اخذتهن منه بلا وعي واشم بيهن ريحته قوية بيهن
هو يباوع عليه مستغرب ..
واني رايحة بعالم ثاني وياهن ..

سد الباب ومشى ..
حضنتهن وگعدت ساعه ابوس بيهن وساعه اشم ..
تالي مااتحملت خنگتني العبرة گابلتهن وابجي ..

ربي شوكت ترحم بحالي وتجمعني بي .. معقولة فراگنا يطول معقولة يكبر ويصبح الرضيه يمة ومايعرفني
معقولة انحرم منه عمري كله ..

سمعت صوت صراخ طفرت من مكاني .. الصوت مخيف وجن اكو عزاااا ..
وبعدها صوت زلم ..
والشيخة ..

هوسة صارت ..
وگفت يم الباب مرعوبة ..

هااااي حورية !!! معناها لگوهااااا صار شهر واكثر يدورون عليها وين لگوها ..

صاحت الشيخة :
" شنهي يحورية لجن تشردين من الحوش وتصخمين وجوهنا وسمعتنا واحنة نعوفج وماناخذ حگنا منج "

ردت حورية :
" شيخة احبن ايدج ادنج على رجلج احبنها بس عوفيه لاتكتلوه شيخة "

الشيخة : لجن خايفه عليه يمصخمة وماتخافين على روحج ..
حورية : حرااام عليكم من زمان تدرون بي هاويني ورايدني انتو المنعتوه ياخذني وهسا هو رجلي عبن احنه مالجين شيخة ما سويت شي بالحرام ولا زنيت "

موحااان : خلوني اجتلها هالعايبة الجابتلنا العار لجن بوكاحة تكول تزوجنا من هيج تطلعين عن شورنا ..

منهل : كل ضنج مانلگاكم .. شردتوا الغير قريه وجن احنة ماندور عليكم .. بس انت ناسية يحورية اني منهل ساعة الصدج انگلب الواحد اخر ماتعرفيه .. وراح نخلي حطاب هو اليغسل عارج ولجن ماگدر نغسله احنة بمجانه .

حطاب : شتكصد يمنهل اني موش زلمة وماعرفن اخذ بثاري ..

حورية : لا خووووووية احبن على رجلك لااااا لاتمشي بشورهم كل همهم يلطخون ايديك بدم اخيتك عبنهم عمرهم كله يحسبونا موش منهم .. يردون يخلصون مني ومنك وتبقى الشيخة الهم ..

صاحت الشيخة :
" حسج ماهيسة طمي عارج وبعدين احجي .. ذاك النهبها شسويتوا بي ؟"

ردت حورية :
" مانهبني ملج عليه اني مرته ابن خالتي وموش غريب هو لاتكتلوه يحطاب هذا ابن خالتك واخيك موش ذولة اخوانك "

سمعت صياح موحان عليها..
ويضرب بيها " والج عين تحجين تردين توگعين بينا وتخربينا .. شيخة خلينا نجتلها ونفتك منها "

ردت الشيخة ..
" احبسوها وي الفصلية بالمخزن .. لين مايصير الصبح واني اگلكم شتسوون .. وذاك خلصوا عليه ومن غير ماتخلون واحد يحس عليكم "

گامت تصيح حورية " لا شيخة لا .. اريد الله ينتقم منكم ياظلام مثل ماكتلتي امي تكتليه ياظالمة ايديج انترست دم وماكفاج . اكتليني وياه لاتخليني عايشه المن عايشة بعد اكتليني "

انفتحت الباب ..
سحلها جعمقة وشمرها بالمخزن وهي ترافس وتصيح
صوتها هز الحوش هز ..
صارت تضرب بالباب وتصيح ..
ولكم حرام عليكم اكتلوني وياه ماسوينا شي هو رجلي رجلي حلالي مامسني يوم بالحرام .. الحرام انتو موش احنة ..

جنت اباوع الها ومااعرف شسويلها ..
تبجي وتصيح بگلب محروگ .. ماخلت شي ماسوته لطمت وبجت وملخت نفسها ومحد سمعها ولااهتم بيها

حالها من حالي ..
هالمخزن شهد على كل مظلوم ودموعه ..
الليل كله مانامت بس تبجي واني هم مانمت وهو اليشوف هيج شلون تغمض عينه !!

تعبت من البجي صارت تون ..
علي وينك علي كتلك خلينا نهج منا نروح الغير محافظة ماسمعتني ..
گلتلك اهلي واعرفنهم مايضيعون حگهم .. لو يحفرون الگاع ويدرون علينا ..

علي وينك هسا بعد بيك نفس لو حرموني منك ..
ولك عليييييييييي اسمعني لاتعوفنييييييي عليييييي

بجيها وصوتها خلاني ابجي .. مااتحملت الموقف ذكرتني بروحي اني ومهران ..
حمدت الله وشكرته لان عايش .. الخلاني اتحمل ضيمي والصارلي لان هو يشم الهوى .
لو لازميه ذيج المرة يمكن هم مارحموه ..
بقيت ادعي ربي يحفظه ولايشوفني بي هيج يوم ..

