يلعقليه ازيارة رزقيني
يلعقليه انتي اكرميني


----------
رســـالة دمعــتي بلــكت عليـچ اتروح
الچ مشـتاگ گـلبي الـمذنب المـجروح
ومثل الخدم يمتة أبقى احضر النوح
وصوتي الغربتـچ ويــة البچو مبحوح
وعلى الدمعة انتي دليني
-----------
يل طـــولــچ ابصــاية حــــيدر اتــربه
واعز سر انحــچه شوف أبدرب غربه
ريــت ويــة الخـدم عبــدچ يـدز گلـبه
وابابـچ يــحترگ مـــن يدخــل العتبه
ومن جمرتچ حرگة اسگيني
-----------
مــــو طـلبه ابـــجرائه ابذلــه اتــوسل
وشحلات العبد يـم مــولاته مـن ينذل
الچ وجهت وجـهي ودمـعي ضل ايهل
اجــي ابابــــچ وأنـــزل نزلتـچ علـتل
ماد چفي ابجودچ انطيني
-----------

الصعب ألعندي لــو گلتيله كـون ايكون
ياخت اعضم كفـيل وبـت امـير الكون
هيچ وامشي وية الخــدم من يـمشون
واشگ ثوبي وانوح ابغــيرت اليـبچون
اشلون انوحن انتي علميني
-----------
يمتـــة اتـــعنى الـــــچ وابابــــچ اتعــثر
يا عضم جــــرح صـــار ابـــگلب حيـدر
الهواشم عــلى الــنوايــب كـلـة تتـصبر
بـس خــــدرچ الــكلفه اشلـــون يتيسر
ومن كفيلچ غيرة انطيني
-----------
يهضــمني اليـــسولـف غـــربتـچ يـمي
بعيــده اعليه اجي بس يبقى اعز همي
اجي وامـــهدلين اچـفوني وي هـدمي
واجي زحفت الحر متحفي الچ جدمي
وبالمناره تكتحل عيني
-------------
عبد وابــــكرم جـودچ ذبـــح كــل رايه
ابكيفچ اجي هسه علـى السـنة الجايه
جرح شــــوگ الزيارة ابضـني مو غايه
اجي امحــزم وحــافي وشــايل الرايه
والرحمتچ ماد چفيني


الخادم علي الحميداوي

يافرج الله

اللهم عجل لوليك الفرج

ياام البنين****ياام البنين
****************
يالخدمتج اكبرشرف***يالبيج من الله شكثر
لاخر نفس ابقه اخدمج***وبخدمتج حكي افتخر
من سمج وعيني نملت***منها وعرفت انه الصبر
صرت انه هايم لج عشك***وروحي صارتلج نذر

خليني يم بابج عبد اتوسلج
وعلميني بمعنى الوفه يالصرت الج

وبيج النفس ولهانه
ياام الوفه وخجلنه
ياام البنين................ياام البنين
**************
 هايم الج غيره وفخر***بعشكج احس ملوحه
الماحبج يضل بيه نقص***وياهو اليطيب جروحه
على عتابج الصله عشك***وطفحت محنه بروحه 
باجريسولف على الكمر***شوك وترافة بنوحه

يال كلج سوالف غرام وغيره
عمر اليحبج ما يضل بحيره

تطينه متردينه
الحد ما يصير بعينه
ياام البنين..............ياام البنين
**************
راسملج براسي ضعن***ومنيتي تتلكيني
وادعي الله  ياام البخت***بس كونج تعرفيني
وشكبري اصيرن لو صدك***من انتي تقبليني
تايه  جنت امروتج***يا بعد روحي وعيني

غيرج منو مولاتي ادكن بابه
وانتي الحنينه وانه عندي حاجه

والحاجه اصيرن خادم
بعشك اعلم الوادم
ياام البنين............ياام البنين
*************
 يوم اليمر ما اذكرج***كل طوالي يضل يابس
بكلشي كمت اصورج***وبحبج اصبح فارس
شمحله خدمتج تختلف***بالخدمه احسن واهس
واطمع  انجن  بخدمتج***بكد ما تجنن عابس

بحسين نجن هوه وشمحلاته
جناني حبج هاذه كلبي وذاته

وناذرلج شما املك
واجبه بعشك اشرك
ياام البنين.............ياام البنين
*******************
 بكلشي اضحي الخاطرج***هو انه شملك غيرج
ربتني بعز خدمتج***وراسي عله بتقديرج
الف نعمه الله شما كلت***مقصر احس دخيلج 
وخجلان اضل كل العمر***جي عايش انه بخيرج

وشما اسوي ما احس وفيتج
طيتيني وشكد فشله ما جازيتج

ونادم ترة تدريني
ويحنينه وتعذريني
ياام البنين.................ياام البنين

الخادم انورالسهلاني

#إلى_سيدتي_ومولاتي
#أم_البنين_عليها_السلام

سمه يم الگمر واولادچ نجوم
ويا دار استراحة لشمس الاسلام
سهرتي .. وليلچ اشما يخلص .. يطول
وفرش عاشور دمعه بخدچ ونام
گلبچ وقف خاص لحب الحسين
وابو فاضل ابابه ويفتر حزام
وكلما زينب تعاينلچ تشوف
بصدرچ نار تشبه نار الخيام
شنشبهچ جبل .. مولاتي الجبال
يم قلعة مقامچ تطلع اقزام
مولاتي .. حياتچ كلهه لله
إجابه واضحه لما معنى الإسلام
دين الطف أبد ما قام لو لا
سيف ابنچ وصوت الحره بالشام
فضلچ ما نعدّه شما يمر جيل
وبنفس الوقت يكبر بكل عام

