كل ما اصدن للمهد تلچمني الجروح
اذكـــر امناغــاك الي يا سلوة الروح
وسفه المهد خالي
عبــدالله يالغــالي
ياسلوة الروح
ـ"""""""""""""""""""""""

غارگــه بهمي ونطـرت اتمرني شهگه
لهفت المشتــــاك للمحــــــبوب ملگه
عمري شجــره ويبساه اجفـاك حرگه
اثناثرت عل گــاع بعـدك ورگه ورگه

سير علّي نسمة هـوه وخليني اشمك
يوليدي مر لو بالحلم مشتاگه اضمك
يمه ارحم ابحالي
عبـــدالله يالغـالي
ياسلوة الروح
ـ"""""""""""""""""""""

اهواي اموتن يمـــك واحـــــيه ابنضرتك
چنت احس الدنيه تضحك وي ضحكتك
ابهـل سهـوله اتروح منـــي ما حسبـــتك
ســــابح ابــدم النحـــر ياوسفه شفـــتك

لو ادري ترجع منـــذبح ما ارضه اوديك
يمه وبدل ماي النهر من دمعتي اسكيك
فگدك شده بالي
عبـدالله يالغالي
ياسلوة الروح
ـ""""""""""""""""""""""

حلـمي تكــبر يل ولـد وتگلـــــي يمه
حلـم حـــدر الگــاع ما حسبت اطمه
كلشي بعــدك يمه صار بعيني ضلمه
وكبر جرحي والالــــم ما بيه اكضمه

نيتك فجر لمن رحـت بس وسفه غدروك
يوليدي گلي بيا ذنب من حضني حرموك
صـابولي دلالي
عبدالله يالغالي
ياسلوة الروح
ـ""""""""""""""""""""

اعيوني يمه الشوفتك كل لحظه تشتاگ
وتدري گلب الوالــده مـا يحمـــل افـراگ
چـنت واهـس دنيتـــي وبكربله انبــــاگ
امصيبتك والطف عليه انطبگن اطبـــاگ

بعــدك ييمه اتعــذبت والمــر جرعته
نجـم الظهر بمصيبتك يوليدي شفته
عشت بهضم تالي
عبــــدالله يالغالي
ياسلوة الروح
ـ""""""""""""""""""""""

انشـدت مهـــــدك عنك وگتله الطفل وين
جــاوب وگلــي انذبح بحضـان الحســـين
بخدي اثر چم چويه ضل من دمعة العين
دمــــوع فگـــدك يالولد چنهن سچاچيين

عفت امك وعيـنك غفت يا وردة الياس
يا مهجتي امصابك ثگيل وشيب الراس
بس الحزن فالي
عبـدالله يالغالي
ياسلوة الروح
ـ""""""""""""""""""""""""

الخادم
كامل السعيدي

سكينه في لحظات مصرع الحسين عليه السلام
*****

عمه الخيل داست صدره لحگيله

****

زينب هالوصل ذباحه يــــــا عمه
ظل يطبر بنحره وعلرمل دمـــــه
لو ذبحو ابونه منين نشتــــــــمه
عطشان انذبح يا مصعب الچلمه

ماي منين اجيب شلون اوديـــله
عمه الخيل داست صدره لحگيله

***

عمه اثنعش طبره وعلگفه مخليه
ما عنده رحم يا عمه يذبح بيـــــه
بويه الله واكبر شنهي المسويـــه
هذا الحجر ليش الفوگه ومأذيـــه

اريد امسح أدمومه بطارف الشيله
عمه الخيل داست صدره لحگيـــله

**

شالو راس ابونه وچثته مدميــــــه
عمه جروح جسمه الف وتسعميـه
راسه اعله الرمح بس باوع اعليه
ها بويه صرت يحسين مسبيـــه ؟

خل نمشي لابونه هناك نحچيـــله
عمه الخيل داست صدره لحگيله

**


سحگو بالحوافر جثة الهيــــبه
دم فوگ التراب وتارس الشيبه
خنصر منگطع ياهوه اليجــيبه
برماح وسيوف الوادم اتصيبه

ها يم عون عمه فياي سويــــــله
عمه الخيل داست صدره لحگيله

**

عشر خيول سحگت صدره وعظامه
هاي اعله الارض مدميه العمــــامه
خلينه انتگابل لطم علهــــــــــــــامه
على المحد فزعله وصار گــــــدامه

توزع عل ترب يا چف اليشيــله
عمه الخيل داست صدره لحگيله

****

يا حافر الخيل اسحگني يلحـــافر
اترك صدر ابوي أچم ضلع كاسر
أموت وياه خلني بشدة العـــــاشر
خايب هذا ابوي شبيك يلــــــكافر

تدري بفاطمه هل يمه تبــــــچيله
عمه الخيل داست صدره لحگيله

رعد الفريـــــجي
محرم الحرام

ارَســـمٔ نهــــر يـم المـهـد بلكي ينــام اوليدي
وايدي امدها اعلى الرسم يطلع اتراب بأيدي
ياريت كل المَر حلمْ وبأيـدي امسحنه الرسمْ
بلكي ينــام اوليدي
****
عبدالله ضامـي وينتحـب ونــار العطش بي تسـري
لا ماي عندي ولا دمــع بـالَونّه خلّــص عمـــري
ارسم نهر من لوعتــي بي مــاي ارسمه ويجري
بس بالرسم يطلع نبــل واتخيلــه يحــز نحـــري
مرعوبه افـز من صفنتي وانظر لمهد الغالي
احتــار والله بعبــرتــــي وتنذبـح كل آمـالي
وخيول أصد كثره وزلم ياريت كل المَر حلمْ
بلكي ينــام اوليدي
****

العنده طفل ضـامي الگلــب خبـروني بيــمن يــروه
يتسلــه بــس وي الدمــع مــا ظل دمــع بي سلوه
كل ساعه أصد رسمه الحلو ذبلت ارسومه الحلوه
كــل طفل يضحــك بالمهــد مــــو بـالمهــد يتلـــوه
عبــدالله والضحكــه بعـــد مـــا يلتقــون ابيتي
بنيران احس چبده انمرد بمهده واخذ عافيتي
وحيلي من اصدله ينهدم ياريت كل المَر حلمْ
بلكي ينــام اوليدي
****
يــاذيني يــا بچـي العطش يرهـــب دليلي وليلي
كل نشغه اشـد مــنْ النبل بالليــل يهــدم حيلــي
صعبه أصبره من الضمه وبچفه اصـد يوميــلي
اعيونه الي ذبلها الضمه عــن يا نهـر تحچـيلي
نهــر الفـرات ومنبعـه فرهد يوسفه احلامي
بيمن تطلبه المشرعه ذبحت دليله الضامي
والماي تنطيه للخصم يـاريت كــل المَر حلمْ
بلكي ينــام اوليدي

