📜قصیدة: [ وحدك قاتلتهم ]

🎤أداء الملا قحطان البدیري
🖊الشاعر محمد البطحاوي
📆 ليلة ٥ محرم ١٤٤٢ هـ.
——————————
المستهل:

یمسلم ماهبتهم
وحدك قاتلتهم
طیّحت السلاطین
اسلاحك حب الحسین
وحدك قاتلتهم
ــــــــــــــــــــ

الیمثل احسین مایهتم لو کل الخلگ ضدّه
انت اشما تطیح اتعیش بس الماي یتبدّه
الیردد بسم أبوالسجاد أبد مایشعر ابوحده
گلت الشِدّه موش الموت افراگ حسین اهو الشِدّه

گلت أعظم افاده
لحسین القیاده
و شلت چلماته بالعین
اسلاحك حب الحسین
وحدك قاتلتهم
ــــــــــــــــــــ

چنت اهواي من طبیت چن هاشم لفت کلها
الأمانه اللي یدزها حسین هنیاله الیوصلها
چنها سیف أبوالحسنین الرساله الچنت شایلها
گلت حسین کلّفنی و اهتزّت عساچرها

سفیر آنه لسماکم
وراي الخیر اجاکم
گلت للکوفه تدرین
اسلاحك حب الحسین
وحدك قاتلتهم
ــــــــــــــــــــ

گلت کلمن یحب حسین و ماعرفوا حچي العشاگ
الیحبه اتگول لو ذره حتی لهله مایشتاگ
اعله حبه لو تموت اهواي من عندك فلا ینباگ
مسلم چي تحب حسین سبب موتك نسجله افراگ

حسین ابکل حیاته
مثل صومه و صلاته
جمعت الدنیا و الدین
اسلاحك حب الحسین
وحدك قاتلتهم
ــــــــــــــــــــ

الیحط ایده علیه حسین لو وحده فلا یحتار
یبیض وجه المودّیه و بالکوفه یظل تذکار
مو گد الحرب ذوله و العرکه ترید اکبار
هُمَّ اولاد المفرعات و انت خَلفت الکرّار

اشما کثرت یردها
یعرفه حسین گدها
جسمت الکوفه نصین
اسلاحك حب الحسین
وحدك قاتلتهم
ــــــــــــــــــــ

یالکلك وفه و غیره حتی ابموتتك تخدم
گلت الماي ماشُربه گبل حسین أنا مسلم
صحت یحسین تسمعني لأهل الکوفه لاتقدم
گبل لحظات من موتك ذکرت حسین و اتسلم

وصل یدري سلامه
مسح روس الیتامه
الذبحوك چا وین
اسلاحك حب الحسین
وحدك قاتلتهم






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ جيشك حاضر ]

🎤أداء الملا قحطان البدیري
🖊الشاعر واثق العيساوي
📆 ليلة ٦ محرم ١٤٤٢ هـ.
——————————
المستهل:

وحدک تامر .. جیشك حاضر
أمرك عالراس و عالعین
سیف و رایه .. اي وفّایه
تعرفنه انصارك یحسین
ــــــــــــــــــــ

من سمعنا بگلب زینب خایف و دمعتها نار
صوت قائدنا حبیب ایفزّع و بعیونه ثار
امزاحم الرایات صار اباب خیمتها قرار
و احنه أهل نخوه و حمیّه و تدري دم الشیعي حار

یا بت حیدر یاهو الیگدر
یوصل یم باب الخیمه
منحر منحر مانتعذّر
دم نصبغ لون الهیمه
ــــــــــــــــــــ

اویاك جیّة موت اجینه و المهم عدنه رضاك
انرید گدامك نموت اشعدنه باقین ابوراك
هذا جون و هذا عابس تدري مجنون ابهواك
و أعلی مرتبة الغرام اتضحّي للتهوه ابدماك

یبن الزهرا و انت الأدره
امجرّبنه و تدري البینه
کعبه انطوفك لا منعوفك
و احنه البیك انجنینه
ــــــــــــــــــــ

یمته یطلع صبح باچر موعد العاشر یحین
نذر نتطشر اگبالك سامعین و طائعین
المیسره بیها حبیب و ابن قین اعله الیمین
الیختم اویه احسین عمره اتخلّد احروفه السنین

یتعنه الحر یمك ینصر
هالثوره ابکل مابیها
و اتعلمنا المُذنِب مِنا
اذنوبه بحبك یمحیها
ــــــــــــــــــــ

الدنیا هیه اشبیها غیرك حتی تستاهل حیاة
ایعیش الیموت اعله حبك و الیعیش ابغیره مات
الله خالقنه اعله مودك منك اورثنا الصفات
یا إمامه و یا عقیده و یا ضمیر و یا صلاة

انت الثوره مو بس فطره
و عاهدناك احنه امن الذر
سیف انصارك یطلب ثارك
و اینادي ابـ حیـــدر حیــــدر
ــــــــــــــــــــ

شرف من الباري النه اویاك یحسین الختام
امن الشهد موتتنه احله و دونك انصد السهام
انت ضامي و احنه نروه الماي من بعدك حرام
یا نهر من جنة الله و رحمة الله اعله الأنام

کلنه انعاهد واحد واحد
گدامك نرخص دمنه
لا و اعیونك حیره بدونك
غیرك مولاي اشعدنه






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ هيبه و خيال ]

🎤أداء الملا قحطان البدیري
🎤 الملا علي مهدي
🖊الشاعر عمار هليل الواسطي
📆 محرم ١٤٤٢ هـ.
——————————

عبّـــاس هیبه و خیّال
عبّـــاس صگّار ارجال
عبّـــاس عبّـــاس

رجفت اگباله الزلم کزبرت گاع الحومه
صار یوم الملحمه و عبّـــاس هاي اعلومه
الله راد لکربلا غیره و عزم من یومه

بیوم زینب حشّمت عقدت علیه آمالها
گلها عونچ غیرتي هالیوم شوفي أفعالها
دخلت انذار الحرب لمّن دخل خیّالها
و الزلم تنشد زلم ترجف اگباله اشمالها

