ليلة دفن ابو الزهراء محمد ص

يحيدر والدي ادفنته .. دفنت وياه عسن بنته
يحيدر وحدي راح ابقه وغريبه
………………………
اشوفك جاي ياحيدر ثگيله برجلك الخطوه
عله خاصرتك تحط ايدك تجرجر بالنفَس گوه
الچنت وياه ظهر واحد اجيت وياك ما هوه
اظن اچفوفك اتگلي دفنت المصطفى توه

وروحك مشتعل ونها .. چفوفك دفنتك چنها
شمـال اعمـامـتك كلش تريـبه
يحيدر وحدي راح ابقه وغريبه
………………………
دمعتك صايره بطولك يحيدر منكسر ظهرك
اشوفك تاكل بروحك وايدك تاكل بصدرك
تگعد ساعه ساعه تگوم معلگ چفك بخصرك
شمالك ماتحاچيني صبرك ياعلي صبرك

اصبرك لو تصبرني .. اموتن راح من حزني
چبـيره اعليك ادريـها المصيبه
يحيدر وحدي راح ابقه وغريبه
………………………
شگلك يالخذت حيلي ودفنته بمگبرة حزنك
كسرة گلبي بكثر نوحك راح تموت من ونك
راح الچان خيمه النه اليحامي عني او عنك
يبو الشدات اظن باچر الشدايد راح يلونك

من الوذن ياعلي اببابي .. الثاني يحرگ احجابي
ويرد يحـرگ علي داري عجيـبه
يحيدر وحدي راح ابقه وغريبه
………………………
عگب عين النبي باچر تدوس الزمره نص دارك
ويحرگ ياعلي دارك الچان ايخاف فقارك
ويدفع بابك برجله الچان اليلوذ بكتارك
والاصعب يحامي الجار مايفزع الك جارك

محد يفزع يمنعه .. عن دارك يجي يرجعه
متهـدلـك ولا مـن عدها شيـبه
يحيدر وحدي راح ابقه وغريبه
………………………
وجدامك يبو الحمله ضلعي ياعلي ايكسره
يدفع بابك اعليه وماتگدر تجي توخره
يحيدر غمض عيونك لونه جابني بسطره
اخافن تنسه الوصيه وتذبحه اليضرب الزهره

اصيحن ياعلي صبرك .. نطيني بهالوضع ظهرك
شتحـمل محسن بهـالنـار اجـيبه؟
يحيدر وحدي راح ابقه وغريبه
………………………
بس اشلون اني اصبر يحيدر من يجرونك
ومن كل صوب ياحيدر ابواترهم يحيطونك
اخاف الثاني والاول على البيعه يجبرونك
واخافن ياعلي بغيهم وحقدهم لا يذبحونك

الاول ياعلي يريدك .. تبايع للحكم بيدك
ويريد الثاني ذبحك من نصيبه
يحيدر وحدي راح ابقه وغريبه


الشاعر عقيل الحسناوي..

يمغسل جسد طه غسله ابمدمع العينين
وحنطه بفاضل الجنه وغمضه ومدد الچفين
@@@
يمغسل جسد طه غسله بدمعة عيونك
ندري وحدك بهالحال وماكو من يعينونك
يكفي اوياك جبرائيل واسرافيل من دونك
ابسم الفتت ابگلبه
عندك عالكفر طلبه
ندري بحالتك صعبه
شلون ابلحد هالمحفور تدفن قدرة التكوين
@@@
هذي حالة الدنيه متخلي ابعمر احباب
مدد باللحد نوره وانثر عالجسد لتراب
غايب بالگبر لاچن باقي بحسرتك ماغاب
احمد للعلى ابسفره
وعايف حسرة الزهره
تبچي بالگلب جمره
تنادي وتنتحب يابوي ليش اتعوف ام حسين
@@@
ولمن تفتح العگده وبترابه توسد الخد
ابچي ياعلي ابحرگه وغيره ما إلك أحد
وانعي فارگ احبابه الهادي المصطفى احمد
چفوفه ابگبره ساويها
ومده ابردته اعليها

شبيها الوادم اشبيها
تعوفك وي جسد طه وحده ما اجاك امعين
@@@
العاده الميت ابدفنه تالي اتزور گبره الناس
واتعظم أجر آله اتشاركها ابحزنها احساس
ماشفنه عزه بالنار واتحيط العزه حراس

وسفه هجموا اعله الدار
وشبوها بعد بالنار
وضلع الي كسرت اشرار
ورضوا متن ريحانه وادم لا شرف لا دين
@@@
بعدك يبوالزهره شصار وبيمن تلتجي الحوره
بس جسمك غمض عيناه وماحتى انوسد گبره
ماحفظوا وصيتك كون ماتت بعدك الزهره
بالعتره ابتدوا بالجور
وضلع الطاهره مكسور
وحيدر ياوسف مقهور
وصيتك گيدتله اچفوف فارس بدر وي احنين
@@@
علي احمد الحمود
١١-١٠-٢٠٢٠
شهادة الرسول -ص
شوط كربلائي

بدموع العاشقين
ننعى سيد المرسلين
يااااا  محمد  يااااا محمد

شكد يحبك الله هل هيج اصطفاك
الموت مدري شماله مستعجل خذاك
علي چنه اهلال صاير من جفاك
عيون موش ادموعنه الطاحن وراك
(قد فجعنا منذ حين )
(ننعى سيد المرسلين )
ياااا محمد يااااا محمد :::-


كون اجي الكبرك واجيبن كل هلي
اعليك نلطم مثل ما يطلم علي
هناك اكل للدمعه كومي تهدلي
ومثل زينب اطك راسي بمحملي
( وبشوقآ وانين  )
(ننعى سيد المرسلين )
يااااا محمد ياااا محمد :::-


شاد رايت حزني لمصابك وفه
اسمعت ميت كلت ماميت غفه
الله خالق دنيا لجل المصطفى
لو رحت بعدك على الدنيا العفى
(من لنا بعد الامين)
(ننعى سيد المرسلين )
ياااا محمد يااا محمد: ::-