****

من شاله ابو اليمه وگصد عبدالله صــوب العســكر
شــايل بـــراءة فــاطمــه السمــاها ربــها الكــوثر
ضنـي يــرد عــوده الذبـل ويرجعلي لونه الاخضر
نحـره اخــذ عطـر الــورد دامــي يــردلــي المنحـر
چنت آنه اشم نحـــر الولد يلّه تنـــام عيوني
وي الدمـــع اغفـــه بعـــد وبنبلته ذبحــونــي
والمهد خالي وبيه اشمْ ياريت كل المَر حلمْ
بلكي ينــام اوليدي
****



باليل اهـز مهـدي الطفل بلكي تنــام اجــروحي
يــا جــرح انومــه ينلچم وآلام يتــرس روحي
وي كــل دللول انــذبـــح من اذكر نحر مذوحي
بس نوحي اليسلي الگلب مـا ابطل ابدن نوحي
تجايه ردته لشيبتي راح وتركلي الحسره
بمهده اصبر لوعتي يذكـرني مهده بنحره
وكل لحظه حيلي ينهدم يــاريت كــل المَر حلم
بلكي ينــام اوليدي
*

الشاعر
موسى البديري

ليش الاوداع
يخلص ابساع..وي النحبهم
واليحنون
مايضلون.. يبعد دربهم
آه ياليل..آه ياليل..آه ياليل
ــــــــــــــــــــــــــــــــــــــ
ودعوني..ولوعوني
واعيوني من كد القهر
تبجيلهم كامت صور
فاركوني فاركوني

آه يباجر الله ساتر
واحد يطيح اعله النهر
وواحد اشوفنه وذر
بالحوافر بالحوافر

من هسه خاصرتي ابتدت.. توجعني واتفحطني
الليله بأمان امدلله..وباجر حبل يربطني

باجر اهات
كله طيحات .. درب الاسيره
وعثرة ام عون
تعمي الاعيون..كلش جبيره

آه ياليل آه ياليل آه ياليل
ــــــــــــــــــــــــــــــــــــــ
كل حناني..ماكفاني
هالليله عيني امساهره
وكل امنياتي امطشره
يااماني.. يااماني

الدنيه هيمه.. عيني غيمه
لاني الغفيت ولاهدت
وأمن الاغروب اتفكدت
خيمه خيمه..خيمه خيمه

الليله الحسين وكافلي.. ابجي بالم سمعوني
واحد شبكني بخوته..وواحد مسحلي اعيوني

عندي خطار
مواهل دار..جنهم اخوتي
ابحيره ضليت
اشكد تمنيت.. ياخذني موتي
آه ياليل اه يا ليل
ــــــــــــــــــــــــــــــــــــــ
وجه الاكبر..الليله يزهر
وباجر عله الدنيه العفه
أمه بحبال امتجتفه
وهوه بالبر..هوه بالبر

وجاسم ادري..يحني ضهري
لمن يزفونه ابنعش
ماوصل عمره  اخمسطعش
ايكسري..آيكسري

جاي أشعر ايقل الهوه..الياخيمه اطب تخنكني
واتصورت باجر شمر..كدام اخوتي ايطكني

والصور هاي
تبقه وياي..لآخر حياتي
صعدة النوك
وطبت السوك..آنه وبناتي
آه ياليل اه يا ليل
ــــــــــــــــــــــــــــــــــــــ
والاذيه.. ايعز عليه
عبدالله من هسه ذبل
ومن أمه ماخذني الخجل
وشبديه وشبديه

ريجه يابس..وكلبي حاسس
باجر يذبحه حرمله
ومن هسه جاي اتخايله
بس يرافس بس يرافس

طلعيت بره أمن القهر..واعيوني صدت عالتل
باجر اروحنله ركض.. واقره أعله اخوتي المقتل

واصرخ ادخيل
منهو الايشيل..حملي ابدالي
وين الإخوان
عكب الاحنان..ضايع دلالي
آه يا ليل آه يا ليل
ــــــــــــــــــــــــــــــــــــــ
لاتجيني..وتعمي عيني
ياصبح عاشر من تطر
جم ركبه يكطعهه الشمر
ياونيني ياونيني

احسيني باجر..ماله ناصر
يمشي ويميل أمن الضمه
وامنكعه اهدومه بدمه
يبقه حاير.. يبقه حاير

تتكاثر اعليه الزلم.. باجر حبيب الزهره
وكلهه تنادي عالاخو..ياشمر اكطع نحره

مايرحمون
من يصيرون.. وليه اعله اخينه
محد وياه
واحسيناه.. يابوالمحنه
آه ياليل اه يا ليل
ــــــــــــــــــــــــــــــــــــــ
والله حيره.. اشكد جبيره
باجر اذا طاح العلم
اتطيح المحامل والخيم
وامشي اسيره..امشي اسيره

اعيوني يعمن.. اركض المن
احمي الازغار امن السحك
السجاد اخلصه أمن الحرك
ميته احسن..ميته احسن

اركض احامي اعله العبي.. لو عن تراجي ارقيه
وحدي أنه وابنص معركه.. والسوط يضرب بيه

وتبجي الاكلوب
وكت الاغروب.. من كد قهرهه
عندي نسوان
وماكو خوان.. تحرس خدرهه
آه ياليل اه يا ليل

