يبن امي هاي الخيل هجمت علينه
شبت خيمنه بنار واحنه انسبينه
ــــــــــــــــــــــــــــــــــــــ
يالنايم اعله الكاع نوم العوافي
ياهو اليرد الخيل ويكلها كافي
بجفوفي اطفي النار والجدم حافي
ون كلبي خويه اعليك وشتد ونينه
ــــــــــــــــــــــــــــــــــــــ
تتصارخ الاطفال وتنادي عمه
وتحيرت يحسين يا طفل الزمه
كمت الهوه بلياك بالكوه اشمه
زينب يبو السجاد ضلت حزينه
ــــــــــــــــــــــــــــــــــــــ
وين الوعد عباس يا حامل الواي
ياخوي اجيت وياك لا تكطع اوياي
يالكتلي اجيب الماي ما ريدن الماي
يمدلل اختك كوم وحدي الضعينه
ــــــــــــــــــــــــــــــــــــــ
بيدي اشكف امن الصوط واجمع بالايتام
واسمعهم ايصيحون حركوها الخيام
لحك صحت يحسين راح امشي للشام
بطيحت زلمه اشلون وليه انولينه
ــــــــــــــــــــــــــــــــــــــ
كلبي مردته اعليك يبن امي وينك
فوك الترب مطروح ومسلبينك
دمك جمد يحسين شفته اعله عينك
والخنصر المكطوع دليني وينه
ــــــــــــــــــــــــــــــــــــــ
راح الخدر يحسين واختك سبوها
كل طفله يمي تنوح وتريد ابوها
زينب عكب عيناك ما انصفوها
ياهو اليردنه ايكوم لرض المدينه



تحسين الخفاجي

للسابع

ابنار الزلم هدت وانه بس حرمه
ــــــــــــــــــــــــــــــــــــــــ
عدي بس عليل الضال بالخيمه
اوسواد الناس هجمت تشبه الغيمه
وين امشي وشحشم راح ابو الشيمه

والحرگ الخيم تركض وادم ابهمه
ــــــــــــــــــــــــــــــــــــــــ
ناس ابخيل ناس ابركض شالت نار
امنين ابدي اطفي خويه حيلي احتار
شلم فرت اگبالي ازغار وي اكبار

وانه الماعدهه واحد واگف اتحشمه
ــــــــــــــــــــــــــــــــــــــــ
ازغار اكبار خويه انرعبت من الخيل
وتركض بين نار الراح منها الحيل
وفتر خويه من الضهر حد اليل

ابضعنك خويه زينب حايره اتلمه
ــــــــــــــــــــــــــــــــــــــــ
نشف حيل الگلب مابيه لحضه اوگف
صفى لا كافل ولا خيمه الي بالطف
مصيبتنه چبير بيش تتوصف
وي ستر الخيم گلبي احترگ دمه
ــــــــــــــــــــــــــــــــــــــــ
زينب يخو زينب حيل متعوبه
وخيم گبل الحرگ يحسين منهوبه
وكافل خدري اشوفن بعدت ادروبه

او طولي انشاف هاي السالفه اتلچمه
ــــــــــــــــــــــــــــــــــــــــ
ماا صحتك ولاچن صاحت اعيوني
يلمدللني خويه اشكثر هضموني
ونوماس الواشم وسفه ضربوني
وانشاف الچان ضله ابفيك اتضمه

علي الحميداوي الكربلائي

شهر المصايب رجع واتذكرت مصابي
وعناد كلبي يدك وجوه التراب احبابي
وبلا كفل من يمر
اجنازه يمشي الخدر
******************************
شهر المحرم من اجه انه اذكرت دلالي
وتذكرت ذاك السبي وراس الحسين اكبالي
راحو هلي وكل اخوتي وراح الاخو المثالي
و يا هو اليردني لديرتي و مذبحه الغوالي

ما ودعوني ومشو وما كالو احنه بسفر
وكلبي صعب يقتنع راحو وما ضل اثر
شيقنعه كلبي بعذر
اجنازه يمشي الخدر
******************************
ما بيه حيل احجي تره وصار الدمع نصيبي
حيلي اندفن ذيج السنه من اندفن حبيبي
و يرجعون لو لحضه هلي واتوسل بنحيبي
وجروحي كلها امفتحه وسافر بعد طبيبي

وبيا محطه انتضر الغايب يردن الي
والوكت لا مو سفر ليش ابتعد كافلي
وضليت بس انتضر
اجنازه يمشي الخدر
******************************
و تذكرت صفكه عرس بيها البواجي اتغنت
جاسم صواني الحنه اله عليها الشباب التمت
والحومه فرحانه اضن ريحه شباب اشتمت
وجابوا امنكع باالدمه و امه عريس اتمنت

والحنه صارت دمه شنهو حلاته العرس
خلص دموعه الشمع والورد مرمي بشمس
من العرس للكبر
اجنازه يمشي الخدر
******************************
عبد الله ذاك الطفل مو للنبل ركبته
باالكوم ما كو رحم ليش بسهم ذبحته
الاكبر شبيه النبي وادري العدو عرفته
بميدانهم وذروا وذر و ما حسبو حوبته

الاكبر يسوره عشك بالطف علينه نزل
ترتيلها بذبحته الاكبر يليله رحل
وليله ذبحها الهجر
اجنازه يمشي الخدر
******************************
بهذا الشهر اذكر جرح بيده خنكلي حيلي
حيلي انهدم لمن وكع عاالمشرعه كفيلي
راح الي جان افياي الي وعليه جم اويلي
من الكمر عني رحل ما نمت يشهد ليلي

ياليل انامه هني والعده بلا مستحة
ولو وصلو اعله الخيم ابدي اقره بالفاتحه
ياشهر ماضل صبر
اجنازه يمشي الخدر
******************************
اذكر خيام محركه و دخان كلها انفاسي
وذيج التراجي مسلبه ولسه البواجي براسي
واذكر صعدت اعله لهزل لمن كضو كل ناسي
اصعد واطيح من لهزل جي ما كو جف عباسي