احمد هادي الشمري

رايح ينبضات العشگ
يا يمة باچر لو صدگ
من تمشي يا لون الندة
گبل الخيم ابدي احترگ
____
من گد الامتانة الصبح.… يتشگگن رجلية
ع الگاع باچر تنچفي………حنتنك والحنية

يمنشف انجوم سماي
شاغت محاچينة هواي
ما تنترك چنك ماي

گالوا زغير اعله العرس
بس تارس اعيوني ترس
بس اليعرفك يرغبك
هو انت هم مثل الصدگ
_
لا تترك اجفوفي الامس. عرگت بخت يم ايدك
وعيوني التصب مستحة . مو تدري بيها تريدك

توجعني دورة مگفاك
خذني ارد اطيحن وياك
لا تنسة ما اتناساك

وعيوني التنگط بچي
حدر الرمش نگعت حچي
دنگت والشيب انتچة
راس اليدنگ هم عثگ

بس انت عدي والوكت… طالبني بيك طلابة
يبني يجاسم لو متت … باچر اشد عصابة

باچر يوازيك الموت
واحنة بدواوين نفوت
باچر يخنگون الصوت

مامش عرس باچر سبي
وتدمّر اتراب العبي
باچر چفافيك الخضر
بالخيمة ينسحگن سحگ
_
باچر يخربون العرس…… وامك تكض عوچية
واشموعك تموت بهوة…… وتابوتها الصينية

باچر يدوسنها الخيل
وامك تدوّر ع الحيل
ايشور ترة بچيي الليل

يوليدي بي حوبة الدمع
ويعثر الطفة الشمع
شيلحگك انت لو طحت
طبع الدمع ما ينلحگ

باچر يعورني الهجر……… و ايد الحزن تچهبني
نيشانك وثوب العرس…… باچر ترة ايغثنّي

بسيوف طولك ينباگ
واهدومك اترسها اشباگ
حظني يرف من اشتاگ

يا بعد شوغات العمر
شيعوضة لو مات البزر
ماكو هلاهل لا فرح
عرسك ترة ضيجة خلگ
____
علي هادي الخزعلي

قال الامام الباقر ( عليه السلام ) :
" لولا خوفنا على شيعتنا من الموت لرؤينا لهم ما جرى في كربلاء "
.………………………....ـ

عبدك ابن عبدك .. موتني مولاي اعله جدك
………………………ـ
دخيلك سولف اعله حسين . مـولاي احنه ما نسوه
وخـلهه تـحـترگ روحي . فـدوه لـخيـمته فدوه
راويـنه الـحـرگ والــنـار . وخـلـي گـلبي يتچوه

دمـه ابـجـيـلـكـم انه .. يمـولانه .. يمولانه
اذا تـنّـشـر قـمـصـانه .. يمـولانه .. يمولانه

خـليه يـحــترگ گـلبي
اصـيحـن دوم يـاربي
أهيم ابـلا وعي
دمعتي ابجرحك اتسافر
وامـوت ابـلـيـلة العـاشر
اذا اسمع نعي
……………………………… ـ
تجـويـنه لـون مـولاي لو من الخيم جمره
جا صبح اومسيه احنه هـاي اعـيـونه حـمره
ما وفه الدمع لحسين وحگ اعمامته الخضره

تـدري الـروح هـلـكـانه يمـولانه .. يمولانه
مصاب حـسين ائذانه. يمـولانه .. يمولانه

نـريد انـشوفـهه اعـيونه
صدگ نامت عله امتونه
ترايب والدمه
يريت انموت كون احنه
سيوف او رمح تشتمنه
عليك ابفاطمه
………………………………ـ
مّـلانه الـصـبر مـولاي مهـدينه اشوكت يضهر
ويـطفي اخيام عـمـاته بـعـد ما اكـدر اتـصبر
خل تزهگ تموت الروح خل يكشف عله المنحر

ذنبـنه شـكـثر عـامـينه .. يمـولانه .. يمولانه
عـليك الـزهره تـرويـنه .. يمـولانه .. يمـولانه

تهـضم ركضت النسوه
جـمر خـيمـاتهـن چوه
كلبهن والجدم
يؤسفه ومـالـهن واحـد
تعبـهن بالـوجه صـاعـد
من طگ الزلم
……………….……………ـ

شـلـنه بـالـعـمـر مـولاي اذا مـانـبجي عالمسلوب
ما ندري شـجره بالطف نقبه ليا وكت جم دوب
شحلات الروح من تشهگ والله هـالگلب متعوب

الـبجي هالـمـره مّـلانه .. يمولانه .. يمولانه
علـيـك الـروح ذبـلانه .. يمـولانه .. يمولانه

تعـال وشوفنه اشبينه
مصاب احسين ماذينه
ولاندري اشجره
سمعنه ايباوع اعياله
وتدوس اعليه خياله
ضلوعه مكسره
…………………………… ـ


الشاعر ; خيري الصفراني

امسى اغروبهه المنتظره عالباب
وحط الليل جنحـــه وما اجوهه
تغمّض عينهه وتحسب وداعات
اشگد حضنوهه واشگـد قبّلوهه
كــل ونّه التونــهه إتشوغ الروح
ابكل هــزّة مهد عبد الله اخــوهه
حسره إمن العليله وصلت الغيم
وفوگ الغيم رسمت وجـه ابوهه