طر الفجر وهي على فد بجي وونين ..
شافتني تهسترت ..
" انت انت الفتنتي عليه مووو انت الگلتيلهم حورية ماهي "

گامت تحجي وتصيح عليه ..
" لا مو اني والله مو اني جعمقة هو الشافج من رجعتي اني بالي يمج اصلا همة شبعوني ضرب عبالهم اعرف مكانج "

مااهتمت الحجي وبقت تصيح وتبجي ..
وصارت تدگ على صدرها " موش حورية بنت الفلاحة مثل مايگولون اذا مااخذ ثار علي منهم .. اخليهم يتندمون جيف ماكتلوني وياه .. يالشيخة الا اخليج تتحسرين على الشيخة مالتج .. اراويج حورية شتسوي"

جانت تهدد وتتوعد بگلب محروگ ..
الى فقدت فد مرة .. وكعت وماتتحرك ..

گمت من مكاني امشي على كيفي .. احرك بيها ماتتحرك
كمت ادگ بالباب ..
" بلبل افتح وينك بلبل تعالوا شوفوها وينكم "

انفتحت الباب ..
تراجعت لورة ..

دخل بلبل ووراه الشيخة :
" شبيج دوهنتينا كلشي مابيها عيارة نسوان .. جب عليها ماي بارد خلها تصحى "

جاب بلبل ماي شمر عليها .. صحت بس ماوعت بقت نايمة بمكانها وتون ..

حجت الشيخة :
" صيري عاقله يحورية ولاتتسودنين .. مال موت ماارحمج واخليج تموتين .. بس راح انطيج التستاهليه
التزوجتيه بعد ماله وجود انسيه فكري بروحج منا وغاد"

//// البارت الثامن /////


كـل شئ ممكن ان يتغيـر ..
لأن الامور لاتأتـي على هوانـا دائمـا !!
‏______________________________

دخلت عليه الشيخة وياها الحبوبة مثل مايسموها ..

" گومـي خلـي تشوفج صارلج شگد ومامش فرخ "

هالمرة جنت حاسة ماكو شي لان ماحسيت مثل ماجنت حامل برضوان والجاهل الثاني الوگع مني ..

فحصتني وكملت ..
باوعت للشيخة وهزت راسها بمعنى ماكو ..

حسيت بفرحة ماتنوصف يمكن هاي اول فرحة احسها من اجيتهم لسا ..

الشيخة ضاج خلگها ..
اشرتلها تطلع .

اتقربت الي .
" هم تاخذين شي من ورانا "

رديت " شاخذ مااعرف شي "

ردت " لجن ادري بيج مدهربة وشيجي ببالج تسوين عبن لو دريت تاخذين شي ماارحمنج واخلي ايامج جهنم حمرة "

طلعت وعافتني ..
كمت عدلت فراشي وطلعت.. وبداخلي احجي لجن هي حياتي جحيم ان حبلت او لا ..

اهون عليه اعيش بهالجحيم ولا انحرم من ابني مثل رضوان ..

طلعت صارت بوجهي رضية وجانت تتبسم يمكن عرفت اني مو حبلة ..

رحت للمطبخ سمعت الشيخة تصيح فهيمة..
مرت من يمي ركض ..
" اي شيخة اجيت اجيت "

بديت بشغلي مثل كل يوم نظفت المطبخ وطلعت للساحة اكنسها والممرات ..

شوية واجت فهيمة بيدها گلاص ..
" هاج اشربيه كله "

سألتها " شنو هذا ؟"

ردت " اعشاب فورتها والشيخة تگول تشربيه كله الصبح وبالليل "

قربته من حلگي حار وريحته مو طيبة ..
رجعته الها :
" شنو هذا مااريده مو طيبة ريحته "

ردت " هجم بيتج وشبيها ريحته اشربي اشربي "

صفنت عليها ومترددة :
" دشربي يحظي لاتخافين موش سم هذا دوة دوة "

" المن دوة اني مو مريضه ؟ "

" موش مريضة بس فارغة .. نريد بطنج تنترس "

" شنو فارغة "

صاحت " لاتسودنيني بس تتسألين اشربي كله جدامي هسا وفضيني وراي شغل الحد راسي مااضل وياج "

كطعت نفسي وشربته كله لمن اختنگت ولعبت روحي من الصبح حتى اكل ماماكلة ..

طلعت الشيخة من غرفتها ..
" هااا شربته ؟"

ردت فهيمة " اي شيخة شربته "

هزت راسها " وقبل لاترحين بالليل هم سويلها تشربه وجدام عينج "

ردت فهيمة " اي شيخة من عيني "

سألت " وين بلبل خله يروح الخاجية يگللها شني عندها جديد تجيبه باجر وتجي لجن عندنا عرس اثنين من ولد الشيخ مرداس واريدن كلشي من الغالي "

راحت فهيمة صاحت بلبل حجت وياها الشيخة وفهمته وراح ..

