لسان حال كل خادم للزهراء عليها السلام

ما رايد مدح عالخدمه لا شُهره
بس رايد رضاتچ عني يالزهره
...........

يهنياله اليصفي النية بالخدمه
المهم گلب الموالي مو مهم اسمه
اليخلُص بالعمل يعله بعلو النجمه
ويهنياله التوفّق فاطمه تنظره
..........

اذا بيّه الغرور اتلبّس ابديني
دخليج فاطمه مولاتي نبهيني
بغروري وكبريائي لا تعوفيني
سماحچ والكريم يسامح الفقره
...........

اذا لا سامح الله وما قبلتيني
وين انطي الوجه مولاتي حاچيني
امامي المهدي يطردني ويجافيني
يضيگ بعيني هذا العالم بأسره
...........

اذا شفتيني مرّه تكبّرت بسمج
حلمج فاطمه مولاتي بس حلمج
للمجلس اجيتج أعتذر يمّج
التوبه التوبه عفوج عني هالمرّه
.............

اذا ما استحق خادم تسمّيني
خادم للخَدَم مولاتي حسبيني
اكنس بالمجالس عاد خليني
لو صفّط نعِل خدامج بعبره
.............

عله مصابج جبت عمري أون ونعه
الليالي الفاطميّة شهود والدمعه
اموت بلا مجالس والله يالبضعه
اريد ارضيج وجبر ضلعج وكسره
.............

اواسيج بمناحه ودمعه سچابه
المجلس لو اجيته اوكف ابابه
اصيح بصوت آ يحسين ومصابه
ومثل ما يقره ناعيّچ اظل اقره
.............

ادري بكل حُسيّنية ألچ لوعه
عله حسين الذبيح الكسرو ضلوعه
يهنياله التواسي دعوعج دموعه
ويوسّم باللطم يافاطمه صدره

#سيد_زيد_الفحام
__

ميمر مذيل رباط عگيلي للدفن



يــا عمّــه يالسجـاد گلّي شحــاله
بيا حــال بيــدك جمّعــت اوصاله
شخلّــت يعمّــه ابجثتــه  الخيـاله

(( جسمه اعلى الغبره امگطعينه  ))

****
يا عمه عشر اخيول رضت صدره
وذره يعّـمــه مــا بقــت يــمْ وذره
وياك اظن لمّــت اوصالـه الزهره

(( بالنوح اتجمع بأوصاله ))

****

گلها وتهل مــن المصــاب دمــوعه
يا عمه روحي من الدفن  مفجوعه
عمّــه نظــرته مهشمــات ضلـوعه

(( مطحونه ابسحگ الخياله ))

****


تنـزف يعمّـه جـروحه لمّن شلته
بلا مــاي عمّـه ولا غســل نزلته
لا راس تالــي بس نحـر وسدته

(( ارتج الكون لهل الحاله ))

****

يا عمّــه وبدمعـه التهل مذروفــه
تعنيت أبو فاضـل نظـرت ﭽفــوفه
ابدمه الگمر حنّـه النهر وجروفه

(( وسدته ويرجف ﭽف ايده ))

****

شلت الشباب وگلبـي احسه تفطر
جســام جمره بالگلب ظـل يسعـر
يا حــال عمّــه مــن نظرت الأكبر

(( ﭽن طاها امگطـع گـدامـي ))

****

عبــدالله عمّــه اتعجبت مــنْ امره
من راد أبو اليمـه اوسـده لصدره
حَسّيته ﭽن شمّه الحسين  بنحره

(( هد حيلي امصابك عبدالله ))

****

بعــد الدفـن يــا عمتي وآلامــه
ياذيج يا درب السبــي وايتامـه
باﭽر ايزيــد يشــاهدﭺ گــدامه

(( هذا اكبر جرح الياذينه ))

****
الشاعر
موسى البديري

ندبة الامام المهدي عليه السلام

يمته صوتك يعتلي
وتظهر براية علي
تاخذ بثار الحُسين وثار عباس
..............

بالسلام عليك نبدي  سيدي يبن الحسن
انشالله بخير وسلامه  ندعي بدموع وشجَن
چم محرم مر علينه  الف عام امن الزمن
يمته للثارات تظهر  يالعليهن مؤتمَن

يمته ياتاج الزلم
من عدّوك تنتقم
تظهر بسيرة مُحمّد تحكم الناس
................

هذا عاشور المصايب  هيّجالك چم جرح
يابوصالح وانت گلبك. بي الف طعنت رمح
اكبر واعظم جروحك  يوم عاشر ينفتح
جدك يسفكون دمه  گبال زينب ينذبح

وهيه ما الهه احد
تنتظر المن بعد
حسين بخيول ال امية صدره ينداس
.................
حان وكت الثار يومه  انهض واعلن حرب
لسّه نحر حسين دامي  بالگبر دمه يصب
سهم ابن كاهل تشوفه  نابت بلب الگلب
ضامي من ذبحوه يمهدي  ونچوه بذاري الترب

بالصبر لا تكتفي
اخذ ثارك يالوفي
بأي مصاب مصاب گلبك حاشه ينقاس
...................

عمك العباس طايح. تدري بي يم النهر
من وگع وچفوفه طاحن  ظهر الحسين انكسر
عالشريعه الراية ظلت  تنتظر منك خبر
تاخذ بثار ابوفاضل  من تجي يالمنتظر

هذا ابن حامي الحمه
سوّه بالطف ملحمه
من علي وارث خصاله ما يطخ راس
.........

اعظم واصعب مصيبه. اذّتك يبن النبي
من خذوا زينب سبيه  آه ياجرح السبي
من بعد عباس وسفه. يحدي بيها الاجنبي
گوم گص راس السّباها  وفني حكم الناصبي

اظهر بسيف النصر
اشفي گلب ام الصبر
انت بس تشفي گلبهه عدها احساس
..........

