وينك صحتلك شو مااجيت
شكد اشرتلك عالتل بقيت
حركو خيامي وماضلي راي
خويه يابو فاضل انوليت

بلايك اسيره
بحماك اميره
المن يكافل
وجهي اديره



ماحسبت هاي ابقه غريبه
للتل ركضنه بنار المصيبه

اطفال ويتامه للتل ركضنه
ياخويه تدري عنك بعدنه

...ياقمربني هاشم
================
طف المصيبه رايدله حيل
نركض وتركض ورانه خيل
يابا الفضل جالمن نروح
نسابكَ اوياهن يالجفيل

اركاظ ركضنه
للتل لحكَنه
ويلاه يخويه
لحّكَو احتركَنه

نار بخيامي وخيل التفرهد
ياخويه حيره جا المن اشرد

بخدري وعفافي الحيره شكبرها
زينب غريبه شو صار امرها

ياقمر بني هاشم
=================
يالعشريعه راح الدلال
جتفو حرمنه وخشنه الحبال
شبعن هظم شبعن نايبات
اشكد صحتلك خويه تعال

جانن عزيزات
هسه سبيات
للشام اخذهن
راحن غريبات

الجانت عزيزه هسه سبيه
ومجتوفه سكنه ورمله برقيه

خويه ولوني جيفن وحيده
كل الجره وصار ابطيحت ايده

ياقمر بني هاشم
==================
الغاضريه سوده من العبي
تدري بعمرنا رحنه بسبي
ماشفنه خويه خيال الرجال
هسه يماشينه اجنبي

اشكد نخيتك
داسو ثنيتك
موش انه لمشي
وانه ابحميتك

كَلب العقيله مابي بعد حيل
ياخويه تهنه بمرادم الخيل

شيحمل هلالام وشهل المواجع
مابين الازلام خدر الله ضايع

ياقمر بني هاشم
=================
خويه واقع هذا لو حلم
زينب اختك ابنص الزلم
بس الشماته وبلا اخو
من تمشي تعثر جدم بجدم

عباس عجيبه
اختك غريبه
جاوين اهلها
شهاي المصيبه

جاوين اهلها اهل المحنه
للغربه راحو مافزعو النه

صاحو عليها ذيج السبيه
وشلون اشاكَف مشدوه اديه

ياقمر بني هاشم
===============
وسام المبارك

يا صاحب الزمان
يا صاحب الزمان

،،،،،،،،،،،،،،،،،،،،،

سلام من العيون الرادت تشوفك
سلام من الدموع الحظنت حروفك

بچي ليل ،، انتهى الحيل ،، عذاااااب
نحن ليك ،، نحاچيك ،،، مصاااااب

بعيدين وقريب انته
يصفنه مرافگه السكته
يضيم ابگلبك الشلته عذااااااب

يا صاحب الزمان ،،، يا صاحب الزمان

،،،،،،،،،،،،،،،،،،،،،،،،،،،،،،،،،،

وصلنه الحال ما ردنه العمر دونك
تعبناك ندري ونسأل شلونك

وطن مات ،،، بالاهات ،،،، شهيد
الفرح راح ،،، بالاجراح ،،،، بعيد

يمهدي وانته تدرينه
بألمنه وظلم ماضينه
على الونه تغطينه شهيد

يا صاحب الزمان ،،، يا صاحب الزمان

،،،،،،،،،،،،،،،،،،،،


تمر جمعات وايام العمر وحشه
ظلام الليل كلش زاعل الغبشه

على البال ،،، ولا زال ،،، هواك
يموعود ،،، يبو الزود ،، رضاك

خلاص الناس بانفاسك
تريدك يا شهم ناسك
سلام الله على احساسك هواك

يا صاحب الزمان ،،، يا صاحب الزمان

،،،،،،،،،،،،،،،،،،،،،،،،،،،،،،،،،،،


نگول الله الكريم وباچر الملگه
ولو هو الحبيب يموت بالفرگه


الوجع وين ،، بالسنين ،،، حرام
تره نموت ،، بلا صوت ،،، حمام

مثل اطيور التهاجر
تحن تشتاگ وتسافر
بعيد وطوول الباچر حراااام


يا صاحب الزمان ،،،، يا صاحب الزمان

،،،،،،،،،،،،،،،،،،،،،،،،،،



نشوفك راحه بس الروح تعبانه
نريدك چف تراهه الناس غرگانه

وكت آه ،،،، دفناه ،،، يتيم
يمنصور ،،،، تره الجور ،، جحيم

كبر هم البشر مهدي
يبعد العافية العندي
انه بدونك طفل وحدي يتيم

يا صاحب الزمان ،،، يا صاحب الزمان

✍️✍️✍️✍️✍️✍️✍️

كلمات الشاعر / رعد الفريجي

القصيدة كتبت عن قصه حقيقية
تحكي معاناة طفله استشهد والدها سنة 2008 اثناء ذهابه لزيارة كربلاء على يد التكفيريين اعداء ال محمد
الفاتحه على روح الشهيد
( مثنى الزبيدي )
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

أنه ابنيتك أنه
عمري أچم سنه
بعدني احتاجلچ لا لا تخليني
مو حظن المگابر حيل ياذيني
أنه ابنيتك أنه

،،،،،،،،،،،،،،،،،،،،،،،،،،،،،،،،،،،،،،،،،،،،

ما شبعانه منك ،، ابوي وروحي چنك
طفله اوعودتني اغفه اعله صدرك

اشمك حتى انامن ،،، بين چفوفك آمن
هسه شلون احظن بله گبرك ؟

يخادم للحسين زيارة مقبولة
گلتلك أندعيلي وگتلي محلوله
چانت روحك بشباچه مشتوله
أتاني اعله الدرب بلكت يهل طوله

ساعات انتظر
صبر مات الصبر

اتاني وعلدرب بلكت تلاگيني
مو حظن المگابر حيل ياذيني

،،،،،،،،،،،،،،،،،،،،،،،،،،،

صار الليل والخوف ،، بده اعله ديارنه يطوف
يا ربي اندعي يرد بالسلامه

ما اريدن ملاعيب ،،، تعال ارجوك لتغيب
طفله وانذبح ذبحة حمامه

بچيت وما گدرت دموعي افسرهه
أظن گلبي يگلي الونه احضرهه
صحت بويه التحبهه انكسر خاطرهه
تعال ارجع فلا غيرك يصبرهه


