البت واضح انها صغيرة و مليون سؤال جا في بالي عشان اوصل لي سبب الحاله اللي هي فيها دي ! كل العملتو اني ركبتها العربيه على امل اقدر اقدم ليها المساعده ! بعد تعب شديد ! عرفت انها من قرية و جات الخرطوم للجامعه و قاعده في داخليه !! م كان عندي حل غير اني اوديها المستشفى بدل الداخليه خصوصا ان الزمن فات و اتوقع ليهم زمن محدد يدخلو الداخليه و التخير ممنوع و دا ممكن يدخلها في مشاكل !
و وديتها المستشفى بالفعل ! بالجد ما قادر انسى قدر شنو هي زوله مسالمة و حسيت بالضياع اللي فيها ! ماف اكعب من احساس العجز من انك م تقدر تقدم مساعده لي زول !
المهم بعد جرجرة فحوصات و كشوفات !
قالو لازم تقعد للصباح معاهم ، لمن سألت عندها شنو ! قالو صدمة اقرب للانهيار العصبي و انها اتعرضت للاغتصاب حسب الكدمات الفي جسمها !
من غير م اشعر لقيت نفسي قابض بُنيتي و بخبط في الحيطه !
قدر شنو ناس الدنيا ديل مستوحشين قدر شنو الدنيا دي قاسية ! ليه وحدة في براءة وشها دا يحصل ليها كدااا !!
الضيق الدخل جواي بسبب الانسانه دي م مرق مني بالهين ! و قررت اني ابيت ف المستشفى لمن الصباح !

#تاني_يوم
عزو مكمل كلامه !

م قدرت ادخل اتطمن عليها ! رغم اني ما بعرفها بس المها كان المي ! لمن دخلت ليها الممرضه و بعد نص ساعه جات طالعه من الغرفه على رجلينا ! و جات مارة بي جمبي زي الشافعه الضايعه ! الا وقفتها انا ! قلت ليها :
متزكراني !
__ ( اتلفتت علي عاينت لي ) هزت لي راسها ( انه لا )
( عيونها كانو زي الغيوم شايلين دموع و وجع ) انا عز الدين ! انا الجبتك هنا بليل !
__ ( مسحت دموعها ) شكراً ... و مشت !!
ماشة على وين يااا ؟ ياااا ؟ اقيفي !!
( سمعت صوت الممرضه من وراي قالت لي قالت اسمها رُقية ) !
بقيت وراها ! انتظري انا بوصلك محل عايزة ! يا ..( اترددت انطق اسمها م بعرف ليه ) !
بس م كانت بترد علي لمن طلعنا برا المستشفى ! لحد الشارع .. م كانت بتعاين لى حتى م بتتكلم نهائي بس بتمسح في دموعها ! و كانت بتردد كلمة بحرف السين بتهمس بيها م فرزتها !!
لقيتها فجأة وقفت ، قالت لي :
__ وصلني الموقف حق الباصات (..) !
حاضر ..
ركبتا و البت دي لسه بتهمس بي نفس الكلمة و بعد مجابدة عرفته انها بتقول ( سلوان )و بتكررغي الكلمة . كان م اخاف المبالغه م كانت بترمش ! و مسهمة اتجاه واحد ! حالتها ما ساهله و اخدت حيز كبير من تفكيري في اني كيف اساعدها لدرجة فكرت اوصلها انا لحد قريتهم دي بس عارف القُرى دي شويه صعبه و ممكن تدخل في مشاكل ، مخي جاط شديد !و ما وقف عن التفكير !
لمن وصلتها الموقف و ركبتها و دفعت ليها ! و بقيت واقف لمن البص اتحرك !
و رجعت دورت عربيتي و مسكت دربي ! حسيت بي تلفوني هزاز بيضرب ! رديت !
السلام عليكم !
__ عليكم السلام ... انا ...( بي تردد )
عرفتك يا ندى ، كيفك ؟
__ حمدلله ! ممكن الاقيك ؟
حاضر .. متين ؟
__ اسي !؟
اسي اسي !؟
ايوا !
** اصلاً انا برا ، نص ساعه و اكون عندك !
اوكي !

#جانب_سلوان

عيني م شافت النوم ليلة امبارح و مدثر الليله من ضمن الايام بات في الشغل !
عايزة اطلع على رُقيه و مكتفه بي جاي مع مرة ! اسي لو كان عندك تلفون مالو يا رُقية .. ياربي !
دا غير القلق الداخل فيني ! حال مروة ما مطمن الحمة تنزل حبه و ترتفع ساعات ! حسيت مسكتي ليها وهي في الحالة دي غلط ! انا لازم اطلع بيها على المستشفى!! و ما دايرة اكلم مدثر في التلفون عشان عارفه قلقو!
قررته اطلع بيها على المستشفى! و فعلا لبستها توبها و بقيت واقفه دايرة لي شافع ارسلو يجيب لينا امجاد ما لقيت!
قلت اسوقها و اطلع بيها على الشارع لو لقيتها بتقدر امشي و تتسند علي ! فعلاً بقيت تاكياها علي و بنتاتي عديل لحد الشارع ! الظاهر عشان يوم جمعه الناس دي كلها مريحه في بيوتها ! ما لقيت امجاد كل البجي ركشه و عشان المطبات م حتنفع !
لقيت نفسي بأشر بس للبقيف لينا ! و من ضمن العربات في عربيه ملاكي كبديه وقفت لينا من غير ماا ااشر !! براهو نزل لينا و قال لي : عافية ؟
قلت ليهو : ساعدني عليك الله نوصلها المستشفى م لاقيه لي امجاد !!
سمعتو قال : حاصل شنو من امبارح ! يارب لطفك ! و بقى بيساعد فيني لمن اتحرك بينا على المستشفى !!

يمكن الوقت م مناسب للكلام الحا اقولو دا !
رغم اني م عاينت ليهو و تركيزي كلو كان على مروة ، بس عيني وقعت عليهو بعد ركبنا في المرايه ! الزول دا وجيه شديد ! رغم الارهاق الطاقي على ملامحو الحادة ! سبحان السواك ياخي !
الظاهر اني سرحته فيهو لمن لقيت انه كمان بيعاين لي ! م عرفته افرز نظرتو ديك بس ما حأنسى العيون دي !
وصلنا المستشفى و نزل قدامي خلاهم جابو الكرسي و دخل معاي لحد جواا ، و لمن دخلو مروة في غرفة الكشف و طلعوني برا !
سمعت وحدة من الممرضات قالت ليهو : يا استاذ كويس انك رجعته تاني ! لان المريضه نست كيس العلاجات وقت طلعت !
بي تردد حسيتو ! قاليها : اديهم لي زول تاني ممكن يحتاج

ليهم انا حا اجيب ليها غيرهم و سكت !

قلت ليهو : ممكن تتفضل بعد كدا ! معليش تعبناك معانا و شكراً ليك كتير !
يعني م محتاجين حاجة ؟
__ انا ضربت لي زوجها حيجي اسي !
اها اوكي .. عن ازنك ... و فات !

#بعد_ساعه
جا مدثر بي نفس قايم و قلق و لوم !
قلت ليهو : قبل تلوم علي اكتر ! مروة بخير جوا في الغرفه خش ليها وخليك معاها لمن ارجع انا عندي مشوار ضروري قبل المساء برجع ان شاءالله !!
مدثر : طيب طيب ( حتى م ظنيتو ركز معاي ، دخل ليها ملهوف ) !

فا مشيت على اقرب امجاد و مشيت على الداخليه ! ساأت منها قالو من امبارح م شافوها لا ف الجامعه لا في الداخليه و اخر مرة وقت كانت معاي ! راسي ضرب ! م عندها حته تمشي عليها ! مشيت سألت عن محمود ! قالو م جا هو كمان ! فجاة بقيت بكورك ! اووع الفي راسي دا يكون صح ! رُقية هبله و بتسويها ! بقيت م عارفه محل اقبل !!
و بنقاض في افكاري ، قلت مستحيل انا كيف فكرته كدا ، رُقية مهما كانت هبلة ما حتعمل كدا! بتكون نزلت القريه وقت زهجت من غيري عايزة تعاقبني ساي عشان ارجع ليها و اخلي مروة !! يعني ! لالا انا لازم امشي القرية !!
و فعلاً من دربي داااك على القرية !

#في_جانب رقية !

((( الاحدث الجاية احداث حقيقية )))

بتحكي :
وصلت القرية او وصلت بيتنا بمعنى اصح ! على صوت زغاريد ! كأنه سباق ! و كل مرة بستنكر انه في بيتنا ! لمن وصلت لي امي في نص الحروم !
مسكتها من يدها ! قلت ليها :
( بي صوت فتران )في شنو عندنا ؟
__ انتي مالك ! زي العيانه كدا !؟
عمتي : ( جات زغردت لي في اضاني بي مكايدة و مكاواة و يشيلو و يتدافرو هي و سهام و يزغردن و يرفعو في حواجبهم ) مبرووووك يا عرووسه مبروووك ! اهااا يا المتعلمة يا بت الخرطوم ! عرستي الدلاهه كيتاً عن الحاسدين و البغرانين و تاني زغرووووووته و ايوووي يوووي يووووي !
امي ! ديل بقولو في شنو ؟
__ انتي عرفتي كيف انه ابوك عقد ليك على الصادق ! و جيتي من الخرطوم ، و فيك شنو وشك دا شاحب كدا و خشمك دا مشقق !؟
** ( سكته و اخدت نفسي) سلوان هنا ؟ سلوان وينا ؟ سلوان ..( سامعه صوت امي بعيد بتقول لي يعني سلوان ما جات معاك ) .. و ( بقيت بردد في اسم سلوان و اصوات زغاريدهم و دوشتهم حسيتا بعيده لمن دخلت غرفتي و تربسته الباب وراااي !!

#في_الحلقة_الجاية
لي لحظة لقيت نفسي في نص البكى و السكاليب ما فاهمه حاجة !
لقيت يد مسكت في رقبتي من وراي و بتقول لي : ليه تقتليها ؟ حراااام عليكي !
انتي القتلتيها انتي القتلتيهاااااا و كمان بي كل وقاحه و قلة ادب جايه في نص بيتها ! انتي القتلتيها !
و بقيت ما سامعه غير اصوات الحريم دي حوليني و كاتمين علي و الماسكاني من يدي و الماسكاني من عبايتي لمن شرطوها لي و كل وحدة تلبع فيني بي اتجاه ، و بقولو لي انتي القتلتيها ولازم تتعاقبي ! انتي القتلتيهااااا !
قلت ليهم : انا ما قتلت زول انتو ليه بتقولو لي كدا !
فجاة جاني صوت من وراي بقول لي : ( انتي القتلتيها )!
و مجرد ما اتلفته لقيتـ.....
يتبع ...

توقعاتكم للاحداث+ بكرة بريك ان شاءالله

#استككانه 😔...

#سحر_سمير
#فاطمة_قسم_الله .

#شارع_ال60
بقلم سحر سمير و فاطمة قسم الله
-١٧-

*تزكير : الاحداث ، حصلت على مدار سنتين ..

#الدخينات

#الجمعة

#رقية_بتحكي

دخلت الاوضة وصوت الزغاريد و همس النسوان و القطايع حقتهم قطعت اضني ولمتهم ومباركتهم واسمي البتردد في لسان كل وحدة فيهم ! حريم قريتنا و ياهم معروفات و كلهم فهم واحد و البسمعو بحكو بيهو سواء صح ولا غلط ..

رُقية رقية هيي رقية ماشاءالله ،

العروس

-هي ما قالوا العروس ما حا تجي

-هي مالا عاملة كدي دا شكل عروس هسي

-البنية دي هفتانة كدا فيها شنو

-يمة رقية شكلا مالو زي العيانة عيانة

-مالا مسهمة زي الجابرنها في زول يوم عرسو بصر وشو كدا..

كل الكنت حاسه بيهو وقتها ، اني الناس عاوزة اقفل اضاني منهم ولا تجيني الجرأة واطردهم كلهم ، و اقول ليهم رقية ما حا تعرس الصادق بس سويت شنو غير دخلت وتربستها علي..

"طلعت دفتري و قررته اني اخد خطوة تجاه حياتي و لو لمرة وحدة بس " !!

رغم ان صوت الباب و الكلام اللي وراه شتتني بس كان بزيد رغبتي في قراري !

"صوت الباب بدق شديد "

*رقية يا رقية افتحي لي الباب دا مالك يابت وينا سلوان ما جات معاك ليه .. رقية .. رقية

-يمة "بصوت واطي" اعفي لي يا يمة "بتبكي"

"مشيت جهة الدولاب و طلعت كم طرحة و ربطتهم مع بعض " و اصواتهم واصلاني ! و سامعه سهام و هي بتقول :

*خالتي عمي دا بناديك "بتعاين جهة الباب" هي مالا رقية ما قال ما بتحضر العقد ما بتتجهز ،،

هسي هي قاعدة تجهز في روحا ولا شنو ووين سلوان ما شايفاها يعني..

-"بقلب مقبوض" دا المحيرني ياسهام انهم ما بتفرقو ، كدي اقيفي لي هنا النشوف عمك دا داير شنو وبالمرة اشوف سلوان امكن دخلت بيتهم اول..

"سهام بتدق في الباب"

*يابت رقية انا عارفاك ما قدرتي تستحملي ، اكيد كلمتك سلوان انو عقدو ليك مش عااااارفاها احمد جايب ليها موبايل قايلني ما شفتكم النبي ها اتشاكلتن ولا شنو جيتي براك قالت ليك ما بتعرسي مش الحاسدة الحاقدة قطاعة النصيب لكن عجبني ليها البركة الما سمعتي كلاما وجيتي..

