كلُ مافي الدنُيا ايام وما أجملها أن كانت في رحاب سيد العاشقين



ايام الحسين   بيهه نبــــــحر للأمان
ايام الحسين   احلا ايـــــــام الزمان
ايام الحسين   عاطفه وحب وحنان
ياهوانه المــــــــانعيش ابلا هواه
انه واحد ضايع وســــــوالي جاه
گلبي يعشگ بس حبيبي وماسواه
راعي گلبي وروحي انته
حته گــــــلب اهلي ملكته
انته كل عمري الي عشته


ايام العزاء   دمعة المجـــلس بخت
ايام العزاء   ماهي عــــين المابچت
ايام العزاء   روحي بحسين اكتفت
عمري عاشــــور وزيارة اربعين
تنگع الوجنات بـــــين الحرمين
خطوه للعباس يقبلني الحسين
أعذب امن الماي وأعذب
كلهه تبعد وانته تگــــرب
انته ضـــامي وانه اشرب


ايام الخدم     عــــالم ابهيئة جرح
ايام الخدم     دنــــيا مابيهه صبح
ايام الخدم     راس ابوهم عالرمح
فيض من اجراح ومــــراكم حزن
گلب اليحب ينچوي مو بس يون
احنه اهل عاشور من نعشگ نجن
ياحلال اعله اليــحبك
ياهو شايل مثل گلبك
بس ابو فاظل يشبهك

ايام العمر   تنحـــــسب من كربله
ايام العمر  اشگد عشـــگ متحمله
ايام العمر  بالنحيب اگـــضيهه اله
كلف جرحك ياحــــسين ايريد حيل
عاش من شافك حلم چـــــملني ليل
ارد اشوف الخيل چانت صدگ خيل
مو اصيله وضاع اصــله
الباگ خنصر منه غــــفله
شلون سحگت نعمة الله

شاكر الصيمري

شور للمشايه:


بأجواء الدرب..تلتم الخدم
لكل عاشگ اصد..بچفوفه علم
يمشي للحبيب..لو يفديله دم
جاي امن العدم..لأرباب الخيم

لو ينگطع عنّه الهوه ويمتنع عنّ الماي
وينطي إِدِيهْ واجدامه واعيونه...يجي مشّاي

ينطي والله كلشي..والمهم بس يمشي
ولو ينام بلحده..تمشي دمعه بخدّه
...........................
اليخدم مستعد..وي ربعه وهله
يتلگّه اليجون..بصرخاته اعتله
زوّار الحُسين..بجيّتكم هله
ويفرش روحه اله..لگاصد كربله

اينادي هله وميّة هله لو شخص متعنّيه
من مَحجَر اعيونه ايشيل اعيونه و ايخلّيه

يدعي ربه ايناطر..يطب بيته الزاير
يسحگ اعله متونه..ويغفه بين اعيونه
...........................
يگصد للحُسين..الشايب والطفل
ويگصدله زحف..الما عنده رِجل
يمشون بشَغف..ومَيهِمهُم حِمل
واينادي اليِمل..ادخيلك بو الفضل

والاعمه يندلّه طريقه وبالگلب بي حَس
و بفضل ابو فاضل قره لطميّه كل اخرس

غيمه سوده تزحف..امنل بحر لارض الطف
وبالتعب مرتاحين..بالگمر متحزمين
...........................
بكل خطوه اليحب..ينصبله عزاء
مأتم كل شبر..لحد طف كربلاء
ما يتعب ابد..و ايتاني اللقاء
بمملكة البُكاء..وي ربّ الوفاء

من كل كتر يتعنّه زاير والنهايه الطف
الجن والملائك والبشر لحسين توگف صف

والخدم تتبسّم..وبدربهم تلتم
وهوّسو بالرايه..هله بالمشايه
...........................
ما رادو ابد..اي جاه و علُو
رادو يعتنون..للماله اخو
و ايحشّم يضل..بأولاده الابو
للباقي غريب..يتعنّه منو

حيهم صحت وين المواسي اليمشي مشايه
(من كُلِّ فَجٍ) فزعو الخدّام بالرايه

من نخيت التمو..وبالكفيل اتحزمو
وبالطريق الوادم..خادم ايشد خادم


(اجواء الدرب)
محمد اياد السعد

حياكم الله ... خدام الحسين
كواكم الله ... زوار الحسين
انه امشي وياكم
ادعي الله يرعاكم
خدام الحسين ....زوار الحسين
......
فاطمه الزهره الزجية انه امكم
امشي وي ممشاكم واتبع جدمكم
اابدفتري زوار متسجل اسمكم
وانتو يالخدام بعيوني شلتكم

والشاهد الله ... انه اشفعلكم
مو صعبه سهله ... كلحنطه المكم
للجنه وياكم
......
كل وكت دعواتي الكم يالحبايب
الله يكثر خيركم يهل المواكب
الله يبعد عنكم الشر والمصايب
ويفرج الهم عنكم ابطلعت الغايب

دعواتي الكم ... صبح ومسيه
يحفظ اهلكم ... رب البرية
يل حلوه ملكاكم
ادعي الله يرعاكم
.....
ها عساكم ما تعبتو يالغياره
الخطوه تنعد ابألف هاي الزياره
الف حجه والف عمرة بنتظاره
الزار كبر حسين هاي الكم بشاره

زوار الحسين ... حجاج اسمكم
ها يالمحبين ... الله يحبكم
يغفر خطاياكم
ادعي الله يرعاكم
.......
ابشاره ابشركم يخدامي الميامين
ابدال كل درهم تنفقونه للحسين
باجر ابجنه عدن اوفيكم الدين
وبجواري ايصير مسكنكم يطيبين

خدام الحسين ... موعدنه باجر
الكم يطيبن ... جنه اكابر
بجواري سكناكم
ادعي الله يرعاكم
......
زاير حسين الملائك يخدمونه
على طول الدرب همة ايدللونه
ابهله وياميت هله يستقبلونه
وابجر تسبيحهم يتقاسمونه

كلمن يزوره ... ماشي اعله رجله
ياخذله صوره ... جبريل اكله
ما انسه ذكراكم
......
وانتو يلخدام خدمتكم عظيمه
انبياء الله رادتها ابعزيمه
خلو خدمتكم على الفطره السليمه
مو شرط بهواي الاشويه الها قيمه

المايه تكفي .... مو شرط الهواي
الماي تكفي .... اتشربها مشاي
مشكوره مسعاكم

......
الحمدالله رب العالمين
اللهم صل على محمد وال محمد
موسى الخادم ....