علي صار المسى
ودمع هجرك قسى

اريد اليوم ابوي ودمعتي ابعيني
مو حظن المگابر حيل ياذيني

،،،،،،،،،،،،،،،،،،،،،،،،،،،،

رجع بس شرجع ؟ ،،، بده بروحي الوجع
بتابوت ويطب للدار ابونه
چيله بصدره مصيوب ،، لگوه علگاع مگلوب
عيونه امفتحه ومو ذاكه لونه

فهمت عيونه چان يريد يشبگني
گبل ساعة وفاته وهم يودعني
بعدني زغيره يا بويه وتيتمني
طحت فوگ الجنازه وچنه يسمعني

يچلماتي انتهن
وطن مات الوطن

يبويه اليتمتني ارجوك حاچيني
مو حظن المگابر حيل ياذيني

،،،،،،،،،،،،،،،،،،،،،،،،،،،،،،،،،،،،،،،،،،،،،،


گتله ابجالك اكبر ،،، بويه الله واكبر
ما شبعانه من چلمة يبابه
ويني اوين الدموع ،، غير الموت موضوع
دنام بحظني شنهيه الترابه ؟

ارجعلي الطيور السافرن ردن
البنات بحظن ابوهن من عصر گعدن
اليتيمه تظل يتيمه ادموعهه أيهدن
اذا ما تلگه ابوهه تموت مو تحزن

غريبه بلا اهل
ولا واحد سأل

بعد ذاك الابو ياهو اليحاميني
مو حظن المگابر حيل ياذيني


،،،،،،،،،،،،،،،،،،،،،،،،،،،،،،،،،،،،،،

عشت بس ما عشت ،، بعد موتك متت
اول مره اطب المگبره وياك
وانته بگاع مدفون ،، وانه تسيل العيون
يهيلون التراب وگلبي ينعاك

ارشن ماي گبرك خافن يفوتك
قرب وقت الصلاه يلماخذك موتك
توضه بماي عيني وكبر بصوتك
اتاني اعله الگبر بس يمي تابوتك

ياهو البعد الي
راحو كل هلي

يا عين العمت جانت تدليني
مو حظن المگابر حيل ياذيني

كلمات خادم الحسين
رعد الفريجي
26/ 9/ 2020 السبت

#مشاي

مشاي. اي والله هنيالك
مشاي والمهدي يبرالك
انطينه فرصه فدوه لعيونك
اهل المواكب خل يخدمونك
مشاي. مشاي
........................

كل خطوه تمشيها/زينب تواسيها/يازاير حسين
تدعيلك الزهره/ يابختك شكبره/بين الموالين
زاير حسين ومقامك عالي
لأن غالي حسين تصبح غالي
أئمر احنه بخدمتك يالزاير
ادلل علينه وابــد لتبالي

عالراس يازاير دخيلك
عالراس لو تتعب نشيلك
مولانه املاك اليحرسونك
اهل المواكب خل يخدمونك
مشاي. مشاي
........................

خدامك انرحّب/لا تعبر الموكب/شرفنا لحظات
اگعدلك شويه/اشربلك اميّه/ نتوسّل اتبات
البيت بيتك والخدم اخوانك
تفضل ادخل فارشينه امچانك
الله حبنه وجابك عله بيوتنه
زاير حسين شكبر عنوانك

مبخوت. هذا التطب داره
مبخوت. من الله الابشاره
اهل السمه كلهم يحمدونك
اهل المواكب خل يخدمونك
مشاي. مشاي
........................

طول الدرب خدمه/نعمه بأثر نعمه/شتتمنّه موجود
أئمرنه يالزاير / ماي واكل حاضر/ وعيونك شهود
نريد منك بركة مر بينه
الدنيا تضوي من تسلم علينه
لا تمر بالموكب وماتدخل
نزعل عليك وتره تبچّينه

خطوات. يالزاير امشيها
خطوات. لخدامك اهديها
عدهم وصايا خل يوصّونك
اهل المواكب خل يخدمونك
مشاي. مشاي
........................

بالممشه من تبدي/ سلّم على المهدي /ادعيله ويّاك
اهديله خطواتك / يگضيها حاجاتك/بعيونه يرعاك
المهدي يمشي وياكم بدمعاته
شيلو يالزوار من مأساته
للفرج ادعوله هوه وياكم
من مغيبه يظهر لثاراته

ويّاه. من يظهر لثاره
ويّاه. كل احنه انصاره
يامن تزور حسين خيعونك
اهل المواكب خل يخدمونك
مشاي. مشاي
.......................


كل اليخدمونك/يالغالي يردونك/من توصل هناك
اذكرنه بالحضره /يم والد العتره/كلحنه برجاك
طلب منك يالتزور انطلبه
من تزور اذكرنه تحت القبّه
ياحُسين احفظ جميع الشيعه
صارت تمرّ بمواقف صعبه

نشتاگ. للحضره والبيهه
نشتاگ. نوصل مشي ليهه
يالزاير وكلهم يشكرونك
اهل المواكب خل يخدمونك
مشاي. مشاي


#سيد_زيد_الفحام
2020
_''___________"""___'''''_________

هذا يوم الاوفياء
جينه ونقدم عزاء
مايهمنه اي وباء
كربلاء يا كربلاء


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياهله تصيح المواكب من لفو
الروح ترتاح وكلبنه من اجو
يا هله بريحت الغالي ادللو
لخدمت الزوار يله اتشرفو

ذوله زوار الحسين
اكلوبهم كلهه حنين

كلهه تسمع النداء
كربلاء ياكربلاء



٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


اليوم مشايه وخدم تصرخ حسين
تعاهدك مولاي يبن الثائرين
تبجي وتصيح اعله نهجك سائرين
هذا يوم الحشر يوم الاربعين

مشي تلطم وعتنت
شافت الكبه وبجت

حتى بجيت السماء
كربلاء يا كربلاء

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اليوم خطار المضيفك تعتني
الكافل استقبلهه كل شيعة علي
هذا اخو الحوراء هذا بن الولي
اليوم جفين الوفه مدهن ألي

هذا ابن جود وكرم
هذا اخو حسين الشهم

موطن الحب والوفاء
كربلاء يا كربلاء

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اليوم دمعتهه جرت فوك الخدود
تعنتك يحسين كل هاي الحشود
اجدد البيعه وتشم عطر الورود
تنادي بعدك ابد ما النه وجود

حسين يا نبض الگلب
انه غيرك ما احب

بذكرك نزيح البلاء
كربلاء ياكربلاء
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

واليزورك سيدي يصبح أمير
تحت جدمه الكاع تتحول حرير
ألف هنياله الحبيبه انته تصير
ما تمسه النار ابد يوم السعير