"دق دق بتدق تاني"

رقية يابت كدي ها افتحي الباب دا النشوف دايرة تلبسي شنو توب ولا فستان ،، اتلقي فستان اشتريتي من الخرطوم الحاجات رااااقية عاد مفلهمات ومقرضمات كيفن ما بتجيبي من هناك ..عليك الله جلبطي لي حاجة في وشك الباهت دا و الله لا صراهو في وشوشنا عاد عروس الهنا هئ !

#بره_الحوش

"ابوها وامها"

*انتي صحي رقية جات الشفع حدثوني

-جات ودخلت جوه زي العيانة العيانه كدا عايتو نهائي ما عاجباني ! كدي انا ماشة اشوفا ما ردت لي ما بعرفا مالا

لكن كدي النمش اول جهة ناس سلوان رقية غتيتة ما بتتكلم لي..

*ما فيها شي ، مش براها جاتني اليومداك و ادتني الموافقه ، تاني البخليها تتحزن و تاباهو شنو ؟! ، ووكت جات جهزوها بالمرة عريسا يسوقا ويمش طوالي..

-اجي يا راجل دا كلام شنو عاد بتي ما بتمش كدا يتعمل ليها حفلة وتلبس زيها زي العروسات بتي يايمة صغيرة واول مرة تعرس البخلينا نخارجا كدا شنو زي البنستر عليها من عملة.. و بعدين انا كلامي مع الصادق دا لسسع ما كمل ! انا ما بسلمو رقية دي في ايده الا بعد يكرر لي الوعد الوعدني ليهو قدام رجال اهلنا ديل كلهم !

انا بتي ما دقيت ليها صدري طول السنين دي تقري و تتمرمط من الدخينات للخرطوم و تنكرف كرف في قرايتا دي عشان بالاخير كل دا يضيع هبوب الريح ! و الكلام دا ليك اتا زاتك ! دام وعدتني بتي تتك قرايتا بعد العرس ! تقيف معاي و تسمعو كلام حار ! عشان انا بعرفو تب اب راساً خفيف !

_ ما تبقي لايوقه ! الراجل قال بخليها تتم قرايتا تاني كترت الكلام لزومو شنو !؟. سوو الدايرنو المرا تبع راجلا وخلاس ارح الاكل دا لسه الناس دي ف الديوان كتار خلي النسوان ديل يستعجلن بدل ملمومات كدا للفارغة والقطيعة..

-عاد في حق بتي بتلايق ! المهم دا اخر قولي و الا انت عارفني زين زي م وقفت في نصهم قبل اسسع بقيف قدامهم تاني يلا انا بمش !

** استغفرالله العظيم ! شوفي الاكل شوفي الاكل !

— ( مشت ، و فجأة وقفت و ختت يدها على صدرها ! ) قلبي دا تقيل و واجعني ، لا حول ولا قوة الا بالله ! ..

#جانب_سلوان

"في المواصلات"

قلبي دا مالو مقبوض كدا وواجعني شديد للدرجة دي يا رقية انتي زعلانة مني وشايلة في نفسك مني بس ما كان العشم اتوقعتك تعزريني في الاخر دا اخوي ما بقدر اقول ليه لا ..

*كدي الليلة النصلك يا رقية ما حالفة عليك اكفتك وادقك احرا من دقة سهام شفتي الليلة بقطع فيك السير اليومتا داك كان ما وعيتي الليلة عمرك ما حا توعي لروحك تاني ..

عرفي يا رقية عرفي!!! كان اهلنا عرفو بقتلوك وبقتلوني معاك في زول عاقل بعمل عملتك دي...

الشلهتة والخلعة الفيها انا هسي دي عمري ما اتشلهتها في حياتي دا كلو عشان قعدت مع مدثر تتزعلي وتتعاوري كدا فيني بتعاقبيني فيك بالطريقة دي سمح يارقية سمح اصبري بس جاياك قربته..

#جانب_عزالدين

"بعد رجع البيت "

الحمدلله والشكر ليك يارب

الدنيا دي ملانة وجع والناس بعد

دا عايشة

"بستحضر "

ياربي البت ديك الحصل عليها شنو كل ما اتزكرا قلبي بوجعني عليها ..

عندها رب كريم بتولاها يا عز ان شاءالله..

"مع الارهاق الكان حاسي بيه نام "

و نسى ...

#جانب_ندي

"جات راجعة البيت زعلانة"

*ندي مالك رجعتي سرعة من مشوارك القلتي ماشاه و مالك في شنو قالبة وشك؟!!

-دا صاحبك القلت لي عشاني انا اديه فرصة!!

*ندي انتي كنتي وين؟!! وعلاقة عز شنو؟!

-ما هو مشيت الاقيه لاني عاوزة اقول ليه شروطي !!

*ندي!!!؟؟؟"بضيق"

-معليش يا مالك انا ما كان قصدي اسوي كدا لكن ضروري كنت اقابلو بس شكلو ما بينا قسمة من هسي كان بخلف المواعيد من اسي حا ارجا منو شنو لقدام دا!!!

"داخلة غرفتها و تأف أف "

*( بي صوت عالي ) طيب مش يمكن يكون حصل ليه شي ما اديتيه العذر !!!

-في تلفون ممكن يتصل ويعتذر غلطانة انا يااخوي معليش قول لي صاحبك انك مرفوض خلي يمش يعرس واحدة تتقبل استهتارو دا !

"كررب قفلت الباب ومن جواها زعلانة وندمانة"

اول مرة يا ندي تتسفهي بالطريقة دي تستاهلي زاتك عشان تاني تبادري وتتصلي الخلاك شنو تفكري وتضربي ليه لا وكمان تلاقيه..

كان بقي اخر واحد ما حا اعرسو ما حا اعرسو..

#قرية_الدخينات

"مسافة زمن مرت امها انشغلت مع الضيوف والاكل يادوب فضت تشوف رقية"

*كدي النتاوق للبت دي كان بتتجهز كان انتهت لي هسي و لا ياربي حارسه سلوان !

جات زعلانة مادة بوزا مترين "بضحكة" ما ياها ياربي اتشكلت مع سلوان اتلقي

عارفاها ما موافقة علي الصادق زعلتا بتكون وابت تجي معاها ! و الغريبه ام سلوان زاتت قالت انها ما جات ..

"قربت علي الشباك المغطي ب "نملي" ختت وشها وجمبة يدها مغطياه..

بمتاوقة..

النسوان متلميات في موضوع القهوة يهرجن ويتونسن ويقطعن في فلانة ديك وعلانة ديك..

"جات كواريك قوية خلتهم يجرو مخلوعين"

بتي بتي بتي مرمية في اللرض "بتضرب علي وشها وراسها وتخم في التراب وتكتح"

بتي بتي بتي ياناس الحقو بتي حصلوهاا حصلوهاا "جارية يمين وشمال مخلوعة منططة عيونا بترجف"

*سهام جرت بره بكواريك احمد الصادق الحقونا وااااي الحقونا رقية .. رقية

بتي بتي الليلة واااا والليلة والليلة وااااا بتي ماتت ماتت ولا مالها !

"ماشة وجاية بتدنقر وتنقز لي تحت بتضرب وشها بيديها وتعاين للنسوان وتفتح يديها الاتنين وتسكت"

حيلي مات حصلوها ادفرر الباب عليكم الله حصلوهااا وااااا بتي نور عيوني !

"الرجال ال في الديوان جو جاريين"

والنسوان ماسكين امها البقت ما واعية بروحها بتسوي في شنو غير بتتلولح في مكانا وبتتهزا بتكورك بأعلا صوتها..

*بتي بتي ماتت بتي بتي والليلة والليلة وااااا وتدق يد بيد يا حليل رقية يا حليل رقية ..

"احمد بكورك وابوها مسكو متكلنو وقع "

( جا صوت من الرجال ) يخوانا لا اله الا الله يمكن ما ما ماتت ..

-الصادق النكسر الباب يا جماعة ارح

"ضربة اتنين مع كسرة الباب..

رقية💔

لا حول ولا قوة الا بالله لا حول ولا قوة الا بالله

"النسوان والرجال بلمة وزحزيح بتاوقو يشوفو الحاصل؛"

الكواريك ،، الصراخ ،، هولة المنظر والخلعة وقتها خلتهم يبكو مع امها الشبه عقلها فوت من الشافتو وبتها معلقة في المروحة..

"احمد بنادي بكواريك"

- الصادق الصادق يا الصادق

وكم واحد تاني دخلو معاه "

زحو النسوان ديل زحوهم ياخي زحوهم "حتي هو في حالة صدمة كان"

جرا ملاية السرير انتبه لحاجة وقعت ..

و...

#سلوان_بتحكي

اخيرا وصلته احييي جاياك يا رقية

مالي زي سامعة لي صوت بعيد ما ياهو زي صوت كواريك الله يستر قلبها عمل شح وسرعت خطواتها !

( لقيت يد صغيرة مسكتني من جمب المظله )

قال لي ! ( رقيه صحبتك عرسوها )

قلت ليهو بتنضم في شنو انت يا ولد ! ( بقيت بكلم في نفسي و اقول الجنا دا طاشي )

من هناك

ختيت يدي في صدري "بشهقة هييييع منططه عيوني " قمت جارية مع صوت الكواريك والصريخ العالي الجاي من جهة بيتنا..

ما حسيت بروحي الا وانا في نص الناس بكورك زاتي بأعلي صوتي

في شنو يمة يمة وين انتي في شنو ياناس المات منو في شنو يييييمااااا ييييييماااا

كرعي ودتني لجوه وسط اللمة والزحمة والمدافسة ما حاسة بروحي زاتي ماشة وعيني بتفتش في رقية وامي..

#بنادي

رقية رقية انتي وين في شنو زول يقول لي يمة انتي وين

مع الصوت العالي دخلت فيني رجفة ودموعي جرت

يا ناس في شنو "برجف" وقتها جاني احساس الفقد اني فقدت زول عزيز علي ماشة وافتش وبخيب في ظني..و مافي زول داير يرد علي لمن اعصابي باظو حسيت رجولي ديل ما شايلني لمن بقيت بزحف في الواطا ! في نص رجولهم !

لمن اتكتمتا و ما قادرة اوصل مكان بيعاينو و مصدر السكلبه ! فجأة وقفته ! و بقيت منططه عيوني !

ما حاسه بضربهم وشريط عبايتي الا وانا بلومو فيني بقيت ما فاهمة شي..

فجاة جاني صوت من وراي بقول لي : ( انتي القتلتيها )!

و مجرد ما اتلفته لقيتـها.

#خالتي خنقتني

"بحاول افك يديها مخنوقة بكح..

خالتي انا ما قتلتها ما قتلت زول المات منو ، فكيني ؟؟ منو المات

حلفتك بالله تتكلمي ! انتي خانقاني كدا ليه انتو ليه بتعملو فيني كدا ! دا ما وقت مكايدك انتي و سهام ! فكيني

"بتكفت فيني"

"زحيتا بقوة

بهترشة قمت جارية هناك وجيت"

وينا رقية يا رقية

هي ما جات من الخرطوم ولا شنو؟

قربت علي خالتي البتتلولح وتتهز في روحها ما جايبة خبر

"النسوان شايفاهم واحدات بتتهامس وواحدات بتتفرج"

قالت لي:

اختك ماتت قتلتي صاحبتك وجيتي قتلتيها يا سلوان هي انتي ما عارفة لقو رقية معلقة في المروحة ميته شالوها قبيييل قتلتيها يا سلوان

"بقت تضحك وتبكي"

هي كلموها يابنات امي جات تمنع العروس كدي انتي القلتي ليها موتي وما تعرسي مش مش "وبتغمز ليها بعينا وتتبسم"

"ما اشتغلت بكلامها ودخلت جوه رغم كلامها ما مصدقة من الصدمة ما فاهمة شي "

رقية بطلي هظارك التقيل دا خلاص اطلعي منعول مدثر ومروة انا هدي جيتك اسوقك نرجع الداخلية والله العظيم ما بمش منك تاني كلو والا زعلك..

رقية ياخ اطلعي

"بتفتش تحت السرير وورا الستارة"

يا رقية ياخ كفي رقييية

سلوان سلوان "ببكية" ااااا وختت يدها في نص راسي

"بصرخة قوية " رررب وقعته في الارض

رقية ما ماتت يا سهام ما ماتت زحي مني كدا ولا كدا اوووعك تبكيها

هي ما جات من الخرطوم بس انا عارفة عارفة

رقية رقية واااااي واااااي يايمة واااااي وااااااي واااااااي انا اختي وصاحبتي وبتي ما مشت مني ما تقولو لي ماتت ماتت دي شنو وااااااي احيييي انا واحيييي الببرد نار قلبي شنو احييي يابت امي احييي انا وااااااي

"جدعت طرحتا هناك وبتلطم علي وشها وهي في الارض"

استغفر الله يارب استغفر الله

"قامت وجرت بره "

خالتي رقية وينا قولي لي

هي يا سلوان ما كلموك "فتحت ليها يديها"

بقيت ماسكاها وبنبكي سوا واااااا يا خالتي واااااي يا يمة

"فجأة في صوت عالي بكورك"

ما بخليها قلت ليك يا احمد ما بخليها فك فك

"شايل لي سكين"

قلت ليك فكني فكني تموت هي زاتا القتلتا سويتي فيها شنو بتحرشيها انتي انتي دي

*يالصادق قلت ليك اقيف

"ماسكنو وطلعوه بره"

"النسوان بقو مركزين معاي اكتر واياديهم تلز وتدفر فيني لبره "

قتلتيها وجاية بقوة عين تعزيها

جروني من خالتي بالقوة وانا بمسك في توبا ما دايرة افكو ياهو البتلبسو رقية بشم في ريحتا..

"للاسف الجزء دا عن احداث حقيقية حصلت"...