محمد الجماسي

#اللهم_عجل_لوليك_الفرج

يا خيل كافي من الاخو عوفنه
ما ظل عظم بي سالم تسحگنه
عوفنه  عوفنه
::::::
ما عافته خيول العده      ظلت تروح وترجع
بالخيمه اختك جالسه   كسرة عظم گمت اسمع
عوفن حسين شگد صحت  بس صيحتي ما تنفع
حسين روحه من السحگ   من جسمه ظلت تطلع
شلون نسحگ بالخیل باب الجنه
::::::
مو بس تره جسمه انسحن   داسن عليه بعيونه
اثكال حذوات الفرس   كسرن حتى سنونه
ما يگدر يشيل الچتف   منسحن عظم متونه
حسين مطشر وذر      وين اهله ويلمونه
الزهره خلها تزيد حيل الونه
::::::
ما اعرف شگد الزلم       كلهم عليه من هدت
حسين من كثر الضرب       عافيته كلها تبدت
شلون اعله سبط المصطفى   هالزلم كلها تعدت
والشمس وياهم صفت   عن جسمه لا ما ردت
ما شرب ماي حسين بي يتهنه
::::::
شفت الشمر يم الاخو    من الخيمه عيني تلمحه
فوك الصدر جالس شفت  وبسيفه ظل يذبحه
الليل لا يطلع بعد         ما دام ذبحو صبحه
بيده ورفع راس الاخو   وانوب شاله برمحه
الشمر يم حسين ظل يدنه
::::::
سبعين الف كلها اركضت    مطروح ظل فوگ الگاع
حسين من كثر الدبچ        ما ظلت بجسمه اضلاع
جيت اركض انه ودورت   ما ادري من جسمه شضاع
من كل كتر ظل يلجم       الجسم متروس اوجاع
شفت السيوف اعليه صارت حنه
::::::
تسعه الاصابع شاهدت    بس خنصره ما شفته
ضليت ادور بالارض        ما شفته من دورته
جبت الحصيره وگمت الم   وذره بوذر جمعته
  ضيعني بسنين الغرب    بهالحاله هم ضيعته
لو بيدي ما ابتعد ابدن منه
::::::
علي جبار الكعبي
الفاتحه لوالدي

خل تعمه العيون هالليله عاشر
وحــدّها ام عون بالهيمه باجر

اويلاه يام الخدر
~~
الليله نعمه الخيم ما محترگه
حسين يم اهله ورقيه تشبگه
الاكبر وجسام ضاوين الخيام
هاي اخــــر ليله باجـــر فرگه

والكافل يضوي وجهْ الكافل
بدر چنه وكامل .. ياخويه

الخيمه شمحله ذيج الخيمه
بيها للحب قيمه .. ياخويه

اويلاه يام الخدر
~~
ليلة العــــاشر مصيبه الليله
حسين كاعد مجتمع بالعيله
گلهم توادعوا هذا اخـر لقاء
باجر الطف منه ياخذ حيله

والخاطر ينكسر چم خاطر
اخ منه العاشر .. ياخويه

هالگعده هاي اخر گعده
حسين باجر وحده .. ياخويه

اويلاه يام الخدر
~~
حسين طاح واخته بـس تباوع
لاهــــي زلمه حـــته عنه اتدافع
تشوف اخوها العده ملتمه عليه
مسلبينه وجسمه بالـــــدم ناگع

متعوبه حگها لو متعوبه
حسين سلبوا ثوبه .. ياخويه

عالتله ركضت اعله التله
تريد بس تندله .. ياخويه

اويلاه يام الخدر
~~
الرايه طاحت وين راعي الرايه
صـــــــدگ نايـم فوك المسنايه
طايــــــح بطـــول النهر وموذر
وانكــــــــسر ظهر العقيله بهايه

مهضومه زينبك مضهومه
طولتها النومه .. ياخويه

نادتك كافلي نادتك
گوم والحگ اختك … ياخويه

اويلاه يام الخدر
~~
بعــــــد ذاك الظهر ماظل زلمه
الجيــــوش اعله الخيم ملتمه
ماكو واحد بقه بس زلمه عليل
حيــره زينب ياهو بله تحشمه

تتعثر تمشي بس تتعثر
من الجمر ماتكدر .. ياخويه

محتاره بالخيم محتاره
الطف جبيره ناره .. ياخويه

اويلاه يام الخدر
~~
بقـــــت زينب لا حمه ولا والي
تشوف غالي طايح بصف غالي
تصيح لاخوتها اريدنكم تجون
ماكو واحــــد بلا يرحم حالي

مكسوره بلا اخو مكسوره
الحزن ماخذ دوره .. ياخويه

مابيها حيل ماضل بيها
من انذبح واليها .. ياخويه

اويلاه يام الخدر
~~
ليلة الحــــــــادي عشـــــــر غربتها
تبدي چـــــي محد بقه من اخوتها
من سجود تصلي ماظل بيها حيل
واثــــر دمعه باقي يــــم سجدتها

وين انته حسين چا وين انته
يالــ مدلل اخته .. ياخويه

مختنگه من الهضم مختنگه
چن خيم محترگه . ياخويه

اويلا يام الخدر
~~
خادم القصيده
عزيز المياحي

السيدة زينب عليها السلام ، وهي تخاطب صباح يوم العاشر بلسان الحال :


لا تهل.. مصباح عاشر لا تهل
إتگودني امن ايد الهواشم للحبل..


لا تهل يالبيك أودّع هيبتي
اوياها اودع الروح بوداع اخوتي
وحمرة يا مصباح تنزل دمعِتِي
بيك يالبيك الحمل ما ينحمل..


لا تهل ، يالتذبح أحلام الربه
ومن بني هاشم تغيّب كوكبه
وتُبگه بالخيمة اُمهات أمعذّبه
حالهن يا صبح حال المنچتل..


لا تهل يالرايد الأكبر علي
يرتحل وتروح روح آخر هلي
ويبگه أبيّه امن المصايب منولي
وميت أويه وليده ماهو الظل عدل..


لا تهل يالبالدمه تطفي الشمع
وتترك ام عالگاع محنية ضلع
بعرس ابنهه وعینهه اتگطر دمع
والعروس رماد صارلهه الكحل..


لا تهل يالحاد سيفك عالگمر
وتگطع چفوفه تريد إعلى النهر
وتعمي عيني ، وللأُخو تكسر ظهر
وبالردان ايكفكف الدمع اليهل


لا تهل يلي اسلبت نوم الولد
وحارت أمه بلايه در اتهز مهد
ابحسرة نادت، نام يا طير السعد
يناطر أمك باچر امثلث نبل..


لا تهل يالخال عينك عالخيم
تريد تحرگها او یشب بینه الألم
وتجبر الأيتام تطلع والحرم
وركضة المحترگه ماهي التنعدل..


لا تهل يالتكسر گلوب البنات
وتبگه عالخوان مكسوره الخوات
بس عبي بنص نار ، ما بيهن حياة..
وهم يشب هموم ، منهه اشتحتمل..


