🌹دەنـگـوو دێوەزناوی🌹

‍

‍ مامۆسا مەولەوی ئەم غەزەڵەی لە وڵامی ئەحمەد بەگی کۆماسیا وتوە ، گوایه ئەحمەد بەگ بۆی نووسیوە یار ئێسته وەکوو لەمەو بەر نیە ، گەلێ شۆخ و شەنگترە لە جاران .
ـــــــــــــــــــــ
پەشێو وێنەی وێم نیشتەبیم خەجڵ
دیم شادی دەس دا نە دەروازی دڵ

واتم نامانی هەرگیز های چێشەن
لەب بەردەوە چێش نامەی تۆ پێشەن

نە تاریکی خەت مەعناش مەجۆشا
چون ئاو حەیات دڵ خاس خاس نۆشا

ئاخ ، قووەی زەمین دەروونم کەم بی
بووڵە کەی سفتەم سەرە ڕای خەم بی

وەرنە ئەو شەونم جە سەردا مەوەشت
مەشیا کەردایێش وە رەوزەی بەهەشت

فەرماییت ئیسا جەمین جام جەم
پاسەیچە نیەن تۆ دیەنت وە چەم

نرخ کاڵا کەش ئاڵا تەر بیەن
سەد گیان وەپووڵێ باڵاتەر نیەن

ئارێ ، تا پەی ئەو من رۆمەن چون شەو
شەوقەن پەی خەندەی سوبح جەبهەی ئەو

تاوە ئەڕەی دەرد دڵەی من شانەن
زەریف تەر تڕەی ئەو دانە دانەن

تا من دووی سفتەی جەستەم فێشتەرەن
جەلای ئاوێنەی ئەو زیادتەرەن

تا سفتەی قامەت من وسمە وەشەن
ئەبرۆی ئەو وە رووی دڵ کەمان کەشەن

های چێشت واتەن ، وە رحمەت شاد بی
مەر زوو تەر کەم بی ، ئیسە زیاد بی؟

ئەر جە زام دڵ من نیگات مەکەرد
مەزانات ئەو زات ئەو وەسف بێ گەرد

ئەو راز ، ئەو ناز ، ئەو قەوس ، ئەو خەدەنگ
بیەن ، هەن ، مەبۆ ، مەگێڵان جە رەنگ

حاڵش دەستە مل وە ئیستیقباڵەن
ئیستیقباڵ چەنی "مازیش" یەک حاڵەن

بارێ دڵ وە خشت وێرانی ئاوان
حەقت وە دەسەن نەداری تاوان

دڵ تفڵ و ئازیز هەر رۆ نە شانێ
هەر لادێ تەرزێ ، هەر سات نیشانێ

گا چون ستارەی تاریکەی سەحەر،
گا قەمەر ، گا خوەر مەیۆ وە نەزەر

گا وە بێستوون هەستی بیناوە
حوسنش وە و گوڵ گوون وەش ئیستیغناوە

دەست شیرینش ماوەرۆ وە یاد
فەرهادی نە تاق فەرقە کەی فەرهاد

گا چەرخ دیدەی سەد لەیلا فرۆش
کوورەی نار ناز ماوەرۆ وە جۆش

تابۆی حەرارەت مەوج دەریای دەرد
مەجنوون وێنەی تەم بەرۆ هەردەو هەرد

خاڵۆ ، بەی جەلال ئەر کارسازیشەن
وادەی تەجەللای تیر ئەندازیشەن

بسم اللە ئەو تیر پەڕ تێدا بەستەش
ئید نیشانەی دڵ سەد جار شکستەش

چون رەنگ کەرۆ زام تازە دامانم
ئاو مزۆ ئەو دەم کۆنە زامانم

زام تەن وە تیر ، بەڵاش زیاتەر
ڕای ئامۆشۆی دڵ ، وە لاش زیاتەر

ماموسا مەولەوی

🌹 دەنـــــــــگـوو دێــــــــــوەزناوی🌹
🌻🌸@divaznav🌸🌻

1.13K viewssohrabzadeh danesh, 04:19