#دمتم_بسلامة☕

#سحر_سمير🎻

#فاطمة_قسم_الله🌼

#شارع_ال60
بقلم سحر سمير و فاطمة قسم الله
-١٨-

#جانب_عزالدين

فجأة جاتو صحية مخلوع

لا حول ولا قوة الا بالله #ندي ندي نسيتا كلو كلو ..

"قام من محلو عاين للساعة"

ياربي للدرجة دي انا من التعب نمته الوقت دا كلو يارب ما تكون ختت عني انطباع كعب..

"قام دخل الحمام وبدل هدومو وطلع مستعجل"

* احسن شي اشيل لي صينية باسطة زاااابطة "بإبتسامة"

وامشي ليهم لازم اوضح الموضوع اكيد حا تتفهمني...

...............

*مدثر مدثر "بصوت مرهق" انت نمته؟!!

-مروة انتي كويسة.؟!

لالا بس مغمض ساي فيك شي حبيبتي انادي الدكتور ..

*لالا انا الحمدلله كويسة

"بهبش فيها بقلق"

وين سلوان؟!!

"هبشت بطنها"

انا اغمي علي ولا شنو؟!!

-طيب ما تتوتري هسي مالك خفتي كدا " ضغط علي يدها قوي" الحمدلله الجنين كويس انتي بس روقي ما تتخلعي..

*في حاجة حاصله انا ما عارفاها لانه وشك دا ما عاجبني ؟ ما يكوون ولدي حصل...**قاطعا

_لا اتطمني قلت ليك الجنين بخير ! بس اا ( بي تردد ) في موضوع حابي اقولو و ما عارف اذا دا وقتو المناسب ولالا بس ..

*لالا اتكلم م تقلق بي !

_شوفي حبيبتي انا شايف ان من بداية الحمل دا و انتي تعبانه شديد و ماخد من صحتك كتير شديد و صدقيني انتي بتهميني شديد و صحتك اكتر ، انا م عندي مانع لو ننزل الجنين ما ظنيت فيهو حرمانيه لان الدكتور لمن شرح لي حالتك ختاهو لي ك خيار بحكم ان حملك م جا بالساهل و دا سبب تعبك ! و انا رأي انه ننزلو !

*انت عايزني انزل حتة منك و قطعه من روحي و روحك يا مدثر ! انا ما صدقته ربنا رضا علينا و رزقنا معقول نضيع النعمة ! طالما ولدي في بطني بخير ، لا يا مدثر مستحيل انزله انا مستعده اتحمل اكتر من كدا و ياريت م تجيب لي سيرة الموضوع دا تاني !

_طيب خلاص روقي ! ( باس يدها و راسها )

*سلوان وين؟!!

-ما عارف قالت عندها موضوع مهم ولا شنو كدا وبترجع تاني ما جات نهائي

*مشت حلتكم شكلها!!

-قالت ليك كدا؟!!

*ما قالت بس كانت مقلقة انا سمعتها ونحن في الشارع مع اني ما مستحضرة كويس لكن كانت بتقول لي يا رقية..مش رقية دي بت اهلك؟!!

-اي ياربي في شنو كدي النتصل بيها!!!

"حاول مرة واتنين "

مقفول !!!

انا زاتي بديت اقلق يلا انا حا امش اشوف لازم نطلع الليلة نمش البيت

"وفي بالو حاجة"

.............

انت عملته شنو عملت شنو يا محمود ليي الا رقية رقية ما زي اي بت انت عارف كدا كويس انا لازم اتكلم معاها لازم اصلح السويتو..

وقت تتصايع مع رقية

"حاسي ضميرو بألم فيه"

اعوذ بالله من الشيطان الرجيم

انا مقلق شديد ما كان اخليها امس تطلع بالحالة دي نهائي ..

انت بتحبها صحي ولا شنو!!

ياالله يا محمود انت وقت بتحبها سوويت فيها كدا لشنو عشان خفت من اهلك ما يوافقو لانها من قرية ولا خفت من كلامها عن اهلها الصعبين وقنعت من خيرا فيها..

يلا ما حنك رقية بقت ما عندها حل غيري كدا كدا مجبورة توافق بي وتعمل اي شي عشان تعرسني هوشة امس دي اي كلام رقية حافظها كويس ما بتقدر تتكلم ولا توري سلوان زاتو بالحصل بينا..

.............

#جانب_سلوان

إِن الفراق جهنّم الأقدار!💔

احمد جا بيتنا وقعد في البرندة عاوزني في موضوع

وقتها ما قدرت اسكت بحكي ليه

رقية ما بس صاحبة هي اكتر من اخت وفعليا هي حياتي العايشة فيها..

لاول مرة افقد حد قريب لي شديد يا احمد

واتمنيت وقتها ما أستحق اعيش لاني سبب وفاتها اتخليت عنها في اكتر وقت احتاجت لي فيه وما لقتني كنت مفتكرة ان دا انسب وقت اقدر اخلي فيه رقية تعتمد علي نفسها فيه ..


*بس هي كانت مقررة من زمان!!

-كلو مني انا بلوم نفسي عشان هي صاحبتي واختي شديد ما سمعتها يا احمد رقية في الفترة الاخيرة دي حياتا كانت ماشة بالناقص انا الكنت مسيراها وبقنع فيها ببكرا بكون احسن ما حاولت اسمعها واخليها تحكي الجواها.. كنت بكتم وبلوم فيها بس ما حاولت اعالج مشكلتها قلت ليك كتمتها انا انا...

"سكت"

دقيقة دقيقة انت قلت شنو؟!!

*قلت ليك ان هي مقررة كفاية لوم لروحك!!

-انت عرفت كيف؟!!

"مدا لي ورقة هاك اقري دي"

"جريتا منو وفتحتها بتوتر و لقيت مكتوب فيها :

الى#سلواني الغاليه :

سلوان سامحيني يا اختي انا عارفة ان الحا اعملو دا ما حل وما سبب الكاتماه جواي كتير وساكتة،

لو كنتي هسي قدامي كان حا تكفتيني اول شي ههه وكالعادة بتقولي نصايحك العمرها ما نفعت فيني ،، انا حاولت كتير يا سلوي حاولت صدقيني بس انا كدا ما قدرت اغير من شخصية رقية المهزوزة ، الخوافة ، الضعيفة ، الغبية ، البتتصرف علي حسب الموقف البكون قداما ساعة هوشة ممكن تخرب اي حاجة وتجي تندم لما تلقاه غلط..

كان نفسي اقيف قدام امي وابوي اقول ليهم انا بحب انسان تاني بس بعد شنو؟!! ،

سامحيني يا سلوان الخطوة دي من زمان في راسي وكل مرة تفكيري فيها بزيد وبتراجع من خوفي لكن الليلة رقية لاول مرة حا تكون شجاعة زيك وما تتردد امكن دا اهون حل اسوية بدل اشوف نظرة الانكسار الممكن اسببها في عيون امي وابوي ..

.

ما كنت عاوزة افارقك يا سلوان بس انا ما عندي طاقة بقت استحمل كل الضغوطات دي وبعدك عني الفترة الاخيرة اثبت ان انا ما عندي لازمة اعيش في الدنيا ما مكاني هنا..

سامحيني يا اختي ، سامحيني وادعي لي كتير ما تنسيني في يوم ، سامحيني يا رفيقة دربي،،

وامي عليك الله امي ختيها في عيونك وحققي ليها الما قدرت عليه انا ،، خليك جمبها مهما تعمل فيك ما تخليها ما تنقطعي منها مسكينة انا عارفاها،،

وانتي خلي بالك من روحك واوعك في يوم تتكسري او تهون عليك نفسك انا بحبك كتير يا سلوان خليك قوية زي ما انتي يا صاحبتي.

مع السلامة

رقية.

قبل وفاة رُقية بي 15 دقيقه :

"شرطة الورقة من الدفتر وطبقتها ختتا تحت المخدة .

كنت كل ما اقرا حرف زيادة عيوني ماشة ترمش وتتحرك يدي بتتهز ودموعي نقطت في الورقة جريت التوب اللابساه عضيت عليه غصبا عني صوتي طلع بوجع وانا بقرا وبقرا"

عصرت الورقة شديد واتفتحت تاني بالبكي ..

دي لقيتا وين؟!!

*"سكت " في الاوضة وقعت مع الملاية ال...

"ما قدرت استحمل اسمعه للنهايه "

قمته بسرعة مشيت المغسلة بكيت قدرتي و غسلت وشي وجيت راجعة قعدت في محلي بسكات وبتهزه ورا وقدام..

#بتتكلم

مهما كانت الظروف يا رقية انا هنت عليك للدرجة دي تخليني وتمشي ما عارفة البحصل لي من وراك..

ياريتني قدرت الحقك قبال ما

"ختيت يدي في خشمي بدموع تاني" ياريتني ياريتني ما خليتك براك ..

كلمتك ان الصعب مصيرو يهون ، لو كل الابواب اتقفلت في باب فاتح ، بجي يوم وتختفي كل المشاكل .. لي اخترتي تقفلي الباب وتنهي حياتك تمشي وتخليني يعني ما اتوقعتها منك انحنا متعلمين و عارفين ان الانتحار حراااام و جزاته عند ..#قاطعني احمد !

مسكني من يدي الكنت قافلاها وماسكة الورقة قوي

*سلوان كفاك خلاص ما قادر اتحمل لومك لروحك بالطريقة دي قلت ليك ما انتي السبب..

"اتنفضت فيه وجريت يدي"

-ما انا السبب كيف "ببكي وقمت من السرير" انت شفت الخلق الكانت بره دي كيف ؟!!

شفت شفت النسوان وضربهم ولبعهم لي ،، شفت نظرات خالتي..

انا كيف ممكن املي عيوني فيها تاني ..

بتزكر يوما القبلونا في الجامعة جرتني من يدي

قالت لي ياسلوان رقية امانتك وعارفاك حا تحافظي عليها اوعي في يوم تكسرو عينا!!!

انا سويت شنو هسي؟!!

"قعدت في الارض"

ما حافظت يا احمد اهملتها وضيعتها وتجي تقول لي ما انتي السبب..

عين خالتي وضهر ابوها انا سبب كسرتهم اكتر من كدا اكسرهم كيف

"بتبكي بحرقة"

...

"قومني لقيت روحي في حضنو كنت تعبانة شديد وقتها محتاجة حد يسندني الناس دي كلها اتخلت عني لقيت احمد لحظتها حسيتو فعلا سند ممكن يفهمني ويحس بي براه "

زحيت منو

*احمد انت بتسوي في شنو كان في زول شافنا هسي دي براها مشكلة ما حتنتهي..

-ماف زول الناس دي كلها بهناك وبعدين ما قدرت اشوفك منهارة كدا غلبني يا سلوان غلبني رغم عمايلك دي كلها بس انا بحبك وحفضل احبك عمري كلو..

"قشيت دموعي"

*طيب ممكن طلب؟!

-انتي تأمري يا ملكة!!

*حاول أجل عقدنا لحدي انتهي و صدقني عمري ما حقدر احفرح و رُقيه م معاي ، و بالجد لو انت مصمم على الموضوع. دا نظرتي ليك حتتغير !!!

-"ب تأففف" وسكت عاين بعيد"

*"مسكت يدو" احمد احمد اسمعني عليك الله انا قربت خلاص ماباقي لي شي انت صبرت وانا عارفة..

صبرنا الكتير بقي بسيط عليك الله عليك الله نأجلو انا ما بقدر اعقد ورقية "اتفتحت بالبكي تاني" افهمني يا احمد اختي ماتت كيف دايرني افكر في عقد قريب!! انت زاتك حترضاها !؟ رقيه دي بتخصنا كلنا م بتخصني انا براي و اقلاها تقدير لي ناس خالتي ، و لي انا ! انا فقدت اختي فاهم يعني شنو ؟ يعني نصي !

-سلوان سلوان خلاص خلاص لبعد ما تتمي نهائي ماف زول حايجيب ليك سيرة عقد وعد مني...

حا تكوني بقيتي كويسة انا عارفك قوية حا نتخطا الصعب سوا ولا شنو؟!!

يلا غسلي وشك وارتاحي ليك شوية ..

"طلع منها بعدم رضا"

"احمد مشي وخلا كل الافكار الجواي بدت تنهش فيني تاني من اول وجديد"

................

"الباب دق"

*اووو عزو الاحوال

"سلمت علي مالك ودخلنا جوه سلامو شوية كان بارد فعرفت انو عرف"

قبل نقعد جريتو من يدو

-مالك مالك اسمعني قبل تقول حاجة اول

*انت خليت شي يا تقال يا صاحبي بعد العملتو!!!

- اول اول شي انا ما كنت قاصد الاقي اختك بوراك لاني ما الصاحب البعمل كدا بورا صاحبو وانت أمنتني على ندي ..

تانيا والله العظيم تلاتة حصلت لي ظروف حيرتني دا غير اني كنت مطبق، و دا سبب عدم ملاقاتي ليها ورجعت البيت تعبان وجايي اعتزر ليها طوالي نمت بدون احس..

*"سكت مني" عارفك يا صاحبي بس اقول ليك شنو عارف ندى ما اقتنعت اول وهسي طلبت اوصل ليك رفضها بشكل نهائي.

-طيب ممكن بعد اذنك تناديها انا عارف ان ندي اخدت موقف مني ودا سبب رفضها..

*طيب خير اتفضل اقعد حا نكون واقفين كدا..

"ضحك وقعد"

"دق دق ندي "

*ايوة يا مالك خش

-"كررب" ممكن تجي الصالون عزالدين بره داير يتكلم معاك!!

*معليش اسفة مش كلمتك بردي يبقي ماف

سبب يخليني اقابلو تاني ..

-ندي الراجل منتظر يعني يجي لحدي البيت و...