والشام لا مو عرف ناس الي تنضر غرب
والوضع لا مو سهل كلش عليه صعب
ضربوها كال الشمر
اجنازه يمشي الخدر
******************************
عبد زينب
مرتضى الشمري

لمن يجد صعوبة بالحن اي قصيدة اطلبه من
@moatmed2

اي قصيده تعجبك انسخه
وارسلها ع المعرف ورح نكون
بخدمتك 😭😭

(لمولاي القاسم ع) ... محرم 1442 هـ

رايح ...التارس الدنيا بحلاته
رايح...وطفن شموعه امهاته
عريس راح وكاشخ ويا محلاه
دم الحرب جسام بالطف حناه

وين اكو عريس لابس خوذه والثام
اتلكنه ملكه وداع من شبكنه الاسهام
حط راسه بحضن امه اوصه جسام
يكلها اريدن رمحي شمعه يروح لشام

يلتارس الطف بضحكته
بس بجي مقسومه زفته
انطفه شمعه بكلب عمته

باقي ...بس حلم بلخيم خله
باقي ...يا عزيز بكلـب رمله
تتمنى تكضي العمر لو بس وياه
دم الحرب جسام بالطف حناه
ــــــــــــــــــــــــــــــــــــــــــ
الكمر لو مات كون اتشيعه النجوم
وجاسم من اتبده طوله التمت الكوم
بجسمه ماكو اثر باقي اله ملجوم
حسين من شافه يذبحه يطيح ويكوم

تباوع حسين لخيامه
رجـع يلطم عللهامه
مات اليعزب العمامه

طايح ...يلتفت ويصيح يمه
طايح ...الكاع ما تكدر تلمه
العباس هد حسين بس ما خلاه
دم الحرب جسام بالطف حناه
ــــــــــــــــــــــــــــــــــــــــــ
بقت رمله بالخيم تدعيله وتنوح
فزت عالصوت رد جسام مذبوح
ركضت لشكبت ابنها الماخذ الروح
لجن رد جسام عاري امطرز اجروح

امجان ماكو بي تشمه
تلولي كعدت رمله يمه
كطع كلب حسين عمه

رملة...اكباله كعدت والله حيره
رملة ...تصيح لا مو هو غيره
ابني كمر يا سيف هذا الطفاه
دم الحرب جسام بالطف حناه
ــــــــــــــــــــــــــــــــــــــــــ
وين اكو ماي بضهاري يموت عطشان
وجها من تدنه يمه تكول قران
لعبت الخياله حيل بسجمه ميدان
هيه تنشك الرساله بيد عميان

كام يشم انفاسه كوه
خربو كحلته الحلوه
ضل يصيح حسين يسوه

شحاله ...بصحره نام تبده حيله
شحاله....الدم ترس ثوبه و شليله
بصحره تجوي الكاع والدم غطاه
دم الحرب جسام بالطف حناه
ــــــــــــــــــــــــــــــــــــــــــ
حلمه جان من الطفوله يكبر بساع
حته من حسين يمشي يصيرله شراع
عيونه من تصفن عليهن ورك نعناع
امه ما متهنيه بي اتهنت الكاع

حنته مشتاكه ليده
وامه عن شوفه بعيده
اكبالها حزو وريده

شايل ...جن لكو مكتوب عده
شايل...حرز شايل اسم جده
يا علي مكتوب شافه وشكاه
دم الحرب جسام بالطف حناه


كرار فاهم الخفاجي

ثگيل ليلة الانصار سلام الله عليهم:

وهب من شاف الغريب
عاف دينه والصليب
واعتنق دين الغرام
امن التقى برب الخيام
عاف دينه والصليب
......................................
گالو الحب اعمى لاچن..بان ان الحب بصيره
وهب بس شاف ابو الاكبر..عاف دينه والعشيره
ظل ينادي يبو اليمه..العشگ رحمه مدري حيره
حبك التارس اعيوني..ودنيتي بعيني صغيره

عاشگ وهايم وهب..وكلشي لجل الحب وِهَب
سلّم امره والدليل..وگلبه عالخيمه انصلب

بعينه من صد الذبيح
بظهره ذب دين المسيح
نظره وحده امن الامام
امن التقى برب الخيام
عاف دينه والصليب
......................................
كل طقوس الحب بداها..كربله لمّن گصدها
اعله بو الاكبر ظل يدوّر..چنّه ام فگدت ولدها
اتلاگه وي محبوبه لاچن..وهب عينه ما يسدها
وانغمه النصراني لمّن..اعيون ابو السجّاد صدها

الكون كلّه بعينه زال..من نظر ذاك الجمال
بقصص الحب والغرام..وهب واصل للكمال

ماكو حب صاير مثيل
وهب وي اخو الكفيل
لحظه بالحب چنها عام
امن التقى برب الخيام
عاف دينه والصليب
......................................
كلمن وطينته بخده..وطينة العاشگ دمعته
وهب عاشگ عاف كلشي..واخذ السيف بيمنته
وذب صليبه من رگبته..وللذبح حضّر رگبته
نزع كل آثار دينه..ودمعه لبّسها وجنته

لا ارادي بسرعه حب..بدمعه عالوجنه كتب
يا حبيبي يا حسين..خادم وعبدك وهب

كربله صارتله دار
وضمن هالسبعين صار
ويّه صحب احسين هام
امن التقى برب الخيام
عاف دينه والصليب
......................................
من جديد انولد بالطف..وأذّن بإذنه حبيبه
دخل للاسلام يبچي..مدري يبچي اعله المصيبه
صلّن ادموعه اعله خده..وحاچه ابو اليمه بنحيبه
اشهدُ أنّك غريب وزينبك هيّه الغريبه

