــــــــــــــــــــــــــــ

المستهل:

یالشایل نعش عیني
هذا اولیدي تانیني
من ودّعني ما گال
یمه الولد یمه
حیّرني الوکت حیره
ماعندي ولد غیره
افراگ الغالي چتّال
یمه الولد یمه
۱/ــــــــــــــــــــ

تعب أیام العمر، لشیبتي ردته ذخر
أحسبله ساعات، تالي الولد مات
سوه سولفنه أمس، علی الحنّه و عالعرس
ما حاسبه احساب، ینزف للتراب

توه ابني بعیوني حله بسنینه الثلثطعش
مذبوح اجاني لخیمتي و متن الحسین النعش

صحت و أعثر ابهمي
جیبولي الولد یمي
و اگبالي انحنه حسین
عمه و بچه عمه
جمرة گلبي تحرگني
و گتله یالمفارگني
افراگ الغالي چتّال
یمه الولد یمه
۲/ــــــــــــــــــــ

شابگه اولیدي و صحت، وین یا شیبي رحت
گوم احچي ویّاي، ماظل بعد راي
صدگ لو هذا حلم، ابحظني مذبوح النجم
لجروحه الهواي، اعمن یعیناي

یا شوف عیني امن الدمه وجهك ولا ینعرف
مو راح أموت امروتك حاچیني لو بس حرف

معقوله یروح أمك
ماتگعدلي أشتمك
بعدك یبني دنیاي
ظلمه صفت ظلمه
یالتدري اشکثر غالي
تدري شنهو چتّالي
افراگ الغالي چتّال
یمه الولد یمه
۳/ــــــــــــــــــــ

غالیه اجروحك عَلَي، و الطمت وجهي بِدَي
ودّعت الأفراح، راح الولد راح
لیش خلّاني الوکت، ابطرگ دمعاتي و صحت
تچّایتي و طاح، چا یمته أرتاح

ردتك متن فوگه أنتچي لو أخذ حیلي الکُبُر
و اتسیّر اعلیّه ردت کل مغربیه و تمر

تالیها رحت عني
و خلیت الظهر محني
و گلبي بغیبتك شال
همّه اشکبر همّه
بدمعي صبّرت روحي
و أسمع صیحت اجروحي
افراگ الغالي چتّال
یمه الولد یمه
٤/ــــــــــــــــــــ

اشظل بعد غیر الحزن، گوم بعیوني اندفن
هالوجه یا نور، مو مالت اگبور
حیل البجسمي رگد، دهري ما أدري بعد
بفکاره شتدور، من بعد عاشور

گتله خذت مني الولد یا دهري بعد اشتبي
گلي یرمله اتهیأي امتانیچ درب السبي

أمك یصعب اعلیها
بهزله الشمر یسبیها
و راسك فوگ الرماح
دمه ضوه دمه
یا ضي عیني التبدّه
موتي و عیشتي وحده
افراگ الغالي چتّال
یمه الولد یمه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10949