ادعينه يم الصحن
يفكنه من هاي المحن

هذا ابن الاوصياء
كربلاء ياكربلاء
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

الزاير اليوم أعتنه لارض الطفوف
لا لبس كمامه لا لابس جفوف
شايل ويا المحبه بلايه خوف
يواسي اخت عباس بمصاب الجفوف


يصيح كابي كربله
روحي افديهه أله

ألك حبنه الولاء
كربلاء ياكربلاء

كلمات خادم الحسين
#حيدر ناجي الدراجي
1422 للهجرة

روحي يمك مـــاهي روحي
من اجيتـــــك فاض نوحي
ماگدرت اكتم جــــــروحي
مولاي
مــــــــن اول لقاء اوياك
چن رديــــــــت لصياري
گـمت اتخيــــــلك وياي
شما جـــــابو الك طاري
باول فرگه شفت الموت
مو گـــــــــد الهجر ثاري

مديونك ~يصاحب روحي وتوأمها
وعيونك~ بشمس لو قارن اضلمها
من لونك~اشوف الزهره ومحرمها




قصرت ويـــــــــــــــاك عفواً
على هـــــــــاي النعمه شكراً
دوم الوذاً بيـــــــــــك حتماً
مولاي
اشوفك لليعـــطشك ماي
ماچـــــــنك متت ضامي
حياتي اتبــدلت من يوم
وگـــــــفت يمك اجدامي
وي غيرك اســـولف ليش
حرام اگــــــضيهن ايامي

بحسـاسك~ تذوب الدنيـــا ومابيهه
بمـــداسك~تراب الجنه اتســـاويهه
حد راسك~مراجل ربـــــك حاويهه




ياوطن روحــــــــــي الغريبه
منـــــــــــــك ارزقني مصيبه
گلبي محســــــــــود بنصيبه
مولاي
اركضلك ركـــــض عميان
ماوچد شنـــــــــي اگبالي
وابچيلك بچــي المفطوم
حد ما ينگـــــــــع اخيالي
حبيتك نهــــــــــــار وليل
أنام واگــــــــــــــعد ابالي

كل حيره~ تشح يحسين اعله اعتابك
ياغيـــره~ اليدور غـــــيره ايدگ بابك
تفســـيره~ لغز محد حـــــــــل اترابك



المايحبـــــــــك روحه ميته
تنطي كلشـي وكلشي سكته
والمشه بدربــــــــــك ملكته
مولاي
مو كلمن يحـــــــــب ينگال
ماخذ عالعشــــــــــگ شمره
اكو يگضي العــــمر مشتاگ
واكو عــــــنده العشگ فتره
كلهه اتحب شرط عالشوف
بس حبـُـــــــك على الفطره

مشبوحه~ عليك عيــــــوني المانشفن
للـــــوحه~ يضـــــــل ذكراك وماينسن
بجروحه~ يجيك الخادم مــــن ايحن



مــــــــــــــــن عرفتك غيرتني
الرحمة عيــــــــــونك خذتني
من وحـــــــــل للحب شلتني
مولاي
تعودنه وجزيـــنه الشوگ
جرحك عمـــــــره مايبرد
ماعدنه دمــــــــــع چذاب
علينه مجلســــــك يشهد
مثلك ماكـو عدنه اهواي
واحد انتــــــــــه ماتنعد

بچيني ~اريد ابچــــــــيلك كل ليلي
خليني~ ابچّي الناعي ويــــــبچيلي
ياذيني~ مصاب العاشر هد حـــيلي



خادم القصيده
#شاكر الصيمري

#رقية عليها السلام


غيابك....... شمَر بعيوني السهر
غيابك...... ملح وبجرحي استقر

ياكل بگلبي الصبر جا ما تجيني
الحگ اعليه قبل لا تعمه عيني


بغِيابك ذَبْلت عودي وانه ارويحِتي خضره
كلشي حلو من عندك لكن فرگتك مره
النهار اكضيه بالشوغات وخلص ليلي بالحسره
طابت چويه الجمرات وغِيابك ناره مستعره


يبابا.......شفت راسك عالرمح
يبابا...... ما اصدگ منذبح

برد كلشي وما برد شوكي وحنيني
الحگ اعليه قبل لا تعمه عيني
.
.
.
.

رقيه وحلمي كد عمري تمشط ايدي شيباتك
تضحكلي السمه والگاع من انظر الضحكاتك
ما فگدت الترجيه فگدت إذني چلماتك
شوكت ترجع يشوف العين وِتحن على ابنياتك


وغلاتك..... ذَبَل عيوني البجي
وغلاتك..... هواي الك عندي حجي

الحادي ضل يبجي على دموعي وانيني
الحگ اعليه قبل لا تعمه عيني
.
.
.
.
يجرحي اتمايل ويالريح ومن السهر نحلانه
هجرك بيّن بوجهي الملامح كلها تعبانه
يماي الحب يعافيتي الطولك حيل عطشانه
بلك الله بحلم الگاك واگلك عالسده ويانه


اسولف..... عالتراچي والهِزل
اسولف..... عالخيام وعالحبل

وارد اكلك والله حيل معذبيني
الحگ اعليه قبل لا تعمه عيني
.
.
.
.
كلها تصيح حيل وياج محد گالي اشلونج
بنات الشام گاللي اهلج ما يريدونج
عافوج ومشوا لبعيد واصلا ما يحبونج
عليج الدم يلوگ هواي حيل وياج يسبونج


الهضمني..... شمرن اعليه الحجر
الهضمني...... جدمي يمهن من عثر


گبل وين وياك بويه وهسه ويني
الحگ اعليه قبل لا تعمه عيني
.
.
.
.
بان الشوگ بعيوني وكلها تباوع اعليه
جبتلك ماي يالغالي خضِر عالرمح ليه
بس احضني وارجع موت لا تسأل على البيه
وبهونك على امتوني الألم خافن يفز بيه

اموتن..... لا ترد بس رأس الي
اموتن.....  من القهر يا ابو علي

راسك ولو اجه ليه يجيب بيني
الحگ اعليه قبل لا تعمه عيني


#الشاعر عبدالله الشويلي

عن ماجــرى في كربلاء
عن زينب وباقي النساء
بدموعه يروي الباقر

عشت الطفـــوله ابكربله. ومن زغري طلعت شيبتي
عن جدي كل ما سولفت. تستغفر الله احچـــــايتي
طف كله مــابي مستحه. شفت العجب من خيمتي
رگبة محمد تنســــــحگ. وعطشانه ضلــــت عمتي
ذبّل شــــفايفنه العطش
وحسين ضل ابلا نعش
هشم ضلوعه الحافر