عشگه صار اربع حروف..حسين وغيره ما يشوف
انولد چنّه من جديد..ومسقط الراس الطفوف

عمره ليله وحده چان
وعلى ارسومه و وجه بان
كل تجاعيد الهيام
امن التقى برب الخيام
عاف دينه والصليب
......................................
وهب چان امس مسيحي..وهذا دينه امن الطفوله
بيوم عاشر صار شيعي..وآمن بالله ورسوله
ولگه بالحب دينه كله..وكل فروعه وكل اصوله
وهب ما يشرك بحبّه..وعشگ منّ النظره الاوله

(حسين احبه) وهب گال..ماكو غيره گلبي شال
لربا ادري بي حرام..والربا بالحب حلال

ظل ينادي ويجري عين
لا حبيب الّا الحسين
وهب عاشگ..والسلام
امن التقى برب الخيام
عاف دينه والصليب
......................................
فرق بين الجمر شاهد..وبين ذاكه اللي يجيسه
وهب الجاستّه جمره..ويه غيره لا تقيسه
عاف انجيل النصارى..وخاطبه بالرؤيه عيسه
معبدك هسه المخيّم..يا وهب عوف الكنيسه

بليل عاف الصومعه..وبات يم المشرعه
صلى واوّل فرضه چان..والوضوء بمدمعه

عاف دير الراهبين
وراح لخيام الحُسين
يبچي ظل وما ينام
امن التقى برب الخيام
عاف دينه والصليب


(عاف دينه والصليب)
محمد اياد السعد
2020

لسان حال مولاتي ام البنين ع

البارحه بلطيف جني وي زينب رايحه
وانسبينه بناكه وحده وهيه كلسا طايحه
والله حيره ....عالجبيره
ــــــــــــــــــــــــــــــــــــــ
سيرت بلطيف جني وي السبايه اني رحت
وصعدوني وي زينب بناكه عسمه اجتفت
وشفت راس حسين فوكي باوعتله ودنكت
شفت بيه اثار حافر كوه شفته وشيبت

جن اسمعه يكلي يمه ارفعي راسج سالمه
انتي ام عباس امي ونعم اسمج فاطمه
والله حيره....عالجبيره
ــــــــــــــــــــــــــــــــــــــ
بحبل واحد جن مشينه مخدرات وي الغرب
بيا وكت علويه تطلع تركض وتحضر حرب
وفوك كل هذا اخوهه اكبالهه هم ينضرب
الماي يطونه بشتايم لو يبدو عالترب

بعيني شفت انه المواقف وانه كلش خايفه
شلون راح تروح زينب وتطب ذيج الطايفه
والله حيره ...عالجبيره
ــــــــــــــــــــــــــــــــــــــ
جن كعدت اليله ابجي بلصحاري وي البنات
اسالت زينب يبتي شكو شصاير عللفرات
كالت العباس يمه أچفوفه منه امگطعات
اتكطع ابنج علشريعه بلا غطه هناكه يبات

كلت كل اولادي فدوه تروح لبنياته
بصدري كون ولا بصدره الخيل من دايساته
والله حيره ....عالجبيره
ــــــــــــــــــــــــــــــــــــــ
هناك شفت بنيه تركض ميته كاتلهه العطش
شكد حجيت وياهه كافي تبجي من ليل اهدعش
تكلي ما شفتي يعمه جسم ابوي من انفرش
امنيتي بعبيتي المه بلكي يرهمله نعش

تكلي عمه هناك عفته هدومه كلهه مسلبه
وانتي شوفي الرمح يمج لسه ينزف حاجبه
والله حيره ....عالجبيره
ــــــــــــــــــــــــــــــــــــــ
عالفضل سالتني زينب جن تكلي ما كبر
ولله مشتاكه اشبكه ريحه بيه من الكمر
كافي بسج ردي يمه انطول احنه بلسفر
من كعدت الكلشي شيب نوم ماجاني شهر

صرت جن يعكوب عيني بيضه كلهه شايبه
ولسه هذا الطيف اشوفه شلون زينب راكبه
ولله حيره ...عالجبيره


كرار فاهم الخفاجي

ياتـؤم نـفاسي -- ياسـيد حـــساسي
أشهـــد أنك يا حسـين الهادي المهدي
ــــــــــــــــــــــــــــــــــــــ
اليعـطش يركض أعله الماي وأنه أمن أعـطش أركضلك
وتستقـبلني مـــاي بجود -- وترويـني بعـذب فـضلك
أشوفنك أبـوي أتصير -- وصيرن واحد مـن أهلك
أشوفك بالكلب يحسـين -- وتفـرح لمن أكصدلك

أفاقي محدوده وعيوني مسدوده
بلا صبع جفك أشوف يمــسح بخدي
أشهد أنك ياحسين الهــادي المهدي
ــــــــــــــــــــــــــــــــــــــ
شحلات أسمك علا اللساني -- سحب يسحبني الدروبك
أتونس شفتي بطرواك -- حبيـبي وأنه محبوبك
والله أتمـنه يامولاي -- أصـيرن خيط من ثوبك
وثـوبك أدري بي مسلـوب -- بس كلبي هـوه سلوبك

كلماتــك أقراهـن وتسامر وياهــــن
أوكف أبابك يغالــــي وكفت مكدي
أشهد أنك ياحسين الــهادي المهدي
ــــــــــــــــــــــــــــــــــــــ
طيحت سن عقل ماطيح--أجيلك جية مـواعد
شيطلعني من طـرواك -- أحبك نايم وكاعد
الرساله التخله من الشوك -- مجرد بالضرف كاغد
وذا عن حبك أتخليت -- أصبح عـن هلي زايد

مابيه شي يسوه لوما ألك أهـوه
أنته بس كلي تـعال أستقبلك عندي
أشهد أنك ياحسين الـــهادي المهدي
ــــــــــــــــــــــــــــــــــــــ
عــيشني زغير وياك -- رتب مـارايد أتعـله
كد ما أنته طيب ذات -- الزغير بخدمتك يحله
المهم بس حبك السالم -- الأمور الباقـيه سهله
أذا ماشم حــروف أسمك -- تبين بالنفس خله