*والله الكلام دا مفترض تلومو عليه هو انا حكيت ليك..

-انتي قايلاني سكت ليه اوعك تقولي كدا تاني انا اختي ما بتهون علي انتي فاهمة واديتو النصيب من الكلام...

*قال ليك شنو؟!

"حكي ليها كلامو"

-اممم طيب اشوف اول

*ندي حا تجي ولا لا ؟!!

-لا وفي رايي القلتو ليك.

"جا راجع وقعد"

*والله ياعزو ما عارف يعني لكن رفضت تقابلك ..

-ولا يهمك تمام "قام" خلاص انا بستأذن نتلاقي وقت تاني ان شاءالله..

*طيب الشاي ما حا تشربو معاي ما صدقت ياخ انك جيتني ..

-خليها مرة تانية يا مالك برواقة..

"فجأة جا صوت من وراهم"

ندي كانت واقفة جمب الباب ..

*السلام عليكم

-وعليكم السلام

*نعم انا جيت عاوزني في شنو لاني مستعجلة عندي مواعيد لازم الحقها ما بحب اخلف ...

واقفة بعيد ما اتحركت"

- قدامك يا مالك انا جيت داخل بالباب وما بلقي نسب احسن منك كفاية انك عشرة وصحبة وبعرفك كويس كنت نعم الاخ والصديق لي ولقيتك اكتر من ناس كتار خزلتني..

شوفي يابت الناس انا داير اتقدم ليك علي سنة الله ورسوله وتاني بفاتحك في الموضوع قدام مالك وبسألك انتي رايك شنو؟!!

*موافقة بس بشروطي!!

"مالك عارف ان ندي شخصيتها قوية زي امها لكن ما اتوقع منها موقفها دا"

بقي بعاين ليها ما رضيان علي البتعمل فيه وهو واقف حسه بإحراج قدام عزالدين..

*ندي لو سمحتي ممكن تدخلي جوه

-بدخلتي جوه يا مالك خليك عارف اني رافضاه معناها..

"عزالدين اتدخل "

*مالك مالك انا متفهم اختك واي شروط قبلان بيها اتفضلي قوليها!! من بعد اذنك يعني!!

*تمام قولي ليه ياندي شروطك؛

-تمام اول شرط زواج هسي ماف امي متوفية قريب ودا في حد زاتو سبب كافي لرفضي..

*اكيد و لا انا ناوي في الوقت الراهن ، بعد تلاته او اربعه شهور ان شاءالله !

-حا نتعرف اول شي من ناحيتي واثقة منها لكن انا ما بعرف عنك شي واول انطباع لي عنك كان سيء

"مالك اتدخل"

*ندى!!!

"عزالدين كان متابع كلام ندي المهذب وطريقة كلامها الواثقة وعينها المنزلاها ما رفعتها اتجاهو "

*مالك ممكن تخليها تكمل ؟!!

-طيب طيب كملي كلامك !

-اخر شرط ودا المتمسكة بيه جدا

*ال هو؟!!

-ما تستعجل حا تعرف!!

"من جواها اشوف متمسك بي لأجل دايرني ل زاتي ولا عشان صاحبك.."

#جانب_سلوان

"بعد هدت وراقت شوية "

انا ما عندي قعاد هنا لازم امشي الخرطوم هسي اعفي لي يارقية صاحبتك تعبانة ما قادرة اعاين جهة الحيطة بتزكرك

"رجعت تبكي تاني"

سمعت كواريك من تاني قامت مهجومة شالت البمبر وجرت طلعت تاوقت بي فوق

شافتهم متكلين ام رقية شايلنها واقعة..

ساعتها جريت حفيانة ما حسيت بالشوك الطعني

دفرته الباب خالتي وينا مالا خالتي خالتي..

قبل اصلها " جرتني ام سهام وسهام وقفت لي في الباب"

قتلتي بتها ودايرة تتممي علي امها

يمة قلت ليك قادرة قادرة ما صدقتوني بكرا تعرس ولدك وتقتلك اتي زاتك..

"امها تفتفت كم مرة بالجمبة "

*قلت ليكم زحو من قدامي دفرت سهام ودخلت..

*خالتي انتي كيف كويسة "بصوت شبه مبحوح وواطي"

-شاحدة ربي عليك يا سلوان لا تسعدي لا تتهني لا تشوفي السمح في شغل لا في عرس لا ترتاحي في دنيتك ولا موتك..

زحوها من قدامي زحوها الجابا شنو؟!

*"ببكي" خالتي اسمعيني ورميت روحي فيها غصب مسكتها قلدتها اسمعيني مرة ياخالتي وبمش..

"كوركت لسهام"

سوقيها مني وتاني الحوش دا كان رجلك ختت فيه بقطعا انا قبال ابوها...

"لاول مرة خالتي تتلفت مني وتدعيني طلعت شبه منهارة "

بعاين لشماته سهام وامها فيني وانا عارفة كل التحاريش منهم هم لقو يدهم ولعبو لعبتهم وعارفة نشرو بين النسوان اني سبب وفاة رقية..

#دخلت البيت جيت الاوضة طلعت تلفوني وعملت اتصال...

*الووو....

#دمتم_سالمين☕

#سحر_سمير🎻

#فاطمة_قسم_الله🌼

#شارع_ال60
بقلم سحر سمير و فاطمة قسم الله
-١٩-

#دخلت البيت جيت الاوضة طلعت تلفوني وعملت اتصال... !
سمعت صوت رجلين امي جايه علي !
قفلت المكالمة ! و ختيت التلفون جمبي و بمسح في دموعي !

( امي وقفت في باب الاوضة و رفعت توبها و ربعت لي يدينها و بتعاين فيني عين حارة كدا جواا عيوني ) !
قلت ليها :
خشمك ملان كلام ، قوليهو لي !
__ بتبكي لي شنو ؟
( مشيت عليها و وقفت مقاصداها ) كيف يعني ببكي على شنو ! انتي ما امي يعني ! مش مفروض الام بتحس بي وجع بتها ؟ هاااه ولا انتي زيهم يا يمة ؟ ردي علي عشان نظرتك دي جديده علي و انا ما قادرة افسرها !؟
__ كلامن صح يا سلوان !
رُقية دي زولة الله و الدخينات دي جت عليها بتشهد بي كدا ! اهااا اذن في الحالة دي اللوم على منو ؟ منو الملا ليها راسها ؟ منو الساقاها الخرطوم ؟ لو ما انتي يا سلوان ، اسي كان يكون حالها حال اي بت في القريه دي ! عرست و بي اولادها !
اتكبرتي انتي و رفضتي و طلعتي مننا بي ركوب الراس ، انتي احسن من بنات القريه ديل بي شنو ؟ ما ياهو مصير كلنا عشناهو !
في الحالة دي ذنب المسكينه دي في رقبة منو ؟ ما انتي الكنتي بتقولي ليها الدلاهه دا ما يعرسك انتي المتعلمة ؟

( بمسح في دموعي ) !
انا ما قتلتها لا بي كلامي لا بي افعالي ! انا كنت حريصه على انها تعيش عيشه كويسه ، من حقها تفرح بي حياتها ! ليه تنجبر على حاجة هي ما عايزاها ! حيحصل شنو لو حققت رغبتها في حياتها ؟ و لليوم ولي بكرة و لو الزمن رجع لي ورا انا حا اعمل نفس الشي مع رُقيه ! لأني بحبها !

__ رقية انتحرت ليه ؟

رقية قبل تموت خلت لي رساله ! الرساله دي فيها كلام اكبر من ان زول يفهمو و يستوعبو ! جايز لو قريتو ليكي انا ما تصدقيهو و حتقولي ببرئ نفسي و ذمتي ! عشان كدا حا اخلي كل شي للأيام يا يمك ، و اتأكدي اني لمن اعرف حأوريكي !
و حاجة اخيرة ! ما اتمنيت حاجة اكتر من انك ما تكوني زيهم و تثقي فيني و ما اضطر ابرر او ادافع عن نفسي قدامك ! حني يا يمة حني و اتذكري ان عندك ولد و انتي كدا بتجبريني امشي على خطاه !

__ ( ختت توبا في عيونها مسافه و بتبكي حضنتها شديد ) !

انا بتك و خاته برك قدامي و يبقى اخر يوم في عمري لو اتعمدت ازعلك ! انسي الواقع دا و فكري فينا شوية !

__ ( بي صوت مكتوم ) بتعرفي دربو ؟

( رجعت منها خطوة لي ورا ) ايوا بعرفو تب ! نفسك تعرفي حالو ؟ هاه يا يمه ؟ احكي ليك ؟؟ يمه احكي ليك عنه !؟ ( بتبكي ) !

ما تقطعيهو! ( و فاتت خلتني ) !!

في عز الوجع ! كان في بصيص امل لي زعل عاش جوانا بالسنين و ما كنت ظاناهو يمرق مننا ! الليله حسيت انه كله بيتغير مهما كان معقد و صعب ، بنفتكر حاجة و ربنا بكون خاتي لينا حاجة تانيه ، و في نهاية كل حال ، الحمدلله .

كل مرة كنت بنقز من قعدتي ! مخلوعه من اصوات البكى ! صوتها عالي كان عالي شدددديد ! كل مرة تقعد تصرخ وتسكلب و بتقول ودوني لي بتي ! ما تدفنوها براها ! ادفنوني معاها و بترجع تسكت ! و بتصحي جوااي انا وجع كبير شديد ! و شلته الليله ديك كلها بكى !

#تاني_يوم !

#جانب_عزو ..

طبيعي شديد ، زول حياته فاضيه زي ! تفكيرو كله يكون متمحور حول الحدث الحالي في حياته ! و كانت ندى ! شاغل بالي شديد شرطها اللي اتحفظت بيهو و ما قالتو لي !
بس م عارف ليه كنت على استعداد تام اني احقق ليها كل الدايراهو من غير ما افكر حتى ! بالجد م كنت عارف سبب اندفاعي تجاه الانسانه دي ليه ؟
هو اكيد ما حُب ! لأن الحب بالنسبه لي محتاج دوافع كميه و م حيحصل بين يوم و ليله ! عارفكم حتقولو جواكم ! ( انت يا عزو على ياتو. اساس بتتكلم عن الحب و انت قلت لينا ان عمرك ما حبيت و لا صاحبتا بنات حتى ) !
يمكن فهمي ليهو دا هو اكبر سبب ، لي اني م حبيت ! انسان قلبي و عقلي في شغلي !!
المهم نرجع لي ندى ! يمكن انا مندفع تجاهها عشان شخصيتها القوية دي ؟ ما عارف بس كل الـ...(قاطع تفكيري صوت باب غرفتي ) !

عزوزز ! ممكن ادخل ؟
هو الباب فاتح اصلا ههه تعالي ، تعالي ! كيفك و كيف الاولاد و أبوهم ؟
__ انحنا بخير الحمدلله ، انت كيفك و انت مبتسم كدا ! م نفسك تحكي لي اختك ! ( رفعت ليه حاجبها ) !
اصلاً جيتي في وقتك ! تسنيم ( اخته التانيه ) جات معاكي ؟
__ لالا تسنيم اولادها عندهم مدارس م عندها جيه تاني الا اخر الاسبوع ، و انا زاتي جيت جبت ليك اكل ختيتو في التلاجة و جيت اشيل اغراض امي الله يرحمها !
اغراض شنو ؟ و عايزة توديهم وين ؟؟؟
__ نتصدق بيهم يا عزو حيقعدو في الدولاب ساي حيعملو شنو ؟ اخير تاخد دعاوي حلوة من وراهم ! المهم خليك من دا ! كدي احكي لي !
ربنا يرحمها و يغفر ليها ! طيب يا ستي على سيرة امي ! اهو حبيت اوريكم اني اخدت خطوة في موضوع الزواج حقي !؟
__ كيف يعني ؟ خطوة و اخواتك واخوك ما معاك ؟ دا كلام شنو يا عزو كان ما عارف الاصول اسألنا بنوريك ! و بعدين زواج شنو اسي ؟
** روقي ! اخوكي عارف الاصول اتطمني !

طيب اها فهمني ! مش كنت بتسأل من هاجر و قلت ليك عقدو عليها و اسي كان قريبه في المشرق العربي !
انسيكي من هاجر ! دي اسمها ندى و اخت مالك صحبي ! و م شايف ان في احسن منها لي صراحه !
والله دا كلام ! طيب و عملته شنو ؟
فتحت ليهم اضانهم و اتفقنا العرس لي قدام كداا و كان علي داير اعقد و خلاص على كدا !
لا ماف حاجة اسمها عقد وخلاص لا انا لا اخوانك بنخليك ! لحد الوقت داك ربنا يسهلها و يحينا ! المهم ضروري نمشي ليهم فاهم !؟
اكيد بس م اسي خليها لقدام شويه ! هم كمان امهم اتوفت مع وفاة امي !
لا حول ولا قوة الا بالله ! غايت الحمدلله !
اي الحمدلله ! بس يا ستي دا كل الموضووع ...***تلفونه بيرن هزاز *
كمان مكالمات و الله ماشاءالله هه انا مارقه رد عليها ما تتكبكب ساي هه !
احم ..( بي خجل ) .. عاينت ليها لمن طلعت و قفلت الباب وراها و رديت ليها .....

*في_جانب_مدثر !

مروة : بقدر اللبس براي ارتاح انت !
مروة ! مقلق على سلوان شديد ! انا متأكد انها قالت لي بترجع المسا و انحنا تاني يوم اسي لا حس لا خبر !

جربته تتصل تاني ؟

ايوة بليل .. رن جرس طويل بعد كان مقفول و م ردت لمن دخلت بجرس تاني اداني مقفول و لي هسي نفس الشي ! ما بعرف لكن قلبي ماكلني ، و متأكد حاصل شي ! ان شاءالله امي تكون بخير يارب !

