*مؤمن ساكت خشمو م فتحو بس بقى يعاين ليها ب المراية وهو سايق.
نور:ع العموم ي السمحة هسي بنوصلك ب الشوفير بتاعنا مؤمن ده😹🙈...
*بس قدر م نور اتهابلت وتحاول تتظارف مؤمن وملاذ م فتحو خشمهم
نور:انتو بايخين ع فكرة😒
ملاذ: م سمعتك
*اثناء م مؤمن بعاين ل ملاذ ف مراية العربية وقلبو واجعو ومتألم بدا يتكلم مع نفسو:(يا الله ي مؤمن البت فقدت ضحكتها فقدت روحها الجميلة ليه ي مؤمن تعمل فيها كده ليه💔 شفت الحصل ل نبيل ول أختو م خايف يحصل ليك؟ م خايف قلبك يتوجع زي م وجعتها،ولا هو اصلا قلبي وجعني وربنا عاقبني نور م بتحبني
*في اللحظة ديك ومؤمن شاارد وبالو مع ملاذ جات عربية خاشة فيهم😨 وطاااااخ عمل حادث💔💔💔
الناس كلها اتلمت وبقو يطلعو في مؤمن ونور وملاذ
ملاذ كان مغمى عليها بس نور ومؤمن كويسين الا حبة جروح في يدهم يعني كان حاجة بسيطة
مؤمن:زحو زحو،ملاذ قومي ،قومي ي ملاذ(وهو بكفت فيها ودموعو في عينو).
اول م لاحظ انو ملاذ م فاقت شالها ب يدو وجررري ع المستشفى حتى م لاحظ ل عربيتو ولا اتزكر نور ولا راعى ل جروحو بس همو كان ملاذ ،نور جات وراهو واتصلت ل نبيل تكلمو بالحاصل. نبيل في ضيقو داك مشى وهو خايف ومصدوم
وطبعا هند جات اول م سمعت بالحاصل عشان ملاذ صحبتها اول م هند جات داخلة المستشفى
هند(وهي بتعاين ل نبيل ومؤمن وبتكورك) :انتو دايرين مننا شنو؟ وروني؟؟ م عاوزين تخلونا في حالنا ليه؟ وانت ي مؤمن م كفاك انك غشيتها ولعبت بيها عاوز تقتلها كمان
مؤمن:هند ده قضاء وقدر ذنبي شنو والله انا خايف عليها💔.
هند:خايف ع منو؟؟ عليها؟؟ هههه ضحكتني،ليه م خفت عليها وقت كنت بتلعب ب راسها؟؟ليه م خفت عليها وقت جبتها ل المكان القذر ؟ ليه م خفت عليها وقت خدرتها ورميتها زي الكلبة💔💔
*نور كانت بتسمع في الكلام ده وهي مستغربة لأنها م عارفة ايي شي وم جايبة خبر مؤمن وملاذ ،بس قالت انو ده م وقت سؤال وسكتت.
مؤمن:الغلط بتصلح ي هند،وانا انسان وهسي بصلح العملتو
*اثناء م بتناقشو الدكتور جا طالع،مؤمن جا ماشي عليهو
مؤمن(وهو ملهوف) :ايوة ي دكتور طمنا عليها😓.
الدكتور:الحالة استقرت الحمدلله بس محتاجين دم
مؤمن:انا انا بتبرع شيلو دمي كلو بس رجعو ليها عافيتها
الدكتور:لازم نشوف الفصيلة اول عشان نقدر نحدد
*هند كانت بتعاين ف مؤمن وهي مستغربة وفي نفس الوقا نبيل ديل مالهم بقو كده؟ وخوف مؤمن واستعدادو انو يعمل اي شي بس ملاذ تبقى كويسه😐.
*بعد شوية الدكتور جا وقال ل مؤمن:المريضة طلعت فصيلتهاAB يعني تستقبل الدم من اي نوع فصيلة تانية
*طوالي مؤمن ولا اتلفت رفع كُم القميص ومدا يدو ل الدكتور وقال ليهو:شيل قدر م عاوز شيل دمي كلو بس تبقى كويسه
الدكتور:شكلها المريضة قريبة منك شديد.
مؤمن:🙂(م قال حاجة)
*هند واقفة برة وقلبها في يدها ومتلبكة وخايفة ومتوترة يعني ألف إحساس في وقت واحد،نبيل كان بعاين ليها بس وسرحان معاها وعاوز يقول والوضع م مناسب وم قادر يسكت
*أيي واحد منهم كان قلبو بحكي قصة براهو من ناحية مؤمن القدر يحب ملاذ من اول جديد بعد م عمل العملو معاها ،ونبيل العاوز هند،ونور الحابة نبيل وعارفاهو م ليها،القصص إتضاربت وأي زول بقى م فاهم شي ولا عارف يعمل شنو بس سلمو قلبهم للأيام 🙇🏾‍♀💕
*اول م مؤمن طلع هند من غير م تحس جات عليهو.
هند:اها ي مؤمن ان شاء الله خير😓
مؤمن:كل الخير الحمدلله بس منتظرنها تفوق وقال م ينفع ترجع البيت لازم تبيت هنا
هند:تبيت؟؟؟😐 ي ساتر يعني الموضوع خطير
مؤمن:لا الحمدلله بس إجراءات مستشفى وكده عشان عافيتها تتم
نبيل:خلاص انتي ارجعي ي هند ارتاحي ي نور برضو انتي كفاك م تنسي انك برضو اتضررتي
نور(قالت في نفسها ياداب اتزكر انو انا برضو كنت في الحادث 🙂💔)هند:انا ح ابيت معاها
مؤمن:لا انتي ارجعي عشان ناس البيت م يخافو
هند:واخليها براها؟؟ لا م بقدر
مؤمن:هي نايمة اصلا ل الصباح
هند:خلاص م دام قلت كده🙂💔 دعواتي معاها ،بس ممكن اشوفا صح؟.
مؤمن:ايوة خشي اطمني عليها
*هند وقفت من بعيد وبقت تعاين ل ملاذ وبتبكي م قدرت تشوفا ورجعت طوالي
نبيل:هند معليش اوصلك؟
هند:لا بتصرف
مؤمن:هند م تبقي قاسية🙂💔
هند:مؤمن معليش بمشي براي.
نبيل:خلاص م بضغط عليك
نور:انا هنا يخوانا🙂
نبيل:انتي اصلا ح تمشي معانا م عاوزة ليها اتنين تلاته😅
مؤمن:يخوانا م ايي زول يمشي براهو.
هند:انا م بمشي مع زول
نبيل:خلاص راحتك ي ست هند.
*وفعلا كلهم طلعو وفاتو البيت ،نبيل طول الطريق بفكر في هند، ونور جنبو تعاين ليهو بس
نور:سرحان وين ي أسمري🌚
نبيل:نوري♥️ههه ولا محل بس بفكر في الحصل
نور:عادي إيه الحصل ؟ كلها قضاء وقدر، بس عاوزة افهم كلام هند القالتو ل مؤمن قصدها بيهو شنو؟؟.
*نبيل م رد ع نور وعمل فيها م سامعو

*الحاجة الكانو م عارفينها انو مؤمن بات في المستشفى للصباح في غرفة ملاذ وبقى يراعيها وهو البديها الدواء وبساعدها في الدرب وطبعا هي ده كلو م حاسة ب شي🙂.
جا الصباح ومؤمن راقد ف الارض من التعب حالتو صعبة بس صحا ب صوت ملاذ وهي بتتوجع
مؤمن طوالي جرى ع الدكتور وناداهو
الدكتور بقى يفحص في ملاذ وقال ليها :حمدلله ع السلامة ي بطلة ماشاءالله صحة حديد
ملاذ :انا وين😐
الدكتور:هههه انتي جابوك امس تعبانة لكن هسي كويسة وده كلو ب فضل راجلك الساهر وتعب عشانك.
ملاذ:راجلي؟؟!😐.
مؤمن(عشان كذبتو تنجح) :شكرا ليك ي دكتور هسي المدام بتكون تعبانة شوية خليها من الكلام😅
*الدكتور طلع وخلاهم براهم
ملاذ:انت كيف تتجرا وتقيف جنبي اصلا زح مني بعيد😓
مؤمن:ملاذ💔 م عاوز كلام ارتاحي بس
*هند جات داخلة
هند:لووزتي😭 حمدلله ع سلاامتك يخخ والله سلاامة كبييرةة😭😭
ملاذ:حبيبتي 😭♥️ الحمدلله
*مؤمن طلع خلاهم مع بعض.
هند بدت تحكي ل ملاذ كل العملو مؤمن وخوفو عليها وقلقو وكيف اتبرع ليها بالدم من غير تردد ولا خوف ،،وكيف نسى نفسو وبقى معاها حتى انو هند إتفاجأت إنو مؤمن بات في المستشفى وم رجع البيت💔
ملاذ كانت بتسمع الكلام وهي مترددة وخايفة،م قادرة تخوض التجربة تاتي وتوجع قلبها ،وم قادرة تسامحو ع العملو فيها...
ملاذ:عارفة الصدمة الكبيرة شنو ي هند🙂💔
هند:خير في شنو تاني؟؟؟.
ملاذ:نبيل طلع بحبك ي هند🙂💔

👇🏻
في علاقات عارفين انها منتهية او شبه انتهت،بس احساس الامان والراحة الكنا بنحسو فيها عمرو م راح،يعني قدر محاولتنا عشان ننسى نلقى نفسنا اتعلقنا أكتر ،صدقني العلاقة البترتاح فيها غالباً هي بتكون سبب وجعك🚶🏻‍♀💔
نتاااابع🚶🏻‍♀💕

#متلازمة_عشق
بقلمي:نهاد كمال
-٩-
*إنو نبيل بحب هند ده كان خبر صادم جداً بالنسبة ليها وبقت تعاين ل ملاذ
هند:ده كلام شنو ي ملاذ؟؟ نبيل شنو البحبني ي بت
ملاذ:دي الحقيقه ي هند،بعدا انتي وقلبك
هند:مستحيل اغلط غلطة زي دي💔 انا ونبيل؟ هه ولا في الاحلام
ملاذ:قلوبنا م بيدنا ي هند 🙂
*في اللحظة دي مؤمن جا داخل عليهم وشايل في يدو أدوية
مؤمن:مواعيد حبوبك ي ملاذ
ملاذ :ممكن توريني وببلعهم براي تاني
مؤمن(م حبا يتماسخ معاها) :حاضر بوريك
هند:مؤمن ارجع كفاك انت بايت من امس
مؤمن:اطمن بس واكمل الإجراءات
ملاذ :بالنسبة ل المصاريف
مؤمن:عيب منك ي ملاذ🙂
ملاذ:م مقطوعه من شجرة انا كويس؟ واي قرش دفعتو ح نرجعو ليك
*مؤمن زعل من كلام ملاذ شديد وم قدر يستحمل طوالي شال نفسو وطلع وقفل الباب وراهو ب قوة
هند:ملاذ مافي داعي ل الكلام ده صح هو غلط وغلطة كبيرة كمان بس تصرفاتو بتعكس ندمو ومن حق اي زول فرصة تانية.
ملاذ:انا بكرهو ي هند بكرهو😭 م عاوزاهو يخش حياتي تاني.
هند:هسي ارح البيت الكلام ده م وقتو انتي محتاجة راحة لسه
ملاذ :فعلا والله محتاجة راحة شديدة..
*نبيل رجع البيت وحالتو ياها م اإتغيرت ،م زال متأزم وتعبان ونفسو قافلة من اي شي وصورة لنا كل مرة تجيهو قدام وشو🙂💔 كان متأثر بالحصل شديد والندم ظاهر في عيونو ،م بقى نبيل الزمان كل حاجة فيهو إتغيرت
لميس وفاطمة ام نبيل لاحظو تغير نبيل، وهم كمان كان حالتهم اصعب منو وبقى اي واحد فيهم عاوز يواسي التاني💔 إحساس الوجع المشترك ده ببقى أبيخ إحساس والمشكلة إنو م قادرين نخفف ع بعض او نحاول ننسى،
التجاني كان واقف برة وبرضو خاتي اللوم عليهو ف كل الحصل ف قال يغير الحاصل شوية
التجاني:فاطمة ي فاطمة
فاطمة:ايوة جنبك
التجاني:احنا ح نسافر
فاطمة:سفر؟؟؟! وفي الظروف دي ي تجاني
التجاني:ما هو عشان الظروف دي احنا محتاجين نسافر ،محتاجين ننسى
فاطمة:لكن ع وين؟
التجاني:ايي مكان المهم نتحرك من البلد دي ،ريحة لنا في كل مكان ،بسمع صوتها ف اضاني، ندمان ع السنين الراحت وم اتهنيت ب ونسة معاها ولا شبعت من ضحكاتا وحركاتا
فاطمة:م توجع قلبي عليها😭💔 الله يرحما،الله يرحما كبدة حشاي😭.
*فاطمة فعلا كلمت نبيل ولميس بالموضوع،لميس وافقت،بس نبيل رفض وإتعذر ب الجامعه ال هو اصلا م قعد يمشيها بس كان جواهو فهم تاني
التجاني:كيف يعني م ماشي ي نبيل
نبيل:امتحاناتي قربت سافرو انتو وانبسطو
فاطمة:واخليك براك ي ولدي؟.
نبيل:لا ح يجيني مؤمن صحبي هنا
لميس :يخ سافر معانا ي نبيل😭
نبيل:م تضغطو علي ياخ🙂
التجاني:خلاص خلوهو ع راحتو هو واعي
لميس:بس ي ابوي م وريتنا مسافرين وين😹
التجاني:م مكان محدد ي بتي بس ح نلف
لميس:احللللى شي زهجتا من مدني دي💃🏻
*وفعلا تاني يوم اتحركو سافرو كلهم ونبيل قعد براهو ف البيت والغريبة حتى م كلم مؤمن انو ناس البيت مسافرين،نبيل كان مصر يعرف العمل في لنا اختو كده منو ول شنو؟ والسبب الاكبر الخلا لنا تنتحر؟ الموضوع كان واجعو شديد ولقى فرصة انو ناس البيت مسافرين عشان يقدر ياخد راحتو ويفتش ب طريقتو
اول زول خطر ع بالو طبعا عُلا صحبة لنا لانها هي اقرب وحدة ليها وعارفة كل صغيرة وكبيرة عنهااوفعلا نبيل حاول ب كل الطرق يجيب رقم عُلا ويلاقيها عشان يمسك الموضوع من اولو
وإتفق إنو يجيها ف الجامعة ويلاقيها
اليوم الخطط يلاقيها وهو ماشي ع الجامعه إتزكر إنو نسى تلفونو في البيت🤦🏻‍♀رجع عشان يجيبو تاني لقى منها كم مكالمة ورسالة مكتوب فيها "نبيل محاضرتي بدت م تجي".
نبيل إتحسر ع إنو إتاخر وم قدر يلاقيها ف فكر يطلع من البيت لأنو بقى يقرف منو ايي حاجة فيهو بتزكرو ب لنا💔
إتصل ل مؤمن وإتفقو يطلعو البحر
نبيل:حاسي ب فراغ عجيب انا ي مؤمن،بطني طامة من ايي شي ونفسي مقفولة،بقيت م فاهم شي في دنيتي مؤمن:كلو بهون ي نبيل بس انت قول ي رب
نبيل:ياارب 🙂بالمناسبة ملاذ بقت كيف؟
مؤمن(اخد تنهيدة طوييلة كده) :ملاذ ؟ كويسة كويسة
نبيل:مالك قلتها كده؟
مؤمن:موجوع بس زيك ي صحبي العملتو فيها م هين وقلبي رافض يبعد منها وإمكانية إنها تحبني تاني شبه مستحيلة،وفي نفس الوقت نور💔العايش عمري كلو ع إني صحبها وكاتم حبي ليها ،القلب ده بحير ي صحبي
نبيل:القلب م بحير ي مؤمن ،إحنا ال بنخت نفسنا في متاهات م منها اخر وبندخل قلبنا في حتات ضيقة ،بنستهلك مشاعرنا ع الفاضي ونخت اللوم ع قلبنا
مؤمن:انا محتاج فترة أبعد فيها من الناس دي لأنو نفسياتي طين والله
نبيل:انا محتاج هند💔 والله ي مؤمن
مؤمن:بتحبها ي صحبي؟

