#جديد محرم 1440 هـ (قصيدة متعددة الاوزان)
.
يعــــباس أنت بقياسـات البــشـر ما تـنــقاس
يعــــباس كل مفصل بجسمك بطوله ونبــراس
جيش انجمع بيك منهــو اليـلاويك
يعباس

/1
أصعب عباره ابكربله شفناهه
احتار الفكر ياسيدي ابمعناهه
.
خير العمل بيك ارتجل ياباالفضل
أنت عسكري
.
ذهل فكري كلام احسـين بيا مظــمون انظـــرله
صرت بعيون أبو الاكـبر جيــــشه بكـــربله كله
.
الـمعنى يابو الـموزمه عنــــدك كرامات
كل مفصــــل بجســمك مقــاتل بالملمات
عيونك غــدن وحي السـمه ويرتلن آيات
چفوفك بعد غـير الحــرب عدهن مهمات
.
يمغوار يحسب إلك جيش العده ألـف أحــــساب
يمغوار يدري بوجـــودك صعــــبه خيمه تنصاب
وينه اليــــلاگيـك منهو اليـــلاويك
يعباس
.
.............................................
.
/2
عيونك حچن يبو الفضل بالطفوف
اتحاورن ياسيدي ابلايه احروف
.
اتوادعن وتعانقن وتقاسمن
جبهة الحرب
.
وحده اتعاين اعيالك تحـرس خيــمة الخدر
وأخره بالحـرب وياك تصد وتراقب العسكر
.
بالخـزره وحده اتعاونك تخـطف بـالارواح
وحده تراقب بلشـــمر اليــا كتر راح
مـن حـــرمله تعنى السهم شـايله ذباح
تصـدت اله عين الحـرب منها النظر طاح

بالبتار تحصدهم أبعينك سهم حرت ابهاي
بالبتار طشــــرت الـ 30 الـــف يـامـــولاي
گلبك يدليك منهو اليلاويك
يعباس
.
................................................
.
/3
كل چف ألك ياسيدي مرجع دين
استنبطن فن الحرب من اسنين
.
چف يمنتك وچف يسرتك من غيرتك
طلبن الأذن
نزلن للحرب مولاي رفن بالسـمه رايه
يعــرفوهن اذا بــرزن ينقشن عالترب آيه
.
هتفت ألك سوح الحرب يبن الـميامين
برق وعصف كل سطره بوجوه الملاعين
چفوفك جزن عابس شفـتهن بالسوادين
اتگطــعن فوگ التــراب النصـــرة احسين
.
يعنوان اليفگد اخو وسط الحرب شيظل بي
يعنوان چف يســـرتك اليمنــتك دم تفدي
حيدر مُربيك منهو اليلاويك
يعباس
.
...........................................
.
/4
فكرك يحاور بالگلب يالوفاي
ماترجع إلا بجربتك جايب ماي
.
من قررت. متأخرت. فوراً رحت
تگصد النهر
.
فكرك جندي بالميدان... يعرف بالذي ايضده
لازم للشريعه ايفوت.. وجيش اهل الرده يرده
.
گلبك يگلك زينب اتنادي ينوماس
عبد الله مات من العطش احظر يعباس
بعدك رقيه من الهظم محنية الراس
وحسين اخوك ابلا اخو وتحاوطه ارجاس
.
يزلزال..بعمرك بعد ماظل الي غير اليوم
يزلزال .. حط الفرات ابجربتك يجيدوم
اتمنى الا گيك.. منهو اليلاويك
يعباس
.
............................................
.
/5
شايل على طاسك بطل مامعروف
لساهه تحچي ابهيبته هالطفوف
.
لامو بشر ولا من حجر. بأول نظر
شفت ريشتك
.
على طاسك شلت ريشه .. بيها اسرار مخفيه
بس بين طرف منها... منهم ما بقوا 100
.
نادى المنادي بكربله واسمك هتف بي
كافل خدر زينب نزل منهو اليلاگي
بين طرف من ريشته ياهو اليلاوي
بريشه وسهم خزره وعزم جمعنه يفني
.
يستار ... مغضب تچوي ابوجنتك الدموع
يستار ... لمظة فقارك سيدي اطيح اضلوع
100 هلا بيك. منهو اليلاويك
يعباس
.
..................................
.
/6
جسمك تگطع عالترب من شفته
لآخر مهمه بكربله وزعته
.
كل غايتك. ترف رايتك. ودم جربتك
يكتب النصر
.
راسك بالسبايه ايروح ... وسهم العين بلدم در
حتى الناس تنظرله ... ومحد ينظر الخدر
.
اليمنى من درب السبي تجمع بالاشواك
خافن يتيمه تعثر وبالصدفه تلگاك
واليسرى دفنت سيدي كل گطره لدماك
لا تنهظم أختك اذا شافت بقاياك
.
يمحبوب... نحرك تحير عالترب وين ايروح
يمحبوب ... شافت بعد زينب وريدك مذبوح
هتفت بساميك.... منهو اليلاويك
يعباس
.
.
تمت ولله الحمد
لا تنسوني ووالدي من فضل دعائكم المبارك
.
حسن الموالي الفاطمي
.
القصيدة محرمة على رواديد ال DJ
.
2018/6/12

