#نبض_العزام
بقلم تسنيم
-١٦-
على لساني

_ اليوم عدى شهر ونص... ما حقول عايشة حياتي مثالية و طبيعية بس بتتخللها مشاكل مفتعلة من ياسر.... ايوة مفتعلة مرات بيكون كويس جدا لمن أراجع نفسي واقول انا ظالماهو ومرات ببقى أنسان تاني غير البعرفه همجي و عشوائي و كيف كيف تصرفاته..... اليوم خميس و عزمونا عرس... لبست التوب الأسود و هو كان لابس على الله رصاصي جينا داخلين طوالي مسك يدي.... عاينت ليهو قال لي:- هه شهر وما اتعودتي! .... قلت ليهو :- و اتعود كيف بس انا ؟.... قال لي :- تعالي نقعد هنا عشان شوية ونطلع ما حنقدر ننتظر للنهاية.... قلت ليهو :- عشان المزرعة بكرة ولا شنو ؟ .... قال لي:- ايوة..... بعد العرسان جو داخلين و زافنهم قال لي :- عايني العروس بتذكرك منو ؟ ..... لمن اتلفت ما لقيت ليها شبه بس العريس... العريس عزام الخالق الناطق.... قلبي طعني من شوفتوا كدا حسيت بتقل في راسي و لساني جيت أسأل ياسر عنو و ياريت أكون غلطانة.... اتلفت أساله قال لي:- ههه العروس ملامح وشها إنتي يوم العرس كنتي جميلة بس ما راضيه.... بسم الله أنتي كويسة ؟!.... وشك مالو مخطوف كدا... هاك اشربي موية حبه روقي حبيبي روقي.... قلت ليهو بصوت متقطع:- العروس والعريس أسمهم منو ؟! .... قال لي:- مروان و مروة ليه ؟!.... قلت ليهو بعد شلت نفس لا بس شبهتهم... وعشان ما يركز معاي قلت ليهو:- العروس ابدا ما مضايقه عاين بتضحك كيف من قلبها... مبسوطة هي.... قال لي:- بس ما كنتي زيها.... عاينت ليهو وقلت:- لاني فعلًا لا زيها ولا حكون انا كنت مجبورة على العرس عشان بابا.... قال لي:- ودا السبب المخليك تمنعيني عنك صح.... قلت ليهو:- يستحسن نقفل الموضوع دا.... قال لي:- ويستحسن نمشي بعدا!

على لسان عزام "

شهر كامل وانا ما سمعت صوتها ولا شفتها.... اشتقت ليها شديد... كلي آمل أنها حتكون معاي هنا في يوم من الايام..... تبقى اجمل حلال و أحلى صباح الواحد يطل عليه بعد سنين من وحشة الوحدة 💙 وبدل آني أتفرج على فيديوهاتنا سوا او صوتها الفي الريكوردرات ..... ديل اللي مصبرني و مهونين شق الشوق ..... أمي طبعًا طول الوقت عرس يا عزام عرس! ....ايوة كاسر بخاطرها لمن أرفض بس حتفرح لي لقدام بأذن الله....لمن تسألني متين و كيف ؟! بقول ليها انا ماعارف بس حتجي وحتنورنا🌎💙

على لسان بدر الدين "

_ تسنيم طولت ما إتصلت فيك كمان يا ثريا ؟!..... قالت ليهو:- آي والله طولت عديل منها لكن تلفونها كان شاشتها اتكسرت .... لإن انا كلمتها من تلفون ياسر..... قلت ليها:- من عدم القروش ولا التلفونات بكرة رسلي ليها واحد..... قالت لي:- لا قالت بتصلح تلفونها بس منتظرة وليد يرسل ليها الاسبيرات بس..... يوم الاحد انا بمشي عليها أشوفها إذا محتاجة شي .... قلت ليها:- وآنا.... عاينت لي وضحكت 💙🌎

يوم الجمعة....
بداية الكابوس....

على لساني "

صحيت رتبت البيت وحالي.... الرحلة للمزرعة عملوها آهل ياسر عشان نحن و ام ياسر جات.... عزمت بيتنا بس اعتزروا عندهم ضيوف في ذات اليوم.... لبست فستان نهار مخطط بالأسود والأبيض و ياسر لبس قميص سماوي و بنطلون أزرق ... اول ما اتحركنا جاهو تلفون وقف العربية و اتكلم مع الفي التلفون بعداك أتحرك و غير اتجاهو قلت ليهو:- على وين غيرت طريقك..... بنهرة كدا لمن خلعني قال :- لي جهنم دخلك شنو إنتي !! ... قلت ليهو:- امشيها براك جهنم سألتك سؤال ...الله!!!.... ما محتاج كوراكك دا..... قال لي:- سايقها إنتي ولا أنا ؟!... آنا صح يبقى تقفلي خلاص.... قلت ليهو:- آلف مره قلت ليك أسلوبك دا معاي ما بينفع و غيرو افضل... قال لي:- عاوزاني اغيرو حاضر حاضر حتشوفِ كيف بعدين طيب .... آول ما وقفت العربية قال لي:- انزلي! .... قلت ليهو:- نعم !! أنزل وين ودا بيت منو.... اثناء كلامي باب الشارع فتح و جات طالعه ام ياسر.... نزلت ليها و ركبت ورا .... الشي العجيب و غريب ياسر أتغير قدامها 180 درجة....
وصلنا المزرعة و حسب اللي فهمتوا هي جات معانا عشان ياسر لأنها بتريدوا شديد.... قعدنا وبقينا نتونس و نضحك لمتهم حلوة.... اللي لاحظت انه أمه واختو اللي ما حضروا عرسنا لونهم بختلف عن ياسر شديد و ياسر لونه زي ابوه .... ضحكت قلت وينك يا بابا تجي وتشوف .... بعد الفطور كدا بدينا نرتب المكان امه طلباتها كترت مع ان في غيري بس تلقاني و ترسلني.... أخر حاجة قالت لي:- حبيبتي دون أمر بس أمشي جنب الرجال محل بيشو تلقيني ختيت صحن هناك و حبوب السكري جيبيها لي.... عاينت ليهو ولا كأني هنا واصل لعب بالكورة مع بت اختو ...... مشيت و كنت زهجانه من الوضع شديد شلت الصحن في يدي الشمال و بقيت أفتش عن الحبوب أثناء تفتيش جات بت اختو شاتت كوره و في زيت كان في كباية اتدفق فيني الزيت حار بقيت بصرخ بصوت عالي واهف فيها لحقني عمو دخل يدي في تلج وكانت محمرة بعد طلعتها وواجعاني ... عمو نادى ياسر و وراهو يدي بين أنو اتاثر و لا.... قال لي:- بالك كان وين لمن حصل كدا ؟!...

ابوهو قال ليهو:- حصل خير أسي لازم تعمل مرهم في يدها .... عاين لي قال لي:- واجعاك ؟.... قلت ليهو:- بسيط ايوة.... قلت ليهو نرجع البيت لو ممكن... قال لي:- أمي ما حترجع قبل الكل يمشي ف استحملي الالم خفيف بطلي حنكشه وًمشى .... بعدها بقيت ابكي حسيت بالغرابة كل واحد في همه مسحت دموعي و عيوني جات في أمه و للمره الخامسة ألقاها تعاين لي عين مخيفه و آول ما تنتبه لي تبتسم لي... قلت في ذاتي العيلة دي عندهم انفصام كلهم ظاهر 🤣
يدي بقت شايلة موية مشيت جنبه قلت ليهو:- ياسر ممكن تجي معاي!... قال لي:- ارح خير.... أها عاوزه شنو! .... قلت ليهو:- عاين يدي بقبقت كيف من قبيل... لازم أمشي بيها مركز ولا مستشفى فممكن نمشي أسي لإنها جد واجعاني ماقادرة احركها.... قال لي:- انا قلت ليك امي انا مربوط بيها.. قلت ليهو عمو جاء حترجع معاه أحنا نمشي أرجوك.. قال لي:- لا جات معاي ترجع معاي انتظري ما حتموني يعني.... قلت ليهو:- طيب الوجع ؟!... قال لي:- اتصرفي !
لمن قال لي اتصرفي انا ما عارفه مخي فكر كيف بس انا من الوجع و يدي شاده وماشه تتشنج ما فكرت في العواقب الممكن تحصل من ورا قراري دا...

يتبع

#نبض_العزام16💙

#نبض_العزام
بقلم تسنيم
-١٧-
على لساني "

شلت شنطتي دون آي واحد ينتبه معي و طلعت برا مشيت مسافة بي رجولي لحد ما وصلت بداية الشارع... الحمدلله لقيت وحده سايقه وقفت لي قلت ليها:- أقرب مركز آو مستشفى بس... عاينت لي يدي قالت لي:- لا حول ولا قوة الا بالله الشوهك شنو كدا... قلت ليها:- زيت حار طار فيني بس.... قالت لي:- معليش للسؤال بس المنطقة دي ما فيها بيوت أنت طالعة من وين شكلك بت ناس... ضحكت قلت ليها:- لا انا جيت المزرعة اللي لي جوة كانت عاملين رحله... قالت لي:- أوك آها رحله شبابية وكدا بس انت باين آنك متزوجة!.... قلت ليها:- اي والله متزوجة و المزرعة فيها آهل راجلي خليتهم و جيت... قالت لي:- دقيقة بس... اهل راجلك في المزرعة ؟ ... يعني عارفين إنك كدا وخلوك طلعتي براك ؟!... قلت ليها:- مافرقت بس هم ما عارفين اني طلعت برا... يدي لمن وجعتني طلعت هم لسه مطولين فهمتي... قالت لي:- عمومًا تصرفك غلط كان تكلمي اي زول حتى راجلك... قلت ليها:- هو الخلاني اتصرف كدا... قالت لي:- تصرفكم دا ممكن ينهي علاقتكم... قلت ليها:- أتمنى ذلك... قالت لي:- احكي لي لو حابه! قلت ليها:- في حاجات كتيرة ما بتتحكي بس تتحس أو بتترجم شكل دموع البوح بيها صعب جدا... قالت لي: راحتك أهم شيء... المهم كوني اكثر بخير دايما... بعدها نزلت و دخلت المستشفى .... نضفوها لي و عملوا مرهم و كتب لي مضاد حيوي.... بعدها وأنا طالعه لاقتني صحبة جودي قلت دي الجابها شنو هنا... جاتني قالت لي:- تسنيم خير مالك هنا ولا مع ناس البيت جيتي ؟.... قلت ليها لا لا مافي شي بسيطه بس انت هنا ليه!.... قالت لي:- انا حولت هنا ودوامي خلص لو حابه اوصلك في طريقي ... قلت ليها طيب 💙

بين ياسر و أمه "

_ مافي كيف يعني معاكِ ... آنا خليتها هناك جنبكم ومشيت

= ما عارفه قايلاها معاك انا .... اضرب ليها شوفها وين!؟

_ تلفونها في البيت انا كان كسرت شاشتها.. اوووف منها حتكون طارت وين دي ؟! إنتي قلتي ليها شيء ولا حاجة ؟

= و ما أقول.. المشكلة وين ؟!.... حتى الزيت الطيرتو فيها عفيت منك.... بس لو كان جاء في رأسها و ريحنها منها اخخ بس

_ بالغلط شوت الكورة واتدفق فيها بس مهما كان ما حاذيها بس لدرجة تتشوه

= ارح ارح أسي فتش عليها

_ ارح أوصلك أول بعداك اشوف البلوة البليتوني بيها دي

على لسان جودي "

_ بعد ما اتصلت فيني هناء و قالت لي لاقت تسنيم بس بقت كويسة.... سألتها من الحاصل شنو قالت لي زيت طار فيها و قالت لي نبهيها للغيار مرتين في اليوم.... و نخلي بالنا منها لمن سألتها في شنو اترددت قالت لي لا مافي شي بس عشان الجرح وانتي عارفه... بعدها كلمت امي قالت لي:- مهما كان ما للدرجة بتسهي لمن يطير فيها.... قلت ليها:- اي والله تسنيم حجة حريصة بس بكرة بمشي ليها أسي لو ما الزمن اتاخر كان مشيت ليها.... وكمان تلفونها مقفول
ماما قالت لي:- اي بس شاشتها اتكسرت... دقيقة نضرب لي راجلها

في جانب ياسر "
يالله دي الناقصه.... أسي تقول عاوزه بتها و بتاع ... كان مالي آنا أووه ففف

_ ألو

= سلام عليكم ياسر كيف حالكم ؟!

_ بخير نحمد ربنا أنتِ كيفك يا خالتي ؟!

= طبيبين نحن في أمان الله... و تسنيم كيف

_ كويسه الحمدلله

= ويدها كيف ياولدي الحرق كبير طمني يرضى عنك

_ لا لا كويس ما تشيلي هم بكرة تبقى طيبة ان شاء الله

= لو كان الزمن بدري كان جينا بس قلنا تاخدوا راحتكم

_ الله يسلمكم اطمنوا بس.... لكن لكن إنتي عرفتي كيف نحن ما كلمنا زول عشان ما نقلق بيكم

= والله لو ما صحبه جودي هي اللاقتها و وصلتها ما كان عرفت.... تاني بتي ما تخليها وراك وتطلع

_ ايوة... لا انا مشيت أوصل أمي.... الحمدلله ربنا ستر

= شكلها نايمة سلم عليها لمن أصلها بكرة ان شاء الله.... ودعتك الله

بعد قفلت من أمها رسلت لي امي أنها في البيت طلعت وحرجع اكلمك .... وصلت البيت بقبت بنادي فيها بس ما ردت الطمني لقيت فستانها في السرير طلعت الغرفة التانية لقيتها نايمة هناك و يدها اليمين ملفوفه وجنبها كيس ادوية .... طفيت النور و طلعت الحوش شربت سجارة إتصلت بي أمي

_ اخيرا فضيت لي!