عبّـــاس ما یسمع صوت
عبّـــاس مندوب الموت
من صاح خطّاف أرواح .. زمجر بالزلم
و الطاح من عدهم طاح .. و الراح منهزم
ــــــــــــــــــــ

عبّـــاس حید المیدان
عبّـــاس وین الفرسان
عبّـــاس عبّـــاس

رفرف بچفه العَلَم وین الزلم ناداهم
سعف بالریح أخو زینب هالشکل خلاهم
للي یسأل عالشجاعه یاخذ المعلومه

ماجت الگاع بزلمها رهبه خطفت لونهم
خزرت الکافل کفایه خیّبتها اظنونهم
و النهار أظلم علیهم من دخل طاعونهم
وینکم صاح ابوفاضل الله یعلم وینهم

عبّـــاس یوم الطف طاب
عبّـــاس لو داحي الباب
عنوان خط العنوان .. ردد مایلي
آنه اربات المیدان .. و الضیغم علي
ــــــــــــــــــــ

عبّـــاس و العاشر صار
عبّـــاس دخّلها انذار
عبّـــاس عبّـــاس

ماتهم کثرة عددهم ویّه شمرة حیدر
اتخوصر و عاین علیهم رجّفاهه العسکر
لیث یزئر چنه حیدر من یصد اهجومه

حسین باوع للگمر گله الشداید عیدك
کربلائك یابوفاضل یا عضیدي اتریدك
شگ صفوف اعداه بصوله و گله هیچي ایفیدك
اتبسّم حسین لأخیّه و گله عاشت ایدك

عبّـــاس گرّه لکل عین
عبّـــاس و ابگلبه حسین
زلزال بالطف زلزال .. ویله الما رضه
چتّال موت و چتّال .. چنه المرتضی
ــــــــــــــــــــ

عبّـــاس صاح لأم عون
عبّـــاس شوف اشیردون
عبّـــاس عبّـــاس

صار مرجع للشجاعه و للوفه بأفعاله
أخو زینب یوم ضهضب شردت الخیّاله
هو طوفان الحرب و الیوم یاهو ایلومه

هیچي هیبة حیدره و الموت یشبه سیفه
کل قوانین المعارك کلها تمشي بکیفه
شي طبیعي و هوه ابن من؟ للطلب توصیفه
و العدو لو عینه تغمض هم یرهبه ابطیفه

عبّـــاس شتوصفه احروف
عبّـــاس نعم الموصوف
طوفان چنه الطوفان .. فرعونهم غرگ
ظنه یرد ضي عدنان .. لکن مالحگ
ــــــــــــــــــــ

عبّـــاس هذا الوفّاي
عبّـــاس یا طف یا ماي
عبّـــاس عبّـــاس

منطي کلمه و داگ صدره للعقیه ایوافي
حتی لو ینطي حیاته ایگلها لا مو کافي
صورة الوالي علي بکل هیئته مرسومه

عاهد ابکل غیرته وفّه العهد للحره
کافل و گد کلمته للکلمه ینذر عمره
جیش صار لوحده بالمیمنه و بالیسره
لا عجب محد دره ابـ عبّـــاس چان اشکبره

عبّـــاس حط بالعینین
عبّـــاس زینب و حسین
نوماس غیره و نوماس .. مضرب للمثل
بالطف هذا العبّـــاس .. لن عنه سأل
ــــــــــــــــــــ

عبّـــاس تشهدله اعداه
عبّـــاس محد لاواه
عبّـــاس عبّـــاس

یسکت التاریخ حتماً لو حچه اربات الأمیر
وین مهربها الأعادي لو نوه اعلیهم یغیر
غیرة الله غیرته سبحانه صاغ اعلومه

شنهو صیت المشرعه و العلگمي و کل مایه
لو ما ابوفاضل بجرفه رکز ساري الرایه
شویه کلش یا فرات اتصیر هاي الغایه
شویه لن بحر الوفه ابـ عبّـــاس حیل اهوایه

عبّـــاس هالصیت انطاك
عبّـــاس هو الروّاك
معلوم هذا المعلوم .. عبّـــاس و النعم
صارت شبه النسوان .. گدامه الزلم






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: ] لا تبجون [

🎤أداء الملا قحطان البدیري
🖋الشاعر: المیرزا عادل أشکناني
ⓣ: @adel_ashkanani
🏴لیلة ۱۰ محرم الحرام ۱٤۳۹ هـ.
--------------------
المستهل:

لا تبچون توّه ارتاح او سدّ اعیونه
لا تبچون لا یسمعكم و اتگعدونه
لا یِعْله صوت الونّه
و ابنومه خل یتهنَّه
لا تبچون لا تبچون
●●●●●●●●●●
۱/
امْن التَّعَب نام إبني فوگ إمتوني حگّه
ترِف بین إیدي و أذیّه مِن أشُبْگه
یکسر الخاطر وجِه عبداللّه شُوفوه
ساد عینه او مبتِسِم و إشْفافه زرگه

یا محلاه بحضان أمَّه السّد إعیونه
یا محلاه حتّی او هُوَّ امغیَّر لونه
غصْن امن الورد چنَّه
و ابنومه خل یتهنَّه
لا تبچون لا تبچون
●●●●●●●●●●
۲/
ناري ما تطفی و لا الأحاه تُبرَد
اشکُبره گبر البیه راح إبني ایْتِوَسّد؟!
شیبي أبیض مثل لون اگماطه من راح
او دمعي أحمر مثل لون اگماطه من رَد

أصرخ آه الرایح من عندي شیْرِدّه؟
أصرخ آه ماي او من بین إیدي یتبدّه
عبداللّه طیر الجنّه
و ابنومه خل یتهنَّه
لا تبچون لا تبچون
●●●●●●●●●●
۳/
بعد کافي اعیونکم تتفایض إسیول
إعْزیز إبني او عند أبوه احسین مدلول
خاف یالنسوان تاذونه بِلِوْنین
إبدال لا تبچون إقروله الـ دِللّول

