نعي السيدة رقية روحي فداها
****
فزت من حلمها تريد ابوها
وجابو راس ابوها وسكتوها
التراجي اتكله عكبك سلبوها
وامتوني يبويه ورّموها
شمسويه وديّه جتّفوها
وضلوعك شفتهم رضرضوها

ردتك يالحنين تشوف حالي
عيني لراسك ودمعي يلالي
غربه الشام كلها وأهل مالي
وانه ميسره وما عندي والي

ما ضلت معزه ولا مهابه
وكعدنه اخلاف عينك عالترابه
عكبك ما لفاني النوم بابا
وابد ما تنحمل ذيج الخرابه

امسح دمك وامسح بالتراب
وشكيلك عذابي ودمعي سجاب
وكلك وين عني كل هالغياب
ما طاب الجرح بجفاك ما طاب

علي السجاد صاح بهل المسيه
عمه اعله الطشت ماتت رقيه
وزينب عمتي شبكت عليّه
ومن ذاك الحبل دم تجري اديه




الشاعر
تحسين الخفاجي

*رقية ورأس الحسين*


*طفله اتريد أبوها ايعذبوها*
*وايجيبون إليها راس أبوها*

اتنام وتصحَى ياطول الليالي
اشلون اينام من فارق له غالي
وسمعَت صوت يبنيتي تعالي
*يا أصغر يتيمه سلّبوها*

وفِزعَت بين مثكوله و حزينه
وصاحت بويه وينه بويه وينه
شفته بالحلِم فاتح ايدينه
*و جابوا ليها ماي ايشرّبوها*

قالت ما أريد الماي والزاد
عيني اتريد تنظر أبو السجاد
محلات الأبو يحضن الأولاد
*تسألكم رقيه و جاوبوها*

وضجّت في الخرابه النسوه كلها
طفله اتريد أبوها من يحلها ؟
جابوا بالطشِت عزها و أملها
*وفي ساعه اليتيمه شيّبوها*

ومن شافت أبوها انقطع ظنها
وضمّت راس أبوها في حضنها
من يتّم رقيّة ابصغر سنها
*وش حال الغريبه الغرّبوها*

بويه أحچي لك وش صار بينا
من رحتون يا بويه انسبينا
و اخيول العدى هجمت علينا
*و لمدلله بالسوط اضربوها*

والسلاّب يوم اللي إجاني
شد قوّه التراچي من أذاني
لو قلّي أريد أنطيه آني
*ما حاجه الأهلهم يسلبوها*

لو محتاج للمال ابحياته
صدقني التراچي ابطيب جاته
أهديها أنا مني البناته
*و لا بدموم أذاني يسلبوها*

وأطلب ماي وجابوا لي واجيتك
عطشانه يبويه و دوّرتك
بين الما عرفتك ما لقيتك
*تطلب ماي إليها حسّبوها*

بويه وانتظرت الليل كله
وادموعي الوضوءك أستهلّه
أفرش وأطوي بويه بالمصلّى
*و أحبابي الأماني خيّبوها*

ومن بعد انتظاري ايعود ليّه
بس راسك يبويه بين ايديه
شتسوي في هالدنيا رقيه
*ماتت بالحزن عالراس أبوها*


عبدالله القرمزي
17/9/2020 م
28 محرم 1442 هـ