ما تقلق حيكونو بي خير ان شاءالله !
يارب .. ارح طلعنا ، متأكدة بتقدري تمشي و لا اجيب الكرسي ؟

لالا بقدر اتطمن ! يلا !!
وشك زاتو نور الحمدلله يا رب !
حمدلله !

#الدخينات
الساعه 9:30am ..

طلعت من الاوضه .. لقيت امي في وشي ! داخله من برا ..
قالت لي : جايه من بيت البكى !
( استغربت انها وضحت لي براها على غير العاده ) مع سيرة البكى ، دموعي نزلو ! لمن بقيت بتنهد !
حتمشي الخرطوم ؟
( هزيت ليها راسي انه ايوا ) !
احسن حل !
( استغرابي ليها زاد ) ليه ؟
عارفه انتي لمن يتنشر خبر هنا صعب الناس تنساهو سوا صح و لا غلط ! خصوصاً دي وفاة ! و الوفاة دي حتخليهم يتمسكو بي مبادئهم و افكارهم عن العادات اكتر و حيعتيروه جزاة كل وحدة اطلع برا الافكار دي !
انا ما بهموني الناس ! بهمني فهمك انتي يا يمة !
( جريت حضنتها و بقيت ببكي شديد ) يمة والله دموعي م عايزة تقيف انا والله ما قتلتها و حاسه ان حته من روحي فارقتني ، يمك انا راسي انقطع من بعدها ! انا م فقدت صحبتي ! انا فقدت اختي و رفيقة مل مراحلي ! والله ما قتلتها و كل الكنت بتمناهو انها تكون مبسوطة و كل غلطي اني اعتبرت سعادتها مسؤليتي و مستحيل العقد دا يكون سبب كافي للانتحار صحبتي و انا بفهمها و حاسه ان في سبب تاني بس الناس راميه علي اللوم !
كل غلطي اني مشيت مارضتا مروة مرة مدثر...**قطعت كلامي و زحيت من حضنها و سكته !

سكتي مالك ؟ كملي كلامك !!
مافي شي !
مدثر لو سيرتو غابت من البيت ما حتغيب من قلبي ! ماف ام بتفارق جناها بي رضاها ! في عز المشاكل الحصلت محصل منعتك من اخوكي و لا حمنعك ..
( رجعت حضنتها ) كنت حاسه والله ! انتي عارفه انك حتبقي حبوبه ! مروة طيبه شديد ي يمة ، عليكي الله ادعي ليها كتير ربنا يحلها بالسلامة !!

سلوان ! انا جبت سيرة مدثر و بس ! و ربنا يشفي كل مريض .. و حاولي تقعدي معاهو الفترة دي و اختي الداخليه ! وخلي لي نمرتك في ورقه !

ما اتوقعتك تقولي لي كدا !!
مافي ام بترضى في جناها .. افطري قبل تمرقي !!

امي حنينة شديد من زمن كنت شافعه ، بس ما بعرف ليه اسي بتدعي القسوة و بتسكت اكتر من ما بتتكلم ، و صارمة شديد ! مفروض ما اسأل ! لانه العملو ابوي ما هين ! و اسي لو ما الجيران حداخلين مارقين عليها م كان فكرت امشي الخرطوم نهائي !
#المهم
اللقمة ابت تنزل لي من الغبنه و الزعل ! لبسته و طلعته على الشارع !!

مع طلعتي الشارع ..
كأنهم كانو مترقبين طلعتي من بيتنا ! و مسكو فيني تاني و شبه انهم سيروني عديل بي اني قاتله رقيه و كل صوت بسابق التاني و كالعادة سهام و عمتي بيتكلمو و ديلك برددو وراهم !
سهام : البت دي خطر على باقي البنات و خصوصاً بنات القريه ! عشان ما تطبق فيهم نظرية رُقية ، و كان نضميهي دا غلط يا حروم وروني ! كان انتو ما خايفات على بناتكم دا كلام تاني !
وحدة قالت : عدم الولي مشككلة ! لو انا مكان ام رُقيه كان علقتها عبرة في دخلة الدخينات دي عبرة
لي كل وحدة متفلهمه !؟
عمتي : ما خليتى لي كلمة ! تستاهل الدق !!
و هجمو علي كلهم !!
قبل يوصلونني بي اعلااا حسس عندي ، قلت ليهو !
وانا واقفه في نصهم و غازة كيعاني في نصي !!

المرة بصحيح تمد يدها دي فيني !! سكوتي مرة واتنين ما معناتو اني ما قادرة عليكم و خايفه منكم و لا انكم على حق ( دقيت صدري بعد شفت امي من بعيد واقفه خشم بابنا و اتزكرت كلامها ان ماف ام بترضى في جناها و م كنت عايزاها تتجرح من كلامهم ، و الجملة حقتا دي ادتني احساس بالعظمة و في نفس الوقت بالسند و

زادت من شجاعتي ) .. كملت كلاميو قلت ليهم : انا ياني سلواااان ياها زاتا الماعندها ولي زي ما بتقولو و قليلة الادب و ام لساناً سليط ! و عزة جلال الله الغضب الفيني من امبارح لليله عادي جداً ابقى قاتله بي حق و حقيقي و اطبق فيكم نظريه تعلقوها بحق و حقيقي في الدخينات دي كلها ! سامعه الكلام دا يا سهام. و سامعه ياعمتي !
انا ما بخاف الا من الخلقني و العملتوهو معاي لحد اللحظه دي ما هين و انتو حالياً قاعدين تلعبو بي روح عند ربنا فوق ! و انتو كدا اتجاوزتو كل الحدود !
اتهموني بي اي حاجة لكن رقية خط احمر ! و دموعكم النزلتوها عليها دي كلها اداء واجب و عادات مسيرين بيها زيها زي اي عادة مفروضه عليكم ، حتى و انتو قلوبكم ميته ! ما عندكم عقل ولا قلب ولا اساس اتعودتو تنفذو و بس و تسمعو البتقال ليكم من غير ما تشغلو مخكم دا و تفكرو !
ماف وحدة فيكم بكت عليها بي حرقة زي بكاي انا ! مافي وحدة حاسه بي الوجعه غيري انا ! انا الراسي مقطوع وانا البقيت وحيدة و انا براااااي الضايقه مُر فراقها و لسه حا اضوق ! رُقية قطعه من روحي و انا من بعدها ما حاسه بس حاجة غيرها م بسمع غير صوتها !!
و لو رُقية فعلاً ماتت مقتوله فا انتو القتلتوها ، قتلتوها بي افكاركم المسمومة ! قتلتوها بي مطاعناتكم و بي كلامك الزي السم ! اسألكم بالله ! قلتو كم كلمة جرحتوها بيها قبل تموت ؟؟
انا متأكدة انكم قلتو كلام كتير شديد لدرجة سودتو عليها عيشتها !
فا ما تجو ترمو على اللوم لاني لو بقدر ارجعها كان بديها روحي و ارقد انا قبرها !
و يا عمتي و يا سهام لانك مسيرة من امك ! و عميانه و مبارية حقدك و كرهك اللي م ليهو اي دافع !
كل الحأقلو ليكم بي قدر وجعي و العملتوهو فيني امبارح ! نتلاقى يوم الوقف العظيم و صلة الرحم البتربطني بيكم انا قطعتها ! و كان رُقية ماتت بالنسبه ليكم ، فا انا بالنسبه لي حييه ترزق لانها عايشه جوااااي
و مش القرية دي ! انا فايتاها ليكم !

عليت صوتي لي امي و قلت ليها : يمه ! ام المدثر و سلوان ! انحنا بنحبكم و انا ياني بتك و مهمها غلطت انا عندي حد و عمري ما حااتجاوز قيم زرعتيها جوااي و بحبك شديد .. و رااجعه ليكي لانه مرجعي ليكي و ما لي غيرك .

اديتم ضهري و مشيت و انا بمسح في دموعي اللي كنت حابساها قدامهم !!

احضروا الفيديو التحت 👇👇👇 ♥️

.... يتبع

#استككانة 🦋...

#فاطمة_قسم_الله
#سحر_سمير .

#شارع_ال60
بقلم سحر سمير و فاطمة قسم الله
-٢٠-

وصلت المظله ، و واقفه منتظرة البص !!
لمحت احمد جاي جاري علي من بعيييد ! لمن وصلني وقف و اخد نفسه ! قال لي :
__حتمشي يعني ؟
جاري كل دا عشان تسألني سؤالك دا ! غريبه ! اول مرة تخيب توقعاتي ! كنت فاكرة ان سابقين الخير وصلو ليك كلام عني ! اني قليت ادبي مثلا على عمتي ولا بتها ولا حاجة !! وانت لاحقني عشان تشاكلني ! على سبيل المثال برضو !
__ سلوان ! انا ما عدوك ! انا دايرك ليه م قادرة تفهمي النقطه دي !؟
صدقني مهما قلت لي انا في اللحظه دي ما حا اسمع ولا افهم حاجة ! ولا عندي قدرة ليك !
__ طيب اوصلك ؟
فيك الخير ! ( و اتقدمت خطوتين منه ) و بعده ركبتا البص !! و قعدت في المقعدين محل بنقعد انا و رقية ! و دفعت نفرين ! و خايت راسي على الكرسي القدامي و قعدت ابكي لمن وصلته الخرطوم ، وجعتي ما راحت مني !

و من هنا بدأت رحلتي تجاه المجهول !

#في_جانب_عزو !

__ السلام عليكم
و عليكم السلام ! كيف حالك ؟
__ الحمدلله ! بتعمل في حاجة و قاطعتك ؟
لالا فاضي ! ليه ؟
__ اممم انت درسته شنو ؟
بنوك و مصارف !
__ اهااا حلو .... " سكتنا الاتنين "
احم !
__ م داير تعرف و انا درست شنو ؟ ما سألتني ليه ؟
( بي توتر ) اسف بس سرحته شويه و داير اسألك كنته ، اها و انتي ؟
‏__ it
ماشاءالله .. ممكن اسألك سؤال ؟
__ اسال طوالي !
ممكن اعرف شرطك اللي م قلتيهو امس ؟
__ امممم طيب ! لو ربنا كتب النصيب بينا ، انا حابه افضل قاعده هنا في بيتنا !
نعم !!! اوكي بيتكم و اي حاجة بس كمان م حلوة في حقي اجي اقعد في بيت مرتي ولا بقبلها على نفسي ! و على فكرة نفس الشي انحنا كمان بيتنا فاضي ، و عندي استعداد اشوف ليك بيت برا براكي و لا ازعلك ولا تزعليني !
__ بس انا حابه اقعد في بيتنا !؟.
بالمنطق ولا هو ركوب راس وخلاص ؟
__ م ركوب راس ، دا شرطي و مصرة جداً عليهو !
طيب و انا قلته راي في الموضوع و ما اظن راي فيهو يتغير !
__ تمام يبقى انت م شاريني و بتجامل صحبك بس !
بديت احس اني بتعامل مع طفله ! ممكن تعقلي شويه و تبطلي كل مرة تقولي لي جملتك دي ؟ انا مافي شي بجبرني على شي حاجة انا ما عايزها و ياريت تحاولي م تقوليها لي تاني من فضلك !
__ اووك ! حاول تفكر في كلامي لانه دا شرطي !؟
وانا قلت ليكي دا ردي و دا راي ! اذا مصممة شديد على شرطة و شايفاهو حاجة للعلاقه دي لي انها تتقدم ، تقدري من هسي تخليكي قاعده في بيتكم معززة مكرمة لمن يجيك البقبل يعيش معاك في بيت اهلك !!
___ ( انصدمت ) !! شش شنو !
زي ما قلت ليكي لاني ببساطه ما بقدر اجبرك على حاجة انتي م عايزاها و ف النهايه دا زواج يعني حياتك و مستقبلك م حاجة سهله و من حقك تختاري مكان راحتك و انا بحترم رغبتك و بتمنى تعملي نفس الشي !
__ ( حسيت اني غبيه بعد كلامو دا ) طيب !! انا حا اقفل ...
اقفلي ايوا لكن م تقفلي و انتي زعلانه في النهايه انا م ظهرت في حياتك عشان اضايقك ، و زي م انتي قلتي بنتعرف و دا الطبيعي بين اي اتنين !
__ ما زعلانه !
طيب رايك شنو اكلم مالك و نطلع نتغدا برا ؟
__ ( بي فرح ) اووكي خلاص كلمو !
يلا طيب !
__عزو .. دقيقه عايزة اقول ليك حاجة قبل ما تقفل !
قولي طوالي !
__ انا ما عندي مانع ! بقولو المرة بتقعد محل راجلها ! سواء اجرت لي برا او في بيتكم طالما حتكون لي خصوصيتي !
شكراً ليكي و اتأكدي انك ما حتندمي !