احمد الهلباوي

منهاج محرم ١٤٤١
السيدة العليلة(عليها السلام)


تـعــالــولـي الحـﭽــﻲ اتـبــدل
مــرمــرنـي العـطـش واســأل
مـــو ســــر الحــيـــاة المـــاي
ﭽـﺎ لـيـش من اضـوﮔـﻪ أذبـل

تـعـالـولــي تـغــيَّــر كـلــشـــي عـــارفـتْـــه
وكـلشـي هنانـه حط أيـده اعله خاصرتــه
أنْـه العـدلـه الوحـيده المـوتـي عـايـشـتــه
ويـم راســي تــرايَّــــو عــدلــه لـو ميـتــه

وانْـه عـن نـفـسـي مـــا أدري
افـراشـي شفـرقه عـن ﮔـبـري
وعــود الـنــوم راحـــة بـــال
ﭽـﺎ لـيـش من اضـوﮔـﻪ أذبـل
ـــــــــــــــــــــــــــــ1ــــــــــــــــــــــــــــــــ

مـن افـراشــي ولـبـابــي خـلـص لـيـلـي
وهـسـه لـبابـي ما يـوصـل بـعـد حيـلـي
ولا وحـــده بـخـواتـي هـنــا تـتـﭽـيـلـي
ولا يــمــي أبـــوي وحـتــى يـدعـيــلـي

ﭽـﺎن شـمـــا دعــه ابـعـلـتــي
تــرد مـثــــل الـورد صحـتــي
ولـسـه اسـمـه عـسـل بشفـاي
ﭽـﺎ لـيـش من اضـوﮔـﻪ أذبـل
ــــــــــــــــــــــــــــــ2ـــــــــــــــــــــــــــــــ

يسـمـونـي العـلـيـله وصـح عـليـله أنــي
وبـس ثوب ونَـفـس هجر اهـلي خلانــي
لـكـــن والـــدي لــــو هــســـه نــــادانــي
لـلـطـف أركــض وبـخـيـــامـه يـلـﮔـانــي

واذا يـــســــــأل أﮔــــلــلـــه
يـمــــك مـــا تـــظَــل عـلــه
وعطـرك تـارس الأنـفـــاس
ﭽـﺎ لـيش من اضوﮔـﻪ أذبـل
ــــــــــــــــــــــــــــــ3ـــــــــــــــــــــــــــــــ

السـمـه بـيـهـا ﮔـمـر وابـقـيـت ابـاوعـلـه
حـلـو صـح الـﮔـمر بس عمي ﭽﺎن احلـه
شويـه اتـباوعـت مَـل شـوفـي يـنـظرلـه
بـس مـن ﭽــﺎن ابـــو فـاضـل ولا امـلـه

ﭽـــﺎ هـــو الـﮔـمـــر قــابــــل
بـي احـســاس ابــو فــاضــل
ولـسـه احسـاسـه بـيه يعيـش
ﭽـﺎ لـيـش من اضـوﮔـﻪ أذبـل
ــــــــــــــــــــــــــــــ4ـــــــــــــــــــــــــــــــ

ﮔـلـبي أيـﮔـلي صايـر شـي أحـس صايــر
واﮔـلـــه اتـفـائـل أيـﮔـلــي بــده الـعـاشــر
وأﮔــلـلــه يـــــرد الـــرايـــــح امــــسـافــر
وايـﮔـلي بـشــرط مـا سـاحـﮔـﻪ الحــافــر

ﮔـتـلـه شـتـعــنــي فـهــمــنــي
ﮔـلـي اضـلـــوع ابـوﭺ أعــنـي
خـنـﮔـني والهــوه بـالـبــيـــت
ﭽـﺎ لـيـش من اضـوﮔـﻪ أذبـل
ــــــــــــــــــــــــــــــ5ـــــــــــــــــــــــــــــــ

يـكـبـر حــــزنــي والتـزغــر بــدت ريـتـي
الـمـا أخــذونــي أخــذو مـنــي عـافـيـتـي
وأنـه المـاذيـنــي مـو بـس ظَـلـتَّي ابيـتـي
نحـري وخنصــــري وﭽـمـلـتـها ترﭽـيـتـي

واﮔــل لـلحـزن أفـــدي اخـتـي
يـﮔـلــي شــبـاقـي بـيـﭻ انـتـي
واﮔـلــــه الأمــل بـاقـــي وﮔﺎل
ﭽـﺎ لـيـش من اضـــوﮔـﻪ أذبـل
ــــــــــــــــــــــــــــــــ6ـــــــــــــــــــــــــــــ

أحمد البصراوي العبادي

بالخرابه اشما تسلهم عيني
تنلـچـم مدلـوله وتصحيني

1ـ هاي تستاحش من الظلمه وتنز
وذيچ تغفه وجرح يلچمـهـا وتـفز
وتگعد ام عبد الله (كـاروكه) تهز
يگـلـهـا مـا در صـدرچ ترضـعـيني ؟!!