لا تهل يالشايل ابچفك رمح
وچفك الثاني ايتِحَضر للذبح
وتلچم إعلى الزان للباري الجرح
والشمس برماح للشام إتأفِل


لا تهل يالتدني من عدنه السبي
وتفشي بين الناس ، المن هالعبي..
واركب الهزله وفلاهي ابمركبي
ولاهي ترحم آااه مسبية الهزل..


الشيخ منير السعد

((((شور ))))

مادام ابوجن عالرمل نام
من صدره خلي نجر السهام
خلي نلمه ===حته نشمه
////////////////////////
متعوب وايده فوك الصفاح
مخيطات ضهرة خياط الرماح
شوج وحجر جواه من طاح
نص كلب ابوجن بالسحك راح

طاح اعله وجهه وبعد ماكام
وظل رافع ايده لصوب الخيام
خلي نلمه ===حته نشمه
////////////////////////
نيشان صاير صدره نيشان
وينلاح كام امنين ماجان
والصعبه حيل انذبح عطشان
يولونه وليه الفاكد اخوان

بهيده ويه نحره توه مذبوح
اموتات حيله اهواي الجروح
خلي نلمه ===حته نشمه
////////////////////////
الله واكبر جسمه بالكاع
من الحوافر نازل اذراع
مابي مجان الشمة اوداع
سلبو قميصه منه شبساع

عمله ومصيبه تنحجي شلون
مشلعه الحوافر جلد المتون
خلي نلمه ===حته نشمه
////////////////////////
خل اعله جسم احسين نندار
ونشيل عنه كل الحجار
فوكاه تل امن الحجر صار
عريان ابووجن والرمل حار

ويلاه ابوجن مات ويلاه
مامش حصيره نمدهه جواه
خلي نلمه ===حته نشمه
////////////////////////
عالكاع دوسن عمه بهداي
توني لكيته اظلوعه جواي
خلي نلمه كومن اوياي
يعطلنه خاف اسهامه الهواي

من غبشه عنه الليله ماشين
فرصتنه هاي انلم الحسين
خلي نلمه ===حته نشمه
////////////////////////
أسم الله محد كله من مال
من ظهره طالع رمح جتال
موذرين جسمه صعبه ينشال
ظلت تشم بنحره الاطفال

الباجر يضل بعازت افياي
كلله نركض جنه حفاي
خلي نلمه ===حته نشمه
////////////////////////
تمت ____ علاء الزيدي

والله ياليل أهدعش
جرحك بگلبي أنفرش
وروحي لو ترهم نعش
بيهه ألــم جسم حسين

ــــــــ ❁ ❁ ❁ ــــــــ

جسم روح الله وحبيبه اعله الرمل والرمل حار
وانته ياليل الهظمي تگصر وطال النهار
حسين سومر دمه شفته وعطش بروحي الخظار
وانه متعوبة وغريبة ولا أمر عندي وقرار

هسه لـو تاخــذنـي يمه
حتى جسمه بروحي ألمه
لئــن مخـنوگه أرد اشمه

شيبت حـتى الرمش
والله ياليل أهدعش

ــــــــ ❁ ❁ ❁ ــــــــ

من وصلت انه الجثثهم لنها جثه تكول هاي
زينب الكسرتلي گلبي شطلعج خويه تعاي
وانته ياليل ووحشتك جن رمح صوب گفاي
من أسمعت كلمة أجرحتني خويه زينب بلكي ماي

وگلبــي ياليل أنكسر
من سمع كلمة انقهر
من حجه وياي النحر

حيل كاتلني العطش

والله ياليـل أهدعش

ــــــــ ❁ ❁ ❁ ــــــــ

نفسي يعثر گبل جدمي لئن ماضلالي حيل
وانتجي اعله جروحي واعثر موقفك أذه الدليل
ماشلت حسرات مني اشلون أعذرنك يليل
ماخذتهه انفاسي غفله للجثث متروسه ويل

والله ياليل الرزية
بـيك مانامت رقية
ردنه موتتنه سوية

أنخه من رب العرش
والله ياليل أهدعش

ــــــــ ❁ ❁ ❁ ــــــــ

انه لمن شفت اخوتي حيلي يمهم كله باد
وجرح كسر امي وضلعها بلگلب حسيته عاد
لا تضن ياليل گلبي بعد اخوتي اتضنه هاد
گطعاني حسين جسمه اعله الرمل من شفته غاد

وانته ياليل أشدهتني
تـــعـبتني وعــذبتني
والـمـصـايب لو عتني

وحيلي ياليل أنهش

والله ياليل أهدعش

ــــــــ ❁ ❁ ❁ ــــــــ

نعش كون اصير كلك تنحني الجسم الحُسين
الرمل حار ويأذي شفته بجروح الحنين
وانه ياليل الهظمني بيك ممنوع الونين
طوول وراح انه اشوفك بل بجي ماخلي عين

شگد عتب عندي وحجي
وعالـجـفــن ضـل انتجي
والله مــامــــل الـــبجي

بيك يل گلبي انخمش
والله يالــيل أهدعش

ــــــــ ❁ ❁ ❁ ــــــــ


الشاعر محمد البنداوي

يگولون زينب طلعوها... وحرگو گلبها برأس اخوها
===========================
لمن طاح ابو اليمه وعلمنا
لفا الجيش واجه يفرهد خيمنا
يسب گام ابونا ويشتم امنا
قرابة محمد  مارعوها
========================
ركضنا بكثر ما بينا من حيل
ورانا غدت تتراكض الخيل
يسحگون بالأطفال المداليل
بالسياط حرمكم روعوها
=======================
سمعنا اذى  ومر المحاچي
يتاماك ترى شبعن بواچي
رقيه خذو منها التراچي
يجرون باذنها وألموها
========================
شمرهم شفت من عنده الأعجب
ولا له غرض والجيش ينهب
يگلهم ادور انه على زينب
غنيمة حربكم تاخذونها
======================
الفلا هاذ وركضته وجدمي حافي
كتر نار عباتي وكتر طافي
والسياط كلت ظهري وچتافي
ركضت واختكم تعبوها
======================
الشيخ رعد الزيدي

 كعده للوحشه
.
.
.