حسين بعـد اعيـــوني يلغالي
خويه مستحيه احچي البالي
محمل ابنيتك رجـــع خـــالي
خويه يحسين
ــــــــــــــــــــــــــــــــــــــــــــــ
رديت بس ابـــلا كمـــر وابـــلايه فيي الـــرايه
واصوابي مو بس كربله من الشام جبت اهوايه
ينكتل كل خطوه ابدرب اليمشي موش ابــرايه
والذابـــح اعـــزاز الگلـب يتمشه ظـــل وياييه

حسين ياخويه احترگ گلبي
چي مشه ذبـــاحـــك ابدربي
انه مـــن هـــذه الهظم تعبي
خويه يحسين
ــــــــــــــــــــــــــــــــــــــــــــــ
يحسين من بلد البلـــد مگيـــوده انه اوعلويه
وادريك تعرف بالجـــره ومجبوره احچي البيه
خجـــلانه خجلت كافلي من طـــاح مارد ليه
ومستحيه اجيتك چي الك ماجبت بيدي ارقيه

ايشمه مشتاگ اعرف اترابك
لچـــن ماتت هيه بخظـــابك
گلبي ذاب الشايل امصـــابك
خويه يحسين
ــــــــــــــــــــــــــــــــــــــــــــــ
اهــواي الســـوالف بالگلب من ابدي بيهن احتار
وامداور احـــزام اخوتي وما فكـــرت يوم احتار
ومن ذبحـــو دور الحـزم دارت عله اخيامي النار
والماجت اوياي انچوت وعالچويه اديتها ازغار

اگبـال عيني شفت چويتها
مـن بعـــيـــد وتنخه عمتها
النار هاي اجفوفي حركتها
خويه يحسين
ــــــــــــــــــــــــــــــــــــــــــــــ
ماكو وكـــت يكفي البچي وابعاشـــر ابچي عليك
جاي ابچي هسه ابلوعتي وتسمعني ياخوي ادريك
عباس كاســـرلك ظهـــر وظهري انكسر بالطف ليك
وأذتك ركظت زينبك وأذاني چـــم حــافــر بيك

زينب انه وبت علي صيتي
وين ابات ومحتـــرگ بيتي
ابلا مچـان ايصيـــر تاليتي
خويه يحسين
ــــــــــــــــــــــــــــــــــــــــــــــ
شرد احچي واهواي الجره وهاظمني موقف نسوان
العدهن عشيره اخذوهن وتنسبي الماعدها اخوان
ايگولون كلفه بالعرب نسوان تدخل ديوان
وطبينه واحنه اشرف ظعن والشافنه ياهو الچان

آه يحسين والـــف وسفه
انذال شافت مشيت العفه
جـــرح گلبي ما يكف نزفه
خويه يحسين
ــــــــــــــــــــــــــــــــــــــــــــــ
من اجروحي هذه اثگل جرح والحد الگبر مايلتام
من شفت وي طبت الظعن فرحــانه نسوان الشام
وهـــدوم عيـــد اطفالهــم لبست اگـــبـــال الايتام
والشامت ايگصر العمر ونظراته ع الحرمه اسهام

خويه گلبي تدري بجــروحه
من النظر كل حرمه مذبوحه
من تشوف اعيون مشبوحه
خويه يحسين


علي الحميداوي الكربلائي

((((وماهو الرجوع بدونكم))))




ارد ألمن بعد يحسين
لا عندي أخو ولا عندي تچايه
هلي بدرب الجفه مغربين
علي ضلينه مامش بالضعن رايه

ارد اليا گلب مذبوح
بيبان العشيره أتنوح
وبيوت المدينه جروح ... خويه جروح

أرد اليا عليله شلون
أرد والدنيا كلها عيون
أرد أخواني مايدرون .... مايدرون

رديت بدمعتي .... بدمعتي
******
ومعسره الدروب وياي
بكل عثره ودمعتي تشرح مصابي
أردن والنفس مخنوگ
ينكرني أخافن من أرد بابي

مايعرفني خاف الباب
لو شاف بعباتي اتراب
ولو شاف بدمعتي امصاب ..خويه امصاب

مايدري بگينا ايتام
ولوني ضيعيته بشام
ومرت بالضعن ايام .... أوف ايام

******
أرد وحسين موش وياي
ألمن ردتي وياوحشةّ الرده
جرح عالناگه من رديت
ومگطوعه الچفوف وياهو الي يشده

خليت الدوى ياناس
وأجيت ابلا اخو عباس
يهل الغيره ضلي انداس ... ضلي انداس

خليت الهوى ورديت
مخنوگه أرد للبيت
اضل بكربله تمنيت .. أنه تمنيت

*******
تعبانه ومشيّ وسياط
واليحدي بضعنه ذابح اخواني
عيوني أتغمض بيا حال
شما أغفى وحبل من إيدي جراني

الحبل مايرحم النايم
متنه أي وحگ جاسم
الطفل وي الهزل هايم ... الطفل هايم

الحبل من إيدي ليديهن
بروحي أسمع بواچيهن
مدري شلون تاليهن .... تاليهن

******
عگب ذاك السبي كله
أرد ابيا ملامه وأخوتي صرعه
شگلها ام البين شلون
اذا تنشدني وين أخوانچ التسعه

شگلها المادرت بيه
اگلها آنه مسبيه
وعفت أخواني مرميه .. ومرميه

عفت أخواني بالهيمه
ويتيمه گايده إيتيمه
الضعن يايمه ياضيمه .... ياضيمه





عبد زينب
محمد الابراهيمي

دمعي ياناس يچوي الأعيون
ليش الاحباب مايظّلون
سافر الغالي وبقيت الوحّدي
فلقد مات محمد والدي
ــــــــــــــــــــــــــــــــــــــــــــــ
راحو احباب الگـلب وخلو المدمع يصب
ابهيمه وامتيهه الدرب چا بعد وين انتچي
سافرو غيـــــــمه ابسمه وانه بتهم فاطمه
عالدلال امعلّمه مو عله افراگ أو بچي