وعلي من بعدك على الدنيا السلام
بحزن وي الزهره ينعاك الحمام
بقه بعين الزهره بس طيفك ينام
فاهي بفراكك صبح حته الكلام
(عند ذو العرش المكين)
(ننعى سيد المرسلين )
ياااا محمد يااا محمد :::-

✔ علي ياسين اللامي ✔

(استشهاد الرسول ص)

بكل مكان اعليك ننصب نايحه
من سمعنه الزهره تقره الفاتحه
يا رسول الله
نحن حشد الله
بكل مكان اعليك ننصب نايحه

لابسه مرقط اجتنه الانبياء
وعالسواتر قمنه الك مجلس عزاء
اي وحك شيباتك السوتلي صيت
من لطمنه اهتزت اركان السماء
بدموع الاه
يارسول الله
ارواح مو دمعات لجلك طايحه

شلون تمشي وترسم بضحكتنه هم
بوجه كل ساتر تباوع تلكه دم
شايل  الله بصدرك واسمك نشيد
يا ابو الزهراء غير انته العلم
ولذا عشقناه
يا رسول الله
وانته تستاهل سوالف مالحه


احنه بستشهادك انسبل دمه
واليطيح ابيومك اتشيله السمه
الحشد يابس ريجه من كثر النحيب
جا سمعها اعليك تنحب فاطمه
كلنا نهواه
يا رسول الله
وجنودنه بدم ومدامع سابحه

يم ترافت اسمك يذوب الورد
حكنه بستشهادك انثوب ولد
وعلي من كالوا طحت كام العراق
كال ثارك لازم يرده الحشد
قسمآ بالله
يا رسول الله
عيونه الملكاك ضلت شابحه

✔ علي ياسين اللامي ✔

طيحتك كسرت ضهر كلش جبيره
مات شيخ الدنيا مو شيخ العشيرة
الفقره والزهراء تقول
من لنا بعد الرسول
طيحتك كسرت ضهر كلش جبيره

مامحسبه افراكك يخليني احير
واني ادري أخلافك يضيع الفقير
ياجبير الدنيا من غيرك جبير
ياهو يرفع جف علي بيوم الغدير
الحزن حتماً ينجلي
لو رفعنا كف علي
الكون يرتاح وبعد ما تبقى حيره

صافنه وغييم على الدنيا النحيب
بويه عكبك للكلافه امنين اجيب
كوّن ميشم الهوه اليفكدك حبيب
غيرك اعله اجروحي بس حيدر طبيب
منذ غاب السرمدي
الكون ينعى احمدي
واني لجروح الحزن صرت الاميره

الترافه شلون ما تدفنها كاع
يارحيلك هدد الفقره بضياع
منك ارد اشبع بعد وكته الوداع
شماله جف الموت يحصد بسباع
عندما يرحل ابي
يدفع الباب اجبني
الدفع باب الزهره ابد ماعنده غيره

علي مترب راسه والمدمع دمه
ونزلت اتجي العلي حتى السمه
صاح هنيالك تغسلك فاطمه
حسين ابنك غدا ياهو يلملمه
عندها صوتاً علا
قال ويلاً كربلا
غدا جسم حسين ينلم بحصيره

علي ياسين اللامي

اسشهاد نبي الرحمة
...........................................
يامحمد حزني ينهد
مهجتي بفگدك يعانقها البكاء
يامحمد ربي يشهد
بالجروح الداميه قمت العزاء

لطيِفكَ نحتآج ياصاحب المعراج
....
يامحاريب الدمع رحميني
صلة ادموعي فرضها بعيني
حتى لو رايد حلم يلفيني
تبلله دموعي ويرد جافيني
...
انا علي وذيج الحروب الما لوت يميني
بفقدك يمحبوب الاله جتفت اديني
يحتويك الكبر وسفه وريته يحتويني

انت صرحي وصرت جرحي
بعد وجهك كل فجر مظلم اشوف
بعدك انت كلشي عفته
ذكرياتي اتطشرت لربع حروف

من نورك الوهاج ياصاحب المعراج
......................................
ياااااااااااابلال اتأنه بالتكبيره
صوت أذااانك ينتشر بالديره
وألتفت عالزهرره ذابت حيره
الدنيا بعيون الوديعع زغيره

اليفكد نبي الرحمه بعد منهو الذي يرحمه
والبت اذا فگدت ابو تجرحها لكلمه
المختنگه ابو شلها بهوه مابيها رسمه

الزهره تذبل يالي تسال
بعد طه ماضحك سنها البتول
بدار همها كلبي يمها
بس ضلعا بطولها راسم نحول

من همها ماكو فراج ياصحب المعراج
...........................................

علّيه يثكل موتك وتشييعك
بچفي اخف خيبر ولا توديعك
روحي چانت عالمنيه اطيعك
المايطيعك بالوصيه يبيعك

واجهت ابن ود وخضع وذوقه سيفي
لكن والا اكدر على فرگاك ياحيفي
عيني الذي تشتالك وينك طيفي

وي فقاري ظل حواري
يامحمد جني بالدنيا غريب
كل حواسي في مأٓسي
راح اشوفن راسي من بعدك خضيب

بعدك شلي بالتاج ياصاحب المعراج
......................................

