📜قصیدة: [ مرمي ابخطة الحومه ]

🎤أداء الملا قحطان البدیري
🖊الشاعر المرحوم الشيخ ابراهيم الديراوي
📆 ليالي محرم ١٤٤٢ هـ.
ــــــــــــــــــــــــــــــ

أنا ماشفت الهنا یحسین
عگبك و العمر ما ضاع
و لا مر عله اعیوني النوم
حین النور وجهك غاب
١/ــــــــــــــــــــ

اشلون اتغمض اعیوني
و بالطف عفت جثمانك
مرمي ابخطة الحومه
و یمك هلك و اخوانك
غسلك من دمه نحرك
صُبَح و الذاري أچفانك
یا ریحانة الهادي
امصابك غطّه کل امصاب
٢/ــــــــــــــــــــ

امصابك ماجره یحسین
مثله و لا بعد یجري
السمه و الأرض یبن أمي
بچت لك و الهوه الیسري
مو حگي ابحزن و انیاح
أگضّي لخاطرك عمري
و لو گلبي صخر یحسین
بمصابك تلاشه و ذاب
٣/ــــــــــــــــــــ

إهي فرگه یبوالیمه
و أگولن تخلص الفرگه
و أرد اردود نتلاگه
و أگولن هله ابهالملگه
صدگ ردیت أنا لاچن
زماني اشخلّه و اشبگّه
أشوف الدار ذیچ الدار
لاچن کل هلي غیّاب
٤/ــــــــــــــــــــ

چنت أحچي اویه روحي اشلون
یا روحي امن أشوف احسین
شحچیله شسولفله
و أبدیله الحدیث امنین
أول ما أحب إیده
و أگله اگعد ینور العین
خل من وجهك أشبع شوف
یا ریحة هلي الأطیاب
٥/ــــــــــــــــــــ

و نوب اللي أگل روحي
یروحي من أرد لبن أمي
گبل لا أحچي ابضیمي
و أشرح محنتي و همّي
أحط راسي اعله ذرعانه
و أمزج دمعتي ابدمي
و أگله موش أنا زینب
لیش اتعوفني اویه أجناب
٦/ــــــــــــــــــــ

ما چنّي الربیت اویاك
خویه حسین ماچنّي
حدر أکناف أبونه الحید
بالعز من زغر سنّي
من عندي اشبده یحسین
یبن أمي و تصد عنّي
لو ما کربلا ماچان
راسي امن المصایب شاب
٧/ــــــــــــــــــــ

و نوب أصفن و أگل روحي
یروحي امن أرد للوالي
أخافن ینکسر گلبه
ما أحچي اشجره ابحالي
اشکثر صفنات تاخذني
و چم حسبه التجي ابّالي
و أرد لن ذیچ أنا زینب
الدولبها الدهر دولاب
٨/ــــــــــــــــــــ

و تالي أرجع لأبو الغیره
أخوي اللي کفل ضعني
أگله اگعد یبوفاضل
أرید أحچیلك اسمعني
و حگك ماخطر عالبال
تنساني و تضیعني
ابغُرب و المالها والي
ماتنحشم ماتنهاب
٩/ــــــــــــــــــــ

یروحي إن چان أنا زینب
بنت حیدر هلي چا وین
ذاك الخدر و العز راح
مني و وین أخوي احسین
چا وین الگمر عبّاس
أخوي البي تگر العین
لیس ابیسر خلّاني
و ألبس للهظم جلباب
١٠/ــــــــــــــــــــ

یا عبّاس لو تدري
اشجره ابحالي عگب عینك
انگطع رجواي من عندك
یخویه ابگطع چفینك
اطلعت و أعضاي تتراجف
و أصیحن یالولي وینك
یخو زینب مشت زینب
یسیره امچتفه اویه أجناب





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11105

📜قصیدة: [ عبدالله وينك ]

🎤أداء الملا قحطان البدیري
🖊الشاعر: واثق العيساوي
📆 ليلة ١٠ محرم ١٤٤٣ هـ.
ــــــــــــــــــــــــــــــ

المستهل:

عبدالله وینك بس رد علیه
آیلولد آیلولد آیلولد
۱/ــــــــــــــــــــ

یمه صوتك من اجاني
ما أشوفك متت چن بعدك یغالي
اتناغي لیّه بصوت ضامي
و بعدك اتفززني و أسهرلك لیالي
لو ضحکتك من أشیلك بین إدیه
بالحلم و أبچي اعله حالي
دوریتك مالگیتك
اي مکانك بعده بس یا یمه خالي
آیلولد آیلولد آیلولد
۲/ــــــــــــــــــــ

رد علیه یالعفتني
هذا انت البالمهد لو هذا حلمك
یمه مهدك من أشمه
حلم بي شفتك ییمه و حیل أضمك
هذا ثوبك من أگلبه
ینکسر گلبي امن أشوفن بیه دمك
اشتدري بأمك لو عفتها
تصبر اعله افراگ ابنها اشتدري بأمك
آیلولد آیلولد آیلولد
۳/ــــــــــــــــــــ

یمه سهمك من رگبتك
وخّروا قبل الدفن لو بعده یمه
مو یألمك مو یلچمك
ابني بعده زغیر وخروا لا یلچمه
ما یحمله هو ضامي
یا طفل مثله ارتوه من فیض دمه
بیّه سهمك ظل یغالي
یا گلب أم اعله ابنها اتعوف همه
آیلولد آیلولد آیلولد
٤/ــــــــــــــــــــ

اشظل الیّه یالعفتني
ابهمي أبقه و انت تدري اشظل الیّه
بس دمعتي و هم عبرتي
والله گلب الوالده اشیحمل خطیه
و اعله ابنها یبقه ونها
من یفارگها الولد تلگه المنیّه
فوگ همي من فگدتك
شوفتني الضیم أرض الغاضریه
آیلولد آیلولد آیلولد