الابو خيمه البناته الابو فـَيّ أو ستر
الابو غالي اشغلاته وراح اگلكم واختصر
خيط واحد من عباته يسوه كل هذا العمر

حنّي ياروح عالنودهم
عمر الادموع ماتردهم
عالضلع بسمار باچر يعتدي
فلقد مات محمد والدي
ــــــــــــــــــــــــــــــــــــــــــــــ
البيت اذا مابي ابو يعني لافَيّ لا دفو
وهوه بالدنيه شكو غير ابوي وطيبته
بحقي چان اشگد يگول ثمرة اسنيني البتول
لاچن اصحاب الرسول مارعو كل حرمته

فاطمه ياناس مني گلهم وامّي تصير
واليأذّي الزهره يعني هذا خسران الـمصير
والزمن بعده جمعني ابناس ماعدهم ضمير

وادم الخير ماتريده
وعصرة الباب مو بعيده
حايره ومن يا مصيبه ابتدي
فلقد مات محمد والدي
ــــــــــــــــــــــــــــــــــــــــــــــ
اسمي چان المفخره ام ابوهه الطاهره
هسه ليــش المگبره تاخذ أحلام السنين
اسمي صار الثاكله والمدامع هامله
محّد ايگلّي هله راح ابو الگلب الحنين

نومتي نومة عوافي چانت بحضنه الحرير
وبابي دكتور ويشافي وجاهي بالوادم چبير
واذكر ابّدلَة زفافي اتصدقت بيهه الفقير

هسه الايام عذبتني
وعالمعانات عودتني
والإمان ايصيح دفنو قائدي
فلقد مات محمد والدي
ــــــــــــــــــــــــــــــــــــــــــــــ
ابابي چان اشما يمر يكتب ابهيل وعطر
قل اعوذو امن الكسر وقل اعوذو امن الحرگ
ابيتي يشعر بالامان ايحبني وايقدرني چان
اشهدو ابنص الأذان آنه اشم ريحة عشگ

اشهـدو أن محمد قد سكن بالـمگبره
وما ابدل الثوب الاسود لحد يوم الآخره
باچر السطرات عالخد كلهن ايلزمن سره

ذوله عدوان ادري بيهم
كل عذابي من اديهم
عن قريب اوي المصايب موعدي
فلقد مات محمد والدي
ــــــــــــــــــــــــــــــــــــــــــــــ
شيّعو جود العطاء وانقطع وحي السماء
قد أصبنا بالبلاء وبابي دگّاه الرجس
وريحة الدخان اجت وزينب ازغيره وبچت
وعصرة الباب ابتدت ترفس ابضلعي رفس

اتذكرت بالطف رقيّه وسال من اعيوني دم
وهذا بسمار الـــــمنيّه باچر ايصبّح سهم
والحرگ بابي عليّه يحرگ الزينب خيم

أنه ابو حسين يمي يا ناس
وزينب ايغيب عنهه عباس
وعله احسين الخيل باجر تعتدي
فلقد مات محمد والدي
ــــــــــــــــــــــــــــــــــــــــــــــ
يا محمد امتّك خوش والله جازتك
مااجو لجنازتك وشيعوهه وي علي
بعدك أعله المغتسل والبلاء فوگي نزل
ردت الناس الهُبل وللزمان الجاهلي

علي گالوله تبايع بالغصب مو بالرضه
وانه هالظليت ادافع عن حقوق الـمرتضه
ابخدي مطبوعه الاصابع والعمر بالهم گـظه

راح اجي وشوف شنهو حالي
دمعي واصل حد خيالي
الضلع والبسمار ذني شاهدي
فلقد مـات محمد والدي

محمد الجماسي

(نبي الرحمه )