2ـ يا حنين جروحنه وملح التراب
والـخـرايب لا سـتـر لا بـيـهـا باب
والعيون اجناب واحنه بلا حجاب
وآنه كـل عـيـن بسـهـم تـرمـيـنـي

3ـ اشوه عدنه الليل يسترنه الظلام
حته لا تبرالـنـه عـيـون الـحـرام
وين ذيچ اديارنه وذيـچ العـمام
اهنا يهاشم مـوتـه لـو ناسـيـنـي

4 ـ اثنين واثمانين يتشكن سوه
والجرح ـ گص الحبل ـ يردن دوه
ذبلن امن الشمس وسموم الهوه
ونه اشما اطوي الدرب يطويني

5ـ احنه من صيارنه ابيت الوحي
امن الحچي حته ويَ اهلنه نستحي
سمعت اهل الكوفه صوتي وصايحي
خاف ما تدري العده ميسريني

6ـ انه الما چانت خيالي تشوفه
شافـتـه وسمـعتني اهل الكوفه
اعله الهزل وايدي بحبل مچتوفه
بالـطبـل ودفـوفــهـا اتـلاگـيـنـي

7ـ علي بويه هنا يكشاف الكرب
شگد بعد للشام كون امشي درب
الموت ريته ولا يعرفوني الغرب
وروس اخوتي يا علي تماشيني

عزيز الفيصلي

عن الاصل ما تنشغل
الهم خدم كل الرسل
وتنادي يا اهل البيت ... هالطاعه ما ننساها

١ــــــــــــــــــــــــــــــــــــــ
بعضانا هالخدمه سرت وادمها
واتعلت ابين البشر وادمها
حواء تخدم فاطمه وادمها

ضل يعتلي بخدمة علي
قدره اعتله بحب الولي
وضل ادم لحد الموت ... بخدمة علي يتباها
٢ــــــــــــــــــــــــــــــــــــــ
جبريل بالطف للرسل من نوحه
اسماعيل شيب من وكت من نوحه
اسحاق استلم ثوب الخدم من نوحه

وموسى استلم ثوب الخدم
وبعصته خلاه علم
وتعلم وياه هارون ... عن خدمته ومعناها
٣ــــــــــــــــــــــــــــــــــــــ
العاف الخدامه امن الجهل يوسفها
باجر الوادم هالامر يؤسفها
صار العزيز بخدمته يوسفها

وكل العمر ضل يفتخر
لمن خدم نال الاجر
والحنطه بثواب حسين ... وزعها من انطاها
٤ــــــــــــــــــــــــــــــــــــــ
بالخدمه ايوب النفس يونسها
وينادي عنها مو عذر يونسها
بالحوت ضل يرثي الخيم يونسها

لطف العجب هود الكتب
لوط النعه ادريس انتحب
وهاجر تكل لبراهيم ... هالخدمة يا محلاها
٥ــــــــــــــــــــــــــــــــــــــ
يم طه كوثر والخلك مريمها
وكوثر تصبح لو علي مر يمها
نصبت عزه بكتر الجذع مريمها

وصاحت بعد حيدر مدد
يا فاطمه وعيسى انولد
وخدمتها لمها الزهراء ... وكفت هناك اوياها
٦ــــــــــــــــــــــــــــــــــــــ
سليمان يهتف هالعمل بيه صالح
امتنه وإشكال البشر بيه صالح
كل مجلس لطف كربله بيه صالح

بدمعه يهل يابا الفضل
وبناقته يشوف الهزل
امة ثمود اعله حسين ... تسمع بجي خلاها
٧ــــــــــــــــــــــــــــــــــــــ
عمرين لو عنده انتحب عمرانه
من ونته داوود انهدم عمرانه
موكب زكريا بكتر عمرانه

ليحيى انتظر والهم كبر
حط حاجته يم الكمر
ناذر نذر للعباس ... من ينولد يحيايها
٨ــــــــــــــــــــــــــــــــــــــ
شيث النكر من للمجالس عاده
يعكوب صاحب حركه يشهد عاده
مجلس شعيب بكل محرم عاده

حسينك شفه بهالعاطفه
هاي الرسل بيه عارفه
عظمها خلاق الكون ... جي وكفت المولاها


ميثاق الحمداني

محرم ١٤٤١
العظيمة أم البنين (عليها السلام)

سـويـتـلـك جــود اليـســــر النـاظــر
بـي يـنـثـلـم وجـه الـنـهـر بالعـاشــر
تـوكـل على اللـه تـوكـل
ذِل العـطــش يـمــعــدَّل

شـمـا جـود الـك أتـخــيـرَّه....بمـتـنـك أشـوفـه شـمـزغـرَّه
غـيـر انـت عـبــاس
ولا واحـد ايـلـوﮔ اقـنعـت....وبـﭽـفـي الك جـود اصنعـت
ســويــتـه مـقــيـاس
طـالـع علـيك شـﮔـد حلـو....خـلـيـتـه ﭽـن طـبــع الـدلـــو
شـمـا نِـزل تـــراس
ينـزلَّـك اهـوه اعله النهـر....وانـت اعـله طـولك يالـﮔمـر
مـــتـدنــﮔ الــــراس

وهـوَ النـهـر مـو مــال نـزلــة كـافـل
ولـزيـنــب اتـدنـﮔــلــه إي تـسـتــاهـل
كـلـشـي لأجـلـهـا اتحمـل
ذِل العــطــش يـمــعــدَّل
ــــــــــــــــــــــــــــــــــ1ـــــــــــــــــــــــــــــــــ