اوْلیدي نام نوحوا لاچن نوحوا ابسکته
اوْلیدي نام شوفوا مرتاح ابحضن إخته
بالصیحه لتْگعدنَّه
و ابنومه خل یتهنَّه
لا تبچون لا تبچون
●●●●●●●●●●
٤/
ابصوتي المبحوح لوْلیدي أناغیه
ابنام یا یُمّه الولد مهده أهز بیه
حرمله امفصِّل علیه النبله تفصال
إگلادته سهم المثلّث لایگه إعلیه

سهم البین ما خلّالي ابعیني دمعه
سهم البین من نحر اوْلیدي شیْشِلعه؟
سکته اوْلیدي نوحنّه
و ابنومه خل یتهنَّه
لا تبچون لا تبچون
●●●●●●●●●●
۵/
خِنگوا ونّتکم او لِزموا کل الأصوات
نام عبداللّه تره عبداللّه ما مات
حتّی لو مِن رُگبته دم نحره مسفوح
لا تظنّون الولد مذبوح هیهات

مو مذبوح او لا نِشْفت عالماي اریاگه
مو مذبوح آنه المذبوحه بفراگه



• الّلهُـمَ صَل عَلَی مُحَمّد و آل مُحَمّد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ نوم العوافي ]

🎤أداء الملا قحطان البدیري
🖊الشاعر مصطفى العيساوي
📆 ليلة ٢٦ محرم الحرام ١٤٣٩ هـ.
——————————
المستهل:

إنزل ییمه ابحضني و ارتاح
راسك زغیر و خشنه الرماح
کل ظنّي نایم یالولد
هزّیت رمحك مو مهد
نوم العوافي نوم العوافي
ــــــــــــــــــــ

نام اعله رمحك و آنه أناغیك
و امتانیه اتفز حتی أحاچیك
محله الولد لو غفت عینه
شفتك عطشت ابحضن الحسین
ضمیتلك عین و دمعتین
و امتانیه الجربه تجینه

غطیت کاروکك یمدلول
و هزّیت چفّي ابلا دللول
و انت أدره بیّه اشگد حنینه
تعبان لو مجبور عالنوم
عطشان لو مطلوب للصوم
چا شنهو ذنبك مادرینه

ذنبك چنت للماي عطشان
لو چان ذنبك أترف انسان
یالعمرك أزغر من رمح
ست أشهر و شفت الذبح
نوم العوافي نوم العوافي
ــــــــــــــــــــ

طبعك ترف یالنحرك ازغیر
وي دور رمحك راسك ایدیر
و روحي اعله رمحك گامت اتطوف
لو بیدي اوصّي الشایل الراس
خافن یلچمك و انت حسّاس
تنزف ترافه و أمك اتشوف

ما وصل صوتي الکله دخّان
حرگ الخیم یم السهم هان
عمله العملها ابگاع الطفوف
ظمّیت کلشي ایسولف اویاه
و سکتت روحي و حچت فرگاه
و نزلت دمعتي ابّین الچفوف

تدري الیفارگ غالي یحتار
حیرة نبي ابراهیم بالنار
عبدالله فك ریجه ابسهم
محتاره أسولف یا ألم
نوم العوافي نوم العوافي
ــــــــــــــــــــ

یا رمح کونك تعلم الغیب
هذا الولد تچایة الشیب
ما چنت أظن ابوکتي یندار
جُمّار گلبي و الگلب شاط
تعبت امتوني ابلف الگماط
یالماکو مثلك بین الزغار

اسم الله ییمه ایلچمك الماي
یا ضوه الچان ابهاي و ابهاي
الشمس چانت منك اتغار
محتاره أسولف یمك اشلون
و احنه حچینه ابّین العیون
یالغمّضتهن بیمن أحتار

یا شوف عیني الچان لبعید
یالچنت أشوفك جیّت العید
یا جرح بینه الینسمع
یولیدي أحاچیك ابدمع
نوم العوافي نوم العوافي
ــــــــــــــــــــ

ماشین یمه بدرب الأجناب
و تبره لضعنه روس الأحباب
فوگ العوالي الچانوا اویاي
اعثر ابگاع الکلهم عیون
و السوط سولف فوگ المتون
و لخاطرك خلیت ممشاي

من الدمع بللت الاردان
خافن تفز و اتگول عطشان
اعصر عیوني و اشرب الماي
یالماعرفت الرمح شیرید
یمه الگبالك موش اجاوید
چتفوا ادینه المالهم راي

بحبالهم تالیها ماشین
و آنه اعله رمحك سولفت عین
و احتار بیك اشما گلت
جاوبني یم رمحك صحت
نوم العوافي نوم العوافي
ــــــــــــــــــــ

یمه الفکر و الجدم متعوب
خلنه انتوادع گبل الغروب
افتح اعیونك مو حلو النوم
خاف ابتعد و ایچلچل اللیل
و التهي بدمع اعیوني الیسیل
و احتار بین الدمع و الگوم

کون الهوه ینشره للمات
چا بعت عمري و جبت نسمات
و لاعوف نحرك هچ ملچوم
مابین سهمك و النحر سوط
کون انتبادل و آخذ الموت
و لا تبتعد عن أمك ابیوم

آخر احچایه چانت بنوح
ودعتك الله اویه الرمح روح
یمه الولد من یبتعد
أمه لدمعها تستعد
نوم العوافي نوم العوافي





• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ ظهر الحسين ]

🎤أداء الملا قحطان البدیري
🖊الشاعر كرار حسين الكربلائي
📆 ليلة ٧ محرم ١٤٤٢ هـ.
——————————
المستهل:

کسرنه ظَهر الحسین
چبیره احچایة الناس
عساها ابذمّة الماي
أخذ من عندي عبّــاس
بعد یا عین التنام
تبدّه افیاي الخیام
بعد ماعندي خوّان
ــــــــــــــــــــــــ

أگوم و طولي یوگع
أودعه بخطوه و أرجع
یهلبت بي نفس و ایگوم ویّاي
چبیر الغیره طایح
أخوي المني رایح
انطبع چفي اعله خاصرتي یدنیاي

