📜قصیدة: [ وين ابوفاضل ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٧ محرم ١٤٢٩ هـ.
ــــــــــــــــــــــــــــــ

المستهل:

وین أبوفاضل وینه
و الزمن دار اعلینه
۱/ــــــــــــــــــــ

أحس گلبي انخمش حین الرحت عني
گلت میعود أخاف و ینگطع ظني
گمت مذعوره یالفرگاك دوهني
و بلا اراده ارتفع یابالفضل وني

بالفاجعه حسّینه
و لشوفتك حنینه
۲/ــــــــــــــــــــ

گمت مذعوره لك و ادموعي تبرالي
و أحس بأطفال تبچي و تسحب أذیالي
حرت أبچي علیهم لو علی حالي
و بعد یا حیل عندي و اوصل لوالي

للمشرعه اتعنینه
نتعثر امن امشینه
۳/ــــــــــــــــــــ

اوصلت وسط الدرب و اعیوني دم تدمع
و أنادي اعلیك یا عباس ماتسمع
دلیلي مایخلي للخیم ارجع
و لا حیل البگالي و اعتني المصرع

گلبي فگد تمکینه
وسط الدرب ظلینه
٤/ــــــــــــــــــــ

جمعت الحیل کله و أمنت روحي
اذا شفت الگمر یهده و یخف نوحي
یمن متلوعه و جروحچ اجروحي
روحي للنهر یا بنت علي روحي

روحي لبیت والینه
و اخذي الحرم و اسکینه
۵/ــــــــــــــــــــ

ذکرت اسکینه و العین أشبحت لیها
شفتها للنهر ترکض یوالیها
و لن امن البعد أسمع بواچیها
و بدیها اچفوف و اتلولح لي بیدیها

و صاحت یا عمه الگینه
فوگ النهر چفینه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10680

📜قصیدة: [ يا صاحب الغيره ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٧ محرم ١٤٢٩ هـ.
ــــــــــــــــــــــــــــــ

المستهل:

صوت الأجل ناداك یا صاحب الغیره
ماخذ دلیلي اویاك یا صاحب الغیره
تفجعني من اتروح یا أغلی من الروح
یا صاحب الغیره
۱/ــــــــــــــــــــ

یابالفضل عالمشرعه صوت المنیه اینادي
و چن کاتب اعلینه القدر نتفارگ ابهالوادي
یا خویه گبل اموادعك انظر بنات الهادي
و اتصوّر ابلایه ولي بعدك علیها السادي

اتصوره لهالحال یا صاحب الغیره
عیلتنه بین أنذال یا صاحب الغیره
تبگه علیك اتنوح یا أغلی من الروح
یا صاحب الغیره
۲/ــــــــــــــــــــ

عیلتنه تبگه ابلا ولي و اتصور انت الحاله
چم حرمه راحت تنسبي من تهجم الخیاله
یا خویه و ابوسط الخیم صوت الحزن یتعاله
ترضه العده یابالفضل لمخیمك تدناله

خدر البنیته ایطیح یا صاحب الغیره
و تبگه الیتامه اتصیح یا صاحب الغیره
لیك النظر مشبوح یا أغلی من الروح
یا صاحب الغیره
۳/ــــــــــــــــــــ

یا خویه لو عني رحت چم حاله تتراوعلي
جیش العده و المعرکه و بیت الخدر و أطفالي
و من تبتعد عن ناظري تهدم رکن آمالي
و اهمومي یا راعي الفضل تتراکم ابدلالي

و احتار أصد لاوین یا صاحب الغیره
و تدري اشتشوف العین یا صاحب الغیره
جیش الضلاله ایلوح یا أغلی من الروح
یا صاحب الغیره
٤/ــــــــــــــــــــ

للمعرکه اجیوش العده تتحشد و تتجمع
و انت علی صدر النهر توگع خضیب اموزع
بعدك وحید ابلا أخو صوب الحرب راح أطلع
مکسور خاطر منهظم من عندي و اشتتوقع

