يا قاري الدعـوة مـعي قــول آميــــن
‏ويا قابل الـدعـوة ،،، عليك اتكالـي
‏إنـك تثـبتنا على الحــق، والـديــن
‏وتجعل لنا من تحت عرشك ظلالـي

سوّد الله وجه الأيام يامال الغناه
كيف تحدانا على القُّل واحنا طيبين
‏وبيض الله وجه الأيام وظروف ،الحياه
طلّعت وجه الردي من وجيه ،الغانمين

لا تحسب الايام دايم مريفه
بعض الليالي ما تجي لك على الكيف
كم واحد راحت حياته كسيفه
يوم اختلط فيها شتاءها مع الصيف

‏دنيا تلون ماعرفنا لها لون
يامخبل اللي تايهن في وهمها
ان اقبلت خلتك هايم ومفتون
وان ادبرت ياقو طعنة سهمها

‏مدري جديد أيامنا وش مخبي
من جملة أفراح الحياه ونكدها
ماضاق من قلبه تعلق بربي
لقى السعاده يوم غيره فقدها

‏اثر الرياجيل تفرق بالمدى والعزوم
‏والطيب كايد وحزّات اللوازم محك
احدٍ على اطرف سبب ماعاد يقدر يقوم
‏واحدٍ لو تسكّر الدنيا بوجهه ضحك

ابتسم حتى لو تقسي الظروف
من سحاب الكون ما ضاقت سما
كم كفيفٍ قلبه المبصر يشوف
و كم بصيرٍ قلبه الميتْ عما

طبع النذاله فيك من عهد الاجداد
موروث شعبي وارثه من جدودك
ياشين لاتفخر على فعل حساد
حاسد وحاقد وجاهلٍ في حدودك

‏قوي العزايم مايهمه كلام الناس
‏يسوق الطموح لغايته لين يدركها
‏صحيح الهبوب تهب وتطير القرطاس
‏لا شك الجبال الراسيه ماتحركها

‏يحدني عقلي على كثرة الصمت..
‏والصمت في بعض الاوقات معزه..
‏أختار من جــزل الكلام إن تكلمت
‏أما السكوت أو الكلام المنـزه

لا تجرح اصحابك ولا تحسد الناس
‏الله على ما تخفي الناس عالم
‏وان اجرحوك الناس لا باس لا باس
‏مظلوم في الدنيا ولا تكون ظالم

سلم على المحترم واسلوبه الراقي
‏وجنب عن اللي علومه مايثمنهـا
‏أعامل الناس باسلوبي وباخلاقي
‏والناس باسلوبها تعرف معادنها

حظ الصغيّر من عنا الوقت مرتاح
‏وأحلام عمـره دوم ما هيـب صعبه
‏ٰمايلحقه شرهه من الناس لا صاح
‏واليا زعل من شي : ترضيه لـّعبه !

‏نستعجل الايام واعمارنا ايام
‏والشيب يطغى والاماني فتيّه
‏نهاري اقفى واجمل الحلم قدام
‏والحال يضعف والهقاوي غنيّه

‏إضحك لدنياك مهما شانت ظروفك
والعين خلك عــن العبرات واعظها
لا تذرف الدمع ويغطي على شوفك
يمكن تمر الســعاده .. مـا تلاحظها

اسوي المعروف مَن طيب ذاتي
مَاهمني منهو جحد مَا فعلته
رفيقي الطيب عطيته حياتي
وَحتى الردي لا حام صوبي كرمته

‏الذيب لا كثرت عليه المشاعيب
‏أقفا بجوعه وأمرحت عقبه الشاه
‏والرجل دام إنه ترفّع عن العيب
‏لو يظلمـونه مـا يقصـوّن يمناه

‏جعل الكفو تبطي سنينه وهو حي
‏اللي شنار الطيب طاله وحازه
‏ماعنده إلاّ أبشر ومن ذي قبل ذي
‏يا سِعد عين اللي يجي له بعازه

‏عساي ما اثقّل على قلب مخلوق
‏ولا اسـوّي....ما يسـبّـب عـتــابه
‏انا احـب الذوق....وادوّر الذوق
‏عند التعامل..والحكي...والكتابه.

ودي أسافر عن عيون المخاليق
لأبعد مكان اعيش فيه السعاده
لن الزمن والناس ماتدمح الضيق
إلا تزيد النفس هم و نكاده