نندعيلك بالمجالس  وانت حاضر تستمع
عجّل اللهم عجّل. للامام المنفجع
ثار ابواليمّه يمهدي سيدي وثار الضلع
ياوكت بيهن تطالب  نسأل بفيض الدمع

كلها تطلع شيعتك
من تشاهد رايتك
نتتظر ساعة ظهورك لاخر انفاس

سيد زيد الفحام
_

مواساة الإمام المهدي عجل الله فرجه الشريف

يالمهدي يا مولاي يبن الزجيه
من يا جرح موجوع من يا رزيه
٠٠٠٠٠٠٠٠
كثره الجروح البيك الله يعينك
من يا جرح مولاي دم تبچي عينك
ولمن يهل عاشور يشتد ونينك
عالداسته مرّات خيل اعوجيه
٠٠٠٠٠٠٠٠
لاشك اشد مصاب سبي العقيله
لمن خذوها چتاف فوگ الهزيله
لهاي المصيبه دموم دمعك تسيله
ام الخدر يا حيف تطلع سبيه
٠٠٠٠٠٠٠٠
الماشافوا الهه خيال خلّص عمرها
شافوها بالطف حيف سلبوا خدرها
بيد الشمر يا حيف اصبح امرها
عكب الكفلهه تروح بين آل اميه
٠٠٠٠٠٠٠٠
يكتل مصاب حسين ذبحه ومماته
وصعب بعد من هاي سبيت خواته
اكثر جرح اذاك جرح الشماته
يالمهدي جرح الشام اكثر اذيه
٠٠٠٠٠٠٠٠٠٠
مَنلومك عله النوح والدمعه هايه
عمّاتك بيا حال عندك درايه
لمجلس يزيد شلون طبّن سبايه
حگك تسيل دموع صبح ومسيه
٠٠٠٠٠٠٠٠٠٠٠
عَجّل يمهدي الثار طال انتظاره
ثار المشن للشام ثَكلَه وحياره
گلبك يظل موجوع ما تطفه ناره
لمّن تسل السيف عالناصبيه
٠٠٠٠٠٠٠٠٠٠٠
وهل المجالس هاي رفعت اديهه
تدعي لظهورك كون يگرب عليهه
انصارك الخدام يالتدري بيهه
دونك نضحّي نحور يوم المنيه

طور / يبن امي عالتربان عفتك رميه
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بالطف دفنت عيوني الثنين
وسلّم عليچ هواي الحسين
يا عمه وبكلامه
وصاني باليتامه
عيوني الثنين
..
من امس ما نمت ليلي و جفن ما لاگه جفن
وهالتراب الفوگ وجهي بقه من تراب الدفن
شلته بيدي وشفت صدره الخيل طاحنته طحن
عمه من سهم البالچبده والدي لسه يون

لميته بيدي لم الدموع
ساعه الم چبده وساعه الضلوع
المتهشمه عضامه
وصاني باليتامه
عيوني الثنين
..
حسين ابوي وما عرفته مملي طعنات وطبر
من اشيلن كتر بيدي يطيح من ايدي كتر
بالرمل متروس نحره وچان رمل الطف جمر
بكل جرح الگالي نبله بكل عظم الگه كسر

عالرمل نايم والرمل حار
مدفون جسمه بنبل وحجار
الفوگ الرمل منامه
وصاني باليتامه
عيوني الثنين
..
من النحر وياي يحچي وخذت روحي حچايته
يا علي عبد الله خلي فوگ صدري نومته
منذبح عطشان مثلي ومثلي ذبلت شفته
يرتوي يابويه گلبي من اشمن ريحته

ملچوم يحچي من النحر چان
عبد الله ليش يموت عطشان
البچاه حرگ خيامه
وصاني باليتامه
عيوني الثنين
…
انه ابچيله وبچالي وگال غربه غربتك
بويه شو رديت وحدك وين زينب عمتك
ليش ايدك دمه تنزف ليش تنزف رگبتك
ليش محني وفوگ راسك ليش ما هي اعمامتك

گتله يبويه بغربه الضعون
واسياطهم ما خلت متون
بمتني بقت علامه
وصاني عاليتامه
عيوني الاثنين
…
گبل ما هيلن ترابه حچه ونزلت دمعتي
بويه سلملي اعله زينب ريحة امي وشمعتي
بوسلي بنيتي سُكينه وشم رقيه ابنيتي
هواي مشتاگ لبناتي فراگهن فت مهجتي

رد لخواتك كافي الوداع
الليل اجاهن ارجع بساع
چان الحچي ختامه
وصاني باليتامه
عيوني الثنين
…
خادم الحسين ( عليه السلام)
كرار حسين الكربلائي
( ابو كميل )

 للسبي
.
.
.

 
اكــبر جــرح بعيـون ابوصالح
ظـعن الفـواطم للســبي رايح
العــمـاته .. لچماته
وماتنشف .. دمعاته

***

صــباحــا ومــســاء .. بــكاء الـكـــربلاء
حياة المهدي ابوصالح عــباره عن عزاء
معانات وجـــراح .. بــدت فـوگ الرماح
ويه الروس الي نشالت ظعن عماته راح
 
جلالة ســـتر ال البـــيــت مگــيودات اديـهن
المصيبه الذبح عبــاس هــوه الــيحدي بيهن
 
لو هده ونــهن من يطـــب ديره
بالسوط يضرب راس ابو الغيره
مأساته .. وجمراته
وماتنشف .. دمعاته
***

الحنت ظهر الامـــام .. وتخـــلـــي مــايـنام
العلــويات اخـــذوهـــن بـدون أي احـــترام
بعرض حامي الدخيل .. الغـرب گامت تعيل
شــماته ولان شـــافوهن نـــساء ابـــلا كفيل
 
ظعن مو للسبي لا كون ينحـط بين الاحداق
يطاف بظعن ال البيــت وسفه بين الأسواق
 
ال الله العفــاف مفـــصله الظلهن
المايســوى واليــسوى يـصد الهن
ولوعاته .. وحسراته
ماتنشف .. دمــعــاته

***

على الهــزل يـــسيــر .. جـــرح گلبه الچبير
ويسمع صوت عمـــته ام عون لمن تستجير
تصد يسـره ويـمـــين .. تــــدور عـــالحسين
نخت والـشمر گال الها اگطعت بيدي الوتين
 