وحدي أصد للجیش یا صاحب الغیره
و أصرخ عفتني لیش یا صاحب الغیره
دمعي الك مسفوح یا أغلی من الروح
یا صاحب الغیره
۵/ــــــــــــــــــــ

صد الگمر لبن النبي و العاطفه جیّاشه
و گله یبوالیمه العمر لجلك عسن یتلاشه
ضحه أبویه للنبي یوم الرغد بفراشه
و مثله أضحیلك أنا و حاشه أعوفك حاشه

یا خویه بالبتّار یا صاحب الغیره
أهدم عروش أشرار یا صاحب الغیره
و أبني لمجدنه اصروح یا أغلی من الروح
یا صاحب الغیره
٦/ــــــــــــــــــــ

راعي الفضل لبن النبي چلمة وفه ایرددها
و وگفة علي للمصطفی عالمشرعه جددها
روس الضلاله ابساعده سیف العدل یحصدها
و اجسومه أهلها اموذره فوگ الثره ایوسدها

و یهتف الك هالروس یا صاحب الغیره
بیها الحقد مغروس یا صاحب الغیره
ریحة غدرها اتفوح یا أغلی من الروح
یا صاحب الغیره
۷/ــــــــــــــــــــ

عالمشرعه راعي الفضل یحصد زلم عدوانه
سیفه ارتوه دم و لچن روحه بگت عطشانه
نار الضمه و نار الحرب ما زعزعت ایمانه
و من صوّبه بعینه السهم صاحت دمه وجدانه

اعذرني خویه حسین یا صاحب الغیره
طاح السهم بالعین یا صاحب الغیره
و ادري العذر مسموح یا أغلی من الروح
یا صاحب الغیره
۸/ــــــــــــــــــــ

صوتك سمعته یا گمر صوت الأجل یفجعني
و مهظوم اجیتك للنهر گوم اگعد و اسمعني
ریتك چنت یابالفضل عالمشرعه اتودعني
و اخلافك بوادي الأسی چم نایبه تتبعني

ظهري کسرته الیوم یا صاحب الغیره
لبچي علیك ادموم یا صاحب الغیره
یالعالنهر مطروح یا أغلی من الروح
یا صاحب الغیره





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10680

📜قصیدة: [ المجالس تصنع انسان ]

🎤أداء الملا قحطان البدیري
🖊الشاعر علي عباس الربيعاوي
📆 استقبال شهر محرم ١٤٤٣ هـ.
ــــــــــــــــــــــــــــــ

المستهل:

إلی حضرة مجالسنه الکریمه
إلی من حفظت الفطره السلیمه
شکر من گلب و السان
المجالس تصنع انسان
مجالسنه الکریمه
۱/ــــــــــــــــــــ

إلی من حفظت الدین بوکت صار العدم دین
تلم کل الثقافات اعلی لطمه و دمعة العین
یمن لمّت الشبّان اعلی سفرة مجلس احسین
الشکر عرفان و احساس من کل المعزّین

شکر للي صُبح للدین حارس
شکر لأهل المواکب و المجالس
صدگ صلبة الإیمان
المجالس تصنع انسان
مجالسنه الکریمه
۲/ــــــــــــــــــــ

إلی من حفظت الشاب بوکت کلشي صدگ ضاع
الیطب ابمجلس احسین طلع بي شمرة اسباع
نعم من صارت ازماط کلف الیشیل الإشراع
نفسهم الیلطمون حرس ظلوا علی الگاع

لا تستصغر الدمعه الزغیره
العشگ هاي المجالس عنده غیره
اللطم لو وین ماچان
المجالس تصنع انسان
مجالسنه الکریمه
۳/ــــــــــــــــــــ

بثقافة عالم الروح المجالس تغذیة روح
الیطب لمجلس احسین یصیر انسان و یروح
یرد لعیاله مکسور السمع معصوم مذبوح
احترام لکل دیانات و تعاطف ویه الجروح