مصــيبه ومامثل هذي المــصيبه
غريبــه زينـــب اللــيلـه غـــريـبه
اول تــالي يانـــاس
زينب اخــت عباس
غريبه غريبه

***
 
اسدل انهــار الــمصــيبه اللــيل عالــخدر المــسلب
وطفت نار خيام زيــنب وبـدت نار الكــلــب تلهب
الچان ذيچ الساعه عمره يوم من هالــحدث شيب

عـگب الكفــيل بكربله     وصلت الحاله المرحله
الحراس شمر وحرمله     همه اليـحرسون زينب
 
سحكناه صاحـو الصدره سحگناه
وذبحـــنـاه لاتنـطـــرينه ذبـــحناه
الاخوها بخيل منداس
زينــــب اخـــت عباس
غريبه غريبه
***
 
زينب وياعــــظم زيـــنب زينـــب الـــحــره الابـيه
وكـــت خله اخت الكفيل يصـير اسمها الخارجـيه
اخيالها المـا شــافها احد هـســـه شـــافوها سـبيه

صدت على الشاطي ابألم    وصاحت يشيال العلم
ضليت خــويه ابــلا خيم     وكـــلها تتــــفرج عليه
 
يجيبه بلكي صوت اخته يجيبه
سليــبه لو ســـمع بيـــها سلــيبه
الوليها مهشم الراس
زينـب اخــت عباس
غريبه غريبه
***
 
اخ ياليــــلة الـــوحـــشه وآخ يالخـــدر المـــطــــشر
وزينب ابيـن الكفــــيل وبيـــن ابوالســــجاد تفـــتر
بجثة اخوها ســاعه تعـثـــر ســـاعه بالجـــفين تعثر

صحراء هندس مظلمه   ولا والي عدهــا ولا حمه
ياباالحـــسن يافاطـمه     منــهو يم ام عون يحضر
 
الشماته صاحو اگبالي الشماته
الخواته الگمر مـيرد  الخــواته
صحت ياراعي الاحساس
زيـــنب اخـــــت عـــباس
غريبه غريبه
***
 
زينب اية شرف لــــكـــن فـرطـــو ياوســــف بيـــها
من احترگ مصحف خدرها اسياطهم هجمت عليها
زينب اول تالــــي زينــــب بالحبــل مـــگيوده اديها

بمــتونها خولي يطگ          ومتـــونها صــارن زرگ
الله يايـــوم الـــطبگ         امن فكـدت زينب وليها
 
يسمعون الحچي الساده يسمعون
يفزعون شـــوكت هـمه يــفزعون
وين العنده نوماس
زينب اخـت عباس
غريبه غريبه

***

بنــص هـــذاك اللـــيل ونـــت زينــب بــونه حـزينه
ياسكـــينه تگـــلها بلـــكت يســـمع الــونه ويجــينه
والمصــــيبه شلـــون ينـــدل والسـهـــم نابت بعينه

امچان المخيم مـاله اثر     وعباس محجوب النظر
شيجيــبه مـــن يم النهر     خـــبريني ياســـــــكينه

شيدليه على خيمتنه شيدليه
ويأذيه سهــم البـــعينه يأذيه
اكيد بحـالها حاس
زينب اخت عباس
غريبه غريبه
***
حيدر تركي الكربلائي
 

الوحشه
.
.
.

هـــلله هـــلله يــازمـــان اويـــاها
زينـــب اللــيله افگــدت ولـــياها
اه يازينب

***

زينب ابهالليــله مـــو زيــنب امس
من مصايب كربله انتــرست تـرس
حسين مرمي شـافته بحر الشمس
والخيــول اخــتارتـــه المـمـــشاها
اه يازينب

***

اختارته الممشاها متعمده الحصن
حتـى صدر حسينها اطحنه طحن
شلون گـلـي المــثل زينب تستچن
بـذبح اخــوها الـــوكت مـن لاوها
اه يازينب

***

الوكت عگب اخوانها وذاك الستر
وعگب مامنها الخــدر ياخذ خدر
امسـت وخيمــتها يحرسها الشمر
شــلون عــباس الشــهم يـرضاها
اه يازينب

***

امست وليل اهــدعش يامــصعبه
يـهل زينب جـفـن زينـــب شيــبه
حرمه هــم مفجـوعه هـم امسلبه
الوكت فوگ اخــوانـهـــا اتــولاها
اه يازينب

***
فوگ ذبح اخــوانها ونار الگــلب
اخت ابوفاضل عجـيبه تنـضرب
صعـب لا والله اكثـر مـن صعب
مگــيده يــــسراها وي يمنـــاها
اه يازينب

***
زينب اول تالـــي مگــيوده الادين
زينب اول تالي ملطــومت العــين
زينب وعگـب ابوفاضل والحسين
اليســـوه المايسـوه شــو حاچـاها
اه يازينب
***
دموعه اعله اخـدودها انـهــر تسيل
والشـــماته بالحــچي گامـــت تعيل
التفتـــت ولا أبـــو اليــمه ولا كفيل
ايــرد لســن نــاس الـحقـد شرواها
اه يازينب

***
ناس بس هالــناس لاذمه وضــمير
المـثل زينــب تنــسبي عدها يصير
وأبو اليــمه مگــطع وفـوگ الهجير
المهـم يـرضه ايزيد عــن طــرواها
اه يازينب
***
حيدر تركي الكربلائي
 

 ليلة الوحشه
.
.
.


لا مخـــيم لا محـــامل ** يابوفاضل يابوفاضل
خويه يابـدر العشيره
الليله علويتك اسيره
يابوفاضل
__
 
بيمن ابـدي .. والسـوالف
بيهن ازغر وحده خويه بگد رقيه
ترضه بــيها .. يابو فاضل
مــن اعــيون الوادم اتـــستر بديه
 
ياعمود الخيمه عگبـك كلشي طاح
الوكت ذاك المحد ايـشـاهدني راح
ذيچ زينب والشــمر بالجيش صاح
والــعــيـون تـــفتــــحت بيـــــبانهه
 
وبعباتـي النــار تلهب ** وكلها صاحت شفنه زينب
والله يابوالغيره حيره
الليله علويتك اسـيره
يابوفاضل
 
__
 
روحي حنت .. وعتنيتك
الجابني شــوگي يخـويه للشريعه
احمي اختك .. مـا اگلـك
شلون تحميني يالچفوفك گطيعه
 
اطفوف قبل شويه مو ذيچ الطفوف
بطيحة چـفوفك تره شاخت اچفوف
وعالخــدود انطبــعت وريتك تشوف
مـــــن درو زينــــب بـــلا كـــــفـــالها
 
فوگ الرماد گعدوني ** وبعطركم ذكروني
والمـن النــاظر تديره
الليله علويتك اسيره
يابوفاضل
____
 