#وصلت بيت مدثر !
لذيت الباب و دخلته ! لقيت مدثر دا رايح جاي في الحوش !! من شافني جا جاري علي حضني شديد !! قال لي :
__ قلقتي بي شديد انتي كويسه ؟ و مالك لابسه اسود في اسود كدا و وشك وعيونك مورمات ؟
( سكته م قدرته اتكلم ) !
سلوان اتكلمي الله يرضى عليكي ! ناس امي كويسين ! في شنووو ؟؟ ( جات مروة على حسو العالي قالت ليهو) :
مروة : في شنو ... سسلوان !! ( جات علي و حضنتني بي دورها ) قلقتا عليكي مش قلتي لي مدثر حترجعي ؟ حصل شنوو ؟
هي لابسه اسود عايني ليها و عندنا م بنلبس كدا الا لو زول مات و هي م دايرة تتكلم وانا اعصابي باظت شديد !
( كل م اجي اتكلم خشمي برجف و لساني بيتقل م قادرة اطلع الحروف ) ناس امي كويسين !!
مروة : تعالي تعالي جوااا .. يا لطيف يارب !!
فجاة فكيت يدي منها و رجعت ابكي و اللطم و قعدت في الواطا عديل بي حسي بقيت ببكي ! بقيت بقوليهم:
والله العظيم مصدومة لي هسي مصدومة م تتخيلو واجعاني كيفيا مدثر ! روحي راحت معاها ! رقيه فاتت خلتني انت قادر تتخيل ! انا خسرت اختي و الله م قادرة موجوعه شديد و م ظنيت نارها تبرد !
مدثر : ( قعد على رجولو و ضماني ) لا حول ولا قوة الا بالله روقي م تعملي في نفسك كدا ما بقدر اشوفك بالحالة دي ! يا الله ، قومي قومي ادخلي معاي جوا !
مروة : (بقت تبكي معاي )!
مدثر : ربنا يربط على قلبك وقلب اهلها معليش م تبكي ! الحي الله و الدايم الله !! قولي الحمدلله احمد

ي ربك كلها ابتلاءات !
الحمدلله .. الحمدلله ....

لمن دخلنا البرنده شويه شميت نفسي !
مروة ! انتي كويسه هسي ؟
__ حمدلله كويسه زي م شايفاني !
معليش خليتك تبكي معاي ! وضعك براهو م متحمل انفعالات !
__الحمدلله على كل حال !
عايزة اخش ارقد
__ طيب اكلي ليك حاجة اول !
شبعانه .. حابه ارقد بس !
__ طيب بيتك .. اتفضلي !!
يا الله ... الحمدلله .. الحمدلله !!
__( بي همس ) ربنا يصبرك يارب !

*" بعد مرور خمسه شهور "*
"" آخر خمسه شهور في السنتين ! اللي حصلت فيها الاحداث السابقه ، و الاحداث الجايه ، احداث حاليه يعني بعد السنتين ""

#سلوان_بتحكي :

مرت عليّ خمسة شهور و رجلي ما عتبت الدخينات ، مرت عليّ خمسة شهور من غير رُقيه ! خمسة شهور على فراق رُقيه و لسه نارها ما بردت ، كل يوم ببكي عليها زي الفارقتني امبارح ! عارفه اني سببت ليكم اكتئاب من الحلقات الفاتت بسبب الاحداث الحصلت لي مؤخراً ، صدقوني نفسي تحصل لي حاجة عشان احكيها ليكم و افرحكم شويه ! طيب لو قلت ليكم الليله مفروض انها حفلة تخريجي دي حاجة حتفرحكم ؟
جاني مدثر قال لي :

مدثر : م حابة تفرحي و تحضري تخريجك ؟
فخور بي انت ؟ فرحان بي انا اتعلمته و وصلته للمرحله دي ؟
__ فخور بيك شديد يا سلوان ، و في نفس الوقت زعلان !
دا المهم عندي انك فرحان لي ، و التخريج ما حا امشيهو ، نخلي التخريج على جمب و خلينا في زعلك ، المزعلك شنو ؟
__ ( اخد نفسو ) عشان خلاص حتمشي مننا ! الجامعه و انتهت ! و كمان امي بهناك اكيد محتاجة ليكي !
ابداً ما حأمشي هسي !
__ ليه ! عشان رُقيه و الحكيتيهو لي من اهل القريه ؟
اهل القريه اخر همي ! اولاً ان مروة خلاص على ولادة ! و ثانياً لو رجعت القريه حأعرس احمد و الله اعلم الحيحصل بعد كدا !
__ طيب مرة كلها يومين ولا تلاته و تلد ان شاءالله يعني حتمشي في النهايه ! و انتي م دايرة احمد يعني !؟
دايراهو ! بس م دايرة امه و اختو !
— م عارف اقول ليكي شنو !
م تقول شي ! خليها على الله قادر يحلها !
__ ونعم بالله .. طيب انا جيتك عندي موضوع تاني
ان شاءالله خير !
__ لالا خير ( وطى صوتو ) انا عندي مشوار ضروري و م حقدر ارجع منه الا بكرة ان شاءالله !
مشوار شنو دا مدتو يومين و مرتك على وضوع و في اي لحظه ممكن يجيها الطلق !
__ معليش ححاول م اتأخر و كدا كدا حسب كلام الدكتور بعد بكرة مواعيد الولاده !
ما حتوريني ماش وين ؟
__ خليها اسي ! انا قلت لي مروة شغل !
طيب حلي تلفونك فاتح في كل الاحوال !
__ ان شاءالله !

#بعد_ساعه

مروة : غايتو اول مرة تقول داير تشيل معاك غيار للشغل ! و بعدين زميلك دا ما لقى ليهو يوم يدك فيهو الشغل دا غير الليله ؟
م تخافي بحصل الولاده ان شاءالله و كدا كدا سلوان معاكي كلها سواد الليله دا و بكرة بتلقيني قدامك ان شاءالله !
__ ان شاءالله ! عاين انا والله مهمومة بي سلوان دي م طبيعيه من وفاة رقيه و طوالي قاعده في الاوضه و كمان الليله تخريجها يعني ما عارفه ! افرحها كيف !
اوعي تقولي لي دايرة تسوي كيكة ! مروة وقوف في المطبخ ممنوع !
__ لا م كدة ! بفكر اسوقا و نطلع على ال60 الرئيسيي برا ! نشرب حاجة و منو اغير ليها جو ياهو من جات البت دي مقابلانا بالمستشفيات و الكآبه !
طيب فرصه ليكي عشان تتمشي زي مقال الدكتور .. م عندي مانع ، هاكي القروش دي خليها معاكي !
__ لالا خليها معاك انا معاي قروش من المرة الفاتت ! يلاا اطلع عشان م تتأخر !
خلاص فتك بعافيه .. جيبي حضن كدا انتي و ولدي ..
__ تعال ههههه !

#في الحلقات الجايه !!

اها يا سلوان !
عقدو عليك انتي زاتك ! خايفه اقول ليكي مبرووك تقومي تحصلي صحبتك هيهي !

احضروا الفيديو التحت ♥️

يتبع ....
#استككانة🧚🏼‍♀️...

#سحر_سمير
#فاطمة_قسم_الله !

#شارع_ال60

#قفزة في عالم الكتابه !
#سلوان_بتتكلم👇🏻 ركب سماعتك و استمتع لمدة 30 ثانيه 🔥

المقطع عن مشهد في رواية #شارع_ال60

فجرو المقطع عشان عزو جاي 🔥♥️

اداء الصوت : Shosho IShbadeen
تصميم : Fatma Gasmalla
كتابة المشهد : #سحر_سمير & #فاطمة_قسم_الله

https://m.facebook.com/story.php?story_fbid=3075200355914795&id=100002745819011

ملحوظة " الاماكن و القُرى وصف خيالي م ليها علاقة بي ارتباطها بالواقع فا الناس تحاول تركز في المضمون "
#شارع_ال60
بقلم سحر سمير و فاطمة قسم الله
-٢١-

#ايوووووي يوووي يووووي !
عزو : ( زح التلفون من اضانه ) تسنيم ! خلعتيني والله ! هههههه قربته اقول ليكي " سجمي عقدتو " ههه !
تسنيم : هههههه ( جات حضنتني و انا قاعد وهي واقفه ) اخووي و حته من روحنا ! كيف ما ازغرد ما صدقنا الفرح زارنا و هلّ علينا !
خليكي معاي يا تسنيم ( شلت التلفون ختيتو في اضاني ) ندى ! برجع ليكي بعد شويه (كانت بتضحك ) بتضحكي مالك يا بت ؟
ندى : ساي بس فرحانه ! ما اضحك ؟ المهم انا حا اقفل و سلم على تسنيم !
اضحكي ! تعيشي عمرك كلو ضاحكة يارب.. يوصل يلااا !! " قفلت الخط " اهااا يا توته قلتي لي شنوو .. الله كدي احضنيني تاني ياخي شكيت فيك ريحة امي الكانت بتختها ..
__ ربنا يرحمها و يغفر ليها ..
امين امين ! يعني يا تسنيم! ضروي نعمل العرس دا والله قلبي ما مطاوعني !
__ المات مات يا عزو يا اخوي ما خلاص الحزن عمرو ما رجع ليهو عزيز و لا غالي !و امي زاتا لو كانت عايشه كانت عملت ليك قومةو قعده ! و كمان نفرح ندى المسكينه دي !
طيب خلي كلو يوم واحد ، يعني لا حنة لا جرجرة لا كلام كتير ! فطور بالعقد و المناسبه اعملوها بليل ! كدا تمام ؟
__ تمام م حنعصر عليك اكتر من كداا المهم نعمل حاجة و نفرح بيك انا واخوانك !
الله يجعلني ليكم مصدر فرح دايماً يا رب !
__ امين يارب .. اهاا ناقصك شي ؟
تقوى ( اخته التانيه ) قالت لي جلابيه سمنية بي ملحقاتها و البدله! تاني شنوو؟
__ جيب المركوب و حقت الجرتق جبتها ليك معاي بس قوم شوف لي المقاس حقها !
طالع بعد شويه حا اجيبهم معاي !
( جو داخلين اولاد تسنيم و تقوى و اسامة اخوهم )
بي صوت واحد : خالو خالو ... عمووووو ( اترمو فيني )
__ يا اولاد اطلعو برا خلو خلو يقيس لي الجلابيه دي !
( ببوس فيهم ) خليهم معاي انا مشتاق ليهم شديد حمووودي تعال تعال مالكواقف هناك تعال جيببوسه لي عموووو ...
واحد من اولاد تسنيم : خالو دايرين ناكل اسكريم ( و الباقين اتشبطو )
حااااضر .. احلا اسكريم، بس نسمع كلام ماما عشان اطلعكم!
__ يا عزو الاولاد ديل ما تعلقهم ساي انت ما فاضي !
الليله م عندي شي غير المركوب و استلم ، بسوقهم معاي !
__ اقعد خربهم لي بيدلعك ليهم دا !
( اممممممح ) عندي زيهم كم انا .. حبايب خالو وحبايب عمو انتو ههه !

#سلوان_بتحكي !
#مكالمة !

امي كويسه ؟
__ كويسه حمدلله سامع معاها خالتك بخيته !
ااي كنت بضرب ليها في تلفون بتها الكبيرة و اسي ليو فترة تلفونها مقفول !
__ طيب بمشي ليهم و برد ليك خبر لكن اتطمني هي كويسه ! و سامع بي ابوك ما شاءالله عرس وحدة من الدخينات تحت !
طيب م تنسى ! م عارفه اقول ليك شنو بالنسبه لي ابوي ! انت سمعته من منو ؟
__ مشيت ليهو عشان احدد معاهو موضوع عقدنا و ما لقيتو ! لقيت عمك و هو الكلمني !
( بي خلعه ) موضوع العقد ! من غير ما ترجع لي ؟
__ ارجع ليكي لشنو دام انحنا متفقين ؟ هدا تميتي قرايتك و اتخرجتي تاني في شنو ؟ و انا اصلا ضارب ليكي عشان اعرفك حترجع القريه متين ! لاني كلمت اهلي يجهزو ليك حاجاتك !
احمد ! استغفرالله العظيم ياربي !
__ انا ما قادر افهمك ، انتي قاعده تتهربي لشنو ممكن افهم ؟؟ حبك لي اتغير ؟
ما قاعده اتهرب انت بس ما قادر تفهمني !
__ قلتي شنو و ما فهمتك !
طيب انا حالياً مارة بي ظروف هنا في الخرطوم و ما تسألني عن ظروفي دي شنو ! بس ياريت ما تاخد اي خطوة لحد ما اجي القرية و نتكلم !
__ ظروف ! سلوان انتي ما دغريه! انتي وراك شي و شي ما هين و انا ما مطمن !
ما دغريه !! طيب اوزن كلامك معاي !
__ دي الحقيقه! كان فيك شي قولي بالعديل ود عمك و بسترك يا سلوان !
دا كلام شنو يا احمد انت بتشكك فيني ؟
__ عشان كدا احكي بالعديل ! عشان ما تخلي الشيطان يلعب بي !
تصدق ! انا الغلطانه اني بتكلم معاك ! و قبل اقفل انا اشرف من اهلك كلهم !
__ ( رفع صوتو ) ما تدخلي الاهل ! و اهلي ديل ياهم اهلك !
وطي صوتك ما انا البكوركو فيها ! و عرس ما حيحصل مالم اجي القريه و نتكلم و تسمع العندي كلوووو ...
__ تمام يا بت عمي ! تماااام .. سلااااام !
سلامين !!

( اخدت نفس طويل )

ما دغرية !! فعلاً انا ما دُغرية لأني اذا اتكلمته ولا ولا مافي زول حيفهمني !!
و كان نفسي اكون معاك اوضح من كدا يا مُدثر ! لكن صعبه يا اخوي صعبه شديد ! اني اقول ليك ان اكبر اسبابي لعدم رجعتي القرية هو " محمووود " !
محمود يا مدثر ! و ما لم اصل للفي راسي انا ما حيهدأ لي بال !
خمسة شهور ، ايام طوااال بي لياليهم انا ما هديت ولا راق لي بال ! و اختفائك طول المدة دي خلاني اتأكد ان في شي غلط ! و على موتي ، حيجي يوم و اوصل ليك و اعرف دربك !