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11107

قصيدة: ليش تبچي

📜قصیدة: [ أم الشعائر ]

🎤أداء الملا قحطان البدیري
🖊الشاعر: واثق العيساوي
📆 ليلة ٤ محرم ١٤٤٣ هـ.
ــــــــــــــــــــــــــــــ

المستهل:

أنا أم البنینِ و الشعائر
أنا صوتُ البُکاءِ في المنابِر
ناجیتُ یا ذُخري أنْ یَنقضي عُمري
في خدمةِ الحُسین
۱/ــــــــــــــــــــ

ابأول لحظه ابیت العصمه
من صرت ابذمّة حیــــدر
کلشي ابعمري انطیته هدیه
لأولاد الزهره و أکثر
کلمة أم اهوایه اعلیه
خدّامه و یاریت أزغر
و الیخدم أولاد الزهره
اشما یزغر بیهم یکبر

فَکانَ الدمعُ رَقْراقاً بِعَیني
و قَلبي صارَ مُلکاً للحُسینِ
و شاغلاً فِکري أنْ یَنقضي عُمري
في خدمةِ الحُسین
۲/ــــــــــــــــــــ

ابني احسین و أغله امن ابني
و بس الله ابگلبي الیعلم
الله امشرّفني ابمنزلتي
و بیها اشگد أدعي و أحلم
لو أبچیله و تعمه اعیوني
فدوه اعیوني و ما أندم
آنه انطیته أولادي و گلبي
ما مِهتَم بس بي مِهتَم

بهِ قَد صِرتُ رمزاً للوفاءِ
مِنَ الزَهراءِ في الحَشرِ جَزائي
وَکّلتها أمري أنْ یَنقضي عُمري
في خدمةِ الحُسین
۳/ــــــــــــــــــــ

شفته اگبالي ایجهّز ضعنه
و ظل محبوس ابصدري الصوت
شیصبّر گلبي و گدامي
اولیدي امسافر سفرة موت
گمت أدعي بدمعات اعیوني
و أدري ابدمع الأم مبخوت
کل خطوه الیبعد عن عیني
چن یشلع من گلبي ابتوت

مَضیٰ و القلبُ مکسورٌ علیهِ
و صارَ العمرُ رهناً في یدیهِ
دَعَوتُ یا صَبري أنْ یَنقضي عُمري
في خدمةِ الحُسین
٤/ــــــــــــــــــــ

آني أول تشبیه ابإیدي
سویته و گمت أبني اگبور
و أول مشّایه بدیرتها
لحسین ابدمعتها اتزور
و أنصب مأتم کلنه و نلتم
نبچي اعله اولیدي المنحور
و چنت ألطم حیل اعله امصابه
کلما اتذکّر عاشور

أنا مَن شارکَت أمَّ المصائب
لها مِن دَمعتي تُبنی المواکب
و مَنبَري خدري أنْ یَنقضي عُمري
في خدمةِ الحُسین
۵/ــــــــــــــــــــ

کل خادم مخلص ینخاني
ابکلمة مگضیه أتلگاه
و الیبچي اعله احسین ابدمعه
آني اشلون ابشدّه أنساه
و الیخدمنه ابصافي النیّه
هذا انظل للتالي اویاه
درب الخدمه ایعلّي أصحابه
ماشیته و أعرف معناه

أنا روحٌ تجلّت في المآتم
و لَن أنسی لنا مَن صارَ خادم
في العُسرِ و الیُسرِ أنْ یَنقضي عُمري
في خدمةِ الحُسین






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11110

📜قصیدة: [ ودعوني ]

🎤أداء الملا قحطان البدیري
🖊الشاعر السيد عبدالخالق المحنه
📆 ليلة ٣ محرم ١٤٤٣ هـ.
ــــــــــــــــــــــــــــــ

المستهل:

ودّعوني روحي گطرة ماي بتراب الصحاري
ضیّعوني اشحصّل الملهوف من طیف الظهاري
بالله لیش السافروا محد یردهم
بالله لیش اعله النهر میّت وردهم
ضیّعوني ضیّعوني
۱/ــــــــــــــــــــ

انتو وین استفردت بیّه المصایب
و آنه ماعندي گلب
انتو وین نائحة صحراء روحي
و رمشة اعیوني غُرُب

ما اجیتوا اجروحي خضره
و یبست الدمعه اعله جفني و ما اجیتوا
لو حلت بعیونکم دار التباعد لو نسیتوا
لخاطرالله ما سمعتوا اجروحي من صاحت تعالوا
حتّی طیر الموت اجاني من صحت یهلي تعالوا
راح أموت و بیّه بس چلمة تعالوا ما اجیتوا

ما اجیتوا و العمر شمعه و طفیته لیله لیله
ما اجیتوا هالله هالله یا هلي عندکم علیله
بالله لیش اشفافي ما ضاگت شهدهم
بالله لیش اعله النهر میّت وردهم
ضیّعوني ضیّعوني
۲/ــــــــــــــــــــ

انتظر یبست اجدامي ابوگفتي
و البرد صایر لهب
انتظر خضّرت بین الأصابع
ورده من لون العتب

من مشیتوا اختلف حتّی الهوه و یخنگ نسیمه
من مشیتوا ینمسح کل الکتبته و تبقه بس چلمة یتیمه
أشعر الظلمه بچت لي و ما بچیتوا من مشیتوا
بالله عوف الیمکن و گلي نسوني ها یگلبي
ها یگلبي آنه بس موتي ذکرني
من صحت أهلي نسوني
مو شفت نجم الظهاري و ما شفتکم