كـمـلـته جــودك وافـرحـت....وﮔـبـلـك يـبـو فـاضـل رحـت
زورتـه الحـسـيــن
واحـﭽـيـلـك ابكـل الـﮔـلــت....لأجــلــه يـيـمــه اتــوســلــت
تـوﮔـعـلـك أيــديـن
ﮔـالـلـهــا هـذا اشـمـسـهـلـه....وابـشـــاره الـــﭻ يـمــعَــدَّلـــه
انطيـه بعـد عيـن
ﮔــالـتـلـه بـرَّدت الـﮔـلـــب...ومــو يـاهـو ﭽــﺎن ويـنـطـلـب
مثلك يصح ويـن

كـلـمـه انـت عـنـدك مـن ﮔـبل ﮔـايـلهـا
الحــط طِـلـبِـتـه ابـابـك يــرد شــايـلهـا
للمـالـه حـل انـت الحــل
ذِل العــطــش يـمــعــدَّل
ــــــــــــــــــــــــــــــــــ2ـــــــــــــــــــــــــــــــــ

لزيـنـب اخـذتـه ومـن نِـظــر....زيـنـب اشـو اكـثــر كــبــر
ويـنـﮔـط صــبـح مـــاي
ثـاريَّــه مـو بـس لـلـعـطـــش....غيـمه وعلى البيـت انـفرش
ولاختـك نـطـه افـيــاي
وثـاريـه جـــودك بـي طـبـــع....مـن مـايـه ابـد مـا ينشـبــع
مـــثـــلــــك يـــــرواي
وشـديــت بــي مـنـهـا عـــلـﮔ....وشَـم الـعـلـﮔ حـدما شـهــﮔ
وﮔــالـلــهــــا وفـــــاي

المِـــن عـنـده يشـرب مـاي يـوم السـابــع
مـن الســـابــع ولـلـعـاشـر أيـظـل شـابــع
والطـف يتـركـه امـبـلـل
ذِل العــطــش يـمــعــدَّل
ــــــــــــــــــــــــــــــــــ3ـــــــــــــــــــــــــــــــــ

عـلـﮔـتـه يـم بـابــي ابـقـصـد....حـتى اكـثـر ايظـل مسـتـعــد
شـمــا نظــر بسـمــار
وكـل ساعـه ﮔـلبـي أيـكلـمـه....هـنا ﮔـلـه طـاحـت فـاطـمــه
وانـتـفَــــض لـلـثــــار
ﮔـتـلـه انـت ثــارك يخـتلـف....بالـطــف اريـــدنـــك كـلــف
واخـذه مـن الانـهــار
ضـلع أم حـسن يرويه أمـل....لـلخـيــم مــايــك لــو وصــل
وايـروَّي الازغـــــار

وزيـنــب اذا مـن مـايــك اتـرويــهــا
طيـحـة المحـسـن يعني هم تشـفـيـهـا
حظـك اشـكبـره اتـخـيـل
ذِل العــطــش يـمــعــدَّل
ــــــــــــــــــــــــــــــــــ4ـــــــــــــــــــــــــــــــــ

امـﮔـابلته واحـﭽيله قصـص.... ﮔـتلـه اهـيه دنيـانـه فـرص
والفـرصـه الاطـفــوف
المـا مـات بالطـف مـنـهـزم....والمـات تـاج اعـلـه الـزلـــم
قــانـونــه مـعـــــروف
وﮔـتله انـت لو جالـك سهـم....أوﮔــف إلــه وﮔـفــــة عـلــم
وخـل ينتـرس خـــوف
بـراعـيــك بــذاك الــوكــت....لا تـنــتـﭽـــﻲ ولا تـلـتــفــت
مــا يـمـلــك ﭽـفــــوف


وزع الســهــــام ابـيـنــك ومـا بـيــنـه
بلكي الله يـﮔـضـن ﮔـبل وكت حسيـنـه
من ينجـرح راح ازعــل
ذِل العــطــش يـمــعــدَّل
ــــــــــــــــــــــــــــــــــ5ـــــــــــــــــــــــــــــــــ

لـو طحتـو فـوﮔ المـشـرعـه....عـوفــو الألـم واقـرو دعــه
لـزيـنــب والايـتـــام
وسـهـامـكـم لا تـنـســحـــب....خـافــن بـعــد بـيـهــن ذنـب
وايـﮔـصـدن اخـيــام
ويـا حـالـكـم مــا يـنـحـمــل....لـو صَـعــدَّو زيـنـب هـــزل
والمـﮔصـــد الشــــام
الما عايش الطف ما عرف....وقـاصـر يظل شـما وصـف
دورات الايـــــــــــام

وهـاي اهـيـه دنـيا ومـا تحـب الصـافــي
اتـزوده بحـزن كـلـمـا ســأل مـو كـافــي
بـس بـيـهــا مـا نـتـوسـل
ذِل العــطــش يـمــعــدَّل
ــــــــــــــــــــــــــــــــــ6ــــــــــــــــــــــــــــــــ

أحمد البصراوي العبادي

مناطرينك اليوم لو باجر تهل
مناطرينك والبعد ماينحمل
ليمت يالمسافر تعود تعود
ــــــــــــــــــــــــــــــــــــــ
جمع بينه شكثر مرت ولامنك خبر مرنه
تهل ليمت يمن وجهك جبر كسرة خواطرنه
يوجه الله العمر گوض بعد ليمت تسامرنه