صحت یحزام ظهري البیك اشد حیلي
انحنیت اگبالهم منهو الیتچیلي
دسولفلي یبعد حسین و احچیلي
اهد ابیا ضوه لمّن یچل لیلي

گلتله اشیوجعك گال
اشیوصلك یم خیمنه
اخاف اتموت یحسین
وراك اتظل حرمنه
الوکت ما أعرف اشضام
تبدّه افیاي الخیام
بعد ماعندي خوّان
ــــــــــــــــــــــــ

الطاحن موش چفین
هذني اعیوني الثنین
و عثرت بدرب کله اعیون شمات
اعله وجهي طحت مرتین
گمت ماچني الحسین
تره الرایحله أخو یگضیها طیحات

ضواي اعله النهر ماحسّبت یطفه
الاخو مطروح و آنه بعازة الوگفه
أمد چفي اله شو مایمد چفه
ادیه اترد خلیه اگبالهم کلفه

شبگته و چان عبّــاس
یضم بشیبي الدموع
تبدّت عِشرة اسنین
و حنیت اعلیها الضلوع
و لا شالتني الاجدام
تبدّه افیاي الخیام
بعد ماعندي خوّان
ــــــــــــــــــــــــ

سهم بالعین شفته
صحت آخ و لچمته
متت و اتنفّس افراگه لگوني
بچیت لغربتي جروح
و قریت بصوت مبحوح
عله العبّــاس اعمن یا عیوني

شني ظلتهن و شیشوفن بدونك
الاخو لو راح حیره من یسألونك
تکسر ظهري صارت کلمة اشلونك
الدمع بعیوني و انت السهم بعیونك

شگولن للحنینات
عفت عبّاسهن وین
ترد ویّاي لو لا
یبعد عیون الحسین
ضوه ما بین السهام
تبدّه افیاي الخیام
بعد ماعندي خوّان
ــــــــــــــــــــــــ

أخذ کل حیلي یا ناس
عمود الطاح بالراس
طیّح عَمَد خیمتنه الچبیره
لگیت آثار الزنود
مطبوعات عالجود
صحت ویلاه یا بدر العشیره

رجعت ابلا اخو و الخیم سألني
یبعد العافیه لیش الظهر محني
صحت و آنه الدمع یاخذني و ایردني
یخیمات النهر فرهد گمر مني

نهر عطشان للماي
و أخذ من عندي الچفوف
الضوه بعیوني عبّــاس
و بعد بعیوني ماشوف
النهر من باگ الاحلام
تبدّه افیاي الخیام
بعد ماعندي خوّان
ــــــــــــــــــــــــ

غریب لوحدي ظلیت
وي زینب تلاگیت
عین بعین سولفنه و بچینه
العطاشه لا یسمعون
اخیّچ طاح یم عون
صفگنه الراح عالراح امن ادینه

اهنا زینب قرت یم منحري المقتل
و ذیچ الساعه دارت عینها اعله التل
صاحت یخوتي یاجرح اتحمّل
حرگ الخیم؟ ذبحك؟ صعدت الهزّل؟

مادام العَلَم طاح
هزیله باچر النوگ
چبیره اعله اخت الحسین
تطب مچتوفه للسوگ
أسمعه ایصیحلي الشام
تبدّه افیاي الخیام
بعد ماعندي خوّان





• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ واسوها ]

🎤أداء الملا قحطان البدیري
🖊الشاعر واثق العيساوي
📆 ليلة ٨ محرم ١٤٤٢ هـ.
——————————
المستهل:

واسوها واسوها
دمعاتي شوفوها
أم الولد لو مات
بیمن یصبروها
ــــــــــــــــــــ

یا سبّاح گلبي و فرحة البیت
احسب کل لیالي ارباك ضلّیت
للصیوان أزف طولك تمنّیت
ییمه ابیش اجیت و بیش ردّیت
ــــــــــــــــــــ

یالمخلّي ابدلیلي ایبات الاصواب
یفز گلبي و یطیر لدگّة الباب
بعدك شاب توجع موتت الشاب
اشلون اتنام عینك جوه الاتراب
ــــــــــــــــــــ

امحضرتلك شمع عرسك یمزیون
و اشوفك گلت یمه اویه الیعرسون
یبو ضحکة الحلوه و ذیچ العیون
اشلون اتراب فوگاهن یهلون
ــــــــــــــــــــ

یِعین الله گلبها الوالده اتنوح
اذا شافت وِحید اعیونها ایروح
الأمس چان بحضنها الیوم مذبوح
سلوتها الونین و زادها اجروح
ــــــــــــــــــــ

الله ایعینّه اعله الوکت صایود
یختار ابولدنه وین الحیود
گِضنها الوالدات اهدومهن سود
من گد اللطم تعبانه الزنود






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ رايد ملگه ]

🎤أداء الملا قحطان البدیري
🖊الشاعر محمد البطحاوي
📆 ليلة ٩ محرم ١٤٤٢ هـ.
——————————
المستهل:

گضّیت الطف کله اموادع
راید ملگه ایطیب اجروحي
یالاکبر احچیها اگبالك
لمّن تطلع تاخذ روحي
ــــــــــــــــــــ

اَگبَل اعلیّه ابجماله و کل هله بگلبي انحچت
اتشوف بیه جدّي محمّد روحي للملگه ارکضت
گال بویه ارخصلي أمشي دمعتي اگباله انزلت
اهنا گلت رایح اولیدي و ساعة افراگه دِنَت

چلمة رایح آنه أکرهها
من یحچیها أحد من ناسي
لچمتها ابگلبي و ما راحت
لو گلتوها أذکر عبّـاسي
ــــــــــــــــــــ

الابو ایتاني اولیده اگبال عینه ایصیر شاب
و حیل یفرح من یشوفه لابس اکبار الثیاب
و آنه الاکبر راید الطف و حیل أخاف امن الغیاب
لأن کل المشوا گبله صفوا نومه اعله التراب