ياصاحب الباري حبك غـزه فكاري
عالسألني تبجي ليــش دمعتي ردي
أشهد أنك ياحسين الهــــادي المهدي
ــــــــــــــــــــــــــــــــــــــ
أشوفك بالصبح بالماي -- أحسك بالصلاه سجده
أشمك بالنسيم الهاب -- جرح كدامـي يتعده
تره الماشايفك مسكين -- هذا عـيون ماعده
مـن نحرك ينبع ماي -- يسكي الدين والورده


ياجرحك ونزفه من روحك الترفه
حقي أطلبك عالمـــــــــراد ماترد يدي
أشهد أنك ياحسين الهادي المهـدي

الخادم عبد الجليل المالكي

والله لو عدنه مثلكم ..
چا تعلمنه الگلوب شلون تنبض من تحب
والله لو عدنه مثلكم ...
جا ندور الدنيه مانلگه چذب

چا مطرنه حسنات.. وجا تعبنه
حتى نتلاگه بذنب
يا بختنه وينمطر حبكم علينه
حتى حقنه نصيح والله تبللينه
ياحبيب .. يابرير .. يازهير .. ياوهب
هِب بينه هِب
شيبينه واحنه مانعرف نحب

والله مشتاقين دمنه ايتلف اردان الحسين

والله مشتاقين كلش الله ينطينه خيام
وهم مثلكم للجمر ماننطي عين
يمته نتعلم نقلدكم مواقف يالرسايلكم نحر كاتبله دين
وبالقلم ماينكتب

وين عابس..
والله مشتاقين بينه يصير عابس
وبالصوارم نعقد لزينب مجالس
وين عابس..

انطوه خبر عدنه بقيع.....
واحنه محتاجين فارس

وبشرط من نوع عابس
وبجنونه
الذبح كل عقله اعله نيّه

لان مامشمول مجنون بتقيه
وينكم ..
الدنيا بس سبعينكم

الينحسب حصراً رقمكم
غيركم ماينحسب

احمد اللامي

(لسادتي الانصار ع) ... محرم 1442 هـ


بعيونه شاف حسين عابس حگه
فرفح عشك حط اعله ثوبه وشگه
عود احنه ما شفناه وسودنه احسين
يحترگ حته الماي من يعشگه
ــــــــــــــــــــــــــــــــــــــ
عابس سن قوانينه شك ثوبه علطوله وصاح
هذا حسين يا عالم شنهو الخيل شنهو ارماح
قانون اليحبك دوم تضل اباله ما تنزاح
الماعايش ابعشك حسين يكضي الدنيا ما مرتاح

البروحه غير حسين خلي يعوفه
شحصلت بلتاريخ ذيج الكـوفه
الشال ابنه بيده ول لله اطاه قربان
العمر كون اكضي ابوس جفوفه
ــــــــــــــــــــــــــــــــــــــ
الرايد بلعشك يوفي خل يسال حبيب شلون
كل شيبه تصيح حسين خل ترضى عليه ام عون
وي انصاره ملح وزاد اكل وشلون ما يوفون
من كد ما مغزر بي سابع عشك واصل جون

انصارك السبعين عدهم واهس
واحدهم عللموت ضل ينافس
شسويت الهم اني محتار بهاي
واحدنه كون يصير مثلك عابس
ــــــــــــــــــــــــــــــــــــــ
انت اول بشر مطلوب لا مديون لا كتال
وبالطف هوه اليعشكك لازم عالرمح ينشال
وانت ازلامك السبعين واحدهم بالف خيّال
وكمر عدك اذا تغتاض كدامك يصير اهلال

دموعك تطيح وصعبه يم عباسك
الكظه العمر وياك رافع راسك
عندك زلم تنحط اعكال علراس
يلوون خشم الريح لو بس جاسك
ــــــــــــــــــــــــــــــــــــــ
منو غيرك يوجه الخير جايب للحرب رضعان
العافك بالدرب يحسين يضل محسوب عالعميان
وسبعينك الضل وياك صارولك نهر عطشان
يا اول ضوه من الطين صار اسمر من الدخان

يموت الكلب كلمن الغيرك حطه
عطشان يبقى لان عايف شطه
سبعين عندك عاشو بنص الخير
جي عافو العاكول لجل الحنطه
ــــــــــــــــــــــــــــــــــــــ
اليعشك حسين يموت كول وفعل هلسبعين
زهير الشمه من بعيد اجاه يركض بن القين
حبيب مفرع الهيبه يصيح بصوت يلعدلين 
الرايد يوفي وي الله خل يشتم قميص حسين

نعشك حسين ونطلم عاللفطره
بلكي يحسبنه انصار ابن الزهره
الرايد يشم الجنه ويعيش هناك
خلي يزور ويشم عطر الحضره


كرار فاهم الخفاجي

جربه ورايه وخوذه وسيف _ يمعزب وسكينه الضيف
هز الكون _
بسم أم عون _ يمعزب وسكينه الضيف
........................
يمربي الجربه أزغيره وكبرت وياك
تعطش ونته أتشربها الماي أبيمناك
أمعلمه أتنام أعله أزنودك وتحب يسراك
لا ترتاح أولا تهده إله أبطرواك

لا عطشت لا شافت ضيم _ تتناوش ماي أمن الغيم
(هز الكون)
.......................
والرايه البيهه أجفوفك طبعت عباس
مكتوب أعليهه الكافل صكار الناس
رايه ومن طبعك بيهه أشكد جان أحساس
أويه الرايات المارفن لا ما تنقاس

حيدر جان أيحبهه أهواي _ والكافل دكها أعله الماي
(هز الكون)
......................
يامحله الخوذه أبراسك يا كمر الليل
ريشات أمعلك بيهه يا نجم سهيل
كمريه وطالع للحومه أبضهر الخيل
الميت خلص والماميت صاح أدخيل

خوذه وترمي الناس أبنار _ جي لابسهه أوراسك حار
(هز الكون)
......................
ياطكة سيفك والحنضل مره أشواي
ماسامع سيف أبعمري أيكص نحر الماي
سيف الفقار وسيفك مو حسب الراي
يمكن خوان وتوأم ما تغلط هاي

تنزع بيه أوجوه الكوم _ وحيدر نزع بيه أهدوم
(هز الكون)
......................
يمرورة سم عذبهم ياصل الصيف
أموصيتك زينب تاخذ من عدهم حيف
أبكيفك تتركهم تذبح ما عدهم كيف
يمعزب الخيمه أميه عزبهم سيف

شربهم نار وطكات _ أبجفك شبعهم سطرات
(هز الكون)
......................