نبيل:م عارف،يمكن م حب، بس لما أتزكر الخوف الشفتو في عيونها ورجفة يدها ودموعها لما جبتها الشقة بتوجع جدا💔انا عمري م شفت بت بتخاف كده، انا كل الاشكال الجبتها الشقة دي كانت ب إرادتها بدون اي ضغط م حصل بت منعتني م حصل بت قالت لي لا، فلما هند دي رفضتني وبقت تضرب فيني وتقاوم حسيت ب إحساس مميت،حاجة بتقول لي ليه ي نبيل؟ليه؟
مؤمن:ااااخ ي صحبي ااااخ💔
لكن المحاولات في،وإنت حاول اتكلم معاها وصل ليها فهمك وريها انو انت بالجد عاوز تتغير وع يدها هي
نبيل:دي المشكلة،اقول كيف؟ انا لما أشوفا بتزكر موقفي معاها وطوالي بتراجع
مؤمن:نفس احساسي مع ملاذ💔🙂
نبيل:تعبان ي صحبي والله🙂💔
مؤمن:انسسى فضفضنا كتير خلينا نشرب قهوة 💕
نبيل:ممكن امشي اطلب لينا كبايتين سريع ههه
مؤمن:هههه حااضر.
*في اثناء م مؤمن مشى يطلب القهوة ،عُلا إتصلت ل نبيل عشان تلاقيهوو ،نبيل وراها انو ف البحر ومعاهو صحبو وهو م عاوز زول يعرف بالموضوع لكن طلب منها انها تقيف محلها بجي عليهاا
مؤمن جا وشايل القهوة
مؤمن:اتفضل ي ابو النبل
نبيل:قهوة تمام مافي كلام 😂
مؤمن:هههه تنفعك ي فردة
*بعدها اي واحد شاف طريقو،نبيل طوالي ركب عربيتو وسريييع مشى ل عُلا
نبيل:م عارف ابدا ليك من وين💔 ولا من ياتو نقطة
عُلا:المرحومة حتة مننا كلنا💔 فقدت صحبتي واختي والله
نبيل:ربنا يرحما🙂يلا ي عُلا كأي زول في سن لنا اختي بكون عندها حبيب ولا زفت بتتكلم معاهو انا عاوز اعرف الوسخ العملها في اختي🙂💔
عُلا(ملامح وشها اتغيرت وبدت تتمتم) :و.. والله م عارفة
نبيل:عُلا بدون كذب انتي كنتي اقرب وحدة ليها واكيد بتحكي ليك واوعدك م اجيب سيرتك
عُلا:كان واحد زميلنا 💔غشاها ب إسم الحب وبدون م توعى خدرها وغلط معاها وهي م كان جايبة خبر
نبيل(لاحظ انو عُلا بتتمتم وخايفة) :براحة ي عُلا م تخافي، زميلها منو وخدرها كيف ؟ ومتين الكلام ده حصل وريني ياخ🙂🔥
عُلا:هي حكت لي كده بس انا م عارفة شي والله
نبيل:طيب اسمو، اكيد عندو إسم🙂
عُلا:ت..تقريبا محمد
عُلا:بقرا معاكم هندسة؟؟؟؟!
*اثناء م عُلا بتتكلم مع نبيل وهم قاعدين ف كافتريا جات بت ماشية ب جنبهم ووقفت قصادهم وعاينت ليهم وقالت ب صوت عالي:لككن دنياا غريبة تقتلو الزول وتجكسو اخوهو
👇🏻
الإهتمام الزائد،الحب،الغيرة،الخوف،الثقة،كل المشاعر الحلوة دي لما تطلع مننا، فا دا يعني حرفيييا انو احنا برضو محتاجين ليها، محتاجين اليحسسنا انو احنا مهمين،اليشوفنا متغيرين ويعدل المود💔 البفهمنا من نبرة صوتنا وكلامنا،عشان م نموت قهر عشان لما نروح منكم ح نكون مكسب ل ناس تانية🙂👋🏽
نتااااابع🚶🏻‍♀💕

#متلازمة_عشق
بقلمي:نهاد كمال
-١٠-
*اثناء م عُلا بتتكلم مع نبيل وهم قاعدين في الكافتريا جات بت ماشة ب جنبهم ووقفت قصادهم وعاينت ليهم وقالت ب صوت عالي:لكككن دنيا غريبة تقتلو الزول وتجكسو اخوهو🤣
*نبيل عاين ل البت بإستغراب بس م ركز معاها افتكرها قاصدة زول تاني ،لكن لاحظ انو عُلا بدت تعرق وزي خافت شديد كده
نبيل:ي بت مالك؟😐
عُلا(ب صوت يرجف) :ل..لالا ماف شي
*بعد شوية البت جات قعدت جنبهم وعاينت ل نبيل
نبيل:لو سمحتي ي اخت؟
عُلا:رؤى عليك الله امشي من هنا
(البت اسمها رؤى)
رؤى:هههههها امشي عديل؟ امشي انا ي عُلا
نبيل:افتكر انو م من الزوق تتجي تقعدي ب الطريقة دي
رؤى:طيب من الزوق تجي تقعد انت مع السبب ف موت اختك؟.
نبيل(وهو مخلوع) :ده كلام شنو😳 م بسمح ليك اصلاا.. عُلا البت دي بتقول في شنوو
*عُلا كان ساكتة م فتحت خشمها نهائي وفجأة دموعها نزلت💔
رؤى:اي ابكي حسي ع دمك، غشيتي البت وجاية تكضبي ع اخوها
نبيل(وقف ع حيلو) :عُلا فهميني البت دي قاصدة شنو وده كلام شنو ده
عُلا(وهي تبكي ب حرقة) :انا السبب ي نبيل انا السبب😭😭😭 ي ريت لو م خليتهاا ي ريت
نبيل:السبب في شنو ياخ م توتريني في شنو ، لنا كان مالا
رؤى:خليني انا احكي ليك 💁🏻 لنا ي سيدي كان بتحب اخو عُلا ال هو اصلا قصة حبهم دي خطة من عُلا ع اساس تنتقم منها عشان مشاكل م عليك بيها وحسد وحقد.. لكن ي..
*قبل م تتم كلامها نبيل عاين ل عُلا وعيونو محمرة وكالعادة لما يزعل عروقو بتظهر وحواجبينو بقو قراب من بعض قال ليها:انتي ي عُلا؟ انتي؟ وانا الجاي اطلب مساعدتك ،جاي ع امل انك اختها بقيتي مننا وفينا تقومي تغدري بيها كده💔 وعشان شنو؟ عشان شنو بس ،وريني ياتو مشكلة كان نتيجتها روح اختي ،
عُلا:والله والله م قايلة محمد اخوي ح يعمل كده بس كنت عاوزة اكسر قلبها م كنت قايلة الموضوع ح يصل ل كده والله انا موجوعه اكتر منك والله😭😭😭💔م قايلاها ح تعمل ف روحها كده ولا قايلة محمد ح يعمل فيها كده صدقني ي نبيل
نبيل:م قايلة؟🙂💔 دي قذارة منك والله ي خسارة
لكن م ح اسالك ولا اتكلم معاك بس عندي تصرف تاني مع اخوك🙂
*نبيل طلع زعلان وحالتو صعبة مشى على عربيتو وختا راسو في الديريكسون وبدا يبكي💔 يبكي كأنو هو الشال روحها ببكي ع حسرتو وضياع عمرو في الفاضي والنتيجة كانت اختو، وزي ايي ولد في محلو حلف الا يجيب روح محمد اخو عُلا
بس لكن الذنب ذنب محمد براهو؟!
*في الجهة التانية ملاذ خلاص طلعت من المستشفى ورجعت البيت ب سلام وطبعا قاعدة مع ناس هند في البيت عشان اهلها ف الخرطوم زي م قلت قبل كده💕
ملاذ:بكرة ح انزل جامعة طوالي
هند:ي بت كدي استهدي 😒 انا لي يومين جليت ام المحاضرات 😂👋🏽
ملاذ:انا م عاوزة امشي عشان قراية ولا زفت، بس عاوزة اطلع من المود الانا فيهو ده، زهجانة يخ🤦🏻‍♀💔
هند:لوزة♥️ كل شي بتحسن بس انتي ابقي كويسة، والمود ده خليهو علي😌💃🏻
ملاذ :عاوزة تعملي شنو😂
هند:ارح نطلع نطق🤤
ملاذ :تطقك كهربا😒 نفسي ف حفلة ارقص والله
هند:يلا انا م بعرفك😂
*في اللحظة دي جات ام هند"رقية" داخلة عليهم وشايلة شوربة ل ملاذ
رقية:ماشاءالله عليكم بناتي ربنا يحفظكم
ملاذ:يخليك لي ي خالتو والله م حوجتيني ل امي.
رقية:ي بت انتي زي هند واكتر بس ارتاحي وانا م كلمتا عمك عبدالرحيم بالحصل عشان ح يعملو لي موضوع برام عارفاهو💔 راقد وم بتحرك
ملاذ :اي ي خالتو ربنا يعافي بس💔
هند:امي جيبي الشوربة دي🤤
ملاذ :والله ي خالتو بتك دي بقت جنها اكل😂هسي العيان منو فينا.
رقية:ههههه اصلها كده من يومها
*بعد شوية رقية طلعت ومشت ملاذ تلفونا ضرب عاينت كده لقتو مؤمن ابت ترفع💔
هند:ده مؤمن صح؟
ملاذ :اي💔
هند:ارفعي ي ملاذ م عشان ايي شي بس عشان بالجد الموقف العملو ليك ف المستشفى م بيتنسي الود اتبرع ليك ب دمو
ملاذ :م عندي نفس ل كلام.
هند:خلاص رسلي رسالة.
*وقبال م ملاذ ترسل مؤمن رسل ليها "حبيت اطمن عليك" ، وملاذ ردت ليهو "انا كويسة"
*احساس انك عاوز تتكلم مع زول ونفسك تحكي معاهو بس في سبب يمنعك والمشكلة الاكبر انو في الف سبب يخليك تتكلم معاهو وهو باقي المشاعر الجواهو ليك وعشان تحافظ عليها تقوم تتمسك بالسبب الواحد ده بس الاساساً انت م مقتنع بيهو🙂💔
*جا الصباح وهند مشت ع الجامعه وخلت ملاذ في البيت اول م وصلت الجامعه قعدت في الكافتريا ماسكة ليها شيت بعد شوية جات عليها نور😕
نور:هلا هند كيفك
هند(وهي بتعاين ليها) :اهلين نور ،تمام الحمدلله
نور:نبيل مالو🙂💔
هند :نبيل ؟؟ وانا العرفني شنو
نور:الود بموت ي هند بموت😭
هند :انا م عندي علاقة تربطني بيهو اصلا
نور:بدون بياخة كده نبيل محتاج ليك ي هند
هند :نور اسمعيني انتي صحبتو وبتعرفيهو اكتر مني اولى انتي مني وبعدين انا نبيل ده قصة وانتهت ماف حاجة بتجمعني بيهو