يابوفاضل .. وغيرة الله
الليله وحشه وانه حرمه ابلايه والي
وللشماته .. عيون صلفه
ويــن اروح ومحـد امــن اهلي بقالي
 
ياضــرانـه البــيك چنـــه محــتــمين
الـخيل من هبــت صفــينه مطشرين
من اعتله شــمر الخنه صدر الحسين
فــزعت اعلـيـــنه ركــض جـــيــمانها
 
متني بالسوط من يضربون ** يابوفاضل شو يضحكون
الناس ذوله ابـلايه غيره
الليلـه علــويـتك اسيـره
يابوفاضل
 
_
 
مااعـــاتــب .. لا وحـــــقك
 ضاج صـدري وجيت اسولفلك يرجواي
امتوني ورمت .. من ضربهم
الصادفني الــيوم خـويه كـــلش هـــواي
 
الجيش ليش بموتتك چن عنده عيد
وصــفـدو ايــدينه خويـــه بالــحديد
باچـــر ايـــسوقـــونه مـــثل الـعــبيد
ويلــي والغـــربه تــشـوف اوجوهــنه
 
يابوفاضل على بختك ** بلا كفاله تمشي اختك
كسرتي كســره چبيره
الليله علـويتك اسيره
يابوفاضل
 
____
 
هــــذي اول .. مــره خــويه
اتبات زيــنب اخــتك ابلايــه حمايه
البارحه وين .. اوين هاليوم
اليوم خــويه عيــونهم تـفــتر ورايه
 
ولو ليله ارجعلي يالگلــبك حــنين
حتى مايضربــني بالســوط اللعين
خويه بالطف صــار مـمنوع الونين
التبـچي گــول تـــزورگن متـنيــنها
 
كلشي ممنوع حتى الدموع ** تبچي بسكوت العدها مصروع
منو عندي واستشيره
الليله علويـتك اسيره
يابوفاضل
____
حيدر تركي الكربلائي

 نزال ليلة الوحشه
.
.
.

فاليضج الضاجون
واليعج الـعاجـــون
قتل الحسين
***

قُتل كلمــــــة شـــكثر بيها مصـــاب
كلمة صعبه وتهدم گـــلوب الاحبـاب
هاللـه هاللـه حسـين نايــم عالتـراب
شهالمصاب المثله مايحصل مـصاب
 
ياتــــرى أي قـتــــيـــل
قد حنى عرش الجليل
قُتل الحسين

***

قُتل المــــا الـه والـي ولا ســــــنــد
وكالحـســين انســان مامقتـول ابد
الخيـل والـخيال فوگـاه من صـــعد
صدره من سحگت حـوافرهه نسرد
 
مزقــت صدر الرسول
اعوجـــيات الـــخيول
قتل الحسين

***

قتــــــل وأي دمٌ قـــد اســـتبـــيح
والظليـــمه گام ميــمـونه يصــيح
مو جريح وحــتى يتداوه الجريح
حسين فوگ الگاع يازينـب ذبـيح
 
دمه قد اســــتـــباح
رأسه فـــوق الـرماح
قتل الحسين

***

قتل وخل نخــتصر كـل الكـلام
قتل بطف كــربله اليــوم الامام
عالحرير المثــل أبو اليمه يــنام
مو على الغبره وتغـطيه السهام
 
جسمهُ امسى سليب
لهــف قلبي للغــريب
قتل الحسين

***

قتل والـحومه صــــارت بيـــها عيد
امن اعـتله شمر الخنه صدر الشهيد
لزم شيـــبه وصاح أبو اليــمه وحيد
اليــوم اذبحه امــن الوريــد وللوريد
 
جرد السيف اللعين
وابتدى حز الوتـين
قتل الحسين

***

قتــل وصاح البعـض عدنه سؤال
شنــهو بعد القتــل وهذا الــقتال
الشمر گــام وگال جيبولي حــبال
عگــب ابوفاضل بعــد ماكو دلال
 
كافل الــخدر قتيل
حـَر قلبي للكفيل
قتل الحسين
***
حيدر تركي الكربلائي
 

قصيدة ( انطوني شمعه ) ليلة الوحشه



أنطوني شمعــه يالتشعلون الشموع
ارد اشوف حسين مكسور الضلوع
خلص يــوم العــاشر
انطوني شمعـه لباچر

*---------------*--------------*

يالتواسوني بشمــع هــاي المسـيه
شمعه چنـت اتمنى ليـل الغاضريه
حتى أشوف بيا كتر روح الزچــيه
بلكي مــن يستمع وني أيـرد علـيه
ارد أخبــره بالجــره
بعد گطعت منحــره
بــس خيم متوجره بغيــــابــــه
شمعه شتعوض شمس وجه الغـريب
مــن وگع عالغبره عطشان وخضيب
وللخيم ظــل ناظـــر
انطوني شمعه لباچر

*---------------*--------------*

چنــت شمعـه اتمنـــه اروحـا للشــريعـه
حتى اشــم عبــاس وچفــوفه الگطيعه
أرد اخبره هــل الحــرم ضيعـته ضيعــه
من فجيعه اطلع واطب خويه بفجيعه
ارد اروحــن للگمـر
جدمي لا بي أيعثر
خويه مرالي السهر يغــالــي
هيه يــا شمعه التعــوض عالكفيل
وليلي بعــده بالسـبي كلش طويل
يـــا گلـب ظــل حاير
انطوني شمعه لباچر

*---------------*--------------*

شگـد تمنيـت الشمــع بالطــف يجينـه
حتى أصيح الفاگــده رملــه الحــزينه
أرد اگلها جاسـم بهل سـاعــه وينـــه
شو تأخــر عنــه مـا ظن يــدري بينــه
يشوف أمه وعمّته
شگــد تمنـن جيّته
ليش غابت شمعته وشبــابـــه
للشباب أعيوني چن مجره الشموع
ومــا يصبر الفاگــده غيــر الدمـوع
لطولــه تبقى اتناطـر
انطوني شمعـه لباچر

*---------------*---------------*

ضلمــه دنيتنـه وردت للظلـمـه شمعـــه
مـن اجت تمشي الرباب وتجري دمعـه
تگلــي امشـي ويــاي عبـدالله ارضعـه
ها يعمته ارجوچ وانظر شنهي وضعـه
نحره مخضوب بدمه
صـوابــه حيــل يألمه
ريت يـــا بت فاطمه رمــانــي
انطيني شمعه حتى أشوف ابني الذبيح
گلبه ضامـي ويمــه أحـس وينـچ يصيح
وگلبه أحس بي شاجر
انطوني شمعـه لباچــر