حسين باهض الحلفي

الوداع
..
اصعب نايباتي .. توديعي لبناتي
آيا ليلة العاشر .. آيا ليلة العاشر
...
وكت الوداع بكربله كلشي يون حسيته
والليل چان ابيض گلب والفجر سوده نيته
اصعب احساس اعله الأبو لو يمه تبچي ابنيته
التمن عليه والگلب ودعهن بحنيته

گعدن وحده وحده .. ومدمعهن تبده
الوالد عنهن مسافر
آيا ليلة العاشر
...
چانت اسكينه بخيمتي وتگلي ها يا عمري
اِمسح براسي بيمنتك باچر يتيمه ادري
يا ناس باچر انذبح والخيل تسحگ صدري
وسكينه تحضر مصرعي وياها احچي بنحري

اول وحده تسمع .. صوت بنحري يطلع
وتنظر رفسة الحافر
آيا ليلة العاشر
...
فاطمه الصغرى شگد بچت ولشيبتي مسحتها
تنزل بديها دمعتي ومثل الجمر دمعتها
باچر اذا طلعت سبي واتطيح من ناگتها
يلتفت راسي اعله الرمح يبچي على غربتها

محنتها چبيره .. من تمشي اسيره
وعيني للسبي تناظر
آيا ليلة العاشر
...
گعدت رقيه ابنيتي بحضني واشمن بيها
هاي الحنينه بكربله ادري شيصير اعليها
الشوك شلته من الارض لا تنجرح رجليها
خدها ترف ما ينسطر وسوط الشمر يحنيها

وتشوف المآسي .. واتموت اعله راسي
بهالطفله الگلب حاير
آيا ليلة العاشر
...
وابنيه عندي تختلف قصة جرحها بعيني
ذيچ العليله الما إجت بديارها اتانيني
شتگول لو سمعت خبر فوگ الثره مسلبيني
يمكن تموت من البچي ومحسبه اتلاگيني

ابنياتي الحنينات
لكل وحده معاناة
يذبحني فجر باچر
آيا ليلة العاشر
...
خادم الحسين ( عليه السلام)
كرار حسين الكربلائي
( ابو كميل)

((( رحلو ايها العليله فاطمه) )))




اهلي راحو وانه اصيح
همه صعدو وانه اطيح

اصيحن والدمع بالعين زينب عمه بويه حسين
٠٠٠٠٠٠٠٠٠٠٠٠٠٠٠٠٠٠
چبيره الغربه العليه ادور روحي ماهيه
اناشغ ما تسمعوني خلصت الحچي البيه

انه جويعده وحمل ضعنهم
وانه محضره عباتي وانتضرهم
عمري يروح من فدوه العمرهم
خفيفه وما اثگل من حملهم

بويه اعرفك ما تجافي امشي انه بجدم حافي
بويه يبست روح روحي خشبه تتكسر اشفافي

تدري جرحي صار اسير
وين جنحي حتى اطير

شگد متانيه الترحين زينب عمه بويه حسين
٠٠٠٠٠٠٠٠٠٠٠٠٠٠٠٠٠٠٠٠٠
فرگتك زيدت مرضي بواچي تسمع بفرضي
خواتي كلهن وياكم وانه بيا درب حضي

أَتلَفت واتانيهم يصيحون
هلبت گومي اسمعهم يگولون
چلمة يالله كون تصيحلي ام عون
يتباوعلي ابوي بدمع العيون

بويه حنيتك چبيره ترضى اضل بلايه ديره
المشكله انه مريضه فراگك إيموت الزغيره

كض اديه وخل اموت بلا رقيه شلون افوت
عذاب الفرگه بين اثنين
زينب عمه بويه حسين
٠٠٠٠٠٠٠٠٠٠٠٠٠٠٠٠٠٠
حته العثره هم تعثر شگد جروح وتصور
تدري اخواني احبنهم اموت بفرگةّ الاكبر

يبراهيم نارك بيه بيه
شلون عيوني تفارگ رقيه
يوسف بير واحد وانه ميه
حتى النوگ هم تبچي عليه

جروحي چم مره تكابر أتكسرت بيه الخواطر
بويه احس بالماي غربه انسدت بوجهي الگناطر

هيه حيره وين اروح بلايه ديره وبس جروح
تفارگني يماي التين
زينب عمه بويه حسين
٠٠٠٠٠٠٠٠٠٠٠٠٠٠٠٠
عذاب ايوب ضايگته تحرگ دمعةّ السكته
ما ابچي أگبال حسين ازيد لوعته وونته

مثل فراگكم ما صدگ بنوح
الف يعگوب ما يتحمل ونوح
الدللني أعله غفله يمشي ويروح
ادري شمالهه وما تطلع الروح

يادمعتي بلايه اديكم شلون ما اسمع حچيكم
والضعن طوح يبويه وين اشوفنكم واجيكم

وين اجيكم گولو وين واشتريكم ياحسين
نضره وحتى اقبل دين
زينب عمه بويه حسين
٠٠٠٠٠٠٠٠٠٠٠٠٠٠٠٠٠٠٠
بعد ما تنفع الدمعه تعده الحادي وبسرعه
ادور صبري ماهوه فراگ حسين ما جرعه

وصيح بصوت ياعمه تعالي
يعمه بغيركم مشدوهه بالي
والله فراگكم بهذل احوالي
اضل شلون هيچ بغير والي