ما شفتکم یحچي بشفافي السکوت و بیّه چلمه
ما شفتکم و انتحر نمرود حزني و صبري چلمه
بالله لیش آنه انحرم من الأودهم
بالله لیش اعله النهر میّت وردهم
ضیّعوني ضیّعوني
۳/ــــــــــــــــــــ

غایبین غیبة الماي السریعه
و الأخذ روج النهر
غایبین غیبة الشجره الچبیره
و گعدة افیاي و سمر

چذب اعلیه الهوه
و دگ بابي مره و عاتبتکم
و ارکضت رکضة حمامه
الخافت اتوگعها مطره و عاتبتکم
گلبي ضامي و بین شباچ السراب اتصورتکم
کلشي میّت و آنه کلما اموت احبکم
ماطفه چانون حزني و آنه اتحمّس و احبکم
والله کلما انجرح اوگع و احبکم

ها یبویه گلبي یلچمني و أظن هالغیبه غیبه
ها یبویه یالچنت دومك تنادیني الحبیبه
بالله لیش اللي نسوا یلسع بردهم
بالله لیش اعله النهر میّت وردهم
ضیّعوني ضیّعوني
٤/ــــــــــــــــــــ

ذکریات اتزاحمن بطراف عیني
و لو بچیت ابچي صور
ذکریات ینفطر گلب السفینه
الما یعانگها البحر

یا صبرکم لا رساله
و لا هوه الیحمل خبرکم
یا صبرکم انتوا غیمه
و آنه رملة صیف و أتنطر خبرکم
خویه وین اهنا یالأکبر مر و لو مره اعله اختك
خویه وین اشگال گلبك یالنمت و امسهر اختك
راح أسولفلك سوالف من تجیني و ماتجیني

ماتجیني و الیعوفونه هله ایموت بحسرته
ماتجیني یا علي و موت الیتیمه ایصیر سکته
بالله لیش الگمره ماتضوي بعدهم
بالله لیش اعله النهر میّت وردهم
ضیّعوني ضیّعوني
۵/ــــــــــــــــــــ

یا علیل الینترك بالدار وحده
و یلچم اجروحه النده
یا علیل یسمع الحیطان تبچي
و یخترع من الصده

اهنا یناعي صوتك المجروح یعثر بالعباره
اهنا یناعي لو هلي میتین اسکت و اکتفي بس بالإشاره
فزت الحیطان بصوات النواعي اهنا یناعي
کلها موته و راس ابوچ اعله الرمح و اخته سبیّه
یمکن ابهاي المصیبه ماتظل عدله رقیه
احچي گول ولایهمك خاطري و رجفة ادیّه

احچي گلي من رفس صدر الحبیب و گص وریده
احچي گلي گلها یم شاطي النهر ذبحوا عضیده
بالله لیش أحبابي ماحفروا لحدهم
بالله لیش اعله النهر میّت وردهم
ضیّعوني ضیّعوني





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11124

📜قصیدة: [ صلاته بقيوده ]

🎤أداء الملا قحطان البدیري
🖊الشاعر: واثق العيساوي
📆 ليلة ٢١ محرم ١٤٤٣ هـ.
ــــــــــــــــــــــــــــــ

المستهل:

صلاته ابقیوده دمعته ابسجوده سلاحه ابدعائه ابطریق السبایا مشه و بیده رایه نِصَر کربلائه
مصایب حیاته ختمها لمماته سلاحه ابدعائه
۱/ــــــــــــــــــــ

عمره خلّص بالمصایب و الحزن یندلّه وین
الجامعه دمَّت رگبته و ظل أثرها اعله الإدین
یغص بالماي الیشربه و دمعته اتغرّگ العین
صارت أیامه مآتم یبچي بیها اعله الحسین

و البعینه شایف، هذیچ المواقف، و لا تنسه عینه
أبوه من ینظره، خیول اعله صدره، و امرضرضینه
دمعته ابصلاته ختمها لمماته سلاحه ابدعائه
۲/ــــــــــــــــــــ

عابد و أوقاته خِلصَت بالسجود و بالرکوع
و الصحیفه البیها کاتب أدعیّه و أحرف خشوع
کتب ویاهه صحیفه بس صحیفه امن الدموع
کل روایات المصیبه و السبي و کسر الضلوع

کتبها بجراحه، ختمها ابمناحه، اعله ذیچ المصیبه
مشه اویه الیساره، مشه بگلبه ناره، اویه عمته الغریبه
و عبرته لخواته ختمها لمماته سلاحه ابدعائه
۳/ــــــــــــــــــــ

و الرساله اعله الحقوق البیها کل حق ینشرح
یکتب و حبره دمعته و الدمع ما ینمسح
من کتب حق الصغیر اتذکّر و فز الجرح
وین حق عبدالله گلهم لیش ضامي و ینذبح

هله الما رعوهم، ابضمه ذبّحوهم، و اخوه الینظره
الطفل شنهو ذنبه، الدمه ظل یشربه، السهم دمه نحره
بريء و صفاته ختمها لمماته سلاحه ابدعائه
٤/ــــــــــــــــــــ

زین الإعباد و دعائه چان للخالق سَفَر
چانت التربه ابجبینه من سجوده امخلیه أثر
من یحط ایده اعله گصته تنزل ادموعه ابقهر
یذکر احسین و جبینه اشلون مضروب ابحجر

و یمر اعله باله، أمیر الکفاله، مشه و بیده رایه
تتاني الفواطم، گمر آل هاشم، یعود اویه مایه
الوعد حاشه فاته ختمها لمماته سلاحه ابدعائه
۵/ــــــــــــــــــــ

عالم و شاهد و عابد و ابن سید الکائنات
ابن فاطمة البتول الحبها سر هاي الحیاة
و ابن حمّاي الحمیّه التشهد الإسمه الصفات
و ابن الحسین الشهید المنهجه یصنع اُباة