من يغمضلك جفن وتسافر
ينكسر بعدك ضلع والخاطر
بنتك بروحك عليها تحاذر
باجر يسلب فدگها الفاجر

حقها وابنها والضلع والنار والدمعه
كلهن بفگدك يانبي عالزهره مجتمعه
سمعوها من بعدك حجي ماتكدر اتسمعه

تبچي تنذم يخنك الهم
ثمرة الله عاشت بدنيا الظلام
والوصيه مچتفه ديه
باقي حاير واقره عالامه السلام

حادت عن المنهاج. ياصاحب المعراج

..........................................
يالنبي وماحاجه اكول اصاحبك
روح وسال خل تسولف بابك
دم منو البيها ومنو اعله عتابك
يستغل ليش الخليفه غيابك

واية التطهري امس عالباب تقراها
قل انما الله يريدُ اوعكس سواها
بره المدينة فاطمه ملوا من بچاها

الحسن بالسم يتبع الدم
يوصل الطف هناك مذبحنه العظيم
والاميره تروح اسيره
بليه كافل يجري موقفها الاليم

اذ تحتز الاوداج ياصاحب المعراج

...........................................
الشاعر علي السعيدي

استشهاد الرسول الاعظم
....
بدمعة البتول نبكيك يارسول
فما لنا سواك ياليتنا معاك
*
رب العرش يالمصطفى رادك اله جوره
وبنورك الطاهر تجي وتمازجه بنوره
ماميت انته لاوحك من تمم السوره
بسرائك الثاني رحت للخالق اتزوره

فرحت ياحبيب الى السماء تجيب
خلاقك حباك ياليتنا معاك

*
بدمع ام اوبوهه فاطمه جينه ونهل دمعه
نبجي وعلى غيابك نون ونواسي البضعه
وحزنت ملائكة السمه ونذهلت الوسعه
وامة محمد بالهظم عالهادي منفجعه

تسيل بالدموع تذوب كالشموع
والناعي اذ نعاك. ياليتنا معاك

*
موكل دمع من ينبجي ينزل حزن منه
بس انته فكدك يختلف محنه باثر محنه
يابو الوديعه الطاهره مانخفي واقعنه
اصحابك الضد عترتك هذا الوكت ضدنه

تذبح النساء وتسفك الدماء
اذ يسفكوا دماك ياليتنا معاك

......
ياكلب يحمل غيبتك وبيا صبر نصبر
حتى الصخر لو ودعك مايحمل اويفطر
ماتنطق انته عن هوه الا العلي يامر
واقرب صحابه الندعوا كالوا كبر يهجر

ماذا على الضنون بموتك نكون
لايسمعوا نداك. ياليتنا معاك
*
باخر نفس لمن رحت ونختمت اسنينك
بحضن الاجل ولعترتك تذرف دمع عينك
وتكله اعرف ياعلي مايبطل اونينك
والامه ضدك تنكلب محد علي يعينك

يافارس الحروب بهمك تذوب
فتكثر عداك. ياليتنا معاك
***
خلوا علي ابوحده ومشوا يمك يبو الزهره
وتشاوروا اهل البغي بالسلطه والامره
وحيدر على جثتك يون ويحاور العبره
كون ابدا المصطفى واتـوسد ابكبره

فماله بديل للنوح والعويل
ياسيدي ابتداك. ياليتنا معاك

الشاعر علي السعيدي

جديد
ذكرى شهادة الرسول الكريم محمد صلى الله عليه وآله .

ظلت يتيمــه فاطمه
ودموعها سالت دمه
ثاني يتــم هالـلـيلـه مَرهه ...
واثمنطعـش بـعـده عمرهه .. يا زهراء
.......................................................................................................

ليلة حزن كئيبه ... شگد مؤلمه المصيبه
حسرة فگد غريبه ... تأخذ الروح
علّـي بقـت يتيمه ... وتـنـادي يا هضيمه
راح الأبو حريمه ... وظلت إجروح

ثاني جرح توّه إبتده
من بعد فگد الوالده
وسط الگلب يسعر جمرهه ..
واثمنطعـش بـعـده عمرهه .. يا زهراء
.......................................................................................................

حتى الورد ذبـوله ... من حسرة البتـوله
موقف فقد حلوله ... أسئله هواي
شنهو اليتاني فاطم ... حرمه وزمنهه ظالم
بس الله هوه العالم ... يا هضم جاي

كـــل الوجــــوه إتغيرت
چنهه السقيفه تحضّرت
رسموا مخطط بي غدرهه ..
واثمنطعـش بـعـده عمرهه .. يا زهراء
.......................................................................................................

فگد النبي ومُصابه .. يرحل يظل غيابه
يفتح رحيله بابه ... الكل الأحزان
أم الحسن تناطـر ... باچر تلحگه باچر
باب المنيه حاضر ... يبقه عنوان

عالزهـــره لمــن يـنـدفع
يسقط جنين يطگ ضلع
ملعون كل ظالم عصرهه ..
واثمنطعـش بـعـده عمرهه .. يا زهراء
.......................................................................................................

وحشه إنمله مكانه .. ظل فارغ وحنانه
واليرحل بأوانه ... يجرح گلوب
أمر الله والفجيعه .. مكتوبه عالوديعه
ضيعتهه والله ضيعه .. روحها تذوب

مهضومه عاشت فاطمه
والمشتكى الرب السمــه
رب الـعـرش عـظّـم أجرهه ..
واثمنطعـش بـعـده عمرهه .. يا زهراء
.......................................................................................................

لهذا الحزن علامه ... مرسومه عاليتامـه
ذرية الإمامه ... شاهدوهم
بعمر الورد بعدهم ... لكن ذبل وردهم
ما چنّه طه جدهم ... چنّه أبوهم

دمعاتهم چنــهه الضوه
ينوحون عالهادي سوه
تصبرهم الزهره بصبرهه ..
واثمنطعـش بـعـده عمرهه .. يا زهراء
.......................................................................................................

يالراحـل بمنـيـه ... عن علي والزچيه
واتيتموا سويه ... بهذا المصاب
ضاع الأمل وجوده .. جزّه الحزن حدوده
هاي الليالي السوده .. شتحمل إعتاب

شيفيد وياهــه العتب
هذا الدهر دهر العجب
يتعمّـــد الفــاطــم كسرهه ..
واثمنطعـش بـعـده عمرهه .. يا زهراء
.......................................................................................................

دين الله هذا نوحه ... ندري محمد روحه
لا ما تطيب جروحه .. فجعة الدين
بحيدر يظل يكابر .. والطبره هم تناطر
عتره فدت مناحر .. بالميادين

عن يا مصيبه ويا جرح
عتره وگظت سم وذبح
فاطم تناطر مُنـتــظـرهــه ..
واثمنطعـش بـعـده عمرهه .. يا زهراء
.......................................................................................................

