#قصائد_استشهاد_الامام_الكاظم_ع


موشح في رثاء الإمام موسى بن جعفر عليه السلام


وين عن هاي الجنازه رجالها ؟
عالجسر مطروحه محّد شالها
*

هالجنازه منين ولمن تنتمي
شو سمعنه الناس گالوا هاشمي
هاشم الناس ابّختهم تحتمي
ليش چا هاي الجنازه احوالها
*

ليش مچتوفه بسلاسل وبحديد
عالجسر صاحبها ظل مرمي وحيد
گالوا أهله بدارهم ظلوا بعيد
ما اجو ما طالبوا چتّالها
*

من سجن هارون طلعت للجسر
هالجنازه عليها آثار الغدر
بالحديد مگيّديها بكل شبر
عالجسر ما واحد اتدنّالها
*

عرفت الناس الخبر موسى الغريب
وعتلت منها البواچي والنحيب
گالهم مسموم ياناس الطبيب
سمعت الشيعه الثگيله افعالها
*

سمعت الشيعه واجت صوب الإمام
تصيح واويلاه يانسل الكرام
أخذت جنازته من ايد اللّآم
عقدت بموسى الولي آمالها
*

شيّعوا واليهم بموكب رهيب
منلجسر للمرقد بنوح ونحيب
مو مثل جده البقه بالطف سليب
وخته ظلّت من عكب كفّالها
***

حسين محّد شيّعه ظل عالثره
ضلوعه بخيول آل اميّه مكسّره
ظل على التربان ينزف منحره
وخته راحت للسبي بعيالها

سيد زيد الفحام
______________________

#قصائد_شهادة_الامام_الكاظم_ع



في رثاء الإمام موسى بن جعفر الكاظم عليه السلام


قصـّــة غيــــابـه. وسجنه وعذابه
موسى بن جعفر نـذكــر مصــابه



قصـة الكاظـم تضـل قصـة عجيبـه
تهـدم اطـواد الارض هـاي المصيبه
حجـة الله الكاظـم وعبـده وحبيبه
تالي مسموم بسجن يخلص نحيبه
عن اهله بعدوه. بالغربه سموه
دين الله ينعــاه. وينحب كتابه



موسى بن جعفر امـام وعالـي قدره
سابـع اهـل البيـت الله ختاره بامره
شلون يگضي بالسجن ياناس عمره
بالحشـر هـارون باچـر شنهـو عـذره
اليقتل امامه. بيوم القيامه
يدخل جهنم. يشتد حسابه



بسجن ابن شاهك يسجنه الطاغي هارون
وحده وبطاموره ظلمه موسى مسجون
ساجــد بليلـه ونهــاره لخـــالـق الكــون
هـذا حـال الكاظـم عله البــاري ميهـون
يدعــي بصــلاته. تخلص حياته
من فعل الاشرار. يشكي غترابه



بالسـلاســل والحــديــد مگيـّـــدينــه
عالعـذاب الشــافـه بـس الله اليعينـه
موسى بن جعفر بقت مشبوحه عينه
عالاهـل مشـتــاگ يـرجـــع للمدينـــه
بسجن النواصب. دلّالــه ذايــب
وعليـــه سجنهم مسـدوده بابه



سمّه ابن شاهـك بسجنه وذاب چبده
موسى بن جعفر گضه مسموم وحده
لا گـــرابـه ولا اهــل لا صُحبـه عنــده
بس علي ابنه الرضا يبچـي عله فگده
عالكاظم ينوح. بقيوده مجروح
تتسـايل دمــاه. شـاهــد خضابه



هــذا موسـى الكاظـم وقصـة حيـاته
بالسجن عمــره نگضه وبالسـم وفاته
مـات مسمــوم وبقـت بس ذكـريــاته
فجـعــت گلــوب التحبّــه نـايبــــاتـه
حضرت تشيّعه الشيعة وتودعه
بالدمـعــه والآه هـالـــوا تـرابــه

خادم الإمام موسى الكاظم عليه السلام
سيد زيد الفحام
_________________________



⚫