اشرتلها " خلي جعمقة يروح وياه خافن يتيه الدرب "

لليل اجتمعت الشيخة بولدها كلهم ونسوانهم ..
كلهم سطرتهم گبالها وحجت :

" اني گلتلكم الزوم نزوج فرج وبلبل لجن كبروا ونريد نشوف بزرهم ويكبرون وياهم .. واني مااريد غريبة بعد تخش حوشي اريد واحد ياخذ من الثاني وعبن فرج ومنيرة متگاربين بالاعمار گلت ازوجهم .. وبلبل ياخذ جورية وواحد يجبر خاطر الاخر "

انتفضت رضية " منيرة جبيرة على فرج بدال ماتشوفيلها شيخ يليگ بيها تنطيها الفرج "

رد حطاب بعصبية " وشبي فرج مو ابن شيوخ مو جده شيخ وين تلگه احسن من ابن عمها يصونها ويستر عليها"

ردت رضيه " مابي شي بس بنيتي اكبر منه "

رد " الفرگ سنتين بينه وبينها وهو خشن ومبين اكبر منها وان مارضيتي فالحجي بيد الشيخة موش بيدج وابن عمها لو ماخذاها ينهى عليها ويوگف قسمتها "

باوعت رضية الموحان :
" شو ساكت ياابو رضوان شنهي ينهى عليها ويهدد وانت والشيخة ساكتيله "

صاحت الشيخة :
" الحجي مو بكيف واحد منكم الحجي بيدي واني گلت فرج ياخذ منيرة وبلبل ياخذ جورية ورحيم من هسا اكلكم الحمدية بس يكبرون شوية هم ازوجنهم من وغاد بنت العم لأبن العم والمارضيتن ينهى عليها ويوگف بختها "

كلها سكتت من بعد حجي الشيخة .. رضية جانت ماراضية بناتها ياخذوهن ولد سمرة ..

بس بعد ما خلصت الشيخة .. طلعتهم كلهم وخلت رضية يمها .. مااعرف شحجت وياها بس طلعت رضية قانعة وراضية وهي تحجي بالعرس قبل سمرة ..

وبدت تختار اكبر واحسن غرفة بالحوش البتها ..

كملت شغلي وردت ادخل للمخزن ..
شفت حركة ورى البيت ..

اخذت الفانوس اباوع شفت بلبل .. استغربت
" بلبل شعندك گاعد هنا "

رد " مااريد اتزوج جورية مااريد اتزوج عبن جورية اخية الي موش مرة "

اتنهدت " بس جورية حبابه وفقيرة وهسا تحبك ويصير عندك جهال منها "

رد بعصبية " اني مااريد جهال.. اني احبنج الج اريدن اخذج وتجيبين جهال وماتبجين على رضيوي مااخذه منج مااخذه دوم "

من سمعت حجيه انصدمت :
" بلبل مايصير تحجي هيج لو سمعوك يكتلوك ويكتلوني .. اني ماخذة موحان مايصير اخذ غيره حرام وانت الله يغضب عليك لو حجيت "

هز ايده " انت ثولة ثولة هو مايحبج ويطگج وطلع دمج واخذ منج رضيوي اني جنت احبه وكمت اكرهة اكرهة وانت هم بعد مااحبج ولي من جدامي "

دفعني وراح .. حسيته ضاج وانقهر بس هيج احسن اله والي خلي يحسني مااحبه ولا اريده حتى مايفكر بغير شي .. رغم اني احبه اكثر واحد بالبيت من بعد رضوان وليدي ..

رحت للمخزن نمت ..
قريب الفجر اجاني موحان هو هذا وكته لمن تنام رضية يله يجي خاف تحس عليه .. وهي نومها ثگيل ماتدري بي لو طلع ..

دخل موحان جنت عالگة الفانوس ..
اشرلي ..
" جيبي هالفراش خليه بصف فراشج واحد مايكفينا "

استغربت مو عوايده يطلب فراش هو دوم مايبقى نص ساعه ويروح ..

بس هالمرة من كمل بقى نايم يمي .. عيني ع الوكت اريد اگوم اسبح گبل الاذان واصلي ..

سألني " شعنيلج انه "

سكتت ماعرفت شرد ..

باوعلي " شتهيسين من اتگربلج "

سكتت

" ماتحجين شمالج "

رديت " مااحس بشي "

سأل " عبنج حيوانة ماتحسين .. تعرفين لو اشوفج تحبيني وترضيني وتتدلعين وتلبسين وتغويني جان خليتج مرة الي مو جارية وفصلية عندي.. لجن انت ماتفتهمين وبيدج تبعديني عنج .. "

دار وجهة ونام " گبل لايطر الفجر گعديني انام بحجرتي "

اول ماخله راسه على المخدة نام ..
گمت بسرعه حميت ماي .. وبقيت بالمطبخ كاعده مااريد اروح يمه واسمع شخيره واشوف شكله ..

يسألني شنو احس .. واني من اشوفه جن شايفه
جلاد وقاضي وسجان ..

المشاعر اليقصدهن احسهن محرمات عليه .. محسيتهن بس وي مهران وراحن وياه ..
واني مغصوبة على موحان والمشاعر ماتجي بالغصب ..

سبحت واجيت اصلي دعيت لليوم الانجمع بي وي ابني رغم احنة اثنينا ببيت واحد ..

من كملت گعدته مرة مرتين ماكو .. اخر شي هزيته بطرف اصابعي فز وصاح بيه ..