نور:عشان انا صحبتو جاية أتكلم معاك🙂 نبيل بمر ب فترة عقيييمة سيئة كعبة جداا نفسياتو طين. ولحدي هسي انا بتزكر لما لاقتو عزاء لنا اختو وكان واقف ب حالة م مفهومة وبقول:عاوز هند، كأنو رمى عليك كل شي، والله ي هند كلامك المعاهو مرة وحدة بس خلاهو يتحسن ولو شوية كل العاوزاهو منك تقيفي معاهو بس لحدي م يرجع نبيل الزمان
هند:لكن انا..
نور:انتي شنو ي هند 🙂 عشان خاطر ملاذ صحبتك
*في اللحظة دي هند فكرت في ملاذ اول شي وكيف انو نفسياتها تعبانة وم قادرة تاكل ولا تتكلم ولا تعمل اي شي
قامت قالت ل نور
هند:خلاص ي نور انا مستعدة اقيف مع صحبك واطلعو من ال هو فيهو مادام انا الخيار الوحيد بس عندي شرط🙂
نور:اشترطي زي م دايرة
هند:انو انتي تخلي مؤمن يرجع ل ملاذ، ملاذ بتموت وانا م بقدر اشوفا وهي بتموت قدامي😭
نور:لكن انا اصلا م كنت عارفة ب قصة مؤمن وملاذ دي🙂 تصدقي اكتشفتها يوم كنا في المستشفى ولحدي هسي م اتناقشتا معاهو
هند:اتصرفي انا متأكدة انو هو حباها تصرفاتو بتعكس كده، خوفو وقلقو وتوترو وحاجات كتيرة انا شفتها فيهو
نور:انتي م شفتيهو وقت الحادث، م اهتم ب نفسو اصلا بس جرا ع ملاذ وقلبو كان ح يقيف من الخوف💔
وانتي عارفة كده ح اكون ساعدت اصحابي الاتنين من غير م احس♥️
هند:يعني اتفقنا؟
نور:ايووون اتفقناا👋🏽
وانا بأي طريقة اخلي نبيل يلاقيك كأنها صدفة خلاص تمام؟ والباقي عليك وطبعا الموضوع بينا.
هند:اكييد بينا ومنها تبقى صحبة 💕
نور:يلا استأذنك اخدتا من زمنك كتير
هند :طيب يلا
*بعدها نور مشت وخلت هند ،هند بقت تفكر وتقول ي ربي البعمل فيهو ده صح ولا غلط! لكن كل همي ملاذ ترجع زي م كانت احاول اقويها من اول وارجع ليها فرحتهاا البعملو ده كلو عشانها وعشان تقدر تقيف على حيلها من جديد وم تفقد ثقتها في زول تاني وم تكره الحب عشان هي تستاهل😭💕
*لما تجي تصاحب، صاحب الناس البتستاهل تقول عليها"الصحبة السند" الناس البمرقوك من ضيقك ب تصرف بسيط او موقف، صاحب الناس الممكن يدوسو على فرحهم عشانك الصُحبة م انك تكون معاي وقت فرحي وبس، الصُحبة انو وقت حزني تكون انت الاول وحتى لو م قدرتا تطلعني منو تقيف معاي لحدي م يزول ومين عارف يمكن وقفتك براها تنسيني ليهو💕
*نور بقت تخطط في طريقة تخلي نبيل وهند يتلاقو بس يبقى الموضوع كأنو صدفة ف قامت اتصلت ليهو
نور:اسمممررري الملتحي 🤤💕
نبيل:هلا نور(بصوت تعبان ).
نور:هلا ف عينك😒 وبعدين دي شنو الجوطة دي انت وين ي ود
نبيل:تصدقي لو قلت ليك انا بايت ف العربية من امس العصر
نور:بايت في العربية؟؟😳 كيف الكلام ده ي ود انت مجنون
نبيل:كرهتا البيت يااخ كرهتو وقرفت من ايي حاجة
نور:ممكن نتلاقى؟
نبيل:انتي وين؟ طلعتي الجامعه؟.
نور:طالعة بعد شوية
نبيل:خلاص بجي اسوقك اوصلك
نور:عاين تعالي لي في السوبر الماركت الجنب الجامعة بس، لأنو ماشة المكتبة اول
نبيل(وهو مستغرب) :ليه يعني؟ بجي اسوقك المكتبة م مشكلة
نور:لالا بسحرورك لي تعال هناك بس😂👋🏽
نبيل:خلاص طيب.
*وفعلا نبيل مشى طوالي ووقف جنب السوبر ماركت وبقى منتظر بعدها جات هند(طبعا ده جزء من الخطة😉) ودخلت تشتري نبيل او م شافها بقى يعاين ليها
هند دخلت اشترت وجات طالعة ، نبيل قام ناداها
نبيل:هند🙂👋🏽
هند:ايوة .
نبيل:كيفك؟.
هند:كويسة انت كيف
نبيل:انا؟ كويس
عاوز اسألك ملاذ بقت كيف؟
هند:كوويسة م عندها شي*نبيل من بين عاوز يتكلم وبين خايف من ردة فعل هند وبين عاوز يعترف وبين الكلام م عاوز يجي ، بقى في موقف اصعب من صعب بس بينو وبين نفسو قال:انا لازم اتكلم حتى لو م كنت مجهز الكلام وحتى لو م مرتبو دي فرصة م بتتعوض وإتجه عليها وقال يعترف...
👇🏻
من الاحاسيس البتخلينا ملخبطين الاحساس البديك ليهو انسان انو يخليك في النص بين انو عاوزك وم عاوزك بين محتاج ليك وم محتاج
احساس انك في النص دايما وحاجة احتياطية💔
نتاااابع🚶🏻‍♀💕

#متلازمة_عشق
بقلمي:نهاد كمال
-١١-
خلينا نبيل في الجزء الفات خلاص عاوز يعترف وقلبو في يدو والخوف متملك عيونو ،بس كان عندو اصرار عظيم انو يطلع كل الجواهو حتى لو كان رد هند في اللحظة ديك هو الرفض
نبيل قررب منها وبدا كلامو وقال:.
نبيل:هند ممكن دقايق من وقتك
هند(زي الفهمت الحاصل وعملت م فاهمة) :اتفضل
نبيل:خلاص نخش جوة الوقفة بره هنا م سمحة
هند:طيب نخش.
*وفعلا دخلو جوة وقعدت معاهو ف الكافتريا قعدو قصاد بعض بس نبيل بقى يعاين ليها ويطقطق في اصابعو ويحك في راسو ومرة يعاين فوق ومرة يعاين تحت
هند:في شنو ي نبيل مالك عامل كده؟.
نبيل:انا؟مالي كويس
هند:ع فكرة انا تخصصي علم نفس وبفهم ،وتصرفاتك بتدل ع انك متوتر جدا
نبيل(اخد تنهيدة كبييرة) :هند من الاخر كده انا محتاج ليك، والحوجة اكبر من اي احساس تاني ممكن اوصفو ليك، انا محتاج انك تكوني معاي تبدي معاي خطواتي من اول تحسسيني ب طعم الحياة،الحياة الما ح اشوفا الا بوجودك، هند انا صح كنت بكرهك ف الاول وحاولت انتقم منك بس انا جد عرفت حوجتي ليك ويمكن كل الحصل ده عشان ربنا يوريني فيك النور ، عاوزك بجد عاوز زول ياخد بيدي يعلمني يوريني ويفهمني والزول ده انتي
*هند اخدت سكتة كده وهي بتفكر ف كلامو الكان باين انو طالع من قلبو وانو كان جادي جدا في كل حرف قالو وهند زاتا ل روحها اتوترت بين خطة نور وبين كلام نبيل💔
هند:انا مستعدة ابدا معاك ي نبيل بس انت اولا محتاج تقررب من ربك محتاج تحضن مصحفك وتنتظم ف مصحفك عشاان تمشي صح وعشان تصلح حياتك صلح علاقتك مع الاداك الحياة دي،
نبيل:فعلا والله💔 انا بعيد كل البعد من اللحظة دي انا ح ابدا
بس عندي مشكلة ف الصبح😂
هند:انا بصحيك الصباح والقران بقراهو معاك😂
*بعدها اخدو يتكلمو ويخططو ح يعملوو شنو
نور جات لقتهم قاعدين بتونسو ويضحكو، نار الغيرة اكلتها بس حبها ل نبيل خلاها تهدا وانها في النهاية عاوزة سعادتو حتى لو كانت السعادة دي مع وحدة غيرها
نور مشت عليهم..
نور:خاالط من وراي ي اسمممرري😂👋🏽
نبيل:وانا بتاع خلط كمان😅
نور:اي اي بعرفك🌚
هند:انا هنا يخوانا🌝
نور:شايفااك😂 م عندك محاضرة انتي
هند:والله لسه بعد ساعه
نور:على فكرة ي الاسمر محاضرتنا قرربت انا جيت متاخرة
نبيل:يخ م عاوز اخشها الدكتور ده معااط.
هند:اها بدينا ي نبيل🤦🏻‍♀
نبيل:اااخ خلاص طيب
*نور حست ب انو جملة واحدة بس من هند كانت بتقدر تغير نبيل وتخليهو يسمع كلامها من غير م يحس وهي لما كانت عاوزاهو يعمل حاجة الا تلح عليهو وتتعابط، بسرها قالت صحيح للحب عجائب🙂
*بعدها دخلو المحاضرة وخلو هند براها، وهند بتفكر بس في كلام نبيل وانو الح تعملو ده نتيجتو ح تكون شنو؟ والنهاية ح تكون كيف💔.
فكرت إنها تتصل ل ملاذ تفرق عليها شوية مادام اصلا محاضرتها لسه
هند:لووووزتي
ملاذ :اهليين اتزكرتيني من وين.
هند:كويس ي جزمة قلت اسأل منك😒كتر خيري عبرتك
ملاذ :هههههه خلاص م بتقصري
هند:اها كيف الشمار شنوو
ملاذ:ماف شي قاعدة بحضر بس
هند:سمح احضري لي معاك
ملاذ :في الجامعه انتي صح؟
هند:ااي ف الكافتريا حقت كلية صيدلة
ملاذ :الوداك هناك شنو؟نبيل صح🙂💔
هند(م كانت عاوزة ملاذ تعرف ب شي) :لالا ي بت نبيل شنو ،نور كانت عاوزة مني شيت
ملاذ:اننننن
هند:بطلي😒👋🏽 المهم يلا رصيدي ح يقطع زاتو
*احساس انك بتعمل في حاجة بس ضميرك م مريحك وتحس انك بتعمل فيها مجبور ومن جواك عارف النتيجة يمكن م ترضيك بس ماشي ب المثل البقول"الغاية تبرر الوسيلة"..
*نبيل اول م طلع من المحاضرة بالو في هند شال تلفونو واتصل ليها بس كانت بترفض فيهو لانها ف محاضرة ،نبيل فهم القصة ومشى قعد ف محل القهوة وقال ل نور عازمك قهوة💕
نور لاحظت انو نبيل بدا يطلع من المود تدريييجيا وبفضل هند الحاجة دي كانت مريحاها من جهة ومعذباها من جهة تانية
اول م قعدو في القهوة
نبيل:نستكين لينا حبة ب فنجان قهوة
نور:م ملاحظ حاجة ي نبيل.
نبيل:شنو😕
نور:مؤمن م جا🤦🏻‍♀
نبيل:اااي صحي وين هو مالو م جا
نور:يادابك تفقدو😒💔
نبيل:ملخووم يخ عارفة الحاصل براك
نور:م عارفه قال تعبان بس م قادر
نبيل:ح امشي ليهو خلاص بعدين
*اثناء م بتكلمو كان هند طلعت من المحاضرة ولقت مكالمات نبيل قامت رجعت ليهو وصف ليها محل القهوة وجات عليهم
نبيل:نورتينا
هند:منور بيكم
نور:اها محاضرة كيف
هند:صدددعت بي
نبيل:نديك قهوة تظبط راسك😅
هند:ي ريت والله
نبيل:قهوتك كيف
هند:قرفة سكر بسيط
نبيل:اوووو ناس المزاج
هند:ااي😂
*والووونسة جرت حتى نور قامت من جنبهم وهم م حسو يعني كانو مندمجين شديد ونبيل مبسوط ب هند وكلامها واسلوبها وانها انسانة بسيييطة شديد وعادية وبتحب الناس وبدا نبيل يسألها عن ابوها وعن اسرتها وبتعرف عليها اكتر💕
*في علاقات بتبدا غلط او ب موقف بايخ وتصرف سخيف بس في النص بتتملكهاا حاجاات حلوة تخليها تنتهي نهاية م متوقعة ابدا ولا كانت في الحسبان💕