چم سهم بجروحي يلا گمت اگولن كاتبه الله
ما يضل حتى المخيم ولا حلم بعيوني صلى

يا بوفاضل جرحي غار دمعي حار وانت حار
طاحن ياوسف چفين
زينب عمه بويه حسين




عبد زينب
محمد الابراهيمي

((زينب والحزن والطف والنار والحسين) )





اجيتك والجرح للراس شتسوه الدنيا من دونك
يالمدوهني بالأنفاس ويخنگني شذى عيونك
انت ابن آدم التنباس جاليش ويدوسونك
خدر منطيهم وعباس وچفو بالگاع ماعونك

شمسويلهم شو سلبو هدومك
وانته اعله السمه يالزارع علومك
همك عيلتك ولتمت همومك

اذا تسمعني رد ليه حترگت صوغة رقيه
وفرهود الخيم يحسين واجيتك خويه
محنيه
___________________
اجيتك والحچي معروف وضگنه دوست الحافر
بچعب ارماحهم وسيوف وصارت عيلتي تكابر
يالطايح يريت تشوف جدمي اعله الجمر عابر
اجيتك والطريق بخوف وين تريد وتهاجر

يعايفني وسهر بالغربه اسهرنه
انهض والابو بنياته يردنه
مابياش اون يامنبع الونه

خويه النوگ جابوها اگبالي خويه خلوها
وگلولي الفجر تمشين خويه العيله روعوها
___________________
بس طر الصبح طريت هيمه والشمس تحرگ
رساله بالهجر كتبيت ودمعتي تنزل اتشگگ
اسمعني بهجر ونيت السبي من فرگتك يخنگ
ضل يخنگني وتأذيت وأسياط المشرّعه اطگ

وبده ليل السبي والونه والخوفه
خويه اعيالنه بحبال مجتوفه
نمنه وبالحبل لو ضعني اتشوفه

الحبل متزاحم بحلمي خويه حسين يبن امي
من أيد الطفل ليدي وراسك بالرمح يمي
___________________
كلشي بي عطش موجود عطش وغيابك اليكتل
وانه ادري الزمن ميعود الزمن ياوسفتي يفشل
الگلب ياخويه لاميهود فراگك ابد مايحمل
شماگلولي راعي الجود النضر من ونتي يجفل

يادمع اليتيمه الياكل بحيلي
ليل ومااشوفك ياكبر ليلي
واحاجي بدمعتي يادمعتي سيلي

وتسيل الذكرى واتذكر واضل ليل وصبح اسهر
واسرح واليالي اطول وافز من اذكر المنحر
___________________
يسالفتي وعذاب النوگ والناس التمر بينه
خدري بالنضر ملحوگ وغلاتك خويه ملينه
موتنه طواري السوگ السوگ إيشامر اعلينه
بكلشي والضعن مطگوگ خويه مروعه سكينه

يعافيتي وخذاها الشام ماترجع
اكاسر ضيمي بالونات والمدمع
شيبي وبسواد العين ضل يطلع

شكو ضيم وألم ضكته وگلبي بكربله عفته
جرحي يسولف الدمعي ودمعتي التنزل بسكته
____________________



عبد زينب
محمد الابراهيمي

لمن يجد صعوبة بالحن اي قصيدة اطلبه من
@moatmed2

اي قصيده تعجبك انسخه
وارسلها ع المعرف ورح نكون
بخدمتك 😭😭

منتظره جيتكم كتلتني فركتكم
حكه دليلي من يشب نار
امضيعتلي نجمه وربع اقمار
***************
ظلمه السمه وماكو شمس من غاب عني اهلالك
اقره دعاء الندبه الك مدري الفلق اقرالك
بحساسك برودة شته وصوره عطاشه ابالك
ويحسين اموت بحسرتي لو ما وصل مرسالك

عنك ييمه اسأل ورده وبديت اذبل
عجل يطير وجيب الاخبار
امضيعتلي نجمه وربع اقمار
****************
ماتت صباح الخير امس من فاركت وجه الخير
بدموعي غصيت وصحت عينك عليهم يا طير
بالدار اشم عطر الاهل اشتمه والروح اتحير
ام البنين بكربله خدامه تتمنه اتصير

ميته اعله شوفتكم يا محله ذكرتكم
وحشه بجفاكم صارت الدار
امضيعتلي نجمه وربع اقمار
*****************
يحسين تدري الاربعه امك الك نذرتهم
كل ما احن الهم كمت اتباوع بصورتهم
جم حيل وياهم خذو من هاجرو ديرتهم
عافوني وانه اشكد جنت مستانسه بشوفتهم

ضليت اتانيهم وكل رجعه ما بيهم
سافر حبيبي وفكري محتار
امضيعتلي نجمه وربع اقمار
****************
سافر ضعنهم وبتعد والنوح عذب حالي
وهيه المصيبه صورتك ما تنمسح من بالي
حته الهوه بريتي اختنك من فاركيت الغالي
ويحسين ضل من الدمع ما ينقره مرسالي

ذاك العتب عفته ومرسالي شككته
بدربك بكت مشبوحه الانظار
امضيعتلي نجمه وربع اقمار
****************
ربيتهم وادري الولد لا ما يضيعون ارباي
وعباس من دك صدره الي معناها هوه الوفاي
يالماشي لدروب الخطر وتريد تكطع وياي
وياك اخذني الكربله وخليني اوزعلك ماي

ما اهتم بولدي وانته المهم عندي
ماريد ابد كلتهم اعذار
امضيعتلي نجمه وربع اقمار
*****************
ايامي انته ولو رحت شلي بعد بيامي
راح اعله كيف بروحتك باجر تموت احلامي
عباس من جاب اخوته وهز العلم كدامي
كلالي يمه اطمني ورتاحي زين ونامي

يايمه وعيونج ولدج يجازونج
وبالدم نضحي لبن الاطهار
امضيعتلي نجمه وربع اقمار
****************
تمت
تحسين الخفاجي