جم جمعة مرت وانته ماهو
بله الينشف الدمعة ياهو

مرنه مره بداعة التبجيله دم
مرنه مره نحلفك بعين وسهم
ليمت يالمسافر تعود تعود
ــــــــــــــــــــــــــــــــــــــ
على شجم باب يمسافر عليلة تناطر ظعونك
عليك شجم ظعن نشدت ولا دلوها بعيونك
ونس مامش والمضيع يحير بچلمة شلونك

مو تدري المفارگ حبيبه
تعيش الهلا بحلگه غريبة

ياجرحنه سافرت ياسچه بيك
ياجرحنه ياعرف ننشد عليك
ليمت يالمسافر تعود تعود
ــــــــــــــــــــــــــــــــــــــ
الف وينك والف ليمت گظن وانت اعلى هجرانك
صلاة اهل العشگ حانت شوكت نسجد على اذانك
يماخذ كل شي ماترهم بنادم ياخذ مجانك

ليمتها يااخر سفينة
ترحم مدامعنه وتجينه

حن علينه وداعتك مابينه حيل
حن علينه نموت اذا مر بينه ليل
ليمت يالمسافر تعود تعود
ــــــــــــــــــــــــــــــــــــــ
عليش مطول غيابك يمن كل شي لضواك يحن
عيوني توضت لملگاك بلالك ليمت يأذن
عليك يلوگن الجلمات الحجي المو بس الك يلحن

واليامتى تظل السوالف
محبوسة مابين الشفايف

ضامينك. جلمة مابين السطور
ضامينك. گلب ينبض بالصدور
ليمت يالمسافر تعود تعود


رائد الناشي

ليلة الهلال
مولاي صاحب الزمان يخاطب الهلال

يهلال حكي ادموعي حمره
اكبالي جدي انداس صدره
ــــــــــــــــــــــــــــــــــــــ
جان شيخ الديره جدي والخلك تهابه
هسه فوك ضلوعه خيل ويغفى بالترابه
وجانت ابنيته رقيه مدلله واميره
هسه اسيره وشيبتها الناكه والخرابه

يهلال ريجه صاير صحره
ــــــــــــــــــــــــــــــــــــــ
حكي يهلال ابجي دم وعايش بصحاري
حسين وجه الله ولكيته على الغبره عاري
الرمل حار ووجنته ترفه جنها اميه
حكي لو بس بالبواجي مكظي كل نهاري

يهلال اكبالي كطعو نحره
ــــــــــــــــــــــــــــــــــــــ
الجرح الاكبر والكسرني وصرت منه شايب
عمتي زينب فوك هزله وغفت بالترايب
جانت امدللها اخوها وعل الخلك سلطانه
هسه مجتوفه وكلبها مجوي بالمصايب

يهلال جتفو بت الزهره
ــــــــــــــــــــــــــــــــــــــ
حركو الخيمه ورقيه ركضت اعله ابوها
اتكله يا بويه التراجي مني سلبوها
بويه ترضها اعلى متني انضرب يغالي
أبنيتك الكبرها كلبك بالهزل خذوها

يهلال عمتي كسرت ضهره
ــــــــــــــــــــــــــــــــــــــ
عمتي جانت من تزور الزهره وي ابوها
يمسح بخطوة جدمها بصدره جان اخوها
ما مسمح بجفوفه خطوه خافن اتضل ريحه
ومن يسلم ريح زينب خافن يشموها

يهلال عمتي انخلقت حسره

#عبدالله_الفريجي

قصيده اساسيه اهلال محرم

مـــــحرم غير احوالي هلالك غايب اهلالي
بيك النفس مخنوك
اشم اموادع اخواني واروحن ويه عدواني
وركب هزل الــنوك
ــــــــــــــــــــــــــــــــــــــ
شكــثر مختنكه بهلالك وشهرك غير احوالي
ارجف لـو يمر اسمك ويضل يلجمني دلالي
لـــحضه حسين ماعفته وبيك امفارك الغالي
بس افـــراك ميخال لــجن بس راسه يبرالي

شهر الرحمه مــــــــاهيه واروحن بيك مسبيه
غـــير الخدر ميلوك @ واركب هـــــزل النوك
ــــــــــــــــــــــــــــــــــــــ
اشوف امصاب بيامـــك تصير ولا مفر منها
هلالك يقهر ابــــــروحي وحسن حيل جاتلها
احسب بيـــك كل عمري من جانو هلي كلها
هلال اشبيك وي زينب بـــــيك اتعوف كافلها

يروح اليــــرفع الراس وتطيح اجفوف عباس
وعليه الكلب مشكوك @ واركب هـــزل النوك
ــــــــــــــــــــــــــــــــــــــ
شفتك ما شف راحــــــــه وعلي جنت انتهازي
يشهر وياي مــــــا عادل واحس بيك انحيازي
الشمر بحسين يـــــتشمت واني افكد اعزازي
يحز بالراس ابن جوشن وانه ابكلبي انحزازي

راسه اعله الرمــح شاله وخيل اتكطع اوصاله
علي مبــتسمه الحلوك @ اركب هـــــزل النوك
ــــــــــــــــــــــــــــــــــــــ
الم بجروحي لو هليت لـــيش اتهيج اجروحي
اذا طرواك مــــــــــر بالي تذگل ونتي ونوحي
ابشهرك سلبو كلشي وبيك انهدمت اصروحي
مــحـــرم يالخذيت اعزاز عاشو كلش ابروحي