لو ضمّیته ابّین اعیوني
الطف معروفات اسهامه
و عدواني اشلون أنظر لیهم
گدامي ایطشرون أحلامه
ــــــــــــــــــــ

بعدك الیوگف اگبالي ایسولف بنفس الطلب
افراگك آنه یبني أشوفه و گمت أحسّنه گرب
شنسه من عندك فرحتي لو سهرنه و التعب
بکربلا یالولد تدري کلشي احبّنه انسلب

روح و حسّب آنه انتظرك
واگفلك حافي و بدموعي
بس انت الضلّیت اگبالي
یا آخر صفّه امن اضلوعي
ــــــــــــــــــــ

العافیه و عیني و نظرها من طلع مني مشن
و شکو آیه اترجعه النه بگلب أمه اترتلن
و رجع لیّه و کلشي خضّر المن جفاه اتیبّسن
و طلب ماي و کل خواته دوّرن بس مالگن

عطشان و واگف گدامي
کلش صعبه ابّیش أرویه
خجلت روحي اگبال اولیدي
راید ماي امنین أنطیه
ــــــــــــــــــــ

و رجع کرّرها العباره بویه رایح گتله وین
گال راجع آنه للطف الي یمه اهواي دین
عطّشاکم و آنه واگف اشلون تغمض لیّه عین
گتله مکتوبه علیّه آنه اودعك مرتین

رد لسالفته الما خلصت
و طاح و ظل رافعلي اچفوفه
و ابعیني أنظرهم عدواني
ذبحوا ابني و عیني اتشوفه






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ يغالي ]

🎤أداء الملا قحطان البدیري
🖊الشاعر علي مخيلف
📆 محرم ١٤٤١ هـ.
——————————
المستهل:

یغالي و اغلی من عیني
یشوگي و عشگي و ونیني
یحسیني یحسیني
ــــــــــــــــــــ

اتنفستك و مات الهوه
عایش صدگ بحساسي
من ینذکر طاري العشگ
بس انت تبقی براسي
تسبیحة اسمك تنولد
بکل جرّه من انفاسي
طافت بروحي امحبتك
اغلی و أعز کل ناسي

بغیرك سیدي شلّي
مجنونك یبعد أهلي
یحسیني یحسیني
ــــــــــــــــــــ

یحسین کون اگضي العمر
بیدك یضل مکتوبي
مارید مال و لا ذهب
بس نظره من محبوبي
مایسوه من دونك هوه
یاللي غسلت اذنوبي
ادعیلي کون ایضل دهر
أسود علیکم ثوبي

اذا عنك یحرموني
بدونك یعمن اعیوني
یحسیني یحسیني
ــــــــــــــــــــ

یعذیبي أشمّك و انتشي
یا سبب کل تکویني
خلّیتك ابنص الگلب
و ابمجلسك خلّیني
محترم نفسي بخدمتك
غیر انت المربّیني
اسمك اذا مر و انسمع
وحّدها تدمع عیني

یَخِلّي و سالفة روحي
اشتسوه بدونك اجروحي
یحسیني یحسیني
ــــــــــــــــــــ

یاهو انت یالکلك عشگ
عایش جرح بالهامي
بکل شده اطیح و انتخي
و الگاك حل گدامي
احچي اویه روحي و الدمع
امغرّگ اسنین أیّامي
مرّات أشوفك مَي عذب
و مرّات أشوفك ضامي

المثلك عایش بکبره
شسولف و أمك الزهره
یحسیني یحسیني
ــــــــــــــــــــ

أحلم و أفز من الحلم
بس مادري اشیجرالك
ابذیچ الصحاري ابلا أخو
بس الشمس تبرالك
شیصیر لو بالطف صرت
غیمه و تفیي اعیالك
و أمطر اذا جاسك عطش
لو حتّی أبَرد اخیالك

ابمچانك سیدي حاضر
الفرس یسحگني بالحافر
یحسیني یحسیني






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ مهدك ]

🎤أداء الملا قحطان البدیري
🖊الشاعر أحمد ماضي القلعاوي
📆 ليلة ١٠ محرم ١٤٤٢ هـ.
——————————
المستهل:

مهدك شو فرغ یولیدي شتگول
أرید أسهر بعد و أشبع دللول
ابسهم عطشان فطموك
ماظل حتی کاروك
ــــــــــــــــــــ

چنت أغزل اگماطك و آنه فوگ النوگ
ما أدري المنیه اگماط الك تغزل
بحضیني چنت و أشتاگلك و أبچیك
و اتبلل اریاگك دمعتي التنزل
علی طول الدرب چانت سوالف عین
لاتعطش گلتلك مایهُم یکتل

أغمّض و انت نایم فوگ الچتوف
و أفز مرعوبه چن اولیدي مخطوف
و أضمّك خاف یلگوك
ماظل حتی کاروك
ــــــــــــــــــــ

نصّبنه الخیم و الجود ینگط ماي
و امتانین کلنا ینّصب مهدك
کلها اتصیح یمي و آنه گلبي ایطیر
چن بس انت الیّه و غیري ماعندك
تالیها و صفن کلهن حطب للنار
و دمعه انت و طحت للعین شیردّك

ألِم ارماد أدوّر ریحتك بیه
و أرکض و الرمل یچویني و أچویه
یالما باچي بچّوك
ماظل حتی کاروك
ــــــــــــــــــــ

تدرون ابعطش عبدالله من یا لون
ما فطّر اشفافه فطّر اجفونه
و أحسّن بیه و أخافن ما أگل لحسین
خافن یاخذ اولیدي و یذبحونه
خذاك و رمح وحشي اتلولح امن ابعید
مدري ابیا اصیاح انصیح خلّونه

صرت بحضن زینب نار و اجروح
گلتلها أرد أشمّه اتگلي مذبوح
اعله شربة ماي ذبحوك
ماظل حتی کاروك
ــــــــــــــــــــ