لو ما مصطفيك الله نبيه
چا ضلت لهسه الجاهليه
نبي الرحمه نبي الرحمه محمد

____
لو ما وجودك عل كاع
لسه الضماير تنباع... حبيبي
خفت اعله دينه الله يروح
كضيت عمرك مجروح .. حبيبي

مثلك نبي ماموجود لكيتك
ضلموك ونترست شيب لحيتك


لو ميت كبل هاي المنيه
جا ضلت لهسه الجاهليه
نبي الرحمه نبي الرحمه محمد

________

عرش الله رادك مرسال
ما غرتك دنيه ومال . نبينا

لو ماحفظت الاسلام
يعبدون لسه الاصنام .. نبينا


دين الاخلاق اعله الكاع نشرته
وكلبك الحب هاي الناس نذرته


غيرك لو اجه ماعنده نيه
چاضلت لهسه الجاهليه

_______

مثلك نبي ما موجود
غالي ويعشكه المعبود .. رساله

يل مصطفى ادم چان
يتمنى بيده القران .. رساله

جابك واجه جبرائيل بجناحه
ماغرتك بل معراج تفاحه

لو ما رايح بذيج المسيه
چا ضلت لهسه الجاهليه
نبي الرحمه نبي الرحمه محمد


___________

الباري اعله كد حبه انطاك
حيدر علي يضل وياك .. عضيدك


بخوتكم شكد يحجون
يغارون موسى وهارون عضيدك

مو مثل ذولاك الناس موضوعه
شال الاسلام الكرار بضلوعه

لوما چفك وجفه سويه
چا ضلت لهسه الجاهليه

____________

بزودك لمن تمطر حيف
عندك علي وعندك سيف .. والزهره

شارتهم تموت البين
وجه الحسن والحسين .. والزهره

اهل الرساله الله انطاك خاتمها
بكلوبهم حب الناس راسمها

لو ما تنكتب بيهم وصيه
چا ضلت لهسه الجاهليه

علي مخيلف

يا واهبَ الدمعِ لولدِ فاطمةْ
اطيني دمعة اتغار من عدها السمه

يا رسول الله...يا رسول الله

يا اول دمع نازل على اجروح السبط
ارزقني البجي او خلني بْعزاهم مرتبط
أنه خيري بْدمعتي او من تجف روحي تِنُط
كل الجوارح للعزه متحزّمه
.
.
أكرمني بْنحيب اعله الحُسين او زيْنَبَه
وغفرلي الذنوب المانِعَةْ أَنْ أنْدِبَه
واسترني بْعزه او قلبي عليهم عذّبه
جنة عدن ما ريد رايد مأتمه
.
.
أنه امنيتي أنوح الكربلا طول الزمن
يا جد الحسين اطيني آه اعله المشن
من ديره لديره بلا أهل وِتْعذّبن
امكيِّدات او يجري من جفهن دمه
.
.
يا مُحيي الدموع ادموعي خليها نهر
جنني بعزه احسين او جنوني أعظم فخر
كلشي بروحي اريده اينوح والله اعله الكمر
او عمري وقف وِبْمجلس الماتوا ضمه
.
.
مديت الجفوف اترسها لوعة اعله السبي
اريد اصرخ مثل صرخة رقية مطلبي
أنه رايد جزع صادق على اولاد النبي
قلبي يطه رايد آنه اتألّمه
.
.
خُذْ كلشي مني او خلني إلهم أنفجِع
او علمني اللطم والنوح والهَم والدمِع
دليني بْدرب كله بجي عالمنصرِع
أبْكل وجودي رايد آنه أخْدِمه
.
.
فاضل عباس الخزاعي

وين // رايح عن عيني

•••••••••••••

افتحت عيني بعينك    ساعدك ويمينك

وجندي صرت إلدينك   

  آنه الكرار

حيدرك بتارك       يالنبي واسرارك

ليش عايف دارك      أظلم هالدار

آه // فرگاك ياذيني

وين // رايح عن عيني

•••••••••••••

عندي ويسمونك     يمي وايقتلونك

                     يالنبي يدرونك     وصيتني بهاي

مااشيل إسلاحي     وأصبر على جراحي

وراح اظل بنياحي    وحسراتي وياي

نار // صبري ويچويني

وين // رايح عن عيني

•••••••••••••

دنيتي اشمابيها      انت بس ماليها

                      اتعوفني تاليها       وفراگك نار

گلبك ايگطعونه    وجبدك ايسمونه

وامرك يقلبونه     هاي الاشرار

هاك // عمري وسنيني

وين // رايح عن عيني

•••••••••••••

رحت گلبك دامي    وآنه سوده أيامي

                    ياصبر آلامي      بعد المختار

البضعه لو آذوها   وداري لو حرگوها    

   وبابي لو رفسوها   وبيها البسمار

اشلون // بالصبر دليني

وين // رايح عن عيني

•••••••••••••

موسفر وانتظرك   فدوه عمري لعمرك

                     حيدرك آنه بأمرك  أصبر عالآه

راح اظل بأحزاني   ابصبري ع الأذاني

 الزهرا لو تنخاني   يالهادي لا    

لا // شيصبر ايميني

وين // رايح عن عيني

•••••••••••••


الخادم

كريم التميمي

((يارسول الله الشهيد))




رسمتّ دمعتك عالوجن طف وجرح شام
چبدك تـسـمـم يـــالنبي من طاري الخيام
عالمغتسل وانته عدل
تشاور علي تگله هزل
طف وجرح شام .......
*************
برازونةّ الحب تنجرح
من چانن احلامك ذبح
وبجرحك اترش الملح ... من تسمع الشام

چانت خديجه تباصرك
تضمد جراح بخاطرك
وتمسح الدمعه بناضرك ... من تسمع الشام

وتگلك احچيلي الجرح ليش الدمع سال
وتگلها يابت العرب ضعن العشگ شال
هم مره شفتي اعله الورد متحزمه احبال
هم سامعه فوگ الهزل تتحمل اطفال

شايل الطف بعاتقك وكل حزن الايام
چبدك تسمم يالنبي من طاري الخيام
شما تصفن ودمعك يهل
تشاور علي تگله هزل ... طف وجرح شام
**********
الدمعه من تبدي بألم
بضلوعك أتصد السهم
وبدموعك أطفي الخيم ... وتلم الايتام

كل لحضه طف بصفنتك
وتفز ملامح جمرتك
تركض تدَور عيلتك .... وتلم الايتام

من عينك أتزف الدمع يا نار الدموع
من تسمع بطاري العرس مطفيه الشموع
والخنصر بخنجر غدر چاليش مگطوع
وبصفنتك تجمع حرم لو تجمع ضلوع

عينك تغمض بالدمع مرميه الاسهام
چبدك تسمم يالنبي من طاري الخيام
نار الجرح ماينحمل
تشاور علي اتگله هزل .. طف وجرح شام
***********
شگد صابر وانته نبي
بس تبچي گدام السبي
ومن تسمع الحادي اجنبي ..و يانار الاحلام

فراگ الاخو يجرح أخت
ياسيدي أشگد تلتفت
راح الشمل من غمضت ... و يا نار الاحلام

من غمضتّ محسن صرخ يمّ عتبت الباب
وتسمع ضلع گوه انكسر والدمعه سجاب
ومن جمعوا حتى الحطب راس الحطب شاب
ضمك لحد بس ماشفت مچتوف ابو اتراب

هدمو صلاتك من رحت مهدوم الصيام
چبدك تسمم يالنبي من طاري الخيام
قصه چبيره وماتفل
تشاور علي تگله هزل ... طف وجرح شام
***********
يمبلل اتراب الگبر
والفاطمه شگد تعتذر
من حرگوا وداست جمر...من صدرو احكام

من حكموا بجرح الولي
من چتفوا حيدر علي
والزهره نادت يا هلي ...من صدروا احكام

اول حكم چان الحرگ والشاهد النار
ومن فاطمه كسرو علي وبعيونه بسمار
وزعوا بسامير الحقد والطف بعد صار
وخضر سهم من حرمله بنحور الزغار