من طاح ابو فاضل غفلّ. وحسين رد محني الضهر
شفت المخيم بس شكل. طايح عموده ابلا گـــــمر
رد ميت حسين الجـسد. بس روحــه ضلت تنتضر
چتاله جانت خــــــــوّته. وچتال ابو فاضــــــل نهر
چم موقف بموقف شفت
خيل وحرگ كلهن عشت
كاسر گفاي العاشر


هيّن على حســين الذبح. بس ماتهــون اعله الحرم
من هجمت اعلينه العده. شفته زحف صوب الخيم
ركضن بناته بالفــــــــــله. والنار بطـــــــراف الجدم
ياموقف ابزينب جــــرى. شفت ابعبــــــــايتهه تلم
ضاع الهه بالطف چم طفل
شفت الخيم مــــن تشتعل
بس الله بيهه الساتر


شايل حزن مثـــل الجمر. يچوي الگلب من ينسمع
وي اهلي ماشيت السبي. وهم الحـبل بيدي انطبع
اركض لبـــــوي شما عثر. معلول مـــــــابي عالدفع
چم طفله عتـــاها الحبل.وذاك الحبـــــل ماينگطع
كلما يطر وجــــــه الصبح
عين الطفل صوب الرمح
ما يكسر الهم خاطر


عاشرته كل خطـوه ابدمع. درب السبي ماينوصـــف
ضعن الفواطم مــــن طلع. يتلافتن صـــوب النجف
من أيسن مــــــــــن كربله. وچفوفهن شــــبعن نزف
كل وحده ضاع الهه حلم. محد مشه اوياهن عرف
بين الخرايب والقصر
نفترهن ابتــالي العمر
وعين الشماته اتناضر

خادم القصيده
#شاكر الصيمري

انه الوياك اجيت ورايده الملگه
بس حاچيني احلفك روحي مختنگه
لا تتركني عباس
شيب گلبي والراس
بس حاچيني احلفك روحي مختنگه

،،،،،،،،،،،،،،،،،،،،،،،،،،،،،،،،،،،،،،،،،

والله تعبانه ،، من أهد عاشر محرم كارهه الماي
روحي خلصانه ،، اختك ابمجلس عدوك والحچي هواي

مشيت وي الذبحكم والحبل بيدي
مشيت وروس اخوتي اگبالي ووليدي
يعيني من الدمع يم الكفل زيدي


اباوع علتراب الحاظن اخواني
واصيحن يا لحد غطيني بس اني

مو خنگتني الانفاس
شيب گلبي والراس

،،،،،،،،،،،،،،،،،،،،،،،،،،،

خويه مهمومه ،، يابو فاضل زينب اختك
عميه العيون
كلمن ويومه ،، وانه اريد اليوم اموتن ما تگعدون

شفت بالشام ضيم الما رحم بيه
صاحو هاي اخت عباس مسبيه
واگلهم لا وحگ حسين علويه


يشتمون بسكينه وتبچي گدامي
تگلي السوط عمه ايكسر عضامي

طفله شلون تنداس
شيب گلبي والراس

،،،،،،،،،،،،،،،،،،


ما تحاچوني ،، ذنب شمسويه رقيه ومن يضربوهه
تحشم اخذوني ،، ارد اموت بحظن ابوي وما يسمعوهه

بخرابة الچانت وي حسين وبروحه
نامت علترابه وهسه مذبوحه
جروح حسين زادن كثرن جروحه

على راس العزيز اتوفت الطفله
گبل متموت چانت مدري شتگله ؟

يبويه الكلك احساس
شيب گلبي والراس

،،،،،،،،،،،،،،،،،،،،،،،،،،،،،،،،،،،

وهسه ردينه ،، بعد ما شام المصايب خلص عيوني
ما تحاچينه ،، ما اروح هنا اظلن لو تردوني

گوم وياي دنيا بلا اخو تفشل
حملت السوط بس الفرگه ما أحمل
انته اهل الكفاله ونعم من تكفل

بعد بيه دموع ابچيهن ابابك
گوم من التراب اتلگه غيابك

چنه أبوليت الناس
شيب گلبي والراس

،،،،،،،،،،،،،،،،،،،،،،،،،،،،،،،،،،،

ميته وعيونك ،، مر عليه الضيم كله ونته مو أنته
گتلك شلونك ،، هسه ما تسمعني خويه وتكتل السكته

رجعت الكربله وراح انتظر تنهض
ولو هوه اليموت يكوم من ينرض
يحيرة زينب وللموت ما تنفض

الله وياك اروحن والله ويانه
ولو مفروض اموتن يمك اهنانه

يم الكله نوماس
شيب گلبي والراس
بس حاچيني احلفك روحي مختنگه

كلمات خادم الحسين
# رعد الفريجي
1442 للهجره
24 /9/ 2020

شايل ابعيني دمْعِتي
وبچفي شايل رايه
واتحزّمت واتوكّلت
وي رحلة المشاية

خسران ذاك الما كتب .. اسمه واجه ويانا
يا ابو علي وشنهو التعب .. والزهره تتلگانا

.....

الوعد صار  .. رفّت الرايه
يزوار .. يلا ويايه

صيحوا ابگلب مالوم
ويلي على المظلوم
اتعنينه هذا اليوم
بالرايه

يحسين لو وحدك چنت
تتلفت ابلا ناصر
هاي المواكب كلها الك
والعمر اصبح عاشر

....

ملايين
نمشي للحضره
مجانين
نلطم ونقره

بين الچفوف اشموع
وبس اسمك المسموع
عالخد تشوف ادموع
مشّايه

دمعه اعله دمعه تجمعن
سون نهر يا ضامي
خل يشح ماي العلگمي
بيه لا تهم .. إمامي

......


ابلا نار
اشتعل واطفه
اعله تذكار
العاشر وطفه

المشايه كون اهناك
يا بو علي وياك
بدم النحر تفداك
وفّايه

هاي الملايين التجي لزيارتك يالوالي
يا ريت من وحدك چنت تفزع الك يا غالي

.....

العيال
فدوه لعيالك
والأطفال
تبچي لأطفالك

يل بالأهل ضحيت
فارغ تركنه البيت
ابخدامك اشسويت
مولايه

يوم اربعينك شيعتك جابت حرمها وياها
تنتظر زينبكم تجي عالنهر تتلگاها 

.....