" وثول شمالج هيج تگعديني حسبالي شو شني صار "

گام وهو يدردم مثل عادته ..
نمت بفراشي ..
صارت عيني على فراشه .. گلبته ونمت ..
غفيت وماحسيت بروحي الا فهيمة تگعد بيه ..

" گومي يالمسعده طلعت الشمس وانت نايمة "

فزيت من نومي ..
شفتها واگفه فوگ راسي ..
" شنهي هذا الفراش جنج وگعتي عمي موحان بحبالج وطيحتي بحجرج "

گمت عنها لميت الفراش وخليته على جهة وصفطت فراشي وطلعت ..

رحت وراها للمطبخ ..
اشرتلي ..
" هاج اشربي "

رديت " تلعب روحي منه "

ردت " مو بكيفج سمعتي الشيخة شحجت تردين امشي حاجيها الها .. جازحة نعمتج من ايدج المثلج اترس الحوش فروخ واكوش عليه "

اخذته منها بدون مااحجي . بالگوة جرعته طعمه مو امر من المر العايشته ..

اندگت الباب اجت خاجية من الصبح ..
عرفتها من صوتها ..
" صباح الخير يااهل الحوش يبنات الشيوخ اجتجن خاجية جايبتلجن كل مالذ وطاب "

من اسمع صوتها اتذكر مهران ..
اجت فهمية ..
" سوي ريوك الهاي جنها جاية بلاية اكل وتتأمر عليه اظنها شايفتني اشتغل عند الخلفوها "

صارت تحجي وتشتغل وضايج خلگها من خاجيه ..
سويت ريوك ..

اخذته الها ..
شافتني اشرت " رديه للمطبخ واني جايتج .. وانتن اعله كيفجن اخذن اليعحبجن "

رجعته للمطبخ اجت وراي .. شافتها فهمية طلعت :
" عود ديري بالج اعلة الجدور اني رايحة اشوفن الشيخة "

رحت اگلب بالگدور ..
همست .. اخيج مابطل يجيني ويسأل عليج .. لويش هنا ضالة ماتهجين وياه شنهي عاجبتج الخدمة عند ربحة الظالمة "

استغربت " اخوي شوكت اجاج "

ردت وهي تاكل وعين علية وعين على الباب ..
" مو دوم بين وكت وكت يجي وجابلي فلوس "

طلعتهن من جيبها.. " هاج .. وگالي لونها بيوم تريد تهج ماتضل بالسلف كله تركب وتروح البغداد وخلالج هذا المكتوب بي مدري شني يمكنه مكان تلگينه بي "

ايدي گامت ترجف .. لزمت الورقة بيدي فتحتها ماعرفت شمكتوب بيها مااقرأ كلش اني .. والفلوس هم اخذتهن .. جنت خايفه اخذهن لو لگاهن واحد يمكنهم يكتلوني ..

شلتهن بسرعه ولفيتهن وخليتهن بجواريبي .
وگلتلها :
" لو اجاج بعد خله لايجي .. لو شافوه يكتلوه وانت هم وياه "

هزت اديها " وخاجيه شعتدها تخسره عبن اني اعرف شني ربحة من اول مااجت للسلف .. ادريها ظالمة لجن من لاجارة اجيهم حتى الم رزقي .. ولو ما اعرفها ظالمة مارضيت اعاون اخيج واعاونج .. وانت امرج محيرني شني المخليج مجلبه هنا "

سكتت ماحجيت ..
كملت نكثت اديها وكامت ..
امشي اني وانت ضلي لمن تهدرين روحج وتموتين خدامة عندهم ..

طلعت من المطبخ .. اجت فهيمة ..
" هاي خاجيه ينخاف منها مااحبنها لجنها لسان وملعبة خو ماگعدت تبوگ حجي منج وتنشر بالسلف الشيخة ماترحمج لو درت "

رديت " هو اني شنو اعرف حتى احجي وشعرفني بيها"

ردت " اي لجنج السانج مگصوص بس وياي يوم سألتج عن الشيخة شني حجت والمن تزوج فرج ماحجيتي تاليتي اسمع من الفلاليح الشيخة ناهية على بنات عمي موحان الويلاد حطاب "

ماحجيت سكتت ..
بقت تحجي وحدها وتندب حظها ..
" امداه حظج يرملة هالفرج راح ياخذ منيرة ورحيم الحمدية .. لجن ماضل بس عيد وهذا صغير عمره خمس سنين "

عفتها وطلعت .. شفت خاجية تلم بغراضها .. ورضية تجيب وتخلي بحظن منيرة ..

اما جورية جانت صافنه وماتعرف شتختار .. بعد مااخذت رضية الحصة الاكبر ..

انفتحت الباب ودخلت حورية ..
الكل انصدم بشوفتها .. من راحت لليوم مااجت بعد ..

جانت لابسه لون غامق من يوم السمعت بكتلت علي مالبست لون فاتح ولو ماخوفها من حجي الناس جان لبست اسود ..

