#قصيدة_هلاليه

كل محرم بيدي أعلك رايه ..
وكلبي يخفك لو سمع بقرايه ..
هلال شهرك من يهل .. يشّيب بحزنه الطفل
وكلبي يخفك لو سمع بقرايه ..
............................
شما أدك زنجيل أحس روحي تذوب ..
وأنفض بكل دكه عن صدري الذنوب ..
وغير الاسود أبد مايحلالي ثوب ..
حسين شمس الله الفلا شافت غروب ..
كل سنه لعاشور يجدد حزن ..
لمٌن الرادوود يقره وياه أوٌن ..
دمع عيني ينهمل .. يشيب بحزنه الطفل
وكلبي يخفك لوسمع بقرايه ..
.................................
نسأل الله نعمة الخدمه تدوم ..
خدمة حسين وعلي تزيح الهموم ..
مثل ما رمضان واجب بي نصوم ..
صدورنه بشهر اللطم تجري دموم ..
كل محرم تنزل دموع الوفه ..
وجفني بالعاشر أبد لا ماغفه ..
من اللطم لا ما أمل .. يشيب بحزنه الطفل
وكلبي يخفك لو سمع بقرايه ..
................................
اليوم أفلاك السمه تعلن حداد ..
والكواكب والكمر لبسن سواد ..
هذا شهر حسين هل علينه عاد ..
حسين عَبره حسين عِبره للعباد ..
وزينب بحبل السبي مرهونه ..
والخدر عالكمر دار عيونه ..
والله ياناس الحبل .. يشيب بحزنه الطفل
وكلبي يخفك لو سمع بقرايه ..
........................
استقبلت شهر المآسي والعذاب ..
وعشت مأساة العقيله والرباب ..
وخدالحسين التعفر بالتراب ..
وأبو الغيره الوزٌع أجفوفه ثواب ..
والهواشم ظلت بلا والي ..
شما اشوفن نار تتراوالي ..
وسط كلبي تشتعل .. يشيب بحزنه الطفل
وكلبي يخفك لو سمع بقرايه ..
..........................
بهالشهر أحزاني و آهاتي تطول ..
لأن دامي ومنذبح روح الرسول ..
وجسمه عاري وتسحك بصدره الخيول ..
آه يحسين ومصابه أصرخ وأكول ..
والاصابع تسعه صارن بيده ..
وخنصره المكطوع ياهو يعيده ..
العشره ماظن تكتمل .. يشيب بحزنه الطفل
وكلبي يخفك لو سمع بقرايه ..
............................
اله مرفوع العزاء بهالشهر ..
وحاضر ويانه الامام المنتظر ..
عن مجالسنه ولا مره أعتذر ..
والمدامع حفرن على الخد نهر ..
نعيش وياه بمرارات المصاب ..
نكله أظهر سيدي كافي غياب ..
غيبتك ما تنحمل .. يشيب بحزنه الطفل
وكلبي يخفك لو سمع بقرايه ..
........................................
حيدر مطر العبادي

#هلاليه
كلها يحسين بمحرم شدت احزام
نحسب احساب الخدمتك كمنه كل عام
******
احنه حبيناك مو لجل غايه
وسيدي للموت احنه وفايه
كل سنه بعاشور نرفع الرايه
نلطم ولجلك ننصب اقرايه

هاي الايام وغلاتك اجمل ايام
كلها يحسين بمحرم شدت احزام
*
خادمك يحسين دوم تدعيله
ومن يميل الكون جفك ايشيله
المهدي ويانه الليله شد حيله
وصاح ابو الموكب جيبو زنجيله

وصار رادود القصيده الليله جسام
كلها يحسين بمحرم شدت احزام
****
سيدي تعبك هوه راحتنه
كون تتقبل منه خدمتنه
كل سنه بسمك تعله صيحتنه
والمجالس هاي هيه ربتنه

اليوم جم عابس صحت بمحبتك هام
كلها يحسين بمحرم شدت احزام
**


اشما تمر اسنين احنه نبقه وياك
صحنه لو للموت والله ما ننساك
يا عمود الدين بدمنه بايعناك
انته مبدئنه وخاسر العاداك

بيك حكه خادمك من يرفع الهام
كلها يحسين بخدمتك شدت احزام
*
حلوه خدمتنه ونفتخر بيها
وتتعب الرجلين ما نخليها
لجلك الارواح احنه نفديها
والمئاتم هاي دوم نحييها
وتدري يحسين اليحب ما يكدر اينام
كلها يحسين بمحرم شدت احزام
*
هالسنه يحسين كلها متحضره
هذا الي ايعزيك وذاك الك يقره
مجلسك مولاي ينحسب ثوره
ورحبت بالناس فاطمه الزهره