درس عدنه بنبذ کل عنصریه
علي و جون او وهب فوگ الوطیه
التعاطف أسمی عنوان
المجالس تصنع انسان
مجالسنه الکریمه
٤/ــــــــــــــــــــ

شکر للمنبر العایش عمر ینطي روایات
بمدرسة الحیاه صار الأول بالثقافات
التخرّج من الحسین ضمن أعلی الشهادات
و الیسمونه لطّام نجم و إعلی السماوات

الشکر کل الشکر لأهل المنابر
أمسي الأول الیوم اویه باچر
المنابر تبقی عنوان
المجالس تصنع انسان
مجالسنه الکریمه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10715

📜قصیدة: [ كلما اشاهد شمع ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٨ محرم ١٤٢٩ هـ.
ــــــــــــــــــــــــــــــ

المستهل:

کلما أشاهد شمع
أحني لمصابك ضلع
۱/ــــــــــــــــــــ

جسّام الك رف الگلب
و أول رفیفه ابمهدك
من چنت أناغیك و أصب
دمع الحنان ابخدك
أبچي آنه و أضحکلك غصب
خوفي الزمان ایضدّك
یولیدي و ایهون الصعب
من تغفه روحي ابسدك

یولیدي من تبتسم
بگلبي الفرح یرتسم
یولیدي یا جسّام
۲/ــــــــــــــــــــ

عد چم سنه یبني و آنه
أسهر و أباري و أرعه
متمحنه و ظهري إنحنه
و لجلك ذبت چالشمعه
او یا ما تِنه گلبي المنه
مثل الیتاني زرعه
و انت الهنه و روض الهنه
ما یروه إلّا ابدمعه

شمعه اعلگتها العمر
و دمعه اعله خدي جمر
یولیدي یا جسّام




• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10681

📜قصیدة: [ يزهرة سنيني ]

🎤أداء الملا قحطان البدیري
🖊الشاعر هيثم سعودي الكربلائي
📆 ليلة ٨ محرم ١٤٢٩ هـ.
ــــــــــــــــــــــــــــــ

المستهل:

یزهرة سنیني سگیتك حنیني
أنوح لغیابك ییمه یجاسم
فجعني مصابك ییمه یجاسم
سگیتك حنیني
۱/ــــــــــــــــــــ

یمن وسط الجفن شلتك
حلم یتمرجح ابرمشي
و یمن تمشي السعاده اویاك
یا جسّام من تمشي
دلیلي مملکة حبك
یمن متربع ابعرشي
ذخرتك للکبر یبني
و تشیل ابموتتي نعشي

أعیش الأماني و سعیده ابزماني
و أحسّب حسابك ییمه یجاسم
فجعني مصابك ییمه یجاسم
سگیتك حنیني
۲/ــــــــــــــــــــ

حلم وردي و صرت تکبر
و أعِد العمرك أعوامه
اشکثر ماتکبر اسنینه
دلیلي تکبر أحلامه
السهر یبني یهد حیلي
صعب و أتحمل آلامه
و اذا یضحك بدر وجهك
زماني تضحك أیامه

یبدر اللیالي و أهیم ابخیالي
و أراقب شبابك ییمه یجاسم
فجعني مصابك ییمه یجاسم
سگیتك حنیني
۳/ــــــــــــــــــــ

شبابك حصته عمري
و الك مذخوره هالحصه
أرید ابکربلا اتوفّي
و اجت ابکربلا الفرصه
و رحت متسلّح لعمك
خذت للموزمه رخصه
و أحس منجل رحیلك صار
یحوش ابچبدي و ایگصه

أناطر رجوعك و أعاین شموعك
و اواصل عتابك ییمه یجاسم
فجعني مصابك ییمه یجاسم
سگیتك حنیني
٤/ــــــــــــــــــــ

الحرب زفة عرس یبني
و صلیل السیف هلهوله
خضتها ابمجدك و مجدك
نجم ما واحد اینوله
أراقب حربك و گلبي
یگلي عایني لطوله
العواطف جاوبت گلبتي
السیوف اعلیه مسلوله

