#የራስ _ምስል

ከተራራው ደረት፣ ምን አለ፣
የፈሰሰ ብሌን፣ የብርሀን ትል መሳይ
ህይወት አዳይ ፤
ውበት አዋይ፡፡
የከሰመ ይለመልማል፤
ያረገፈ ያቆጠቁጣል፤
ፍሬ ያጎነቁላል ፤
ትንፋሽ
ገነትን ይመስላል፡፡

ከተራራው ስር፣ ዥረት ይገማሽራል፤
እየደነፋ ይንዳል ፤
እየነቀለ ይገድላል፡፡
መርገምት!
ሲኦልን ይመስላል፡፡

ከዥረቱ ጫፍ ውቅያኖስ፣
ሁሉን ቻይ የእርጋታ የዝምታ በርኖስ፡፡
ምንጩም ዥረቱም አይመስል፡፡
የራስ ግምጃ፣ የራስ ምስል።

🔘?🔘

#የራስ_ጥናት

አንባቢ አዋቂ ነው
ማንበብ ሰው ያደርጋል
ሲባል ሰማሁና
መፅሐፋን ብገልጠው
የሰው መሰረቱ የኑሮ ብልሃቱ
ራስን ማወቅ ነው ሲለኝ እያብራራ
መፅሐፉን ዘግቼ ሙከራ ጀመርኩኝ
ራሴን ላጠና.....
ራሴን ሳነበው...
አንቀፅም ምዕራፍም መግቢያም መደምደሚያም
ማውጫ ገፅ የሌለው
የምኞት ጋጋታ
የኑሮ ሁካታ ትልቅ ጎተራ ነው
ከዚህ ሁሉ መሃል
ለ ‹ማን ነኝ?ጥያቄ
ለራሴ ከራሴ መልሱን ስላጣሁት
የከፈትኩትን ራስ መልሼ ዘጋሁት።

🔘ልዑል ሀይሌ🔘