بخیمة عمتك یالولد گبرك صار
و رقیّه اویه الدموع اتراب گام اتهل
وره حرگ الخیم گطعوا لأهلنه انحور
تالي انّبش گبرك خذوا مني الخِل
تخیّل حالتي و فوگ الرماح الرووس
و أصیح بصوت خرسه الطفل ما یحمل

طیر انت و رمحهم حاد سنّین
اذا لامس رگبتك تصبح اثنین
ــــــــــــــــــــ

ما لحّگت أرسم ذکریات اویاك
ابساع ابساع رحت و صار تودیعك
أشم اچفوف ادیّه امسودنه ابلیاك
لهسه أشتم عطر بیها امن أصابیعك
زغیر اهواي بس انت چبیر اهواي
غیر احسین أبوك و کونها ایطیعك

چنت امتانیه أسمع احچایه
یمه اتصیحلي و منّك اکفایه
تره الحرموني حرموك
ماظل حتی کاروك






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ يا قاسما قلبي ]

🎤أداء الملا قحطان البدیري
🖊الشاعر علي جعفر القطيفي
📆 ليلة ٨ محرم ١٤٤٢ هـ.
——————————
المستهل:

یا قاسِماً قَلبي .. بالحُزنِ و الکربِ
عَجَّلتَ حیني قَبلَ حینی یا حبیبي
ــــــــــــــــــــ

یا قابِضاً مِن قبلِ عزرائیلَ روحي
مَا لي بِروحي
یا مَن بِمَرأیٰ حُسنِهِ تُشفیٰ جروحي
هذي جروحي
ما قُلتَ لي اُفٍ و لکن قُلتَ نوحي
دهراً و صیحي
یا لَیتني اُفریٰ بأسیافِ الحُروبِ
یا قاسِماً قَلبي
ــــــــــــــــــ

لَمْ یَبقی لي حُلمٌ سِوی کأسَ المنونِ
إنْ یسألوني
بَل صارَ حُلمي و المُنیٰ أنْ یَدفنوني
قبلَ المنونِ
في لِحدِكَ المحفورِ یا مَروی سنیني
أرجو سُکوني
الموتُ یا ریحانتي أمسیٰ طبیبي
یا قاسِماً قَلبي
ــــــــــــــــــ

في مَسمَعي مِن صوتكَ الشافي سُقامي
أحلی الکلامِ
في ناظِري مَرآكَ یا روحَ الإمامِ
تَمشي أمامي
قد صَبَّت الدُنیا علی أغلیٰ مرامي
شرَّ انتقامِ
یا مُهجَتي قُم کَي تراني في شُحُوبِ
یا قاسِماً قَلبي
ــــــــــــــــــ

أدخلتني ناراً و تَغدو للجنانِ
یَرضیكَ حالي؟
یا شارِباً کأساً مَعیناً قد سَقاني
مُرّّ العِضالِ
مَزَّقتَ آمالي و قد نِلتَ الأماني
مِن کُلِ غالي
یا شمسَ عُمري فاجأتني بالمَغیبِ
یا قاسِماً قَلبي
ــــــــــــــــــ

هذا أنینُ الأمِّ في رَوعِ المُصابِ
یَغلي أساهُ
ما حالُ مَن في قلبهِ ضِعفُ العذابِ
لمّا رَآهُ
قد حَفَرت رِجلاهُ ویلي في التُرابِ
ممّا أتاهُ
غطّی نَواحي کربلاء عالي النحیبِ
یا قاسِماً قَلبي






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ أحزاني ماتنساني ]

🎤أداء الملا قحطان البدیري
🖊الشاعر كرار حسين الكربلائي
📆 محرم ١٤٤١ هـ.
——————————
المستهل:

آنه الإمام السجاد
و أحزاني ماتنساني
ــــــــــــــــــــ
①
أحزاني من زغري ربیت اویاها
لا هیه تنساني و لا أنساها
قصة مصابي بکربلا تلگاها

عذبني دهري یا ناس
و بکربلا اشراواني
ــــــــــــــــــــ
②
لا لا تلوموني اعله دمع اعیوني
خلوني أموت امن الحزن خلوني
یا ناس من السوط سوده امتوني

من أجلي مخلوق النوح
ماتنطفي نیراني
ــــــــــــــــــــ
③
تتجاره عبراتي لقتیل العبره
بعیوني شاهدت الشمر حز نحره
و أنظر عشر خیّاله تسحگ صدره

سیف الگطع نحر حسین
لدرب السبي وداني
ــــــــــــــــــــ
④
بخیامي و اخیامي عَلي حرگوها
و بالخیل کل أیتامنه سحگوها
و اگبالي عمتي زینب ایضربوها

و اتذکرت نار الباب
من وجروا صیواني
ــــــــــــــــــــ
⑤
هدّمت حیلي علّتي المخفیه
بس آني و النسوان لاذت بیّه
و الهاشمیه أصبحت مسبیه

أمي البتول و یا حیف
بیده الشمر جرّاني
ــــــــــــــــــــ
⑥
و لا واحد امن أهل الغیاره یمّي
امن السلسله یا خلگ ینزف دمي
آنه الهظمني الشمر من سب أمي

شتّم علي و الزهراء
و أجري الدمع خلّاني
ــــــــــــــــــــ
⑦
آنه عله افراش الأجل صحت بصوت
اخذ العمر أهلاً و سهلاً یا موت
أبچي اعله أبویه حته و آني بتابوت

بلحدي و أنوح اعله حسین
ماتنگضي أحزاني






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ ملتقانه ]

🎤أداء الملا قحطان البدیري
🖊الشاعر كرار حسين الكربلائي
📆 ليلة ٢١ محرم ١٤٤٢ هـ.
——————————
المستهل:

یمفارگ الحبیب .. باب الفرج قریب
قریباً ملتقانه بکربلاء
ــــــــــــــــــــ
①
هالسنه ماکو شعائر ناس گالتها اشکثر
و بالعکس شفنه بمحرم کلشي یلطم عالصدر
الله مایرضه یعالم سکته عاشوره یمر
رکضة طویریج شاهد عبرت اخطوط الحمر