ايسي مايرد حسين زينـب لاتحشمين
هذاك العالرمح راسه چنج ماتشوفين
 
شافت اخوها عاري ومسلب
من حقها لـمن تنــعمي زينب
احچاياته .. اوناته
ماتنشف .. دمعاته

***

الامام المهدي شاف .. امــيرات العفاف
بحالة مزريه عالنوگ من كلــشي تخاف
الناس اخذت قرار .. تشــامرهن احجار
المثلهن زحمه يتــشامر وحــدتـهن مزار
 
وادم مـــن اســــطوح الدور نار تــذب عـليهن
وقسم من عدهم يضحكون چي ذبحو وليهن
 
الچانت حمايه تطلع اوياهن
صاحوا سبايه هسه جبناهن
حچاياته .. اوناته
ماتنشف .. دمعاته

***

الف موته يموت .. ابوصــالح سكوت
كلما شاهد بعيــنه ظـعن زينب يفوت
ظعن للســبي سار .. ظــعن كـله مرار
اذا لكبــار سابـيهن شــنو ذنـب الزغار
 
شنو ذنب الأطفال تروح بله بظـعن الاحزان
اديهم كلــش ازغيـرات وحبال السبي امتان
 
بالشام مــن دخــلو خـرايبهم
فوگ الســبي زادت مصايبهم
وغـصاته .. ولهفاته
ماتنشـف .. دمعـاته
***
حيدر تركي الكربلائي

اضل مشتاكه لعيونه

دفنته إوترد من دونه

*لو ماخذني خويه من دفنته*

*ماشميت ابوي ولا حظنته*

اضل مشتاكه لعيونه

////////////////

بين اربع حيطان… وبّالي العطشان ..

لميته ابحصيره ..اموذر عالتربان

ابوي حسين عالغبره اتلث تيام

ابوي حسين عالرمله شلون اينام

جروحه هواي واغمجهن جرح الشام


*اشكلت من فرن ابهيمه*

*وبوي اعيونه عالخيمه*


تمنيت اتچيله وكون عِنتَه

ماشميت ابوي ولا حظنته

اضل مشتاكه لعيونه

///////////////////

اتمنيت إمن اتروح… .وتلم المذبوح

وياك العليله… .اتكابلكم وتنوح

عليل شلون لميته يالسجاد

تطشره الخيل وبجسمه الحافر حاد

دم ورمل بعيونه وفوكه ارماد

*يريد ايكوم مايكدر*

*وگلبه عالحرم يسعر*

بالك حكه لو طالت صفنته

ماشميت ابوي ولا حظنته

اضل مشتاكه لعيونه

/////////////

ادري ابونك طال… واتخيل هل حال

من شفته عزيزك… متچفن برمال

تِوِن وتصيح يابويه اخ حسين

ثلث تيام شو عاري ابلا تَچفين

اصابع تسعه شو عندك اصبع وين

*حته الخنصر ايكطعه*

*بجفه شو بقن تسعه تسعه*


اصبع واحد وبالطف فكدته

ماشميت ابوي ولا حظنته

اضل مشتاكه لعيونه

//////////////

اشچم وذره اعله الكاع… شفته وگلبك لاع…

اتذكرت العقيله… راحت دون اوداع

تِگِله حسين شو نايم بس مكلوب

يخويه مكطع وشفتك هم مسلوب

ونطب السوك ياخويه ونمشي ادروب

*تِكله حيل مابيّه*

*صرت زينب المسبيه*

تشب نار ابدليلي وترد ونته

ماشميت ابوي ولا حظنته

اضل مشتاكه لعيونه

//////////////////

مايرضه امشي وياه ....اه وتتبع اه

راح وما يردلي....مو غايب واتناه

أضل عالباب اتنطر بلچي ايعود

لچن حسين ماردلي وبالملحود

الفركه وعِلِتي وجرحي ايرد اردود

*عليله امفاركه الغالي*

*ويبجي الصخر حالي*

ويضل دلالي ما تخلص مِحنته

ماشميت ابوي ولا حظنته

اضل مشتاكه لعيونه

/////////////////

نسالكم الدعاء
احمد الطيب الحلي
13 محرم 1447
9/7/2025. الاربعاء

سولفلي… .من رحت عمه للدفن ..

سولفلي… عفت النحر يبجي ويِوِن ..

انكث عَلَيَّه تراب من كبره ..

تراب العَلَه  هدومك اشم عطره ..

سولفلي…

/////////////

الله يساعدك عمه البكَه براسك ..

راجع منكسر چن حافر الداسك…

دفنته ياعلي السجاد باحساسك ..

لأن ماكاملك لا شبكَه لا باسك…

يلجمني… اتكلي يزينب اشبكَه ..

يلجمني… مكطع وذر مِنَه إشْبِكَه…

وحسين ابوي ابكل كِتر وذره…

تراب العله هدومك اشم عطره ..

سولفلي ..

/////////////////

بيدك جست كَلبه اشكالك زينب ..

وبيدك من دفنته اشهيست يلهب ..

تره العباس راسه إعلَه الرمح شيب

يِكِلَك ضعن زينب لليسر غرب ..

يباريني… ماچنه راسه عالرمح..

يباريني.. عباس ماچن منذبح..

عالرمح ويصدلي إبأحن نظره…

تراب العله هدومك اشم عطره ..

سولفلي ..

/////////////////

اجت هاي الرباب اتكلك وليدي ..

ماراضع ثلث تيام إله إوْحِيدي ..

فرغن  حظني والكاروك اهز بيدي ..

يمكطوع النحر لو نازف وريدي ..

عبد الله… من العطش كلبه التهب..

عبد الله… تاليها من دمه شرب..

من شاله ابوه رايد ولو كطره..

تراب العله اهدومك اشم عطره..

سولفلي…

/////////////

رمله هل اجت تنشد عن القاسم…

عرس لو فاتحه نصبت بني هاشم ..

شو عريس صاحت عالرمل نايم ..

عله خده ورد رب العرش راسم..