*هند عاينت ل الوقت لقت الساعه3ونص.
هند:وااي الوقت اتاخر😳🤦🏻‍♀
نبيل:م حسينا بالزمن والله معليش اخرتك.
هند:لا ولا يهمك بس ح اضطرا أتحرك
نبيل:طيب بوصلك عربيتي معاي.
هند:لا م تكلف نفسك يخ
نبيل:عادي يخ اصلا في شارعي ماشي ل مؤمن اشوفو
هند:خلاص تماام
*وركبو العربية وبرضو مستمرين ف الكلاام وصلها البيت ومشى ل مؤمن
ومؤمن بهناك كانت قصتو قصة وحالتو ميؤؤس منها🤦🏻‍♀💔
نبيل:مؤمن😳الحاصل شنو ي صحبي
مؤمن(بصوت تعبان ومُنهك):تعبان ،تعبان ي صحبي قلبي بوجعني 💔.
نبيل:ملاذ؟
مؤمن:في غيرها؟🙂
نبيل:وح تكون كده
مؤمن:هسي نور كان بتتكلم معاي ‘اقنعتني اواجها ب حالتي دي وفي الداسيهو في قلبي انا م قادر صبري فات الحد💔
نبيل:وانت ح تعمل شنو؟.
مؤمن:ح احاول ابدا معاها من الصفر كأنو م كنت بعرفا من قبل ،أبدا معاها من اول نقطة جديدة، عاوز امحي الفات كلو ي نبيل انا بمووت انا السلبتها حياتها وضيعتا منها ضحكتا💔عاوزها ترجع ملاذ الزمان.
نبيل:كلو شي بتصلح خليك قوي بس وم تنهار وانا متاكد انها بتحبك
مؤمن:ده الكلام القالتو لي نور وأصرت انو انا ارجع ليها.
نبيل:زكرتني🤦🏻‍♂ نور؟ ي ربي رجعت
مؤمن:م كانت معاك؟؟؟؟.
نبيل:والله كنا قاعدين ف القهوة وكده وفجاة جات هند وبتاع م لاحظتا نور اختفت وين
مؤمن:م لاحظتا؟؟؟ نبيل جنيت كيف يعني، ومتين هند شاغلة بالك كده
نبيل:م عارف والله بس حسيت ب احساس حلو وانا معاها احساس اني م عاوز اتحرك من جنبها اصلاا♥️
هسي خليني من هند، قووم خد ليك دش كده صحصح واقشر واتحررك
مؤمن:ع وين؟ م عندي مزاج ل ايي مرقة
نبيل:حتى لو فيها ملاذ ؟.
مؤمن:هه يعني ح تقبل تلاقيني مثلا🙂
نبيل:خليهاا علي انت بس قوم
مؤمن:خلاص طيب اها متحرك
*في اللحظة دي نبيل اتصل ل هند كانو مخططين مسبقا لما كانو ف العربية انو يخلو مؤمن وملاذ يتلاقو ع اساس صدفة 😉 نبيل ظبط ل هند الكلام وهند بهناك بقت تقنع ف ملاذ انهم يطلعو ب حجة يغيرو جو
ملاذ:يخ م عندي مزاج
هند:حلفتك😭انا زهجانة
ملاذ :انتي مالك مصرة كده😕
هند:عاوزة اطلع بس
ملاذ :اطلعي خلاص م ماسكاك انا
هند:تطيري معاي🙂
ملاذ :يخ خلاص طيب
هند:يلاااا💃🏻💃🏻💃🏻
ملاذ:ارح.
هند :طالعة كده ؟؟ ب توب هزاز وشبط بيت😳
ملاذ :م عندي قشة مرة ل زول براي عيانة😒
هند :لالا م بتباريني كده والله امشي اتظبطي
ملاذ:شوفي ي امشي ي كده ي اخلي.
هند:واااي لكن مؤلمة🙂😭
منظرك بيش هسي لو شافك زول ولا ود ناس خالو عمر جارنا السمح داك يقول شنو😂.
ملاذ:مااااا عندي شغلة ارح بس
*لما تكون متضايق من زول معين ويكون الزول ده بالنسبة ليك حاجات كتيرة نفسك بتطلع من ايي شي حتى اكلك البتحبو والطلعات والنوم واللبس بتبقى شبه عايش كأنو لما فات منك شال معاهو روحك💔.
*مؤمن ونبيل طلعو وكالعادة مؤمن قااشر رغم انو نفسو كانت مقفولة بس لبس دييييك ي الجلابية الرمادية والساعة والريحة😎
نبيل:مالك باقي سمح كده ي فردة😂
مؤمن:هههه من يومنا.
نبيل:اي صح😒.
*اتحركو ومشو ل المكان الاتفق فيهو نبيل مع هند بالظبط هند اول م وصلت خلت ملاذ براها وقالت ليها ماشة احول رصيد واجي وملاذ بقت واقفة منتظرة هند في اللحظة دي جا مؤمن وقف قصادها، ملاذ مكسورة وكانت عاوزة تبكي بس سكتت
مؤمن:ملاذ
ملاذ:ولا كلمة🙂
مؤمن: م احنا لو م اتكلمنا م ح نصل ل حل
ملاذ:م عاوزة معاك حلول خليني بس العملتو معاي م هين
مؤمن:انا الليلة جايي ورامي ايي شي وراي جاي ندمان والله عاوز ابدا صفحة جديدة واقول ليك بحبك بس بحبك بالجد المرة دي بحبك الح تخليني اتمسك بيك لاخر العمر، لاني بيك عرفت يعني شنو حب، يعني شنو ثقة والله ي ملاذ حبيتك وعرفت الحاجة دي متاخر جدا بس م عاوز اضيع الفرصة
ملاذ:فات الاوان ي مؤمن وصلنا ل طريق مسدود وقلبي من جهتك اتحجر.
مؤمن:ح تعيشي مرتاحة كده ؟
*ملاذ م قدرت ترد ومن غير م تشعر دموعها نزلت وبقت تكورك
ملاذ :حبيتك انا ي مؤمن حبيتك بكل مافيني ختيتك سندي واماني بس انت خذلتني وغشيتني ولعبت بي تاني اثق فيك كيف م بقدر والله م بقدر
*مؤمن اول م شاف ملاذ بتكورك وهي متضايقة ودموعها مالية وشها طوالي قررب منها للحد اليخليهو سنتمتر واحد ويلمس وشها وجراها عليو وحضنها♥️
وبقى ماسك يدو في راسها ب ورا على كتفو وقال ليها:ابكي هنا طلعي كل الجواك عليي.
ملاذ تلقائياً ومن غير م تحس هدت وبقت ساكتة كأنو حضن مؤمن كانت إشارة الأمان المنتظراها كأنها كانت الحاجة الوحيدة المحتاجة ليها
مؤمن بقى حاضن ملاذ عليو وبقول ليها بحبك والله♥️ وسكوتا كان دليل ع رضاها
*في اللحظة دي نبيل وهند جو وخربو اللحظة الرومانتيكية😂🤦🏻‍♀
نبيل:اووووو شاروخان يا😂
ملاذ خجلت من نبيل وطوالي اتفكت من مؤمن ورجعت ورا وعاينت ل هند نظام اصبري لي بعدين
مؤمن:اهلا ابو النبل بالله انت هنا من متين😅..
نبيل:من بداية الحضن😆
مؤمن:😅😅😅بالله
هند:المهم بقيتو سمنة ع عسل صح؟.

ملاذ (وهي بتعاين ل مؤمن مبسوطة) :ايوة بقينا♥️
هند:ايوووي💃🏻 تتعابطو كده ليكم كم شهر بلا ياخدكم😂
نبيل(عاين ل هند) : عقبالنا انا وانتي🙂...
👇🏻
مرات مهما حصلت كمية الزعل الجوانا ل زول معين ،كلمة بسيطة او تصرف وااحد بس كافي جدا انو يزيل ايي حاجة كلمة واحدة بس كفيلة انو نرجع زي اول صدقونا احنا لما نحب ونتعلق بنبقى زي الاطفال ف رفقاً بنا💔
نتاااااابع🚶🏻‍♀💕

#متلازمة_عشق
بقلمي:نهاد كمال
-١٢-
وقفنا في الجزء الفات انو نبيل عاين ل هند وقال ليها:عقبالنا انا وانتي🙂
هند:عقبالنا شنو
نبيل:ولا شي😅 يمكن حضن
*هند عملت م سامعاهو ومشت لملاذ ورجعو البيت..
ملاذ:هنند الله يجاازيك ي سجم😭
هند:يجازيني؟😕 بالنسبة اني رجعتك ل حبيبك😒🔥
ملاذ:لكن م بالمنظر ده😭 لابسة لي توب هزاز واااي ي وجعتي😭 ح يغير رايو بعد م يرجع الييت
هند:ي زولة براك عملتيها في نفسك😂قلت ليك اقشري ابيتي
ملاذ :م شفتيهو قاشر كيف😭 واي ي هند ريحتو لمن هسي فيني🙂♥️
هند:حضن ي تافهة ي منحطة ي منحرفة
ملاذ:من غير م نحس ياخ🙈
هند :المهم انك مبسوطة؟
ملاذ:شديييد ياخ😭 فرحتي م بتتوصف والله ي هند في لحظة بس نسيت كل الفات نسيت ايي شي حتى الكره الكان في قلبي إتمحى كأنو م كان في شي
هند:وااي ي ملاذ ☹️ بجد شفت الفرحة في عيون مؤمن الليلة 💕
*عيونا دايماً بتفضحنا مهما حاولنا ندس جوانا،مثلا لمعة العيون وقت اول اعتراف ،والحرقة البتكون فيها عند الغيرة،والبرود تجاه زول معين حاجات كلها بتظهرها العيون💕
*نبيل رجع البيت وهو مبسوط من الحصل وبالو رايق فكر يتصل ل ناس بيتو مما سافرو م اتكلم معاهم شال التلفون واتصل ل لميس اختو
نبيل:لميس ي لميس
لميس:وووو نبيل يخ شووق الشووق
نبيل:شوق ي كضابة ،مما سافرتو م اشتغلتو بس رسالة واتس م بتتزكريني بيها
لميس:ياخ والله تلفوني زاتو م قعد اتزكرو كل يوم مارقين محل😂 وعزومات والليلة ماشين ناس عمو علي
نبيل:والله ايامكم😂 نبع الحنان وين
لميس:هاك ليها(وادت التلفون ل فاطمة)
فاطمة :نبيل ي ولدي كيفك.
نبيل:ياداب اتزكرتيني كويس لكن ي فطوم
فاطمة:والله ي ولدي تلفون م عندي واختك الكريهة دي ولا شغالة بينا بس مرقات وحوامة. كيف بالله وجامعتك كيف
نبيل:كويس انا ي امي بس مشتاق ليكم وفاقدكم،
فاطمة:يديك العافية ي ولدي احنا زاتنا بعدا بنجي الليلة عند عمك علي بيجاي
نبيل:ااي لميس قالت لي سلمي عليهم كلهم وسلمي ع ابوي بتصل ليهو بعدين ف تلفونو
*نبيل قفل التلفون بين مبسوط وحزين،مبسوط لأنو الفرحة شوية بدت تظهر على ناس بيتو من وفاة لنا وإنو أمو حتى لو م ناسية الوجع عليها خف، لكن المزعلو إنو م جاب حق لنا القاطع قلبو وحارق دمو وحالف يجيبو لو كان النتيجة روحو💔
اثناء م قاعد براهو كده بقى يفكر في طريقة يصل بها ل محمد اخو عُلا وطريقة يقدر يرجع ل لنا حقو فيها وراسو شغال يودي ويجيب لحدي م جات الفكرة الشيطانية انو العين ب العين والسن بالسن بس قال بينو وبين نفسو انا م عاوز ارجع ل السكة دي تاني بعد م بعدت منها بس انا ح اشيل روحو ح اخليهو يموت بس ماف حل غير كده في..
*في اللحظة دي نور اتصلت ل هند وبدت تتفاهم معاهاا..
نور:هندد كيفك.
هند :اهلين نوور بخيرر والله..
نور:سمعت انو مؤمن وملاذ خلاص رجعو ل بعض.
هند :ايوة الحمدلله😭♥️
نور:يلا انا نفذتا ليك شرطك الباقي عليك.
هند :ابدا م ناسياك والله
نور:يلا الفرصة جاتنا من مافي بعد يومين عيد ميلاد نبيل واحنا نحتفل بيهو جماعة النون برانا بس المرة دي ح تكوني معانا والباقي عليك.
هند:بس ي نور اتفاقنا م كده ،انا م عاوزة اعلق ود الناس بي واحبو انا بس عاوزة ارجعو نبيل الزمان
نور:ماف حل غير كده بعدين نبيل منو اليحب، نبيل ده م بعرف حب اصلا،هند بالله م تخذليني..
هند (وهي م مقتنعة ب كلام نور) :خلاص طيب خيرر
*نرجع نقول انو لما تختار زول عشان تكون ليهو فرحة وتطلعو من الوجع اعمل حساب انك م تكون الوجع ده🙂🍂
*مؤمن وملاذ كانو مبسوطين جداً بعلاقتهم الرجعت دي وبدو في دوامة الحب والاهتمام وحقيقة مؤمن كان مبسوط جدا انو لقى انسانة تهتم بيهو وتحبو وتقدر تعمل ايي شي عشانو خصوصاً إنو اهلو م هنا وهو متعود ع الاهمال وملاذ نفس الشي قاعدة بعيد من اهلهاا، وقدر مؤمن يكون ليها سند ويشيل معاها ايي شي ويمشي معاها خطوة ب خطوة ويقويها عشان ترجع ملاذ القديمة الكان بعرفها اول.
*لما تجي تحب، حب البشوفك عندو الدنيا كلها البوريك حجمك ومكانتك عندو بأفعالو وتصرفاتو،اما الكلام خلي للزكرى بس👋🏽
*نبيل في لحظة عدم وعي ووجعتو ل فراق لنا وإنو هو كان السبب الرئيسي بإهمالو بدا يفتش في محمد الغلط مع لنا ويعرف عنو اي كبيرة وصغيرة عشان يمسكو من اليد البتوجعو ويوم وهو ماشي ل واحد صاحب محمد شدييد لكن عيبو الوحيد انو انسان مادي جدا وطبعا نبيل القروش عندو تراب فقال إنو ده الوحيد الح يقدر يساعدوو، لانو صاحب محمد شديد وعارف عنو ايي شي يعني بئر اسرارو، صاحب محمد ده اسمو انور، انور ده عندو محل تلفونات بشتغل فيهو بعد الجامعه لحدي نص الليل، ونبيل م قصر طبعا وم لقى ايي صعوبة انو يعرف المحل ويمشي ليهو ب حجة انو عندو مشكلة ف تلفون عشان يدرسو ويعرف فهمو شنو
نبيل:السلام عليكم
انور:وعليكم السلام اتفضل
نبيل:تلفوني ده فيهو مشكلة م عارفو مالو
انور:مشكلة شنو بالظبط

نبيل: بقى يعلق كتير وقدر م انزل تطبيق م بينزل لي
*انور شال التلفون قلبو فوق تحت وبقى يفتش فيهو م لقى ايي مشكلة بس عمل إعادة ف الضبط ورجعو ليهو نبيل شال التلفون ومشى
تاني يوم جاهو وقال ليهو
نبيل:والله ي صحبي متشكرك جدا التلفون اشتغل كويس جدا وشال 500ج واداها ليهو، انور عيونو بقو كبار وبقى يعاين ل نبيل وهو متحير وبقول الود ده متخلف ولا شنو
انور:ي اخينا ده شنو انا اصلا م عملت حاجة تلفونك م كان فيهو مشكلة
نبيل:برضو شيلها تلفوني اشتغل ب سببك
انور:بس ده كتير(وهو نفسو فيها)
نبيل :شيلها خليها بداية معرفة
*أنور شال القروش ودخلها جوة جيبو وهو بين مصدق وم مصدق وفي نفس الوقت مبسوط ب القروش الجاتو
اول م نبيل طلع من انور وراجع لاقتو هند في الشارع وهي داخلة ع انور، نبيل خاف وبقى يقول دي الجابها هنا شنو
نبيل:هند؟😐
هند:نبيل😕الجابك هنا شنو
نبيل:انا اسألك السؤال ده
هند:والله تلفوني بطاريتو كعبة وعندنا ود جيرانا شغال هنا جيت اوريهو ليو واشتري منو بطارية
نبيل:ود جيرانكم منو؟
هند:اسمو انور
*في اللحظة دي نبيل قلبو بقى يضرب وعرف انو بطريقة او غيرها هند الموضوع ح يصلها وح تعرف ف بقى يوري فيها مكان احسن تصلح فيهو التلفون
هند:بس انا طوالي بجي ل انور ده وهو ود جيرانا ومضمون
نبيل(وهو متوتر) :قلت ليك انا بوريك محل احسن
هند:نبيل في شنو؟مالك زي الداسي مني شي، رفضك اني امشي ل انور ده م ساي، م تنسى اني بقرا علم نفس😒 وبفهم الزول من تصرفاتو
نبيل:والله ماف شي خلاص امشي
وفعلا هند مشت وشالت تلفونا ودتو ل انور
انور:اوو هند منورة
هند:اهلين انور، بالله تلفوني ده بطاريتو كعبة شوفو لي
انور:تلفونك ده ماسورة قلت ليك اجدعي زمان انا😂
هند:خليتني استمر بيهو هسي بس
انور:محتاج بطارية بس ،
*شال بطارية واداها ليها وطلعت لقت نبيل مدسي جنب الحيطة وزي البسمع في كلامها مع انور
هند:نبيل انت لسه واقف؟؟😳
نبيل:لالا بس منتظر لي زول😅
هند:نبيل م تكذب، في شنو؟ ومالك خايف ومتوتر كده وقصتك شنو
نبيل :قلت ليك ماف شي
هند:والله في م تكذب
*نبيل وهند بدو يتناقشو وبدون م يحسو بقو يكوركو وصوتهم بقى عالي ف اللحظة دي انور سمع الصوت وجا طالع...
انور(وهو بعاين ل نبيل) :انت؟؟ لسه م مشيت
هند:بتعرفو ي انور؟.
انور:لا بس جاب لي تلفونو وكان فيهو مشكلة بسيطة حدا لكن دفع لي مبلغ كتيير
هند:ايوا خلاص خليني معاهو
انور:في مشكلة ولا حاجة ي هند؟.
هند:لالا ده زميلي ف الجامعه وبنتناقش
*بعدها انور رجع محلو وخلا هند ونبيل مع بعض
هند:دفعت للود كم ي نبيل
نبيل:500ي هند🙂
هند :مصلحتك معاهو شنو
*نبيل سكت..
هند:بتكلم معاك انا
نبيل (وهو منفعل) :يخ صاحب الود الغلط مع لنا، الود ال بسببو لنا م معانا هسي ب سببو امي قلبها اتقطع ب سببو متوجعين احنا ، كنت عاوز انتقم، عاوز اشفي غليلي ارجهع ل اختي حقها اقدر انوم بليل ، اقدر اشوف وشي في المراية بقيت بخجل من نفسسي ي هند، بكره نفسي، انا لازم انتقم لازم
هند :نبيل🙂 لنا دي مهما كان سبب موتها ف النهاية عمرها انتهى، وبعدين الود ده م قتلها براهو، انت م قدرتا تكون ليها اخو ، وابوك كان قي الغربة انت المفروض كان تأويها، كان تحتويها انت البديت الغلط ده، لنا م لقت زول يوجها م لقت زول يقول ليها ده صح وده غلط، لنا انت السبب انا م بقول ليك كده عشان تخليهو، بس قول انت قتلت الولد لنا ح ترجع تاني؟ ح تبرد قلب امك؟ ولا ح تجيب ليها كفوة تاني، انت قايل ح تقتلو كده وخلاص انتهى الموضوع
*الكلام نزل ع نبيل زي السيف، بس قدر يتقبلو وعرف انو ده الصح وم ح يستفيد لو قتل الود غير انو ح يوجع قلب امو تاني
نبيل(بعاين ل هند) : دايما بتجي في الوقت الصح، كأنو ربنا برسلك لي عشان توجهيني وتوريني الصح، هند انا بالجد عاوزك
هند:انا معاك ي نبيل وح اقيف معاك
نبيل(بدون سابق انذار) هند تعبت انا، انا بحبك☹️💔
👇🏻
اليد البتمسكك عشان توريك الصح ،الكلام البتقال ليك عشان مصلحتك،الروح البتهتم بيك، الصوت البطلع عشان يقول ليك انو هو محتاج ليك، الحاجات البتتعمل ليك عشان تبقيك مبسوط، احاسيس عمرك م ح تنساها وح تبقى مرسوخة فيك💕
نتاااابع🚶🏻‍♀💕