= اى يداب روقت

_ لقيتها كيف!؟ اتكلمت معاها ولا لا!؟

= الصباح خير... لقيتها نايمة

_ غطيتها و شغلت ليها المكيف و جهزت ليها عشاها

= استغفر الله أقوم ادقها ليك ؟! في شنو

_ ولا شيء غلطانة انا اقفل أقفل سديت نفسي

= يا أمي افهمي أهلها عرفوا و جاينها بكرة

_ عرفوا من وين اوعى يكون عرفوا جات براها ؟!

= لا لا ما حصل اطمنك مخليها لبكرة بعد يمشوا اهلها بس

_ طيب لي بكرة وريني آول بأول
_______
صباح اليوم التاني "

على لساني "

_ آول ما صحيت لقيت الدنيا مسخنه ومعرقة شديد رفعت يدي شغلت المكيف لقيت الكهرباء قاطعة دخلت استحميت و اتوضيت صليت الضحى.... طلعت لقيت ياسر برا قال لي:- وين الشاي ولا فاكراني عاطل ؟... قلت ليهو:- داك المطبخ أتصرف ولا كيف ؟!
قال لي :- كدا بقت... قلت ليهو:- مافاضيه انا لي نقاش لا يودي ولا يجيب.... عاوز تشرب شاي هداك المطبخ انا بي يدي دي ومديتها ليهو قلت ليهو شايف دي انا ما محركاها تلاته اسابيع بالذات بعد موقفك أمس يدي دي البتنفعني.... أول ما قلت ليهو كدا عصب شديد و رمى الجريده بس مسك يدي مكان الجرح و جراني و انا بحاول افك يدي وأصرخ فيه بس ولا شغال بي لحد ما وصلنا المطبخ قال لي:- حاوريك حتصرف كيف ؟.... قلت ليهو ولا يهمني المهم فكني بس.... فك الشاش الفي يدي وأنا بحاول امنعو و خربشتو في يدو بس ما اشتغل بيها بعدها قال لي:- اعتذري عن كلامك... قلت ليهو:- في أحلامك والله.... ما اداني فرصه أتكلم بعدها شال ملح غمتو مكان الجرح بقيت اصرخ و أبكي وانبذه يفكني للحظة قلبي جاني في رجلي حسيت انه خلاص حموت من الآلم بعدها فكاني و مشى ويدي ضربت حافه المسطبة اتجرحت من جوة فتحت الماسورة غسلت يدي و عملت تلج و قعدت في الطاولة ابكي
بعد مسافة قال لي:- دا بسيط جدا زي ما بيقولوا قطرة في بحر.... رديت بغيظ:- مريض.... حسبي الله ونعم الوكيل فيك..... المساء ورقتي تصلني..... ضحك ضحك مستفز قال لي:- اطلقك وجاني قريب و لمس وشي ومرر يدو فيني وواصل كلامه لمن أخد العايزو منك ياحبيبي لسه في الأول أحنا بنقول ياهادي يداب لمن نشبع من بعض يبقى بعدها ممكن افكر اطلقك وأبتسم..... عاينت ليهو بغيظ و كره قلت ليهو:- انا عمري ما كرهت ولا عرفت المعنى الا الليله معاك شفتو ... و خليك عارف اني ما بتذل لي زول.... أهلي كلهم لمن يجو حيعرفو .... وبابا الانت شغال عندو وخيرك منو حيقطعك حته حته و حتشوف.... قال لي:- والله! .... اه خفت صدقي.... و أهلك حيصلو هنا يلقوك مافي لأني قلت ليهم كدا ودعي روحك بس.... س سلام يا مدام جدع لي بوسة في الهواء وطالع قلت ليهو درب يسد ما يزد.... جاني راجع قال لي:- كدا تدعي علي حبيبك المهم إكراما ليك عامل ليك مفاجأة حتتبهري و ممكن تتصعقي معاها خلي البيت مرتب و جاهز آمم وطلع يكشكش و يغني ... قلت لا دا مجنون رسمي طلعت أفتش تلفوني مالقيتو لقيتو كاتب ورقة مكان مختوت " لو أشتقت لي او لأهلك اتواصلي في قمريتين بيجو صباح و مغرب " رميت الورقة قلت ليهو الله يلعنك يا ياسر جريت بابا الشارع لقيتو قافل بالمفتاح والفوق بالجنزير 📌

#نبض_العزام17💙

#نبض_العزام
بقلم تسنيم
-١٨-
بعد لقيت الباب مقفول رفعت راسي للحيطة بس انا قصيرة ولا واصلاها.... جبت لي كرسي و وقفت فيه و عاينت و كوركت للجيران عسى ولعل يكون في واحد بس خاب أملي لمن لقيتهم مقفلين بي طبل و التراب ماليه السيراميك عرفت أنهم مافي قلت اشوف التاني بس اتذكرت انه رحلوا قبل اسبوع قعدت في مكاني بقيت ابكي اعمل شنو لا تلفون ولا زول أقدر أخليه يديني تلفونو ولا يصل يجيب أهلي أخدت بكيتي و قمت خليت الكرسي مكانو دخلت جوة فتحت الادراج افتش عن تلفوني بس ما كان هناك قفلتها ووقفت مسافة أفكر انا إذا كنت مكانو حادس التلفون وين ؟!....

في جانب ثريا و جودي ؛

_ متأكدة انه قال ليك كدا ؟!

= آي يا ماما والله بالحرف قال آنها بخير و كويسه شديد و اختو عرسها قرب و عشان عاجابها حاجات تسنيم طلبت منو تسوقها معاها و هو ما قدر يرفض فساقتها اليوم

_ اجي اجي في شييتن غلط والله انا ما مرتاحة

= لا اطمنك آنا زيك راودتني شكوك بس اختو فعلًا عرسها قرب

_ وما قال ليك راجعات متين ؟

= اي حكاية أسبوع لاسبوعين

_ الله يكضب الشينة الله يستر

= ماما ما تقلقي بعد اسبوعين نمشي من غير نكلمهم نفاجئهم بس
انا اتاخرت الليلة يلا سلام

_ ودعتك الله... الله يستركم ويحفظكم من كل سوء

على لسان بدر الدين "

_ الشركة أخر شهرين بقت أسهمها ماشه تنزل تلاته مناقصات خسرتها والميزانية المالية في زول بيلعب فيها ناديت نادية و قالت لي شاكة في زول قريب مننا بس لمن تتأكد حتى تحكي لي فقلت ليها خلي عبدالله من المكتب السري يتحرك بس ما في اي بشر ينتبه ليهو لإن لازم اعرف الحيوان البلعب فيني دا الا يحفر قبره

_ على لسان ياسر "

_ بعد مشيت الدوام غشيت أمي و حكيت ليها أنو منعت أهلها يصلوها .... سكتت مسافة و قالت لي:- غبي لمن قلت آنك غبي ما كنت غلطانة.... قلت ليها:- في شنو أسي انا غلط وين ؟!..... قالت لي:- في أن اختك شيلتها جاهزة لو جو اتشمشرن سألن حوليا حيعرفو آنك كضاب ياغبي... أنت بعد دا خلاص حتتفضح انا ما عارفه كم غلط وراي لسه ما عرفت بس انت لازم تتصرف و خطتنا تنجح و الشغل معاك الأمور تمام ؟..... قلت ليها:- اي تمام كله ماشي زي ما عاوزاهو بالظبط و الملي و أسي الخطه التانية حتبدا بعد اصل ليها هناك
_بعدها طلعت لي بيتنا وأنا ما مرتاح ماعارف ليه ؟.... وصلت البيت هادي ساكن الغربية إني بتعمد اجوط ليها المكان برجع بلقى كل شي مرتب لمن سألتها إنتي ليه بتعملي كدا ردت لي:- مهما حصل مهما كنت بكرهك واحتقرك و مليت الدنيا قرف و وساخة حانضفها عشان نفسي ما بتسمح لي اقعد وسطها وإذا أنت اتربيت و نشأت وسطها أنا لا.... من قمت اتربيت على الترتيب والنضافه وما بعرف ولا أقدر اقعد وسط الهمج والخمج.... مع ان ردها كان منطقي بس عشان قدرت ترد علي وقلبت علي الطاولة زي ما بيقولوا كسرت ليها تلفونها .... جيت لقيتها نايمة.... جريت الكرسي قعدت جنبها حتستغربو آنا بعمل كدا ليه انا زاتي ما عارف.... عاينت ليها في وشها كانت باكية ... لاقاكم زول دمعو يمشي وهو نايم دي تسنيم.... مديت يدي أمسح ليها فجأة فتحت عيونها قامت مفزوعة قالت لي:- أنت ؟... ابعد عني الله يخليك أبعد عني وريني عاوز شنو حديك ليه بس خليني أرجع بيتنا.... آنا ماعارف كيف بتحول لي واحد تاني لمن اشوف دموعها.... لمن قالت لي:- ياسر أرجوك طلقني... خاف الله فيني.... اتذكرت ورجعت لي واقعي.... جيتها قريب ومسكتها من شعرها من ورا قلت ليها طلاق ومافي.... عمرك حتعيشيهو كدا ولسه حتشوفي و فكيتها.... قالت لي:- خاف الله ياخ.... قلت ليها:- اطري الموت .... قالت لي:- عارف زمان ماما قالت لي المابخاف الله خاف منو وأنت ما خايف منو .... عارف اعمل الانت عاوزو بس ربي قادر و شايف و قامت مشت

على لسان تسنيم "

_ بعد بكرة حنتم شهرين وانا الفترة الفاتت كلها كوابيس من البيحصل بالنهار بسبب عمايل ياسر.... يدي شبه التئمت وشفت الحمدلله بس ... هو معيشني اسوء حياتي مرات يقفل علي الغرفه ما اطلع الا هو يجي و مرات يحبسني في المخزن مظلم وسخن كان ليل او نهار.... حياتي اتحولت لكابوس حقيقي واحد نهار و التاني بسببه النوم بقيت أخاف منو..... أربع وعشرين ساعة يشرب سجار و شيشة مرات بتخنق ما بطلع برا لان إذا عرف اكيد ما حيرحمني بيها.... قسوه قلبو دي من وين ماعارفه.... لمن لقيت تلفوني قبل يومين رجع لي الأمل آني أتخلص منو بس سرعان ما مات أملي لمن وصلتو فالشاحن ولقيت البطارية ميته رجعتو مكانو براحة و بقيت بفتش لحيله تخلي ياسر يغلط قدامي ينسى تلفونو آو المفتاح يغفل عنو عشان أقدر أنسخ نسخه منو بس ياسر حريص جدا عليهم و مكالمات بالليل تخجل كمان..... وأنا قاعدة كدا سمعت الباب فتح قمت حيلي وجبت طالعه اعتب على رجلي فرحت لمن شفت القدامى وجريت حضنتها و بقيت ابكي بقت تهبش في رأسي وتلمس شعري قالت لي:- مالك بتبكي ليه ؟!.... عيونك وجسمك بقو مبهدلين ولا تشبهي النسوان أسي كان جات معاي ضيفة تلقاك مبهدلة كدي...

تلقانيا بعد كلامها دموعي وقفت قلت ليها:- ما هماك الوصلني لي كدا شنو هاميكِ منظري وجيهتي.... قعدت وخلفت رجلها و نزلت التوب من رأسها .... قالت لي:- هدي كويسه ونفسك نازل طالع مالك اجي.... قلت ليها بعد قعدت زيها:- يلا نحن طالما في نفس اللعبة شايفه من حقي اعرف إنتي و ولدك بتتصرفو كدا ليه ؟! ..... قالت لي:- ذكيه طلعتي انتي و حلوة كمان!... بس بدري عليك تعرفي اي شي المهم جهزي الغداء انا متغديه معاكي... قلت ليها:- كان نفسي اشاركك لكن سبقتك تحبي اخت ليك ولا تنتظري حبيب امو يجي و ضحكت 😂.... قالت لي:- لا الظاهر انه ما شايف شغله معاكِ ولسانك طويل لسه.... جات تمد يدها علي ثبتها ليها ورجعتها لي ورا و لويتها قلت ليها:- إنتي مره زيي يعني بقدر عليك واطلع فيك شواطيني ف احترمي نفسك احسن وعمرك ومقامك و غداك يا خالتي أمشي آكلي في بيتك هناك انا ما تسنيم المسكينة وأسي زي الفالحة تشيلي رجلك وتطلعي بكرامتك والله احسن لك.... قالت لي:- عشنا وشفنا جداد الخلا يطرد جداد البيت.... ضحكت مسافة قلت ليها:- جداد و هنا كلٌ يرا بعين طبعه اذا شايفه جداد فراجعي نفسك 🤣😂😂 .... انتي قليلة ادب وحخلي ياسر يوريك ليهو طلعت برا منفوخه حتطرشق... اظن لاقاها برا وجاني نافش ريشو

قلت ليهو:- هلا هلا ولد الغالية هلا....

= قال لي:- امي مالها قلتي شنو لمن طلعت برا ومن الزعل ما شايفه قدامها ؟!....

_ هههه والله طلع بهمك الزعل يعني بشر بتحس أنت ؟! واو حبيبي واو اصفق ليك 😂😂😂😂..... ما تضحكِ الاهنتيها دي أمي يا وسخه كان حيديني كف....

قلت ليهو:- عندك عشان ما ترجع مكسورة اما وسخه دي الا كان أنت اوسخ منك مافي ..