خادم محمد وآل محمد
عمار هليل الواسطي
٢٥ صفر ١٤٤٢ هجرية
الكوت

سلام عليكم

--

--

--

فگد الابو ميهون -- يالهادي بيه شلون

تبجي تظل العين -- ويه الحسن وحسين

--

صعبه يالهادي رحيلك ترتحل وبغفله عني

المن اتخليني بويه والمصايب لو لفني

من گلت بنتي الزجيه هيه روحي وبضعه مني

بالحزن والهم اظلن وانگطع هاليله ظني

خيمه الابو مريود -- بعطفه وحنانه ايجود

ابحظنك ربيت اسنين -- ويه الحسن وحسين

--

ياحبيب الله ورسوله والوحي دايم يزورك

ابغفله ياشمس الهدايه هالقدر غيبلي نورك

وآنه منحتاجه الحنانك آنه محتاجه الحضورك

يالچنت سلوه اليه وشوفتي اتكثر سرورك

بويه صعب فرگاك -- بويه اخذني اوياك

لتگلي لاتبچين -- ويه الحسن وحسين

--

بس غفت عينك علينه اتأمروا اهل المنافع

هدموا دين البنيته يالنبي لجل المطامع

حرفوا نهج القويم وزمره للجاهل تبايع

بويه مابطلوا غدرهم بالغدر عدهم طبايع

اهل المكر والزور -- مارادوا الدستور

عگبك بعد لاوين -- ويه الحسن وحسين

--

انته للامه ابوصيتك مو گلت حيدر خليفه

وبخبخت كلها ابلسنها ونكرته انفوس الضعيفه

أتآمروا بعدك علينه للحقد نصبوا سقيفه

وضيعوا بويه تعبنه وكل مواقفنه الشريفه

حيدر علي اينكروه -- وأمر الوحي ايحرفوه

آذوا لبوالسبطين -- ويه الحسن وحسين

--

مو گلت واجب نطيعه وحب علي تعلن فريضه

الجنه مايدخلها واحد الا يمظيله العريضه

اتحالفوا ضده ابضراوه عدهم اعقول ومريضه

وصبوا اعلينه حقدهم للحقد بين وميضه

ابصبره علي مچتوف -- ريتك تجي وتشوف

وهوه الحمه للدين -- ويه الحسن وحسين

--

امتدت اچفوف الخيانه بويه للدار اعتنوني

من لذت بالباب منهم وآنه بنتك مارعوني

جسروا وسطروني سطره وفجروا مدمع عيوني

والضلع مني تكسر يالنبي من اعصروني

محسن ضحيه ايروح -- وصدري الذي مجروح

احمل كسر ضلعين -- ويه الحسن وحسين

--

سيد عدنان الحمامي

( استشهاد الرسول ص)

يحيدر من تغسلني وجسمي اتنزله الكَبره
خلي باللحد وياي سبحة فاطمه الزهره
من اشتم عطرها
ترد روحي ابكَبرها

_____
1

يحيدر ابد ما همني امر موتي
خايف لا تشوف الزهره تابوتي
إذا صاحت يبويه ايكَلها ها صوتي
ميت واستمد من ام حسن قوتي

إذا ناحت على امصابي وصارت صعبه حالتها
افك الچفن ياحيدر وامسح بيدي دمعتها
صرت فدوه العمرها
ترد روحي ابكَبرها

_____
2

هيه التسليني وتفرج اهمومي
يوم إلما اجيها جنه مو يومي
إذا عنها يحيدر غابت ارسومي
لتكَلها يطوّل بالكَبر نومي

ابسرعه تخلص الايام هاي الدنيا مكَضيه
الأول من اهل بيتي الزهره تلتحق بيه
لو يشفه كسرها
ترد روحي ابكَبرها

_____
3

يحيدر باللحد خليلي سبحتها
ما ينحمل كبري بلايه ريحتها
اسمعها توّن وتجري دمعتها
ميت اني لكن روحي ذبحتها

حنينه ويامه دارتني ابچفها الطيبه مرسومه
اموت واحيه الف مره ولا اشوفنها مهضومه
عظيم اشكَد قَدِرها
ترد روحي ابكَبرها

_____
4

امنتجيب الحسن وتزوّره اللحدي
اشوفن جبدته تصبح مثل جبدي
وبعد الموت هم ما يندفن عندي
يردوني أضل يابه الحسن وحدي

التابوت الحسن انظر بالنشاب يرمونه
واشاهد ابنك العباس بالكَوه يصبرونه
لو يمي مقرها
ترد روحي ابكَبرها

_____
5

يحيدر والمصاب الأشد يفجعني
حبيبي حسين من يرحل يودعني
يكَلي وياك جدي بالكَبر ضعني
جاوبني واعرفك زين تسمعني

إذا ماجاوبه اني و وسط اللحد ماضمه
خايف يا علي اهوايه يحلفني بضلع أمه
إذا يخلص قهرها
ترد روحي ابكَبرها

_____
6

يحيدر والهضيمه الأصعب اعليه
زينب من ترد الكَبري مسبيه
من شمس الصحاري چنها مو هيه
ترجع من سياط الشمر مدميه

زينب بعد رحلتها تجيني وتشتكي العله
لچن بالضعن وياها يحيدر شو نقص طفله
من انظر صبرها
ترد روحي ابكَبرها
_____

#الشاعر_مصطفى_الشافعي

نوحي يافاطمه وزِيِدي بالدمع
وبمكان المصطفى عِلكِي الشمع

غاب الرسول .....حزنج يطول
...................

نور ابوج الجان ساطع غاب عنج
وبتدت قصة احزانج زِيِدي ونج
ضلو اصحابه الذي ايخيبون ضنج
اضلوعج ادري من وراهم يوجعنج

موضلع واحد الج من انكسر
يبقه ويّاج الكسر طول الدهر

دمعج هطول.....غاب الرسول
....................

حقج ايسلبونه ودموعج جريه
ناس ماتاخذ كلام الله ونبيه
من حجه المختار يدري بهل رزيه
كال ياذيني تره الياذي الزجيه

كلهه حضرت بالوصيه وتستمع
يامحمد باب بنتك تندفع

باب البتول......غاب الرسول
......................