صلیل الصوارم یفل العزایم
و عزمهم یهابك ییمه یجاسم
فجعني مصابك ییمه یجاسم
سگیتك حنیني
۵/ــــــــــــــــــــ

تخوض الملحمه و عزمك
یصول و شیمتك تحدي
و سیفك یخطف الأرواح
و الحلگ الأجل یهدي
ابسماء المعرکه غیمه
احجبت عني بدر سعدي
و لن شفتك علی الحومه
خضیب ابضربة العبدي

بسماء المصایب بدر عمري غایب
بمطر دم سحابك ییمه یجاسم
فجعني مصابك ییمه یجاسم
سگیتك حنیني
٦/ــــــــــــــــــــ

و علی اجدام الحزن جیتك
أنوح و دمعتي شفره
اویه کل دمعه ألم تنزل
تجرّح خدي و اتحفره
صدگ هذا انت یولیدي
التراب الوجهك امعفره
یوردة عمري و أحلامي
علیمن ذابله و صفره

تگطع دلیلي و أصیح ابعویلي
أموت بذهابك ییمه یجاسم
فجعني مصابك ییمه یجاسم
سگیتك حنیني





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10681

📜قصیدة: [ رباني عابس ]

🎤أداء الملا قحطان البدیري
🖊الشاعر ثائر الكناني
📆 استقبال شهر محرم ١٤٤٣ هـ.
ــــــــــــــــــــــــــــــ

المستهل:

ذره ذره روحي کبرت بالمجالس
ذره ذره عاشگ و ربّاني عابس
مجنونك حبیبي
۱/ــــــــــــــــــــ

ابعالم الذر و المعاني
کتبت احروف الولاء
جاذبیه بکل حروفك
رافع أرکان السماء
حسین یا صحوة ضمایر
انت عنوان البقاء
ضامي و اتروّي المشاعر
سر وجودك کربلاء

ذره ذره اتکوّن بجرحك صروح
ذره ذره جبل یا معنی الجروح
مجنونك حبیبي
۲/ــــــــــــــــــــ

طفل بذیال المواکب
أجهل ألوان السواد
أمي من أول محرم
أسمع اتگلي حداد
صعب تفسیر المواجع
و آني في عالم مهاد
أشعر بکل طمأنینه
راحه تنتاب الفؤاد

ذره ذره أسمع بعبره تگول
ذره ذره صیر خادم للبتول
مجنونك حبیبي
۳/ــــــــــــــــــــ

کلشي یتغیر فجائي
الضحکه تتحول دموع
باب عتبتنه الحزینه
اتزغرفه ألوان الشموع
أسمع العالم یدوّي
و شفت آلاف الجموع
صورة الخیل الرهیبه
و ماي و اچفوف و ضلوع

ذره ذره أمي کبرها الزمان
ذره ذره آني بدلت المکان
مجنونك حبیبي
٤/ــــــــــــــــــــ

شلت زنجیل اعله چتفي
و رایه سوده اعله السطح
یعني یا بیت النطبه
امخضر ابداره جرح
آني مجنون و حبیبك
العذر منك أستمح
هسه مضمونك عرفته
و لیش انت تنذبح

ذره ذره سامي بجروحك شهید
ذره ذره عالرمل طایح وحید
مجنونك حبیبي
۵/ــــــــــــــــــــ

الخدمه تیجان الضمایر
حافظ اعلیها ابسلوك
مو سهل تترقه بیها
و توصل الرتبة ملوك
صفي بالإخلاص نیتك
کلمن اتحبهم یجوك
الدنیه أیام و لیالي
و صاحب الدنیه ضحوك

ذره ذره العاقبه بحب الحسین
ذره ذره سیدي یا نورَ عین
مجنونك حبیبي
٦/ــــــــــــــــــــ

وظّب امتاع السفرتك
باچر ایطول الوقوف
و البشر محکوم لازم
اموزعه ألوان الحتوف
کامرة حُسن العواقب
امسلطه اعلینه و تشوف
و الیرید احسین لازم
ایعاني آلام الظروف