= هه ياًحلوة فورتك وتعصيبك ما بذيدني الا حماس و لذة !...

_ عارف الكلام معاك سيئة ...ابداً ولا حناقشك.. أنت والبنات البتعرفهم ووسخك كله ما بتهمني و إذا لقيتك في النار حزيدك حطب واس#قاطعني
= نار هههه نار نار نار " مسكني من حنكي و شداهو ":
النار حتشوفيها هنا الجحيم الاتمنيتي دا حعيشك فيه لمن تقولي كفاية !....

_ واحد مريض

= لا ياحلوة راجلك يا مدام

_ على ورق وما تفكر تقرب مني الله اكبر عليك

= حتغضبي ربك كدا !

_ خغضضبه فعلًا اذا خليت واحد زيك صلاة ما بصليها يقرب علي وبعدين انت الله بتعرف ليه شنو ها ؟؟

= عارفه اني حعمل شنو صح ؟!

_ هه زي البياذن ف مالطا ولا بيهمني بقيت جسد دون روح !

= روحك دي بتحسيها لم أجيب ستك فوقك بيقولو ما بتوجع المراة غير مرا تانية

_ ههههه 😂🤣🤣 ضحكتني والله.... دا اذا حسبتني بحبك ولا كنت مرتك ... اقوليك أعمل الانت عاوزو " خلفت رجلي وفتحت التلفزيون و هو طلع غضبان ماشايف قدامو و يتوعد ويحلف للجاي...

#نبض_العزام18

#نبض_العزام
بقلم تسنيم
١٩-
#نبض_العزام19

على لسان ياسر "

تسنيم مصرة تستفزني وآنا ما قادر اخليها تنتبه لي ... لمن خطيت الخطوة دي كان هدفي هي و تغير على ....وتنسى اللي هي بتحبه... مرا حكاية اسبوعين واتزوجت ... ايوة اتزوجت مكايدة ليها وعرست وحده اختارتها امي عشان تمشي حسب خطتها.... جيبتها البيت العصر دقيت الباب مخصوص عشان تفتح هي .... بس نسيت اني بقفلها وبطلع.... سمعت خطواتها و وقفت جنب الباب وقالت:- يا اللي عند الباب المفتاح رايح ... قلت لي سناء في اضانها اتجاوبي أنت معاها.... فقالت ليها:- طيب ارجع متين؟!...... تسنيم سكتت مسافة وقالت:- ماعندي علم مش لمَ هو يظهر ؟..... قالت ليها:- هو منو ؟! ....! تسنيم ردت:- ياسر راجلي.... حابسني زي الغنماية هنا.... ممكن تقدمي لي خدمة ؟!...... قالت ليها سناء:- طوالي حبيبتي وضحكت بسخرية... قالت ليها:- معاكِ تلفون ؟! .... عاينت لي وهزيت رأسي بالإيجاب عاوز اشوف بتفكر في شنو وقلت ليها بهمس:- اساليها عاوزه بيهو شنو ؟.... فقالت ليها:- اي معاي.... تسنيم طوالي قالت ليها:- مرريهو لي بتحت اعمل مكالمة الله يكرمك... أرجوك ارجوك .... هزيت راسي و ورفضت... قالت ليها:- مليني الرقم اللي عاوزه تتصلي بيهو و أنا بدق عليه.... قالت ليها:- طيب ٠٩١******* ها دخل جرس ؟! قالت ليها لسه لو رد أقول شنو... قالت ليها:- قولي ليهم يلحقو بتهم تسنيم بس.... اللحظة دي انا غمضت عيوني مسافة و فتحت الباب بالمفتاح....

على لساني

لحظة الباب دق و لحد ما قلت ليها الرقم حق بابا كان أملي كبير شديد بس لحظة البكرة لفت الأولى و التانية قلبي بقى يدق شديد ... ولمن شفتو قدامي كان عروق وشو بارزه لدرجة انه كان ممكن تتفجر من غضبو... بي نهره قال للمعاهو:- اسبقيني لجوة سرعه ولمن قال لي:- وأنتِ .... خبط الباب برجولو... اتخلعت وزحيت لورا من خلعتي... قال لي:- عاوزه تتصلي بي أبوك ؟! و بقى جاي على... قلبي وصل حلقي عديل آول مره يكون كدا ... دموعي زاتهم اتخلعو وحلفت تنزل 😅... قال لي و هو خانقني:- منو غيرها دق الباب وقلتي انا حابسك هنا اقتلك انا ولا أعمل شنو فيك ؟.... حتموتني فك وبقيت اخبطه في يدو و خربشتو لدرجة جرحتو ... فكاني و بقيت اكح و انحنيت لركبتي اتنفست مسافة غمضت عيوني وفتحتها وقمت بقيت اخبط فيه في صدرو و ألز فيهو لورا و أتكلم بين دموعي....ياخ حرام عليك الله ياخدك بس وارتاح من قساوتك وعذابك عملت شنو انا استاهل دا كلو بسببه ذنبي انا كان شنو... ها وريني ما حرام عليك ولسه بلز فيهو وقدر ما بحاول أنو يمسك يديني ما قادر... قلت ليهو:- أنت وأمك عندكم تار معاي.... الليلة دي تحكي لي.... شفت آنا صبرت عليك واتحملت بس قلت بيجي يوم وكل شي يتغير... لكن لا كل يوم حقارتك و دنائتك في زيادة ما كفاك ياخ الله دا ناسيهو أنت.... ياخي انا اذا بعمل السبعة وزمتها عقابي ما ببقى كدا وصف الآنا فيهو قاسي... شلتني من بيتنا ليه وقت حتهيني ولا دي خطه ما صدفه اتكلم ياخي انا تعبت منكم و قلت لي اموتك ؟... ههه في زول بموت مرتين ؟؟ ... انطق أفتح خشمك دا ولا لسانك اكلتو الكديسه ... قلت ليها:- كل الحصل و الحاصل أنتِ ما ليك دخل فيهو أنتِ بس دخلتي اللعبة زي ما قلتي حسب الخطة آنا من الأول صح كنت بحتقرقك واكرهك بس إنتي ما عندك ذنب كنت بحس بالندم كل ما مديت يدي ولا شفت دموعك بس أبوك هو السبب... قتل خالتي تومة امي و حرمها منها حبتو وحباها في النهاية موتها عرفتي ليه أسي !... ضحكت مسافة وقلت ليهو :- و عاوزني اصدق الحوار الغبي دا ههه شوف غيرو ... نحنا كبار كفاية يعني وجيت ماشه وقفت قلت ليهو:- مبروك يا عريس هههه تغلبك عيال ... لاقتني واقفه و جرت آول ما شافتني قلت ليها:- مابعضي آنا يا مدام روقي ساي و مبروك ليكم... قالت لي بتوتر الله يبارك فيك يارب... قلت ليها:- مش أنتي الكنتي ورا الباب ؟ ههههه 😂 قالت لي:- ش شنو قلت ليها:- شنو الشنو روقي ساي ما سألتك استكيني ريلاكس بس فتحت التلفزيون وبديت اكل فشار

في جانب عزام و والدته "

٠عزام انت أسمع مني واخطب ال قلتها ليك!

_ أنا يا امي قسمة غير مع تسنيم ولا انا ما عاوز افهميني أرجوكِ !
حتى إذا خطبت ما ححبها حظلمها معاي ما بقدر ما بقدر .. كان في وحده تنور حياتي فهي تسنيم ماقل منها

= انت خسرتها خلاص أوعى لنفسك بعدا.. نورك ظلام عندك مضوي في مكان تاني أبوي انا !

_ اه اه نار نار والله يمة قايدة هنا " حرك يدو على صدره " ما بتبرد تاني
= الله قادر وكبير زي ماحبيتها بينسي#قاطعها
_ أمي ارجوك لا... عايني أنتِ لو بتحبيني ما تقولي كدا ولا تدعي لي بي كدا " مسح وشو و عينه و قال :
استغفر الله .. اللهم رد لي ضالتي اللهم هبني مافقدت اللهم عليك بقلبها يارب و بارك لها و ا#قاطعتوا
= بس بس قطعت قلبي " اخدتو في حضنها "
الله يلم شملكم تاني ويجمعكم اااه يجمعكم الله يجمعكم

عزام بيقول:

الحياة عندي أمي و تسنيم.. الاتنين ميزان بالنسبة لي.. الاتنين واحد عندي مجرد ما يختل كفه و تقع أنا بفقد جزء كبير من اساسي .. اليوم معاي أمي اللي هي الاساس الأكبر💙... لكن انا فقدت روحي و شريكتي فقدت نصي التاني و السبب غرور أب شايف انه اللون أساس حياة و ماعارف انه هي حياتي وأنا حبها 🌎💙

مكالمة بين سناء وام ياسر "

_ قلتي شنو ؟؟!.... حكى ليها كل شيء

= اي يا عمتو زي ما بقول لك كدا

_ وعملت شنو بعد كدا ؟!

= ضحكت على كلامو .. قالت ليهو جيب غيرها وربتت على كتفو و باركت ليهو وقعدت تحضر وتأكل فشار

_ لا هي ما بالغباء دا في شي في رأسها دا و ياسر طار وين ؟!

= الليلة جمعة و نايم للآن

_ شكلها ليلتكم حمراء ههه

= مششششم حمراء علي... ما فكر يقرب لي أساسًا

_يالبليدة خليك مفتحه واتجيهي واغريهو ما بيقدر يعاين لغيرك تاني... اسألي مجرب ... حوريك تعملي شنو اسمعي وركزي سمح

= آها قولي

_ تعملي كالاتي....... الخ

= هههه ما بقدر اعمل كدا يا عمتو انا

_ ها العوقة دي بتقدري فالنهاية حلالك هو يلا أمشي شوفي حفرتك وين

على لساني "

_ كنت واقفة في المطبخ قليت القهوة و دقيت البن و وقفت منتظره القهوة تظبط و أثناء دا بعاين للشباك و شايفه السحاب قلت حتجي مطر تاني و بالفعل بدت تنقط الجو ظابط جدا بديت أدندن

طول مفارق حيُو يخوانا كيف وازيو 💙 من يوم فراقو ديارنا ما شفنا زي زي زيو 💙🌎

على لسان ياسر "

صحيت على ريحة قلوة بن عرفتها تسنيم طوالي قمت قلت أقول ليها تعمل لي معاها بس وقفني صوتها و هي بتغني

ﻃﻮﻝ ﻣﻔﺎﺭﻕ ﺣﻴﻮ ﻳﺎﺍﺧﻮﺍﻧﺎ ﻛﻴﻒ ﻭﺍﺯﻳﻮ
ﻣﻦ ﻳﻮﻡ ﻓﺮﺍﻗﻮﺍ ﺩﻳﺎﺭﻧﺎ ﻣﺎﺷﻔﻨﺎ ﺯﻱ ﺯﻱ ﺯﻳﻮ
ﺯﻭﻻ ﺣﻨﻴﻦ ﺯﻱ ﺯﻭﻟﻨﺎ ﺣﺒﻴﺐ ﺣﻨﻴﻦ ﺯﻱ ﺯﻭﻟﻨﺎ
ﻭﺍﻟﻠﻪ ﻣﺎ ﺑﺘﺨﻼ ﻭﺍﻟﺤﻲ ﻣﺼﻴﺮﻭ ﻳﻼﻗﻲ ﻃﺎﻝ ﺍﻟﺰﻣﻦ ﺍﻭ ﻗﻼ
ﻛﺎﻧﺖ ﻗﻠﻮﺑﻨﺎ ﺗﻐﻨﻲ ﺗﻐﻨﻲ ﺗﻐﻨﻲ ﺗﻐﻨﻲ ﻟﻮ ﺟﺎﻧﺎ ﻳﻮﻡ ﺍﻭ ﻃﻼ
ﻳﺎ ﺣﻠﻴﻠﻮ ﺷﺎﻝ ﺍﻓﺮﺍﺣﻨﺎ ﻣﺴﺦ ﻋﻠﻴﻨﺎ ﺍﻟﺤﻠﻪ
ﺣﺮﺍﻡ ﻋﻠﻴﻚ ﻳﺎ ﺯﻣﺎﻥ ﺗﺤﺮﻡ ﻗﻠﻮﺑﻨﺎ ﺟﺪﻳﺪﺍ

عادتو كم مره فغنيت ليها الباقي "

ﻋﻴﻮﻧﺎ ﻳﻮﻡ ﺍﻟﻌﻴﺪ ﻣﺎ ﺗﻠﻘﻲ ﻧﻮﺭﺍ ﻭﻋﻴﺪﺍ
ﺣﺮﺍﻡ ﺣﺮﺍﻡ ﺣﺮﺍﻡ ﻭﺍﻟﺒﺴﻤﺘﻮ ﺍﻟﻀﻮﺍﻳﺎ
ﻭﺍﻟﻀﺤﻜﻪ ﺩﻳﻚ ﻭﻳﻦ ﺳﻴﺪﻫﺎ
ﻃﻮﻝ ﻓﺮﺍﻗﻮﺍ ﻋﻠﻴﻨﺎ ﻭﻋﺎﺭﻓﻴﻨﻮ ﻣﺎ ﺑﺎﻻﻳﺪ
ﻣﺘﻴﻦ ﻣﺘﻴﻦ ﻳﺎ ﺍﻟﻠﻪ ﻳﺠﻴﻨﺎ ﺍﺟﻤﻞ ﺭﻳﺪ
ﻭﻳﻬﻞ ﺑﻨﻮﺭﻭ ﻋﻠﻴﻨﺎ ﻫﻠﺖ ﻗﺒﺎﺋﻞ ﺍﻟﻌﻴﺪ
ﻃﻮﻝ ﻣﻔﺎﺭﻕ ﺣـﻴــﻮ
ﻳﺎ ﺍﺧﻮﺍﻧﺎ ﻛﻴﻒ ﻭﺍﺯﻳﻮ
ﻣﻦ ﻳﻮﻡ ﻓﺮﺍﻗﻮ ﺩﻳﺎﺭﻧﺎ ﻣﺎ ﺷﻔﻨﺎ ﺯﻱ ﺯﻱ ﺯﻳﻮﺍ

_ اتلفتت على و دموعها في عيونها وشبه نزلت وقالت:- انا ما غلبني اتمها عشان ما حافظاها لا ابداً ... بس المقطع اللي جاي و البعدو بيلامسوني في قلبي و بيوجعني عشان كدا وقفت على كدا... قلت ليها :- آها آنا اسف ماعندي علم... عاينت لي و ابتسمت قالت لي:- بالله بتعرف تعتذر أنت ههه.... قلت ليها:- ما تستفزيني.... قالت لي وهي شايلة كباينها وطالعه:- أنت ما أنت وأنت صاحي من النوم و أثناء طلوعها سامعها بتغني :- تعتذر بعد ايه... عن عذابي البي عن دموع عيني... قلت ليها:- سامعك قلنا و ضحكت.... كل ما أتذكر صوتها وكيف بتميل لمن تغني خطفت قلبي 💙🌎
جاني صوت من وراي وآنا بشرب في القهوة.... حبيتها ؟!