گبل عام
اليخدم اهنانه
ابهاليام
ما اجه ويانه

بين الشهيد المات
بين الصرخ هيهات
صوت الحشد هيهات
كفّايه

عطّر اتراب المگبره .. واتشيّع الزفافه
للجنه ما طب للگبر والضحكه فوگ شفافه
.....

احمد هادي الشمري

المهد ناداني يوليدي يعبدالله ويتنهــيدي
يريد يشابچ طيوفك وعيني يبني اتشوفك
المهد ناداني يوليدي
****
يعاتبني المهد يبنــي ويناشدني على غيابــك
يگلي ليش خلانــــي وآني احضن اترابــــــك
يريد ايشابچ اهدومك ويعيش بفرحة احلامك
ينشد كل وكت عنــك وحيد ومظلم خلافـــك
مايدري اشجره واشصار من نحرك دماك انهـــار وسهمك مزگ اوريدي يعبدالله ويتنهــــيدي
المهد ناداني يوليدي
*
رباب اشلون حاچينـي عبد الله نساني ليــــش
بعد ياهو الوليــــــــــه ومن بعده حلالچ عيش
طفل هو ه چذب والله بحــر ماله قرار اوگيِـش
اوبعده من يسلينـــي وبيش اليوم اعوضه بيش
من يضحك يدغدغنــي وحلوه اچفوفه تشبچني
من احضنه فرحتي وعيدي يعبد الله ويتنهـيدي
المهد ناداني يوليدي
****
يعبد الله بزمان الـــراح چنت يمي وتناغيلـــي
وألولي يالولد يبنــــــي وعلى صدري تسليني
ويظـل مهدك يعبدالـلـه على غيابك يحاچينـي
حيرني وهدم صــبري وشجاوب يابعد عينـي
المهد ساكت لچن ادري يظل قهره مثل قهــري
غريب مگيد بگـــــيدي يعبـــد الله ويتنـهيدي
المهد ناداني يوليدي
*
لچن يبني وحگ جــدك مايد ري المهـد بأمـرك
ولايدري السهم صابـــك يبني ونابت بنــــحـرك
ولايدري الـــعطش اذاك ولايدري بعظم صبـرك
ولون يدري بدماك يسيل وغطه جيدك وصدرك
چاهاج وبچه بحرگــــه وكسر عوده وذبل ورگه
وآنه يبني اشبيـــــــدي يعبـــــد اللـه ويتنهيدي
المهد ناداني يوليدي
****
يعبد الله المهد ويــأي يسولفلي على ايامــــك
واشلون سهرت ويـاه وحلوه اتعانگــه انسامك
وبين الگعده والغفوه يلولي ويسمه انغامــــك
يگلي ماشفت مثلــه عظيم وحتى باحلامـــك
يگلي موگطع بيــــه وجودي شنهو تاليــــــه
والمن يبقه ترديـدي يعبد الله ويتنهـــــــيدي
المهد ناداني يوليدي
****
يبني والصدر شدنـي يريد ايرضعـك ويرتــاح
علي ليلي يويلي طال ومااشوفن ابد مصبــاح
يعبد الله انهدم حيلي من شفت السهم طـاح
شاذكر يالولد وانسـه ولروحي چنت ســـــبـاح
وعلي يبني صفت صعبه حياتي بغيرك بغربــه
يريد يشابچ طيوفك وعيني يبني اتشوفك
اشوفك رايح من ايدي يعبدالله ويتنهـــــيدي
المهد ناداني يوليدي
خادم خدام الحسين عليه السلام
الحاج ابو إياد البيجاوي

قصیدة:هیّه صوبک
ـــــــــــــــــــــــــــــــــــــــــــــــــ
هیّه بس ضلّت علیک.. لو نجي لو مانجیک
أشلون بـینه و مانجي بالأربعین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
یلّي هاي اسنین تکرم بینه واحنه ابخدمتک
هسه شمسوین خاطر ننطرد من خیمتک
نعرف انته رحمةالله و جینه نطلب رحمتک
افتـح ادروب الزیـاره یاحسـین الأمـّتک

هم بعد نسمعها هاي..اتفضل اشرب یمنه ماي

یا هلـه بالـزایر أحلـی کـلمتیـن
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
صارت الیالي نسولف والحچي ما بي طعم
هالسنه لو ما عبرنه نمشي عود الیا حرم
کلها محتاره أشتجاوب وینکم یأهل الرحم
یالمتت مظلوم أعلم خادمک هسه أنظلم

الي متعوّد یروح...للمشي هسه ینوح

ناطي ربعه احچایه بین الحرمین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
ماکو بینه المایسولف ذکریاته ابهالدرب
اهنا گعدنه اهنا مشینه اهنا بچینه امن الگلب
یاحسین الغربه صعبه و مانحس چنه ابغرب
انعوف اهلنه و نعتنیلک نشتري چنه الصعب

انته ابو گلب الچبیر.. ماکو عندک مایصیر

والله درب الـغیر ما نعرفله وین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
الگاضي عمره بالزیاره و بالمشي امخلّص عمر
عنده لهفه الأربعینک حتی أحر من الجمر
یاحسین و ابوالموکب ناطر الزایر یمر
گاعد و ایده اعلی خده أمشیّبه هذه الأمر

یمته ابوالموکب یصیح ..اهنا یزایر أستریح

هم بعد نسـمع هله بالزائـرین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
أشگد حلو درب الزیاره امن النجف حد کربله
امنین ما تلتفـت تسمـع هله بالزایر هله
یاحسین ابداعت اول سهم صابه حرمله
ودّي العباس بیده أیحلها هاي المعضله

ندری ما عنده چفوف...أبعین وحده بس یشوف

والله ننـطي اعیـونّه للـماله عین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
یاحسین الگطع بیده راسک و حز منحرک
هسه ما یطگع دربنه و ما یمانع زایرک
نقسم اعلیک أبقداسه العدنا کلها ابمنبرک
وعد لو ترضاها انته أزحوف نوصل محضرک

وعد النه عن قریب...کلنه یم باب الحبیب

أنصیح یحسین احنه کلنه امقصّرین
هیّه صوبک وانته حلها یاحسین
لو نجي لو مانجیک
ــــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري..المحمره
اربعین الحسین 1442