من شفته… بجفوفه حنه لو دمه ..

من شفته… بهيده الجرح لاتلجمه ..

لو ادري اروح اتمدد ابكتره…

تراب العله هدومك اشم عطره ..

سولفلي…

///////////////

لِيلَه تِنشِدَك عن دَفنَت الاكبر ..

دفنته وحَّدَك من تمشي تتعثر !!؟؟

ماتنطيك روحك ادري ماتكدر ..

صحت واحد يعينك ضلعك امكسر ..

عينوني… . حظروا عشيرة بِنْ اسد ..

عينوني… وَسدولي الاكبر باللحد ..

اليدفن اخو جوه الضلع جمره…

تراب العله هدومك اشم عطره ..

سولفلي ..

///////////

تكلي عمه زينب كلبي هَم متروس..

واثر حافر ابصدره بقه من الدوس..

جسم حسين طعنه لو جرح متروس..

كلهم والرضيع اندفنوا ابلا روس..

هد حيلي ..حته الطفل راسه انكطع ..

هد حيلي ..من ثدي امه ماشبع ..

وتفطمه نبلة حرمله بنحره ..

تراب العله هدومك اشم عطره ..

سولفلي..

/////////////

نسالكم الدعاء

احمد الطيب الحلي

رايتـنه وحـــده رايه شيــعيه
وتجمعنه هالخدمه الحسينيه
     ــ⊱☆☆❀☆☆⊰ــ

يجمعنه حب حســـين مولانه
التشكل علينه الناس خسرانه
واحــدنه خادم صـــار عنوانه
وبس ياحســين ايردد السانه

وگلوبــــــنه بيض اولائــــــيه
وتجمعنه هالخدمه الحسينيه
     ــ⊱☆☆❀☆☆⊰ــ

ثوب الخدامه ايشيم الخادم
الماناله يصــبح بالحشر نادم
هنيالها بحســـــــين هالوادم
تســــجد شكر لله عليه لازم

نيتــنه حب وخـــلاص مبنيه
وتجمعنه هالخدمه الحسينيه
     ــ⊱☆☆❀☆☆⊰ــ

رايـاتنه اتضـل دوم مرفــوعه
لجل الذبيـح الرضـــو اظلوعه
الماهلن ابهذا العـــزه ادمــوعه
ما واسه اخته البقت مفجوعه
 
واجـب عليـــــــنه انـوح ليله
وتجمعنه هالخدمه الحسينيه
      ــ⊱☆☆❀☆☆⊰ــ

اشما صـــار مانترك شعائرنه
وماتنخرس صرخت منابرنه
لحسـينه انضحي ابمناحرنه
ونقراله يحســين ابظمايرنه

كل ليله لجله انســوي لطميه
وتجمعنه هالخدمه الحسينيه
      ــ⊱☆☆❀☆☆⊰ــ

لمن نجي ابلهفه الجوامعنه
نتوضه احـنه مـن مدامعنه
حب الحسين اليله جامعنه
نشكيله بالمجلس مواجعنه

انواسيه ابسبي اسكينه ورقيه
وتجمعنه هالخدمه الحســينيه
      ــ⊱☆☆❀☆☆⊰ــ

✍الخادم
كامل السعيدي

‏عـالگبر ذب اعمامته اسجاد هاي الليلـه

‏
‏شاف الصعب والماجره    اسجاد هاي الليلـه
‏ووصال ابوه امطشره
‏يبچي ويدور خنصره
‏من مالگه المحبس بقه بس الحزن يوميله
‏عـالـگـبـر ذب اعمامته اسجـاد هاي الليلـه

‏
‏ امصاب مثله مـاسده    اسجاد هاي الليلـه
‏ابلاراس يـدفـن والده
‏واشـلون راح ايوسده
‏مهضوم ومتعبه الوكت من الهضم يشكيله
‏عـالگـبـر ذب اعمامته اسجـاد هـاي الليلـه

‏
‏محتار مكسور الظهر     اسجاد هاي الليلـه
‏يم والـده گلبه انكسر
‏وسد رضيعه اعلى النحر
‏يم الكبر حيله انهدم وحسين هدم حيله
‏عـالگـبر ذب اعمامته اسجـاد هاي الليلـه

‏
‏تجري اعلى الاكبر دمعته    اسجاد هاي الليلـه
‏واحـتـار مـابـيـن اخـوته
‏رمله اعلى جاسم وصته
‏اوساده من ثوب الحسن من يدفنه يخليله
‏عـالـگـبـر ذب اعمامته اسجـاد هاي الليلـه

‏
‏واتعنه صوب المشرعة    اسجاد هاي الليلـه
‏واشلون شاهد مصرعه
‏دامي وچفوفه امگطعه
‏اتطول سالفته السبي عن السبي يحچيله
‏عـالـگـبـر ذب اعمامته اسجـاد هاي الليلـه

‏
‏محتار خايف من يرد   اسجاد هاي الليلـه
‏من عمته ايطول النشد
‏ويـعـرف گـلبـها ينـمـرد
‏يبچي اعلى عمته ام الخدر وهي بعد تبچيله
‏عـالـگـبـر ذب اعـمـامـتـه اسجـاد هاي الليلـه
‏
‏
‏هـاني ناصـر السـعيـدي
‏

حال الامام السجاد (ع)
عند دفن الاجســاد 👇

للغــاضريّه إتعنيّت ٠٠ أدفن حسين وگومه
ــــــــــــــــــــــــــــــــــــــــــ
هذا آنه زيـــــــن العــابدين السجّاد
آنه العليــــل وحـزني هاليـوم إزداد
جيت لمفــــاوز كربلا وحيــلي إنباد
ياشيعه عينوني إعلى دفن الأجساد

بگاع المصايب طبّيت ٠٠ بدمعة حزن مسجومه
ــــــــــــــــــــــــــــــــــــــــــ
مجروح گلبي وهالگلب شيصبره
وأنظر هلـــي المتــوّسدين الغبره
أجســـــادهم مابين طعنه وطبره
صرت أغســل الدم بمسيل العبره