ذره ذره بالعشگ اعلن وجودك
ذره ذره خدمتك تعلن خلودك
مجنونك حبیبي





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10775

📜قصیدة: [ ولدي ]

🎤أداء الملا قحطان البدیري
🖊الشعر الفصيح: واثق العيساوي
🖊 الشعر الشعبي: كرار حسين الكربلائي
📆 محرم ١٤٤٣ هـ.
ــــــــــــــــــــــــــــــ

المستهل:

في خیمتي هوَ نائمٌ لَم یبكِ منذُ الأمس
السهمُ أطفأ نورهُ و غابَ قبلَ الشمس
وَلَدي حبیبي ظامئاً مذبوح
۱/ــــــــــــــــــــ

وَحدي أجودُ بِدَمعتي و أضیعُ في أحزاني
أبکي علی طفلي دَماً صارَ البُکا عنواني
أخَذوهُ مِني ظامئاً ثم عادَ یُعاني
فالسَهمُ حَزَّ وریدهُ یا لوعةَ الحرمانِ

لمّا نظرتُ بوجههِ صدري اعتلاهُ الهم
تلكَ البراءةُ أصبحت ممزوجةً بالدم
طفلي صغیري یا حبیبَ الروح ظامئاً مذبوح
۲/ــــــــــــــــــــ

لولیت و آنه اعله الهزل بلکت یفز و احچیله
و گبلي منو العِدها ولد منذبح و اتلولیله
اولیدي أمس یم عمته و چف عمته یدعیله
و الیوم أشوفه اعله الرمح درب السبي ایناغیله

ست اشهر و مات الحلم و سنیني صارت هم
و الدمع شیّب بالجفن مالومه ینزل دم
و اسمي تغیّر صار أم النوح ظامئاً مذبوح
۳/ــــــــــــــــــــ

بالأمسِ کانَ بُکائهُ و صِراخهُ یُشجیني
في عینهِ دمعُ الأسی نظراتهُ تُبکیني
الیومَ لا صوتٌ لهُ و هدوئهُ یؤذیني
طفلي ارتویٰ بدمائهِ و أنا الأسی یَرویني

عطشاً بنظرةِ عینهِ و یُدیرُها لِلنَهر
حتّی أتاهُ جَوابهم سهمٌ أصابَ النَحَر
قَابلتُ مَهدك أشتکي و أنوح ظامئاً مذبوح
٤/ــــــــــــــــــــ

بچّیني یفراگ الولد مارید أعیش بدونه
بعیوني ربّیت السهر من فارگنّي اعیونه
أسأل الغیم بکل وکت یا ماي ابني اشلونه
ظل حضني خالي و المهد صاح الگبر خیعونه

أزغر جرح طوله نهر عطشانه خلاني
و عالفاگده مثلي ولد یا موت شمتاني
شلي بحیاتي الدنیا کلها اجروح ظامئاً مذبوح





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10796

📜قصیدة: [ سر الحياة ]

🎤أداء الملا قحطان البدیري
🖊الشاعر علي البصيصي
📆 محرم ١٤٤٣ هـ.
ــــــــــــــــــــــــــــــ

مادام النفس بیّه
دمعة عیني ماتنشف

و من تسألني عنواني
خیمة زینب البالطف

سِر هاي الحیاة اثنین
تربة کربلا و الچف

صدرك موطن العشّاگ
چان امن النسیم أترف

ذوّبني الغرام اویاه
أنسی اعیوني ما أنساه

لو هذا العشگ لو لا
تسکت کلها لو سولف

و أسکت من یلوموني
ماهم لو حچه اللایم

بادي بوجهك المتعوب
و ابنار الخیم خاتم

و بس المحترگ بالشوگ
یعرف لوعة الهایم

یم غیرك مُلُك مارید
یمك أرضی لو خادم

شمسوي الغرام اویاي
یا شهگة غصن عالماي

القصاید و المشاعر هاي
و الحب بس الك راهم






• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10799

📜قصیدة: [ ورد ذبلان ]