#نبض_العزام19💙🌎

#نبض_العزام
بقلم تسنيم
-٢٠-
حبيتها ولا لا ؟!
_ وإذا ؟؟... حيفرق في شنو .... ما تتدخلي عليك الله في اي شي ما بيخصك ارجوك! .... قلت ليهو:- ما بيخصني كيف ؟... مش زوجتك
قلت ليها:- اووف صح زوجك انا.... بس في حاجات شرحها صعب... طيب جربني أفهمك.... قلت ليها:- يا سناء حتى لو حبيتها هي بتكره اسمي خلي شخصي!... انا حبيتها آي لكن أنتِ عارفه انه ما عندي فرصه معاها ويشهد ربي انها قريبه لقلبي بقت و سألتك بالله ما تحاولي تاذيها بإي شكل إذا ما عشانها عشاني و أنا حعمل ليك العاوزاهو بس خليها.... آنا محتار بين أمي وبينها ... البت تمت شهرين وحاجة عايني روحها انطفت حتى ضحك ما بتضحك إلا مجاملة قبل شوية لمن سمعتها بتغني عرفت قدر شنو أحنا سيئين مهما كان هي ما ليها ذنب عرستها غصب عنها وفوق كل دا كضبت على أبوها أنو الشاب اللي هي عاوزاهو عاوز يغدر بيها وقلت ليهو أنو خالتو أمينة عمتك!.... قالت لي:- ياسر ما قادرة استوعب أنت قلت لابوها أنو الشاب اللي عاوزاهو هي عندو خالتو أسمها أمينة واللي هي خالتك أنت و بكدا عرسها ليك ؟!.... هههههه صراحة ما اتوقعتها منك!
_ حتى آنا ما اتوقعتها منكم !
اتلفتنا بدهشة لتسنيم و ملامح وشها و للشايلاهو في يدها!

على لسان بابا "

جاني عبدالله من المكتب السري شايل ملفات الناس اللي شاكي فيهم.... بقيت أقرأ في الملفات من برا لبرا مهيد حذيفة رامي محمد أحمد آمين شرف الدين ياسر و السر و غانم ... بعد شوية رفعت ملف ياسر بعيد قال لي ليه ؟! .... قلت ليهو :- دا زوج بتي أكيد ما حيعمل كدا... قال لي:- آسف اني ختيتو خيار معاهم لكن هو أنضم حديثًا واترقى سرعه للمنصب دا .... قلت ليهو:- انا ياسر عينتو ورقيتو لأنو شاب كفو ما هين والله شغله تمام راضي كل الرضا عنه ف أحسن تركز على مهيد و رامي و السر ديل منهم خوف.... قال لي:- تمام بس ياريت ثقتك فيه ما تهتز... بعد إذنك حشيل الملفات معاي بس عشان ما تجيب لينا هواء.... قلت ليهو:- لا خليها معاي بالمرة عاوز أعمل حاجة للشباب... قال لي:- وهو كذلك 💙

" في بيتنا
حوار بين ماما و عماتي وخالاتي الكبار "

_ عاد زي دا لا سمعناه ولا شفناه بتك جابت الطغى من وين
_ اي يا ثريا من يوم عرست تلفون ساي ما فكرت ترفع تدقو
_ بري والله الاتعلمتو جديد لا يشبها ولا يشبهنا... أسي كم مناسبة راحت ولا فكرت ترفع تلفونها تبارك اجي ؟!
= هوي ها اافتحن عويناتكم دي بتي انا عارفاها وان في ال شي مسكها مننا الا شي قوي و ياهو راجلها قال كويسه ويوم ما مشينا كانو مقيلين مع أهلوا
_ المكابرة فوق كم ؟! في شي حاصل على بتك قلبك دا ما حس بيها اصلو
=حسيت لكن نسوي قروب شنو راجلها مانعها الحركة و المشاكل اللي ممكن تاثر فيها و في طفلهم
_هيه ماشاء الله ماشاء مبروك مبروك والله ربي يثبتوا ويبارك فيهم يارب كلامو صح ... عرفتي كيف كلمكم هو ؟!
= لا انا عرفت من بدر الدين الصباح قال ياسر كلمو أمس و بدر الدين جا متأخر بالليل عشان كدا و ياهو بعدين نمشي عليها إذا جات بدري من العيادة من مقابلتها ان شاء الله بنشوف بعد المغرب الوضع كيف !

على لساني

_ بعد شلت قهوتي نسيت أجيب الفشار فدخلت أجيبوا من المطبخ سمعتهم بيتكلموا عن زول افتكرتو من أهلهم بس لمن جاب سيرة اتزوجتها وغشيت أبوها عرفت انه بيتكلم عني آنا كان فقدت المنطق خصوصًا انه جاب سيرة عزام 💔 بعدني عن حبيبي 💔 انا كنت مستعده اسامحو على كل الفات بس بعد كدا لا ابداً ... لقيت نفسي بقول ليهم حتى آنا كمان ما اتوقعتها منكم 💔 جيت جنبو قلت ليهو :- عارف كمية الكراهية و الاحتقار الفي قلبي تجاهك مش كبرت لا ... بس ما حاسه إنك حتى تستاهل اني أحرك فيك ذرة من آي نوع من الأحاسيس سوى كره أو غيرو لإنك زيرو بالنسبة لي... لأخر لحظة وانا بسمعكم قلت دا زول آنا ما بعرفو يمكن من أهلكم عمل كدا بس لمن جبت سيرة أبوي وعرسك عرفت دي آنا الانت بتتكلم عنهم وفرقتنا 💔 عارف شوهته صورتك الكونتها والله بعد ما قلت إنك بتندم على اي شيء عملتوا حتى كنت حسامحك بس حاليًا ليوم الدين ابداً ما حاسامحك عارف ليه لإنك قبل يغصبوني عليك اغتصبت حياتي شوهتها ودمرتها يومك البعدتني عنو 💔 لو الانتحار حلال كان انتحرت بالسكين بس حسبي الله ونعم الوكيل فيكم ابداً ما حسناها ليك أنت بالذات ولو جيت شايل الدنيا في يدينك ندم و أسف انا يستحيل أسامحك فاهم ولا لا و من هنا لغاية يوم بكرة لازم ورقتي تكون في يدي و تفتح لي زفت الأبواب اللي حابسني فيها دي والا علي وعلى أعدائي .... طلعت منهم من غير أنو أنتظر رد لي كلامي دموعي ملت وشي بعد اتحركت بس قدامهم رغم ثباتي ألا أني كنت منهارة وضعيفة.... بقيت بشيل نفس يالله شفت تلفون ياسر ما صدقت شلتو و جريت غرفتي و من دون أنتظر إتصلت بي بابا أول ما قال لي :-

=ايوة يا ابني !

_ آنا بتك ما ولدك

= الليلة اتذكرتي أبوك!!

_ ما نسيتك في يوم بس نقلب السؤال..كيف حالك مع الجحيم مثلًا ؟!

= أنتي لسه فاكرة جحيم الزيك ممتنين للهم فيه

_ دا هم وابتلاء ما امتنان ابداً

= وحده حامل عاوزه شنو أحمدي الله ما تكوني ساخطه

_ حامل قال ليكم كدا... وأحمل من دا ههه م كفاية عذاب ..... الموت ولا أحمل من واحد منافق غشاش أو نقول الضلالي ده ... أنت فاكر لما بعدتني عن عزام كدا خلاص حميتني لا أبشرك سوقتني للنار بيدك و آما الحقير #قاطعني
= اسمو ياسر راجلك أو احترام ليهو ابو ولدك

_ هههه راجلي على الورق والله آبو ولدي!! بابا انت مُصر شايفاك بس حخيب الفرحة اللي ظاهره في صوتك انا ماحامل ولا حملت منو ... مش اتقبلوا كزوج أول حتى أحمل بس معليش ما حصل ولا حيحصل ... خلينا من دا أسي دا موضوع خربان يعني طين في عجين نجي للمهم .... أسألك سؤال: بتعرف شنو عنه عن ياسر انت ها ؟! هو ولد ناس منو؟!

= قصدك شنو بالكلام دا وكيف ما حامل وهو زفاني بالبشرى
_ خليك من قصة الحمل الكاذب اللي اخترعوا.... ياسر دا ولد ناس منو ؟!
أمينة حسن الإمام دي منو !!؟

= أنتِ بتعرفي الاسم دا من وين ؟!

_ مامهم آنا عرفت بس السؤال علاقتك أنت بيهو و علاقه ياسر بيها دي الحلقة هنا ولمن تعرف الف مبروك علي و هاردلك ليك 🙏

= أنتِ عاوزه تجلطيني بس صح ؟!

_ العفو دا ما مرادي أنا دا مرادهم هم

= هم منو !!!!

_ ياسر و زوجتو و معا#قاطعني
= زوجته إنتِ ... جنيتي يا بت

_ هههههه لا لا يلا أنت فايتك كتير كتير جدا جدا ياسر عرس بعد زواجنا المزعوم بي شهرين يعني حاليا قاعدة معانا هنا ههه والله جد

= انا حاتصرف أنت ِ كوني عادية لحد ما أجي أو حرسل أولاد اعمامك انا حتحرك راجع من مدني واجيك ما بتي البتتهان " بدا برجف و فتح زرارة القميص وقعد ٠" حرجع لك تمام إنتي ماتبكي بس ماتبكي.... احذفي المكالمة دي وانا حتصرف .... استغفر الله استغفر الله لا اله الا الله يارب سلم

بعد قفلت الخط واصلت بكاء ابداً ما قدرت أوقف بكاء بقيت أبكي وأشد شعري و أشد على جسمي .... قمت حيلي و فتحت الباب كدا ... قال لي:- جيبي التلفون دا وخلي الليلة تعدي يا تسنيم!... قلت ليهو تلفونك دا و هزيتو ليهو و رميتو بكل قوتي خبطت بيهو الحيطة ومديت ليهو إصبعي قلت ليهو :- صوتك دا ما يعلا علي تاني فاهم ولا لا.... وأمشي من هنا سرعه قبل ما اط#قاطعني صوتها ... انتي جنيتي تطردي ولدي انا من غرفتو ودا شنو كاسرة التلفون دا ليه ؟... بقروش أبوك كان... جات وقفت جنبي رديت ليها ببرود:- لحم أكتافكم من بابا خلي حته تلفون.... عاينت ليها من فوق لتحت وتابعت كلامي.. عارفه بيقولوا حتى الكلاب الضالة لمن تلقى سيد بتحافظ على الوفاء والولاء للرباها وما بتعضي يدو زي ما إنتوا عملتوا كانت حتديني كف بس عاينت لولدها و سناء قالت ليهم اتعلموا مني ... ما فهمت هي عاوزه تعمل شنو بس مسكتني من شعري ورا و ساقتني لجوة الغرفة و فجأة حسيت ببرودة و تنميل في جبهتي كررتها مرتين خبطت رأسي على الحيطة شفت ياسر وهو بيبعدها عني رؤيتي فالأول كانت مهزوزة ثبتني بيدو واتناقشوا وطلعها برا الغرفة أول ما وصلها الباب لزيتو هو زاتو لي برا وقفلت الباب بالمفتاح قعدت بطولي واترميت في الأرض أصلًا ما بقى فيني حيل..... بقيت اغمض وأفتح أغمض وأفتح لغاية ما بقيت شايفه شي ولا سامعه حتى أصواتهم

أهكذا النهاية حتى دون وداع!

#نبض_العزام20

#نبض_العزام
بقلم تسنيم
-٢١-
على لسان بدر الدين "

_ بعد اتكلمت مع تسنيم طلعت طوالي من مدني بسرعة دخلت الخرطوم مع آذان الفجر وعلى طول مشيت المكتب جبت الملفات اللي جابها لي عبدالله و ختيت جنبها معاملات أخر أربع شهور قام فيها ياسر و إتصلت على عبدالله يجيني في المكتب... كنت بدعي و بقول يالله اني أكون فاهم غلط ولا حتكون مصيبة اذا طلع كلام تسنيم صح... بعد ساعة وصلني ومعاه عناصر من الشرطة والمباحث
عبدالله:- أستاذ بدر المرة الماضية كان قلت انه ياسر ما بيعمل كدا... انا ما أقتنعت انه برىء فتشت سجلاتو ف لقيت ملف الدخول الأولي معدل

_ معدل كيف ؟!