حاير صرت من صدّيت ٠٠ كل الجثث مخذومه
ــــــــــــــــــــــــــــــــــــــــــ
والخلّه بركــان المشـــاعر ينهار
لمّن دفنت بإيدي هـــاي الأنصار
وشلون بيهم هالفــكر مايحتـــار
كومة وذر شمخليه بيهم الأشفار

ظلّيت أعـالج ظلّيت ٠٠ وگلبي شيفّك همومه
ــــــــــــــــــــــــــــــــــــــــــ
ظلّيت أعـــالج بالحــزن وأتحسّر
متحيّر وحـــالي يفســـــر المرمر
وحين إدفنت بالهم إخوي الأكبر
بركــان ـحزني بهالمصيبه إتفجّر

الأكبر شبيه المختـار ٠٠ وارث أسرار إعلومه
ــــــــــــــــــــــــــــــــــــــــــ
آلآم گلبــــــــــــــي المامثـــــلهن آلآم
حين الشفت مطفيّه شمـــــعة جسّام
ولمّن شفت مصيوب من عنده الهام
تذّكرت طبره راس جــــدّي الضرغام

جاسم تخّضب ياحيف ٠٠ ثوب العرس بدمومه
ــــــــــــــــــــــــــــــــــــــــــ
بزلزال همّي إنهــار حيلي وصبري
وإسمعت من نحر الحسين اليجري
وسّد رضيــــعي ياعلي عد صدري
هذا العزيـــــز وهــوّه شمعة گبري

وسّدته يم جسم حسين ٠٠ وبحسـرتي المكتومه
ــــــــــــــــــــــــــــــــــــــــــ
ومن كمّلت دفن الجسـوم بهمّي
تعنيّت يم النهـــــر أدفــن عمّي
شفته صريع وعالتـرايب مرمي
وبلحده وسّدته وتهّـــدم عزمي

مگطوعه منّه الچفيّن ٠٠ ومتغيّرات إرسومه
ــــــــــــــــــــــــــــــــــــــــــ
فراس المحمداوي

- موشح في دفن الاجساد الطاهرة

شلون ماغابت من الكون الشمس
وانته نايم عالثره امن أوّل امس

الك ثالث يوم مرمي اعله الترب
تچوي بجروحك الگاع شگد صعب
جيت بويه الدفنتك طاوي الدرب
شلون اشيلك جثتك شبعت رفس

بلايه راس وجثتك متطّشره
وذر وابحرّ الصعيد امصهّره
گمت اجمعك بالحصيره من الثره
الله يلعن بني ميّه وكل رجس

ياحسين الميّت اكرامه الدفن
ليش خلّو جسمك بوادي الطعن
ظلت اوحوش الفله الچتلك تون
والأرض ماجت وتفتر بالعكس

بويه عفت العايله بذاك اليسر
وجيت ادفنك واحفر الجسمك گبر
عمتي زينب عليّ ظلت بالفكر
اتدوّر اعليه يبو اليمه أحس

احفرت گبرك والگلب حزنه چببر
وحگي بويه بدفنتك لو چنت احير
راس ماعندك وجسمك عالحصير
وين خدك حتى اوسدك بالرمس

وسدت جسمك ودمعاتي تهل
وحسب ماوصّيت بويه بالطفل
عله صدرك غافي وبنحره النبل
وداعة الله حسين يا أشرف نفس

علي الأكبر كسر ظهري بدفنته
بويه يم رجليك صارت حفرته
وسدت روحي احس وي جثته
الله يلعن قاتله العبدي الرجس

بحفره وحده ادفنت انصار الوفه
ووسدت سبعين جثه نازفه
من ضمنهم جاسم الضيّه اختفه
شلته بيدي ملفلف بثوب العرس

بس حبيب بن مظاهر وحّده
حتى يصبح غداً عنوان الفده
بدمه راسم تضحياته الخالده
شيبة الأنصار للعالم درس

وبعد عندي هناك يم المشرعه
عمي طايح والچفوف امگطعه
گمر هاشم ماتلمّه الواسعه
راح ادفنه والعذر منه التمس

يالله خل ارجع واخبّر عمّتي
عالجمر بالكوفه تنطر جيّتي
من تشوف اتراب فوگ اعمامتي
بدفنت الغالين يحسين اتهَجِس

فراس المحمداوي
١٢ محرم ١٤٤٣

حسين ظل ابلا غسل هاي الچبيره
للگبر يـانـاس اخـذتـه بـالحصيــره
~
كأنّي بالامام ايسولف امصابه
زين العابدين ادموعه سچابه
يعينه الله البيده دافن احبابه
والمـحـد يـعـزيـه ويــدگ بابه

الچانت الوادم تگصده وتستشيره
للگبر يـانـاس اخذتـه بـالحـصيره

~
يگول آنه الدفنت احسين ابو اليمه
لمّيته ابـحصـيـره اضلوعه متهشمه
متوذر ابـوي اعلى الـثـره جـسـمــه
والـحـافر للامخيـم أخـذ هـدمــــــه

گلبي صار امن الحزن يوسعله ديره
للگبر يانـاس اخــذتـه بـالـحـصيـره
~

بعدني ابدفنِته ومصابه هدّمني
واسمع صوت من نحره يكلمني
على صدري توسّد ياعلي إبني
عبدالله دفـنـتـه وگلبي مالِمني

ونحر اخوي ونحر ابوي ابفد حفيره
للگبر يـانـــاس اخذتــه بـــالحصيره
~

مايمشي النِفس وبصدري يتكسر
ونـه الـدافـن بـديه جـثـــة الاكبر
حيرني ابدفـنتـــه جسمه الاموذر
الضِمه امبين عليه اميبِس المنحر

ابلايه راس اشلون عالقبله اديره
للگبر يانـــاس اخذتـه بـالحصيره
~

تعنيت الشريعه واحترگ دمي
وبالگوه مشيت وياثگل جدمي
وبديه اشلون أدفن ياخلگ عمي
واچفوفه الگطيعه زيـدت همي