هيه السقيفه القررت تچتف ايتام
چبدك تسمم يالنبي من طاري الخيام
ياسيدي وشفت الحبل
تشاور علي تگله هزل ... طف وجرح شام
**********
كل ذره منك شيبَتّ
ميت وروحك حَدبَتّ
والحسره بنفاسك غفت ... يالتدري ضلام

من فزعوا وچنت بلحد
بالقربى ماواحد يود
خيرهم بدربك يسد ... يالتدري ضلام

وتعدوا الخد فاطمه وصار الحچي جروح
والماله بالديره عرف للمگبره يروح
والعنده مثلك بالگبر كل عمره مذبوح
مكسوره بنتك بالدمع ياسيدي تنوح

وذاك التعب راح بنهر مذبوح الاسلام
چبدك تسمم يالنبي من طاري الخيام
وكل نضره بعيونك تدل
تشاور علي تگله هزل ... طف وجرح شام





عبد زينب
محمد الابراهيمي

تلگوني
رجعت من السبي ياخوتي تدروني
رجعت وشايله اجروح ويضيم الشام

فرهدني ونزل ضيمه عله عيوني.. تلگوني
....

تلگوني
انه الرديت مهظومه
انه الرديت مو زينب
اليروح وماله بالوادم عرف ينسب
ويخواني الحجي يتعب

وحجي الشامت سلب لوني.. تلگوني
....

تلگوني
تلگوني بهله تريح تعب گلبي
انه الماينوصف تعبي
انه المرافكه جتالة اخواني
انه المحد تلگاني

وحمل شايلته بمتوني .. تلگوني
....

تلگوني
ماترهم ارد ومامش املاگه
وصلت الكربله يخواني مشتاگه
انجفت روحي من فوك الهزل للكاع

لو بس جلمه حاجوني .. تلگوني

....
تلگوني
هظم الشام ماخلالي لون وراي
باب القصر كاسر خاطري ومگفاي
ردت بس جلمه اسمعها
ابو فاضل اخيج جاي

اخوتي هنانه يلفوني .. تلگوني
.....

تلگوني
رد ضعن العلاوي وحالته حاله
بهاي الكاع طاحت النه خياله
هنانه انذبحت خواني
هنانه احترگ صيواني
هنا هظم الشماته بيه وده وجاب
هنا صارت عبينه ملونه بتراب
هنا صارت العشره ارماد
هنا عني اخوتي ابعاد

هنا بالهيمه سلبوني .. تلگوني
....

تلگوني
يخوتي من السبي رديت
كومو وياي خويه انرد لذاك البيت
كومو وياي للممشاكم صدك حنيت

كومو لبيتي ردوني .. تلگوني

ابو حميدة الشويلي

صل الله عليك يارسول الله
السلام على ام ابيها
فاطمه ع تنعى ابيها


اشتاگ. رايح اغله احبابي
لفراگ. اليله اجاني البابي

احزان. اتحضرت لمصابي
------------
بويه من تمشي بغيابك تمشي كل نسمة ترافه
ولبنيه اليمشي ابوهه اتعيش بس عمر الكلافه
ولزمن يرمي بسهامه ايسولف اوياي ابصلافه
ونته سندانت حياتي اشلون تتكرني بتجافه

تعمه. لو رحت عن عيني
ضلمه. بويه كل اسنيني

لغياب. بويه جوه اصوابي
---------------------------------------------------
اجفوفه تمطرلي نداوه افياي جان وخيمه ليه
ويه طبگ اجفون طه بابي طبگوهه عليه
اتعيش مكسوره التفارك الوالد وتصبح سبيه
على اعتابي شگد ندبتك بويه ملتني المسيه


الگاك. ليله ليله انتضر
ابلياك. عمري خلصته بقهر

اعراب. اعليه كسرو بابي
----------------------------------------------------
تزغر الدنيا وجروحي تكبر وماتطفي جمره
دنيا مابيهه محمد كل طعم مابيهه مره
عيشتني على انفاسك ومن رحت ذبلت الزهره
ام ابوهه ابلايه ابوهه عاشرتني بصدري حسره


جروحي. تگعد ويايه تون
بنوحي. بويه ذبلت الجفن

اهموم. تاكل بأاعصابي
------------------------------------------------
غٌمَضّتّ اعيونك يبويه وهجمت اعلينه النواصب
حرگوو الدار التحبهه صطرو اوجوه الحبياب
انترس بالناس بيتي وصار ملعب للنوايب
مارعوو قدسيه بويه دخلوو اعلينه الاجانب


تدري. الصوط غير لوني
قهري. الباب رض امتوني

احتار. بضلعي لو بحجابي
--------------------------------------------------------
العوافي كلهه راحت من رحت يابويه عني
جرح ضلعي ألماني بس جرح فگدك كتلني
إلنسميهم صحابه همه باگوو حلمي مني
هدموو داري عليه وضربوني وكتلوو ابني


عگبك. من رحت آذوني
شخصك. بالأسم شتموني

تدري. بدمي صار اخضابي
---------------------------------------
علي سليم الحسناوي

لـ حبيب الله محمد ص ليلة وداعه

ليـــلة اوداع النبي شلون ليله
واگف ابابه الوحي شلون ليله
ياعلي احذر الدنيــا بلاء
ياعلي والمصـيبه كربلاء

اخر ايـــــــــــامه  گعد گـــــــــــدامه
حيدر اگبال النــــــــبي امدنگ حزن
يحچي مأساته  كل معـــــــــــــاناته
ويه اعداء الرساله مـــــــــــــن علن
ياعلي باچـــــــــر  ينكســـــر خاطر
فاطمه من تســــــــمع احچاية وآن
لاتجر سيــــــفك  مو وكت حــيفك
ينهدم دين الله ويطيـــــــــح الركن