احنه خدام ونظل للموت خدام
كلها يحسين بمحرم شدت احزام
*
تمت
تحسين الخفاجي

محـرم 1443هـ

( ام البنين ع )

ضحيتلك ولدي اربعـه .. تاليك جـثه مگـطعه
لبالي سالـم ترجـع .. لنـك وذر بالمصرع
……………………………
ربـيت ولـدي الاربعـه الخـدمتـك والحـبك
وغذيتهم غيره ووفه يموتون كون بدربك
يحسين علمت الولـد يرحون فدوه الگلبك
خالقـهم الله النصرتك هيچـي ارادت ربك

انطاني ربك منزله .. لجلك اضحي بكربله
فدوه بنيني الاربع .. لنك وذر بالمصرع
……………………………
وصيتـهم گبل السفر يبيضون وجـهي عـندك
يلـزمون ظـهرك بالحـرب ممنوع تبقـه لوحدك
ناس الي طلبت نصرتك بالكوفه تصبح ضدك
يخـونـوك ادري بكربلـه الخـانـو ابـوك وجـدك

وصيت يحسين الولـد .. للموت لجلك تستعـد
بالخطر چنت اتوقع .. لنك وذر بالمصرع
……………………………
وصيت ابني وهـيبتي عـباس غيرت حـيدر
للمـوت گـتلـه بكـربلـه دون الحـسين اتحـظر
ويايمـه ابـشـري گـال الي افديـه بهذا المنحر
مادام اشم اني الهوه عله حسين محد يجسر

وادري الگمر گول وفعل .. هذا النفل وابن النفل
عله اطباع ابوه امطبع .. لنك وذر بالمصرع
……………………………
ولن الخبر من كربله جـابه بن حذلم ينعه
يا اهل يثـرب فاجعـه تحضرولـها بالدمعـه
ابكربله حسين انذبح وذبحو اخوته وربعه
تمنيت اناْ بهذا الخبر طمتني كـون السبعه

هد حيلي يحسين الخبر .. گالولي ضل جسمك وذر
معقوله هذا الاسمع .. لنك وذر بالمصرع
……………………………

تمنيت ميته ولا اجـه بهـذا الخـبر بـن حـذلم
مذبوح راسك من گـفه والگـاع فاضت بالدم
وصدرك حوافر سحگته بخيل اعوجيه تهشم
هذا الاسمعنـه صدگ لـو وهـم لــو اني احـلم

يحسن من عگب الذبح .. راسك يشيلونه برمح
وفوگ الثره اموزع .. لنك وذر بالمصرع
……………………………

ذبحـوك يابعـد الگـلب وزينب مشـو يسبـوها
بالنـار يحسين العــده خـيام الستر حرگـوها
وسكينه چتفوها بحبل شماصاحت يضربوها
وبنتك رقيه عله الجمر حافي شكثر ركضوها

حرگوها يحسين الخيم .. وچتفوها كل ذيچ الحرم
وماصح ولي الهن يفزع .. لنك وذر بالمصرع

الشاعر عقيل الحسناوي..

القناه بحاجة الى ادمن لحذف اليستات فقط
الي عندة امكانية لايقصر جزاكم الله خيرا التواصل مع @MlleMastafa

هاي دنيه ولا تأمن بيها
شما تٌطِوٌلَ للگبر تاليها

يابن آدم احذر من الدنيه زين
اشكثر تملك فارغه تروح الادين
گبلك اجيال الي عاشت هسه وين
موته وتراب الثرى مغطيها

بقوتك لا تنغر وكثر العمام
وتنخدع عبالك تعيش الف عام
ترى باچر باالگبر وحدك تنام
وتنفرد بعمال الي مسويها

خلي نفسك دوم جاهز للسفر
هاالمصير الحتمي ما منه مفر
أنظرالموت المفاجئ هاالكثر
توقع بأي لحضه ترحل بيها

لاتأذي الناس،، لا تظلم بشر
صاحب الباطل (زغير) اشما كبر!!
الرايد ينول الكرامه والفخر
احچاية الحگ كل وكت يحچيها

تمسك باأل الرسول بكل وكت
قدوه خليهم الك لو سولفت
جنازتك خليها باچر لو متت
البشر تترحم الراعيها

خلي ناسك تذكرك باالطيبات
ترى الذكر الزين ينفع باالممات
الموت واجب لكن اترك ذكريات
طيبه كون اوادمك ترويها


#سعدالعبودي

(( ثلاث دگات ))

مخطوف وجهي من الخطر واترقبه يعود
مو من حساباتي أظل لا رايه لا جود

ا~~~~~~~~~~ا

لوليته بحضاني شكثر وبزغره اناغيه
ميضيع تعبي بكربله يوافيني ادريه
يخليني بعيونه مثل ما چنت أخليه
هذا الوفي هذا الأبي الما يخلف وعود