تلگتها خاجية " هلا بحورية احلى وحدة بالسلف .. من بعد هالحليوة هاي وباوعتلي "

ضاجت الشيخة ..
" يله يخاجية لمي صررج وغير مرة اودي عليج "

صاحت حورية " لا ليش تروح لجن اخيتي بعدها ماخذيت اليليگ بيها .. هاي جورية بت الشيخ مرداس مو شوية "

اشرت الخاجية " افتحي صررج يخاجية "

ردت خاجية " افتحهن شوراي ولو اني ماخذة اعله خاطري منج .. لون سمعت عرستي ومادريت "

ردت حورية " حگج خاجية حگج عبن تدرين سنة رضيوي مادارت وماسويت عرس تعوضيها بعرس فرج وبلبل "

گعدت حورية تختار الجورية وجوري تضحك وفرحانة وتاخذ وتخلي على جسمها وتأشرلي ..

" مة مة حو حو "

يعني " مرة مرة حلو حلو "

صرت افهم كم كلمة منها واعرف شتقصد ..

ابتسمت الها وهزيت راسي جنت واگفه بعيد اني وفهيمة ونباوع ..

والشيخة ضاج خلها وجن حورية تتعمد تسوي وياها هيج ..

كملت .. طلعت جيس من صدرها وانطت فلوس الخاجية ..

ماخلت الشيخة تدفع.. وهالشي زاد غضبها للشيخة
لان قللت من قدرها كدام خاجية ..

طلعت خاجية ..
صاحت الشيخة ..
" حورية شني گصدج من عملتج هاي "

ردت " وشني السويته شيخة اخيتي واريد افرح بيها لاهو حرام اشريلها مني ولا هو حرام افرح بيها "

ردت الشيخة :
" ماهو حرام بس جنج تتعمدين تكسريني وتهينيني جدام الخدم من يمته وانت تدفعن فلوس وانه موجودة
نسيتن انه شنو ومنو .. حورية جري عدل وياي لا….

قاطعتها " لا شنو شيخة .. شتاخذين مني بعد ماخذيتي روحي "

باوعت الشيخة النا وصاحت ..
فهيمة خشن جوة ولاتطلعن ..

راحت فهيمة للمطبخ وبدت تحوس وتروح وترد ..
تريد تعرف شني البينهن وليش حورية هيج تحجي وي الشيخة ..

بس الشيخة ماخالتها تسمع واخذت حورية للغرفه
وماعاد سمع احد حجيهن ..

شوية وسمعنا انطبگت الباب حيل ..
اجت جورية ..
تأشرلي ..

رحت وراها للغرفه ..
جانت تباوع للقماشات والغراض الاشترتهن من خاجية
سفطتهن الها بصندوگ جبير من خشب مخليه بي غراضها .

طلعت صارت عيني بعين الشيخة ..
صاحت ..
" رضية حجرة جورية وحورية وصن الزلم تجي تفرغها لجن راح تصير البلبل وجورية "

يمكن سوت هيج عناد بحورية لان كالتلها هالغرفه ارجعلها من اجيب لاعبالج اضلن عد العبد مالتج .. ولاعبالج يصير رجلي راح يبقى دوم خدام ومايخلي راسه براسي ..

جانت الشيخة طول النهار هادية ورغم حجي حورية عليها بس هي سكتت ..
وكأنه الهدوء ماقبل العاصفة ..

لليل اجو كلهم .. خلت العشا فهيمة وراحت البيتها ..
بعد العشا..
صاحت الشيخة " بلبل روح جيب حورية خلها تجي اريدنها بشغله ..
وانت يافرج روح الجعمقة كله ينده الحبوبة "

جنت اغسل ماعين ويمي منيرة تسوي فوح الرضوان
سمعنا صياح..

راحت منيرة تركض ..
جان صوت حورية .. تبجي وتتوسل بالشيخة..
" شيخة ابوس رجلج لاتخليها تجيسه وبعد ماتسمعيلي حس والترديه يصير "

ردت عليها " طالع حسج يحورية ونسيتي اني منهي وانت منو . واذا مااكسر خشمج ماتنعدلين "

ردت " انعدل والله انعدل واذا شفتي مني شي سوي الترديه "

ردت الشيخة " تنسين ذاك المايتسمى ومالج رجل بس جعمقة "

جانت حورية مستعده كلشي تسوي بس ماتخليها تسوي شي للجاهل . عرفت الشيخة شلون تلزمها من ايديها التوجعها .. من هيج جانت سكته طول النهار وماتحجي لان تعرف نقطعة ضعف حورية .

حورية الطلعت مكسورة من بيت ابوها .. حتى اخوها من راد يدافعلها لزمته سمرة ومارضت خافت عليه وعلى ولدها من غضب الشيخة ..

اجت منيرة..
اخذت مني الفوح وراحت .. جنت متمنية تكلي تعاي انت اخذيه شربيه ..

انتهى يومي كـ عادته ..
بت اتفقد البيت كـ طفل يبحث عن حنان امه ..

تاخذني رجلي الغرفة منيرة وارجع اخاف احد يشوفني
رحت للمخزن سمعت همس وحجي ..