*---------------*--------------*

ليلـى اجتنـي وبالمشـي هيـه أتّعثــر
دنـيا ظلمه وگلـب ليلى جمره يسعر
يــا شمـــع ليـرد عليـها وجـه الأكبـر
وهوه بي صورة محـمـد بس تطبــر
اطفه يـا نـور الشـمع
لو علي وجهـه يشـع
حگه لو يجري الدمع لــلأكبـــر
وين تضـوي الشمعه يم وجه الينور
هسه ظل اعلى الرمـل ابني الغيــور
بجسمه ادري اشصاير
انطوني شمعــه لباچر

*---------------*--------------*

شگــد تمنيـت الشمــع هاليله وحشــه
مــن بده ليــل اهدعش خـوفه يتمشه
واحنــه مـو للماي عدنا أرواح عطشه
للجثثهم ظــل رمــال الطــف تفـرشه
اخ منــچ كـــربلـــه
اجسوم أهلنا بالفلا
مــن دماها مغسله حســافــه
اهناك جسم حسين ساحكته الخيول
والگمــر يــم النهــر مــرلــــه الأفــول
وضعني عنه أمسافر
انطوني شمعـه لباچر

*---------------*--------------*
الشاعر
موسى البديري

هله هله حسين وينه /// بالسيوف امكطعينه
===========================
١/
طلعت امن الخيمه زينب .. شابجه العشره اعله اخوهه
شافته مرمي اعله طوله .. ويمه انصاره اذبحوهه
صاحت ابصوت الفجيعه .. حسين روحه طلعوهه
ندبت ابدمع الرزيه … قالع البيبان ابوهه

هله هله حسين وينه … جسمه ويلي امسلبينه
==================
٢//
من على التله وتنادي .. بويه يا حامي الحميه
حسينك اعله الكاع مرمي .. و فوكه تلعب الاعوجيه
احضر ابساعك نشيله .. لا تجي أتشوفه رقيه
وحدي هالساعه تراني .. طرك الحبال البديه

هله هله حسين وينه … ابساعك احضر يا علينه
=================
٣///
صاحت الحره العقيله .. وصاحت اوياهه اليتامه
هله هله حسين وينه … وليش مسلوب العمامه
دمه جاري عالوطيه .. بيا ذنب سيد الكرامه
ليش ما واحد فزعله ..الفاكد اخوانه وعمامه

هله هله حسين وينه … ما بقاله من يعينه
=====================
٤////

ويه زينب يوم عاشر .. صاحت الدنيه بكبرهه
كبَّراهه اهواي موته … وهي خمسين بعمرهه
اومن كبر هول المصيبه .. ضيعت زينب نظرهه
وحيل ما ظل بيهه ويلي … اتشيل بي صاحب صبرهه

هله هله حسين وينه … بيوم عاشر ذابحينه
===============
٥/////

كلشي وي زينب تغيَّر .. والسمه أتغير وضعهه
على حسين المات ضامي .. نَزلَّت احمر دمعهه
والزجيه بكسر خاطر… كصدته ابكسرت ضلعهه
شوفت المكسور ضلعه.. رادت وشوفه الفجعهه

هله هله حسين وينه … فجعو الزهره الحنينه
==========================
✍🏻 كلمات موسى الخادم ٢٠٢٥

( هالله هالله حسين وينه بالسيوف امگطعينه )

طلعت امن الخيمه زينب ويلي عالحره السبيه

هذا اخوي حسين مرمي يا خلگ فوگ الوطيه

صعدت الخيل اعله صدره لحگي يالزهره الزچيه

منهشم ضلعه ييمه والقميص امسلبينه

( هالله هالله حسين وينه بالسيوف امگطعينه )

ضامي يُمه حسين لاچن بعد يا ماي اليفيده

فوگ صدره الشمر گاعد يگطع ابخنجر وريده

ابو فاضل مين اجيبه المشرعه يُمه بعيده

بلا چفوف اعله الشريعه وانطفت بالسهم عينه

( هالله هالله حسين وينه بالسيوف امگطعينه )

اوليدچ الغالي يزهره فايض اعله الغبره دمه

من كثر سحگ الحوافر صار من كل صوب جسمه

جيته محترگه العبايه بيش حاچيني المّه

حضّرو نوگ السبايه ابسرعه يُمه انلم ولينه

( هالله هالله حسين وينه بالسيوف امگطعينه )

اگبال عيني الشمر يُمه راسه فوگ الرمح شاله

ابراس اخوي حسين احيرن لو اروح احمي ابعياله

سوطه ملفوف اعله متني والشتم هسه حلاله

فرت النسوان ويلي وما رحم حتى بچينه

( هالله هالله حسين وينه بالسيوف امگطعينه )

****

الشاعر اياد الديراوي

هوسات يوم العاشر

هوسات للعاشر من محرم

الحره تناشد أبدمعـــات وتهل مدمع من العين
وين الوالي ما اجانه تأخر ما رجع الحسين
وحيد أبين عـدوانــــه واندارت عليه صوبين

أرد أنشــــدچ كـــــربلــــــه وينــــــه ولينـــــه
هلله هلله حسين وينه بالسيوف مگطعينه

وين أخوي حسين طايح كربلــه ردي علينــه
هلله هلله حسين وينه
بالسيوف مگطعينه

هاي سكنه تريد ابوها تصرخ اتنادي الحزينه
هلله هلله حسين وينه بالسيوف مگطعينه

*

وين أبيا كاتـــر طايــــح ابواليمه علـى الغبره
صدگ فوگچ على التربان حزو يا وسف نحره
صدگ يا كـــربله الوالي داسـت خيلهم صـدره

جـــاوبينــي كـــربله بدمعــــه حـــــزينـه
هلله هلله حسين وينه بالسيوف مگطعينه

حسين فـــــوگ الغبــره مــا نسمع ونينه
هلله هلله حسين وينه بالسيوف مگطعينه

صدگ خيـل ا ل أميه بالحوافر ساحگينه

هلله هلله حسين وينه بالسيوف مگطعينه


*



وين حسين ابـو اليمه الي ويـــاچ الـــف عتبـــه
صــدگ يــــا كــربله الــوالي نـار أحشاه ملتهبه
وگلبه البيِه محّنه شلون صاب السهم نص گلبه