ا~~~~~~~~~~ا

توجهت ليه بدمعتي ووياي الزغار
زينب انه يابو الفضل گال أمرچ وصار
يم الخدر يم الخدر لتهمچ أخطار
انه كفيلج والخدر وياي معهود

ا~~~~~~~~~~ا

راح وبقيت اتنطره لحظات، ساعات
لا هوه لا جوده رجع لا شفت رايات
معقوله يا أهل الخدر حامي الخدر مات
جا وينه عني شعطله لو جان موجود

ا~~~~~~~~~~ا

لكلشي بحياتي حسبت بالحكمه والراي
لكن ابالي ما خِطر انظر بعيناي
وحده الحسين من النهر صوب الخيم جاي
شفنه وكسر كلبي السبط دمعاته متهود

ا~~~~~~~~~~ا

معقوله ما يرجع بعد خلانه بالياس
حامي الضعينه بطيحته تتشمت الناس
متعودين بكل خطر نصرخ يعباس
لحگ علينا يالوفي يا صاحب الزود

الشاعر #مصطفى_الشافعي .

باجر يمي ايذبحونه / حتى اثيابه ايسلبونه
وراسه الفوك ايرفعونه / وعيونه اتصد عليه
***************
باجر يذبحون الولي وبعيوني اشوف المصرع
يامله يادين اوشرع يذبحون حتى اليرضع
وعبد الله منهم ماسلم تمنيت حيدر يرجع
بس الصده من اصرخ يرد والناس ماجن تسمع

مرجعهم شمر اوخولي / بصياط التمو حولي
صبرا يازينب كلي / وعيونه اتصد عليه
****************
باجر يدوسون الصدر وخيولهم ماترحم
بالحافر اجلب الوذر اويطشر اويها الدم
وظلوعك المتهشمه اسمع كسرها اوتلتم
صدرك اتكسر بالسحك ولحيل راح اتهدم

عيونك صدن لعيوني / لاتسال خويه شلوني
كبالك خويه ايضربوني / وعيونه اتصد عليه
************

باجر اشوف الماشفت اكبالي العده يذبحونك
مجتوفه يمك ياترف عيني تصد لعيونك
ذاك ابحجر راسك شمر برماح ويطعنونك
التمو عليه من كل كتر عطشان ميرحمونك

هاي اوصييه من الزهره / كالت شمي من نحره
ادري بهاي اخر نظره / وعيونه اتصد عليه
**********

ظلو الماعدهم رحم يحدون باجر بينه
وحنه بنات اوبل غرب بس الله عينه علينه
ولكمر طايح علنهر اوسهم المنيه ابعينه
ياربي انظر حالتي بين الغرب ظلينه

يابلسم جرحي اوخدري من السوط ازرق ظهري
ماينشف دمعي اليجري وعيونه اتصد عليه
************
ياخويه باجر على الهزل اختك ترد مسبيه
وحشه يظل درب السبي ومن الهظم محنيه
من التفت راسك شفت يحجي اويسولف بيه
ويرتل ايات الحمد دم يبجي عينه اربيه

ياخدري وكل احلامي/ عطشان اوكلبك ضامي
حزو راسه اوكدامي / وعيونه اتصد عليه
************

جنت انه شيخه امدلله وماشاف واحد ظلي
وهسه اسيره امكيده ياعيني حكج هلي
جان الكمر مثل الهوه ونفاس روحي اوخلي
كالو صريع على النهر اسيوف علئ نحره اتصلي

كالو مكطوعه جفوفه / مشتاكه عيوني اتشوفه
لشوفك وجهك ملهوفه / وعيونه اتصد عليه

****************
(يازينب )
كلمات
(حسين الزيدي )

قصيدة مسلم(ع)
.
.
.
 
ماقبل موتي بثواني      چانت اهواي الاماني
وتمنيت 
چانـت امنــيتي الاخيره
جسمي ينشال بحصيره
تمنــيت

*

عالقصر من صعدوني حسـين بس ابراسي چان
وصوت كسر اضلوع صدره بداخلي شاهد عيان
اتذكرت ســــالوفه عـــمي علـــي سولـفها بمـكان
وگال يامســـلم اخـــيك راســـه ينـــشال بســنان
 
اتگـطع اعضـائه البواتر .. اطشر اعـضامه الحوافر
وتمنيت
البي يصـير بروحـي اديـره
جسمـــي ينــشال بحصيره
تمنــيت

*
 
أطـلب الذبـــاح گــــلي گبــــل ما گـــص الوتين
گتـــله اتمـــنه اصـــلي لـــبواليــمه ركـــعــــتين
بالقنوت ارفعت ايدي انـــــخيت رب العــــالمين
كون من انذبح جـسـمي ينـطحن مـثل الحسين
 