بابج الجان النبي ايدكهه بيمينه
بيهه تلهب نار يالزهره الحزينه
والجنين ايطيح وانتي تشاهدينه
ينحرم شم الهوه ويسدهه عينه

هذا لب الكلب ميشوف المهد
منه تنحرمين يالزهره الولد

كلبج يكول.....غاب الرسول
.....................

الله يجبر خاطِرج بغياب طاهه
وبوجوده جانت الدنيه شحلاهه
وهسه ضاكت وسط عينج من جفاهه
الدنيا يالزهره محمد ودعاهه

راح يبدي وياج انواع الظلم
الا ذو بسده يصيرون الخصم

تذهل عقول.....غاب الرسول
.....................

بيت احزانج يضل ماضنه ينسد
مصايبج يالزهره يوميه اتجدد
نارج اتضل بالكلب مالحظه تخمد
النار شيخمدهه عالفاكد محمد

انتي بضعه وكالهه السان النبي
يعني وين ايروح منه الناصبي

فعل العذول......غاب الرسول
....................

كلبج ايضل للابد هذا عذابه
من رحيل المصطفى ويومه وغيابه
يبقه صوتج دومه ناعي على احبابه
وينه اليواسيني بحسين ومصابه

ونتج لحسين ماتخمد ابد
والدمع يجري المصابه بلايه حد

ماضن يزول.....غاب الرسول



محمد هادي العقابي

يامحمد نبي الرحمه والسلام
على فراكك دم تصب عين الامام
حيدر اخلافك يحير
بصحبه ماعدهم ضمير
.............................

ودعت حيدر يهادي بهل مسيه
إتمنه تطلع روحه وي روحك سويه
تختلف عنده انته عن كل البريه
انته اخ وابن عم يابو الزجيه

بداخله حيدر عله الون والنحب
كبال عدوانه بقه شخصه صلب
يستحق منصب امير
حيدر خلافك يحير
.................................

تدري بالاصحاب بعدك ماتطيعه
عيونك من اتغمض اتحل الفجيعه
انته وصيته بحذر لجل الشريعه
كتله ياكرار واصبر عل وديعه

لوشفت كسر الضلع تتحمله
بس تجر سيفك تضيع البسمله
بيدك الحل والمصير
حيدر خلافك يحير
................................

القلع خيبر حسافه مكيدينه
من رحت واعضم مصيبه تشوف عينه
ابد ماخله على القبضه يمينه
شكتله ياطه لعلي وماتن ادينه

الدين هنياله بعلي وهذا الصبر
على دين الباري مثله مايمر
مااله بعدك نضير
حيدر خلافك يحير
.................................

عجب الوادم بصبره وحير الكون
والسقيفه ماتهمه خل ينصبون
منهو يكدر عل شمس ينضر بالعيون
شماتضكهم مسئله لحيدر يردون

كل صعب عنده سهل بي مايحير
وهمه يحتارون بزغير وجبير
هوه الاول والاخير
حيدر اخلافك يحير
..................................

البات بفراشك اكيد امعّلمه ادروس
درّس عندك حته يعرف كل الانفوس
وعل خليقه ضهر علمه ماهو محبوس
ولا تحرف واضح وطاهر وملموس

تكابليتو اثنينكم علِم بعلم
والخصوم تريد منكم تنتقم
حصلوا نار السعير
حيدر خلافك يحير
.....................................

صار يومك على حيدر ثكل الجبال
على فكدك حكه والله ضهره لومال
جنازة المحبوب موبالسهل تنشال
التعزيه بموتك الحيدر صعبه تنكال

عظم الله اجرك بخير البشر
اخر الاحزان يافارس مضر
هوه بس هذا اليصير
حيدر خلافك يحير




محمد هادي العقابي

ميمر

استشهاد الرسول محمد ص


اعظم رسول القران نازلك ابا ياته
وقران ناطق خليت ذوبنه بحجاياته
.....................

يانبي الرحمه المايشبهك واحد
قائد تضل عالامه نعمه القائد
من عدنه الك هالعهد والله الشاهد

ماننسه حيدر والله نتنومس بصولاته
....................

مشكور يابو الزهره من نصبته
بس الله ونته اليعرف بمنزلته
يجهل الدين الي جهل معرفته

يابو الحسن من نكول الضالم يجر حسراته
.....................

هنياله اليحصل ابن عم مثله
بالروح يفدي لون رادو جتله
جن وإنس حيدر تره شهدتله

كلهه تّعرف الكرار ماتنحسب وكفاته
....................

ناصر الدين بحكمته وايمانه
باب العلم منك صبح برهانه
عاشو وماتو بالحقد عدوانه

وبگلوب الاحباب تعيش طول الزمن كلماته
...................

ساكن اكلوب الخلك من افعاله
هنياله اليحب حيدره هنياله
لِيحب علي المفروض يعرف حاله

حب الوصي امن الايمان يتواضع بخطواته
....................

ماعدنه غير المرتضى والينه
من كل ضلم وبكل وكت حامينه
نرخص الروح الحيدره يدرينه

اولاده احنه وللموت مانزل عن ترباته


محمد هادي العقابي

استشهاد الرسول محمد ص


صوتُ الانين .. في كلِ حين
من فاطمٍ يعتلي .. غابَ الامين
...............

استعد گلب الزجيه الكل الهموم
المصايب حاوطتها وفوكهه تحوم
مشه عنهه الابو والحيل مهدوم
من كثر الدمع ما تعرف النوم

دمعٌ يسيلْ .. فقدَ الخليلْ
والحزنُ لاينجلي .. منهُ العويلْ
.................

الله يعين فاطم عالجره وصار
عن عيناهه غايب ضوه المختار
الحزن خيم عليهه وتارس الدار
بعد وحيّ السمه مامنه اخبار

وحيُ الالهْ ..حُزناً بكاهْ
للسيدِ المرسلِ .. طابَ ثراهْ
.................