أسیر المدامع، ربیب المصارع، متنشف دموعه
شیصبره اعله جرحه، حزن ظل یذبحه، و یکسّر ضلوعه
دمعته اویه ذاته ختمها لمماته سلاحه ابدعائه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11132

📜قصیدة: [ بلايه اوداع ]

🎤أداء الملا قحطان البدیري
🖊الشاعر: واثق العيساوي
📆 ليلة ١٥ محرم ١٤٤٣ هـ.
ــــــــــــــــــــــــــــــ

المستهل:

بلایه اوداع رحنه و ضاگت بینه الگاع
بلایه اوداع نِبحِر هم و الدمعه اشراع
فارگت اشچم غالي و غالي بلایه اوداع
۱/ــــــــــــــــــــ

هالدنیا اندارت بینه، فوگ النوگ امیسرینه
ماظل بعیني دمع لا عیني تهجع
الحارگ گلبي و چوّاني، من ما ودّعت اخواني
اشلون أمشي ابلایه أخو لا بیّه أرجع

من عفتهم و آنه رایح مني صوتي
اشکثر نادیت اشکثر
الیمشي بضعوني وسف ذبّاح اخوتي
و صار حدّاي الشمر

صحت عباس و صوتي ابرمل الصحرا انباگ
صحت عباس لو صار اللیل و أشتاگ
هذا الصار اخلافك حالي بلایه اوداع
۲/ــــــــــــــــــــ

مچتوفه و ما ودّعکم، عیني بظهري اتناطرکم
ماشوف اگبالي أبد و عیوني لیکم
تعثر بدموعي الناگه، آیالغالي و یفراگه
أگطع من إیدي الحبل و أرکض و أجیکم

کون أخلص أیامي یمکم بالمناحه
و ریتني یمکم متت
هو اللي یفارگ أخو مایلگه راحه
و آنه چم واحد عفت

طریقي اطویل ویاکم چان اشمحلاه
طریقي اطویل هسه ابکل خطوه أصرخ آه
بیکم محتاره و بعیالي بلایه اوداع
۳/ــــــــــــــــــــ

من ینزل لون الظلمه، أسمع بس عمه و عمه
و اتلوذ أطفالي تجي یمي و تِأمِّن
وحّدنا ابذیچ الهیمه، صرت الکافل و الخیمه
و اینامون و آني أظل لیلي بس أوِن

کلهم ایسألون عنك یابوفاضل
و آنه محتاره شَرِد
و انت راسك عالرمح یم المحامل
و آني اگللهم یرد

ترید الماي من عندك مو من اعداك
ترید الماي ترجع و الجربه ابیمناك
ایأمنون بذکرك أطفالي بلایه اوداع
٤/ــــــــــــــــــــ

هاي الدنیا اشما تکبر، من غیر أحبابك تزغر
غربه ابکل خطوه اتحس و الدنیا صعبه
و من اتفارگ اخوانك، و اتحس ابدهرك خانك
أیامك وحشه تمر کل لحظه غربه

وین ما أنطي الوجه تدمع اعیوني
ابلایه اخوتي اتغرّبت
من أصیح إخواني وین ایشتّموني
زینب آنه اتلوّعت

بدیّه احبال دنیه و مارحمت ویاي
بدیّه احبال بنت حیدر و أمشي اویه اعداي
من یفزع و ایفل احبالي بلایه اوداع
۵/ــــــــــــــــــــ

هذا الدرب الماشیته، کوفه و شام ابتالیته
و اشیخفي وکتي بعد من المصایب
و الشمات اتلاگیني، و اتشوف ادموعي بعیني
و الچان لضعني حمه عن عیني غایب

آه یالکوفه و یأهل الشام
باچر و أنظر الشامت فرح
الناس کلها اتباوع اوجوه الحرایر
و بالخجل گلبي انذبح

تشوف الناس بنت حیدر مابین أغراب
تشوف الناس ناگتها ابإید الأجناب
حرمه و أمشي ابغیر الوالي بلایه اوداع





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11145

📜قصیدة: [ فداء لمثواك ]

🎤أداء الملا قحطان البدیري
🖊الشاعر المرحوم محمدمهدي الجواهري
📆 ليلة ١٨ محرم ١٤٤٣ هـ.
ــــــــــــــــــــــــــــــــ

فِدَاءً لمثواكَ من مَضْجَعِ
تَنَوَّرَ بالأبلَجِ الأروَعِ

بأعبقَ من نَفحاتِ الجِنانِ
رُوْحَاً و من مِسْكِها أَضْوَعِ

وَرَعْيَاً ليومِكَ يومِ "الطُّفوف"
وسَقْيَاً لأرضِكَ مِن مَصْرَعِ

وحُزْناً عليكَ بِحَبْسِ النفوس
على نَهْجِكَ النَّيِّرِ المَهْيَعِ



تعاليتَ من مُفْزِعٍ للحُتوفِ
وبُورِكَ قبرُكَ من مَفْزَعِ

تلوذُ الدُّهورُ فَمِنْ سُجَّدٍ
على جانبيه ومن رُكَّعِ

شَمَمْتُ ثَرَاكَ فَهَبَّ النَّسِيمُ
نَسِيمُ الكَرَامَةِ مِنْ بَلْقَعِ

وعَفَّرْتُ خَدِّي بحيثُ استراحَ
خَدٌّ تَفَرَّىٰ ولم يَضْرَعِ



وحيثُ سنابِكُ خيلِ الطُّغَاةِ
جالتْ عليهِ ولم يَخْشَعِ

وَخِلْتُ وقد طارتِ الذكرياتُ
بِروحي إلى عَالَمٍ أرْفَعِ

وطُفْتُ بقبرِكَ طَوْفَ الخَيَالِ
بصومعةِ المُلْهَمِ المُبْدِعِ

كأنَّ يَدَاً مِنْ وَرَاءِ الضَّرِيحِ
حمراءَ " مَبْتُورَةَ الإصْبَعِ"