ياوسافه ايموت عمي الكله غيره
للگبر يانــــاس اخذته بـالحصيره
~
وين اهلي الهواشم واني بمصيبه
عن اعيوني شو غابو فرد غيبه
ولا واحد اجاني ونِدفن الهيبه
راحو كل هلي والراح شيجيبه

والعدو مايرحم وميت ضميره
للگبر ياناس اخذته بالحصيره

~
ضل بس النِفس والدمعه بـعـيونــي
ونه ابساعه فگدت احبابي تدروني
اويه ابوي احسين اتمنه يدفـنـوني
ويـم گبره تحظرون وتـواسونـــــي

ياكسرتي الوالدي وشعندي غيره
للگبر يانــــاس اخذته بـالحصيره
~
المصيبه اتهون كلها اشما جره اعليه
الهضيمه اشلون عمتي تمشي مسبيه
وتـطب ديـوان اميه وهـيـه عـــلويـه
ولاكن تـبـقـه زيـنـبـنـه قـيـــاديــــــه

مو اسيره عمتي بل كانت أميره
للگبر ياناس اخذته بـالحـصيـره
~
حيدر بشار الدراجي دفن الاجساد الطاهرة

بين آهات وحـزن
عمّه جيت من الدفن
چم گبر بيدي حفرته وظهري مكسور
وسدت أحباب گلبي وسط الگبــــــور
عمه عمه

عمه يا زينب رحت للغـــــــــــاضريه
ادفن جســــــــوم الوفه الظلت رميه
شموس مدري شلون ضمتها الوطيه
ما بگت يا عمه ذرة حيــــــــــــل بيه

غسلتهم بالدمـــــــع
والهم أحنيت الضلع
جمـرتي بين الجوانـح ظلت تـــفور
وسدت أحباب گلبي وسط الگبــور
عمه عمه

إهنــــــــاك گبر إچبير ياعمه حفرته
هالگبر لأنصــــــــار ابو اليمه جعلته
جـاسم العريس ويــــــــــاهم دفنته
لا تنشديني يعمه شلـــــــــون شلته

بس حبيب الوحده
دفنته متفـــــــــرده
هذا شيخ أنصارنه وبالهمه مذخور
وسدت أحباب گلبي وسط الگبــور
عمه عمه

علي الأكبر هدم حـلي يالعقيله
ما شفت بجسوم أهل بيتي مثيله
جسمه متوذر وحرت شلون أشيله
والتراب شلون عالغــــــــالي أهيله

صحت عالدنيا العفه
والــمدامع ذارفــــــه
شلون بتراب الگبــــــــر يتوسد النور
وسدت أحباب گلبي وسط الگبـــــور
عمه عمه

من دفنت حسين ابويه والله حيره
مهشمه إضلوعه وجراحــاته چثيره
إتحيرت من ردت أنــــزله بالحفيره
والــــــدي يمّ الخدر شلته بحصيره

بالـمواجع والقهر
قبلت منه النحـر
راس ماعنده يوليلي وصبعه مبتـور
وسدت أحباب گلبي وسط الگبــــور

والدي وسّدته وبعينــــــــــــــاي جمــره
لنّــــــي اسمع صوت وإيحاچيني نحره
إيريد أخلي الطفل عبدالله إعلى صدره
وإدفنت عبد الله بيـــــدي بنفـس گبـره

بعد لسّـــــاه النبل
نابت بنحر الطفل
بالگبر منحور راد إيــواسي منحور
وسدت أحباب گلبي وسط الگبــور
عمه عمه

عالنهر مازال يرجف غيــــــــره عباس
رغم لا چفـين والجثه بـــــــــــلا راس
بالتراب شلون عمه إدفنت الإحساس
وهو يدري عگـب عينه الخدر ينداس

إمصيبه وتفت الچبد
گمــــــر هاشم باللحد
گتله يابو الفضل ياعبــــاس معذور
وسدت أحباب گلبي وسط الگبـــور
عمه عمه

فراس المحمداوي

شور للسبي

بكل خطوه تمشي تگض الاصفاح// بهذيج الهيمه
   ولروس وياهه علل ارماح// بهذيج الهيمه
    ‏★
   منا بداية صعدت النوك
صعدت الناگه وجفهه محروك
چف عله چف بحبال مشبوك
تباوع لخيهه راسه مبيوك
الميت اخوها شلون ترتاح// بهذيج  الهيمه
ولروس وياهه  اعلل ارماح//بهذيج الهيمه
    ★
بحر الضهر لسعات السموم
‏وكل طفله ميته بعينهه النوم
‏ وزينب لهلها عيونهه تحوم
‏تغير وجهه وذيج الارسوم
  وبترس اذنهه تسمع اصياح// بهذيج الهيمه
ولروس وياهه  اعلل ارماح//بهذيج الهيمه
    ★
  زينب چبيره وركضت بليل
السجاد ماخذ منهه كل حيل
‏ شيسوي وحده لاكن عليل
   ‏ياسبي تعّب هل المداليل
   ‏بكربله طلعن كل الارواح// بهذيج الهيمه
   الروس وياهه اعلل ارماح//بهذيج الهيمه
    ‏★
   ‏الروس سوت صيت للماي
  ‏وحسين راسه الزينب افياي
  ‏ وصغار مجويه عله حفاي
  ‏الساتر الله  يخوف الجاي
  ‏الشام تمشيله وي ذباح // بهذيج الهيمه
  ولروس وياهه اعلل ارماح//بهذيج الهيمه
    ★
  ‏بنت الهواشم اشرف اناس
  تنده بخيهه حدهم انداس
  ‏وبصوت زينب فزع عباس
  ‏امن الرمح يمكن دخن الراس
‏دمه يسيل عله الارض طاح//بهذيج الهيمه
ولروس وياهه اعلل ارماح//بهذيج الهيمه
    ‏★
سيد محمد الهاشمي   ‏
‏