بسمك ابتدي يحســـين وانهي

وبرماد الخيم صخمــت وجهي


وفقني ارد اخدمك…. وبيض وجهي يمك.. حبيبي

★★★★★★★★★


العمر خلص ياحبيبي وبين الشيب ابلحيتي

انت كل ناسي وحياتي ياحُسين وانت بيتي

ابخدمتك مرفوع راسي وبالحشر هيه هويتي

حرمت كل هوه اعذيبي وبس الك محجوزه ريتي



هذا انت الهوه البنفاسي يسري

ابدونك ياحسين اشيسوه عمري


الهج دوم بسمك…. …. وبيض وجهي يمك.. حبيبي

★★★★★★★★★


ياحُسين اذنوبي كثرة وتحترگ بس بالجدوره

ورايــــد الطم رايد اطبخ وارد اقدملك نذورة

الدنيا شنهي ابلا محرم لا عزه ولطم الصدورة

وكل سنه الخــــدام هايه كلمن ايقــدمله دورة


وفقني الخدمتك بربعينك

يالشايل الخادم وسط عينك

ابنص گلبي ارد اضمك….. وبيض وجهي يمك

.. حبيبي

★★★★★★★★★




كلشي بيه ايصيح احبك وگلبي كاتب فوگ بابــــه

ودوم اصيحا بالمجالس اه يحســــين ومصابـــــه

شلون انام اعله الحصيرة وانت نايم عاالترابــــــه

واختي بالمنزل أميرة وانت اخــتك باالخرابـــــه


الزينب بعد ماايبطل ونيني

والعبدالله ناذر كل بنيني


ابعبدالله انه احشمك….وبيض وجهي يمك.. حبيبي

★★★★★★★★★


وين اروح وانطي وجهي وانت وجه الله وجماله

شرد اقدمله ابحياتي الخاطري قدم عياله

ياحُسين العشگ فرصه ونعمه من الله تعاله

ومن گبل مااصير احبك وياهوا مثلي يحس دلاله



اكثر من ابوي اتحبني وامي

حللت وگليتك نبض دمي


فدوه الطاري دمك……. وبيض وجهي يمك.. حبيبي

★★★★★★★★★


ياحُسين ارزقني نظرة وخل اخدمك في حياتي

الشيب اخذني ياحبيبي وثگلت ابچتفي عباتي

والله مااسوالي درهم خدمتك سوت غلاتي

انت روحي وانت عمري وانت تحضرني ابمماتي



باجر ياحُسين ابگبري اريدك

من اغرگ ابذني مدلي ايدك


غرگان ارد اشمك…... وبيض وجهي يمك.. حبيبي

★★★★★★★★★


انـــه عند اهلي واحسن غــــربـــه والوادم بعيده

وامي تحچيلي اعله حبك واگعد واكتب قصيده

اتگلي يبني كون اريدك ايـــــدك اتخليها بــــيده

واليعوف حســــين يبني باالحشر محـد يفـــيده



هيچي اتگلي امي وتحچي عنك

وانت اويانه گاعــــــد والله چنك

امي فــــــدوه لمـــك…. وبيض وجهي يمك.. حبيبي

★★★★★★★★★






ــــــــــــــــــــــــــــــــــــــــــــــ
ماجد حبيب الخيكَاني
2020/ 9/26 ونسألكم الدعاء

جمره اتولع بالروح
بين الاعادي
عالهزل يالمذبوح
زينب تنادي

يانورالبالعين
يبن امي يحسين
زينب تنادي ٢
*
ابسكوت الصفنه چن زینب
تذوب وتحبس العبره
اخافن یسمع الشامت
بچت بت فاطمه الزهره
تمسح بالدمع خفيه
وتنهت خفيه بالحسره
اويلي من قلب زينب
اويلي من جمرصبره

مره اينوح امن البين
قلب العقيله
مره اينادي يحسين
ياهم اشيله

هجرك هدم الدين
يبن امي يحسين
زينب تنادي ٢
*
تون فوگ الهزل زينب
ورياح الحيره شبّنهه
وليال المحنه ياويلي
ابشجون الحسره شيبنهه
عگب ذاك الدلال اليوم
سياط الهم يعذبنهه
المصايب والحزن والنوح
اويلي اليوم حدبنهه

عذبهه اسياط الجور
بنت الزجيه
عافت جسم المنحور
بالغاضريه

واتون امن البين
يبن امي يحسين
زينب تنادي ٢
*
تنادي فدوه لعيونك
يخويه الچنت اودنهن
عیونک چن شمس بیهن
غیوم الهم ابعدنهن
يخويه اشمحله بسماتك
لأن من طاهه معدنهن
صرت هسه ابزجر هجرک
ليال النوح اعدنهن

نظراتك دوم اوياي
بدموع اعيوني
بسماتك يامولاي
عاشن بظنوني

لجروحي تسكين
يبن امي يحسين
زينب تنادي ٢
*
تلاميحك يبوالاكبر
كأن جدك نبي المختار
وحين اتشدالعمامه
تشبه والدي الكرار
بجية اهلي بس انته
وغبت عني يبوالاحرار
و.يزتني عالرمح راسك
يصدني وصوبي بس يندار

مسبيه وفوق الشوس
روس الهواشم
تتهرول خلف الروس
چن امنه فاطم

عباسك چاوين
يبن امي يحسين
زينب تنادي ٢
*
الگمرچن گلي يازينب
هذآني عالرمح راسي
ازتّچ خويه يازينب
فدیتک خویه بانفاسي
اظل احميج اناوهيهات
اعوفچ ياضوه احساسي
انا احسيناوي يازينب
واظل للتالي عباسي

عاتبني وشفت الراس
دمعه يسيله
صرت اندب ياعباس
احمي العقيله

ياحامي اِلْياسين
يبن امي يحسين
زينب تنادي ٢
*
خادم خدمةالحسین ع
ناصرآلبوعبید

#گواچن الله...