🎤أداء الملا قحطان البدیري
و الشيخ حسين الأكرف
🖊الشاعر وسام الشويلي
📆 محرم ١٤٤٣ هـ.
ــــــــــــــــــــــــــــــ

المستهل:

ورد ذبلان بالصحراء
و نهر مگطوع مایجري
یعني انگول مات الماي
و العطشان مایدري
درب غربه و سبیه
عطش شوگ ابرقیه
نهر مگطوع مایجري
ــــــــــــــــــــ

قصیده اجروح قوافیها
یتیمه ادموع لیالیها

أگول اشجایب الورد ابوسط صحرا
و أثر جمره ابغصنها
حظن بستانها و وین ورد یابس
عتب تارس حظنها
رقیه هذي معقوله فلا ترهم
ضرب ورّم متنها
تدور عن وطن ضایع جمر فرگه
اشوکت تلگه وطنها

بلا صوت حچي الموت حچیها

الترافه اشلون داست شوك
الأثر بالگاع صار أحمر
درب تمشیه جر احبال
اتگوم ابسوط من تعثر

زغیره اعله الأذیه
عطش شوگ ابرقیه
و نهر مگطوع مایجري
ــــــــــــــــــــ

مشت لا وین و لا تدري
تعال اتصیح أیا عمري

عگب حضنك ظهر ناگه یصعدوني
و یشدوني ابحبالي
اذا عنك ردت اسأل
أشو مبعد سیاط اترد سؤالي
أطیح و أبقه بالصحرا علیك أشگ
أصیح الحگ یغالي
حنین و دمعة اعیوني عتب صبت
أنا ابحسرة دلالي

عتب روح و الجروح ولتني

یجي الجمّال بیده السوط
بویه و حیل یضربني
اگله اشبیك لیش اویاي
هسه ایعود الیحبني

و اگلها اشسوه بیه
عطش شوگ ابرقیه
و نهر مگطوع مایجري
ــــــــــــــــــــ

الگبل ترتاح علی چفّه
صفت عالگاع اذا تغفه

خرابه و بیها سجنوها
العزیزه اتون منو الیسکن خرابه
رقیه اتنام مهظومه اویه دمعتها
و وسادتها ترابه
یجیها ابطیف و اتنادي
اجه الغالي اجه الوالي هلا به
شکت و اتگله بغیابك یضربوني
علی اعیوني ییابه

چنت وین ضوه العین أخذته

تفز تلگه طشت بي راس
و المذبوح والدها
نومة موت ويه احسین نامت
و اشیگعدها

خذت کاس المنیه
عطش شوگ ابرقیه
و نهر مگطوع مایجري





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10801

📜قصیدة: [ ابوي اهنا ]

🎤أداء الملا قحطان البدیري
🖊الشاعر علي البصيصي
📆 محرم ١٤٤٣ هـ.
ــــــــــــــــــــــــــــــ

أثر خطوات أبوي اهنا
وجهه اهنا صوته اهنا
أبوي اهنا
ــــــــــــــــــــ

و أثر سجادته و عطره
و سبحته و عِمته الخضره
و رساله انخطت ابیمناه
أبوي اهنا

کتب بیها النهر عنوان
و الحیطان و البیبان
صرخت ما مشیتي اویاه

اهنا آخر عتب و أول وداع ایصیر
مابین أمنیاتي و بین ضعن اجفاه
اهنا أکبر جرح عشته
أبو و ایودع ابنیته
و عم یمشي و تظل بالآه

یاخذ اویاه کل حلم بعیوني ساکن
تستفزني بروحته اعیون الأماکن

حنینه و ماگدرت انساه
أثر خطوات أبوي اهنا
أبوي اهنا





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10804

📜قصیدة: [ مشتاقلك ]

🎤أداء الملا قحطان البدیري
🖊الشاعر علي مخيلف
📆 محرم ١٤٤٣ هـ.
ــــــــــــــــــــــــــــــ