= معدل الصفحة الرئيسية الفيها الأوراق الثبوتية الاسم و الرقم الوطني جواز السفر شهادة الميلاد.... فمثلًا عندنا في الأول ياسر عثمان المرضي.... تاريخ الميلاد 9/9/1987....اسم الوالدة:- أميمة حسن الإمام وفي التاني اسم الوالدة مي عمر محجوب .... الملفات دي أستبدلت قبل شهرين ونص... حسب تاريخ الإدخال والحفظ

_ أستغفر الله لا حول ولا قوة الا بالله يارب.... كيف آنا ما أنتبهت الا أسي سرعه نتحرك أسي على بيتو... و اقبضوا عليه حسب التهم

= وبتك ؟!

_بتي الله يستر عليها ....اتطمن حتكون بخير طالما هو بعيد عنها ...
المهم لازم الوسخ دا يدخل السجن وقدر السرقو و الأسهم و المناقصات الراحت يدفع تمنها .... حاتحرك وراهم أنت خليك معاي ما قادر أسوق خلي عربيتك في الكراج .... بعدها إتصلت بي ثريا

= صباح الخير
_ صباح النور... ثريا لاقيني في بيت تسنيم وما تكتري كلام ولا تعملي جوطة... هي كويسة اطمني لمن اجي بتكوني وصلتي قدامي اتحركي مع جودي....

على لسان الراوي "
الحياة دايما بتدينا فرصه نصلح فيها غلط آو نستمر في ذات الغلط .... ولازم نستثمرها صح... وفي النهاية الخير بيغلب الشر مهما اتعذبنا وضاقت علينا الدنيا الله بيفرجها كأنها ما ضاقت وكلها امتحانات ما علينا الا الصبر
بعد بدر الدين أتصل بي ثريا جرت لي جودي وصحتها من النوم قالت ليها أبوك قال نسبقو عند تسنيم وما ندخل الا هو يجي.... جودي قالت ليها في شنو يعني عشان نفهم ؟؟... ثريا قالت ليها ما تكتري حيلي مات زيك كدا مافهمت شي بس أرح.... لبسوا وطلعوا وهم في طريقهم للبيت اللي فيهو ياسر وتسنيم و الشرطة وبدر في الطريق كمان.... بس في اللحظات دي في وقت متأخر من الصباح ياسر جا ماري بغرفة تسنيم لقى النور لسه شغال دق الباب مسافة مافي رد طلع من الصالة وجا بالشباك من الحوش عاين لجهة السرير فاضي حول نظرو حول الغرفه فجأة لمح رجلينها ممدودة على الأرض... جرى داخل البيت و بقى يحاول يكسر الباب و في اللحظات دي صحت سناء و أمو بالصوت قاموا مخلوعين لمن وصلوا لقوهو كاسر الباب وقاعد جنبها وهي واقعة في الأرض دون تتحرك... الدم جف في عروقهم سناء قالت ليهم وبب ماتت سجمك وسجمنا ياعمتو الليلة أقبل وين انا كان مالي بيكم انا وقعدت في الأرض تبكي وتلطم وياسر مسهي لا هناك لا هنا قاعد بلا وعي... ضاميها عليهو وبيقول آنا آسف آنا قتلتك آنا آسف... امو جات ادتو كف يوعى ختت يدها في رقبتها قالت ليهم عايشة فيها نبض خفيف أسرع اديني تلفوني أضرب لي مها ... مها قالت ليهم ما بتقدر تجي هي لازم تمشي مستشفى لآن في مضاعفات ممكن تكون حصلت وهي بتلاقيهم هناك وبالفعل مشوا بعد أحتجاج ام ياسر بس شالها وطلع بسرعة دخلها العربية دون يناقشهم طوالي حصلوهو ركبو معاه في اللحظات دي عربية جودي كانت في بداية الشارع و ياسر ما أنتبه ليهم بس ثريا كوركت لي جودي قالت ليها هوى اقيفي هداك ياسر وامو ومعاهم وحده ورا ما قدرت أشوفها لفي اجري وراهم
_ جودي قالت ليها:- ماشين وين من الصباح.... تسنيم تكون حاصلة معاها حاجة.... أمي قالت ليها:- قلبي ماكلني الله يكضب الشينة.

على لسان جودي "

_ بعد مسافة من المشي لقيناهم وقفوا قدام مستشفى خاص... ماما قالت لي:- سجمي لو في العربية بتي وحاصله ليها شيء... بعد شوية شفناهم جابوا سريع نقالة وأول ما ختو فيها بت أمي نزلت جاريه ليهم وتكورك وتتحسبن وصلتها ياسر مخلوع وامو لفت وشها من أمي و معاهم وحده ما عرفناها... ماما تبكي وتتحسبن في ياسر وهو قال ليها اسف يا خالتي هي كويسة لكن. وسكت.... ما عارفه بس ياسر كان ما طبيعي ابدا .... لمن عاينت لي تسنيم لقيت وشها مضروب و في دم جبهتا اليمين وجسمها بارد... دخلت مع الممرضات و الدكاترة وريتهم انها حامل كمان.... بعد نص ساعه سمعت جوطة برا طلعت برا لقيت بابا مشتبك مع ياسر وداقيهو و المرة اللي مع ياسر قالت ليهو:- هي هي الهمجيه دي شنو.... داقيهو كدا ليه ؟! ... بابا عاين ليها وقال ليها:- أنت مرتو الجديدة صح!!!... أول ما قال كدا و هي ردت بي خوف وتوتر :- ايوة ايوة في شنو ... ماما قالت:- أشهد ان لا اله الا الله و أشهد آن محمدًا رسول الله... وقفت فوق وجات أدت ياسر كف خلعنا كلنا و صحى ياسر من الهو فيه ... لمن عدلتو بالتاني جاها صوت:- اقيفي حدك يا ثريا.... لقيتها دي أمو لياسر...

لقد كانت مواساتي لنفسي دائما ان الله ما احدث لي امرا الا لخير وما اشقاني الا ليرضني وما ابكاني الا
لأتلذذ بطعم الفرح وما حرمني الا ليعوضني ما اخذ مني الا ليعطيني وما جعلني اقطع طريقا طويلا
ومظلما الا ليعلمني ان الشمس تغيب وانه من الضروري ان احمل نورا في قلبي 🌸💕

#نبض_العزام21💙
___
قربت يخوانا بكرة وبعدو بالكتير حانتهي منها 💙🌎
__
كنت محظورة ما عارفه الفيس مالو

#نبض_العزام
بقلم تسنيم
-٢٢-
على لسان جودي:-
_بعد ماما صرخت .. جريت عليها قلت ليها:- ما تبكي لا هي كويسه والله كويسه و حتبقى أحسن.... قالت لي:- ما سمعتي كلام الدكتورة ولا شنو بتقول ليك عملنا الفي يدنا بس الباقي على الله ...قلت ليها:- ماما هي حالتها حرجة وفاقدة سوائل محتاجة حكاية اربعة وعشرين ساعة وتصحى ان شاء الله وتكون بخير ادعي ليها بس أنتِ .... قالت لي:- حدعي ليها وحسبي الله ونعم الوكيل فيهم والله.... حرقوا قلبي يحرق دمهم عليك بالله هي المسكينة ذنبها شنو تتحاسب هي على شي لا يكاد يذكر آه بس... بابا قال ليها :- يا ثريا.... ماما قالت ليهو:- بلا ثريا معاك بلا هم.... أنت السبب عملت فيها آنا بحميها أهو غير الرقدة الجوه لقت شنو وراك... ياخ لو كان خليتها للولد اللي رايدها ما كان اخير ؟!.... يا ريتني وقفت معاها يومها ولا أشوفها مرمية الرمية الجوة دي .... وأسي خليك عارف لو جا وقال عاوزها أنت رضيت ولا أبيت حياخدها وعصرت عيونها بطرف توبها وبقت تبكي.... بابا جا جنبها ومسكها قال ليها:- حتعدي ما تشيلي هم وآنا غلطان المرة دي وأسف حقك علي 💙 .... بعد المغرب المحامي سلم بابا ورقة وأتكلم معاه شوية ومشى جيت جنبهم قلت ليهم:- يا جماعة هي ما حتصحى أسي بابا سوق ماما وخالاتي وعماتي أرجعوا البيت ماما قالت لي:- رجلي ما برفعها لو بتي ما قامت معاي... شهد قالت ليها:- يا خالتو اسمعي كلام جودي وارجعي معاهم انا حقعد مع جودي وننتظر للصباح .... بعدها مشى الكل وبقينا في المكتب منتظرين "

"المستشفى_بين ممرضتين"

_اللي حصل للمريضة ده شي ما طبيعي ..حصلت ليها مضاعفات بعد الضربة ..محتاجة متابعه بس

=أيوة..بس جابوها متأخر... الحمدلله كل صورها ظهرت نضيفه في الأول أفتكروا وضعها خطير يا حليلها

_ومع ذلك أنا عاتبه على آهل المريضة ...فلنفترض إنو مافي اي زول جاب خبرها و شافها كان تكون ميته اسي...

= الحمدلله الله كاتب ليها عمر بس...غير كده هي حتكون في عداد الموتى زي ما قلتي الصراحة ...

"الممرضات فضلوا يتناقشوا بعد أطمنوا على حالة تسنيم الصحية..في حين شهد و جودي قاعدين في المكتب منتظرين تجي ممرضة يسألوها و تمشي جودي تقعد معاها "

على لسان عزام "

من يوم عرست بقيت اتجاهل إصرار أمي و أنها عاوزه تفرح بي بقينا يوم كويسين والتاني لا ... قلبي دايماََ مشغول بيها، اعمل شنو؟ ، كنت مفتكر إني و مع الأيام ح أقدر اتجاوزها و اكمل حياتي من دونها علشان كدا في البدايه ما حاولت أوقف الخطوبه و انتظرت عشان أقنع منها بعد ما تحصل، كنت بقنع في منو في نفسي ولا بغش عليها إنو هي في أي لحظة; .. حتجي و تعترف لي أنو مجرد حلم ولا مقلب أصلًا اتعودت على مقالبها أنا... قولوا ليها إنمقلبت ارجعي كفاي 💔، بس ما حصل، سافرت واتغربت بس عشان ما أضعف وأنا قريب هربت لبعيد شديد بس فضلت ملاحقاني بشوفها هنا و هناك بقيت عايش في عالم فيهو هي من خيالي الليلة أول مره أشوفها في نومي قمت مخلوع في شي حاصل عليها بس شنو انا ما مطمن ابدا قمت وصليت ركعتين وشلت الليل الباقي صلاة ودعاء لحد ما دخل الفجر نزلت ومشيت المسجد صليت معاهم بعدها قعدت في ركن وقريت قرآن بعدها بقيت أدعي ليها بس لسه حاسي قلبي تقيل شديد بكون مرا بيكم الشعور دا.... جاني راجل من أهل المسجد قعد وحكى معاي وقال لي اي كان اللي في بالك شايل همو أتصدق بالنية وبإذن الله تفرج... وبالفعل عملت زي ما قال لي ورجعت البيت وانا راضي 💙

على لسان الراوية "

مروا يومين وخلاص التالت على وشك وتسنيم لسه ما صحت... شهد وناس البيت بيمشوا و يجوا أما جودي ثابته قاعدة معاها في الغرفة حوالي الساعة عشرة جودي قاعدة جنبها وخاته يدها اليمين وبتقرا عليها قرآن بعد خلصت بقت تمشي يدها على رأسها قالت ليها:- عنيدة في اي شي حتى النوم الناس بتصحى بعد سته ساعات ولا تسعه لكن إنتي لازم تنومي قدر دا أصحى كفاية.... وبصوت باكي قالت ليها اشتقت أسمع صوتك انا اسفة انا كان عندي فرصه اني أوقف كل شيء بس لا خليتك براك... الله اعلم الحيوان دا عمل فيك شنو احنا مقصرين معاك بس هو كان واهمنا إنك كويسه وإنك حامل يالله بس.... سبحان الله ابدا ما اتخيلت يطلع بالسوء دا ... إصحى بس وانا حعوضك حنسافر سوا و نمشي لي نجوان نقعد معاها و نحضر ولادتها و يييك خطط كتيرة بس أنت اصح#
_ لا أنتي ناوية تقعدي في وشنا لمتين يعني...
دا صوت تسنيم قالت كلامها وهي مغمضة و بي تعب قالت كلامها دا.... جودي قالت ليها:- نينا واتلبشت بالفرحة ما عرفت تعمل شنو وتقول شنو حضنتها وقعدت تبكي و باستها في خدها وفي يدينها قالت ليها ماما حتفرح شديد والله حمدلله والله على سلامتك

قلت ليهو:- عاين دون تعصب ولا تكورك أمجد رجع وأتقدم ليها وهم طول الفترة دي متواصلين بس أنت ما تعارض أرجوك خليها تبسط باقي عمرها طالما هي عاوزاهو وما حتغير قرارها دا و بما أنها عارفه عواقب القرار بس هي متمسكة بيهو و انا كمان داعمة ليها المرة دي ۔۔۔ قال لي:- ودا حيرضيك ... قلت ليهو:- أهم شيء فرحتها هي... قال لي :- إذًا على البركة خليها تكلموا يصل البيت بس... قلت ليهو:- هو قال حيكون هنا فترة شهرين ... الخ قلت ليهو كل اللي حصل.... سكت ما قال شي غير جهزوا حالكم بكرة 💙