اخذتهم من نضر عيني واول واحـد احسيني
المصايب والقهر فوك @ اركب هزل النـــــــوك
ــــــــــــــــــــــــــــــــــــــ
اذا هـــــــــل الشهر حسيت حيل وروح مابيه
وتصير اشباح كدامي وصـــــور تتكالب اعليه
ضـوه اهلالك اذا شفته احسن روحي مسبيه
جــــــــــم عله تحط بالروح راس حسين ورقيه

علينه اشكد يضحكون مــاضن سالفه اتهون
مامتوقع اطب سوك @ اركب هــــــــزل النوم

بسام قابل الياسري

لسان حال الحسين ص ...يسولف ابو علي عن وليده علي الاكبر ص يكووول


يل مدوهني بالحر
اسولف بيك وفتر
شويه وصاحو اركض الحك ابنك
واعدل ضهرك وشيله اعله متنك
ــــــــــــــــــــــــــــــــــــــ
علي لمن طلعت كبالي ومشيت
ثلث مرات عينك عثرتني

سألتك بالعيون وانته رديت
اخر مرة اشوفك جاوبتني

على اركبي طحت وعيونك تشوف
شبكتك وانته دكيت اعله متني

اشم بركبتك بس هيست ماي
رغم ما يابس انته وبللتني

وحتارينه بالحل
ياهو يهد الاول
تهد ايدي وجرك من تهدني
وحطن جلمه بذنك دوهنتني
اسولف بيك وفتر
ــــــــــــــــــــــــــــــــــــــ
ياعوجيت ابوك الرايد تروح
فص عيوني مابطل نحيبه

ادور ششمر بضهرك يل وليد
هو الماي وينه منين اجيبه

صاحت ليله يمه بهيده لهنا
وحبيب ورايد يودع حبيبه

طب وشاف امه مفرعه تصيح
علي يمه عفتني بيا مصيبه

ياتجايت امك
تعال بحضني اضمك
حبحب كل اخياته بكصصهن
بس رجلين زينب دنكلهن
ــــــــــــــــــــــــــــــــــــــ
راح وحيلي خلص مثل الشموع
وكلما يبتعد تزغر مهرته

اهود اشفافي شيهودهه الجدام
لا كاعد ولا جدمي نكلته

فجأه وهوسو وادمهم هناك
كتلنه اليحلف حسين بكشخته

ودولي المهر متروس طعنات
ومدري اجم سهم نام بصفحته

سألت المهر ما رد
صهل صهله وتمدد
اشرلي المهر بطراف عينه
شفت بركع برجله شادينه
ــــــــــــــــــــــــــــــــــــــ
ما اصبر بعد وتبريد الحيل
ودلاني المهر ياصوب دربه

لكيته امدد ويشهك بالانفاس
شيتنفس المضروب اعله كلبه

طحت وكتله بويه شيوجعك كوول
كال العطش بويه انطيني شربه

كتله اطلع لسانك فوك الشفاف
وصارن خشبه مطبوكه اعله خشبه

مامش ماي بيه
مات بحضن ابيه
فرشت الصايه المك يا وليدي
ماينطيني كلبي واسحب ايدي
ــــــــــــــــــــــــــــــــــــــ
حملته وللخيم ماخذ حبيبي
والشمات تضحك من كفايه

امشي وكوه تنكل بيه الجدام
وشوفن خيط دم يصب ورايه

وصلت وصاحن النسوان يحسين
الاكبر وين شو كلك دمايه

ثغبت اكبالهن شكيت الازياك
ولطمت اعيوني عالميت بصايه

كلهم شايفيني
ابجي وزركه عيني
كشخت هاشم الراح امن دينه
راح الاكبر وميرد علينه


ابو قسور العويدي

عباس يا ماي العين شو طولت يالغالي
لا تجفي عني اترجاك عكبك يشب دلالي
منتظرة ترجع يا حيد
خوية النهر موش ابعيد
عكبك يشب دلالي
ــــــــــــــــــــــــــــــــــــــ
ها يبن من رد الشمس ردلي و دخليني افرح
يمطيّب اجروح البشر ما عودت عالتجرح
ارجع و رد بية النفس حتى الهوى عكبك شح
شو كمر غايب بالسمة من درت وجهك ماصح

يا خوية اني اترجاك ردلي وتخمد ناري
عكبك يعباس الروح طلعت ودمعي الجاري

روحي دخليها تهيد
خوية النهر موش ابعيد
عكبك يشب دلالي
ــــــــــــــــــــــــــــــــــــــ
منتظرة ترجع للخيم عكبك نشف بية الدم
وهمي على افراكك كبر ما عودتني اعلة الهم
بغيابك امن اشتم هوى يطب ريتي مثل السَمّ
غير انتة سباح الگلب من دونك اشلون اشتم

يا خوية ما شم الريح لو ما اشوفك يمي
كافي انتظر يبن الروح بس لا تزود همي
لو ما تجي همي ايزيد
خوية النهر موش ابعيد
عكبك يشب دلالي
ــــــــــــــــــــــــــــــــــــــ
ما بية حيل اتنطرك مو موتتني الفرگة
يا هوة الرية ارجع ترى اختك غدت مختنكة
موش الخيم روحي اصبحت من گوطرت محتركة
وامتوني عكبك يالگمر تصبح من الطگ زرگة