من کربلا الحیاة و بکربلا الممات
انولدنه بهالعقیده و الولاء
قریباً ملتقانه بکربلاء
ــــــــــــــــــــ
②
وگفت الدنیا بکبرها و انکسر میل الزمن
انسدت الأبواب کلها و ما انسد باب الصحن
یالله یالمشّاي حضّر رایتك من کل وطن
گبل ما ننصب مواکب فتح دیوانه الحسن

و برحمته الذبیح یجمعنه بالضریح
و انقیم بحضرته هذا العزاء
قریباً ملتقانه بکربلاء
ــــــــــــــــــــ
③
حسین هم یشتاگ النه مثل ما نشتاگ اله
سید و من طیب گلبه ایحسب زواره هله
صوت یا أهلاً وسهلاً من مناراته اعتله
أیّها الناس استعدوا تنتظرکم کربلا

مکتوبه عالمزار نحنُ بالانتظار
البُعد لازم نهایاته اللقاء
قریباً ملتقانه بکربلاء
ــــــــــــــــــــ
④
احنه نحچي ابمعتقدنه الیفتهم مقصدنه وین
هاي شدتنه الچبیره ما یحلها الّا الحُسین
اتموت هاي الگاع اذا ماکو زیارة أربعین
کربلا الجنه ادخلوها بسلامٍ آمنین

و بنظرة الکفیل مایبقی مستحیل
بضریحه العافیه راعي اللواء
قریباً ملتقانه بکربلاء
ــــــــــــــــــــ
⑤
مرحبا و حیاهم الله ایصیح من هسه الگلب
من البصره لکربلا ابیا هله مفروش الدرب
العدد في مرتین لازم هالسنه لصحنه یطب
فشله ما نتلگه زینب جایه من دیرة غرب

مهما الزمن یدور للطف نجي و نزور
اویه زینب لازم انقیم العزاء
قریباً ملتقانه بکربلاء






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ ذاك اليوم ]

🎤أداء الملا قحطان البدیري
🖊الشاعر واثق العيساوي
📆 ليلة ١٥ محرم ١٤٤٢ هـ.
——————————
المستهل:

ذاك الیوم غیر الیوم کلشي ابدنیتي اتغیّر
بس الذکریات ادموع اگلّب بیها و اتحسّر
تعالوا اویاي .. بچیت اهواي
ــــــــــــــــــــ
①
غریبه الدمعه باللیل
تنزف بس صورکم و اگعد اصرخ فارگوني
یطلع صوتي مکسور
و صدی صوتي اسمعه ایردلي واضح مایجوني
سگف العایله انجوم
حزین الدرب و الصحره خذت من عندي لوني
أرجف وحشه مو خوف
و أسولف للحبل عن معصمي و عن الولوني

ذاك الیوم چنت ابیت أبوي و أستظل بأمي
بس الیوم أنا الضلیت وحدي بلوعتي و همي
الغدر دنیاي .. بچیت اهواي
ــــــــــــــــــــ
②
ذاك الیوم الي اخوان
چان الیوم ویاهم یمر بعیني لحظه
اذا صد لیّ عبّاس
اذا زعلانه یزعل و أبد مایرضه الّا أرضه
چنت وین و صرت وین
فارگني وحیده اللي چنت شایلني نبضه
صرت مچتوفه بحبال
عونه البالغرب وي الغرب باخوانه یحظه

فرق مابین الك خوّان بالشده یعینونك
عن یوم التجي العدوان شمات و یحیطونك
تضیگ اسماي .. بچیت اهواي
ــــــــــــــــــــ
③
نور عیوني یحسین
مکانك یمي خالي و الرمح لا مو مکانك
نحرك هذا مذبوح
یخویه شسوه بیه وبیك یالغالي زمانك
تعال و شوف الأیتام
عطشانین شوفة وجهك و تطلب أمانك
بعدك جابوا الماي
اشربه اشلون و انت امن العطش جمره بلسانك

اتذکرتك ثغر عطشان مات بحسرة الگطره
بعدك مانرید الماي ماي ابلا أخو انشمره
امن اصد للماي .. بچیت اهواي
ــــــــــــــــــــ
④
بینه اتسافر النوگ
من دیره لعد دیره بقینه ابلایه والي
اعلیکم گلبي محروگ
اصد لوجوهکم فوگ الرمح و ابچي اعله حالي
رقیّه تسأل شصار
تسولف وي أبوها بس حسافه الرمح عالي
أنا المتحیره بأیتام
مچتوفه بحبل و آنه العشت عزي و دلالي

لو طال الدرب ویاك یأمن گلبي الیشوفك
راسك یفزع بنظرات عله اطفالك یظل خوفك
بهذاك الراي .. بچیت اهواي
ــــــــــــــــــــ
⑤
خطوه بخطوه احتار
صار اشطوله وي اعداکم و یرعب دربنه
حربکم نبله و ارماح
و احنه اویه العیون الشامته صارت حربنه
من الکوفه للشام
چم شامت بشامت خویه بخلافك یسبنه
بعد شنسوي بالماي
تجرّعنه المرار ابلا أهلنه او هم شربنه






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ يا منهال ]

🎤أداء الملا قحطان البدیري
🖊الشاعر كرار حسين الكربلائي
📆 ليلة ٢٤ محرم ١٤٤٢ هـ.
——————————

المستهل:

مره لاگیته .. و دمعي حچه ویّاه
کیفَ أمسیتَ .. یبنَ رسول الله
شفته اتخوصر و گال
شحچیلك یمنهال
عن عذاباتي
ــــــــــــــــــــ
①
بشام الآهات .. دموعه توراة
و عصه موسی بچفه یتوچّه علیها
سید النوح .. خطوته اجروح
و چانت انفاسه خیم محترگه بیها

الثوب أحمر صایر من دمه
و بس زینب تتلفت یمه
فاگد والله ایکون ابعونه
کلمة وین حسین اتلچمه