صبرك اتلزمه   وغيضك اتكتمه
اخذ هالچلمه   والوصيه
من على افراش المرض   حالي شفته
ياعلي الديـــــن انفرض   واتكمل انته
ياعلي احذر الدنيــا بلاء
ياعلي والمصـيبه كربلاء
_______________
عينك اتشـــاهد  والزمــــــــن واحد
آل بيتي يــــــــــاعلي اتشوف العبر
تنضلم بعــــــــدي ادري كـــل ولدي
والحسن يتسمم امـــــن اقرب بشر
هاي دنيــــــــانه  ماهـــــــــي ويانه
يوم سم ويوم بالســـــــــيف القدر
الله رايــــــــدنه  وخالــــــق الجنه
وبيدك اتقسم مــــــــوازين الحشر

الله چـــم آيه    بطاري الولايه
نزّل بهــــــايه    للبريه
عني اســـــــــمع مايلي  والله عـالم
الموت عــــــاده ياعلي   الأل هاشم
ياعلي احذر الدنيــا بلاء
ياعلي والمصـيبه كربلاء
_______________
يهمس ابصــــوته  من گـــــرب مـوته
شما حچه عن كربله ايصــــب الدمع
ترحل الزهــــــره  وتكــــــبر الحسره
والمصايب تبدي من كــــــسر الضلع
من تسد عينـــك  باچـــــــر حسينك
اضلوع تتكسر ابصـــــــدره وتنفجع
محد اينـــــصره  عيونه متحـــــيره
وبالحصيره ابنك يحيــــــدر ينجمع

كربله ابروحـي    منهه كل نوحي
تكثر اجروحي    بهالرزيه
باچر اســـــــمع بالخبر  ويزيد همي
من يسلبون الخدر   وحسين مرمي
ياعلي احذر الدنيــا بلاء
ياعلي والمصـيبه كربلاء
_______________
جرحي ضل يلهب  احچي عن زينب
يامصاب ايحــــــــــــل عليهه ابكربله
ادري ابو فاضــــل  باچــــــــر الكافل
ضعن زينب هــــــــــــوه بس يتكفله
واسمع اخبــــــاره   دمــــــه يتجاره
مايضوگ الماي گــــــــــــــبل العايله
زينب انطـــــــيهه  هــــــوه يحميهه
والكفاله ياعلي هيــــــــــــــــــــه اله

يوگف ابضهرك    باچر اينصرك
تفرح بگـــــبرك    والزچيه
زينب اتشوف الخـــــــطر   ياوليــــهه
بيد عباس الگـــــــــــــــمر  حط اديهه
ياعلي احذر الدنيــا بلاء
ياعلي والمصـيبه كربلاء
________________
اخر انفـــــــاسه  حرّك بـــــــــــراسه
ودخلت الزهره اعله ابوها وشــافته
حيره حيــــرتنه   يامحــــــــــــمدنه
وين رايح بويه طاحــــــــت شبگته
شما يحس بيهه  وينضــــــر اعليهه
شما يشوف الـــــــزهره خفّت ونّته
يصعب اوداعك  ياحلـــــو اطباعك
ماحچه وفارگ حيــــــاته ابسكتته

بويه وعيـــونك   ضمني بمتونك
الدنيا من دونك   بس اذيه
كون وياك الـــــــــوكت  حل مماتي
وانه كلشي ماشــــــفت  من حياتي
ياعلي احذر الدنيــا بلاء
ياعلي والمصـيبه كربلاء

خادم القصيده
شاكر الصيمري

قال رسول الله (صلى الله عليه وآله وسلم)
إن لقتل الحسين حرارة في قلوب المؤمنين لا تبرد أبدا،


الحرارة البالحديث اتگول عنها
اريـد اشويه يـابـو الـزهره منها


اريـدن جمرة تجويني
على حسينك تبجيني

---------------

يـا نـاعـي المصيبه و اول انسان
نـعـه لحـسيـن وامـصاب الغريبه
وحـتـه مـن وگع مولاي عطشان
بـسـمـك صـاح يـا باب المصيبه


وحق جــدي انا ضامي
صرخ واعيونه لخيامه
وگـع فوك الترب دامي
يـويلي وضاعو ايتامه

وزينب بـالحـرم مـحـتـاره حيره
بنهار الله افگدت شيخ وعشيره


بقت تصرخ صواويني
على حسينك تبجيني

---------------

مــن بـابـك اجـيـت واطلب ادموع
لـلـزهـره ومـصـاب الـــغــاضـريــه
وره ضلع الـزجيه انهشمت اضلوع
مــو بـالـبـاب بـخـيـول اعــوجـيه


حـسـافـه وعـتـرة الهادي
عــليـهـا الـعـايــل اتماده
مــشـت وادي وره وادي
وجـبـيـره عـمـة الساده

الجدها انته سـبوها بناگه هزله
عگب كافل خدرها الماكو مثله


على زينب عمت عيني
وعلى حسينك تبجيني


---------------

يــادرب الســبـايـه وعـثـرة النوگ
تــجــرح كـلـمـن بـوجـدانـه غيره
مشوها ابطريج المـاهو مسحوگ
والـجـدهـا الـنـبي صـارت اسيره


قبل مـحـد قبل ســامع
سبيه ومـن بني هاشم
ضعن وي الغرب گاطع
بدرب شيخ شكو خادم

المصيبه المابعد منها مصيبه
بنـت الـزهره سموها الغريبه


اريــد الـهـايـه تـعميني
على حسينك تبجيني


---------------

قـصـرت بـرثـائـك والله مــولاي
بـس مـا ناسـي ذكـرك بـالمدامع
اعـذرني عـليـك الـمـاشرب ماي
لـو مـا انـته جـا هـسه انا ضايع


الـعـذر مـنـك يبو الزهره
مصاب الطف شغل بالي
اذكــرك مـن أون واقـره
واعـرفـك اعـلـم بحالي

المصيبه الصبت ادموعك عليها
انـته اتوصي بـيـنه نـبجـي ليها


يمن بيك اعرفت ديني
على حسينك تبجيني


---------------

يـالـعـمــرك گـضيته تـبـجـي واتنوح
كــل مـاتنـظر اعله اعيون الاحـسين
واتسئلك الـزهـره .. اتگلها مـذبــوح
ويـخـلـق الله الـه شـيعـة ومواسين