((عندما وصلت إلى قصر يزيد))
نبرة صوتج مرجفه الدواوين
اصبعج هذا لو فقار ابو حسين
سويتي القصر تله
وسحكتي اعله الضلم كله
اصبعج هذا لوفقار ابوحسين
---------------
يهيبه عد علي الكرار ... عليهم صرتي موت احمر
وصلتي مجلس ابن ازياد.. علي وچن واصل الخيبر
اكيد الشافج من الخوف ....يروح بعيد يتكتر
مثل ما گلبج اتفطر .....قصرهم كام يتفطر
نزلت روس من شافوا مقامچ
تتراجف الدنيا من كلامج
حچيج مابرد دله
وسحگتي اعله الضلم كله
اصبعج هذا لوفقار ابوحسين
////////////////////////////
الروس الدنگت كلها.. صارت لونها صفره
حچيها السان لاجن سيف ..بس الميت يعبره
هلا برأية بني هاشم ...هلا بالورثت الزهره
الراس الهذا بالصندوك باجر ينگلب حضره
هزيتي الشوارب چنچ بخيبر
من حچيج قصرهم بده يتبخر
خلت بالزلم خله
وسحگتي اعله الضلم كله
اصبعج هذا لوفقار ابوحسين
////////////////////////
خطبتي بالقصر والجيش ,. وگف بعروگه مجرى الدم
عبالك تذلني انت … احلم يايزيد احلم
اني هم ابو فاضل ....الموت كبالي يتلثم
كلمتي سيف عد عباس ....اليضدني والله ما يسلم
مرة بس امر من السيف وابشط
عطشانة وتذل الماي والشط
احنا المايل انعدله
سحگتي اعله الضلم كله
اصبعج هذا لوفقار ابوحسين
///////////////////////
سوت مثل ماعباس ..حار بحار طفاهه
ضاگت بيهم الگيعان.. وحدر الگاع خلاهه
هيه وخيلها الفرسان ..صوب الكوفه رداهه
مو بس راس طك براس.. خيل بخيل طگاهه
مثل ماسوه اخوها هيه سوت
ضفاير والزلم كلها تلوت
يزينب صوتج الاعله
وسحگتي اعله الضلم كله
اصبعچ هذا لوفقار ابوحسين
////////////////////////
شالت راسها الحوراء .. صوب الراس وتگله
يبعد الروح يا عباس .. صاير بالرماح احله
عشت مرفوع راسك دوم .. حتى بموتتك تعله
اخذلك هيج حرمة تشوف.. صبرت عل ضلم كله
زينب والقصر حراسه رجفت
رياگ الناس من شافتها نشفت
وذلت جيشهم ذله
وسحگتي اعله الضلم كله
اصبعج هذا لوفقار ابوحسين
///////////////
سيد محمد الهاشمي

 مقدمه للسبي
.
.
.

لملمــت الـــسوالف بــيه مابيه
زينب بـت علي معقوله مسبيه
***
 
جبيره السالفه وموهينه يا هالناس
احطها براسـي لكن ماتطب الراس
اذا هالمراءة زينب وينه چا عباس
خـدرهــا ذاك ويـــنه اويــن راعيه
***
 
خدرها وين ذاك اليــوم اريد اسئل
خدرها البي عفـاف الدنيا يتوســل
على الناگه صدگ زيـنب بلا محمل
يريد الهالحــــچــي قـوه ومكــانيه
***
 
يريد الهالحجي مو روح لا روحـين
ولا مو لحظة استـدراك بل سنتـين
معقوله سبيه طالــعه اخت حـسين
الخدر معـــقوله هيــچ يصـير تاليه
***
 
معقــوله الـذي مــحد لمــح ظـــلها
هسه الناس وســفه تـشوفها كلــها
ودو طــارش العـــبـاس كــافــلــها
الــسيد خــل يجي ينــقــذ العلويه
***
 
السيد خل يجي ويشوف هذا الحال
زينب بــــت علي تمـشــي بلا كفــال
المصيبه فوگ هاي مگـــيده بحــبال
خـــذوها بلايه رحــمه ولا انـــسانيه
***
 
خذوها للـــســـبي ونـار الهـضــم تلهب
وچانت ويـــن هــاي الــسالفه الزيــنب
الشمر ينطي الخوله السـوط من يتعب
السوط المنها يفـــلت يضـــرب ارقــيه
***
 
مشــت وعيون كــثره حولها تنــظر
ودمــع عيونها بالوجنــه ضـل يحفر
الطف تــرد عليـها اردود مــن تــذكر
كــلام اخــوانــها المـتروســه حنـيه
***
حيدر تركي الكربلائي

(لحن هذا الغريب منين):

زينب وحيده  اليوم
ولْيه ولتها الكوم .. وليه ولتها الكوم
وين الهواشم وين
وين الكمر وحسين .. وين الكمر وحسين

------
ضاكت الليله الوسعيه
بعين الحتركت خيمها
احتارت بوليان هاشم
ياهو ويّـاها اليلمها
لا ولي اليفرع يجيها
ولا كفيل الضال يمها
بس حرايم عدها ضلت
والحرم رادت زلمها

ضاكت عليها الكاع .. مامش ولي وفزاع
زينب فجعها البين.. وين الكمر وحسين

--------
تنادي يا عباس مرّه
ومره تندب  يابو الأكبر
ومابقى صوت الها كدما
يابو فاضل صاحت احضر
من كثر ضيم العليها
كامت من الريح تعثر
العاشر وضيمه وضلامه
تكوم ما خلاها تكدر

ضيم العليها ازداد  .. من طاح ابو السجاد
والرايه والجفين .. وين الكمر وحسين

-------
من الخيم لحسين وصلت
بيا علي كوه بدمعها
تشكي ضيم البيها رادت
لاجن المنظر منعها
شافته بلا راس جسمه
وهالوضع  زيّد وجعها
حالته البيها رميّـه
من الجمر اكثر لسعها

تشكيله اجت بجروح   ..  بس شافته مذبوح
ولطمت على الخدين.. وين الكمر وحسين

-------
وكامت من حسين كوه
وراحت لصوب الشريعه
وعثرت بجود الكفلها
وكامت بحسره فظيعه
شافت الماي وزراگه
وذْكرت حسين ورضيعه
وتعتب اعله الماي ضلت
ونشِدَه حال الوديعه