گواچن الله یا عزیزات الگمر
اشباقی بیچن حیل من هاذ السفر
هوه انتن امخلصات کلچن بلدرب
یا عافیه الضلت بعد ذاک القهر

زینب های تعبانه حیل و بیهه ضل اخر نفس
ماکو افیای شهرین صایر نومهن حدرالشمس
و شح المای عطشان بنت ام الحسن وین الیحس

ساعدهن العباس من ظیم های الناس
امدنگات فوگ النوگ ما شایلات الراس


گواچن الله گواچن الله
__________


ما شفتن الراحه عگب لیل اهدعش
من طاح اخوچن بلفله وجسمه انفرش
الطب للخیم مارده واحد بس لچن
واحد یصح ابکربله ایرد العطش

لیل و خیل والدنیه مدری اشلونهه ابلیه الگمر
وراح الحیل من ماکو رایه اترف بعد یم النهر
ظلمه ولیل وعیون زینب ذابلات امن السهر


اشلون گلی اتنام واتروح الصبح للشام
واشلون بیهه اتهید الفگدت خدر واخیام


______


ساعدچن الله امن الصبح حد الظهر
یا راحه بعد اتشوفن و یمچن شمر
اشما ردتن اتگعدن یفز بیچن جرح
شی گامت اتطفی الخیم شی بلخدر

ماترتاح الگوه تمشی للسبی و ترکب هزل
الکافل طاح امدللهن وعگبه کفل زینب حبل
وشامت صاح الماراکضات الیوم رکضوهن عدل


یل موش مرتاحات اترکض وعطشانات
وایصیح راس احسین ابهیده یعلویات


____________


زینب ابلیله راسهه ابشیب اشتعل
گلولهه القربان من عدهه انقبل
مختلف بس موهیچ قانون الذبح
گلولهه بس بیچ دین الطف کمل

یا قربان ما شارب المای ویذبحونه الظهر
ضل عریان والخیل فوگ اتروح واترد العصر
والنسوان انطنه لخوهن حیل وانطاهن عمر


المفروض علقربان ما ینذبح عطشان
واحسین ثالث یوم ضل علترب عریان

_____

ساعدچن الله الشام ماینطب گبل
اخفاف ناسه و ما یعرفون الثگل
طبیتن و مو ثوبچن هاذ البلد
الاهلا وسهلا صارت ابدگ الطبل

ناس اموات واگلوبهم میته ویکرهون العبی
وعلویات اشلون طبن بی و ما طبه نبی
تعبانات ساعدهن الله اتعب ادروب السبی


یاکون ما جیتن وبلشام طبیتن
نص الدرب یاکون لحسین ردیتن


_____________


#عبد_الرباب
#احمد_الصخراوی

قصيدة (( قري عيناً ))

قُــري عيـناً كـــربـــلا قـــد بــدى حــجُ الـــولا
ومسيرُ العـــاشقـــين ذا نــــداء الأربــعيـن
*
گـــرت اعيـــونــچ كـربلــه متعنيه الــچ كــل المــلا بلهفــت محـبيـن
عشاگ اجــو طول الـدرب وبشوگه متعــني المحب يا كربــلا حسين
وبلهفه يمشي أعلى الجدم وبچفــه مــرفوع العـلم تتفايـض العـين
مثــل الــحجيـــج أتقدمــوا بين الصفى ومروه سعوا بين الضريحين
لبــى شــــوقـــا وسعى وبــكــى ثُــمَ نعــــى
ودمــــوعُ السائــــرين ذا نـــداء الأربــعيـن
*

يـا كـربلــــه أذَن وحـــي حيا علـى فرض المشـي للغــاضــريــه
هالصوت چنه من السمه گصــدت آوياكــم فـاطـمه الزهره الزچيه
صــوت العــوالـم تسمّعَه مــن الجهـــات الاربـعــه لكــل البـــريـه
احِـــرِم يــزايــر بالدمـع عــل منّـه مــا سالـم ظلع فوگ الوطيـه
ظل صوتنا وصــدى قتـــلَ النحــرُ الـــردى
وأذلَ الــظــــالمـيــن ذا نــــداء الأربــعيـن


*

يــا كــربلـه مــن العلي عالناس ظل سـرچ جلي حيرها الأذهــان
محتـاره بي كــل البشر سـرچ مثـل ســر السـوّر ما يدّركه إنسان
عطشـان طـاح الأرض لكن صبّح مثــل الفرض ما چنه عطشان
بعده نهر يروي الضمه مو بس ارض حتى السما سر وحيه قرآن
ســـرهُ ســـرُ السمـا ظـــلً دومـــاً محكما
ويلبــي يـــا حسيــن ذا نــــداء الأربعيـن

*

هذا المشي من الله فتح سَبّح بســم ذاك الـذبـح لا تبقـى حايــر
نصـر الله مـن دم النحر هاليـوم بالطـف انتصــر بأسمك يزايــر
آيات ربـــنـا أتجسـدت بـدم الحســين اتخـلدت مــن المناحــر
من راسه عالرمح أنوضع گبله كتـاب الله أنرفع والمعنى حاضر
رأســـهُ لمّـــا عـلا ســـورةُ الكهـــفِ تــلا
مــلأ الدنــــيا أنيـن ذا نــــداء الأربــعيـن

*



يــا كــربله قبلــه نعـم بـس للمــفاخر والقـيّم صنعتها السيوف
قبلة كرامه من صدگ بيها أنجمع كل العشگ كل مغرم أيطوف
تحـرم حجيجچ كربله بس بالدموع الهــامله والعالــم يشوف
كــل الأديـان أتعنــته قـرأن لمــــن شـــافتـه من دمه معروف
قد بكى خيــرَ الــــورى دمـــهُ لـــمّا جـــــرى
وبكـــاهُ العـــالمـيـــن ذا نـــــداء الأربــعيـن

**
الشاعر
موسى البديري

اعذرونه .. المشي للطف منى
اعذرونه .. وما اجينه هالسنه
من الأحساء مشتاگ
عفوكم يهل لعراگ
اعذرونه .. اعذرونه
@@@
سكروا لحدود لمن اعلنوا عن الوباء
مادروا بحسين گبره وتربته بيها الشفاء
وجينه نتعذر أليكم ياعراق الشرفاء