تَمُدُّ إلى عَالَمٍ بالخُنُوعِ
وَالضَّيْمِ ذي شَرَقٍ مُتْرَعِ



فيابنَ البتولِ وحَسْبِي بِهَا
ضَمَاناً على كُلِّ ما أَدَّعِي

ويابنَ التي لم يَضَعْ مِثْلُها
كمِثْلِكِ حَمْلاً ولم تُرْضِعِ

ويابنَ البَطِينِ بلا بِطْنَةٍ
ويابنَ الفتى الحاسرِ الأنْزَعِ

ويا غُصْنَ "هاشِمَ" لم يَنْفَتِحْ
بأزْهَرَ منكَ ولم يُفْرِعِ

ويا واصِلاً من نشيدِ الخُلود
خِتَامَ القصيدةِ بالمَطْلَعِ



يَسِيرُ الوَرَى بركابِ الزمانِ
مِنْ مُسْتَقِيمٍ ومن أظْلَعِ

وأنتَ تُسَيِّرُ رَكْبَ الخلودِ
ما تَسْتَجِدُّ لهُ يَتْبَعِ

تَمَثَّلْتُ يومَكَ في خاطرِي
ورَدَّدْتُ صوتَكَ في مَسْمَعِي

وَمَحَّصْتُ أمْرَكَ لم أرْتَهِبْ
بِنَقْلِ " الرُّوَاةِ " ولم أُُخْدَعِ

وقُلْتُ: لعلَّ دَوِيَّ السنين
بأصداءِ حادثِكَ المُفْجِعِ

وَمَا رَتَّلَ المُخْلِصُونَ الدُّعَاةُ
من " مُرْسِلِينَ " ومنْ "سُجَّعِ"

ومِنْ "ناثراتٍ" عليكَ المساءَ
والصُّبْحَ بالشَّعْرِ والأدْمُعِ

وماذا! أأرْوَعُ مِنْ أنْ يَكُون
لَحْمُكَ وَقْفَاً على المِبْضَعِ





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11147

📜: [ شيخ المشايه ]

🎤أداء الملا قحطان البدیري
🖊الشاعر: عمار هليل الواسطي
📆 ليلة ٢٦ محرم ١٤٤٣ هـ.
ــــــــــــــــــــــــــــــ

یدري ابکل سنه مشّاي أتعنّاه
وصلت الموت إجاني و هلا ابهالجیّه

حبیبي و الطبیب احسین شفته ابطیف
شد حیلي اعله دربه وگلي مگضیّه

و ابهاي السنه یدریني اله مشتاگ
یعرفني أحسبه الروح و الریّه

تعال اویاي گلي و لا تهم للموت
سمعته ذاك صوته الکله حنیّه

حضرني ابموتتي و غمّض اعیوني
و هاي هدیّه لکل محب روحه حسینیه

رساله للخدم عن تجربة أجیال
صفّوا اویه الحسین الراي و النیّه

شکراً یا حسین من گلب و السان
خذتني ابطیب خاطر و إقبلت بیّه






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11149

📜قصیدة: [ يا طريق الجنة ]

🎤أداء الملا قحطان البدیري
🖊الشاعر: واثق العيساوي
📆 ليلة ٢٤ محرم ١٤٤٣ هـ.
ــــــــــــــــــــــــــــــ

المستهل:

یا طریق الجنة حضّر و أفرش النه الضوه
یختلف بین المواکب حتی طعم الهوه
و اتصیح الضمایر صوت أهلاً یزایر
۱/ــــــــــــــــــــ

یا طریق حنّینه، و احنه شوگ البینه
اتّرجمه المشّایه
اتلگّه هاي أحبابك، من تشم اترابك
ویه خفگ الرایه

لا مو فوگ الگاع، اجناح الشوگ ابساع
یاخذنه لکربلا
جنة انت و ویاك، کلها اتگلك هاك
الزوّار امدلِلـه

صح سنه احنه افترگنه
و هسه حان الوعد
نمشي چم ملیون فوگك
و انت تطلب بعد
و ایهز المشاعر صوت أهلاً یزایر
۲/ــــــــــــــــــــ

ثورة مو مشّایه، و الحسین الغایه
ابکربلا ایحیّینه
و الگصد محبوبه، ماتضیع ادروبه
ابگلبه صارت عینه

یطوي الگاع الشوگ، نوصل للمعشوگ
یسوه احسین العمر
و الما ناوي ایروح، هم ایگوم ایروح
گلبه ایصدر أمر

اطلع و شوف المواکب
لایصیبك کسل
المشي و الخدمه هذي
هي خیر العمل
اسمع لا تکابر صوت أهلاً یزایر
۳/ــــــــــــــــــــ

ابهالطریق عنوانك، یتّضح ایمانك
اتعلم التضحیه
امشي و اخذ اذنوبك، و اگصد لمحبوبك
منه اخذ تزکیه

حِب احسین و شوف، و اگصدله و ملهوف
منه اتعلم درس
بس عوف اللاموك، یردون ایخلوك
تمشي ابدرب العکس

خطوة المشّایه نبضه
ابکل گلب من تدگ
و اسأل المایمشي یبقه
ابیته بس مختنگ
و یرتاح الیناصر صوت أهلاً یزایر
٤/ــــــــــــــــــــ

یا طریق خدامك، أوفیاء لأیامك
سوو الما یُعقَل
الزایر الینخاهم، کلهم ایگولوله
تأمر و تدلل

ابکل موکب مفتوح، لابد من اتروح
تلگه اسوالف عجب
الخادم صح تعبان، بس من یتلگاك
کله ایروح التعب

