توادعنه بجينه عيون وحجيتي وياي
توادعنه وعلى الايام بجينه هواي
وانتهت كل ذكرياتي
ورحتي يازهره حياتي توادعنه

مو نعش جدامي لا هايه حياتي
مو جفن لفيته انه بذكرياتي
راحت الجانت تناديني يغاتي
انه ذاك البالكبر دفنو ضواتي

بضلام الليل حلم مذبوح ونين وياه
بضلام الليل نحيب نجوم اه واه
وانتي بين ضلوعي باتي
ورحت يازهره حياتي توادعنه

........... ............

كبل ما عالبيت يطبع ضهر مكفاج
وعلى عيوني تصير حسره طيوف ملكاج
والايام الحلوه تمشي بنعش وياج
راح اوصي الكاع وبهيده اتلكاج

وتفاركنه حدر تربان تنام احباب
وتفاركنه حجي الخلان يضمه تراب
الوينج تموت بلهاتي
ورحتي يازهرة حياتي توادعنه

.....................
الفركه موت العاشك الفاكد حبيبه
والمفارك مثلج يواسيه نحيبه
والله يم زينب تره زينب غريبه
وللحجايه المالحه ياهو النجيبه

اضل مشتاك يماي العين وين انتي
اضل مشتاك تموت الروح يعافيتي
انتي يانيه صلاتي
ورحتي يازهره حياتي توادعنه

.........................

طبك جنحج من حياتي راح الفياي
على الماي شلون راح نبدي الماي
وعلى نعشج كلبي اشوفه رايح وجاي
يالهواي بروحي وفراكج ترى هواي

يضل الشوك على البيبان سوالف نوح
يضل الشوك صور حيطان حلم مذبوح
غمضت وياج امنياتي
ورحتي يازهرة حياتي توادعنه

...................

يمعلمتني على جلمه هلا بكل حين
ليش هسه وياي بس بالعين تحجين
انت ماتدرين حالي من تبعدين
اضل احجي اعلى الصور البالحياطين

اريد انساج ويفر ذكراج بملامح طيف
اريد انساج هبوبه ريح تهب بالصيف
وعالصور ادري مماتي
ورحتي يازهرة حياتي توادعنه

...............................

هيه هيج الدنيه تفرح بس بالفراك
تموت اذا واحد يضل للثاني مشتاك
وانت يازهرة شبابي وكل الاشواك
ياهوى الله اشتاكلج بيه النفس ضاك

سوالف ضيم وانه بيا حال صرت رحال
سوالف ضيم اروح منين ونحيب اطفال
وداعة الله ياغلاتي
ورحتي يازهرة حياتي توادعنه

#ايوب جبار السويطي

انه يوميه العصر كلبي يذوب
جيه لكيت عيونج بلون الغروب
والله لو تدرين بيه
فراكج مبين عليه


انه ذاك الباله مشدوه برحيلج
نجمه انه وضايع شما طال ليلج
منيلي الحيل والج ليليه اجيلج
واحنه ندري ونينه يوجع دليلج

خنكه بيتج يابعد بيتي تعاي
شمااجيلج ضاله بكبرج وراي
لوبعد مابيج جيه
فراكج مبين عليه

.......... .......................
لهسه ماهزه الفكد بيرغ صفنتي
منهد ماجدامي ياحيدر ندهتي
عمد خيمه وكلج اعلى الباب طحتي
منين اجيبن غيرج اونيس لكعدتي

وانه هسه الوحدي والذكريات
نمسح اوجوه الصور والامنيات
يالغلاتج ذيج هيه
فراكج مبين عليه
...........................

هيه مو يومين لو ساعه لحنيني
الفركه منا لحد مايلفيني حيني
هوه هيج الملكه من تشتاك عيني
شكد اجيتج وانتي مامره تجيني

نامي نوم العافيه جوه التراب
وي كل كعده يسجلونج غياب
رحتي وفراك اذيه
فراكج مبين عليه

............................................

منين ماصد ذكرياتج تارسه العين
نبجي من تبجين نفرح من تفرحين
يمنه ماضل كلشي منج بس الونين
بكلشي بيه الكاج عنج ماكلت وين

ياجبيرة بيتي شو كبرج زغير
يالرضيتي بعشرتي بس بالحصير

راضيه بكلشي ورضيه
فراكج مبين عليه
............................................
شمااصد محرابج يحن الاذانج
والله وسفه الشمعه ترتاح بمكانج
عيله ضلت خايفه بلا في حنانج
من بعد ماجانت تلوذ بامانج

كلشي خايف بعدج بلايه امان
يالمشيتي وعفتي لمسه بكل مكان

والله ياالزهره الزجيه
فراكج مبين عليه

...............................................

شلونه بيا حاله من ينشد علينه
دمه يصبن كثر مانفرك بدينه
اشتهينه الموت يالزهره اشتهينه
احنه ذوله المنصدك مكطوع بينه

لهسه كلما نذكرج يعلى النحيب
يالحبيب ويالصديق والطيب ..

عافيتنه وهاي هيه
فراكج مبين عليه

نسالكم الدعاء
#ايوب جبار السويطي

.....................................................