في كل ضيقه كنت ببكي !
الليله قررت اكتب ليها ! م عارفه ليه ؟ بس

يمكن رد على الرساله اللى خلتها لي .. طلعت شنطتي و قطعت ورقة من الدفتر ، و بديت رسالتي بنفس اسلوبها :
إلى رُقيتي :
انا فاقداكي ، و كل مرة بتزكراني هُنت عليكي و فارقتيني بي قلب قوي ، ببكي شديد ! طيب انتي مرتاحه هناك ؟
يعني لقيتي الراحه تحت التُراب ؟ الراحه ما لقيتيها في نصنا ! لقيتيها هناك ؟
م مشتاقه لي ؟ ما نفسك تزوري صحبتك و اختك ؟ تعالي زوريني الليله لاني اشتقت ليكي شديد !
انا الليله حأنوم بدري عشان انتظرك ! و تحكي لي ! تحكي لي الما كتبتيهو لي في رسالتك !
حأنتظرك ! اتفقنااا خلاص !
و ....**قاطعتني مروة و هي داخله علي !!
( طبقت الورقه سرعه سرعه و قفلت عليها بي يدي ) !

بسم الله ! مالك قمتي ناطة كدا ؟
ساي مافي شي !
اممم طيب ، مدثر الليله بايت في الشغل كلمك ؟
اي كلمني ، ربنا يعينو ان شاءالله ! بس انتي لابسه توبك ماشة وين ؟؟
انتي لابسه عبايتك و طرحتك برضو !
اي كنت طالعه مشوار !
مافي اي مشاوير الليله يومي قومي قومي !
( جرتني من يدي بالقوة لمن قومتني من السرير ) دقيقه يا مروة ( و انا عاصرة الورقه في يدي ) دقيقه فهميني بس ماشين وين ؟؟
طالعين مشوار ! و م تفكري ترفضي عشان ولد اخك ما يزعل !
طيب طيب ما حا ارفض بس فهميني !
يعني حا اخطفك مثلاً يا سلوان !! امشي ساي !
( انحنا لمن طلعنا الشارع هي جاراني من يدي الماسكة بيها الورقه ) طيب خلاص فكيني بمشي براي ، و اعملي حساب نفسك !
اصلا الدكتور قال لي امشي ، م عارفه رغم اني كنت خايفه من موضوع الولاده دا لكن اسي مرتاحه شديد و مبسوطة كدا ! بس حبيت نطلع كدا و نشم هوااا !!
( طول السكة مروة م سكتت على عكس العادة روحها كانت مرحةشديذ وحرفياً دي اول مرة اشوفها كدا ) !! دا شارع ال60 زاتو صح ؟
اي ياهو لكن دا جهة المحلات !

#مدينة ال( *)
قرية دار داؤد .

مدثر : السلاااام عليكم .. السلام عليكم ياحاج !!
( جاني صوت من ورا شويه ، قال لي) : ما حيسمعك امشي ليهو قريب ...
مدثر : اها تسلم !
( مشيت ليهو من قريب - حاج كبير فاتح جزء من بيته محل خناجر يدويه) ! قلت ليهو : السلام عليكم يا حاج !
يا مرحب و عليكم السلام .. اتفضل اتفضل !
يديك العافيه مستعجل والله ! داير اسألك يا حاج عليك الله ! البيت القصادك دا ( اشرت ليهو بي يدي )
قلته شنو. ؟؟
( عليت صوتي ) قلت ليك البيت دا !! وين الناس الكانو ساكنين فيهو ؟؟
قصدك ناس حاج عبد الرحيم ؟
اي اي الله يفتح عليك !
جا عليهم السيل في الخريف الفات دا ! و البيت خرب ! اسع ليهم شهرين من فاتوهو !
و فاتو وين ؟ عندك فكرة ؟؟
في ناس قالو مشو على قرية داؤد زاتا ! و كان عندهم ولدهم الكبير داك شغال في السوق ! اسع سمعته فات على الخرطوم !
قرية داؤؤد ! و دي وين مش ياها قرية داؤد زاتا ؟
لالا دي الدار ، دار دؤاد !
كم كيلو متر من هنا ؟
ما عارف لكن بقولو يومين في الطريق !
( قلت في نفسي يومين صعبه عديل ) طيب شكراً يااا حاج ! بس كلامو اداني امل شويه ! بي وجود اخوها في الخرطوم ! يمكن بفتش لي مروة ؟ كان نفسي اقدر افرحك يا مروة قبل ولادتك و افاجئك بيهم !

#في_جانب عزو :

اي انا برا !
طيب !
عايزة تقولي شنو يا ندى ؟
مش قلت الشفع ديل جمبك ؟
ايوا يعني الشفع حيسمعو كلامك ، قولي بسم الله !
اممممم ما بعرف لكن انا خايفه شديد !
بسم الله ! خايفه من شنو ؟
عاين ! اوعدني !
اوعدك بشنو و خايفه من شنو ؟
انت بس اوعدني !
اوعدك بشنو لكن ؟
انك ما تزعلني نهائي ! و انك تحاول تحبني مع الايام ، و اني ما اهون عليك في يوم ، و انك تخاف علي ، و انك ما تشاكلني او تكسرني في يوم ، و تكتفي بي و تسعدني و م تهرشني ! يلا اوعدني !
دا شنو دا ! انتي كاتباهم في ورقه ولا شنو ؟
عزو خليك جادي عشان انا جاده !
طيب دا المخوفك يعني ؟
ايوه !
طيب يا ستي اوعدك ان عمري م اعمل القلتيهو لي دا كلو !
و انك تحاول تحبني ؟
( سكته لاني م عارف اذا عندي ليها حاجه ولا لا اذا قلت ححاول يمكن اجرحا و تكون حابه تسمع اني حبيتا ، و اذا قلت ليها حبيتك حا اكون غشيت عليها ، م كان عندي حل غير اني اتحجج واقفل ) ند انحنا وصلنا محل الاسكريم حا انزل اجيب للاولاد و ارجع ليكي بعدين في البيت !
__ طيب م تنسى تصور لي المركوب واوع تجيبو نمري !
حاضر يلاااا ( قفلته ) ( اتلفت على الاولاد بعد بركنت العربيه ) خليكم هنا انا حا اجيبو ليكم و م تهبشو في العربيه اتفقنا ؟
قالو لي : اتفقنااااا !
فراوله كلكم ؟
قالو لي : ايوه ! و نزلته و دخلته على المحل !!
طلبته ليهم ، و رجعت العربيه و بقيت واقف منتظر ، و بقيت بفكر في في سؤال ندى !! و بالجد م لقيت ليهو اجابه ! بس يكفي اني وعدتها و دا ابسط حقوقها !!

بعدها نزلت عشان اشيل الايسكريم !
حمودي : عمو اجي معاك ؟

لالا خليك في العربية مع اخوانك !!
و انا دااخل المحل بعاين في تلفوني ! و م مركز قدامي !! و في اخر لحظه لقيت نفسي خبطت لي في وحدة هي طالعه و انااا داااخل !

لاحظت ليها مسكت كتفها من فوق محل الخبطه ! و بقيت بقوليها ااسف !! ااسف .. لمن ركزت فيها ! انا بعرف الشكل دا !! لقيت نفسي بعاين ليها شديد ! و هي حتى عينها ما رفعتا فيني و ما ردت علي و لا ناقشتني و لا شاكلتني ولا اي حاجة ! و مشت طووالي على الشارع !!!
م عارف وقفت كم في مكاني دا ، و اذا سألتوني من السبب والله ما عارفو بس حسيت بي حاجة شدتني ليها !!
و انا ماشي لاحظت ان في ورقه مطبقه او شبه مكرفسه واقعه ف الارض و مليون في المية وقعت منها !! بعد رفعتها جريت برا المحل عشان اخلصها ما لقيتها .. لفيت داير ما يدور ما ليها اي اثر !

م كان عندي حل غير اطلع جزلاني و اخت الورقه فيهو !
بعدها سألت نفسي : انت مجنون يا عزو ! مش يمكن تكون دي الفاتورة حقت المحل بالقيمة الاشترت بيها ؟

...... يتبع !

#استككانه 🤡...

#سحر_سمير
#فاطمة_قسم_الله

#شارع_ال60
بقلم سحر سمير و فاطمة قسم الله
-٢٢-

#سلوان بتحكي :

ما بنكر ان مروة غيرت لي جو و اثرت على مزاجي ! يكفي انها فكرت فيني في يوم تخريجي ، بالجد دي براها بالدنيا !
مشينا شارع ال60 زاتو فيهو سلسلة بتاعت محلات جمب بعض ! و مشت قاصدة محل الاسكريم لانها حكت لي عنه كتير و انحنا في الشارع شابكانيZanobia و انه اسكريمهم رهيب و بيجوهو كتير هي و مدثر و ! او بالاصح هو محل شامل حلويات كميه ، و قعدت في كراسيهم البرا و مشيت طلبته انا ، و بعد رجعته بتزكر قالت لي ! انا قلت ليكي شكولاته ما منقه ! و انا م مستحضرة قالت لي شنو اصلا لانه بالي م معاي و في مشواري !
قلت ليها ، خلاص حأمشي اشوف اذا ممكن يتبدل و لا لا .. و فعلاً مشيت و ما بدلوهو لي فا طلبت ليها واحد تاني .. و انا طالعه لمحت مروة مافي محل خليتها قاعده ، فا طلعت مستعجله لدرجة اتخبطت في زول قدامي و ما ركزته حتى اسفه ما قلتها ليهو ! و كان بيقول في كلام م مستحضراهو اظن كان بيطنطن في اني ما بشوف قدامي و الله اعلم .. و طلعته جريت و بقيت بتلفت في مروة ! لمن كسرت زاويه يمين لقيتها واقفه و تاكله على الحيطه بتتوجع !
من الخلعه فكيت اي شي من يدي و مسكتها بي يديني الاتنين !
مروة !! مرووة !! طلق ولا شنو !؟ حاسه بي شنوً ؟
مروة : بطني !! ااااه بطني يا سلوان بتطعن فيني سكاكين بس !
لا حول الله يارب .. اسوي شنو ياربي ( اتوترته ) ! يعني دا طلق حتولدي ! حاسه نفسك ؟ اوديكي المستشفى ؟
__ سلوان م تسأليني عشان انا ما عارفه حاجة و انتي مش دارسة تمريض مفروض تكوني عارفه اااه يا الله يا الله يا رب تهونا علي !
مابعرف ما بعرف م قادرة افكر ! يعني اسوقك البيت و لا المستشفى اسي !؟
__ البيت .. البيت اانا لازم انتظر مدثر م حينفع اولد وهو مافي !
يعني يا مروة والله بتبالغي دي كمان حاجة بيصبرو عليها ! انا حأوديكي المستشفى دا اسلم حل ! ( امجاااااااااااد اقيف ..اقيف ) !

ساعة متواصله من الوجع اللي كان ملازم مروة

لمن وصلنا المستشفى ! و طوالي قعدتها في الكرسي و دخلت بيها لحد القسم جواا ! و استلموها مني !
و قالو لي ان لسه مواعيد الولادة و دا الم بس لانها تعبت في الحمل ! و رقدوها لحد مواعيد العمليه !
و بقيت قاعده معاها في العنبر !
بين اتصل بي مدثر و بين انه لا حا اقلق بيهو ساي و هو قال م حيقدر يجي الا بكرة !
اااه يا مروة ( بعاين في وشها و هي نايمة م جايبه خبر الدنيا ) تعبتي في حياتك ،

#الدخينات !

احمد : يمة حتقيفي لي فوق راسي كدا لمتين ! (و اقفه و غازة كيعانها )
بتحس انت يعني !؟ خمسه شهور صارة وشي دا فيك عشان تحس و تخلي عندك دم ، و ما حسيت !
احمد : المطلوب مني شنو ؟
سلوان ! شابكني القرايه و التعليم و السجم و الرماد سنين و لحد هنا و كفااااا من ما مرقت بعد موتة رقيه دي م عتبتها و ما ظنيتها طارياك و لا جايبه خبرك و بتجرجر فيك و شايله من عمرك و انت زي الطيرة قاعد لي هنا و حارس الحواشات و القرف و هي بهناك مطلوقه ما لاقيه اليلمها !

( وشو قلب فوق تحت ) كان انتهيتي انا مارق !
__ لاااااا اخر قولي و حتسمعو و حتنفذو انا البت دي ما بدورها و ما دايراها !
انا بقيت ما فاهمك انتي دايرة شنو بالضبط ؟
__ انا دايراك تعرسها ! و تطلقها في اسبوعها كان داير ترضيني و بيهمك رضاي و بعرس ليك ست ستها ! قلت شنو ؟
امي !
__ ما امي ! حاتسوي البقولو ليك يا احمد ! انت ما خجلان من نفسك ! تمشيك مرة ! ما بتخجل راجل قدر الليله و باكر تهز و تلذ تمشيك مرة ! عيبا في حقنا و الناس زاتا ما ساكته مننا !

يبقى ما اعرسها من اساسو و اريحك كلو كلو !
__ حاتعرسها يا احمد و حتسوي البقولو ليك بالحرف كان كايس رضاي ! عشان م تطبق فيك نظرية الصادق الغبيان !

#في_جانب عزو !

انزلو براحه براحه .. يا عبودي ! امسك اخوك دا من يده ! ( خاتي التلفون في اضانه ) !
الوو .. ايوة يا تسنيم ! اها تقوى .. عايني انا وصلت الاولاد ديل برا افتحو ليهم عشان انا راجع عندي مشوار ..... تمام ، تمام !