على لسان أمجد:-

_ما كنت مصدق ابداً إتصلت على و هي بتبكي ما فهمت غير بابا وافق وبكره مننظرك 💙 يداب حسيت اني مبسوط وانو الأمور بدت تترتب بعد حين من الانتظار... بكرة حنبقى اتنين و الفرحة تالتتنا 💙 كلمت أهلي يرتبوا نفسهم للمساء بكرة.... قريب للمساء رجعت إتصلت بي جود تاني قلت ليها:- حبيبي 💙 ... لو حتفضلي تبكي كدا اعتبري اني بكرة ما جاي... قالت لي:- أنت غياظ على فكرة حدك وين.... ضحكت و واصلت قلت ليها:- بكرة ما عندي حد ولا عندي شغله في اي واحد... قالت لي:- بطل قله ادب... قلت ليها :- دا آنا حكون مؤدب ح تحتاري والله يحلك الله يا مرتي غايتو 💙 المهم بدل سكوتك الكتير دا حبيت أقول ليك اني بحبك 💙 و كل شيءٍ جاهز فأشوفك بكرة في الموعد 💙 قالت لي:-و تلاقيني بحبك اكتر و الشوق ليك ماليني و فاض 🌎💙

#نبض_العزام22

#نبض_العزام
بقلم تسنيم
-٢٣-
على لسان الراوية"
صوت الضحك.. الزغاريد بين اللحظة و التانية و صوت الغنا
بت الفنجري اب جيبين يا جودي زيك وين 👏👏👏👏👏
لا صاحبتي لا باريتي يا جودي زيك وين💃🏼💃🏼💃🏼💃🏼
لا صاحبتي لا باريتي رب القدره يغتي عليكي ي جودي زيك وين 👏👏👏👏👏
حلات الدلال في عيونا يا جودي زيك وين 💃🏼💃🏼💃🏼💃🏼
حلات الدلال في عيونا ويمين بت رجال مضمومه يا جودي زيك وين 👏👏👏👏 و الزغاريد ودق الدلوكة .... البخور اللي ريحتو ماليه المكان ..... بينما الشارع فيه علت أصوات الرجال و التهليل و المباركات و صوت الرصاص معلن عن أنعقاد فرحة عمرهم و فرحتهم الأولى.... لابس الجلابية و شال و الخاتم 💙 طويل قامتو و عيونو زي حبات الزيتون الأسود... أبشر يا عريس أبشر و كل خطوة معاها زغرودة وأبشر و يسلم على الخالات و العمات و بالو وعقلوا هناك في الغرفة فوق اللي فيها جودي 💙 لمن لقى الصف طويل مسك تسنيم قال ليها:- أعمل ليك العاوزاهو بس وصليني ليها سريع 🌎💙 شهد سمعت كلامهم و جرت مسكت الدلوكة وبقت تغني

المهيره عقد الجلاد النار يا عروسنا عريسك غلبو الثبات 😍♥️💃🏻💃🏻
الساعه سته والبيت فرشوا وديل نسابتك بلبيجو جوا 💃🏻💃🏻💃🏻💃🏻
المهيرة مهيرة القصيص انتي الملكه وحرس انجليز حكومه يا عروسنا عريسك غلبو الثبات 💃🏻💃🏻💃🏻💃🏻💃🏻💃🏻
المهيرة مهيرة السرور انتي الملكه وحوليك زهور يا عروسنا عريسك غلبو الثبات ♥️♥️♥️♥️💃🏻
بقى يضحك و يبشر و قال لي تسنيم :- اتقدمي ولا بمشي براي.... بقت تضحك عليهو و سبقتو للغرفه و دقت الباب و فكت الزغردة و جات باركت ليها و كانو حيبكوا قالت ليها:- راجلك وراي امسحي دموعك دا يوم فرح يا عويرة وتاني زغردت ♥️💃🏼💃🏼

على لسان أمجد:-

من لحظة المأذون قال بارك الله لكما وجمع بينكم بالخير و المودة و البركة و خالها قال الله أكبر 💙 اللحظة دي قلبي دقه و إحساس كنت طاير بس عشان اصلها بس.... كأني كنت ما واعي الا بعد شفتها قاعدة لابسه فستان حياكل منها حته💙 حغش عليكم لو قلت ليكم عارف لونو شنو... كل الألوان في ضحكتها قاعده و منزله رأسها في هدوء و استحياء ومشبكة يدها... اتقدمت ناحيتها مسكتها من يدينها كانت تلج و انا حفوتها بالرجفه 💙 وقفتها قصادي ختيت يدي في رأسها و بقيت أقول بعد حصنتها :- بارك الله لنا و بارك علينا و فينا و الله يوفقني و أسعدك يارب مبروكه علي يا ست بيتي و دنيتي 💙🌎 بوستها في رأسها مسافة... عاينت لقيتها بتبكي اخدتها في حضني وكانت ماسكة قبضتها قوي في صدري 💙 هديتها بي طريقتي الخاصة 💙🙈 قلت ليها:- اسمعي ما بيدوني ليك أسي في يدي بدل الشهر الجاي والله ما بقدر اخليك وراي تاني..... ضحكت وقالت لي:- لا انا حابه أقعد مع اهلي لسه بعدين شهر زاتو بسيط آنا شايفه .... قلت ليها.- لاحظي واقفة وين بس في يدي صلاحيه وانا حلالك يعني.... ضحكت وقالت:- بلاش قلة ادب ۔۔ قلت ليها:_ زمان كنت محترمك ومحترم علاقتنا بعد دا سبب واحد يخليني أكون مؤدب مافي صراحة 😹💙 عايني عايني صراحة ما حنخلص بس مبروكة علي💙🌎 اسي نطل على الجماعة برا بي رجلك اليمين أهم شيء و نورتي حياتي 💙و سرنا وسط الفرح والمباركات و الزغاريد 💙🌎

بعد شهر.... تسريع للأحداث "
يوم العرس💙
مكالمة بين تسنيم و نجوان "

قولي لي يا نينا اللي عاملة جوطة دي شهد... ضحكت قلت ليها:- كُل يوم من دا غايتو فاتك عرس جودي و كان شفتي الجرسة اللي هي فيها تموتي ضحك .... قالت لي:- وااي فاتني بالجد والله البتدق دلوكة دي هي صح.،.. قلت ليها:- كيف ياخ تربيتنا 😹😹💙 المهم أنتِ كيفك اسي و إحساسك شنو و بكرة حكون معاكِ 💙 قالت لي:- مبسوطة والله خصوصًا حطمن جد لمن أشوفك قدامي عارفاك بتبيني إنك قويه و مامتاثرة بس لمن الاقيك و نحكي أسي الحقي جودي في الكوفير.... قلت ليها :- حاضر أساسًا محتاجة أتكلم معاك.... غايتو جودي نادرة في اي شي في زول بيعمل عرس نهاري هي و أمجد بالغوا غايتو ههه .... قالت لي:- يلا يا ستي أمشي وحاولي افرحي طيب... سكت مسافة قلت ليها:- ان شاء شاء الله 💙

"قريب للعصر في الكوفير ...

أمجد واقف برا إتصل علي جودي يستأذنها يجيي داخل بعد قفلت قلقت شديد قالت لي:- طالعة كيف... نزلت ليها الطرحة و صلحت فستانها اللي بيشبه الأميرات و خلاها في هيئة ملكة 💙 جمال الدنيا فيها تبارك الرحمن قلت ليها:- ملكة و قمر شديد والله جا داخل عليها يخوانا بكى و هو واقف الا هي اتقدمت ناحيتو و حضنتو 💙 اتسللت طلعت برا و الذكريات طاردتني اتذكرت من لحظة ياسر خطبني و لحظة العقد رجع الخوف اتملكني آول ما شفت أمجد بالبدلة وكان متقدم ناحيتها قعدت أبكي لدرجة بكيت بي صوت الا شهد حسيتها ضاماني و بتبكي قالت لي:- طلعي الجواك لسه ما تخافي احنا هنا...

قلت ليها:- بس انا لسه خايفة يرجع تاني بعد يطلع من السجن 💔 شهد آنا بقيت ما بنوم بالليل نهائي مش عدى شهر بس آنا لسه بكون خايفة 😭💔 آنا لو حاولت انوم بصحى مخلوعة و بغلبني أرجع انوم تاني .... قالت لي:- عايني هي فترة صعبة بس حتعدي آنا متأكدة أنتِ قدرها ... قلت ليها:- قدرتي كملت في ما بين ياسر و عذابه و عزام و فراقو 💔😭 قالت لي:- طيب عزام وين ما مشيتي العيادة تشوفيهو ؟!..... قلت ليها:- اخ يا شهد مشيت و ياريتني ما مشيت عزام طلع قافل العيادة و سافر من بعد خطوبتي 💔.... قالت لي:- طيب اتصلي عليهو ...... قلت ليها:- والله إنك مسكينة والله حليل تلفوني كاسرو لي ياسر و بقى فيه مشكلة شاشه وبطارية و ياهو خليتو هناك أساسا عارفه الحصل انت بعد كدا 💔 قالت لي:- يالله ! .... الله كريم عليكم.... قومي بعد دا امسحي دموعك ديل طالعين....... مسحت دموعي و وقفنا في الممر انتظرناهم لحد جو طالعين و متماسكين و يضحكوا 🥺💙 اتمنيت وقتها لو عزام كان مكانو وانا اللي في يمينو 💙 عاينت لي جودي و أشرت علي نظام مالك.... ابتسمت هزيت راسي 💙

في الصالة و الزفة و الفرحة حقيقي كنت مبسوطة وأنا شايفه جودي وفرحتها و أمجد و ضحكتوا اللي ما فارقت وشو لغاية ما لبسوا ملابس الجرتق و جرتقوهم بالعديل و الزين و قرا ليهم بابا سورة يس 💙 لحد ما جات لحظة الوداع خصوصًا ان ما حنشوفها قريب حتسافر معاهو طوالي فكملنا البكى اليوم دا

تاني يوم بالمساء كنا في المطار انا و ماما و بابا و أخواني خليناهم مع جدو عشان المدارس .... قبل الإقلاع قعدت في نفس المكان اللي أخر مره شفت عزام فيهو طلعت تلفوني بس رقمو السوداني للآن قافل 💔.... إتصلت بي نجوان... رديت بي :- نوجة كيفك.... قالت لي:- صوتك متغير في شنو ؟! .... قلت ليها:- كل القصة شوق😭💙 قالت لي:- يا حبيبتي الله يخفف عنك... في المطار صح ؟!... قلت ليها:- آمين يارب... ايوة منتظره الإقلاع بس... سمعت صوت مره معاها قلت ليها دي منو ؟!.... قالت لي:- دي خالة عبير مرة طيبة خلاص مخففه على وحدتي لمن وليد يطلع دوام لمن تجي حتحبيها والله حكيت ليها عنك💙 قلت ليها:- أها كويس طيب... يعني جارتكم وقاعدة براها زيك كدا ولا شنو .... قالت لي:-! لا ما جارتي طوالي عرفتها في مناسبة و ياهو عرفت أنها جديده هنا جات مع ولدها دكتور قالت بيجيبها لي الصباح و بيرجع ياخدها المساء 💙 قلت ليها:- الله حلو طيب و ماما كدا بالها حيرتاح 🥺💙 قالت لي :- بالظبط كدا ... ياخ ماما كان تجي معاك.... ضحكت قلت ليها:- بتجي للولادة عارفه بدري ما بخليها تقعد قدر دا قلت ليها هي يلا الزمن جا كلها كم ساعه و انورك 💙 قالت لي بالسلامة حبيبتي 💙 ماما قالت لي:- اوعى تكوني خربتي المفاجأة بس... ضحكت قلت ليها:- معقولة لكن😹💙

أول ما طلعنا بابا قال داك اخو وليد أرح.... أتفاجأ بي شوفتنا كلنا مفتكر انا بس اللي جايه قال ليهم مفاجأة والله ... كنت تعبانة شديد من شهر والعرس و الجوطة اللي حصلت قلت ليهم:- أسبوع معلقة ما حرفعها حانوم بس لمن قلت كدا ماما قالت لي:- اريتو تنومي جد... عرفتها قاصده شنو... وصلنا و نزلتا ماما قالت لي:- رحلت ولا بتخيل لي... ضحكت قلت ليها:- اي رحلت أرح قبل أتحرك من مكاني انتبهت للبور في العربية قلت لاخو وليد:- اسبقوني بس اجيب حاجة من العربية و آنا ماشه في بتاع عربية سايق سريع الا زحيت سرعه قلت دا مالو المتهور دا شلت البور من العربية أمنتها و آنا راجعه لقيت نفس العربية واقف دخلت السماعات في اضاني و دخلت العمارة في المدخل اتصدمت مع مره في عمر ماما وكانت بتبكي... قالت لي:- اسفة ما أنتبهت آسفه... قلت ليها:- لا عادي بس إنتي كويسة!!!
_ ايوة ايوة قالت بتردد وتكرار ودموعا لسه ماشين... قلت ليها:- أوصلك مكان؟! ...قالت لي:- شكرًا يا بتي ولدي هداك لمن أشرت طوالي اتحركت... كنت حا أتلفت مكان بتاشر بس وليد جاني داخل سلم على و طلعنا سوا 💙

في الشقة قبل تسنيم تطلع "