وبالهم كلبها احتار .. وحركت جدمها النار
ونار بدموع العين  .. وين الكمر وحسين

-----
جلجل الليل بضلامه
والكمر عالرمضه نايم
وزينب بوحدها ضلّت
ياهو يحرسها الحرايِم
ليله وحشه اعليها مرّت
من عگب عين الهواشِم
وين الاكبر وين جعفر
وين عون  اوين جاسِم

بنت اشرف الانساب   .. تحرس حرمها اجناب
ياوسفه عالطيبين .. وين الكمر وحسين
-------
✍️حيدر عبدالله السعيدي

ودو اليثرب اخبار لمحمد اخونه
كطعو راس الاحسين كلوله وسبونه
ــــــــــــــــــــــــــــــــــــــ
يمحمد يصنديد عوف ارض المدينه
اريدك تسبك الريح بالشكره وتجينه
الحك يااخو احسين احسينك ذابحينه
داسو صدره بالخيل واحنه سلبونه
ــــــــــــــــــــــــــــــــــــــ
يبن فراس الاحروب لوطارش اجالك
معصب بيده وديت فزع كل رجالك
ذبحو كل هلك غاد ما واحد بكالك
ياسراجة الخيل يمته تلحكونه
ــــــــــــــــــــــــــــــــــــــ
اريد ابغيضك اتهيج من تلكد رسنهه
تعال وجيب الاسباع واختكم نشدو عنهه
حته ارموش الاعيون طالع شيب منهه
بضرب السوط ترضون ضهري يورمونه
ــــــــــــــــــــــــــــــــــــــ
عكب ماذبحو الشيخ لزوم الكم مواقف
دطفو نار الادلال واغلكوهه المضايف
يهلنه راس الاحسين بالبالدان طايف
ومن ضربات الاحجار احمر غادي لونه
ــــــــــــــــــــــــــــــــــــــ
جا يمته يشجعان تنجزون المهمه
ابمواضيكم تهدون زلمه بضهر زلمه
حرمكم طبت الشام واهل الشام لمه
بدك الطبل وادفوف هيج استقبلونه
ــــــــــــــــــــــــــــــــــــــ
هم يوم أمن الايام سمعتو بهالرزيه
علويه اوي الاجناب ماخوذه سبيه
جان اسمي الحوراء وهسه الخارجيه
آ ياطبة السوك آه أمن الولونه
ــــــــــــــــــــــــــــــــــــــ
حيهم ياهلي انصيح ولا واحد اجانه
القصر الاموي اهناك حادينه خذانه
ويزيد  اكبالنه الراس طكه بخيزرانه
من حلكه الدمه سال جا يمته اتحمونه

محمد الجماسي

#اللهم_عجل_لوليك_الفرج

يبو السجاد بس وياك خليني
من حبك يبعد الروح غذيني
~
الگلب ياريت حبك سيدي ايشغله
وعن كل مغــــــريات الدنيا يتخله
مايـحـله العمر لـــــــولاك مايـحـله
وياك العمر محــلاته يحـــــسيني
~
غـذيـنـي ابـحـنانـك وانـت ربـيني
ومن اعطش ابچفك ريت ترويني
ولا فــرق البـاري بــــيـــنك وبيني
وخــــــــادمكم يبو اليمه تسميني
~
لون تــــدري يماي العين شتمنّه
علگ گلبي على الشبـــاك اشدنّه
جنّه حـــــظرتك يامحله هالجنّه
ونسيم ازيارتك مولاي يحييني
~
همت باسمك وحگ الطاهره البضعه
وعشت بِيّه جرح واجريلك الدمعه
اخــــذني العالمك خليني بس انعه
يـمن جـمرة مصابك دوم تچويني
~
دعيت الله تـــــدوم ابحبك العِشره
اولا يجعل وصالي اوياك بس فتره
الما عايش حنانك عايش ابحسره
حلم عمري ابخدمتك تخلص اسنيني
~
وفقني الخـــــدمتك بيه مابيه
خليني أهيم ابكل حـــــــسينيه
واحلفك بالمشت للشام مسبيه
على دربك يبو السجاد مشيني
~
حيدر بشار الدراجي

يا حسيني
نسخة معدلة
🍂🍂🍂🍂
فدوه انه —- وكل بنيني
لشعره منك — يا حسيني
———————
انته بسملتي وقبلتي وانته ديني
فدوه الك شيبات راسي وكل سنيني
تحت چدمك وانته سالم كل بنيني
نذر اسجد للصبح كونك تجيني

نذر ما نام —- وتغفه عيني
بس تردلي -— يا حسيني
———————
كطره كطره حبك الغالي شربته
حسين عشگ سنيني من يوم العرفته
هي من الله رزق جانت محبته
واللي يطلب الله خل يلزم خدمته

نور شفتك —- في جبيني
شكبره فضلك -— يا حسيني
———————
انه كل خيري ونعمتي من الحسين
هذا نوري من خدمته وسهر السنين
الماله لحسين بحياته تالي لا وين
حصلت هاذي عَظَمتي بدمعة العين

اخذ عمري —- وكل سنيني
وكون سالم -— يا حسيني
———————
ريت راسي المرتفع عالرمح عالي
وريت جسمي ابدالك موذر يغالي
اه عملت كربلة اشسوت بحالي
خذت مني كل هلي وتعب الليالي

حلم دومه —- يعتريني
خاف افگدك -— يا حسيني
———————
جنت يومية تجي بگصتي وتحبني
الدنية لو جانت برد وارجف شفتني
جنت تنزع صايتك يبني وتلفني
صرت خيط ومنهزل يوم العفتني

اشظال منك —- لو تجيني
وينه طولك -— يا حسيني
———————
جنت اسوي قبور باطراف البرية
ولدي كل واحد اسويله بنية
وغير قبرك ابد ما حضنت ادية
حاشا أن انطي الظهر لابن الرجية

اهناك يمك —- كون حيني
بكربلائك -— يا حسيني



ابو علي
عبد الحسن القريشي