ترى بعنه العمر كله بخطوه وحده لكربلاء
...
سامحونه .. والقوي حكمه انكتب
سامحونه .. وانتوا تدرون السبب
علينه فرضوا لطواگ
عفوكم يهل لعراگ
اعذرونه .. اعذرونه
@@@
تذبح المشتاگ لمن ذهنه يقره الذكريات
امن الأمير اشلون طلعه ويّه افواج المشاة
الشايل الرايه ويرفها والي يمشي بالعصاة
وعالطريق اطفال وگفوا رحبوا ولد او بنات
...
بأحلا كلمه ... عالبراءة مرددين
بأحلا كلمه .. هلا زوار الحسين
لرقيه شلون عشاگ
عفوكم يهل لعراگ
اعذرونه .. اعذرونه
@@@
محشر الله الناس صارت والمشي كل الأمم
چف تمسح للمدامع وچف رفت للعلم
وعالمضايف صف شفنه ورحبتنه هالخدم
أي وحگ لحسين الهم دين بوسه عالجدم
...
دللونه .. الشانهم عالي وكبير
دللونه .. وخلوا الزاير امير
وعرشها اخيام ورواگ
عفوكم يهل لعراگ
اعذرونه .. اعذرونه
@@@
ابطريق احسين كل شي بركة ذاك الامام
من عصير وماي خلوا من مبيت او يالطعام
من علاج او يالمساج ويالمواكب والخيام
طيبوا گلب الزچيه ابلسم اجروح الامام
...
تكفلونه .. وعزبوا حتى السمه
تكفلونه .. والأجر عد فاطمه
ابلاش اتصير لسواگ
عفوكم يهل لعراگ
اعذرونه .. اعذرونه
@@@
ويّه كل عامود نحسب خطوه خطوه للكمال
وعرش الله بس نزوره نوصل لرب الوصال
واليعزب إلنه نادى عدنه يالزاير تعال
والمواكب مو مواكب حظن ام امن الدلال
...
خير الله .. تارسه الدرب الطويل
خير الله .. عين فرشوها ودليل
مضيف اشكال ورناگ
عفوكم يهل لعراگ
اعذرونه .. اعذرونه
@@@
ابكل سنه يعراگ حيدر والله للزاير وفيت
دولة المهدي ابجداره من كرم طبعك بنيت
تنحصي لنجوم لاچن بالفضل لا منحصيت
كل سنه گلنه ونجيكم وهالسنه گلنه يريت
...
تعودينه .. اي وحگ أم البنين
تعودينه .. نشوف رايات الحسين
خنگ لصدور لفراگ
عفوكم يهل لعراگ
اعذرونه .. اعذرونه
@@@
علي احمد الحمود
٢٥-٩-٢٠٢٠
زيارة الاربعين
كارونا

قصيده للمشايه /شور


(1)

يبني هاك الرايه
امشي للمشايه
وحضرلك ادموع

اضرب عله عيونكً
وحيل طيح امتونكً
وكسرهه للضلوع


عمري وحياتي بس حسين
دنيه ومماتي بس حسين
صومي وصلاتي بس حسين

ياثارالله حسين.

_________________________

(2)

كل سنه ونزورك
نخدم بعاشورك
ونطبر الراس

يا هله بزواركً
كاصدين ديارك
محلاهه هل ناس

كلبي ويه روحي بس حسين
تهتف جروحي بس حسين
يامحلى نوحي بس حسين

ياثار الله حسين
————————————————
(3)

محلاهه هل خدمه
من الله شكثر نعمه
شكراً يمولاي


جيتك بكل حيلي
الطم صبح ليليً
وهم جيت مشاي



محله النهايه بس حسين
حب وبدايه بس حسين
بيدينه رايه بس حسين
يثار الله حسين

_______________
(4)


ربحان لبدريكً
خل يشكر لربكً
يخدم للحسين

محلاهه بيبانك
سوينه صحبانك
ياقرت العين



محلا ونيني بس حسين
كلهه سنيني بس حسين
عشكي وحنيني بس حسين


يثار الله حسين
————————————-

ريت العمر كله
اخدم وما امله
وارجعله ندمان


اعترف بذنوبي
للملطخه بثوبي
يرجعني انسان



اطلب رجائي بس حسين
هاذه عزائي بس حسين
هوه دعائي بس حسين

ياثار الله حسين.





سيد علي الشرع

قصيدة لرجوع الضعن إلى كربلاء

بينة الزمن دار
اتلـــــكَانة زوار
يحسين اجينة يحسين اجينة
-----------------------------------------------
من جينة وياك كل احنة بحماك
ردت يتامـــاك اسمـــــع بچينة
---------------------------------------
تلكَاني رديت من السبي جيت
وياكم تمنيت انظــل ياولينة
-------------------------------
بت الزچـــية چانت سبية
يا بو الحمية راسك بدينة
--------------------------------
جيتك بالايتـــام اكَعد يضرغام
ظلت لي بالشام رقيــة الحنينة
------------------------------
وينك يوفــــــاي يالكَتلي بحماي
كَوم امشي وياي لرض الـمدينة
------------------------------
انادي يـــمظلوم لاتـطول النوم
يابو الفضل كَوم واحدي الظعينة
-------------------------------------
اشـكَد نخيتك من ودعيتك
اليوم اجيتك نشكي العلينة
------------------------------
اطي الوجه وين حاچيني يحسين
طشــــرنة البين وشســــوة بينة
-------------------------------
أسألكم الدعاء رائد الاسدي

قصيدة لرجوع الضعن لكربلاء


تلكَانة ياعباس ردلك ظعنة
اكَعد يبو النوماس ردنة لوطنة
--------------------------------
وياك اجينة بزود من المديــنة
عيالك وجينا وياك وانتة ولينة
ردينا الك زوار اتلكَانة جيـــنة
زوارة احنة اليوم وعيالة چنة
--------------------------------------------
اعذرني ياعباس كَوة خذونــــــــــي
حشمتك وناديت من جرجــــــروني
صحت بعلات الصوت خوية سبوني
وشكَد بچينا عليه من عنة رحنــــة --------------------------------------------
فاركَتك ورديت خوية ارد اشوفك
لو بيدي اظل وياك ما ساعة اعوفك
واكَظي العمر بالنوح فدوة لچفوفك
ما اروح اظل وياك ونلم شمــــلنة
--------------------------------------------
من السبي رديت ياخوية بالراس
اختك ونادي عليك اكَعد يعباس
ما ابطل من النوح حد گطع الانفاس
من نمتوا عالتربان ياخوية ظعنة
----------------------------------------------
طر الكَـــــــــبر عباس وادفني وياك
فراكَك صعب ياخوي ما اكَدر انساك
ايفت الكَلب والروح ياخوية طرواك
هوة عزيز الــــــــروح چا شنسة منة
---------------------------------------------
مرة ازور حسين مــــــرة ازورك
من عطرة اخذ ليك واخذ عطورك
ما فــاركَك للموت عاش بشعورك
بينك لبين حســين ياخوية حرنة
------------------------------------------
مـــــــاتم نصبنا عليك بالغاظرية
ون ولـــــطم ونياح صبح ومسية
نـنخة ونصيح بصوت يهل الحمية
كــــــــافيكم من النوم الكم رجعنة
--------------------------------------------
لـــوطر ظعنة وراح خوية ومشينة
ورديــنة بس نسوان لرض المدينة
وتنشدنــــي امك غاد چا ابني وينة
محتارة اكَلـــهة اشلون لو ناشدتنة
---------------------------------------------
أسألكم الدعاء رائد الاسدي