جزعت فاطمه والجزع مريود
على طه الرسول ونبي المعبود
محمد هذا حكهه اتجرح الخدود
عافاهه وگلبهه اعليه ممرود

يبقَى النحيب . ينعى الحبيب
والدُها والولي .. حانَ المغيب
.................

البجي الفكد الابو ياناس مسموح
ومنعوهه الزجيه اعله الابو تنوح
زين وبيهه ضلت فاطمه الروح
جرحوهه وابد ماتحمل اجروح

جرحُ الكلامْ .. شبهُ السهامْ
عن داركِ فارحلِي .. قولُ اللئامْ
................

اويلي شلون حال ام حسن وحسين
لا ام لا ابو وغابو النورين
شيصبر گلبهه بفكد الثنين
يتيمه ومن هضمهه احمرت العين

كهفُ الامانْ .. حضنُ الحنانْ
ما عاد في المنزلِ .. يالَ الزمان
...............

تنضر للجسد وتهل العيون
الزهره بموت ابوهه انخطفت اللون
يساعدهه الله حين الي يشيعون
عزيز الروح بي للكبر يمشون

حانَ الفراقْ .. والقلبُ ذاقْ
كفقدها الاولِ .. دمعٌ يُراقْ



محمد هادي العقابي

يامُحمد گبل توصي ابجارك…

ومن رحت ربعك الحرگوا دارك

يتمت حته السمه ….. وتبچي ظلت فاطمة…. يامُحمد

★★★★★★★★★



ابهل أمر… من الضهر…. اجتمعوا اصحابك تحت ذيچ السقيفة

اتجمعوا….. اوصرحوا…. وگالوا من اليوم حيدر موا خليفة

اتنادسوا…….. وأسسوا…. دوله يابو الزهرة لچن مو نضيفة

والقصر… من يمر… لازم ايدنگ على اباب الصريفة


ينحني راس الطغاة العالي…..

وبس علي رغمٱ يظل الوالي

شيعك حامي الحمه….. ….. وتبچي ظلت فاطمة

★★★★★★★★★


ابلا خجل….. ولا وجل…. انهُ مجنون يهجر في كلامة

لا ولي…… ولا علي….. ولا محمد لاكتابه ولا عمامة

سولفوا…… وخالفوا…. يامُحمد دينك وهاي الإمامة

أذنبوا……. ونصبوا…… وصعدوا شيطانهم كرسي 💺 الزعامة


اتعلم الشيطان يغوي ابناسه…

ونفس ذاك الحكم ذوله الساسه

من العصابة المجرمة…. ….. وتبچي ظلت فاطمة

★★★★★★★★★


بالغظب…. والحطب…. اتجمعوا يم بابك الچانوا صحابه

اتلثموا… من أجوا….. وعلي وكت الحرب مايلبس نگابه

بالغدر….. ينسطر….. فاطمه خدها وعلي محروگ بابه

فرفحت….. وصيَحت….. هجموا الشيخين شوا چنهم ذيابه



وعلي امچتف بالوصيه اچتافه….

وعگبك الشيطان حيل اتعافه

والصحابه امحزمه….. ….. وتبچي ظلت فاطمة

★★★★★★★★★


ياجرح... ويارمح….. يامُحمد نحچي عنه ويامصيبه

من الضلع…. والدمع… مانشف بعيونه والله عجبيبه

الحب علي…. يبتلي…. وينذبح كلمن يسولف عن حبيبه

والوطن…. ابلا وطن….. وعدنا چم زينب بلا والي وغريبه



باعوا الغالي ابرخيص ابزورهم….

وعلوا ابروس اليتامه اقصورهم

والشعوب اميتمه……. ….. وتبچي ظلت فاطمة

★★★★★★★★★


كل حُكم….. باالظُلم…… مايدوم اولا تظل هاي السياسه

والحِكَم….. ومارحَم… . باچر ايطيح القصر ثق بوگ راسه

والشعب….. بس تعب….. شاف من عدكم واعلن ترة افلاسه

جوع اكوا….. ظلم اكوا…. والملك نايم وأمن بالحراسه


الله لا ينطي الحكم واذنابه…..

بدلوا هذا العراق ابغابه

يمته تبدي المحكمه…… ….. وتبچي ظلت فاطمة

★★★★★★★★★


نسألك… ..عن هلك…… وعن خيمكم والحراير والسبايه

ابكربله…… امدلله…… عدكم اوذاك الشمر شگ العبايه

والحدث….. بس جثث…. كربله انترست تره دم وضحايه

والگمر…… عالنهر……. طايح اوللمهدي خله اهناك رايه



خلي يجي وبيده يحد بتارة…..

ومن هذوله الزمرة ياخذ ثارة


يصبغ السيف ابدمه…….. ….. وتبچي ظلت فاطمة

★★★★★★★★★



ـــــــــــــــــــــــــــــــــــــــــــــــــــــــــــ

ماجد حبيب الخيكَاني

2020/10/10ونسألكم الدعاء

هكذا قالها سيّدُ الكونين
إنّني تاركٌ فيكم الثِـقْـلٌَيْـنِ

فاحفظوني فيهما إن غابَ بدري

__

ابليل موته / هذا صوته
يدوي بآفاق المدينه او هيّه سكته ..

اعيون تدمع / او كلها تسمع
بيمن الهادي الرسول ايوصّي اُمْـتـه ..

دار عينه / و ابونينه
گام يتوصّه ابكتاب الله او عترته ..

او بآخر انفاس / ناده يا ناس
هذا أجْر ارسالتي او تعْب التعبته ..


فغداً موقفٌ فيهِ كلٌ يُسألْ
عن ذوي قربتي و الكتابِ الـمُنزَل
فاحفظوهم هكذا توفون أجري

__

بيده لكتاب / او شاف اِلاصحاب
گال هالمصحف أمان الكم تعرفوه ..

او عترتي اوياه / همّه والله
حبِل ربنه او واجب اعليكم تلزموه ..

او دار عالباب / او دمعه سچاب
او گال هذا احجاب الله لا تهتكوه ..

و اللي بالدار / أم اِلاطهار
لا تغضبوها تره لربّي تغضبوه ..