#متلازمة_عشق
بقلم نهاد كمال
-١٣-
في الجزء الفات وقفنا في حتة حساسة جدا انو نبيل خلاص إعترف ل هند ب حبو وم قدر يكتمو اكتر من كده، اخيرا قرر يطلع الجواهو ونشوف رد هند..
نبيل(بدون سابق انذار) :هند تعبت انا،انا بحبك☹️💔
*هند اول م سمعت الجملة دي قلبها وقف،وحست ب رجفة وقالت في نفسها ده الكنت خايفة منو بس جات اللحظة البقت فيها امام الأمر الواقع بقت فيها قدام الحقيقه الما منها هروب
هند :ده كلام شنو ي نبيل؟😐💔
نبيل:ده م كلام، دي مشاعر جواي طلعتها، هند في كل موقف كنتي بتظهري في حياتي كنتي بتوريني الصح كأنو جيتيني من فوق ، تزكري يوم لاقيتيني صدفة يوم بضرب نفسي ب غزاز العربية وساعدتيني؟ وهسي الليلة جيتي ف نفس الوقت الكنت مخطط فيهو ل جريمة، جيتي وانقذتيني وعيتيني، قدرتي ترجعي راسي ل محلو، كمية الراحة البحسها في قربك م بتتوصف م بقدر ابوحها، هند انا بحبك♥️بقولا بكامل وعي من غير تأثير ولا تحت ايي ضغط، يمكن حبيتك من اللحظة المنعتيني فيها المسك في اللحظة القدرتي تقيفي حاجز لي عن معصية 💔 هند مما عرفتك وحياتي بدت تمشي في الطريق الصح، جيتي لي هداية وانا عاوز اتغير عشانك بس م بقدر براي غيريني انتي، سلمتك نفسي💔 بقولا ليك تاني ي هند حياتي في يدك عاوز اكملها معاك، حبيتك بإصرار عجيب م حصل مني، انا في حياتي م حسيت بالاحساس ده ولا حصل جاني ،انتي اول انسانة تقتحتم حياتي بالطريقة دي،
*هند الكلام وقع في راسها زي الصاقعة، حب نبيل كان واضح في عيونو، وحتى طريقة اعترافو المليانة خوف وإرتباك، حتى يدينو الما قدرت تقيف من الحركة من اول كلامو، دي كلها كان دلائل على إنو الكلام طلع من جواهو وبإحساس صادق ومشاعر م تستاهل انها تموت او زول يخذلها💔 هند لقت نفسها في موقف صعب كيف تكذب على زول انها بتحبو عشان مجرد شرط اشترطتو مع نور ؟ وكيف تقدر تقتل مشاعر نبيل دي وتخليهو يرجع اكعب من اول تاني؟ وهل ح تقدر تحبو؟
*نرجع نقول انو نقطة المنتصف البنتختا فيها مافي اصعب منها والله،انك تكون بين احساسين وتلقى روحك مايل ليهم الاتنين وفي نفس الوقت بتهرب منهم الاتنين💔
*هند سكتت ولا ردت بكلمة ع نبيل ،لأنو الكلام غلبها في اللحظة ديك بس كل القدرت عليهو قالت ليهو:"خلي قصتنا للأيام"
نبيل:دي م قصة ي هند، ده قدر وانا مع الأيام ح اثبت ليك، هسي خليني اوصلك
هند:لا بمشي براي
نبيل:هند اركبي🙂👋🏽
*هند ركبت العربية وطول الوقت بتفكر في كلام نبيل،والاحساس الحست بيهو وقت سمعت كلامو ،يمكن ده هو الانسان الكان بتحلم بيهو؟ وهل ح تقدر تصلحو بعد مشاعرو الباح بيها وم قدر يكتمها؟
طبعا هند إتجهت ل ملاذ عشان تاخد رايها عشان تقول ليها تعمل شنو
اول م دخلت لقت ملاذ تتكلم بالتلفون مع مؤمن🤦🏻‍♀
هند:خلاص بدينا ايام الخلط😒
ملاذ(نزلت التلفون وبدت تضحك) :طوولنا ياخ😂 كدي ي مؤمن دقيقه وارجع ليك.
ملاذ :مالك اتاخرتي كده واشتريتي البطارية ل تلفونك؟.
هند:ااي.
ملاذ :مالك ي بت؟ اختصرتيني كده
هند:م عارفة ابدا ليك من وين
ملاذ :نبيل صح؟
هند:عرفتي كيف😐
ملاذ :من لمعة عيونك🙂
هند :كيف يعني؟
ملاذ:هند، مش في كلام ولا مقولة بتقول انو انت بتحس ب زول معين او تشوف زول معين في صوت زول تاني ، او في لمعة عيونو، زي م شفتي حب مؤمن لي يوم حصل الحادث بس انا هسي عرفتا
هند :يعني افهم شنو هسي
ملاذ:اسألي قلبك
هند:قلبي ده زاتو المشكلة ي ملاذ😭💔 انا بقيت محتارة وفي نفس الوقت خايفة يخ
ملاذ :تخافي من شنو؟ نبيل يستاهل ياخد فرصة تانية، زي م مؤمن اخد الفرصة دي، ايي انسان غلط وعاوز يصلح غلطو من حقو يدو فرصة يغير بيها نفسو م من حقك تمنعيهو
هند:بس نبيل اعترف لي ي ملاذ ،اعترف ب حبو🙂💔
ملاذ:اعترررف؟؟؟؟😳
ايوووووي اخيييراا🤤💃🏻💃🏻💃🏻💃🏻انا وصحبتي ح نعرس اصحاب اها قال ليك شنو وكيف ورديتي ب شنو احكي لي
هند:ي بت احكي ليك شنو اصلا م رديت ليهو
ملاذ :اديك كف؟🙂👋🏽
هند:والله، م عاوزة اخوض في علاقة م عارفة نهايتا شنو، وأعلق قلبي ب زول م عارفة اخري معاهو شنو ،اعيش في دوامة ما ليها نهاية ولا منها مهرب لأني لو خشيت فيها بموت، لأني انسانة بتعلق بسرعة وبخش في ادق التفاصيل،ومريضة اهتمام،يعني اقل تصرف بجرحني💔
ملاذ :هند م تحكمي ساي انتي ادي نبيل فرصة شوفيهو، ع الاقل اخدي منو موقف واحد لكن م تبني اوهام من فراغ منك ساي.
هند:يخ خلاص انا عاوزة انوم اصلا بكرة الجمعة يلا
ملاذ :اتخمدي اصلو الزول م يتونس معاك، ح اتصل ل مؤمن زاتو😌
هند:اقعدي امعطي كده لما يخليك😒
ملاذ :هو بقدر😌
هند:خلاص خليني انوم😹

*نرجع نقول ماف حاجة اسمها اجرب اخوض علاقة،او اشوف نفسي كيف؟ قلوب الناس دي م حقل تجارب ولا مشاعرهم دي منتجات تستهلك وترجع من جديد،عاوز تحب كن مقتنع تماماً انو الحاجة دي من جوة قلبك وانك بتحب عشان عاوز تحب مش عشان تجرب او عشان صحبك بحب او شينة يقولو عليك انت سنجل🙂 لأنو الوجع البجي للطرف التاني جذورو عمرها م بتتقلع💔
*جا الصباح وهند لسه بتفكر في نبيل وحبو الجا من غير ميعاد ومتزكرة في نفس الوقت شرط نور ، بعدها ب شوية جات امها رقية قالت ليها
رقية:ي بت هند الساعه11الفطور جا.
هند:اي والله انا زاتي جعانة
رقية:سريع ملاذ هجمت نص الصينية😂
هند:شايفاها ابت ترجع بيت خالتا صاباها معانا هنا😂
*
بعدها هند مشت واكلو واتونسو وايي وحدة رجعت مكان م قاعدة، هند وملاذ دخلو الاوضة.
هند:ماشة صلاة الجمعة انا ي بت
ملاذ :انا زاتي.
هند:خلاص اجهزي م تأخرينا ، مواعيدها قربت
ملاذ:م عندي شي ارمي فيني عبايتي بس.
*وفعلا مشو الصلاة وصلو اول م طالعين ملاذ شافت مؤمن الكان اصلا متفقة معاهو😂 وطبعا مؤمن م بجي من غير نبيل
هند (وهي بتحمر ل ملاذ) :طبعا اتصلتي ليهو انتي😒
ملاذ:ااي😁
مؤمن:لوزتي♥️ جمعة مباركة عليك عقبال جمعة عقدنا
ملاذ:مؤمني♥️امييين ي رب.
نبيل:يخوانا احنا هنا😒 حبو بعض بعيد
مؤمن:زاتو خليناكم وشكم الكريه ده..
هند:لا بالله تمو عليكم الله.
ملاذ:حارقك وين، نبيل وقدامك😂
*هند اتحرجت من كلام ملاذ بس م قدرت تقول ليها حاجة
نبيل:هند كيفك..
هند :كويسة، تعال نقرا سورة الكهف.
نبيل:حلو😍.
*هند ونبيل قعدو في مظلة قريبة من الجامع وشوية منعزلة من الناس ، هند طلعت مصحفها الاصلا كان جايباهو معاها ونبيل كان جمبها، وبدو يقرو مع بعض♥️
نبيل حسا ب راحة عجيبة، آمان م بعدو أمان، شعور بالطمأنينة ،إحساس إنو بقى بعيد من الدنيا ،اول م خلصو
هند:لو قريتا كل جمعة تحميك لحدي الجمعة الجاية.
نبيل:اللله ي هند اول مرة اشعر بالشعور ده
هند:لازم تتعود، هسي ارجع اخد ليك راحة
نبيل:راحتي في قربك انا🙂♥️
هند(وهي زي متحرجة) :نبيل انا م قدر الكلام ده
نبيل:انتي قدرو ونص وخمسة. ي بت انا بحبك
هند:تاني ي نبيل🙂
نبيل:تاني وتالت ورابع وألف
هند:خلاص، انا راجعة البيت
نبيل :اتضايقتي؟.
هند:لا، بس اتاخرتا امي ح تشفق علي، اتصل ل مؤمن خلي يقول ل ملاذ تجي
*فعلا نبيل اتصل ل مؤمن وجو
هند:خلاص تميتو خلطتكم😒
مؤمن:نفسي اعرف محروقة مالك😂 ابرددي يااخ
ملاذ:خليها خليها😂👋🏽
هند:بكرهكم، المهم يلا قدامي
نبيل:خلي بالك ي هند..
هند:ان شاء الله
*رجعو البيت وهند كان طوول الوقت بس تفكر في نبيل وكلامو، وبتجيها صورتو وهو كان بعترف بالطريقة المليانة صدق وأمان، هند عرفت انو تفكيرها فيهو ده م ساي وانو اكيد جواها حاجة ليو بس هل ينفع تكلمو؟ ينفع توريو انها بتحبو..
*من غير م تحس هند شالت التلفون واتصلت ل نبيل في لحظة انفعال وتفكير
نبيل:ي بت هند خير م يكون في شي.
*هند ساكتة...
نبيل :هند
هند:نبيل انا يمكن اكون بحبك🙂
نبيل:يمكن؟
هند:م عارفة مما جيت منك بفكر فيك.
نبيل:وانا عمرك م رحتي من بالي..
هند:م عارفة اقول ليك شنو.
نبيل:حاسي بيك من غير م تقولي
هند:فهمتني؟..
نبيل:ايوة♥️
هند قفلت التلفون ورجعت نامت...
*هل هند دي كان تصرفا صح؟ولا الكلام القالتو ده في لحظة تهور وانفعال؟ يعني هي ح تحب نبيل بجد؟.
👇🏻
اعرف انو انت ومهما كان كترة الناس الحواليك واهتمامهم بيك وسؤالهم عنك، ببقى زول واااحد بس لو سأل سؤالو بفرق ولو إختفى غيابو بوجعك، زول واحد بس هو البغنيك عن الناس ديل كلهم 🚶🏻‍♀💕