عفیه یا أهل العراق
الصرتوا مضرب مثل
نسمع الشکراً تجینه
من جمیع الدول
کثروا ابهل حناجر صوت أهلاً یزایر
۵/ــــــــــــــــــــ

ربي لاتحرمنه، من نعیم الخدمه
و أربعین احسینك
الخدمه هيه الواقع، بالدلیل القاطع
تبقه تنصر دینك

احسین الحامي الدین، و احنه اویاه ماشین
للموت انظل خدم
و منصور الفد یوم، حتی ایغیض اعداه
ابدربه ایثّبت قدم





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11151

📜قصیدة: [ الك موكب مشينه ]

🎤أداء الملا قحطان البدیري
🖊الشاعر: طلال آل طالب الكاظمي
📆 ليلة ٢٢ محرم ١٤٤٣ هـ.
ــــــــــــــــــــــــــــــ

المستهل:

تره ابرحلة سبینه
الك موکب مشینه
مسیر الضعن یحسین
عزاء و بچّه کل عین
الك موکب مشینه
۱/ــــــــــــــــــــ

من یوم الحده الحادي ابرواحلنه
تهیأنه لمراسیم الحزن کلنه
و خل موکب نأسس للعزه گلنه
و مشه موکبنه و اهتزت سلاسلنه

ونین الگلب رادود
صار و بالنعي ایجود
و صار ابهذا الونین
عزاء و بچّه کل عین
الك موکب مشینه
۲/ــــــــــــــــــــ

یخویه و ما قرینه ابهالنعي أشعار
حنین الروح هو السولف اللي صار
و مشاعل موکبك صارت یبوالأحرار
نار اگلوبنه و عندك خبر هالنار

و منابرنه الرواحل
نبث منها المقاتل
مقاتلکم یطیبین
عزاء و بچّه کل عین
الك موکب مشینه
۳/ــــــــــــــــــــ

و ما جبنه خطیب ایوضّح الأبعاد
أنا و شبلك ذهلنه ایزید و ابن ازیاد
أنا احچیت ابخطاباتي وعظ و ارشاد
و أبیات المصیبه أقراهن السجاد

بین الکوفه و الشام
حچینه ادروس و آلام
و صار ابهالمکانین
عزاء و بچّه کل عین
الك موکب مشینه
٤/ــــــــــــــــــــ

و تشابیه الذي اعرضناها مو تمثیل
مشاهد کلها من واقع یهد الحیل
و أقواهن الصار و جره ابذاك اللیل
من فزّت رقیّه و ظل دمعها ایسیل

رقیّه و حاضنه الراس
مشهد کله احساس
و نصبنه اویاها بالحین
عزاء و بچّه کل عین
الك موکب مشینه
۵/ــــــــــــــــــــ

المواکب کل شعیره اللي یقیموها
من عدنه یبوالیمه تعلموها
و هاي الأربعین الإجوا یحیوها
مثل خطواتنه قرروا یمشوها

ملایین التعنّت
مثلنه الك حنّت
و سوّت هالملایین
عزاء و بچّه کل عین
الك موکب مشینه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11167

📜قصیدة: [ عيني عالدرب ]

🎤أداء الملا قحطان البدیري
🖊الشاعر: عمار هليل الواسطي
📆 ليلة ٢٥ محرم ١٤٤٣ هـ.
ــــــــــــــــــــــــــــــ

المستهل:

عیني عالدرب دگات الگلب
تترقب أول رایه
واگف مستعد مشتاگ و أعد
یمته تجي المشایه
هلا ابکل الیزورون
هلا ابوفایة أم عون
۱/ــــــــــــــــــــ

موکب چنه گلبي الما یسد بابه
لأن خدام أبوالسجاد أحبابه
أنا ابماي الورد رشیتها أعتابه
عطر جنة أشم ابریحة اترابه

یتشرف بالزایر یبقه موکبي
مادام ابدمعاته الحزن الزینبي

کل یوم الیمر أصبر عالجمر
مشبوحه تبقه اعیوني
أرفع رایتي تبدي قصتي
أحسب متی ایشرفوني
علی راسي و تشرفون
هلا ابوفایة أم عون
۲/ــــــــــــــــــــ

أولادي و صحبتي اگلوب مشتاگه
مثل ناطر عزیز امطوّل افراگه
نجي من الصبح و اهناك نتلاگه
کلمن یبدي دوره و یعلن أشواگه

لو مر أول زایر من أستقبله
مثل الفاگد روحه و روحه اترد اله

أتلگاه هلا تشبه کربلا
حزنانه بس ملهوفه
من أستقبله اشگد أتوسله
ایخلیني أبوس اچفوفه
أخط ابدمع العیون
هلا ابوفایة أم عون
۳/ــــــــــــــــــــ

أتحزم وفه و یتدلل الزایر
یأمرني و أگله کل أمر صایر
یالمشاي ابشر ماتظل حایر
هچ الیوم یگضي و یبتدي باچر

إسم الموکب واضح و ابصفه علم
موکب أزغر خادم لتراب الخدم

خادم و أفتخر گضیت العمر
للیمشي أنطي اعیوني
ماکو کل تعب راحه و السبب
أبیض گلب یدروني
بأمرهم و آني ممنون
هلا ابوفایة أم عون
٤/ــــــــــــــــــــ

أفخر لو کرامه ابموکبي صارت
أگول أم الحسن للموکب اختارت
أواسیها و أگلها بنتچ احتارت
علیها الدنیا دارت و البشر جارت

أشکرها ابکل مره و دمعي اتفززه
أبقه أصرخ یا زینب وکت المعجزه

سیدة الشرف و آني بروحي طف
أحزاني نبض ابگلبي
آني و موکبي لخیط امن العبي
ما أوصل بکل تعبي
یریت امن الیجازون
هلا ابوفایة أم عون
۵/ــــــــــــــــــــ