فاطمٌ بضعتي و هْيَ جزءٌ منّي

فاحذروا تشتكي لي سوادَ الـمَتْـنِ

ضلعها ضلعي و صدرُ الطهرِ صدري

__

أم ابيها / وصّه بيها
او تالي دار اعيونه للكرار حيدر ..

گال تدرون / سيّد الكون
من بعد عيني علي هوّه ايتصدّر ..

إبن عمي / دمّه دمّي
و هوه مني ابمنزلة هارون و اكثر ..

يالعرفتوه / لا تغدروه
لا يجيني او راسه بالسجده ايتطبّر


عنكُمُ إن خبا كوكبي أو غابا

فاحفظوا قبلتي و احفظوا المحرابا

و احذروا فيهِ دمُ الكرارِ يجري

__

اخلاف حيدر / من تحسّر
دار عينه للحسن و ادموعه من دم ..

هذا إبني / و آه يحزني
لو إجاني و الچبد ممرود بالسّم ..

او لو تواريت / يمّي ياريت
يندفن جسمه او يصير لجرحي بلسم ..

لاچن ادري / شنهو يجري
و اللي يرمون الجنازه بيهم اعلَم ..


كيفَ نعش الهدى بالسهام يُرمىٰ

و لرزءِ الزّكيِّ فؤادي يُدمىٰ

و لهُ أبكي دماً في لحدِ قبري

__

ابدمعة العين / دار لحسين
و اختلف لون النّبي من شاف نحره ..

صاح ويلاه / كربله آه
من ذكرها او شنهو ذاك اليوم يِجره ..

نحره مذبوح / او يبگه مطروح
و الخيُول العَشره تلعب فوگ صدره ..

راسه ينشال / فوگ عسّال
و الجسم عاري يظل محد يستره ..


ولَدي جنبَ نهرِ الفرات ظامي

و لهُ نسوةٌ اُسِّـرَت للشام

كيف تمضي للسبا من بعدِ خدرِ

___

الميرزا عادل أشكناني
" النجف الأشرف "

ارفع إيدك موالي ارفع ايدك
بعزه مبعوث السمه
اوياك تلطم فاطمه
ارفع إيدك موالي ارفع ايدك
@@@

ابيوم ذكرى فرگة الهادي الرسول
حزن مامثله ابد خطبه المهول
وحي الله نازل ابدمعه الهمول
وانته مثله واسي للزهره البتول
...
واسي فاطمه يشيعي واسي فاطم
وعلي حمّاي الحمه
اوياك تلطم فاطمه
ارفع إيدك موالي ارفع ايدك
@@@
فاطمه الليل ألبست ثوب السواد
وحنت وعلنت على الهادي الحداد
بضعة المبعوث رحمه للعباد
تدري من بعد النبي اتشوف الشداد

...
تدري تنظام يويلي تدري تنظام

بهالليالي المظلمه
اوياك تلطم فاطمه
ارفع إيدك موالي ارفع ايدك
@@@
على نعش المصطفى چان الحنين
وماسكن نوح الزچيه ام الحسين
مو سهل مسموم سيد المرسلين
ومو سهل لتراب عفرله الجبين
...
بلحده مطروح نبينه بلحده مطروح
يلي أجره اتعظمه
اوياك تلطم فاطمه
ارفع إيدك موالي ارفع ايدك
@@@
من بعد طه شسده بآل الهدى
حادي انواع الظلم بيهم حدى
ابيت لحزان الزچيه مبعده
گالوا اذتنه ابعزاها اتردده
...
واجب الها نواسي واجب الها
وكون هالمدمع دمه
اوياك تلطم فاطمه
ارفع إيدك موالي ارفع ايدك
@@@
لبنت ابوها تالي يثرب مو وطن
هجروها في بلدها بالمحن
اتجهزت ام ابيها للچفن
وابتدى عهد المآسي والفتن
...
هاجموها بسكنها هاجموها
وعالضلوع امهشمه
اوياك تلطم فاطمه
ارفع إيدك موالي ارفع ايدك
@@@
بهالليالي الفاضله يامن تريد
حاجتك تگضيها بالهادي الشهيد
اگصد الزهره ودمع عينك يزيد
وهي منجاتك ترى يوم الوعيد
...
اگصد الها ابطلبها اگصد الها
تنجى من الحاطمه
اوياك تلطم فاطمه
ارفع إيدك موالي ارفع ايدك
@@@
ارفع ايدك واطلب ابجاه البشير
وترى جاهك من لعد فاطم كبير
والله يتسهل الك امر العسير
وطه نعم المولى بل نعم النصير
...
تگضي امرك بيديها تگضي امرك
وامرك الها سلمه
اوياك تلطم فاطمه
ارفع إيدك موالي ارفع ايدك
@@@
علي احمد الحمود
١٤-١٠-٢٠٢٠
شهادة الرسول