وين جــــده المصطفــــى يگصد يجينـــه
هلله هلله حسين وينه بالسيوف مگطعينه

ينظر بيا حاله طايح عالترب والد سكينه
هلله هلله حسين وينه بالسيوف مگطعينه

لا أهــــل يمّـــــه ولا أخــــــوه التعينــــه
هلله هلله حسين وينه بالسيوف مگطعينه

**
الشاعر
موسى البديري

قصيدة ( وحشه الليل ) تخص ليلة الوحشه وما مر على العائله


يا خــويــه يا خــويـه
وحشــه الليلـه ابليـاك
تمنيــت تـــرد يمـنـاك
وتنظرني أبيـن اعداك ... يالكافل

****

وحشه اليل يرهـب ماكــو خُـوّاني
ومــو بالبــال ابقـى ابين عــدواني
بأصعـب ليله وكتي اليــوم خـلاني
اسيــره وعالترب يـا وسفه ولياني
يا خــويــه يا خــويـه
أنظــر ماكــو الوليــان
ظلــوا فــوگ التــربان
گلبـي اعليهم عطشان يالكافل

****

اول ليلــه اسمـي تنــزف احـروفـه
لان بيــن الشمــاتـه تالــي معــروفه
طـولي الـﭽـان يمــك محــد يشوفه
اخت عباس هاي ابطيحت چـفوفه
يا خــويــه يا خــويـه
بطيحت چـفـك عالمـاي
تنظرلـي عيــون اعـداي
ما چــنت امحسبه لهاي يالكافل

****

وحگ چفك يغالي وهيبتي وخدري
اصعــب ليله هــاي المَــرّت بعمــري
يخويه واصعب من اليل لــو تـدري
الشماته نــار تلهب ظلـت ابصـدري
يا خــويــه يا خــويـه
يذبحني حـﭽـيّ الناس
صاحــوا ويـن العبــاس
وتدريني كلّي إحساس يالكافل

****

موقف خويه اسولف واعرف اتذكره
اجيـت مــن المـدينــه لمَحملي تبــره
وهســه شلـون بعــدك زينــب الحـره
وحشه الليله خويــه وتخنگ العَبــره
يا خــويــه يا خــويـه
يالكافـل وحشــه اليــل
نســوان ابيــن الخــيل
بالطف ما ظل كل حيل يالكافل

****

وحشه اليل خـويه وبيش نتصبر
وكلهـن فاگـدات ونـارهـن تسـعـر
اصبر رمله بيش وام علـي الأكـبر
لـــو ام الـرضيـع الرادتــه يحضـر
يا خــويــه يا خــويـه
شيصـبر هــل الايتـام
مرعوبــه شلـون تنـام
ومن بعد الطف الشام يالكافل

****

يخويــه الليل يرهـب واليتـامه اتلوع
وحتـى النــوح للفاگــد صفـه ممنـوع
بس صوت الشتم عباس ظل مسموع
يخويه الخوف صار بكــل كتر مطبوع
يا خــويــه يا خــويـه
يا خويه تلوج الــروح
مذبوح ابصف مذبوح
ممنــوع اليــوم النـوح يالكافل

****
الشاعر
موسى البديري

ما أشد وحشة هذه الليله على السيده زينب عليها السلام
قصيدة ( لا كفيل ولا خيم )



ألليل أجاني و بس حرم
لا كفـــيــل ولا خيِـــــمْ
يــــا أبــو فاضـل
يــــا أبــو فاضـل


*

خيّـم الليل ابظــلامه وانــته غـايـب
منين ما اصد بالنظر بس الأجــانـب
خويــه بعــدك شفنه آلام و مصايب
خويـــه أعظم نايبه مـــن هالنوايب

أسيره أبالي مــــا مـر هالخبر
أسيره مــن بعــد گطــع النحر
أسيره وأنتـــه غايب يا گمــر
يــــا أبــو فاضــــل
يــــا أبـــو فاضــل

*

هـــذا اول ليـل بـــتْ حيدر سبـيه
خويه مـا ظنـيت هيـچ يمــر عليه
والله صعبه يا گمر فوگ الــوطيه
آه يـــا فگـــد الاخـو اكبــر رزيــه

غريبه امفارگه أحبابي وهلي
غريبه صعبه مــا عندي ولـي
غريبه مــن رحـت يـا كافلـي
يــــا أبــو فاضـــل
يــــا أبــــو فاضـل

*

هــذا أول ليــل مـــا بيــن الشـمـــاتــه
اليفگد أحبابـــه بعـــد شلّــه بحياتـــه
آه يـــا درب الســـبي ويـــــا نــايبـاته
الگمر غايب وسفه عن أهله وخواته

يخويه اگعـــد وشـــوف الســده
يخويه وحــدي مــا بين العـــده
يخويه وشخصي كلها اتشـاهده
يــــا أبـــــو فاضــل
يــــا أبــو فاضـــــل

*

خويــه صعبـه تنسبي بنت الـوديعه
ومــو وكتهــا طيحتك يـم الشـريعه
بعيني ضاگت يا گمــر هاي الوسيعه
يــوم صـدت عيني چفينــك گطيعه

سبيه بعد طيحت يمنتـك
سبيه مــن هويت برايتـك
سبيه خويه ترضه غيرتك
يــــا أبــو فاضـــل
يــــا أبـــو فاضـل

*

شگــد تمنيــتك يبن حـــامي الحمـيه
تنظـــر لـــزينب يخــويه بهـل المسيه
آه يـــا ليــل اهـــدش بـــالغــاضــريه
اسهام نظـــرات العــدو چنها المنيــه

حسافه يهلـــي أظـــل أمحيره
حسافه نمتو تالي أعلـى الثــره
حسافه زينــب انـــه أميســره
يــــا أبـو فاضـــل
يــــا أبـو فاضـــل

*

شنهو لذت الـــروح لــو فگدت أهلـها
ريــت ويـــاكم لـَـوّن مــر بيهـا اجلـها
يوم شفـت الرايه چـف شامت حملها
ويــن زينب نــاده چـــا ويــن الكفلها

يزينب ويــــن شـــَيّال الٓــــوه
يزينب طـــاح منْ أيده وهوه
يزينب بعينـه مــوتنا الضـوه
يــــا أبــو فاضـــل
يــــا أبــو فاضـــل

**

الشاعر
موسى البديري