حَلفت ربي بغيـاثه .. ابلا دفن ابقه ثلاثه
وتمنيت
هاذي احــلامي الچبيره
جسمي ينشـال بحصيره
تمنــيت
 
*

الدعوه الاخره ادعيت ربي قبل طبگت ناظري
كون ســلاب المــحابس مثــله يگـطع خنصري
أي يذبـــاحــي احـــلفـــك لــو ردتلـــي تنـــبري
من القـفه بثنعش طبره اطبــرني انتــه بمنحري
 
هالطلب مسلم يريده .. من تحز انته وريده
وتمنيت
مثـله ابقـى ابلا عشـيره
جسمي ينشال بحصيره
تمنـــيت

*

راسم الطف ابـن عمـــي في مخـــيلتي صــور
سالفتهـــن مــو ثوانـــي لا يريـــدالهـــن شــهر
من القصر لمن اطيح اتمنــه لو ظـهـري انكسر
مثل ما ينكسر ظــهر حســــين باچـــر عالگمر
 
حلمي من تلفي المنيه .. كلهن يصـــيرن عليه
وتمنيت
ابنيتـي وي بنـته اسيره
جسمي ينشال بحصيره
تمنيــت
 
*
بالشمس كون ابقى مرمـي ابلا دفن وبلا غسل
وراسي وي راس ابو اليمه برمح عالي ينحمل
وبنتي وي بنته رقيه مچتـــفات اعلــــه الهزل
وين الله وابــوفاــــضل حـــلم عـــمري يكتمل
 
الله شاهد چان حلمي .. يدفن السجاد جسـمي
وتمنيت
مـن يحــطني بالحفيره
جسمي ينشال بحصيره
تمنــيت
*
حيدر تركي الكربلائي

*قصيدة تحاكي الخيول الاعوجية التي داس صدر* *الحسين* *ع😭😭
٠٠٠٠٠٠٠٠٠٠٠٠٠٠٠٠٠٠٠٠
*خيول عشرة الداست حسين الغريب*
*ونعجن ويه التُرب جسم السليب*
*ياخيول الأعوجيه*
*حسين هذا ابن الزجيه*

*ماتعرفينه الحبيب ابن الحبيب*
٠٠٠٠٠٠٠٠٠٠٠٠٠٠٠٠٠٠٠٠٠٠٠

*ياخيول الاعوجيه شلون كلبج طاوعج*

*من وكفتي فوك صدره وحيل دستي بحافرج*

*صوت جم ظلع الكسرتي ليش مامر مسمعج*

*منو كلج رضي صدره*
*وعلى حسين العلمج*


*العلماج ابن الدعيه*
*حسين هذا ابن الزجيه*

*صدره مطبوك عله ظهره والعجيب*
*ماتعرفينه الحبيب ابن الحبيب*
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
*الخيل داست على صدره وهو عينه عله الخيم*

*ما يهمه وجع صدره*
*ولاألم ذاك السهم*

*اليهمه شلون زينب*
*تنسبي ويه الزلم*

*لاكفيل الظل يدافع*
*وطاح شيال العلم*

*رحمي حاله بهل الرزية*
*حسين هذا ابن الزجية*

*هذا ابن الطاهره وابن النجيب*
*ماتعرفين الحبيب ابن الحبيب*
٠٠٠٠٠٠٠٠٠٠٠٠٠٠٠٠
*يسمع اطفاله تصارخ رحمي حاله بهالوضع*

*مابقاله جسم ينهض نكطعت اوصاله گطع*

*عياله تاهت بالبراري*
*بساعة البيهه وگع*

*شلون ينهض ياخيول*
*اوموت من عندج جرع*


*عينه مشبوحه الرقيه*
*حسين هذا ابن الزجيه*

*ماكو رحمه بحافرج لمن يصيب*
*ماتعرفين الحبيب ابن الحبيب*
٠٠٠٠٠٠٠٠٠ ٠٠٠٠٠٠٠٠٠٠٠٠٠٠
*روحه صعدت والحوافر فوگ‌من صدره اعتلت*

*ماشفيتي بي غليلج*
*چم‌رزيه‌البییه اجت*

*ياخيول وصعبه كلش* *والضلوع تکسرت*

*عيلته تنظر وليهه*
*ریت عینچ بس عمت*


*شكد شبع منج اذيه*
*حسين هذا ابن الزجيه*

*قصتج ابكلبي تبقى للمشيب*
*ماتعرفين الحبيب ابن الحبيب*
٠٠٠٠٠٠٠٠٠٠٠٠٠٠٠

تمت بقلم خادمه الزهره البتول
1/8/2021