تعبانه وضم من ناضرك تعــبي
هـا عــــباس جلمه وتاكل بكلبي
اليتركها غـريبه أخته
لا عــباس مــو أنته
ـــــــــــــــــــــــــــــــــــ
يبعد سنيـن زيـنب والشمس والـفي فدوه تــــروحلك خــــويه الخـــيم والمي
عليك بروح حيدر لا تـطــفي الضي
عيونك تسوه روحي وتسوه ملك الري

بعد طولي تعال أشتمك أكربلي
أنه بلا أهل عــــباس أنته أهلي
اليغيب الكـمر شفته
لا عـــــباس مو أنته
ـــــــــــــــــــــــــــــــــــ
يل مغــــطي الخــــيام بخـــيط جفـيته
أنـــــته أول كـــفــــيل أتـــحزم بنيته
مثــــل الـــماي وبصيـــــنيه خليته
خدري ومن تعــــوفه كول بديته

عطري الناس بس تعوفني تخنكه
بكلبي وداعتك يتيتم الملكه
غيرك ماحفض بخته
لا عــــباس مو أنته
ـــــــــــــــــــــــــــــــــــ
أيتلفت فوك وجناتي الدمع شفــته
أيسولفـلك عذابي أسمعها سالفته
موش الماي صرت أنته العطش أنته
جي يسوه العـتب عباس عاتبته

أنا بياوكت أوكف عله التله
يعــباس التعوفه يموت أحسله
ذبحتني تره السكته
لا عـــباس مو أنته
ـــــــــــــــــــــــــــــــــــ
غـير أنته أكتبت عالخيم ستر أختي
وغـيرك مارضيـت يقود قافلتي
باجر لا تـــكلي ليــش شيبتي
أشيب من تروح وتنحجي قصتي

شيسون بوجهي الخيل والذاري
ياوسفـــه اليذبحك يدخل الداري
جرح الكلب سولفـته
لا عـــباس مو أنته
ـــــــــــــــــــــــــــــــــــ
الناكه العاليه صعـــدتها مو سهله
ومن أبجي الشمر بدموعي يتسله
أطب للشام ويــــن الشام أندله
أخ وأخ والله تمـــــــوت الذله

خويه العاليه من تنهضم تنصه
وأنه الشمات يدور علي فرصه
خدري يروح لوعفته
لا عــــــباس مو أنته


الخادم عبد الجليل المالكي

(لمولاتي العليلة ع) ... محرم 1442 هـ

امكيفه لميت العبي ...وين الجديده
نزلني تالي من الضعن ..صعد حميده
واني عليله ...واني عليله
ـــــــــــــــــــــــــــــــــــ
بنياته صعدها الابو بس انه ما صعدني
كلما اروح لناكتي اصعدها وينزلني
كلهن حسبهن ب الاسم بس اني ما يحسبني
وصلهن اليم الضعن واني للبيت يردني

وضليت مشلوعة كلب ...وعيني عليهم
اخذوني اني اتوسلت ...وحبيت اديهم
واني عليلة ...واني عليلة
ـــــــــــــــــــــــــــــــــــ
وين اطي وجهي اليا كتر كتلتني حيل العازه
ومن شفته حمل بلضعن ذبيت انه العكازه
حته ابينله طبت وياخذني وي اعزازه
وما احمل ابقى الوحدي وكلبي يضل يتوازه

ورقية صاحتلي الصبح ...كل اضنها اروحن
وياي اصعدي بناكتي ...وضليت انوحن
واني عليلة ...واني عليلة
ـــــــــــــــــــــــــــــــــــ
يابويه من دون الحرم بابك عليه اتسده
ما كلت بتي من اكعدت اخذها اول وحده
وادريه دربه من مشه بس راسه ليه يرده
اتمنيت ياخذني الابو حتى اموت بسده


حسين فاركني ومشه ...وعيني علدربه
وعيوني ما يغفن ابد ...اله علكلبه
واني عليله ...واني عليله
ـــــــــــــــــــــــــــــــــــ
كل مغربيه بغرفتك اعتب و احجي وياها
وهايه مكاتيبك بقت ما عدي عين اقراها
وداري اسمها ام الحزن بويه الفرح جافاها
وجيراني بويه اتشمتو يصيحون ما خذاها

معقوله عايفها ابحجر ...بته المريضه
وكل يوم واحد بالحجي ...كلبي يغيضه
واني عليلة ...واني عليلة
ـــــــــــــــــــــــــــــــــــ
المتعمله تكعد كل صبح اتكابل اهلها ابسفره
الجنت اشبكنه الصبح خلاني وحده ابحجره
والطير اذا انحط بقفص يكسر كلب كل شجره
خلوني عد ليل ومشو الجنت عدهم كمره


كبرني عمرين الحزن ..من امشي هدله
كل لحظه اعيشنه الحد...ما جني عدله
واني عليلة ...واني عليلة
ـــــــــــــــــــــــــــــــــــ
بويه البنيه التنهضم لوالدها تشكي بهمها
جا هيه المن تشتكي كون الابو هاضمها
ماخذ فرحها اعلذبح وبس الحزن ضل يمها
والي تضل بلا ابو حته الضحك يلچمها

ضليت اعاتب بالهوه ...ودي دمعتي
وكللها مشتاكه الج ....لو شفت عمتي
واني العليلة ...واني العليلة