لو ما ترد خوية تصير مثل الفرات امتوني
واني ادري بيك العباس ما تقبل يطكوني
اتنطر وحيلي ايبيد
خوية النهر موش ابعيد
عكبك يشب دلالي
ــــــــــــــــــــــــــــــــــــــ
لو ما ترد يا بألفضل كول السلام اعلة احسين
وحَيدَة كدام الخيم كلسا يهجمون (ألفين)
نشفت ارياجة من العطش والخيل تهجم صوبين
منتظرك ترد يالشهم والساعة صارت (نوحين)

كلي يزينب عباس ما ظنة يرجع لينة
واعلة النهر ضل مطروح خلي تأئيس اسكينة
لا تترك حسين وحيد
خوية النهر موش بعيد
عكبك يشب دلالي
ــــــــــــــــــــــــــــــــــــــ
حدب احسين او يتضح كلمن يحدب ظهرة
يعني طحت عالمشرعة ومحتار ضل ابأمرة
لو يعتنيلك ننسبي يضل بالخيم هم خطرة
ومن اسمعت انة اركضت عالتل اشوف اشيجرة

شفتك وراسك مهشوم ومبترات اجفوفك
والجانت تشوفك حيد هسة رمية اتشوفك
بس ارجع انطيك الايد
خوية النهر موش بعيد
عكبك يشب دلالي
ــــــــــــــــــــــــــــــــــــــ
حشمتك اهواي وبعد ما حشم وما اعتب
مو كلبك علية احترك حتى الخيم جاي تشب
بس مالت الله من رحت ليلي بغيابك يرهب
خوية صرت مثل النهر وانة الجنت ماي بحبِ

ما حشمك ولا تختاض الغربة مكتوبة النة
وباجر اروحن للشام والسبي خوية يسلنه
انوخذ باجر ليزيد
خوية النهر موش بعيد
عكبك يشب دلالي

حسين حيدر الموسوي

#تراث

زينب نادت أم چلثوم گومي ولا تخلينه
راحو كــل بني عدنان وبدمـهــم تحنينه
ــــــــــــــــــــــــــــــــــــــ
گومي ولا تخليني وحيده وخطر ممشه الليل
گومي انلملم الاطفال الشردت من لفتها الخيل
گومي اندور اعلى احسين راح الحيل وي الحيل
گومي انشوف أهالينه البيهم مثلو تمثيل

وسهم البين صاب حسين
واحترگت صواوينه
ــــــــــــــــــــــــــــــــــــــ
گلبي وگلبچ المجروح ما تتلايم اجروحه
ودمعتي ودمعچ المذروف المصايب نشفت موحه
گومي انشگ سواد الليل گومي انروح فد روحه
للشاطي ولعد عباس چثته اهناك مطروحه

وسهم البين صاب حسين
واحترگت صواوينه
ــــــــــــــــــــــــــــــــــــــ
دسمع يا أمل زينب دسمع يارجه المهموم
مسينه بلا حمه ولا دار نهبتنه وسبتنه الـگوم
وسهم الي مرد عينك مرد گلب اختك المالوم
واحنه انشاگف الضربات واحنه انواجه المقسوم

وسهم البين صاب حسين
واحترگت صواوينه
ــــــــــــــــــــــــــــــــــــــ
عگب هيبة منازلنه الچانت ضاربه الصوبين
وترفرف عالخدر رايات منظوره بحمات الدين
وانته الخيمتي عنوان يا ضنوة بطل صفين
ويمينك چانت ويسراك عمد للخيمه وي العين

وسهم البين صاب حسين
واحترگت صواوينه
ــــــــــــــــــــــــــــــــــــــ
گومي انشاهد العريس والرمله نسواسيها
رمله ماتبطل النوح فگد جسام ماذيها
وغريبه ظـلـت بهالدار لمن راح حاميها
مثل ضيعة أمانينه ضاعت كل امنايها

وسهم البين صاب حسين
واحترگت صواوينه
ــــــــــــــــــــــــــــــــــــــ
گومي وخل نشوف اشلون حالة ليلة الاكبر
چانت تحسب ألف حسـاب يوم بيوم تتنطر
تعرسه وتفرح بعرسه واخوته تزين المحضر
بعد ما حسّبت لن يوم تشوفه ابكربله مطبر

وسهم البين صاب حسين
واحترگت صواوينه
ــــــــــــــــــــــــــــــــــــــ
گومي ولا تخليني وحيده وما الـيه امعين
ونين اسمع واريد اعرف مصدر هالونين منين
اضن هاي الرباب اتريد ترضع طفل اخوي حسين
اظـن درن ثداياها وتعنت يـم ابنها الحين

وسهم البين صاب حسين
واحترگت صواوينه
ــــــــــــــــــــــــــــــــــــــ
مثل حزنچ حزن گلبي أو ونينج زيد ونيني
بعد بيمن أشـد اِگــواي وانتي هالـتشوفني
البيابي ما يعينني وششوفن لو عمت عيني
يزينب ركـد مني الحيل والواجب تعذريني

وسهم البين صاب حسين
واحترگت صواوينه


الشاعر
عزيز الگلگاوي الكربلائي

#اللهم_عجل_لوليك_الفرج

لسان حال مولاتي اخت الحسين(س الله ع )

أديـه بـحـبـل شـدهـن هـاي ... ويـهـاي
مــن الخـيـمــه ذيــچ بـنــار .... ويـهـاي
طــلعــت ودايــره لــنــهــر ..... ويـهـاي
خـــاطـــر مـــا تــصـــد الــزلــم لــيــه

محمد الجوراني