استغربت .
اتقربت يم الحمام القريب على باب البيت.
هذا صوت الشيخة ..
تحجي وي جعمقة .. " اسمع تخلي عينك عليها لجن ماادري شيدور برايها .. وانت ماتتگربلها دوم لين تجيب وتحل عليك .. لجن اني ملجتلكم عن حجي العالم وحتى تنجبر تروح وياك الحوشكم .. لجن مايجوز تملج عليها وهي حبله وهي جاهلة ماتعرف بهالسوالف لو عرفت جان لگتها حجة ومارضت تملج عليها وننفضح بالسلف كله "

رجعت على اطراف رجلي للمخزن .. اي المخزن اسميه لان لليوم ماحسيته بيتي ولا هالغرفه غرفتي ..

كعدت بفراشي وافكر بحجي الشيخة شتقصد من تكله مايجوز تملج عليها وهي حبلة . مو اجه الشيخ وملجلهم ؟؟"

دخت ومافهمت شتقصد بس العرفته بيها وبين جعمقة اتفاق وحجي وهو بس يكلها تامرين شيخة .. اي شيخة
.. التريديه اسويه شيخة ..
مايوم گالها لا ولا يوم طلع عن شورها ..

نمت بسرعة لان اعرف اذا اجه موحان يحرمني النوم ..
تذكرت الفلوس والورقة ..

اخذتهن من جواريبي ..
جنت خايفه لحد يشوفهن .. فتحت المخدة وخليتهن بوسط المخدة بين الگطن ..

بس ماعندي خيط اخيطها خليتها للصبح .. فزيت
شفت جاي ..
خليت المخدة بسرعه وبقيت صافنه بوجهه ..
" وين الفراش كم مرة گلتلج تحضرين الفراش قبل لااجي "

ركضت جبته خليته وعيني ع المخدة السحبها وگلبها
خفت يشوفها ويكتلني ..

كملت فراشه :
" يله عمي كملته الك "

باوعلي من فوگ لجوة ..
" خليني هنا مرتاح .. يلة اريد تونسيني اليوم لان تعبان وضايج خلگي "

بقيت واگفه بمكاني مااعرف شيريد ..
اشرلي
" بساع فضيني شنهي واكفة تردين اخذلج اصور "

اخر شي شاف مابيه نتيجة..
اشرلي " تعاي لجاي تعاي عبن انت مابيج خير لا بيض الله وجهج "

مثل كل مرة اتحمل غلطه وسوالفه واسكت ..
كمل وبقى نايم بمكاني واني بقيت بمكانه كاتلني الخوف .. كلما تاخذني الغفة افز .. ماحسيت بطعم الراحةكمت سبحت ورديت نمت ونام بمكاني ..
فزيت الصبح ماهو بمكانه .. فتحت المخدة بمكانهن موجودات
غطيتهن بالبطانية وكمت ..

جان البيت هوسة ..
شافني بلبل اجه " غطي روحج غطيها هنا ازلام "

جان داير وجهة عني ومايحجي ..
سألته " انت زعلان ماتحجي وياي "

رد " مو وكته مو وكته . امشي للمطبخ بساع امشي "

عافني وراح يمكنه زعلان عليه..
جان فلاليح ينگلون بالغراض ويعدلون الغرف ..

لفيت وجهي ورحت المطبخ .. لكيت فهمية تتريك

اشرتلي " وينج كم مرة طرشتلج بلبل عبن ان من الصبح اجيت وانت ماخذتج النومة .

غسلت وكعدت يمها شربت بس جاي ..
سألتني " شنهي الصار ماصار وراي "

رديت " ماكو شي "

هزت ايديها " واني الفطيرة اسألها عبن ادريج ماتحجين خوينسة "

سكتت ..

رجعت سألت " شنهي الصراخ بالليل زلمتي سمعها يكول نسوان تتمالخ بينها "

يمكنه يقصد صوت جورية ..
رديت " ماادري ماكو شي بالليل "

ادري ماصدگتني وبقت كل شوية تسأل شي واني ساكته .. لو الهي روحي بالشغل حتى ماتسألني اخذت منها مخيط ..
ورحت خيطت المخدة.. سألتني شتسوين بيهن ؟؟

كلتلها اخيط فراشي قديم وطالع الگطن منه ..

البيت مافرغ طول اليوم تعبنا .. نشيل ونخلي احس ظهري موتني ..

جورية فرحانه وماتعرف شنو السالفه المهم عندها صندوگها محد يوصله ..
بعكس منيرة الجانت ضايجة ويمكنها انجربت عليه بس رضية جانت تجيب وتخليها ..

كملوا كلشي بكم اسبوع وصار موعد الزواج .. والشيخة عزمت هواي ناس ..
ومنهم دنانير ومهجة .. اجت مهجة من بعد اشهر من زواجها .. هاي اول مرة تجيهم ..
جانت رافعه خشمها والگاع ماتشيلها ..
جاي وياها رجلها وبنات دنانير ورجلها الشيخ ..

الشيخة حارت شسوت وشطبخت حتى ترفع راس بنتها
الديوانية البره فرغتها للزلم .. والبيت للنسوان ..

اني وفهيمة مانلحگ .. اجت ويانا رملة وكم مرة من السلف جابتهن فهيمة على معرفتها ..

رملة جانت ضايجة وتتذمر وتحجي على منيرة ..
" شوفيها عبن جنها واوي شكلها يخوف يمكنه بليلة العرس يشرد منها "

بعدين دارت على جوري " لو هاي المسودنة راح تعرس ورملة ضالة لو مخليه بلبل ياخذني ولا هالعيشة "

جنت استمع الها بس مااحجي..
اباوع الجوري واضحك جانت فرحانه وهي ماتعرف شنو العرس بالاصل ..