على لسان نجوان:
_ الجرس رن فكنت عاوزه أقوم قلت لي خالتي عبير الظاهر تسنيم وصلت 💙... قالت لي مكانك آنا بفتح و أصلًا ح أمشي ولدي جاء تحت... قلت ليها:- ياخي كنت عاوزه أعرفك بيها... قالت لي و هي بتفتح في الباب:- حا اجيها تان....
_ أنتِ ... دا صوت بابا قمت حيلي وبقيت ماشه لمن وصلتهم لقيت ماما وبابا واقفين ونينا مافي بقيت ابكي كنت حا أسلم عليهم بس خالتو عبير قالت:- بدرالدين !! أنت هنا و البكى وقع 😭💙

#نبض_العزام23

#نبض_العزام
بقلم تسنيم
-٢٤-

على لسان ثريا "

_ أول ما لقيت في وحده غريبة فتحت الباب افتكرتها شقة غير بس لمن بدري قال ليها أنتِ ؟! قلت هو بيعرفها من وين و ملامحها ما غريبة علي... وهي لمن قالت ليهو بدر أنت هنا و بقت تبكي استغربت قلت دي منو و دي شقه منو الا شفت بتي جايه ماشه نسيت اسلم عليها... قلت ليهو:- دي منو يا بدري عرفنا عليها... المره قالت لي:- أنت ثريا صح و اتلفت على نجوان و قالت ليها:- ليه ما وريتني إنك بت بدر الدين كان عرفتك طوالي.... نجوان قالت ليها:- بس يا خالتي ما انتبهت أجيب سيرة لبابا بس وريتك بي ماما و لمن عاوزه احكي عن بابا ولدك جاكي عشان يسوقك تتذكري.... قلت ليهم:- زول يفهمني ممكن!!!.... بدر الدين قال لي:- ما عرفتيها كيف ؟! .... دي زوجته لأحمد الخالدي صحبي 💙 عبير ..... قلت ليهو:- بالله! ومشيت حضنتها وسلمت على حلو سلام معرفه .... بعدها بدر قال ليها :- طيب و أحمد وين من بعد زواجي وانقطعنا من بعض نزلت السودان لقيتو رحل.... هو هنا معاكِ ؟!! .... ردت عليهو بكسرة كبيرة:- حياتك الباقية أحمد اتوفى بدري شديد البركة فينا و فيك.... بدر عزاها و أنا كمان بعدها طلعت برا و هي بتبكي و بدري حالتو اسوء دخلتوا غرفه و جيت طالعه سلمت على نجوان.... قالت لي:- فاجئتوني و اتفاجئتوا تصبر على تسنيم بس هي وين ؟!
_ جايه مع حماكِ .... مفاجأة والله يحليلو بدر مفتكر صحبو عايش و متلهف لي شوفتوا اتصدم والله.... الله يربط على قلوبهم... وأنت عاملة شنو مع الحمل وكمان قربتي جهزتي حالك ؟! ... ضحكت وقالت لي:- أمي قولي بسم الله... لسه عندي شهرين... حركات وليد دي.... قلت ليها:- وليد و آنا هينين ابقي اقدري على تسنيم 😁😹 ضحكت و قبل ترد تسنيم جاتها طايره قلت ليها:- براحة هي براحة 🌎💙
أجمل احساس في الدنيا تكوني آم و تتابعي نمو طفلك لحد ما يكبر يوم بعد يوم و تلف الأيام و تفرحي بيهو و تودعيه لبيت الزوجية و يكمل فرحك لمن يجي يبشرك بي الحمل بيكون اجمل يوم عندك حماس و سعادة فالحمدلله 💙🌎
" الله يرزق جميع المدامات الإحساس و الشعور دا و تعيشيها بفرح و سرور "

على لسان عزام في العربية "

_ أمي مالك من جيتي و ما علي بعضك و ساكته...
عبير :- سوق سواقتك بس ما تناقشني رأسي واجعني....
_ طيب وريني مالك بس ؟! ....
قالت لي لأنو عارفاني ما ح أسكت :- لاقيت واحد معارف أبوك وما كان عارف أنو اتوفى ارتحت... بعد قالت كدا عرفت ليه حالها اتبدل فسكت منها لآنها حتكون فاقداهو و انا كمان يارب تلطف بينا 💔

" بتمر علينا لحظات صعبه كانت و بتكون أمي قويه قدامها الا شوقها لأبوي هو البخليها ضعيفة و تكون وحيدة رغم اني جنبها بس الفراغ اللي سابو هو جواها ما قدر زول يملاهو "

على لساني "

آنا اللي فضلت قاعدة مع نجوان في شقتها و ماما و بابا اجرو الشقة اللي في الدور اللي فوقنا ... جيت و قعدت مع نجوان و الونسة جرت

نجوان: من جيتي ليك اسبوعين و أنتِ ما على بعضك.... آنا و أنت عارفين إنك ما تمام بتحاولي تضحكِ و تمثلي إنك مبسوطة و كأنك ما أنتبهتِ أني مراقباك غير ماما قالت أقعد معاك عشان كدا خلتك هنا.... و بعدين ليه ما بتنومي بالليل فاكرة إنك إذا استعملتي مكياج حتغشي عيوني... أنا إذا عميت قلبي ما عميان منك

نجوان آنا كويسه والله احسن من اول بكتير

نجوان: ما اختلفنا في إنك أحسن من آول... لكن اذا كنتي كويسة كان من جيتي نزلتي تتمشي جنب البحر ولا قعدتي على المرجيحه اللي تحت كعادتك يعني

_ آنا جيت عشانك ما عشاني فهمتي لو نزلت يمكن تحتاجي لي

نجوان: أمي لمن تكون قاعدة كان ممكن تنزلي بس أنتِ ما عندك رغبة فهمتي لإنك حابسه نفسك لا عاوزه تبكي تتحرري ولا عاوزه تمشي لقدام... الطلاق ما نهاية عشان تحبسي نفسك ولا حتى عيب والله... الأفضل تطلقي ولا كنتي لليوم تعيشي مذلولة ؟!

_ طلاق شنو بس الشايلة همو... أخر همي لآني من يوم مد يدو على طلبت الطلاق ف الحاجة دي ما حتاثر علي ابداً ..... و لو المهانة هي اللي حامياني انوم بالليل لإن العملو فيني ياسر حيظل محفور في ذاكرتي صعب جدا أنسى... يستحيل يكون بشر والله... حبس و حبسني... زيت حار و ادفق فيني.... اما البيت يومي يومي برتبو عشان حضرتو كان بيسوط الدنيا و لا همو لمن لقاني ما شغالة بيهو بقى ما بيجوط البيت و ياهو يا اتشاكلنا و اصواتنا علت يا حبسني مع الحشرات في المخزن ما خلى لي وسيلة و ما عذبني بيها

نجوان: حسبي الله ونعم الوكيل فيهو ياخ الله لا كسبوا عافية... تعالي تعالي ما تبكي... بكرة تنسي كل شيء... ختي رأسك في رجولي .... و ما عرفتي حاجة عن عزام

_ لسه ما عرفت شيء .... الواتس قافل حسابو و رقمو حق السودان و السعودية مقفولين... هو كان في دولة عربية بس وين ما عارفه انا آنا بس لو حفظت الرقم أسي كان يكون عندي بس سلام على حظي سلام💔 ... اوووف إنسي بس ... صحي الخاله ديك من جيت ما جاتك تاني أسمها منو كان

#نبض_العزام
بقلم تسنيم
-٢٥-


_ايوة يا خالتي عزام.... كيفك أنتٍ كويسة!! .... قالت لي: بخير الحمد لله أنت علك طيب!؟ ... قلت ليها:بخير بخير.... حمدلله على سلامتكم.... قالت لي: الله يسلمك يا ولدي... بس ما وريتني أنت بتعرف وليد يعني ولا شنو ؟!
_ وليد علاقتي معاه بدت قريب لكن أمي بتجي هنا عشان تقعد مع زوجتو نجوان بتك... قالت لي: لا حول ولا قوة الا بالله أنت ولد عبير و أحمد الخالدي!
_ دنقرت رأسي و قلت ليها ايوة بذات نفسه
قالت لي: عاد يا ولدي الله يهديك وقت أنت ولدوا ليه من الأول ما قلت لينا كدا ؟!
_ يا خالتي جات كدا كنت مربط و سلفًا عمي بيكرهني فما حبيت افتح معاه الموضوع لانه كان ممكن يتعب تاني..... قبل ترد لي وليد جانا داخل قال لي: خالتي عبير عاوزاك قالت .... طلعت أشوفها لقيت نجوان بس معاها .... ونجوان شايلة ملامح تسنيم ولا تسنيم اللي ماخده شبها 💙 لولا اختلاف عمرهم و شكل نجوان لولا الحمل اي واحد ممكن يقول تسنيم.... وقفت جنبها بس ما قادر اقول حرف واحد ....
_ تعال يا عزام أقعد .... وليد جيب معاك الكيك من جوة
حاضر يا نجوان ... بعد جابها و جا قال لنجوان: أنت تسنيم وين ؟!
_ دخلت جوة قبل شوية بس دقيقة أناديها
شايف بعدما نجوان مشت أمي و خالتو ثريا قعدو يتونسوا و يضحكوا و كل مره يعاينو لي... وليد قال لي: يا ابو الشباب شكلك كدا حيدورك استعد عاين النظرات كيف ليك هههه
ضحكت قلت ليهو شكلو كدا ههه

في جانب تسنيم "

جاتني نجوان قالت لي: البيشوفك والدموع والسكلبه قبل فتره ما يشوفك أسي..... قلت ليها: انا مبسوطة اني شوفتو و ختيت يدي في وشي مسحت دموعي و ضحكت جيت ضميتها قلت ليها بطنك حقيقي مشاركاني فيك والله ما ممكن كدا😹 قالت لي: بكرة تحملي و تضايقني فيك نشوف كلامك... قلت ليها: انا و العرس ما بنتفق تاني شيليها من رأسك تمام
_ و عزام اللي راجيك دا ؟!
قلت ليها: وليه يربط نفسه بي يشوف حياتو بعد كدا أنا ما حكون لا ليهو ولا لغيرو
_ لا دقيقة عشان شنو و الغير رأيك شنو مش كنتِ بتفتشي عليه ليه طيب ها.... عايني هنا المرة الفاتت حياتك خربت بسبب قرار غلط.. أسي انا ح اقيف ليك ولا ح يهدأ لي بال ما لم أشوفكم سوا و آنا بذات نفسي حا أدق الدلوكة و اجرتقك و ترقصي كمان رأيك شنو تاني
قلت ليها: افهميني عزام ما بيستاهل وحده زي حالتي آنا مطلقة و الحاجه دي خصم عليه فهمتي
= و أنت الاداك حق تعرفي انه ما يستاهلك منو ؟! و منو القال ليك حيشتغل بكلام الناس هو ؟! اعذري تدخلي بس كمان عزام ولدي يا تسنيم بتي حباك💙 ما حب عادي لدرجة انه مرات نوم ما بينوم بيقعد في المصلاية بس عشان يدعي إنك تكوني بخير 💙.... رشحت ليهو بنات من هناك و من هنا بس هو كان وللآن ما شايف غيرك 💙 تجي أنت بسبب ما عندك يد فيهو تقولي لا ما بيستاهل.... عتبانه عليك والله بينتي لي إنك ما بتعرفيه ابداً بالجد زعلت منك 💔
يا خالتو عبير آنا بس كن...
= يا يمة اسمعيني آنا لغاية يوم شفتك في الصورة عشان أختك بتحكي لي عنك و يوم قالت لي هي متزوجة ياهو قبل تطلقي قلت ليها لو كان ما متزوجة كان عرستها لولدي و شوفي سبحان الله تطلعي أنت نفسك اللي كان عاوزها هو.... و يوم جيتو و لاقيت أبوك و عرفت أنكم بناتو يعلم الله فرحت إنك اطلقتي من زوجك... آنا أم و الام بتحس بي جناها... جاني قال لي انا بقيت بشوفها حولي محل ما أقبل كنت قايلاهو بدا يهضرب كمان... بس يوم شفتك تحت في العمارة و بعد الليلة كمان اتاكدت إنك نفسها.... فما تخلي شي يقيف قدامكم تاني آنا هنا معاكم و أمك كمان
_ وأنا كمان
= شفتي حتى أختك معانا يبقى كلام الناس و الطلاق ما اسمعوا عندك تاني فهمتي ؟! وأسي ارح برا و اطلعي من هنا و ما بقول كدا بصفتي خالتك لا بصفتي أم راجلك يلا قدامي... شيبتي لي ولدي وراك هههه
ما كان قدامي غير أطلع معاهم من سكات في الحالتين حطلع كنت... لمن طلعت افتكرت ماما بس اللي برا بس اتفاجئت بعزام جنبها و وليد قاعد و باين انه خلاص حينوم مكانو ... وليد صلح قعدتو قال لي: شنو لكن عرفتو قاصد الكيكة حقتو... رفعت حواجبي و قعد يضحك... ماما قالت لي: اجي يا تسنيم سلمي... عاينت ليها انا يعني بحاول اتحاشاهو تجي تقولي سلمي شلت نفسي و هو مبسوط من اللبشة اللي فيني... مديت يدي قام على حيلو.. قلبي بقى يدق شديد و يديني حسيتهم الواح تلج أول ما جات يدي في يدو كنت مدنقره رأسي لان دمعتي في الطرف واقفة... ضغط على يدي نظام ارفعي رأسك.... صوتو ظهرت فيه بحه قال لي: ان شاء الله أنتِ كويسه و حمدلله على سلامتكم ... جيت أسحب يدي ضغطتها اكتر و همس لي: اشتقت ليك 💙 اتوترت و يدي بقت ترجف حتى لمن ابتسمت كانت الرجفه ظاهرة فيني فك يدي و غمز لي و ضحك... مشيت أقعد آمو قالت لي: تعالي جنبي هنا... قلت في نفسي حرب التوتر حتنتهي متين ؟! ... ابتسمت و عاينت ليهو لقيتو بيضحك علي ومبسوط... غمز لي تاني امو قالت ليهو: عيونك واجعاك لسه كلو من السهر في التلفون دا 😹