الاوزان .... ميمر+ 4/3 الحدي منفصل + وزن مركب من (فاعلن مفا)
+ بحر طويل+الفائزي

#جديد محرم 1440
ختمة عزاء .. .
.
أويلاه. يا فاطمه
.
هم رحتي شفتي كربله .. بيها الشباب امچتله
بعيالچ ايحيط الخطر .. وسط المخيم زلزله
وسط المخيم زلزله
.
شفتي بلحسين اشجره
خده افترش ارض الفلا
ياويلي طر چبده الظمى
وبگلبه نبيلة حرمله
گاعد على صدره الشمر
يالزهره منهو اينزله
سل سيفه باشر بالذبح
كامت تشوفه العايله
نحره 12 طبره انطبر ..
محبوبچ اليوم انوله
يافاطمه دمه جره. ..
ما ظل ولا ناصر. اله
ياويلي گطعوا منحره ..
صاروا سبايه كل هله
گطعوا چفوفه وخنصره ..
شدو رقيه ابسنسله
راسه ارتفع فوك الرمح ..
زينب مشت بالقافلة
زينب مشت بالقافلة
أويلاه يا فاطمه
.
.
هم رحتي صوب المشرعه. شفتي الچفوف امگطعه
ضحى الكفيل ابمهجته .. لجل الخدر. والمقنعه
لجل الخدر والمقنعة
.
يالزهره زينب عالنهر
شافت يويلي مصرعه
بالدمعه تنظر جربته
بعينه السهم ما طلعه
نادت يخويه يا شهم
صوت الشمر هم تسمعه
أينادي طلعوا بت علي
چفك بعد شيرجعه
ظلت رقيه ابلا ابو
ظلها الشمر ظل يتبعه
سلب تراچيها النذل
وبخدها طبعة أصبعه
متني من السياط انذبح
كل طگه دم أمرصعه
لكن ولا طاح اللوا
بچفوفي خويه ارفعه
بچفوفي خويه ارفعه
.
.
حگي اذا درت النظر .. عن حالچ بيوم الخطر
يافاطمة ابو الحسن .. بچفوفه شالچ للگبر
بچفوفه شالچ للگبر
.
يا فاطمه عندچ ضلع
واحد تهشم وانكسر
بالعصره گطعولچ نفس
من مهجتچ غاب النظر
شوفي الحسين ابكربله
فوگ الترب صدره انحفر
حافر اذا مس الضلع
يترك على الگاع الأثر
10 الخيول الداسته
طلعت ضلوعه من الظهر
اطشر ابنچ بالفلا
لازم تدورين النحر
بين الخيم والمشرعه
عالتله لو درب السفر
يالزهره دوري خنصره
بيا حفره شوفيه استقر
وحدچ تلمينه صعب
متوذر احسينچ وذر
متوذر احسينج وذرچ
.
.
نزلت دموعي أمحيره .. موقف اريد اتصوره
عبدالله ليش الياسبب .. يالزهره گطعوا منحره
يالزهره گطعوا منحره
.
ليش العطش اصبح ذنب
وتصيبه نبله اتعفره
عبد الله يتروه ابدمه
من العصابه الكافره
مايشعر ابحر السهم
يشعر ببوه الينظره
أحا ينبلة حرمله
گلب الحسين اتمرمره
عبدالله كلش منقهر
والعله شنهي ياترى
كاروكه بالنار احترگ
وهدومه كلها امبعثره
بالذبحه الگماط انفتح
بي شدوا ايد الطاهره
عبدالله من نام ابگبر
هدموا عليه المگبره
راسه ارتفع فوگ الرمح
ياويلي امه اتناطره
بالخيمه امه اتناطره
.
.
خليني أحظر عبرتي .. شعرت رقيه بلوعتي
گالت يناعي استمع .. راح اروي كامل قصتي
راح اروي كامل قصتي
.
آنه الي چنت امدلله ..
وبحظن ابويه نومتي
گلبي ولا مره احترگ
ولا مره سالت دمعتي
من ليلة الحادي عشر
كملت ملامح غربتي
اظلم غده ابعيني الصبح
محترگه انظر خيمتي
شفت الشمر جاب الحبل
شده يشيعه ابرگبتي
ايعتني كل ساع واطحت
واركض والوذ ابعمّتي
آنه الشفت راس ابطشت
ظليت اونله ابونتي
نمت وشفت چن ابحلم
قبلني ابويه بوجنتي
اخذني وياه ورحت
وسط الخرابه دفنتي
اويلاه. يافاطمه
……………………… .........
لاتنسوني ووالدي من فضل دعائكم المبارك
.
حسن الموالي الفاطمي
.
2018/8/16ـ
القصيدة محرمة على رواديد ال DJ