المستهل:

مشتاگلك گد البچي و گد الراح
أتمنی لو عندي اجناح مشتاگلك
اهوایه السوالف یا ضریح البیه
یومیه أموت و أحتیي یومیه
مشتاگلك
ــــــــــــــــــــ

یا لهفتي شوگي یکبر دمعي ینزل
کلي حیره
یا لهفتي گلبي ضامي و جرحي دامي
و روحي أسیره
یا لهفتي صمتي موتي و خنگه صوتي
و حزني دیره
یا لهفتي لزینب أمشي فدوه عمري
للأمیره

أشتاگلك و اللیل یخلص خنگه
دوّر اعیوني السافرت للملگه
غیر المدامع یا ضریح اشتلگه
وي زینب امتعبتني حیل الفرگه

أحتاجك شوگ و مشاعر ملیان
عازة نفس للغرگان أحتاجك
أحلامي کلها ازیارة العلویه
یومیه أموت و أحتیي یومیه
مشتاگلك
ــــــــــــــــــــ

یا حسرتي بگلبي جمره و عیني حمره
امن المدامع
یا حسرتي الدنیا هیمه و حزني غیمه
امن المواجع
یا حسرتي امن المشاعر جرحي شاعر
و آنه ضایع
یا حسرتي للزیاره یبقی دمعي
بخدي طابع

بالدمعه و الیاریت متعذب
التمن علیه و گابلاني المغرب
شلال بالفرگه و جبتها امحدِّب
آنه اللي خلص عمره بسمك یندب

محتاملك گد الهوه و گد الناس
گد الوفه العد عباس محتاملك
من الطفوله و نیتي هاي النیه
یومیه أموت و أحتیي یومیه
مشتاگلك





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10815

📜قصیدة: [ شهر الأحزان ]

🎤أداء الملا قحطان البدیري
🖊الشاعر المرحوم كاظم منظور الكربلائي
📆 ليلة ١ محرم ١٤٤٣ هـ.
ــــــــــــــــــــــــــــــ

المستهل:

شهر الأحزان أحزان
بیّن اهلاله
صاب الحسین ابسهم
صاحت الإنس و جان
بیّن اهلاله
۱/ــــــــــــــــــــ

اهلال لاچن من یهل
یهل دمع العین و تثگل الحسره
عالگضوا بالطف چتل
لانتصار الدین و الحیوا أمره
اهلال بمصاب الطفل
یرجن الکونین و یفجع الزهره

و الرضیع اعله الماي
عینه همّاله بالدهر مالاحظت
اهلال مثله ماشفت
ما یراعی العطشان
بیّن اهلاله
۲/ــــــــــــــــــــ

اهلال بیه الفاجعه
شحنت الدارین و علل مخفیه
و اشکسر عالمشرعه
کسر ظهر احسین من مرامیه
و چم عقیله امودعه
ابگطعة الچفین مشت مسبیه

عیّن اوصاب و صاب اسهام چتاله
اهلال لاچن رَمیِته
ابگلب زینب نابته
فصّل او نبل اوزان
بیّن اهلاله
۳/ــــــــــــــــــــ

هل الهلال و فجع
رمله بجسام و ثگل اهمومه
ابصارم الأزدي انصرع
انشرگ منه الهام و فاضت ادمومه
چم گلب بالطف گطع
من گبل بسهام غدر مسمومه

و چم گلب من ولیاه گطع آماله
آیذبحة کربلا
آیسبي العایله
و الگطع بالولیان
بیّن اهلاله
٤/ــــــــــــــــــــ

هل الهلال و مُرَد
گلب لیلی و آه معلن بنوحه
والده اتشوف الولد
من نزیف ادماه و یجهد ابروحه
راح الأکبر و انذبح
گلب البرجواه تنزف ادمومه

و العطش للمصیوب فطر دلاله
و گلب لیله گطّعه
موت الأکبر وزّعه
شهر صاب النیشان
بیّن اهلاله
۵/ــــــــــــــــــــ