نتاابع🚶🏻‍♀💕

#متلازمة_عشق
بقلمي:نهاد كمال
-١٤-
*العلاقات البتبدأ فجأة بدون سابق إنذار،المشاعر البتطلع مننا من غير تفكير،والتصرفات المن غير عقل، إهتمامنا ب فئة معينة ، قُربنا الشديد من زول مميز، كلامنا الما مرتب ليهو، اللخبطة البتحصل في نص الزعل، مشاكلنا البتأثر على نفسيتنا، الحاجات البنكتمها وبتوجعنا، حياتنا الشايفين إنها ما بقت لينا، غيرتنا على الناس البخصونا، صورنا البنحبها، أصحابنا العندهم نكهة تاني في حياتنا، هبالتنا مع ناس البيت، الكلام المفرط فيهو، التعود الما بشبهنا، نظراتنا البتفضحنا، وجع المنتصف، العلاقات المن غير إسم ، الإنسان البتبيع الدنيا عشانو، الضحكة البتطلع فجأة وبتخرب بلد، المقدمات الطويلة قبل الإعتراف، اللون الأسود، الطلعات البتفرح الروح، الرسائل الصباحية، مكالمات نص الليل، الحواجبين الغزيرة، الوجنة الفي الخد الأيمن، صرة الوش عند الغيرة ، واكتر واكتر حاجات إحنا م بنلاحظ ليها بس غيابها عننا او إختفائها بأثر علينا حافظو على تفاصيلكم البحبوها الناس فيكم، حافظو اكتر على روحكم♥️
نرجع ل قصتناا*جا الصباح وهند نااايمة نوم عميق جات ملاذ ناطة فيها
ملاذ :هييي ها النايمة دي
هند(بصوت نعسان وتعبان) :مالك ي بت أصبحنا
ملاذ :ي بت هند الساعه 8ونص مواعيد المحاضرة قربت ي بت قومي
*هند قامت مخلوعه النوم طار من عيونا.
هند:واااي الوقت إتأخر😳 ليه م صحيتيني
ملاذ :لي ساعة بنبح فوق راسك😒.
هند:خلاص إنقلعي زحي امشي اتجهز
*هند سريع سريع إتجهزت وملاذ كان منتظراها وصلو الجامعه لقو الدكتور خشا المحاضرة وابا يسمح ليهم يخشو وراهو💔
ملاذ :كلوو بسببك ي هند😭
هند:يخ عارفاني م بحب أتاخر بس شالتني نومة، انتي م صحيتيني ليه.
ملاذ :انا ساعه بنبح فوق راسك اعمل ليك شنو لو بتنومي زي الفيل م بتحسي.
هند:يعني هسي الراجل ده م يدخلنا شنو ال10دقايق دي بس😭
ملاذ:انتي عارفاهو م بحب زول يجي وراهو كلمنا من اول يوم
هند :خلاص يخ، ارح ناكل زاتو شاي م شربتو.
*اثناء م ماشين ع الكافتريا لاقتهم نور..
نور:لووزتي وهند الشووق🤤..
ملاذ :اووو نور يخ كتيييرر كيفك
نور:تمااام التماام
هند:منوراانا الليلة
نور:والله ياداب خلصت محاضرة من 7شغالة قلت اشوفكم، محاضرتكم لسه؟.
ملاذ :م تزكرينا😭 الليلة طردونا
نور:طردوكم؟😐.
هند:ي زولة م طرد😂 جينا متأخرين والراجل الكريه دا ابا يدخلنا
نور:ههههه ي زولة رب ضارة نافعة ، نشرب قهوة؟.
هند :صراحة عاوزة اكل انا اول😅
نور:مالو نأكل ونشرب😂
ملاذ :انا ماشة الاقي مؤمن
هند:عصافير الحب😆
ملاذ:ح اتجاوزك😒 يلا
هند:طيري زاتو
*بعدها ملاذ مشت ونور وهند بقو براهم
نور:عاوزة شنو؟ عازماك الليلة
هند:لالا يخ انتي طالبة زيي عزومة شنو
نور:اعتبريها شبه عزومة
هند:والله صراحة انا بحب طعمية الكافتريا دي وحاارة وسمحة😂.
نور:خلاص نشتري اتنين
*نور وهند بقو قاعدين وخلصو أكل.
نور:هند عاوزة أتكلم معاك في حاجة
هند:عارفاك عاوزة تفتحي معاي موضوع نبيل صح؟.
نور:ع فكرة الليلة عيد ميلادو اها ح تجي طبعا صح
هند:المشكلة هو بليل، والطلعة صعبة من البيت
نور:جازفي ضرووري تجي
هند:ان شاء الله بحاول
نور:صدقيني ي هند م عشان نبيل صحبي ولا عشان الشرط الكان بينا، بس بالجد لو كسبتي قلب نبيل وعدلتي حياتو، ح تكون دي خطوة كبيرة ليك وليهو، نبيل ده م حصل إنكسر ل بت م حصل شفتو بالبراءة دي ،م حصل شفت جانبو الطفولي ، نبيل بقى بس شافع ومنتظر منك الأوامر ،كل كلامو بقى عنك شوية شوية بدا يرجع زي اول وأحسن، قدر يتغير كتييير وكتير، نبيل بدا يحس ب طعم الحياة ،وده كلو بفضلك
هند:انا معاك في ده كلو ي نور بس العشم حار، والدنيا م معروفه وانا م بقدر اخوض علاقة نهايتا مجهولة بالنسبة لي، افهميني ثم انا م متأكدة من مشاعر تجاهو، انا لو خشيت في العلاقة دي عاوزة اخش لما أتآكد إني فعلا بحب نبيل م بحب حبو لي ولا انو بس بهتم بي وإني ح اغيرو، عاوزة أحس بالحاجة دي جواي، إنو فعلا المشاعر دي ل نبيل ليهو هو بس عشان م ينكسر في يوم بسببي
نور:وانا ح اديك الفرصةة دي في عيد ميلادو بعدين، الفرصة البتقدري تحددي فيها مشاعرك وعلاقتك بيهو
هند:يحصل خير بس.
نور:أستأذنك ح ارجع بدري عشان اجهز وكده
هند :اتفضلي يلا😘
نور:تسلمي ل بعدين
*إتخيل كمية الوجع والخذلان الممكن يحس بيها زول كان خايف من كلمة حب او بكره حب، ويقع في حب زول ويكسرو💔 يعني بعد م حاول يقنع نفسو إنو في حاجة إسمها حب حقيقي، لقى نفسو في متاهة إنكسار💔 وتاني بقول رفقاً بنا
*هند اول م نور مشت منها وبدت تشتغل تفكير بس، الحاصل ده كلو من بداية حادث نبيل مع ابوها، وقصة الشقة، وتغير نبيل الكبير الحصل وحاجات اكتر من كده، هند بقت مشتتة م قادرة تحدد وجهتها
قامت اتصلت ل ملاذ عشان ترجع البيت ،جوها ملاذ ومؤمن
مؤمن:هند كيفك
هند:اهلين مؤمن تمام
مؤمن:ارح ع العربية اوصلكم
هند:ماف داعي تتعب

مؤمن:اتعب عشان مرتي؟🙂
هند:عشان مرتك يعني م عشاني😒
مؤمن:مرتي وصحبتا😂
ملاذ:خلاص ي انتو المهم نصل
*ركبو العربية ومؤمن وصلهم لمن قريب البيت واول م نزلو قال ليهم مواعيدنا بعدين م تتاخرو..
وصلو البيت كالعادة بدخلو اوضتهم تعبانين خاالص
ملاذ:انا لو نمت ل بكرة م ح اصحى
هند:م بتلحقيني والله
ملاذ :اها بالنسبة ل حفلة عيد الميلاد ؟
هند:والله م عارفة ي ملاذ، اقول ل امي شنو وهم عاملنها متأخرة
ملاذ:اقول ليها سايقة معاي هند تبيت معاي عند خالتي عندي هدوم عاوزة اغسلها وكده
هند :امم ممكن
ملاذ:خلاص بس اتفقنا
*بعدها هند رقدت وملاذ ماسكة تلفونها اثناء م هند رقدت تلفونا ضرب لقت المكالمة من نور..
هند:نور كيفك
نور:خليك من كيفك وايي شي اها جاية ولا لا
هند:ان شاء الله
نور:معتمدة عليك اعتماد كلي
هند:طييب
*هند اول م قفلت من نور عاينت ل ملاذ وخلتها تكلم امها من هسي عشان يجهزو ويطلعو بدري، رقية أم هند على طيبتها وافقت طوالي ، هند وملاذ شالو هدومهم ومشو بيت خالة ملاذ عشان لو سألو منهم يتأكدو انهم هناك وملاذ حنكت خالتا انها ماشة حنة صحبتها شديد وبدو يتجهزو..
*كمية المجازفات والتنازلات البتعملا عشان خاطر إنسان كافية جدا إنها تكون سلاحك وقت الفراق👌🏽..
*ملاذ أصرت على هند إنها تلبس فستان اسود، خصوصا انو هند بيضاء وطويلة..
فعلا هند لبست فستان اسود ب كُم لحدي نص يدها، وجزمة واطية بالآحمر، ورووج خفيف وفكت شعرها بس ختت طرحة ب فوقو،
ملاذ عاينت ل هند😳
ملاذ:ي بت ي قمممرر انتي🤤
هند:ده كلو منك يخ ده شنو حاسة نفسي عولاق
ملاذ:انا ظبطتك والله، انتي العولقتيني يوم لاقيت مؤمن ب توب هزاز🙂
هند:ي زولة براك الاتعولقتي😂
ملاذ:هسي ده م موضوعنا انا ح البس فستاني الرمادي يلا..
*ملاذ وهند كانو قاشرين اااخر حاجة، وخصوصي هند كانت طالعة قمر14، يمكن هي زات نفسها م ركزت بعد نص ساعه مؤمن اتصل ل ملاذ
مؤمن:ي سجم
ملاذ :عيوون السجم🤤♥️
مؤمن:م وقتك نهائي😂 اها جاهزين؟.
ملاذ:ااي ااي😂
مؤمن:خلاص وصفي لي بيت خالتك ده ب وين
*فعلا ملاذ وصفت ل مؤمن البيت وجاهم وركبو..
مؤمن:إيه المزازة دي🤤😂
ملاذ:خلي المشاغلة ي ود ازهري
مؤمن:بتجيبي سيرة نسيبك في خشمك، ربيتك كده انا
ملاذ:اممم سكتا خلاص
مؤمن:هند مالا عاملة صامت
ملاذ:متنشنة شوية
مؤمن:هسي تخشي الحفلة تنبسطي
هند:لالا م كده براي بس
*اول م وصلو بالعربية مؤمن نزل فتح الباب ل ملاذ ، هند جات نازلة ب ورا اول م رفعت عينا وقعت ع نبيل
نبيل كالعادة لابس بدلة ب الزيتي وقميص بيجي واللحية
اول م شاف هند، إنعزل عن كل الناس وجا عليها..
نبيل:هند(وهو بعاين ليها مبسووط)
هند:كل سنة وانت طيب ي نبيل
نبيل:كل سنة وانا بيك انتي بطيب🙂♥️
هند سكتت،،
*دخلو جوة الناس كانو كتار والصالة مليانه، نبيل ناسو م بيتحسبو وصحباتو ب الكمية، بس م كان مركز مع زول كل إنشغالو مع هند ، بس الكان واجعو انو هند كانت م شغالة بيهو وواقفة بعيد كل م يقرب منها عشان يفتح موضوع يلقاها تتهرب منو
نبيل(مسكا من يدها) :هند م عاوزة تتكلمي معاي؟
هند فكت يدها منو
*نبيل زعل جدا ومن غير م يحس لقى نفسو بصفق في النص والناس كلها طبعا التفتت عليهوو..
نبيل:اسمعوني كل الحاضرين هنا
انا نبيل التجاني بشكرككم جدا ع جيتكم، وعندي مفاجأة محضرها ليكم ،وحبيت اخليها واعلنها ف عيد ميلادي..
بعد سنين من العزلة والوحدة، اخيرا لقيت الانسانة الح تسعدني، والح اقدر معاها اعيش مبسوط، الانسانة الكان بتجي في ميعادها تماماً عشان تنقذني ،عشان تاخد بيدي إلى النور، القدرت تكون سُراجي المنير في عز عتمتي، القدرت تكون طوق نجاة تشيلني من غرق الهموم، انا نبيل بكل قواي العقلية وقدام الناس دي كلها بقول:بحبك ي هند♥️
👇🏻
إتعلم تحب الما بخاف من زول، ولا بخجل من إنو يعلن حبو ليك، حب البفخر بيك قدام الناس، والبقول عليك إنك حبو وسعادتو، إختار البحبك فوق كل الناس والعمرو م ح يخليك💕
نتاااابع🚶🏻‍♀💕