گتله سولفلي .. و احچیلي المبچیك
ها یبعد أهلي .. شمسوي دهرك بیك
گال اتغیّر الحال
شحچیلك یمنهال
عن عذاباتي
ــــــــــــــــــــ
②
گال بالآه .. حسبي الله
من عشیرتنه عدل بس آني ضلیت
ادفنت یا حیف .. اسبعطعش سیف
ابّاریات اتشیّعوا موش ابتوابیت

یا منهال ابذنّي ایدیه
دافن کل أهل الحنیّه
و ما احچیلك عن الحافر
حسین انلم اشویه اشویه

حرمله بسهمه .. من چبده اخذ ثلثین
و الشمر یمه .. یذبح بأبوي حسین
عن حر ذیچ الرمال
شحچیلك یمنهال
عن عذاباتي
ــــــــــــــــــــ
③
ها یمنهال .. اتخیّل الحال
طفل ست اشهر دفنته و راسه مگطوع
نایم الشوگ .. بصدر مسحوگ
حسین گلي ادفن اخیّك بین الضلوع

اصعب موقف گلبي ایضمه
من ردیت و لاگیت أمه
چي ریحة عبدالله بچفي
لزمت چفي بحرگه اتشمه

اخوه ماعندي .. حته الطفل ذبحوه
و المرد چبدي .. راسه برمح شالوه
وحدي ابلا أخو ظال
شحچیلك یمنهال
عن عذاباتي
ــــــــــــــــــــ
④
جفني مانام .. یحرس أیتام
ایلوذن بکتري خواتي من العیون
الهاشمیات .. عالهزیلات
وماینامن لیلهن من سوط المتون

من محد یفهم آلامك
یاریتك ماعشت أیامك
یامنهال اتخیّل حاله
اتشوف اختك تنطگ گدامك

امچتفه اسکینه .. اتودّي العتب بالریح
عمي چا وینه .. خافت رقیّه اتطیح
خشنه اهواي الحبال
شحچیلك یمنهال
عن عذاباتي
ــــــــــــــــــــ
⑤
لمحنتي هاي .. ابچي ویّاي
ذیچ زینب یمنهال امچتفه الإید
بثگل الجبال .. و صعبه تنگال
اخت ابوفاضل سبیّه اتطب عله ایزید

زینب هاي الما شافوها
ترکض یوم الطف خلوها
و من بعد التل صعدت هزّل
و هسه بدیوان ایوگفوها

چم جرح صلّی .. و عماتي مسبیات
بنت رسول الله .. اشلون بخرابه اتبات
سلبوا راحة البال
شحچیلك یمنهال
عن عذاباتي






• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ مشاي طالع ]

🎤أداء الملا قحطان البدیري
🖊الشاعر عمار هليل الواسطي
📆 ليلة ٢٧ محرم ١٤٤٢ هـ.
——————————

المستهل:

مشاي طالع و الگلب بس انت سالفته
یحسین غیرك ما أحب لو انت لو انت
و بگلبي یقین مشاي الأربعین
عین الله حارسته
ــــــــــــــــــــ
①
عاشگ و قصة غرامك سکنت بوجداني
چنه ربك چي أحبك خادمك خلاني
بالمشي بیوم أربعینك عالعهد تلگاني
رایه بیدي اعلیها أکتب مالي غیرك ثاني

روحي بیك أعتنیك
أرتجیك یا حسین

کل عام گبلي لکربلا ألگه الگلب واصل
بي غزّرت ملحة وفه من زاد أبوفاضل
خطوات الوفاء الیمشي لکربلاء
عین الله حارسته
ــــــــــــــــــــ
②
بیها أشد حیلي و أواصل من أشیل الرایه
أشعر بقیمة وجودي یاللي حبك غایه
آنه شایف بأربعینك چم کرامه و آیه
حلمي کون المهدي یمشي بالزیاره اویایه

و السلام عالإمام
و الکلام یا حسین

بس الله یدري ابیا صبر عایشهن آلامك
و بأربعینك یعتني یمشي اویه خدامك
و بگلبه الحزین کل هاي السنین
عین الله حارسته
ــــــــــــــــــــ
③
بالدرب شفت المواکب مر سؤال ابالي
کلها للمشایه تخدم سهّلت ترحالي
طفله غاد اهنانه شایب و السؤال التالي
اشگد تحب حسین گتله و گلي هذا الغالي

من الزغر للکبر
هالعمر یا حسین

یحسین هنیاله الوگف خادم لزوارك
من خیرك ایمد سفرته و خطاره خطارك
حتماً ما یحیر هو امن الأخیر
عین الله حارسته
ــــــــــــــــــــ
④
واهم الرایدني اعوفك ما أریده بدربي
اعیوني لدموعك عفتهن گمت أشوف بگلبي
خدمتك حبي الحقیقي و ما أعوفن حبي
نعمه من الله وجوباً لازم أشکر ربي

و الدعاء کربلاء
بالولاء یا حسین

منطیني کلشي بخدمتك ناذر الك کلشي
یحسین مره بالسنه معقوله ما أمشي
أنفاسي حسین احساسي حسین
عین الله حارسته
ــــــــــــــــــــ
⑤
للي گلي اشگد مغالي راح اوضح فکره
هذا مافاهم حیاته و بالعکس کل عمره
آني ماعوف الشعائر لا و حگ الزهره
بخدمتك اعبر صراطي و هو یاهو ایعبره

الصحیح ما اطیح
من اصیح یا حسین

تاخذني بیدك سیدي اتودیني للجنه
حاسبلي دمعي و المشي و اللطم و الونه
من الله اشأرید و الخادم أکید
عین الله حارسته
ــــــــــــــــــــ
⑥
ربنا من حبل الورید لکل موالي أقرب
یعلم بیوم أربعینك بیا فرض یتوجب
طالع اتلگه السبایا و لو صحت یا زینب
فدوه آنه اروح لإدیها التلطم اعله المعصب

یا غریب یا سلیب
یا خضیب یا حسین

ام عون رجعت و الفرض نفزع لملگاها
اشگد وگفت النه بهالعمر خل نوگف اویاها
شنقدم قلیل هاي اخت الکفیل
عین الله حارسته





• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed