قصيدة في ليلة الوداع ليلة العاشر من محرم


يا ليلة الوداع. رحمينـي وتـمـهّـلي
يا ليلة الوداع. محتاجه اودع هلي
.......................

آنه زينب والسبي قرّب عليّه
هذه آخر ليله وي اهل الحميه
باجر يذبحون اخوتي عله الوطيّه
باجر يسموني مو زينب سبيّه
اتحسّس الضياع. من يبقه باجر الي
يا ليــلة الـــوداع. محتاجه اودع هلي
.....................

آنه ويّه حسين عمري كلّه جبته
هوه اخويه وتاج راسي وانه اخته
شلون لو باچر عله التربان شفته
بلايه راس وتسحگ الخيل عله جثّته
بعيوني انطباع وجه الحسين الولي
يا ليلة الــوداع. محتاجه اودع هلي
......................

رحمي يا ليلة العاشر رحمي حالي
مو فقط ليلة ردت منّچ ليالي
حته أشبع شوف من اغله الغوالي
حسين أبو السجاد هذا وقدره عالي
عن آخر جتماع هالقصّه ياسائلي
يا ليلة الــوداع. محتاجه اودع هلي
...................

بعد عندي اوداع وي بدر العشيره
كافلي العباس ما يكفلني غيره
عالنهر باجر يطيح شلون حيره
من اميره بجاله اتحوّل اسيره
لو غدروا الشجاع. اعني الگمر كافلي
يا ليلة الــــــوداع. محتاجه اودع هلي
...................

بالله يا ليلة العاشر لا ترحلين
ما اريد افگد يليله اغله الاثنين
ما بقوا وياي بس عباس وحسين
وين انطي الوجه بغياب اخوتي وين
مو كافي افتجاع. گلبي بحزن مبتلي
يا ليلة الــــــوداع. محتاجه أودع هلي

سيد زيد الفحام
__________________________

#قصائد_الامام الحسين ع


على التل الزينبي - ويه زينب نوكف احنه نصيح عباس
على التل الزينبي - نصيح ياعـــــــــباس وينك حزو الراس

حركو اعليهه المخيم يابو فاضل بيهه تعلم
...........................1

بينك وبين المخيم تل مصايب لو تراقب طاح الحسين
طاح عطشان وينادي ماتجينه الماي وينه وتسكي كلبين
وكلب يمن من يشوفك كلب ظامي وكلب دامي وكلب نصين

على التل الزينبي شلون تكدر تنظرلنه وسهم بالعين
على التل الزينبي شمس وكفت هاي زينب تندب حسين

على شمسك ليل خيم يابوفاضل بيهه تعلم
..............2
جبل فوك التل عجيبه نور زينب يضوي كوكب شمعة احساس
ماتطفيهه النوايب اسم زينب علم يكتب (بين الاقواس)
راية العباس زينب معنى اسمهه اليفتهمهه فقط عباس

على التل الزينبي بعين كلبه المهدي ينظر صاح جداه
على التل الزينبي من محاجر عينه خضب خده بدماه

دمعه تحجي ودمعه تنظم يابوفاضل بيهه تعلم
....................3
ليش زينب يابو فاضل عافت التل ليش نسأل ركضت بخوف
ترفع بكل خطوه رايه خطوه لوعه وخطوه دمعه تسكي الطفوف
فوك جسم حسين طاحت مثل جفك زينب اختك طاحت انشوف


على التل الزينبي جود جنه التل تبده وزينب الماي
على التل الزينبي ركض يم حسين سالت تعلم بهاي

كلب زينب من تألم يابوفاضل بيهه تعلم
....................4
عليك ظهر حسين محني شكبر كسره ومن يجبره يابو فاضل
انكسر ظهر الحره زينب لبو اليمه من تشمه ودمه سايل
اتلمست جرح المثلث صاحت افزع خويه ارجع لاتطاول

على التل الزينبي بين نار خيام تلهب بين الحسين
على التل الزينبي بلصفا وللمروه اسعه بين جفين

تقبل الجف التوسم يابوفاضل بيهه تعلم
.......................5
على صدر حسين صاعد شمر لازم سيفه عازم يكطع الراس
للنهر متوجهه زينب تكول وينك فكهه عينك خويه عباس
خويه يلجم جرح صدره ويحز نحره بعيني انظره ونار الانفاس

على التل الزينبي تنتظر زينب يكافل منك جواب
على التل الزينبي تشيل عبدالله سكينه وجرحه ماطاب

دمع سكنه اعليك من دم يابوفاضل بيهه تعلم
..................
حيدر موسى الرميثي

اجرك الله ياصاحب الزمان بمصاب جدك سيد الشهداء اباعبدالله الحسين(عليه السلام)
عاشوراء مصيبة ما أعظمها وأعظم رزيتها في الإسلام وفي جميع أهل السموات والارض فلا يُومْ كَيَوّمِكَ يا أَبا عَبدالله

أعظم الله أجورنا وأجوركم بهذا المصاب العظيم

يا حسرة الفاكد اخو وبالشده يلزم ظهره
والعاش عمره بلا اخو هم يضن عايش عمره
عاتبت التراب بفراك الاحباب
*
ما الومن حسرته الفاكد اخيه
هو شيعوض الاخو الكله حميه
اثنين جنه وحلوه كعدتنه سويه
راح اخيي ولزمت ظهري بديه

ابن امي تكتل فركته وعذبني حيل اغيابه
ما اكدر انسه صورته وشكد نطرت ابابه
ومكابل الباب بفراك الاحباب
*
اصفن واذكر عشرته وذيج الايام
وهو اليفارك اخوه هم يكدر اينام
راح اخيي والزمن مدري الي شضام
شحصلت لمن دفنته غير الالام

ياجرح المفارك اخو كلي العتب شيفيده
ويعينه الله ياخلك الدافن اخيه بأيده
كاتلني الغياب بفراك الاحباب
****
راح اخوي الجان يسري وي الانفاس
انحنيت بفركه وصار ابيض الراس
عازته عازه الاخو تدرون ياناس
راح عني الحسن لاجن باقي عباس

كتله بعد راح الحسن ومحني الظهر خلاني
عباس خلينه سوه واحد يحن للثاني
وبكلبي الصواب بفراك الاحباب
****
يا ابوفاضل مالي غيرك بعد تدري
انته اخوي وانته عمري وانته ذخري
خويه خاف تعوفني وتكسرلي ظهري
وتدري بفراكك يبين خويه كسري

عباس فاركني الحسن وشيبني خويه بفكده
وظليت بس انته الي وماعندي غيرك بعده
حتى الرمش شاب بفراك الاحباب
*
راح عن خوتنه اخبرك ياضوه العين
حلوه خوتنه ومثلها تنلكي وين
جنه انه والحسن خويه احله أثنين
خويه كل عمره الحسن ما فارك حسين

جنه لمن نمشي سوه مشيتنه يا محلاها
وذيج السوالف عالاخو عباس سولفناها
جرحي فلا طاب بفراك الاحباب

تدري جان اشكد حنين الحسن وياي
وجان بيد من اعطش ايشربني ألماي
دوم يحضني ويشم بمنحري اهواي
وجان اخوي من الشمس ايسوي الي افياي

كلي تره بطف كربله اخيول عشره تسحكك
وصدرك يخويه ينخسف وشمس الظهاري تحركك
وياعظم المصاب بفراك الاحباب
***
تمت
#ميثم العمري

لستشهاد فاطمة الزهراء ع

سﻻم الله على الضلع التهشم
سﻻم الله على البسمار والدم
جروح تواسي بجروح
يتيمه وحايره الروح
سﻻم الله على البسمار والدم

////////////

جروحي ماهدت لحظه اعله فركاج
يريت آنه رحت ياروحي وياج
اصد للباب تنزف دمه بفركاج
وتون وكت اليمر اعليهه طرواج

سﻻم الله على الباب وألمهه
سﻻم الله اعله كل حرف بأسمهه
بقت محتاره بالنوح
جروح تواسي بجروح
سﻻم الله على البسمار والدم

////////////

اشوف الدار اشاهد عتبه الدار
حرك دم وسواده باقيه اثار
طحت يمهه اعله حيلي بحيره افكار
اواكع وياي اويلي بسدي بسمار

سﻻم الله على اﻻثار كلهه
سﻻم الله على الدار واهلهه
الحزن من عدهم يفوح
جروح تواسي بجروح
سﻻم الله على البسمار والدم

////////////

دخلت البيت اشاهد فقط ذكره
على الحايط شفت اثار عصره
عثر گلبي وطحت من غير عثره
تأملت واحس جن صوت سطره

سﻻم الله على المسطور خدهه
سﻻم الله الوحدهه وكلهه ضدهه
اسمهه نشوفه عالوح
جروح تواسي بجروح
سﻻم الله على البسمار والدم

////////////

عطر ظيم وحزن بنفاسي شميت
وشنو اكثر اشوف بهمي ناديت
اموت وﻻ اضل بالحاله ياريت
شفت صوره طفل مذبوح بالبيت

سﻻم الله على الكاع الحضنهه
سﻻم الله على المحسن ابنهه
سكط بس ﻻعب السوح
جروح تواسي بجروح
سﻻم الله على البسمار والدم

///////////

الحسن وحسين احسهم جن ينادون
ييمه فراك عينج تعمه العيون
وحس زينب يتيمه ادك عله اموتون
الگلب والروح يمه وياج يردون

سﻻم الله اعله همهم وي اﻻحزان
سﻻم الله عليهم وين ماجان
رسمهم مني ميروح
جروح تواسي بجروح
سﻻم الله على البسمار والدم

//////////

ابو الحسنين اشوف ادموعه تجري
وينادي يالزجيه انكسر ظهري
عليي هين لون فاكدلي عمري
وﻻ ابقه وحيد ابين دهري

سﻻم الله على اﻻيام وياج
سﻻم الله على ذكرج وطرواج
اضل كل عمري مجروح
جروح تواسي بجروح
سﻻم الله عل البسمار والدم

////////////
الي ثار وارد باجر ييمه
حشه تنزل على الظلموج رحمه
الضلع ما انسه ابد هيهات دمه
اضمده بثاري يايمه واضمه

سﻻم الله عليج بكد مغيبي
سﻻم الله على ظيمي ونحيبي
اضل بالغيبه مذبوح
جروح تواسي بجروح
سﻻم الله على البسمار والدم



خادم الزهراء
ليث كرار الموالي

للتواصل مع خادم الحسين ع خادمكم ملا مصطفى الكربلائي على هذا المعرف
@MlleMastafa

أبوذيات لمناسبة ولادة الإمام المهدي المنتظر عجل الله تعالى فرجه الشريف
🌻🌻🌻🌻🌻🌻🌻🌻🌻
أسلم عالنبي بذكرك / وصلي
يمهدي ولا خبر منك / وصلّي
هم يوم ويجي وأوكف/وأصلي
صلاة العشگ ياروح الزچيه...
💐💐💐💐💐💐💐💐💐
يمهدي بالعشگ ذايب/تره آنه
وعلى أوتار المحب گلبي/ترنه
يمن ما ننظرك وأنته / ترانه
شوكت نتلاگه وأهديلك هديه...
💐💐💐💐💐💐💐💐💐
زال الحزن من گلبي/وآلامه
ورد والياس أجمعله / ولمه
تهاني أبعث لبو المهدي/ولمه
ولجده المصطفى وحامي الحميه...
💐💐💐💐💐💐💐💐💐
من عالم الذر عشگك /والآ زال
ويظل گلبي ألك مخلص/ولا يزل
أنه أمتانيك عالموعد /ولا زال
أظل منتظرك الحد المنيه...
💐💐💐💐💐💐💐💐💐
ليل أنهار أصيح أسمه/وأنده به
بصلاة الليل أذكرنه / وأندبه
ودعاء الفرج أقراله / وندبه
وأزوره بكل صباح وكل مسيه...
💐💐💐💐💐💐💐💐💐
شكثر للمهدي ناديته/وصحتله
ألنه مغيمه الدنيا / وصّحت له
مايظهر بعد گالوا/وصحت لا
مايخلف وعد حاشه عليه...
💐💐💐💐💐💐💐💐💐
چم عاذل يضد بينه / ولا يم
وگالوا لا شهر يطلع/ ولا يوم
وگلت لابد إله ساعه/وأله يوم
يجي ويفكس عيون الناصبيه...
💐💐💐💐💐💐💐💐💐
يمهدي الدنيا بالظلمات/ماجت
ورسالة من جنابك ألنه/ماجت
أجت كل الجمع جمعتك/ماجت
تأخرت جمعتك يابو الحميه...
🌻🌻🌻🌻🌻🌻🌻🌻🌻
الشاعر(أسعد قاسم الگريعاوي)

موشح للأمام علي عليه السلام (( والدك يحسين ))

والدك يحسين ... طبروا راسه
اليوم بالگوه يجر انفاسه

لايفك عينه ولاشم الهوه
ولايفيد اضماد راسه ولادوه
والمساجد راح من عدهه الضوه
صبحت تلطم احبابه وناسه
والدك يحسين ... طبروا راسه

صبحت يحسين تلطم شيعته
والدك دمه يبس بعمامته
من يفك عينه تلچمه طبرته
طاح دين الله وتهدم ساسه
والدك يحسين ... طبروا راسه

طاح ساس الدين والناعي نعه
اليوم عالشيعه مصيبه وفاجعه
ايودع اعياله علي وتوادعه
ماگدر يكسر الليله انعاسه
والدك يحسين ... طبروا راسه

ماگدر يكسر انعاسه ولاينام
راسه مطبور ويون گوه الامام
اشلون يتجسر عليه ابن الحرام
هاذه حيدر ضيغم الفراسه
والدك يحسين ... طبروا راسه

هاذه ابو الحملات جيدوم الحرب
اشلون بالسيف اعله راسه ينضرب
مو سهل يومه صعب فوگ الصعب
يوجع اغيابه وكلف مقياسه
والدك يحسين ... طبروا راسه

يوم ابو الحملات يوجعنه وجع
بيش مطلوبه العقيله وتنفجع
چم نحر باچر تشوفه ينگطع
والشفيه يروح درعه وطاسه
والدك يحسين ... طبروا راسه

باچر يطيح الشفيه عالنهر
زينب اخلافه يشبعوها قهر
لليسر والشام ياخذهه الدهر
والضعن خولي وشمر حراسه
والدك يحسين ... طبروا راسه

لشاعرة اهل البيت
ام هجران العمارچية
غير مبري الذمه من يمسح اسم الشاعره او ينسب الرثاء لشخص اخر

لشاعر الحسيني ظاهر حبيب الهليجي (للامام علي ع)

فجر الرزيه البنت الزجيه
بيه إيتصوب حامي الحميه
*
فجـر النـايبـه بـزينب فـلا تــرحم
جرح أمها بعدها الهسه تتهظم
تردلـها بـجرح ثـانـي ابن مـلجم
كتاب الله علي هامه يفيض بدم
تصبح يتيمه هاي الهضيمه
تجري المدامع صبح ومسيه
*
زينـب تـنـتـظـر والـدمعه سجـابــه
تأخـر مـا رجـع وإعليه مرتـابـه
جن تعلم بعد فرض الصله إمصابـه
علي يرجـع لجن ايعـود بخضـابـه
رادة اجلها وصبح املها
ويه ابوها كون المنيه
*

عليها لا تـمر ياعيد منفجعـه
أبن ملجم طبر ديـن النبي وشرعه
بشهر رمضان وسفه تفطر بدمعــه
ولتــراب الـمنـيـه حـيـدر تــودعــــه
بعده المصيبه حرمه و غريبه
بعاشر محرم بل غاضريه
*
بأهات ومدامع لـوطلع صبحــك
مثل وحشي بكلب زينب تحط رمحك
بدليل الطاهره بحسره يظل جرحــك
طاوعت السقيفه وحصلت ربحـــــك
يا أبن ملجم ربحك جهنم
وهذا قراره رب البريه
*
زمان الي اخـذ امهـه إشبگه عدهه
يرد والنوب ياخذ منها والـدهــه
ابوها ألي بحنـانه وطيبه عـودهه
لون احمر مسيل الم عله خدهه
الراعي اليتامه تبقه علامه
من دم لبوها بخد الابيه

16 رمضان المبارك 1444

بحق مسلم ابن عقيل //ع //على لسان حميده



اقره بعيونك سفر والجرح بيّه كُبر
الينتظر جيّة محب نار انتظاره
بويه سولفلي ابخبر هاي السفاره
*÷÷÷÷÷÷÷÷÷*÷÷÷÷÷÷÷÷÷÷÷*

امودع الله ودعوتي ايصير التريده
اليدعي لحبابه العلي ميرجع ايده
بويه گلي ابسفرتك يمكن بعيده
خايفه ابطول الهجر تنسه حميده

تجرح سنين البعد ازرع لجيتك ورد
گلي ارجع واحفظ ابگلبي البشاره
*÷÷÷÷÷÷÷÷÷÷*÷÷÷÷÷÷÷÷÷*

صعبه تهمل ددمعتي بشوگ ابتعادك
لغربه رايح والبلد ماچن بلادك
انتظر جيتك واحن واذكر ودادك
اسجد لربي شكر لو ليّه عادك

غيبة الوالد حزن ابقه بغيابك احن
تدري بالخاطر صعب مر انكساره
*÷÷÷÷÷÷÷÷÷÷*÷÷÷÷÷÷÷÷÷*

تمشي وابقه بغيبتك شوفي أديره
فجئه راحل والسفر معرف مصيره
يا كبر جرح الابو واني زغيره
خاطري وگلبي انكسر كسره چبيره

اتودع ودمعك يصب چنك ابسفرة حرب
حيلي هدّمته ودمع جفني ايتجاره
*÷÷÷÷÷÷÷÷÷÷*÷÷÷÷÷÷÷÷÷÷*

تدري طفله وخايفه ايغيبك زماني
انته شمعة ناظري وحبي وحناني
ابهذا عمري وماتت ابروحي الاماني
بعدك اگبالي وألم حزنك غزاني

حايره وغاب الامل دمْعِتي صارتلي حل
ابعيني خليت السمه يسود نهاره
*÷÷÷÷÷÷÷÷÷÷÷*÷÷÷÷÷÷÷÷*

روحي يالغالي تره فگدت املهه
غايب وچنك أبد ما ترجع الهه
دنيتي من الهجر اجزع واملهه
ترخص الدمعه وعلى اخدودي اهلهه

تنطفي شموع العمر وانتظر طيفك يمر
جاوب بكلمت عطف وانطق عباره
*÷÷÷÷÷÷÷÷÷=*÷÷÷÷÷÷÷÷÷÷÷*

ادري اخلصنه العمر عِشره اويه نوحي
وادري بوداعك تضل ملهوفه روحي
مرسه اصيرن للحزن واغفه بجروحي
بويه حسيت السفر موّت طموحي

احلم ايمرني الفرح والگلب بيك انجرح
اليفگد الحب والعطف عمره خساره
*÷÷÷÷÷÷÷÷÷÷*÷÷÷÷÷÷÷÷÷*

✍بقلم خادم الحسين ع
الشاعر رعد الچريخي

السلام عليكم ورحمة الله وبركاته

إخواني خدمة الإمام الحسين (ع) سيتم تنزيل برنامج محرم الحرام لهذا العام ابتدأ من يوم غدا الأحد أن شاء الله

للتواصل أو لطلب القصائد أو التلحين عبر الرابط الآتي
@MlleMastafa