صبر الحسین اشصبر
مو صبر ایمان للگلب جنه
ایشاهد ابطعن و طبر
طاح بالمیدان چم ولد منه
ورع صابر عالأمر
و مصرع الشبان ثگل الونه

و فگد الأکبر وافاه و مادهش حاله
و شهر عاشور اعتده
شمل بالطف شتته
و الهدم چم صیوان
بیّن اهلاله





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10834

📜قصیدة: [ ما دام النفس بيه ]

🎤أداء الملا قحطان البدیري
🖊الشاعر علي مخيلف
📆 ليلة ٢ محرم ١٤٤٣ هـ.
ــــــــــــــــــــــــــــــ

المستهل:

مادام النفس بيه
ماتتغیر النیه
عشتگك عشگ فطري
لگیتك نهر یجري
ماتتغیر النیه
۱/ــــــــــــــــــــ

یالتعرف شکو ابروحي، لگیتك اول اجروحي
عقلي ابلا وعي و لامعرفه ابکیفك ملکته
امعطشني و صرت ضامي، أنام و انت بحلامي
حبك بالگلب و العاطفه و ابراسي شلته
عنك مایمنعوني، مجنونك یسموني
بجنوني افتخر یالمنذبح حبك عرفته

یالمافارگت عیني
طاري اسمك یبچیني
لأنك ضوه ابگبري
لگیتك نهر یجري
ماتتغیر النیه
۲/ــــــــــــــــــــ

سلطان و أمیر الدم، کلما یگرب امحرم
أبچیلك دمع مثل الطفل عالخد حِلاله
و أمي اشگد حزن بیها، تبچیني بنواعیها
علیك ابکل محرم تنطبگ مثل الرساله
بس انت انسأل عنه، نوحك ما أمِل منه
عندي اشگد حلو هذا الحزن ماکو بجماله

أحبك لیش أحب ثاني
أضیع و انت تلگاني
خدمتك روت صبري
لگیتك نهر یجري
ماتتغیر النیه
۳/ــــــــــــــــــــ

مثلك یا بشر شایف، نحرك بالعشگ نازف
انت مو بشر لا بل فرض من الله نازل
موسی و عنده هارونه، و انت العندك اشلونه
یذب اچفوفه اذا صحته یخویه یابوفاضل
من ایسولف احساسه، و ایدخن غضب راسه
سکینه اتگله یا عمي یحلال المشاکل

ذل العلگمي و مایه
و لسه اترفرف الرایه
تگله انجبر کسري
لگیتك نهر یجري
ماتتغیر النیه
٤/ــــــــــــــــــــ

اختك من تمر یمك، و انت امخضب ابدمك
متگطع وذر و انت بطفوفك عثره صایر
جسمك یاهو یدناله، تلعب فوگه خیاله
و زینب لمتك تتعثر ابین الحوافر
صدرك ترسته اسهامك، تکسر خاطر ایتامك
ما سالم کتر منك بقت بس المشاعر

طفوا بالأرض صبحك
واصل للسما جرحك
أموت بخدمتك نذري
لگیتك نهر یجري
ماتتغیر النیه
۵/ــــــــــــــــــــ

حیّرت السما بجرحك، للغیم ارتفع رمحك
یالشاهك عطش فدوه لنحر بالطف تنذره
لا یوم المثل یومك، عاري و سلبوا اهدومك
گطعة خنصرك و المحبس الناقصته شذره
کل هذا و لا مهتم، یالفایض ضوه اویه الدم
گد ما فاضت اجروحك دمه و بالحمد و تقره

گد ما داسك الحافر
احتار اشیکتب الشاعر
اسمعك تون ظهري
لگیتك نهر یجري
ماتتغیر النیه





• الّلهُـمَ صَل عَلَی مُحَمّد و آل مُحَمّد
ــــــــــــــــــــــــــــــ

• مُحبّي الرادود قَحطانْ البْدیري
• للقصائد المکتوبة

@qahtanqasaed
https://tttttt.me/Q_albudeiri/10837