#متلازمة_عشق
بقلمي:نهاد كمال
-١٥-
*الموقف العملو نبيل خلا الناس كلها تنصدم وبقو واقفين متحيرين ، ومستغربين من جرأة نبيل وقوتو وإنو م خاف ولا إتردد قدر يصرح ب حبو قدام الناس كلها بدون أي توتر..
هند كانت في حالة شبه مصدومة م قدرت تفهم موقف نبيل كان قصدو بيهو شنو، بس الموقف ده كان بثبت ليها انو نبيل بجد حباها♥️ وحابي يتغير على يدها..
نص البنات الفي الحفلة عاوزين يعرفو هند دي منو؟ ومين القدرت تشيل قلب نبيل التجاني القدرت تاخد نبيل ليهاا..
نور عشان تنهي الموضوع جابت هند ووقفتها جنب نبيل نظام الناس تفهم دي هند
بس هند الخوف كان باين في عيونا ويدها بترجف ومرتبكة، نبيل مسكها من يدها وقال ليها:انا جنبك م تخافي♥️ مسكة يدو قدرت تمتص خوف هند وحست بالأمان إنو نبيل معاها
في بت سالتو:عاوزين نعرف هند دي كيف قدرت تشيل قلبك ي نبيل؟.
نبيل:ببساطة لانها كانت على طبيعتا م حاولت تصطنع، لأنها ورتني نفسي الكان ضايعة مني، لأنها م إتكلفت أبدا إنها تخش قلبي بس قدرت تتملكني كلي ♥️
في بت تانية قالت ليهو:ونهاية قصتكم ح تكون شنو؟
نبيل:طبعا بيت يلمنا انا وهي وصوت اطفال صغار يكونو جزء مننا وبيهم اكمل باقي فرحتي♥️
*في اللحظة دي أكتر من ربع البنات الجو الحفلة مشو، هند بدت تتدمع وم قدرت تنطق ايي كلمة، يعني حفلة عيد الميلاد اتحولت ل ليلة مليانة إعتراف ،نبيل اصلا م خاف قدر يتكلم بكل صراحة..
بعدها الحفلة اشتغلت بس الناس كلها بقت مركزة مع هند ، ونبيل حسا بالحاجة دي فقال ل مؤمن خلاص ألغي باقي الحفلة والناس كلها تمشي..
وفعلا مؤمن قفل ايي شي بقو بس قاعدين براهم.. نور ومؤمن وملاذ مع بعض، وهند ونبيل منفردين
نبيل:هند انا م عارف تصرفي ده صح ولا غلط، ولا عارف نفسي عملتا كده ليه، بس حسيت اني عاوز ابوح ليك كده على الملأ ،يمكن تصرفي م عجبك بس وحيات الخلقني م كنت في وعيي بس حاجة خلتني اعمل العملتو..
هند:نبيل(واخدت ليها سكتة كده) انا اول مرة أتختا في موقف زي ده، كل العيون بقت موجهة لي، انا عمري م حبيت ولا بعرف يعني شنو حب او انك تحب زول، بس تصرفك ده خلاني احس ب حاجة حلوة م عارفة هي شنو بالظبط، بس كونك تعلن حبك لي قدام الناس كأنك بتفتخر بيهو والحاجة دي بسطتني بقدر م خوفتني بس مسكة يدك في اللحظة الكنت جنبك نستني خوفي♥️
نبيل:وانا معاك العمر كلوو بس انتي خليك جنبي عشان أقدر أحافظ عليك عشان أقدر أكمل مشواري البديتو معاك ♥️
هند:انا م ح اخذلك وح نبدأ من الصفر رامين كل الفات ورانا♥️
*بعدهاا هند ونبيل بدو يرسمو في حياتهم وخططهم تحت إسم الحب بعدها جات عليها ملاذ..
ملاذ:هيي العروس😂الساعه11عاوزة تجي ح يطردونا
هند:ااي والله اتاخرنا خلاص نمشي
ملاذ :اي يلا
نبيل:م شبعتا منك يخ☹️
ملاذ :هيي برلوم الحب ده😒 بلا م شبعت منك، لحمة هي؟😂
نبيل:بطلي إستظراف ي ملاذ 🙂
مؤمن:يخوانا يلا
نور:اها الح يودينا منو
نبيل:انا طبعا
مؤمن:وانا اخلي عربيتي هنا😒
نور:عندي فكرة ، نعمل فريقين😂
مؤمن:المشكلة هند ملاذ ماشين نفس المحل
هند:ي جماعه المشكلة نصل لأنو الوقت
مؤمن:خلاص م مشكلة انا ونور بنمشي، نبيل انت ودي هند وملاذ
نبيل:خلاص طيب
مؤمن:ملاذ م اوصيك على نفسك♥️
ملاذ:وانت كمان♥️♥️
*بعدها نور ركبت مع مؤمن وفاتو..
نبيل ساق هند وملاذ يوصلهم البيت الشارع كلو مبسوط ويضحك..هند قالت في نفسها انها اول مرة تشوف نبيل مبسوط بالطريقة دي ،معقول الحب بخلي الناس مبسوطة كده؟
* ماف حاجة اسمها علاقة من غير مشاكل، او علاقة حب طرفيها دائما مبسوطين، بس تمسكنا ببعض هو البخلي العلاقة تستمر ،وعزمنا على اننا عاوزين نستمر مع بعض هو البدي العلاقة نكهة فرح💕*هند وملاذ وصلو البيت مبسوطين ونبيل رجع بيتو..اول م وصل البيت وغير هدومو مسك التلفون لقى15مكالمة من لميس اختو.
نبيل اتخلع وخاف طوالي اتصل ليها
نبيل(وهو خايف) :في شنو ؟؟لميس انتي كويسة؟.
لميس:ي ود مالك😂عاوزة اقول ليك كل سنة وانت طيب عامل تقيل م عاوز ترفع
نبيل:والله خفت ي لميس🙂 الحمدلله انكم كويسين، وانتي طيبة يااخ وين الهدية😂
لميس:عندي ليك هديتين كمان😌
نبيل:ووو طوالي قولي
لميس:الهدية الاولى احنا جايين بعد بكرة😂
نبيل(وهومبسوط):ياخ والله دي أحلى هدية البيت بايخ من غيركم، فاقدكم
لميس:يلا استلم الهدية التانية
نبيل:اها اصدميني
لميس:جاني عريس🙈
نبيل :بالجد؟؟؟😳عريس شنو ومن وين واتكلم معاك ومتين و..
لميس:يا ود ابرد، ما زول غريب تزكر لما قلت ليك كنا قاعدين مع ناس عمو علي؟
نبيل:ااي اها
لميس:بس ، كمال ولدو قال عاوزني وكلم ابوي
نبيل:وانتي رايك شنو؟.
لميس:كمال ود مهذب جدا والفترة القعدتا معاهو م شفت منو ايي شي بس غير رايي محتاجة رايك كمان
نبيل:لو انتي عاوزاهو وح تعيشي معاو مبسوطة م عاوز اكتر من كده♥️
لميس:ربنا يعمل الفيو الخير

نبيل:انا برضو بسأل عنو ناسي البعرفهم، حتى لو ود عمي اكيد عندو سلبيات
لميس:خلاص كويس
*نبيل فرح جدا بخبر لميس، لأنو حسا إنو السعادة أخيراً ح تخش عليهم بالزات بعد فراق لنا وغيابها عنهم💔 حسا بجد إنهم محتاجين يفرحو بعد المُر الشافوهو، وقال دي مناسبة كمان إنو يحكي ليهم عن هند..
*في الاثناء دي هند كانت حاسة ب سعادة كبيرة م بتتوصف، م إتوقعت إنها ح تتحب بالطريقة دي او يخش حياتها انسان ويقلبها فوق تحت..
*أغلب علاقاتنا م بنكون لينا يد فيها بتحصل بفِعل الصدفة، بس صدفة واحدة بتقدر تخلق ألف معجزة👌🏽..
*هند تاني يوم مشت الجامعه هي وملاذ وطبعا كانت متوقعة نظرات البنات ليها وتعليقاتهم عليها..
اول م جات داخلة، مسكتها بت من يدها
البت:هند؟؟ بالله ياها انتي هند العاملين ليك قومة وقعدة
هند :لو سمحتي الشارع
البت:ولو م سمحت؟ ح تنادي لي نبيل
*في اللحظة دي ملاذ فكت يد هند من البت وزحتها ومشو..
ملاذ:عايني ي هند م تخافي اصلا البنات ديل كده
هند:حصل خير🙂👋🏽
ملاذ:م تشتغلي ب كلام وحدة فيهم
*اثناء م ماشين تاني جات بت عليهاا من البنات الهاي هاي وكانت مكسررة في نبيل، البت طوالي عاينت ل هند
البت:بالله دفعتي ليهو كم ؟ ولا كتبتيو عند ياتو شيخ! م مصدقة انو نبيل ينزل ل المستوى ده..
*هند بقت ساكتة وم قالت شي وطوالي خشت ع القاعة، بعد ساعتين طلعت من المحاضرة وقعدت في القهوة..
هند :والله ي ملاذ م فهمت شي من محاضرة الليلة راسي مصدع زاتو
ملاذ:انتي لسه خاتة بالك في الكلام حق قبيل؟
هند:ضايقني ي ملاذ، ضايقني جدا
ملاذ:ياخ انتي عارفة البنات وعارفة نبيل وشهرتو
هند:بس ل متين؟.
ملاذ:هسي خليك من ده اشربي قهوتك وارح البيت
هند:اصلا عاوزة ارجع البيت م عندي مزاج اقعد.
*هند شربت قهوتها وبعدها طوالي اتحركو ركبو المواصلات في الشارع نبيل اتصل على هند كم مكالمة بس بدت تفصل فيهو الخط.. الا اضطر يتصل ل ملاذ ردت ليهو قالت ليهو:احنا في المواصلات..
*اول م نزلوو ووصلو البيت هند رجعت ل نبيل..
هند:الو.
نبيل(وهو بكورك) :كيف تمشي بالمواصلات وانا قاعد؟ وريني؟ وتمشي قبال م اعرف انك مشيتي كيف
هند :كنت مصدعة ي نبيل
نبيل(لسه بكورك) :توريني ي هند، وبتقفلي الخط في وشي ليه
هند:كنت في المواصلات🙂(ب برود)
نبيل:ويعني شنو؟ توريني انك في المواصلات عشان م اخاف واتجنن
هند:طيب
نبيل:م تختصريني🙂
هند:والله م قصدي بس تعبانة ومصدعة
نبيل:خلاص ارقدي ارتاحي ل بعدين *هند من التعب الفيها نامت ل تاني يوم وهي م حاسة ،صحت لقت مكالمات كتيرة من نبيل ورسايل مليانة خوف وقلق ،رجعت ليهم م رد افتكرتو نايم راحت جامعتها عادي
واول م وصلت الجامعه بدت تاااني التشغيلات والكلام في هند، هند كإنسانة بسيطة م قدرت تستحمل الكلام ، وقعدت تبكي وطواالي رجعت البيت حتى م نادت ملاذ ولا ركزت لأي شي.
وصلت البيت وهي منتهية من البكا بس بقت تبكي وتقول: انا اصلا غلطانة نبيل م مستواي😭 من اولها كده😭
*هند م قدرت تستحمل ووشها بقى مورم من كلام الناس والطعين الجاها ،حتى نظراتهم ليها كانت غريبة
في اللحظة دي ملاذ اتصلت عليها هند عاينت ل التلفون ياداب ركزت انو هي م انتبهت ل ملاذ وخلتها في الجامعة اول م فتحت الخط..
ملاذ :هننند الحححقي وييين انتي؟
هند :ي بت في شنو😳
ملاذ :نبييل ي هند نبيل..
هند:ماالو في شنو؟.
ملاذ :تعالي الجامعه سررريع
👇🏻
لو لقيت إنسان خذلك بعد م حبيتو ووثقت فيهو، أو إنكسرت من زول م اتوقعت تنكسر منو م تخت اللوم عليهو وبس، راجع نفسك شوف حصل كسرت زول؟ حصل زول إتعشم فيك وإنت قتلت عشمو؟ حصل زول وثق فيك وإنت م كنت قدر الثقة ؟
كما تدين تدان ي صحبي ، م ضروري نفس القصة بس نفس كمية الوجع🚶🏻‍♀💕