أغله أیام عمري اهنانه أگضیها
أتمنه متگضي ابروحي شاریها
گایلها گبل و الیوم أحچیها
أحسب ساعه ساعه حتی أحییها

أهلا بالمشایه عنوان الفخر
أتمنه أسمعها ابصوت المنتظر

حاضر سیدي یمشي یبتدي
و ایواسي جده الضامي
فدوه لهالإسم أتمنه ابحلم
الگاه وگف گدامي
یرحب بالیواسون
هلا ابوفایة أم عون
٦/ــــــــــــــــــــ

أنا امسجل وصیتي لأهلي و بصوتي
اذا حان الأجل مني و دنه موتي
أرید ابموکبي اتمرون تابوتي
إقروا الفاتحه و شیلوني یا خوتي

من بخت المشایه و أنفاسهم عطر
راید آخذ منهن تذکار للگبر

هاي اوصیتي و الکل اخوتي
وکت المشي ذکروني
ابدعوه و فاتحه روحي الرابحه
المشایه لو زاروني
صدی صوتي یسمعون
هلا ابوفایة أم عون





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11169

📜قصیدة: [ اتعنه ازورك ]

🎤أداء الملا قحطان البدیري
🖊الشاعر: حسن مسلم العتابي
📆 ليلة ٤ محرم ١٤٤٣ هـ.
ــــــــــــــــــــــــــــــ

المستهل:

أتعنه أزورك یحسین
بدموعي و بآهاتي
۱/ــــــــــــــــــــ

یحسین أسافرلك دمع و ابنیه
إني أزور اجروحك القدسیه
و من کُلِ حدبٍ صوت یصرخ بیّه

ازیارة اجروحك کل یوم
أبدیها من حسراتي
۲/ــــــــــــــــــــ

متخذه دمعاتي بغیابك منهج
للطف اجیت ابیمه یمه آنه ألهج
اجروحك طفتهن مثل طوفان الحج

کعبه الجرح طفته ابـ آه
بس السعي بدمعاتي
۳/ــــــــــــــــــــ

صلّت ادموعي بغیبتك فرض الـ آه
ما مرني لیل و غمّضت لا والله
یالما حملت افراگ أخیك و اجفاه

کون العطش یبني ایموت
و اتموت کل عبراتي
٤/ــــــــــــــــــــ

و اتعنه دمعي اجروحك البالخیمه
یمطر اسم الله اسم الله عکس الغیمه
نیران و ارماد اعله وجه الهیمه

طاح الدمع فوگ النار
و اشتعلت ابکل ذاتي





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11171

📜قصیدة: [ حلم ضاع ]

🎤أداء الملا قحطان البدیري
🖊الشاعر: واثق العيساوي
📆 ليلة ٣٠ محرم ١٤٤٣ هـ.
ــــــــــــــــــــــــــــــ

المستهل:

یا رقیّه یا حلم ضاع امن إدیّه یا رقیّه
گلبچ اشلون انکسر من غفیتي اعله النحر
یا رقیّه یا رقیّه
۱/ــــــــــــــــــــ

غربه و الصفنه دمع و ابکل نفس نار
درب مفروش ابألم و امغیّم أخطار
و طفله نظرتها رعب ماتعرف اشصار
تفز لو هب الهوه و مر بیها خطار

یا رقیّه امنین هذا الدم بأذانچ یا رقیّه
باقي للترچیه أثر من غفیتي اعله النحر
یا رقیّه یا رقیّه
۲/ــــــــــــــــــــ

من تسألیني ابدمعتچ تغرگ العین
نظرة اعیونچ رقیّه رایحه لوین
اي سؤالچ بالگلب خلالي علتین
عمّه ذاك اعله الرمح مو والدي احسین؟

یا رقیّه والله محتاره شجاوب یا رقیّه
دمعي بخدودي عثر من غفیتي اعله النحر
یا رقیّه یا رقیّه
۳/ــــــــــــــــــــ

اشما گرب من عدنه واحد جایب آلام
شفتچ اتلوذین بیّه وي الأیتام
هو المفارگ حبیبه یگدر اینام؟
ایغیب بس میغیب لحظه عن الأحلام

یا رقیّه بارده اضلوع الخرابه یا رقیّه
موحش و لیلچ خطر من غفیتي اعله النحر
یا رقیّه یا رقیّه
٤/ــــــــــــــــــــ

عمّه لتفزین نامي لیلچ اطویل
غافیه و دمعة اعیونچ گامت اتسیل
راس أبوچ اعله الرمح ویه الهوه ایمیل
و اسمعت ونات صوتچ چنها ترتیل

یا رقیّه چنچ اتگولین بویه یا رقیّه
شفتي بحلامچ صور من غفیتي اعله النحر
یا رقیّه یا رقیّه
۵/ــــــــــــــــــــ

بالخرابه ریت عمّه ماصحیتي
و لا طلبتي احسین مني و لا بچیتي
شفتي نحره و شیبته و ویاه حچیتي
صحتي بویه و عالنحر سکته غفیتي

یا رقیّه نمتي لو فارگتي روحچ یا رقیّه
غفوة لو نومة سفر من غفیتي اعله النحر
یا رقیّه یا رقیّه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11173

📜قصیدة: [ الوداع ]

🎤أداء الملا قحطان البدیري
🖊الشاعر: سيد علي الموسوي
📆 ليلة ١٠ محرم ١٤٤٣ هـ.
ــــــــــــــــــــــــــــــ

المستهل:

الوداع الوداع یا أباعبدالله
۱/ــــــــــــــــــــ

اللیله یا زینب ننادي و ننتحب ویاهه
اهمومها ابلیلة العاشر والله ما ننساهه
لیلة اوداع و حزینه بنت علي نلگاهه
انصیح واویلاه باچر تنذبح ولیاهه