#جديد صفر 1440
قصيدة دمعه في يوم الاربعين..
……… ..وزن المجرشه…… ..
.
عمري فدوه الك عمري
نوحي وعبرتي وقهري
انته دمعتي التجري. ….. حُسيناه
.
.
.
يحسين الك ناوي السفر وي طلعة المشايه
فجر اربعينك من بزغ شلت ابيميني الرايه
رتلتك ابروحي. عشگ واربع حروفك آيه
سجلني. ياروح النبي وي ربعك الوفايه
.
أسمي أنته كل أسمي
جرحك يسري وي دمي
أگضي بخدمتك دهري.. حُسيناه
.
.
.
سائل اجيت الحضرتك منك اريدن نظره
تتصدق اعليه ابهظم وتمن عليه ابطبره
1900 جرح. انطيني. منهن. قطره
بيهن اواسي فاطمه بكسر الضلع والعصره
.
أسمع كسرة اعضامك
وافهم. ونّة. الآمك
واهدي الثورتك عمري .. حُسيناه
.
.
.
درب المشي لزيارتك متعطر بأحساسك
واليمشي مايتعب لأن يشتم عبير انفاسك
يالعندك انصار اشكثر بالخدمه رفعوا راسك
فزعوا مجانين العشگ خدامك وحراسك
.
خادم يغسل اجدامي
وآخر يروي بالظامي
واني دمعتي ذخري … حُسيناه
.
.
.
ماخذني الك درب العشگ امشي وعيش الآمك
بچفوفي ماشدوا حبل محروس أنه بخدامك
زاد الذي. استطعمه محرومه منه ايتامك
آنه المواكب.خيمتي وانت الجمر بخيامك
.
وجهي محد ايصفعه
ظهري محد ايدفعه
راحه بالگلب تسري… . حُسيناه
.
.
.
الگبرك ايرد الضعن يوم اربعين احزانك
يحمل خبر عن غربته من غيروا عنوانك
بنتك رقيه ابكل كتر چانت تدور احضانك
راسك تشوفه بلا جسد وتحاوطه عدوانك
.
لاچف لاحظن دافي
راسك بالرمح غافي
نادت بويه هم تدري… حُسيناه
.
.
.
أحلفك ابكسر الضلع هاي الزياره أقبلها
مدمن أنه بشم تربتك اودمعتك ماملها
سر كربله ماينفهم من كل درب نوصلها
حتى الطفل وسط المهد آية دمع رتلها
.
نحيى لمن انزورك
نبصر من يشع نوك
عاشگ للطم صدري… حُسيناه
.
.
تمت ولله الحمد
لا تنسوني ووالدي من فضل دعائكم المبارك
.
.
حسن الموالي الفاطمي
.
.
القصيده محرمه على رواديد الDJ