اجـيـتـك سـيـدي امـواسي
واريــدك تـقــبــل الـدمـعـه
ادگ والــلطـم عـلـى راسي
على حسين وعلى البضعه

على المغصوب حقها بعد ابوها
وعـلـى الطفله رقـيـه السلبوها


خيم محترگه راويني
على حسينك تبجيني


---------------


ابو حميدة الشويلي

شور شهادة ابا القاسم محمد ص
..........
ماذا على من شم تربة أَحمد
أن لا يشمَّ مدى الزمان غواليا
صُبَّت عليَّ مصائب لو أنها
صُبّت على الأيام عُدن لياليا
............
اول مره
وجه الغبشه يلوحه اتراب
اول مره
بردان مصله المحراب
اول مره
يمشي محدب داحي الباب..... اول مره

يازهره بلا ماي الزهره اتموت
دمعج من يطيح يطلع صوت
ما ينقص شي من عمر التابوت
بس ياخذ روح وحيل الزاتوت

جفنك غفه..... يالمصطفى...وليل ام حسن ليل
تبجي دمع..... لاخر ضلع...... بي تسحك الخيل
...............
ليل الفركه
يفتح باب لخنكة مغرب
ليل الفركه
كلشي الباقي بعمرك يسلب
ليل الفركه
لو جاس الدلال يشيب...... ليل الفركه

يارحمة ربي وياا اجمل نعمه
بس وياي فراكك مابي رحمه
ماكدر وبدونك ما انه معلمه
بويه اريدك والله يريدك يمه

بيه الحزن... اصبح وطن.... يظفرني ليل هواك
دنيه بعد.... ماتسوه ابد.... ادعيلي اموت وياك
...........
لا موكتك
يابويه وكلشي بدنياي
لا مو وكتك
ياصاحب كلبي وتجواي
لا مو وكتك
بسكته فراكك مثل فياي..... لا موكتك

مشتاكه لحظنك بردانه ضلوعي
مكابلني حسين ويمسح بدموعي
صار فراكك سالفتي وموظوعي
اشعل والحصرات اطفي شموعي

انته الهوه..... انته الضوه.... وينك بويه تعال
بعدك تره...... متحيره..... ياابو العز والدلال
..........
يا خيمتنه
غالي وعند الله شكد غالي
ياخيمتنه
يابختي ويا سدي العالي
ياخيمتنه
شوف شصاير انه بحالي ياخيمتنه

فراك الوالد يكتل بالهم دربه
محد بشعر بي بس المجربه
جلمة يابويه تضل تمرد كلبه
مابين احبابه ويحس بالغربه

كسر جنحي....الم جرحي..... حزن روحي مزار
عطش سنيني.. بيني وبيني... انكطعت الاخبار


الشاعر مصطفى الحسيني

تبوس عيوني رمشَك...گلب سويته نعشَك
         بنتك ذِبل من الدمع وَردهه
................
وَرَق وَجـــناتي ذابل...من دَمـعت رحيلك
يخِل گلبي و حبيبي...لا تـتــرك خَـليـــلك
أنــه وَردت حــياتك...ويـن ألـــگه مـثيلك
چـــــبيره للمـــــگابر...بالـلـيـل اعتــــنيلك

يحرموني شموسك...اعله خدك ما أبوسك
    حرموني حضناتك أنه الأودهه
...............
چــنت بالليل اجيـلك...استاحش واكلمك
واذا كابوس اشــوفن...أرتـــاح من أشمّك
تســــافر عنّـــي بويه...لو أَمـــــري يهمّـك
سويّه انمــوت اريدن...گــبـري خَلّه يـمـك

 (علي) گلبي تِــمنَّه ... بگـبر واحد دفنَّه
      يم لِحدك شمحله البنِت لِحدهه
..............
الهَجر يجرح يبويه...وهاذي بطبعه شِــيمه
فلا يـستثني واحد...طـــــــعناته أليـــــــمه
أنه ورده بوجــودك...بُعدك عــــــندي هيمه
صرت ضِمن البَنات...الما ظــــل إلهه خيمه

 بشنو من ايصبروهه...زچيه ومات أبوهه
     (الكوثر) توَّدِع هالمِسه (حَمِدهه)
.................
يغصن البان احضنك...بدمــوعي أرِشـــــــَك
بشِتَه فراگي لحنانك...يعطش جسمي رمشك
عله جــــروح الليالي...مَـرهم چنت أفــرشَك
منو يصـــدگهه تـالي... أحــضِن بيدي نَعشَك

 يريت ابگبري أَنمد ... بَعد موتَـك محمد
    جْروح البُعد من هسه خل أعِدهه
...............
يبـــويه بَـشَّــــرتني...بَــعدك موتي مشكور
شــنو شخَبرته بلله...حـــيدر شـفته مقهور
منو البَعــدَك تجيلك...لكن خَــدهه مسطور
وتِخِبرَه اصُبر ضِلعهه...ها لو شفته مكسور

  بس دمعتك تصُبهه ... قنفُذ إذا ضـربهه
       يا حيدر وترجعلي زَرگه يَدهه
..............
علي چَـفــــك يلزمه...وتحچي ويا بالمصاب
جِبت أسمي سِمعتك...و تــــــأشر عله الباب
تگله هنا صــــــدرهه...يوم العَصــره ينصاب
عله البسمـار تحـچي... كون يرفـعه خـشّاب

   يمــوّتهه بكَسُرهه ... إذا يدخل صدرهه
 .      مَيّت يطيح اعله الثره وَلَدهه

الشاعر حاتم صبري الكاظمي

اشهد انك في قلبي يا حسين
اشهد انك في روحي يا حسين

شوك بنون والقلم
وعينه على الخيم
واليفدي روحه
يحله نوحه
تلكه بي عشك
صوت حزنه ماخلص
عمرنه دم رخص
على الحب وعينه
كل بجينه
مو وهم صدك

