اكضي الليل بالحسبات وافزن عالحزن والنوح
واعاتب كصه التربان عليك حسين ضل مذبوح

ما بين الصحه والنوم ومابين الامس والراح
تجيني احلام مال ازغار ويمهن يفتر الذباح
يتلاكني ضهر عاشور وافتل فله السباح
واطيحن من ضهر حزني مثل حسين لمن طاح

واكوم واكعد من الشوك وكلبي من الفكد محروك
يم يعباس روحي تصيح راحت باليتامه النوك

مثل مامالن الخيمات مالت روحي للملكه
ومثل حضنه رضيع حسين اديه مناطره الشبكه
جاساني الضمه مو ماي ولف معتازله اتشهكه
وانه ام البنين هنا عليهم روحي محتركه

التوه طولي وطحت عالكاع مثل خلين وكت وداع
هيج جفاك ذب الحيل وركه بريح تمشي بساع

طلعت اركضلك من البيت مثل ما فرت ارقيه
وعثرت بذكره الك وياي وسوالف كلهه حنيه
وفزع دمعي لان عطشان دره بيك وصحت خيه
واجيتك وانت ماموجود وروحك دلتك بيه

ييمه الصار بيه هواي طلعت ومنكسر مكفاي
مثلك من وكع عباس رحت وعاتبيت الماي

شسولفلك على الشمات التجيني وتنشد شحاله
علي غارت خيول جفاك بس بدون خياله
وحالي شلون حال اختك خدرهه الغربه تبراله
تكبر صفنتي اعلى الماي من اذكرك طايح كباله

ويجي الليل بنواعيه انباكت طفله ترجيه
وبعيني الضلام ايموت واصبح فاكده ارقيه

وافطن والكه ملك الموت كاعد منتضر روحي
ياخذهه لعزيزي احسين ويمه اكعد ابنوحي
ميته وما دريت اشلون اشبك راس مذبوحي
كطع كلبي النبض بجفاك وكلت لرويحتي روحي


ييمه فراكك شكثله نتلاكه هناك يم الله
واشوفن دم ترس خديك اثر من سهم عبدالله


#ايوب السويطي


https://tttttt.me/joinchat/AAAAADyvNcFdjoQh-74liA



قناه نشر القصائد المنبريه ثقافه الشعراء

ابي يا سورة القدر
سلاما منك في الفجر
من الراس الى الطف
وحتى مذبح النحر علي علي

الحياة الممات ثوابت من ثوابت حكمة القهار
الحنين الدموع ثوابت للي عايف بالكلب تذكار

للمخليله بسمه بكل وجه متعوب
للكاسي اليتامه وعايش بفد ثوب
الماكادر يلحكه بالدمع يعكوب
للمنه يتعلم للصبر ايوب

وزهدا عشت في الدنيا
ارتقيت بروحك العليا
فمن قلبي صراخاتي
وحتى مذبح النحر علي علي

..........................................................

العذاب غياب دفو اعيونك يغالي الساكن ابالي
البيوت الزغار الماذن واليتامه شيبو حالي

لان تارك علامه بكل درب ومجان
وسوالف فطره الهه تخشع الحيطان
الك ضل كلشي ينحب مرتبك حيران
مو معقوله حيدر ياخذه التربان

فقبرك ياابي صدري
من الان الى الحشر
دفنتك بين اضلاعي
وحتى مذبح النحر
علي علي

.............. ....................................

الزمان المكان يدورك يالتركت بكل شبر ذكراك
الامان الحنان مثل ضلك يبويه المندفن وياك

مشيت وكلشي بالدنيه علينه اندار
مثل مادارو علينه بهجوم الدار
اول مره اسمع بذني صوت ازغار
تركض حافيه ومرعوبه من النار

فموتك ياابي يعني
اقتراب الخيل من بدني
ومن خدري ومن زينب
وحتى مذبح النحر
علي علي

.....................................................................

محال تعود ولكن بويه مو هينه علينه تروح
تعال اصيح انه اسماعيلك الباجر يرد مذبوح

انه قربانك البالبر تدوسه الخيل
التطشر ضلوعه الجنه عطر للهيل
التناديله اخته وهوه مابيه حيل
الدور عليه زينب توالي الليل

فهامت روحها تسال
حسين من اعالي التل
اخي مازلت تسمعني
حتى مذبح النحر علي علي

............................................................

بضماي بدماي ملامح عاشر بروحي تبين الحين
الدخان الخيول على زينب يديرن من تغمض العين

لاتبعد عليهه الناس موش الناس
مابيهم كفو مثل ابنك العباس
لاعدهم مروه وغيره لا نوماس
موزينب ترى البعيونهم تنجاس

ابي واللوعة الاخرى
بكت من خطبها الزهرا
بكتها تندب العباس
وحتى مذبح النحر علي علي

.............. ....................................

التراب ينوح التراب اصبح يتيم بلايه ابو تراب
المكان الاذان ينوح الليله جيه فاكد اعز احباب

الطيور تنوحك ويبجيلك المحراب
وبالتابوت جلب من طلعت الباب
اختنك لمن دره بموتك هوه الله الهاب
رحت وانفل يبويه من الكلب جلاب

الا ياراحلا عني
بكيتك واعتلى ان
من الفجر الى القبر
وحتى مذبح النحر علي علي

نسالكم الدعاء
#ايوب السويطي

https://tttttt.me/joinchat/AAAAADyvNcFdjoQh-74liA



قناه نشر القصائد المنبريه ثقافه الشعراء

مامرتاح لان ماجيتك من اهواي
صار اجم شهر خايف تصير سنين
كمت كلش احس بالروح جنهه تموت
وموش انه البلا شوفك يصبح زين
كاضيهه النهار اتهلوس ومجنون
ومن يكبل عليه الليل بس ونين
اول مره احس بلوعة المشتاك
كصيره ايديهه لاجنهه بصيره العين
كطعو دربك ومر اعلى بالي الماي
دربك والعطش بينه اثرن يحسين
اول تالي يمنه انته وعلينه بعيد
ولا عايفنه انت ولا احنه مغربين
ودينه الرسايل وي جنح الماي
ومثل يعكوب يوسف ريح منتظرين
جزعانين جنه من البجي يحسين
ومن فركة ضريحك هسه جزعانين
مامرتاح لان ماطايح اعلى الباب
ولابايس العتبه ولا مدمع العين
#ايوب السويطي

https://tttttt.me/joinchat/AAAAADyvNcFdjoQh-74liA



قناه نشر القصائد المنبريه ثقافه الشعراء

*[ مرايتيه الماي ]*

أداء: الرادود #علاء_الغريباوي
كلمات: الشاعر #ايوب_السويطي

https://youtu.be/uFR2u-Qt-Gs

مجالس شهر محرم الحرام لسنة 1442 هـ - 2020 م
مجالس ليالي العشرة الثالثة من شهر المحرم
ليالي إستشهاد إمامنا زين العابدين وسيد الساجدين علي ابن الحسين صلوات الله عليهم أجمعين
عزاء هيئة الشباب الحيدري - العراق - الكوت - الكرينية

مونتاج: سيد كاظم الموسوي
مكساج: كرار الموالي
مخطوطة: مؤمل الرميثي
تنفيذ: وارث للانتاج الفني
النشر الشبكي: علاء بركات العاملي