2018/10/20

قصيدة (( 18 باب ))
#جديد لشهادة الامام موسى ابن جعفر
.
… .. وزن المجرشه……
.
.

من باب واحد للسجن منه الگلب ذاب
موسى ابنَ جعفر عنده صار 18 باب
الهن كرامات .. بيهن علامات .. بالكاظميه

ـــــــــــــــــ ❁ ❁ ❁ ـــــــــــــــــ

متحير وفكـري انـذهل بالكاظم واسراره
سدو عليه باب السـجن رادو تضيع آثاره
الـباري خله ابمرقده بـيبانه لجل انصاره
اصبـح عـددها (( 18 )) وترحب ابزواره
.
بيبان هاي من السمه للمرقد اوتاد
باب الرجا والمغفره وي باب المّراد
بيهن شفه الروح .. للگلبه مجروح
بالكاظميه

ـــــــــــــــــ ❁ ❁ ❁ ـــــــــــــــــ

باب الزچيه الي اندفع هـشم ضلع مولاته
خله بگلب راهب علي شوغة هظم بآهاته
من تلفظ أنفاسه النعي يذكر جرح مأساته
فـاتحله باب الفـاطمه لجـله يهـل دمـعـاته
.
هالباب مغلق للاسف چن فتحه ممنوع
يمكن لأن مـره انفتـح اوهـشم اضلـوع
بس باقي تذكار .. للزهره والدار
بالكاظميه

ـــــــــــــــــ ❁ ❁ ❁ ـــــــــــــــــ

واقع مصـيبة كـربله نلگـاهه مـن انطـوفه
باب الحسـين اليدخله منه يشوف اطفوفه
ملح البطوله ابعتبته وابو الفضل واچفوفه
والي يركز يسـتمع صـوت الشـمر وسيوفه
.
اطفال تركض بالفلا ومراشگ اسهام
واليختنگ يعني شهگ دخان الخيام
والمرقد اينوح .. للدمه مسفوح
بالكاظميه

ـــــــــــــــــ ❁ ❁ ❁ ـــــــــــــــــ

جرح الخـرابه ينفتح ياويلي من احزانه
باب الرقيه بي فتت اسمع نعي حيطانه
قصة يتيمه وي طشت ترويها كل بيبانه
ماتت سـبية كـربله امـسلبـه وعطـشـانه

ماتت رقيه وكل جسدها امترس اجروح
ماتت على راس الابـو مدمـعـها مسـفوح
ون اليتيمات .. نوح الحمامات
بالكاظميه

ـــــــــــــــــ ❁ ❁ ❁ ـــــــــــــــــ

للرحـمه بابه منفـتح واهـل السـمه ايحـيـطـونه
باب العلي وباب الحسن والصافي وسط اعيونه
نزلت اله امـلاك السـمه بالمــرقـد ايخـدمـونه
كلـها تـنـادي يـاهـلا بالگـصـدوا ايــزورونـه
.
باب الحكيـمه ونرجس وللعسـكريـين
وباب الرضا ناده هله بخدام الحسين
درب المطيعات .. والزينبيات
بالكاظميه