الشيخة وصت الاكل يصير بغرفتها الدنانير وبناتها ومهجة ..

وديت الاكل لهناك ودنانير ماشالت عينها مني ..
" ربحة منيلج هاي البت اول مرة اشوفها جنها موش منا "

هزت راسها ربحة :
" هاي الفصلية الاخذناها الموحان "

ردت :
" يافلك ياموحان .. ماتشوفيها بكبر بناته "

ردت ربحة :
" جنج نسيتي عاداتنا يدنانير "

اتنهدت دنانير :
" لا وشلون انسى عاداتكم يوم هديتوني الشيخ اكبر مني ومااعرفه ولا شايفته "

ردت ربحة " شنهي بعدج ضايجة اعله هدوتج للشيخ
لجن لو ماهالهدوة ماجان وصلتي للوصلتيه اللزوم تتشكرين منا مو تلومينا "

ردت دنانير :
" حجايتج عدلة يربحة لجن انت ماتغلطين دوم .. وهالتشكرتج وخذيت بنتج لوليدي . وبنتج صارلها شهور عندي ولسة ماشالت الزوم تشوفيلها حل لجن اني ماانطر والشيخ ماتعرفيه يريد يترس البيت ولد وعزوة مثل ماانتي تريدين "

ضاجت ربحة وفرغت غضبها عليه:
" يله فضينا صار ساعه جاعدة تتسمعين علينا امشي ولي منا لا بيض الله وجهج "

جنت كاعده اسفط الاكل اليجيبنه النسوان للغرفه ..
عفتها ومشيت ..

صار بلبل بوجهي جان ماخذ على خاطره مني بعده..
صحت وراه ..
" بلبل شنو بطلت تحجي وياي جنك كرهتني "

رد " اني ماكرهتج ماكرهتج بس مغثوث مغثوث من روحي "

" ليش باجر عرسك ولازم تفرح "

" بس اني مااريد اعرس مااريد وهاي جورية فرحانة واني مو فرحان .. وعمي موحان وعني منهل يتمضحكون عليه ويعلموني سوالف ضوجوني ضوجوني "

" دير بالك على جورية خطية وحبها مثل ماتحبني وانت راح تبقى دوم فرحان "
هز راسه وعافني حسيته ماراضي ولا مقتنع ..

لليل فرشنا شكو غرفه فارغة ورتبناها لليباتن ..
ارتاحيت هالفترة من موحان ..
واصلا اني هالفترة اجي اخلي راسي على المخدة مااحس بروحي من التعب كبل انام ..

ثاني يوم طلعوا بليل و فرج لابسين لبس عربي ..
من شفت بلبل ماعرفته طالع حلو وشكله متغير مو جنه ذاك بلبل الدوم مخلي دشداشته بحلگه ويركض من مكان المكان ..

بقوا الزلم برة مانسمع بس التفگ والهوسات ..
اما احنة .. من الظهر بثينة عدلتهن ولبست بدلات بيض وكعدن والنسوان تجي من كل مكان ..

البيت هوسة صار ومانلحگ .. كل شوية اجي اباوع واروح اكمل شغله..

جان البيت هوسة ..
ولو اخذت رضوان وطلعت محد يعرفني .
هالفكرة مااعرف شلون اجتني بساعه عجز من غير ماافكر بالعواقب حتى اهلي مافكرت بيهم المهم وليدي يرجعلي ..

مشيت للمطبخ وافكر شلون اخذه .. كمت اروح وارجع
مرات الگيه بحضن حمدية ..

للمغرب صارت هوسة الطبخ والعشا ..
رحت للغرفة ..
شفته نايم ..
شلته على كيفي وشميته حيل ..
" من اليوم بعد مانتفارگ ابد "

اخذته بسكته للمخزن .. فتحت المخدة وطلعت الفلوس والورقة خليتهن بجواريبي ..
ولبست هدوم هواي ولميت صرتي ..
جبت وياي خمار وعبايه من غرفت بنات موحان..

لبستها وشلت رضوان لفلفته وطلعت ..
البيت هوسة محد يعرف الثاني .. نسوان السلف تارسات البيت لمن يتعشن ويشبعن يله يمشن ويمكن هالفرصة اجتني من السما ..

جان كلبي يدك مثل دك الطبول بالحروب ..
الخوف ماخذني ..

طلعت من البيت واباوع الجهة الديوانية او المضيف مالتهم جان ملينا زلم ..

مشيت كم خطوة واني مامصدگة بروحي طلعت واخيرا مرمر راح تخلصين .. راح تنجمعين بأبنج وماتفارگيه ..
راح تنسين ماضيج كله وتبدين من جديد ..

خطوات قليلة بعدتني عن البيت . ماحسيت الا واحد يصيح وراي ..

اوگفي انتي ياهي وشني هذا الجوة كترج ..