دورت عربيتي و رجعت خلف ، و مسكت شارعي ! بعدها جاني اتصال :
ايوة ياااا(قاطعني انفعالها و كلامها الما مفهوم !! ) ندى ! ممكم لحظه !
__ طيب !
بتقولي في شنو انتي و وطي صوتك !
__ يعني ما شفت مكالمتي و حضرتك بتتكلم و خاتيني في الانتظار !
ما انتبهت ! و بعدين دي حاجة تخليكي تنفعلي و تتكلمي بالطريقه دي !
__ لانك قلت حترجع لي و م رجعته لي !
طيب دا معناتو اني مشغول صح و لا غلط ؟ و انا ما فاهم انتي مستعجله على شنو يا ندى ! م تبقي اندفاعيه و حمقيه بالطريقه دي ! تلفوني دا فيهو مليون رقم منهم اصحابي و منهم اهلي و ناسي ! فاهمه كلامي دا !!
__ طيب ! امممم شكلك سايق !
ايوا سايق !
__ حتجيب شنو اسي ؟
تسنيم موصياني على حاجات حا اجيبهم !
__ اها تمام !
ناقصك شي ؟ جهزتي حاجاتك ؟
__ ايوا خالتي م مقصرة معاي ( محبوسه عندها ) !

** طيب انا حا اقفل اسي !
__ اوكي ، سلام !

ما عارف ، لكن برغم شخصية ندى الرهيبه و الجذابه الا ان فيها حاجة انا ما قادر استوعبها ! حاسي انها اندفاعيه و مستعجله و دايماً مبادرة ! و ما قادر اعرف اذا الحاجة دي كويسه و لا كعبه ! بس البعرفو انه مهما كانت العيوب اللي في شريكك ، لازم تحاول انك تتقبلها لان مافي انسان كامل و طالما اخترتو شريكك لازم تتقبلو زي م هو !

من تفكيري في ندى ! لقيت نفسي شارد في عالم تاني ! لدرجة نسيت مشاويري و مشيت جمب البحر ! و ما قادر ازح من خيالي الموقف الحصل الليله دا في زنوبيا !! شفتك وين انا ؟؟
غريبه الحاله اللي كانت فيها الزوله دي ! حتى حرف ما قالتو لي و لا عاينت في وشي !
( طلعت جُزلاني و فتحتو و شلت الورقه )
مسكتها مسافه بقلب فيها بي اتجاهاتها ! ابداً دي ما فاتورة ! في آثار حبر ! .... متردد بين افتحها ولا ما افتحها ! حاسي نفسي اذا فتحتها حأقتحم خصوصيه يمكن ما عارف ... بعد صراع طويل شديد ، اقنعت نفسي انها مجرد ورقه عاديه و لو مهمة كان رجعت ليها في لحظتها ! و اصلاً مستحيل الاقيها تاني !! للاسف ، فضولي انتصر علي ! و فتحتها !!

و اول حاجة عيني وقعت عليها في الورقه ، كان مكتوب : " إلى رُقيتي " !
يعني رُقيه ( لقيت نفسي بردد في الاسم ) !!! رُقيه .....!

#جانب_سلوان !
#مكالمة -

ايوة ! وصلتني الصباح !
لالا خلاص انا حأتصرف بعد دا ، شكراً كتير ! اوووكي مع سلامة الله .. ( بعد قفلته ) اخدت تنهيده طويله شددددددديد !
كدا كدا خلاص الزمن فات و الواطه ليلت ! ما عندي اي طريقه لي طلعه تاني الا الصباح ، اوفففففف الله يجيبك يا مدثر يا اخوي !
و دخلت لي مروة و بقيت قاعده جمبها لحد اليوم اتطبق و اصبحنا ، و هي لسه نايمة !!
مشيت سألته اذا النومة دي طبيعيه و لالا ! و قالو لي طبيعيه ..
كملت اليوم التاني دا بي قلق شديد ! لحد الساعه 1:00 بعد الظهر ! وقتها مروة ابتدت تفوق شويه !
دخل لي مدثر بي مكالمة !

__ ( بي قلق و انفعال ) البيت فاضي ليه انتو وين ؟؟؟
براحه انحنا بخير !
__ وينكم ! و بتتكلمي براحه كدا ليه ؟
( اتلفت عاينت لقيت العيانين الفي العنبر كلهم نايمين و م ينفع اعلي صوتي ) دقيقه يا مدثر خليك معاي !
مروة : ( بي صوت تعبان ) ماشه وين ؟و مدثر لسه ما جاني ؟
( قفلت سماعة التلفون بي يدي ) ما ماشة بعيد حا اتكلم تلفون و اجيكي و مدثر جاي علينا ..
مروة : الحمدلله طيب ! كلمي يجي سريع دايراهو ضروري !
حاضر حاضر ارتاحي انتي اسي حا اجي !
( طلعت برا ) ايوا يا مدثر معاك !
__ في شنو يا سلوان ؟
انحنا في المستشفى من امبارح و م كلمتك عشان ما ..**قاطعني و نفسو قايم شكلو بجري
__ في ياتو مستشفى ؟
حقت المرة الفاتت بس اطلع العنابر فوق ! مدثر ما تقلق هي كويسه الحمدلله و انا ...**قفل الخط ! اوفففف دا الكنت خايفه منو !

#بعد_ساعه الا ربع من المكالمة ، مدثر وصلنا !!
وقف في باب العنبر ! قال لي :
__ جري الستارة عشان اخش !!
ايواا .. تعال تعال .. ( عشان الحريم الراقدين معاها ) زحيت ليهو و دخلتو مكاني ! ( قلت ليهو ، انا في الممر برا ) !
نظرات اللوم و العتاب في عيون مدثر للمرة التانيه يتكرر نفس الموقف كأن الزمن بيعيد في نفسه ! !

#جوا العنبر !
مدثر كان ماسك يد مروة و خاتيها في وشو ! .. و بيعاين ليها بي خوف شديد ! قاليها : ياريت لو العافية بتتقسم ! ياريت ياريت يا مروة !
مروة : الحمدلله و بعدين دي حسنات لي الحمدلله و هانت ما فضل شي ، اتحملت الكتير يا قلبي ! كلها يوم بكرة و الد بالسلامة ان شاءالله ! رغم الالم لكن مرتاحه ! حاسه اني حا ارتاح شديد بعد الولاده !
__ يارب يارب !
مروة : ( ختت يدها فوق راس مدثر و بتطبطب عليهو ) اتطمن ! نفس اشوفك و انت ماسك ولدنا و بتكبر في اضانه ههه !
__ ( قال في نفسه ، كان نفسي اجيك داخل بي اهلك معاي و افرحك ! و يفرحو بيك و القلوب تتصافى يا مروة نفسي كان )
مروة : انت ليه ساكت !
__ ما ساكت بفكر في اسم ولدنا ولا بتنا ! اسي كان خليتينا عرفنا جنس المولود مالو !
مروة : اياً كان جنسو الحمدلله عليه .. المهم انت خلي بالك منه شديد و اقسم ليهو من حبك لي !
__ حنحبو سوا و نربيهو سوا و كل شي سواا ان شاءالله .. دقايق و برجع ليكي حمشي لي سلوان و اجي !

#جاني_مدثر !
داير تشاكلني عشان م كلمتك صح ؟
__ ( هز راسه انه لا ) ! انتي عارفه انا مشيت وين ؟
ما وريتني انت قلت لي مشوار بس !
__ سافرت لي اهل مروة ! كنت حابي افرحها و منه يجو يحضرو ولادتها ! بس للاسف ما قدرت اوصل ليهم و العنوان الوحيد البعرفو طلعو راحلين مؤقت منه !
يا الله ... طيب امها مش عارفه العنوان هنا ؟
مرة ابوها قصدك ! كان مروة رسلتو مع صحبتها البتجيها ديك !
** يعني مروة امها ما عايشه ؟
مرة ابوها الربتها هي و اخوانها ! بس مروة بتناديها امي ،

مقابل كل حاجة حلوة عملتها لي مروة الا انها ف النهايه قابلتها بالشين يوم قررت تعرسني و قوت راس اخوانها عليها ! قصه طويله يا سلوان طويييلة شديد !
لا حول ولاقوة الا بالله !
__ رغم ذلك مروة بتقول م زعلانه منها ! لانها ربتها و تعبت عليها و دي م حاجة هينه انه مرة ابو تعمل كدا !
و في النهايه عملت شنو ! النفس لو نضيفه ابن ادم ما بيأذي يا اخوي ! المهم انا برجع البيت اغير و اجيب حاجات مروة و الشنطة المجهزاها و برجع !
__ طيب اصلاً جاي عشان اقول ليكي كدا ! معاكي قروش ؟
خيرك سابق يا اخوي معاي ! لو احتجت بكلمك !
__ ( ابتسم لي و دخل العنبر ) !

حسيت اني ياداب حقدر امشي مشواري الماكل قلبي من امبارح و ما لاقيه ليهو طريقه !
طلعت سرعه سرعه ركبته امجاد و قلت ليهو معهد ال(*) و تابعت العنوان اللي في الرساله اللي استلمتها امبارح الصباح ! - مسافة ساعه نزلني قدام المعهد !! حسابتو و نزلت ..
و من توفيق ربنا ما تعبته عشان اصل ليهو .. و كان واقف في حوش المعهد و معاهو وحدة و الظاهر هي زاتا بتقرا في المعهد !
مشيت عليهم و البت عينها كانت علي من لم ماشه عليهم احد م وصلته و كل دا هو م كان منتبه لي لمن وقفته جمبهم !!
البت المعاهو واضحه عليها الغيرة و لمن قالت لي : __ خير يا اخت ؟
وقتها عاين لي و اتصدم شديد لمن وجع خطوة لي ورا و قالي لي : ( سلوان ) !
انتي حاولي ما تدخلي ! اممم كويس يعني متزكر اسمي !
__ دي منو يا محمود !؟
سكت بتك دي عشان ما اسكتها بي طريقتي !!
محمود : ( بي وصوت برجف ) اامشي انتي اسي اانا بكلمك !
لالا تمشي وين خليها ! وجودها مهم !! قالو لي اختفيت من يومها و خليت الجامعه و طفشته و حتى بيت العزابه الكنت قاعد فيهو خليتو ! ليه عملت كل دا ؟
— محمود ! البت دي بتقول في شنو ؟
( بي نهرة ) اسكتي قلت ليكي و ما تدخلي نفسك في موضوع ما يخصك !
محمود : سلوان انا والله حاولتا اوصل ليها و صدقيني عايز !!!!
__ انا ماشه و لمن تحب تفهمني معاك رقمي ! و مشت !!
معاك سلامة .. اها كمل كمل سامعاك !
__ عايز اصلح غلطتي و ...
غلطتك ! ههه ضحكتني ! انت ما حاولته اصلاً يا محمود انك توصل اهلها ! انت ما عملت اي حاجة عشانها ! هانت عليك لدرجة تكتبها ورقه عُرفي ! دا الطلع معاك !
__ ( محمود قال في نفسه ، يعني هي بتتكلم عن الزواج ،، اوفف حمدلله شكلها ما عرفت حاجة ) !
حاولتا بس اتضطريت اسافر لي اهلي الوالده كانت بي عافيه شويه و بعدها نقلته المعهد لانه التمريض م كان رغبتي و ....الخ. رقية كيف ؟
رقية !! ههههه
__ والله داير اصلح غلطتي صدقيني !
ما كل غلط بيتصلح يا محمود ! وريني حتصلح غلطتك كيف ؟ ما سمعنا بي زول مات و وجع للدنيا !
__ ( بي صدددمة ) شنووووووووو انتي بتقولي في شنووو ( اسلوبو اتحول 360 درجة ) ! المات منو قصدك يا سلوان عليكي الله ! فهميني !
م ظنيت بهمك ما هدا عايش حياتك و حابي و مرتبط ! شلت اربعه سنوات من حياتها على الفاضي ! هئ يا خسارة !
__ ارجوكي قولي لي الفهمتو غلط !
لا ما غلط ! رُقية ماتت .. رُقية انتحرت قبل خمسة شهور من الليله ! رقية انتحرت تاني يوم من اخر مرة كنا واقفين فيها انحنا التلاته مع بعض .. اها حتقدر ترجعها لي ؟؟؟ هئ ....( و مشيت خليتو ) !

مجرد م طلعت من المعهد جاني اتصال من مدثر ! كل القالو لي :
تعالي لي بسرعه .. مروة تعبت و دخلوها للولاده !!
اتوترت شديد و انا م مشيت البيت لا غيرته ولا جبته حاجات مروة يا ربي اتصرف كيف اسي !!
م عندي حل غير ارجع المستشفى قلق مسكني بقيت جاريه رايحه جايه لمن اوقف لي مواصلات توديني ! و وقت الاستعجال بحس كل شي متعمد يأخرني !
بعد مسافه حتى لقيت لي امجاد ! و شابكاهو استعجل عليك الله .. استعجل لي !
لمن وصلني .. و اظن من شدة م قلقتو لمن كان داير يخش معاي المستشفى !
جريت جري على المبنى لمن وصلت غُرف العمليات .. مع طلعتي السلم لقيت مُدثر في وشي !

جريت عليهو قلت ليهو :
الحصل شنو لسه ما طلعوها ؟؟
__ مسكني قوي ! م عارف ! ما عارف حاجة ! داير ادخل معاها منعوني غالبني الانتظار .. يا الله
رووق .. اهداً خلاص ان شاءالله كل حاجة حتكون بخير ولدك و مرتك ! يارب !
__ تعبت شديد استحملت كتير ! ( مشى على الباب و بقى يخبط عليهم و يقوليهم لسسه !! )
( جريت مسكتو و جريتو من الباب ) يا اخوي سمي الرحمن مااقبل اتم كلامي جات ممرضة طالعه و شايله الطفل و بيبكي !! وصلتها قبل توصلني و شلتو منها و انا بتكلم مع مدثر !
اهااا شفته يا مدثر ! اهو الحمدلله كل حاجة بخير
مدثر !! مدثر ... ( اتلفت م لقيتو جمبي )

... يتبع !

#استككانة🍊...

#فاطمة_قسم_الله
#سحر_سمير

عايزين ياتو مشهد من الرواية ينزل صوتي ؟