يارسول الله .. دمعتي وقصة امل
يارسول الله .. ونورك الزاهي رحل
يايتيم واحيى امه
ياوجود وكل رحمه
يارسول الله
@@@
يايتيم وكله رحمه ونوره عالعالم نزل
ومعجزاته من وصوله حطمت لات وهبل
الله رادك باليتامه اتعيش ياخير العمل
وبعد سبع اسنين امك شاء ياخذها الأجل
...
عايش ابيتمك .. جرح من بعده جرح
عايش ابيتمك .. فاگد امك كل صبح
الدنيه دون الام ظلمه
ياوجود وكل رحمه
يارسول الله
@@@
جدك المهيوب شالك وچان بحظانه الربه
شيبة الحمد ومقامه الله شانه كاتبه
ومن دنت منه المنيه لبوطالب طالبه
والوصيه كون دونك حامي نحره ايخضبه
...
يا ابوطالب .. هذا تنزيل السمه
يا ابوطالب .. وانته كافل والحمه
وابوطالب گال عزمه
ياوجود وكل رحمه
يارسول الله
@@@
ومن نزل وحي الجلاله وانته بالله مستعين
كذبوك الناس وانته منعرف صادق أمين
اشگد اذيه الشوك نثروا يا امام المؤمنين
وانته صابر كون صبرك ثابت ابحق ويقين
...
ثابت ابصبرك .. رغم ماشفت الالم
ثابت ابصبرك .. بالخلق تحيي القيم
نوره والأكوان ظلمه
ياوجود وكل رحمه
يارسول الله
@@@
حتى عام الحزن ويلي وبالشعب حان الحزن
ألخديجه ساعه ونّك ساعه عد عمك تون
ابلا حمه يصعب مقام ابمكه وافادك يحن
وهجرتك واجب فريضه وبالمصايب تنمحن
...
واجبه الهجره .. بلا ناصر اوحمه
واجبه الهجره .. وماتت امها فاطمه
ومابگه للروح نسمه
ياوجود وكل رحمه
يارسول الله
@@@
بالمدينه ايكون عزمك حتى الله ينعبد
والجهاد اعظم فريضه وانته حشّدت الحشد
وللحزن هم چان موعد صار عد غزوة احد
اسد الله حمزه عمك للاجل نحره يمد
...
چانت الغزوه .. ابمصرعه عمك وذر
چانت الغزوه .. وعنك الجيش انكسر
والجبين ايسيل دمه
ياوجود وكل رحمه
يارسول الله
@@@
مانبي مثلك تأذه وانته خاتم كل رسول
وللخميس اشلون شاهد عالرزيه امن العذول
عالذي اتجرأ وقاحه وعنك اليهجر يگول
وتالي بالسم كون تگضي وينكسر ضلع البتول
...
تودع العتره .. للسمه من ترتفع
تودع العتره .. وينكسر منها ضلع
ياللي گد الدنيه همه
ياوجود وكل رحمه
يارسول الله
@@@
علي احمد الحمود
١٤-١٠-٢٠٢٠
شهادة الرسول ص

فتحة عزاء لاستشهاد رسول الله
عليه وعلى آله الصلاة والسلام

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

السلام عليـــــــــك يا رســـــول الله

********************

عليك دموع محتاره وبچيـــــناهه
يكلمه بحضرتك لوعه وحجيــناهه
عرفنه الزهره ونت اي عرفناهه
تمنينه الجنازه هناك شلناهه

السلام عليـــــــــك يا رســـــول الله

،،،،،،،،،،،،،،،،،،،،،،،،،،،،

يعمري بغيبتك ما لزمته سنيـــــــني
بغيابك غيمت والمطر من عيــــــني
دليني اعله نورك وين دليني
سويني عزاء دموع سويني

السلام عليـــــــــك يا رســـــول الله

،،،،،،،،،،،،،،،،،،،،،


سلام اعله الرسول الضحى بانفاسه
الخله البشر يمشي وما يطخ راسه
على الما همه نفسه وهمه كل ناسه
على المحد وصل لايمانه واحساسة

السلام عليك يا رسول الله


،،،،،،،،،،،،،،،،،،،،،،،

سلام اعلى النبي بساعات توديـــعه
سلام اعلى الحفظ للناس تشريــعه
تمنينه حضرنه اليوم تشييعه
ونجددله الولاء ونحضر البيعه

السلام عليـــــــــك يا رســـــول الله

،،،،،،،،،،،،،،،،،،،،،،،،،،،،،،،،،،،،،،

على حيدر سلامي الوصى بيه الله
على زوج البتول العالي من علاه
على الغمض عيونه بحظنه من خلاه
يا كسرة دليله ولوعته وچم آه

السلام عليـــــــــك يا رسـول الله

،،،،،،،،،،،،،،،،،،،،،،،،،،،،،،،،،،،،،،

كلمات خادم الحسين
رعد الفريجي
1442 للهجرة

#فتحة_عزاء او #شور_كعده

عادت الزهراء بعد العاشر وتخاطب رسول الله (ص)

من ابني انته وابني المنك
يعني الذبحنه يذبحنك
__________________________
عن جواده نكسوه..وانذبح بغضاً ببوه
التحبه فاطمه ضيعو رسمه

والبواچي تريد عين..وحرت ما بين الثنين
امشي ادور راسه لو احرسله جسمه

كاسرني امصاب ابني..ما ينلم ابحضني
ما فكرت بضلعي..واضلوعه الهدني
گوم وياي نلمه بحضنك
يعني الذبحنه يذبحنك
__________________________________
اوليدي دمه مستباح..بايت بحضن الرماح
امن الگفه ذبحو عزيزك يا محمد

ذبحوه في الورى..دفنوه اهل القرى
التدفنه الغربه جثته بگبره تبرد

امه وگوه اركضله..وي كل شوغه انشغله
ولوشگو قمصانه..ابني امغمضه اندله

يابوية عيونه يدورنك
يعني الذبحنه يذبحنك
__________________________________
خامس اصحاب الكساء ..ضل مُرمل بالدماء
وما يگوم لأمه اول تالي هاي

جيوبه ضلن مُضرجات..والشفايف ذابلات
امدلل امه ما شربله گطره ماي

بجفه ذبحو بزره..وعتاز امه الزهره
ام ضلع المتكسر.. شما تركض متأخره

ما لحگت لأبني وابنك
يعني الذبحنه يذبحنك
________________________________
الابدان ابلا رؤوس..وجسمه شاحب بالشموس
بالخباء انهتك نحره وباقي وحده

امغسل بدم الجراح..ابني من جفوفي راح
راسه وين الگاه واحط جفي اعلخده

لمدلل مالتنه..ذبحوه يا كسرتنه
لو ما ميتين اهله..جا فوگاه هم متنه

يمي امدنگ اعرف حزنك
يعني الذبحنه يذبحنك
_________________________________
يا نبي الأمه الرسول..بگلبي بكلمه وراح اگول
اعمامتك باگوها من راس ابو الاكبر

شما سمع صوت الخيام..يگوم بس ما جنه گام
انباگ حيله وحته عالگومه ميكدر

الجنت التود ارسومه..مسلوبات اهدومه
ابچ‌ي ولتسكتوني...غير امه وملچومه

ابنيات اوليدي ايبچنك
يعني الذبحنه يذبحنك

مصطفى صادق اللامي