نتااااابع🚶🏻‍♀💕

#متلازمة_عشق
بقلمي:نهاد كمال
-١٦-
وقفنا الجزء الفات انو ملاذ اتصلت ل هند..
ملاذ:هننندد الححقي وين انتي ؟
هند:ي بت في شنو؟😳
ملاذ:نبييل ي هند نبيل
هند:ماالو في شنو؟؟؟
ملاذ:تعاالي الجامعة سرريع
*هند أعصابها كلها باظت مشت بأقصى سرعة عندها ع المواصلات ، كانت خايفة جداً، أول مرة قلبها ينقبض واول مرة تحس إنها بالجد ح تموت من القلق، حاولت تتصل ل ملاذ عشان تتطمن لقت نفسها نست تلفونها في البيت🤦🏻‍♀ من العجلة، اول م وصت جنب الجامعه دخلت وطوالي على كلية صيدلة☹️ بقت تفتش في نبيل ،شافت كمية من الناس متلمين عرفت إنو نبيل هناك، أول م وصلت لقت نبيل بضرب في واحد🤦🏻‍♀ وواقع فيهو كفوف والأولاد بحاولو يفكوهو بس نبيل رافض وبضرب فيهو بكل قوته.. هند م عرفت تعمل شنو ولا عارفة السبب البخلي نبيل بضرب الود كده بس بقت تزح في الناس وجرت نبيل من يدو، نبيل م كان عارف إنو دي هند لأنو م مركز أصلا أول ما حس إنو في زول جاريهو من يدو كان عاوز يضربو رفع يدو عاين لقاها هند طوالي هبط🙂 وفكا الود من يدو هند بقت تكورك في نبيل
هند:ده شنو ي نبيل؟ دي شنو أمور أولاد الشوارع دي؟ أنا جاية من هناك وقلبي مقطوع قايلة حاصلة ليك حاجة ألقاك تضرب في ود الناس كده؟
نبيل:هند انتي م فاهمة حاجة
هند:ولا عاوزة أفهم،
*في اللحظة دي الولد إنسحب برااحة والناس كلها مشت، هند زعلت جداً من منظر نبيل وهو بضرب في الولد بكل عنف وقسوة، ملاذ جات ل هند.
ملاذ:هند اخييرا جيتي بتصل ليك في تلفونك م قعد ترفعي
هند:نسيت تلفوني في البيت وي ريت لو م رجعتا زاتو
ملاذ:لاقيتي نبيل ؟.
هند:م تجيبي لي سيرتو، لقيتو بخبط في ولد ب طريقة قاسية شديد م حصل شفتو منفعل كده شاكلتو وجيت
ملاذ :لا إله ألا الله منك ي هند🤦🏻‍♀🤦🏻‍♀🤦🏻‍♀💔يخ إنتي أفهمي الحاصل أول
هند:مالك ي بت إنتي كمان
ملاذ:عارفة نبيل كان بضرب في الولد ل شنو؟
هند:لا، أنا بس جيت لقيتو بضرب فيهو
ملاذ:هند، أول م رجعتي إنتي ،نبيل جا سألني هند مالا وشكلها متضايق قمت حكيت ليهو ب عمايل البنات وتصرفاتهم وكلامهم معاك، مشى عشان يتكلم معاهم بالسياسة وقال ليهو لو قلتو كلمة وحدة في هند ح اطلع روحكم، قام الولد الضربو نبيل ده نظام بدافع للبت وقام بقى ينبذ فيك وقال ل نبيل:هند شنو الما تامة بت دي تحامي ليها كده ولا شكلك م قدرت عليها بالطريق الغلط قلت أغشها أتزوجها وأخد العاوزو وأرميها، نبيل م قدر يستحمل وطوالي وقع في الولد ضرب شديد ماف زول قدر يوقفو ، لو م جيتي إنتي يمكن كان قتلو، ظلمتي نبيل ي هند💔
*هند بعد سمعت الكلام إتضايقت من نفسها شديد وإنها م أدت نبيل فرصة يشرح ليها أو هو عمل كده ل شنو؟ م أدتو فرصة يبرر موقفو ،وطوالي رجعت تصلح الموقف..
*دايمأً خُت للزول البتحبو ألف سبب وألف عذر لما تشوفو غلط عليك او عمل حاجة ضايقتك ،أعمل حساب حبكم وحساب إنك م بتهون عليو💕
*أول م هند رجعت لقت نبيل قاعد في ركن وشايل تلفونو شكلو بتصل في رقمها وم عارفا نست تلفونا أول م قرربت منو وقالت..
هند:نبيل☹️
*نبيل وقف على حيلو وعيونو مليانة خوف
نبيل:هند، مالك م بترفعي قغد اتصل من قبيل..
هند:تلفوني نسيتو في البيت
نبيل:كنت عاوز اشوفك..
هند:نبيل انا بجد أسفة، أنا م أديتك فرصة تبرر لي إنت عملتا كده ليه☹️💔 طوالي بقيت بشاكل فيك، م ختيت إنو إنت ضربتو اكيد عشان في سبب
نبيل :هند ، خليك عارفة وواثقة آنا ك نبيل التجاني مستحيل ومن ساابع المستحيلات إني أزعل منك أو أتضايق بس انا م كنت عاوزك إنتي تفهميني غلط أو تأخدي عني فكرة
وما الولد بس ، أي زول يحاول يقول فيك مجرد حرف غلط أنا بسلب روحو عارفة بسلب روحو يعني شنو؟؟
هند :بتحبني ل الدرجة دي ي نبيل؟🙂
نبيل:وأكتر من كده ي هند، إنتي م قادرة تصدقي إنو إنتي بقيتي لي أيي شي♥️
هند:هسي م يكون جاتك حاجة☹️
نبيل:لالا ولا شي ، راجع البيت زاتو ناس أمي جايين الليلة
هند:اهاا ربنا يوصلهم بالسلامة ي رب
نبيل:امييين. يلا انتي زاتك م تتاخري أوصلك معاي
هند:لا أنا ح آمشي السوق وأرجع البيت بعداك
نبيل:م تتاخري ي هند م تتاخري
هند:حااضر يلا*بعدها نبيل فات بيتو، وهند مشت ل ملاذ..
هند:واي ي ملاذ كارهة نفسي☹️
ملاذ :انا زاتي شاماك😒 الود يحامي ليك وانتي جاية نافشة ريشك😒
هند:يخ انا م عارفة م قصدي والله
ملاذ:خلاص الحصل حصل
هند:عاوزة امشي السوق
ملاذ:تشتري شنو؟
هند:هدية ل نبيل
ملاذ:قروشك المحرقاك دي اديني ليها
هند:جادة انا 😂
ملاذ :خلاص كويس، خليني أتصل ل مؤمن أكلمو عشان م يسمعني محاضرة بعدين..
*ملاذ وهند فاتو السوق، وبالجهة التانية نبيل رجع البيت وبدل م يجهز البيت ل ناس أمو لقى ناس أمو جو ومنتظرنو..
نبيل:وووو فطووم🤤
فاطمة:ي ود ي قليل ادب😂 لكن فقدتك ي ولدي والله
نبيل:كتيير ياخ(وهو حاضن أمو) كيف صحتك نورتو البيت والله
*بعد شوية جات لميس ب ورا وهي بتكورك:نبيييبييل

نبيل:اووو لوسي ي جن
لميس:ياخ الشوق جننا
نبيل :والله كتيير ي عروستنا😉
لميس:بدينا التشغيلات😂🙈
فاطمة:كدي اقعدو ي

أولادي
نبيل:ابوي وين؟
فاطمة:ابوك ناس الشغل بريحو ي ولدي🙂 طوالي مشى المكتب
نبيل:اممم، ودي شنو الخطوبات الحاصلة دي
فاطمة:والله ده كمال ود عمك علي إتعابط فينا قال بس لميس دي، وبيني بينك ي ولدي كمال ولد م ساهل ماشاءالله عليو الوحيد ال لفت إنتباهي من اولاد عمك علي كلهم
نبيل:انتي عارفة ي أمي من لميس كلمتني عندي صحبي هناك خليتو يجيب لي اي تفصيل عن كمال وكل صغيرة وكبيرة عنو ، طلع ماشاءالله عليو والله ولا كلمة
فاطمة :الحمدلله ي ولدي، هسي جايين الاسبوع الجاي يعقدو والزفاف بعد م يمشي الكويت ويجي طبعا شغلو هناك، عشان يجهز ليها اوراقا ويسوقا معاو طوالي
نبيل:الكويت كمان والله لقيتيها ي لميس😂
لميس:كويس ي حقار، عقبالك كده
نبيل :الللله أحلى دعوة
فاطمة:اها ي ولدي قربت تتخرج انت عشان نعرس ليك طوالي
نبيل:انتي قنعانة مني ولا شنو ي امي😂
فاطمة:عاوزة افرح بيكم ، العمر م معروف ي ولدي
نبيل:بعد عمر ان شاء الله ي امي، بعدين العروس قااعدة بس خليني اتم السنة دي
لميس:دي منو دي؟ وتقرا وين؟ عندك صورتا؟
نبيل:هي ابردي😂 كلو بتعرفي *في اللحظة البتونس فيها نبيل مع أسرتو وهو مبسوط ،ملاذ بهناك تتصل ل مؤمن وم برفع الخط💔 قدر م إتصلت أبا يرفع وبترسل ليهو م بيرد ملاذ خافت شديد قامت إتصلت ل نبيل:
ملاذ:نبيل
نبيل:ايوة ي ملاذ خير؟.😳 هند جاتا حاجة؟؟.
ملاذ:ياخ هند نصيحة زي الحصان، انا عاوزة اطمن على مؤمن بتصل م برفع ،
نبيل:والله م عارفو طلعنا قبيل مع بعض وكان كويس
ملاذ:خلاص طمني عليو لما تعرف خبر
نبيل:ان شاء الله م تخافي
*من الحاجات البتخليك تتعلق أكتر الإهتمام، الإهتمام ده سيد الأدلة وسيد المواقف ، إهتم عشان تقدر تحتوي العلاقة💕
*جا الصباح وماف ايي خبر عن مؤمن، ملاذ مشت الصباح الجامعة ومن خوفها وقلقها ولا مشت كليتها طوالي على كلية مؤمن😐 بس م لقت ولا زول حتى نبيل ماف، قلبها أكلها بس ماف ولا حاجة تتطمنها
*أول مرة مؤمن يغيب عن الناس كده من غير سابق إنذار ،في النهاية ملاذ قالت تمشي ل نور اكيد ح تعرف هو مالو..


👇🏻
الأصعب من إنك تنهي أي علاقة كيف تقنع الطرف التاني إنك لسه محتاج للعلاقة دي😐💕
نتاااابع🚶🏻‍♀💕

#متلازمة_عشق
بقلمي نهاد كمال
-١٨-
*وقفنا المرة الفاتت في غياب مؤمن من غير حس ولا خبر، وملاذ من خوفها وتوترها قررت تمشي ل نور عسى ولعلى تلقى عندها خبر
ملاذ ماشة الشارع كلو وقلبها مقبوض ،إحساس الخوف الكان بتملكها م حست بيهو قبل كده، أول م حصلت بيت نور وقفت وبدت تدق في الباب.. بس كان المفاجأة إنو يفتح ليها الباب مؤمن زاتو🙂
ملاذ (وهي مصدومة) :مؤمن؟؟؟!😳 كيفك! كويس انت؟مالك م بترد علي؟ في شنو؟ الحاصل ، سألتا منك نبيل برضو قال م عارف عنك شي، طمني عنك (ودموعا جرت)
مؤمن:انا كويس ي ملاذ مافيني شي بس الامتحانات كبست وم قاري جيت ازاكر مع نور
ملاذ:امتحانات؟؟ياتو يوم القراية منعتك تتكلم معاي او تغيب عني بالصورة دي
مؤمن:دي امتحانات الفاينل ي ملاذ
ملاذ:مؤمن م تكذب، القصة م قصة امتحانات في حاجة مضايقاك انت
مؤمن(وبدأ يصرخ)ماف شي ي ملاذ ماف شي
*ملاذ اتخلعت من ردة فعل مؤمن وفي نفس الوقت م قدرت تصدق انو غاب يومين وم بيرد عليها بس عشان امتحانات..
ملاذ:مؤمن انت كويس؟😟
مؤمن:كويس ياخ كويس
*في اللحظة دي نور جات داخلة من جوة..
نور:ملاذ كيفك اتفضلي
ملاذ:لالا ماشة بس جيت أسألك من مؤمن وخلاص لقيتو
نور :اهاا، اي مؤمن جا يزاكر معاي واشرح ليهو وكده(وهي بترتجف)
ملاذ:كويس ربنا يوفقكم🙂
*وطوالي ملاذ طلعت وهي متضايقة وم قدرت تفهم موقف مؤمن والجابو ل نور شنو وليه هو بيعمل كده
طوالي رجعت البيت ودخلت الاوضة تبكي..
*ما إنت لو م قادر تخلي الطرف التاني جزء من مشاكلك وهمومك وضيقك، مافي داعي يكون موجود معاك وقت فرحك🙂💕
*نبيل بهناك كان خايف أكتر من الامتحانات وانو خلاص دي الامتحانات الفاينل ومنها يمشو السنة الاخيرة كان متوتر جدا في حين انو كان بيمر في كل امتحان ب سبب انو ود التجاني وابوهو ليهو سهم في الجامعة، بس لأول مرة يحس إنو عاوز يقرأ وعاوز يجتهد وينجح ب تعبو، عاوز يجرب إحساس تتعب عشان حاجة وتحصدها
*الامتحانات جات خلاص وهند طبعا بدت تظهر دورها ك حبيبة ل نبيل وتجتهد معاو، ومن ناحية ملاذ عايشة نفسيات 🙂💔كل م هند تقرب عشان تسألها ملاذ كانت بتتهرب وم بتجاوب عليها،
*ملاذ من يوم لاقت مؤمن في بيت نور تاني م سمعت صوتو ولا رسالة منو، ختت في راسها بالجد انو هو خايف عشان الامتحانات واحسن م تشغلو بس كمان قلبها كان رافض الحتة دي وكيف تخلي مؤمن في ظروف زي دي..
*أول يوم إمتحان ل طلبة صيدلة كان الأحد، نشوف نبيل وهند :
هند:زاكرت تمام ي نبيل؟
نبيل:اي والله اول مرة اتعب ف امتحان زاتو😂
هند:لازم ي نبيل من هنا ول قدام تجتهد وتتعب عشان تحس ب طعم النجاح عشان تشوف الفرحة الح تعيشها وقت تظهر نتيجة سهرك
نبيل:ان شاء الله ي هند أصلا قعد أعمل ده كلو عشانك وعشان أجي أخدك ل عندي ♥️
هند:هسي خلي الكلام الكتير وتم باقي قرايتك لكن م تساهر عشان ح اصحيك بدري تراجع
نبيل:اااخ التشغيلات ح تبدا😂
هند:اااي وم ح نتكلم كتير لما تخلص امتحانات
نبيل:الله يخ خلاص طيب يلا
هند:الله معاك دعواتي ليك ♥️
*هند قفلت من نبيل وعاينت ل ملاذ ملامحها باهتة وساكتة وشاردة طول الوقت أكل زي الناس م بتأكل..
هند :ي بت مصرة تكوني كده انتي؟
ملاذ:مالي؟ كويسة انا
هند:ح تحكي مؤمن مالو ولا كيف؟
ملاذ :والله ي هند انا زاتي م عارفاو، بس عاوزة فترة امتحاناتو دي تعدي واتفاهم معاو م عاوزة اعمل ليو ضغط.
هند:ي رب خير، م تشيلي هم فترة وبتعدي بس تصرفي معاو عادي
ملاذ:م لاقياهو اصلا، واتس م بخش تلفونو مقفول طبيعي
هند:شيلي الصبر كلو برجع زي الاول واحسن كمان هسي بكرة ح ينزل الامتحان لاقيهو واتكلمي معاو بس م تجيبي ليو اي سيرة اسأليهو عادي اشتغلت كيف وكده
ملاذ:ان شاء الله طيب انا نعست ل بكرة
هند:خلاص كويسة
*جات الساعه4ص منبه هند ضرب ، صحت مخلوعة وبين نعسانة وم مجمعة اتصلت ل نبيل عشان تصحيهو يراجع
هند(بصوت نعسان وتعبان):نبيل يلا قوم راجع حبة
نبيل(وهو نعسان) :اممم طيب
*كانت اول مرة نبيل يقوم يزاكر عشان امتحان وكمان الصباح بدري،هند قدرت تغير نبيل في نفسو وحياتو أول قدرت تخلي يحب حاجات عمرو م حباها ويتعلق ب حاجات م كان بطيقها وتصرفاتو تتغير للأحسن.
*لو م حبيت الإنسان البخليك تشوف نفسك أول ويوريك قيمتك، عمرك م تقول إنك حبيت💕
*الصباح على غير العادة نبيل قام نشيط وإستحما بدري وشرب الشاي ، وهو طالع باس راس أمو وأخد دعواتا وطلع،
لميس وأمو وأبوه أول مرة يشوفو نبيل متحمس عشان إمتحان، نبيل البكره يشوف كتاب أصلا ولا شيت، الليلة قام بكل نشاطو عشان الامتحان بس هو قام عشان في زول ختا فيهو ثقة عمياء زول حلم معاهو حياة تانية وم ح يقدر يكسرو♥️
*أول م نبيل وصل الجامعه عاين ل شلتو ماف زول جا طوالي إتصل ل نور
نور:اسسسسممررري
نبيل:نوري♥️ويين انتو يخ الإمتحان ده مواعيدو كبست
نور:لحظة انت جيت الجامعة؟.
نبيل:اي جيت وهسي منتظركم

نور:نبيل حاسي ب شنو من متين بتجي بدري لإمتحان😂
نبيل:ممكن تخلي كلامك ده ل بعدين وتتخارجو تجو
نور:خلاص جاية
نبيل:مؤمن معاك؟.
نور