#محرم_١٤٣٩_الليله_الاولى_الناشر_الحاج_فلاح_حسن

نعي للهلال
......
والله يهـلال الـكـدر لالا تـلالي
بيـك انه فـكـدت عزي ودلالي
يهـلال الـكـدر لـتـشـوف حالي
انه زينب المحد مشاهد خيالي
اميرة انه جنت والراس عالي
صفيت الوحدي وظلمة الليالي
انه حرمة وغريبة بغير والي
وجـبريل الـوحي نـاح وبجالي
سبيه وانضـرب ماجانت ابالي
عليه هواي فكد حسين غالي
والله يهـلال الـكـدر لالا تـلالي
.........
الشاعر
اياد الفرح التميمي.
ــــــــــــــــــــــــــــــــــــــــــــ


#الناشر_الحاج_فلاح_حسن

#يسمح_بالنشر_ويسمح_حذف_حقوق_القناه
#ولا_يسمح_بحذف_اسم_الشاعر_او_تغيره
#ولا_يسمح_بالنشر_للقنوات_والكروبات_التي_تضع_عباره_غير_مبري_الذمه_من_يقوم_بازاله_روابطها

#محرم_١٤٣٩_الليله_الاولى_الناشر_الحاج_فلاح_حسن

يهلال حزني هالسنه يمك طلب عندي
بسماي لا تطلع اذا ما جايب المهدي
حته احبك يا هـــلال
إلبس الجمعه وتعـال
ـــــــــــــــــــــــــــ
شكثر ذوبت المهج * جيبلك جمعة فرج
ابدي يوم الجعمه حته بسمه زينب تنقبل
يا هلال اتعذبت * بگد بياضك شيبت
لون ماجايب المهدي بهالسنة لا . لا تهل

مشتاگه اشوف ابن الاخو . وي طلعتك جيبه
مو لسه يوجعنـي الحبل شو طــول الغيـــبه
انه عمته ام الــدلال
إلبس الجمعه وتعـال
ـــــــــــــــــــــــــــ
كل سنه تزيد الوجع * بيك اشوف اربع جُمَع
انطيني جمعه وزيح همي كافي گلبي توجعه
المهدي جيبه بهالشهر * تعلّم من ام الگمر
ردت منك جمعه وحده لا تضحي بأربعـــه

منواي اشوفك من تهل جايب خبر عاجل
چا يمته اشمك بالسمه وعطر الفرج شايل
بلا . فرج تطلع محال
إلبس الجمعه وتعـال
ـــــــــــــــــــــــــــ
عندي هاي الأمنيه * وردت منك تضحيه
الگمر چان يگلي أمري روح منه ادرس وفه
بس خذاه مني الدهر * وينك اوين الگمر
راح مني وعذبـّــاني الچان ينــزف عاطفه

ما ردت عينك لا زند . منــك ردت بـُـشــره
ويه الندبه اوديلك حچي وللمهدي منتظره
شما اشوفك دمعي سال
إلبس الجمـــعه وتعـال
ـــــــــــــــــــــــــــ
بيك ودعت الزلم * وعندي بس هذا الحلم
حسين اخر يوم شفته بيوم بسته بمنحره
صبري يهلال انتهى * المهدي گالو يشبهه
اتشاگت عيوني لحبيبي وصارلي اشگد انطره

ارد اكضي ليلي أشتكي والمهدي يســمعني
بس خاف اجرحه لو سمع سوط انضرب متني
خلافه تعلم حالي حال
إلبس الجمعه وتعـــال
ـــــــــــــــــــــــــــ
من تجي انطيني الوعد * كون اشوف المهدي رد
حته اراويه القميص البي حبيب امي انذبح
نحسب انه وياه سوه * چم جرح منه ارتوه
بهالقميص شگد حوافر لعد چم جرح انجرح

منّ ألگــفه بخيل انسـحگ ومهشمه ضلوعه
ومن الصدر سهم ورمح يحــتمل يا لوعــه
بهالقميص اشچم سؤال
إلبس الجمعــــه وتعـال
ـــــــــــــــــــــــــــ
ارد اطش له دموعي طش * واحچي عن ليل اهدعش
ماكو حاجه اشرحله وضعي يعلم البيه ويحس
بس يشوف اعبايتي * يگلي آه يا عمّتي
لو نظرلي يگلي عمه بيچ شمسويه الشــمس

الشمس گبلك يا هلال الغـــيـّـرت حالي
هالطلب منك بس ردت من تهل يهلالي
رايده يلمنه الوصــال
إلبس الجمعه وتعـال
ـــــــــــــــــــــــــــ

مهدي التقي

#الناشر_الحاج_فلاح_حسن
#يسمح_بالنشر_ويسمح_حذف_حقوق_القناه
#ولا_يسمح_بحذف_اسم_الشاعر_او_تغيره
#ولا_يسمح_بالنشر_للقنوات_والكروبات_التي_تضع_عباره_غير_مبري_الذمه_من_يقوم_بازاله_روابطها