#نبض_العزام
بقلم تسنيم
-٢٦-

💙
" الأحداث فيها الزمن متفاوت و سريع ✅"

اللي هو شنو ممكن اعرف ؟!
_ عزام غير بابا رافض أنت عارف آني كنت متزوجة وهس....
بس بس ما تتمي... لو على أبوك ما حيرفض المرة دي... و يا ستي إذا عشان و سكت مسافة و واصل عشان مطلقه صح ؟!
_ أمم و دنقرت رأسي
قال لي: عايني لي هنا... اسمعي يا ستي... الطلاق عيب وريني بس
_ لا
طيب... متفقين على حاجة عشان نمشي لقدام... قرار الطلاق من منو كان!؟
_ مني و مسحت دموعي
لا لا من غير بكاء و دموع ارجوك ! .... طالما قرارك يبقى تكوني فخورة بروحك.... ما كل طلاق نهاية ولا خلاص الدنيا وقفت على كدا ولا حتى هو عيب... ابدا ما حسالك عن السبب شنو لآنها واضح ... إذا السبب البمنعك آنا.. فكرك حتخلى عنك عشان كدا جنيتي صح... يا بت اه بس انا كنت عايش عذاب لمن اتذكر ساي أنو جنبك ... و لمن عرفت أنك اطلقتي لو ما استخرت قربت ازغرد تقولي لي الطلاق بيمنعك خليك عارفه مافي شي ولا قوة تاني تمنعني منك حتى لو اضطريت اقلعك قلع فهمتي... عشان اعرف موافقة ولا لا ها يا ست البنات 💙 نقول على البركة! خلاص يعني عزام اللي قدامك دا شيب وراك باقي لي الجلحات يا بتي ها موافقة ولا عندك رأي لسه! حقيقي آنا محتاجك جنبي لا غيرك حيملاني ولا حيكون أها قولي
_ شربكت يدي مع بعض و قلت ليهو : الرأي رأي أبوي و الشورة عندو
بقى يعاين لي مسافة اتنهد قال لي ازغرد ولا اسوي شنو ؟! خليك عارفه يوم اليوافق مأذوني في طرفي والله ساعتها تعرفي قدر شنو آنا مشتاق ليك و اشوف الضحكة منورة تاني 💙

بعد يومين....
يا امي آنا نويت أتزوج خلاص رأيك شنو.... قالت لي: ايوووى يووووي عاد فرحة ودخلتها في نفسي يالله و عقبال أفرح بي جناك يارب.. بوستها في رأسها قلت ليها يخليك لي يارب... أها ما حتساليني العروس منو ؟! قالت لي: ههه وفي غيرها ما ياها البتغمز ليها قبل فتره قايلني ما قبضتك هههه .... آها نمشي متين ؟!
يوم الجمعة يوم السماية نتقدم ليها و بعد تلاتة أسابيع العقد ... قالت لي: آجي يا ابوي كيف بس دا لخمة ساي قول خير يابا أنت 💙 .. يمة آنا جاهز مافي شي ياخرني.... قالت لي: هي و أهلها بكونوا عاوزين وقت.... قلت ليها: لا بس التلاته وخلاص ..
_ هههه الشفقة تطير لا شفنا ولا سمعنا الله يتمم عليكم بخير يارب 💙

نهار يوم الجمعة
على لسان الراوية "
لمة بسيطة بمناسبة تسمية ازاد ولد نجوان و وليد 💙 الاجواء فرائحية جدًا.... الاختلاف في أنها ما شاملة كل الآهل و الأحباب زي ما متعودين على أغلب السمايات في السودان... تسنيم شايلة كورة شوربة لنجوان و قالت ليها تشربيها كلها قدامي يلا يلا

نجوان: اتنفخت بالنشويات و الشوربة كفاية اشربي أنتِ

تسنيم: سبب واحد يخليني أشرب مافي

نجوان: لا في... مش عرسك بعد تلاته أسابيع ولا دا شنو ؟!

تسنيم: دقيقة دقيقة... الكلام دا جبتي من وين ها!!.... عزام هو الكلمك صح!! ... يارب منو

نجوان: دقيقة بس إنتي.... قصدك شنو... مش وافقتي!! الجد شنو... و يا ستي ما عزام اللي كلمني... خالتو عبير هي اللي كلمتني...ما شفتيها فرحانه كيف وهي بتحكي قبيل... غايتو الله أداك نسيبة هدية و رضيه بختك والله 💙

تسنيم: ما تفرحي كتير عشان تعرفي بابا ما حيوافق... عشان كدا اختصرتو و قلت ليهو الرأي عند أبوي

نجوان: هبلة أنتِ ولا متخلفة.... و بابا حيوافق و حتشوفي... آما كلامك إنك اختصرتيهو ياريت ما يتعاد فهمتي... الراجل شاريك متمسك فيك... كان ممكن يقبل بإي خيار تاني غيرك لكن هو رغبتو فيك أنتِ عاوزك أنتِ .... بابا مش جا من الصلاة ؟!

تسنيم: اوف ياخي ما عارفه اعمل شنو... آي مع وليد بهناك

نجوان: إذًا خالتو عبير حتقعد مع أبوي ترا

في جانب تاني "

_ بدر الدين تعال عبير طالعة و عاوزه تعرفك بي ولدها
قال ليها حاضر ياثريا جاي.... وقتها كان واقف عزام في الباب و رن الجرس... ثريا فتحت الباب قالت ليهو اتفضل اتفضل... سلم عليها و دخل... بدر الدين أول ما وصل قال لي عبير: قيلي ياخ معانا على الأقل نسترجع الذكريات الجميلة... قالت ليهو: حنتلاقى تاني كتير بس حاليًا لازم امشي عشان ولدي نازل السودان كمان وراجع... قال ليها: بالله ! و وين الشاب دا هو من جيت ما شفتو! قالت ليهو: دقيقة اناديهو.... دخل مع ثريا يسلم على وليد... قال ليها: ايوة بكون دخل بغادي و عش....
_ سلام عليكم عم بدر الدين
بدر الدين بقى معصب و عاوز يكورك فيه قبل يقول شيء.... عبير قالت ليهو بعد وقفت مع عزام و ربتت على كتفو دا هو اللي بتسأل عليه و ابتسمت... قال ليها: عزام!! ولدك ؟.
قالت ليهو: ايوة عزام أحمد الخالدي 💙 ولدي و سندي بعد المولى عز وجل .... عاين فيهو مسافة و عيونو رقرقت سلم عليهو بالأحضان قال ليهو: كيف ما عرفتك بس... قال ليهو: أنسى الفات ما عتبان عليك... قال لي عبير: عن اذنك حاقعد معاه عشرة دقايق ما باخركم
قالت ليهو: آجي يا بدر الدين زي ولدك

بدر الدين: ما قلت لي شغال وين

دخلت فيني رهبة قويه جدا و زي البقيت في عالم تاني.... أطول لحظة مرت علي
و لما قال بارك الله لكما..و بقوا يكبروا و يهللوا حسيت روحي طاير فرح و سرور 💙 نزلت دموعي و سجدت في مكاني و قلت الحمدلله ... قفلت منه سريع و نزلت ليها و الشوق و الحنين ليها سابقين خطاي💙
دي تمسك و دي تفك و دي تبارك لي و الزغاريد ملت البيت ... أختها قالت لي: تعال معاي البتفتش عليها ما هنا... أول ما فتحت الباب قالت لي: مبروك عليكم إياك أشوفها باكية غير دموع اليوم فاهم... هزيت رأسي وعاوز أرد جاتها و ماسكه فستانها و آنا كنت مديها ضهري قالت ليها: أنتِ يا نوج في عرس هنا ولا شنو.. نجوان قالت ليها: اي عرسك و فاتت حضنتها و قالت ليها: مبروك حبيبتي يجعله عقد تنعقد فيه سعادتك و سعادتو

لمن قالت ليها كدا سمعت صوتها و هي بتبكي و بقت تصرخ فيها ما قدرت ما أتلفت عليها لقيتها قاعدة في الارض و خاته يدها في وشها و تبكي عاينت لنجوان أشرت لي أنها طالعه وقفلت الباب معاها... قعدت قدامها و مسكت يدها... نفضت يدها و قالت لي: ما تمسك...
_ حضنتها قلت ليها أهدي حبيبتي دا أنا 💙 لسه ما كانت مجمعة و بتزح مني... قلت ليها: تسنيم يا ماما أهدي روحي آنا هنا عايني لي آنا عزام... قلت ليها بصوت مبحوح مبروكة علي حبيبي أنتِ 💙 بعدها بقت تبكي و ماسكني قوي قالت لي: عزام أنت بجد هههههه و بتبكي... ضميتها قلت ليها: #نبض_عزام أنتِ💙 آنا هنا فعلًا... بعد شوية قامت على حيلها قالت لي: دقيقة يعني أنت مجهز لي دا كلو كنت و لمن إتصلت عليك سلفًا بس بتلعب بأعصابي... مسحت دموعها قلت ليها: ههه بس ما آنا براي أهلك معاي متفقين... قلنا نشغلا ليك حبه
_ حبه ها دي حبه مش تعال ما تجري اقيف
ههه أسي كان جاء زول يلقانا زي توم و جيري أهدي طاقتك دي وفريها لي قدام ههه
_ بقت تبكي و تشيل نفسها و قالت لي : ثغيل عارف
قلت ليها: تعالي تعالي... مسكتها من يدها ومسحت دموعها... واصلت كلامي شوفي الغاية تبرر الوسيلة... بس هدفي الأول و الاخير أتحقق لي مهما كان ... عايني انا هنا تمام... دي لحظة ما حتتكرر تاني خلينا نفرح... باقي عتابك خليهو بعد اسبوعين أبقي عاتبيني بي الطريقة البتريحك و آنا راضي 💙
بعدها سلمت عليها في رأسها قلت ليها: مبروكة علي
_ يبارك لي فيك 💙 و ضحكت
سوقتها وطلعنا ليهم في حفلة من المباركات و الزغاريد بعدها بقت بعيده ساقوها النسوان و أول ما شافت أبوها جرت عليه و بقت تبكي في حضنو سلم عليها و انا بي دوري مشيت سلمت عليه في رأسوا و هو حضني و قال لي في اضاني: بتي أمانة في يدك... ضميتو قلت ليهو: في عيوني قبل يدي💙 مسكني من كتفي قال لي: مبروكين على بعض 💙

_أخر اليوم بالمساء...

مكالمة بين عزام و تسنيم...

= عزام انا ماعاوزة البس زفاف
_مامشكلتي إذا لبستيه قبل بس انا من يوم شفتك وبتمنى إنك تبقي لي وتلبسي الفستان والطرحة وبعدين كدا حيكون حلمك غير مكتمل و انا صراحة عاوز اشوف ضحكتك وكل أمنياتك تتحقق قدامك تتذكري خططنا ديك #قاطعتوا :...
= هههههه اي آي بتذكر لم قلت ليك حنرقص سلو و نجي بدرى للحفلة ونحضر من البداية و #قاطعني
_ و تلبسي الجرتق وما اكشح فيك اللبن صح
= عههه صح بس اي اي صح
_اه " اتنهد " حبيبتي والله انا حاسس ان دا حلم عادي اجي اقول عاوز مرتي باقي الليل دا
= ههه وين وين يا مال الحب أنت لسه أسبوعين تاني
_ اخ بس حتمر زي السنين على قلبي.. يلا انا طالع في امور لازم تترتب ارتاحي اممم ... بحبك 💙🌎

قبل العرس بي يومين ...

كلنا نزلنا الخرطوم و فرحنا بي جودي و حملها و نجوان ممسكة ولدها لي وليد و ماسكة الدلوكة هي و شهد و يغنوا طول الوقت و يغنوا و يزغردوا في يوم الصالة أول ما شفت نجوان و جودي قلت ليهم عاينوا بس في نفسي حاجة والله... قالوا لي يومك سوي الدايراهو... فكيت زغرودة وهم ما قصروا معاي جات شهد قالت لي عاد البورة لا
يلا اتاخرنا على الكوفير....
طلعنا و عزام ما بطل اتصال في النهاية شهد ردت: يا دكتور كدا حتاخرنا كلها ساعتين و تتلاقو صبر بس.... لا مافي اديك ليها ابداً ههه يلا إذًا لي بعدين بتنا بتجهز ليك 💙
كانو بغنوا و بزغردوا عملو جو في المكان لغاية ما جهزت و وصل العزام 💙 لمن جا داخل آول مره شفت نفسي فيهو كيف ما تسألوني 💙 وقف قدامي حصني بي الفاتحة سبعة مرات و الإخلاص و الفلق و الناس تلاته تلاته وايه الكرسي بعدها حضني و قال لي اخيراً يالسمحة 💙الله يقدرنى و اسعدك بقيت بعاين فيه ملامحه و ريحة عطره اللي علقت في أنفي و مسكني و طلعنا وسط الزغاريد
اول م وصلنا الباب لقينا اصحابو واقفين واصوات الزغاريد اختلطت بي أبشر يا عريس أبشر زفونا و ساق هو بنفسه و آول ما ركبنا مسك يدي و باسها قال لي: لو عارفه اني مبسوط كيف وبحبك قدر شنو 💙 و ماسكني لحد ما وصلنا الصالة 🥺💙