ـــــــــــــــــ ❁ ❁ ❁ ـــــــــــــــــ

بحر النوايب لو غـضب وتلاطمن امواجه
ولي تنـطره ما وفـه وشـح الـذي تحتاجه
اگصد ابو طلبه بهـظم وي دمـعتـه اتناجه
مايعتذر منك ابد يم بابه تگضي الحاجه
.
فرهـادي وي القبله ظلن انه عـنوان
والسيد محمد بعد والصاحب الزمان
18 باب .. هلن بالاحباب
بالكاظميه

ـــــــــــــــــ ❁ ❁ ❁ ـــــــــــــــــ

برهان حُسـن العـاقبه واضـح يظـل مقـياسه
موسى ابن جعفر بالسجن ومراقب ابحراسه
بالتـقـوى يبّـني الآخـره رص للگـبر أسـاسـه
والسـندي چـان ابغربته يحسب عليهّ أنفاسه

خالد يظـل گبر الوفـي بعـين النجـم لاح
بابه ارتفع رغم العدى وباب القصر طاح
والصبره آيات .. ترفعها رايات..
بالكاظميه
.
.
.
تمت بفضل ربي وعطاء اهل البيت
لا تنسوني ووالدي من فضل دعائكم المبارك
.

حسن الموالي الفاطمي
.

تأكدت من عدد ابواب مرقد الإمام
موسى بن جعفر عليه السلام وأسمائهامن خلال قسم العلاقات العامه في العتبه الكاظميه المقدسة..

#جديد # شهادة امير المؤمنين ١٤٤٠
حوار بين زينب وابيها امير المؤمنين عليه السلام…
.
تگله ..
زمـانك طـشـرك بـويـه ولـم بـيـك
هظم فوگ الهظم طبره وألم بيك
اشــاهـد للگـبـر جـرحـك ولَمّ بيك
جهز ويتاني ساعات المنيه
.
يجاوبها…
.
البـسـي للنـوايـب زي نبـي أنتي
جبل واخت الغيارى زينب أنتي
انه الينـشـدني اگـله زيـنه بنتي
صبوره وتسحگ ضلوع الرزيه
.
.تگله
.
بيتك بـويـه لـمـصابك وجـل باه
أديرن ناظري بجرحك وجلباه
دواك اتمــنه اوجـــدنه واجلـباه
وداويك وتــــرد يابــــويه اليه
. .
يجاوبها..... ........
.
لازم عـن ديــــاري اليـوم اجلاي
يزينب بويه هـا قد حان اجلاي
حـزنچ والهـــظم والنوح اجلاي
اذخري دمعـــتچ للغـــاضريه
. .
تگله.... ......
.
يبويه الـزمن كـل ظهـره الك دار
واشوف العرش بدموعه الك دار
ظلـمه الــدنيا لمـصابك والك دار
تون بيها الفــواطم هالـمسيه
. .
يجاوبها.... ......
.
النجم بمــصابي حگه من هـــوه الچن
بنـاتـي ودوم افـكـــر منــهـو الچـــــن
الخيم من تدوي مامش من هوه الچن
تشهگنه وتــركضن بالـــــبريه
. .
تگله... .......
.
عليك اليوم بويه گلـوب هامت
يمن لجلك تـذل وتطيح.هامات
عنك تـنـشـد الأيـــــتام ها مات
نظن حيدر يزينـــب ماله جيه
. .
يجاوبها... ......
.
حنوطي والچـــفن هاليوم والماي
اوفظي اعله اليتامى الزاد والماي
نزيف ادماي ليـــش ايزيد والماي
افكــــر بالشــــمر يسطر رقيه
.

حسن الموالي الفاطمي
.
محرمة على رواديد ال DJ