باچر اجروح و ضیاع یا أباعبدالله
۲/ــــــــــــــــــــ

مثل هاي اللیله زینب چم جرح ماذیهه
ویلي و ادموع الموادع عالوجن تجریهه
أبوالیمه اشچم وصیّه ابحسرته ایوصیهه
اعیالي یا خویه أریدچ عوض عني احمیهه

ابعیني یا حلو الطباع یا أباعبدالله
۳/ــــــــــــــــــــ

یالموالي ابحسره نوح و دمعتك هماله
اللیله محبوبك یودع عیلته و أطفاله
اجرح احساسك لزینب شوفها ابیا حاله
باچر احسینك یعذبه امراکض الخیاله

للسحگ عدها اجتماع یا أباعبدالله
٤/ــــــــــــــــــــ

اللیله خل انعیش لوعة زینب و کفالهه
ایخاف ابوفاضل علیها لا یبان اخیالهه
آه واویلاه باچر من تطیح ارجالهه
بالضعن تالي سبیّه و العده تبرالهه

من عگب عین السباع یا أباعبدالله
۵/ــــــــــــــــــــ

حسرة أم جاسم لبنها اتحسّر ابهاللیله
عیش فرگة علي الأکبر و انتحب وي لیلی
انحب لعبدالله و أمه و دمع عینك سیله
ینهدم باچر احسین اعله الطفل کل حیله

امن العطش عبدالله لاع یا أباعبدالله
٦/ــــــــــــــــــــ

هالمسیه ابحسره نبچي و ننعه وي مهدینه
من دمه یجري دمعته عالغریب احسینه
ابلیلة اوداع الغوالي لفاطمه اتعنینه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11175

📜قصیدة: [ انحب لفركاهم ]

🎤أداء الملا قحطان البدیري
🖊الشاعر: سيد علي الموسوي
📆ليلة ٣ محرم ١٤٤٣ هـ.
ــــــــــــــــــــــــــــــ

المستهل:

انحب لفرگاهم و الحسره بیّه
و انتظر ملگاهم صبح و مسیه
۱/ــــــــــــــــــــ

هلي راحوا وکلشي راح اویه الأحبهم
و ادموعي تجري عالطاهر نسبهم
خلوني انحب لطیبة گلبهم
و اعیوني امناطره و تربي لدربهم

کل وکت أتناهم یلفون الیّه
و انتظر ملگاهم صبح و مسیه
۲/ــــــــــــــــــــ

أحبابي أغدي من فدوه لعمرهم
لو بیدي أرکض و أتبع أثرهم
محتاره یاهو یلفیني ابخبرهم
مشتاگه الیا وکت راح أنتظرهم

روحي من اجفاهم شبعت أذیّه
و انتظر ملگاهم صبح و مسیه
۳/ــــــــــــــــــــ

هم لیلي چنّه حادي و بیّه یحدي
و اجفوني امساهره و دمعه اعله خدّي
حسباتي ضلت اتجیب و تودّي
و اعتابي عالمشوا خلوني وحدي

ماخذوني اویاهم للغاضریه
و انتظر ملگاهم صبح و مسیه
٤/ــــــــــــــــــــ

عن عیني غاب أبوي و غابت أمي
مهظومه محد امن اخواني یمي
لا زینب عمتي لا عباس عمي
محتاره حیره و المن أشکي همي

حایره ابلیاهم و اصفج بدیّه
و انتظر ملگاهم صبح و مسیه
۵/ــــــــــــــــــــ

ملهوفه وینه الیخبّرني عنهم
غیّابي ابخیر یا ربي عسنهم
کل خوفي هالزمن یحرمني منهم
و أتمنه موتي لو ما رد ضعنهم

والله ما أنساهم حد المنیه
و انتظر ملگاهم صبح و مسیه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11178

📜قصیدة: [ جسام يا ضنوتي ]

🎤أداء الملا قحطان البدیري
🖊الشاعر: المرحوم عبدالحسين أبو شبع
📆 ليلة ٨ محرم ١٤٤٣ هـ.
ــــــــــــــــــــــــــــــ

المستهل:

جسّام یا ضنوتي رایح رایح امن اعیوني
مارحمني الدهر انت نور البصر
رایح رایح امن اعیوني
۱/ــــــــــــــــــــ

یولیدي تدري ابهذا گلبي انطعن
بمصاب أبوك الحسن بعد الحسن
انت الأمل ظلیت أتاني الزمن
لن اعله الثوب العرس تلبس چفن

اتنیت الزمن و الأمل وینه یبني انخطف لوني
ودعتني اشبعد انتظر یا وعد
رایح رایح امن اعیوني
۲/ــــــــــــــــــــ

یبني ابرباك اتعبت حیلي انضهد
محنیه چنت اعلیك فوگ المهد
ینعدل ظهري فکرت یلولد
و افگدت گلت انت الرجا و الضمد

عرسك بفکري حلم یمته بعرسك یبشروني
هذا حلمي صبح شو حزن مو فرح
رایح رایح امن اعیوني
۳/ــــــــــــــــــــ

چنت احسب اسنین العمر بالزغر
و أفرح ابکل سنة الجدیدة التمر
و اثنعش یبني جمّعت لك عمر
هاي السنین اتعبت بیها اشکثر

لن ساعه وحده العده اسنینك منها یحرموني
دهري یبني اشلعب یبني کل التعب
رایح رایح امن اعیوني
٤/ــــــــــــــــــــ

و اطلعت من بیتي علی عزتي
گلت ابني اگبالي و اهو رجوتي
و ابکربلا حین انصبت خیمتي
انت چنت یا ضنوتي شمعتي

بس انت یبني صرت یمي وین الیودوني
سلوتي ابرجوتي یالترد وحشتي
رایح رایح امن اعیوني





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/11181