من عيونه تعرفه الميت عل الهزل
الما عاشك خل يعشك كل جويت رجل
بعطفه وحنيته يعطف على الذبح
و يعلك دمعاته بغصن الحبل

اشهد انك في قلبي يا حسين
اشهد انك في روحي يا حسين

______________________________

ماي جفنه ينجفي
لسكنه والعبي
لعد رقيه
يحدي بيه
كل حجي الزلم
موت اموت الجرح
ونذره للرمح
بلهفت وجودي
كل خلودي
يبقه للشهم

وبكلبي ازرع الوعه لوعت منهضم
من روحي اتبره وما ابطل الطم
يعطشني احساسي يم هل العطش
وتروه بحس حبي ومن ذنبي انفطم

اشهد انك في قلبي يا حسين
اشهد انك في روحي يا حسين

______________________________

الروم وعزت النجوم
واليل والغيوم
حبك سكنه
يا املنه
ياعمرنه والهوه
هود وجرحونا الصمود
والفيل والحشود
امنه بسمك
انته رسمك
الرسم نينوه

يا ر سمك محلاته بكليبي نرسم
شطيته وضل ساكت ما يحجي السهم
رويني من عيونك كل ما انجرح
وحسبني لو مره من حساب الخدم

اشهد انك في قلبي يا حسين
اشهد انك في روحي يا حسين

______________________________

النور والصف والزبور
من طينت الخدور
ضل ضاوي همنه
يا عشكنه
عشكك العذب
نوح وزينت الجروح
ونحرك الطموح
فيهن رحمنه
كل هضمنه
يوحي للسلب

تعلمنه من راسك معناه الشموخ
يا اطهر خلق الله ويا شيخ الشيوخ
معزبنه بديوانك و نعزبك ذنب
مالكنه بحنيتك وحزن النبله طوخ

اشهد انك في قلبي يا حسين
اشهد انك في روحي يا حسين

______________________________

التين وجرفك الحنين
يا معبد السنين
الفنه بضميرك
احنه اغيرك
ما هوينه ايبشر
الطور وزينه الشعور
ولطمت الصدور
كل هذني
ماروني
بس حجي الكمر


يمشرع للخوه بشيبك و الكلب
امحلفك بالخوه دليني الدرب
طيني وكر عيني شما ضعنك مشه
وعيشني كل عمري بنص وادم غرب

اشهد انك في قلبي يا حسين
اشهد انك في روحي يا حسين




عبد سيد الشهداء
انور السهلاني

جديد ...
ذكرى شهادة سيدي ومولاي الإمام علي بن موسى الرضا عليهما السلام

قصيدة (( ثامن جروح الآل ))

يوم المنيه وينطوي عمرك كتابه
ما نشفت دموعك على حسين ومُصابه
يالرضا ودمعك همّال
يا ثامن جــروح الآل
على حسين ومُصابه
على حسين ومُصابه
.................................................................................

أحاديثك يبو محــمـــد قريناها
بفضل النوح عالمذبـوح شفناها
بحياتك ما نسيت الطف مناياها
مناياها بوســط گلــبــك لگيناها

حتى بمنــيـتك ما نسيت
تبچي على الظامي بقيت

چم لوعه بيك وچم جرح يبن الإمامه
من كربله وگلبك تفطّر عاليتامه

يلشايل جروح اثگال
يا ثامن جــروح الآل
على حسين ومُصابه
على حسين ومُصابه
.................................................................................

رغم سم التگطع منه كل چبدك
لكن دمعتك ما فارگت خدك
على حسين الغريب المنذبح جدّك
بعدك عايش بطف كربله بعدك

كل لحظه تجري بيهه عين
تصرخ حبيبي يا حسين

لوعة مصابك گرّبت يوم المنيه
يبن الغريب ودمعتك ظلت سريه

مگطوعه عندك آمال
يا ثامن جــروح الآل
على حسين ومُصابه
على حسين ومُصابه
.................................................................................

شرايد منك الدس بطعامك سَم
يبو محمد هضيمه اليوم تتألم
دموعك بالنيابه اعليك تتكلم
غدروك وبقه بنص الگلب مأتم

آه إعله فگدك يالغريب
آه اعله حزنك يالحبيب

يالماترد كلمن يگصدك يبو محمد
الدنيه كلهه اعليك لبست ثوب الأسود


حزنك يهد ضيمه اجبال
يا ثامن جــروح الآل
على حسين ومُصابه
على حسين ومُصابه
.................................................................................

ما ناسي الحسين بلحظه من عمرك
تلهج بإسمه حتى بموت اليحضرك
يا شمس الشموس وينكسر ظهرك
يطفه الليله نورك بس يظل ذكرك

شمس الشموس وهاللقب
يفتخر بيك وبالنسب

مفجوعه أرواح التودك من مصابك
هالليله أملاك السمه كلهه اعله بابك

يا حال تبقه بيا حال
يا ثامن جــروح الآل
على حسين ومُصابه
على حسين ومُصابه
.................................................................................

غريب بطوس وتواسي غريب الطف
بيا حاله المنيه اعليك تتوصف
حكمة الله هاي وبيهه الله أعرف
بس أرواحنه بهالألم تتحسف

حيف اعله حالك يالرضا
سم الغدر تتمضمضه

چبدك تگطع يا غريب الله أكبر
ويلي اعله هضمك يا إبن موسى بن جعفر

يا محنه بعدك تنزال
يا ثامن جــروح الآل
على حسين ومُصابه
على حسين ومُصابه
.................................................................................

تنعاك السمه والگاع مهضومه
موتك هالمسه حان ووصل يومه
الله يساعدك يا أخو المعصومه
بينه جروح هاي الليله ملچومه

وبمشهد الليله العزاء
خطاره أملاك السماء

بصحنك تقيمه واللطم هاي المسيه
يذكر غربتك وي غريب الغاضريه

حزنين ما ظن تنشال
يا ثامن جــروح الآل
على حسين ومُصابه
على حسين ومُصابه
.................................................................................

خادم غريب طوس عليه السلام
عمار هليل الواسطي