كرار فاهم الخفاجي

عباس اعتنيتك ...... واتعثر اجيتك
هاي بطيحتك ياخويه تدري
اول مره احط ايدي ع ظهري
واتعثر اجيتك
💔💔💔💔💔
تمنيتك وطريت الميادين
ووليدي علي فارگني توه
ضلت فاهيه عليك الصواوين
مدري فراكك بزينب شسوه
من اتخوصرت صاحولي يحسين
هلمره الفراگ فراگ خوه
هلمره انچفه العباس مو ماي
ومو خوك اليكلهم راح فدوه
غير جدامي يهدن.......اوصله ويردن
حگي تخوصرت ومدنگ الراس
غير الطايح ع الكاع عباس
واتعثر اجيتك
💔💔💔💔💔
من بعيد شو ماعندك جفوف
طاحن لو عيوني الوهدنني
ما اعرف شصاير اني لاشوف
كون اوصلك ويعمن هذني
انه حسين ما اموتن بالسيوف
بس فراگ عباس الكتلني
امشي وذكرياتك ترسن البال
ومدري ليا كتر عنك خذني
گبالي وماعرفتك.....انه امشي وعبرتك
حگي مدوهن وما اندل منين
اول مره هيجي يصير بحسين
واتعثر اجيتك
💔💔💔💔💔
اكعد يالاعز من ولد الحسين
فدوه لطيحتك يرحون ولدي
هيه البلوة مو بس موت وفراك
ولا بلوة خيول تدوس جبدي
بس سبعين الف شامت يعباس
كلهم شافوا دموعي اعله خدي
كون اكبالهم نتشابك وموت
مو عباس اليخليني وحدي
اول مره عباس .....بيه تشمت الناس
تدري عيوني مو هين بچيهن
هاك جفوف اديه وكوم بيهن
واتعثر اجيتك
💔💔💔💔💔💔💔
چلمه خويه ما تنكال بجفاك
وداعت خوتك تحرم عليه
كضيت الظهر من طاح عباس
وصارت عادة لليفگد اخيه
حيرة تفارك اليندلك شبيك
وانته بلا حجي وتعرف شبيه
اول مره هاي يغثني عباس
من مديتهه وما كظ اديه
وسفه ياعضيدي...ماكضيت ايدي
الف وتسمعية جرح ياناس
كلهن طلعن من فراك عباس
واتعثر اجيتك
💔💔💔💔💔
الله وياك لكن الله وياي
وين الله واموت وتكعد انته
من كد عازتي لحضنك يعباس
حته السهم كضيته وشبگته
اوصل للخيم والوجهك اشتاك
واركض وانهطر والكاك سكته
كسرة شيخ يم المالها شيوخ
هيجي حسين بفراكك كسرته
اول مره الحسين.....تفزعله النساوين
حسين الما مخلي بخاطرك يوم
يحط ايده اعله زينب يالا يكوم
واتعثر اجيتك
💔💔💔💔💔💔
كلمات : الشاعر محمد الموسوي

يعباس انكسر ظهري
يعباس الدمع يجري
يعباس انهدم عمري أنا حسينك
ــــــــــــــــــــــــــــــــــــــــــ
يخويه امن اسمعت صوتك دم ينزف اجه ليه
حسيت ابسهم عينك نضر عيني طفه ضيه

يحسين اسمعت احضر
گمت مرتين اتعثر يخويه

مره اتعثرت لمن شفت زينب بلا كافل
ومره اتعثر بروحي خذت روحي يبو فاضل

بيك العدد والعده
ودرب المشرعه اشبعده يخويه

أحس بيه اشبعد دربك
أحس بيه انكسر گلبك
احس بيه صعب امري أنا حسينك
ــــــــــــــــــــــــــــــــــــــــــ
اجيتك والخيم ماظل واحد بيها يحميها
بس عبدالله رايد ماي يبو فاضل يون بيها

وروحه امعلگه ابجودك
شگله طاحن ازنودك يخويه

اذا اعيونه ابيضت امتاني عمه امن النهر يرجع
اذا ماارجع انه اوياك روحه امن الضمى تطلع

اروحن مارحت حيره
ورضيعي جبدته اصغيره يخويه

بلياك تريد امشي
بلياك انتهى كلشي
بلياك منوا إلخدري انا حسينك
ــــــــــــــــــــــــــــــــــــــــــ
شفت تتصارع اويه الموت بجروحك تتانيني
اعليك امن المهر للگاع طحت لو طاحت اسنيني

شگلك ياجرح ماذيك
وكل هاي السهام إلبيك يخويه

أطلع ياسهم ينزف أخليها السهام اتموت
اعوفك خايف امن الخيل على جسمك يخويه اتفوت

انشد وين چفينك
لو انشد على عينك يخويه

بلسهام انمله جسمك
بلسهام خلص دمك
بلسهام شجر مدري انا حسينك
ــــــــــــــــــــــــــــــــــــــــــ
يانفسي ونفس وياي لاتگطع نفس روحي
ابجي لچن امن اضماي يابس ماطلع نوحي

اريد اعليك وناتي
العطش ماخله دمعاتي يخويه

زينب تنتظر جيتي وانت اوياي يعضيدي
اشلون ارجع بلا عباس بس دم عينك ابإيدي

شگول وتنتظر زينب
وراسي إلحالتك شيب يخويه

أردن للخيم وحدي
أردن حيل ماعندي
أردن حسرتي ابصدري انا حسينك
ــــــــــــــــــــــــــــــــــــــــــ
وصلت الخيم والاطفال كلها امتانيه إلجيتك
إلخبر موتك يبو النوماس اخاف اتموت خويه اختك

زينب شرد أگللها
بلا چفين كافلها يخويه

وزينب روحها بروحك اخوها انت وابن إلها
أخوج إلراح لو ابنج يبو فاضل شگللها

امن أطيح عمد خيمتنا
أخاف اتموت زينبنا يخويه

الاخو راح وبقى وني
الاخو راح ابظهر محني
الاخو راح وصعب امري انا حسينك
ــــــــــــــــــــــــــــــــــــــــــ
الحرم من اوصلت يمهن ماعرفني من شكلي
احس موفاگد العباس احس فاگد جميع اهلي

احسن عيني تتگطع
العطش ماخله ابد مدمع يخويه

شيعوض الاخو المثلك وانه ابعازة الخوه
احط إعله الخيم حارس عقب عباس ياهوه

ظل عبدالله شيسكته
وانت اعليك عودته يخويه

عفتني اويه الحرم هايه
عفتني وانت لي الرايه
عفتني ابعازتك تدري انا حسينك


الخادم
كريم التميمي