غمضت عيني " هذا صوت جعمقة شلون وشوكت شافني .. معقوله خوفي خلاها يكشفني "

اتقرب مني " طلعي هذا الجوة كترج شنهو "

رديت " ابني هذا استبرد واريد اخذه الحوشي "

رد " ياحوش منهن .. هو انت عندج حوش غير هنا "

درت وجهي .. ماعرفت شلون كشفني ..
اتفاجأت من شفت حمدية وياه واگفه .

" شنهي تردين تبوگين اخوي وتشردين وعبالج ماانكشفج "

من شفتج طلعتي من المخزن تتلفتين ومخليه جوة كترج شي . عرفت راح تشردين وماهتميت بس تذكرت رضوان وشفته ماهو عرفتج اخذتيه .. عبن شفتيها هوسة كلتي محد يكشفني بس جانت الشيخة تعرفج الهيج وصتني مااشيل عيني عنج .. ووصت جعمقة مايفارگ البيت . همزين من طلعتي اشرتله واجاني بساع وكضيناج لون ماندري بيج جان اخذتيه ووليتي ..

غمضت عيني ووكلت امري لله لان اعرف ماراح تعدي هالسالفه على خير ..

اتقربت مني . اخذت رضوان ودخلت ..
واني بقيت حايره بمكاني ماعرف شسوي ..

اشرلي ..
" احمدي ربج جيف هوسة وعرس .. بس احسابج تاخذيه من الشيخة باجر . خشي جوة ولو طلعتي لاتصدگين تبقين عايشة .. وين ماتولين تجيج جيلة بمجانج "

رجعت للبيت ارجف .. وين اروح وابني هنا .. جن مكتوب عليه ابقى هنا العمر كله . شلون تسرعت وسويت هيج.. شلون فكرت ممكن يغفلون عني والگيعان كلها حرس ..
اول مرة بحياتي اتشجع واخذ قرار تالي هالقرار راح يكلفني هواي ..

رحت للمطبخ بقيت كاعده والخوف ماخذني .. صار الليل وزفوهم للبيت بهوسات وجيلات ..

جانن كل وحدة بغرفتها كاعده .. دخلوا فرج بالاول الغرفته ووراه بلبل الغرفه جورية..

حورية حانت حاضرة بس ساكته وماحجت ابد ..
والشيخة علنت عن حملها من جعمقة كدام الحاضرين

اهل السلف كلها راحت لبيوتها وبقوا بس عمامهم والقريبين عليهم ..

شوية وطلعت جورية من الغرفة تركض وتصيح ..
ومانعرف شبيها ..
وبلبل يركض وراها " جورية تسودنت جورية تسودنت"

وهي تركض وهو يركض وراها ..
ضحكت دنانير ..
" شحصلتي يربحة من عرستيهم هالتشوفيهم عقلهم مثل عقل الجاهل "

صاحت بيهم الشيخة وگفوا ..
" روحوا الحجرتكم ومثل مافهمتك بلبل صير رجال "

رد " شيخة هي تسودنت ماتخليني ابدل ضربتني وتصيح وتطردني تريد الحجرة بس الها "

صاحتها الشيخة ودخلتها للغرفه وتحجي وياها ..

شوية وطلعت باوعت البلبل ورجعت للغرفه من غير حجي بس جنها خايفه ..

اشرت الشيخة البلبل راح وراها .

نظفنا وكملنا البيت كله النص الليل واني گلبي يدگ مت الخوف هدوء الشيخة مايطمن وماعرف شناوية ..

بيومها فهيمة وبنتها نامن يمي بالمخزن .. لان مايكدرن يرحن ويرجعن الصبح والفجر مابقاله كم ساعه ..

كل وحدة اخذت فراش ونامت واني بقيت مالي مكان
والتفكير ماكلني ..

مر يومين ومحد فتح الموضوع وهالشي يخوفني اكثر
فضت العالم ودنانير اخذت مهجة وعائلتها ورجعوا المحافظتهم ..

هدأ البيت ..
جانت منيرة رغم رفضها بالبداية بس بعد العرس جانت مبينه فرحانه ..

اما رضوان فحمدية الصارت تربي مو منيرة ..

جنت بالمطبخ اجت فهيمة ..
" الشيخة تريدج "

من گالت هيج ارتبكت وطيحت الجدور كلها بالكاع
صاحت " شمالج يالغبرة عطرتي الجدور كلها "

مشيت واني ادعي بداخلي .. خايفه ومااعرف ليش سكتت ثلاث ايام وشناوية ..

وصلت الساحة البيت .. شفتها واگفه ..
اشرتلي البسي وتعاي وراي ..

رحت للمخزن لبست واجيت وراه امشي ..
مااعرف وين ماخذتني الدنيا بعد ..

هي تمشي واني وراها ..
اخذتني المخزن العلف الي خلوني بي اول مااجيت ..
شفت جعمقة واگف يم بابه ..

تراجعت ..
" شيخة مااسويها بعد والله مااسويها "

اشرتله ..
فتح الباب دخلت ..
واجه الي كلما ارجع لورة يتقدم اكثر ..
سحبني حيل وشمرني بالمخزن ..

اشرتله " اشعل الضوة "
شغله ..
راح جاب سطل ماي جبير واجه ..

شفته انصدمت " شيخة شتسوين بيه تردين اكتليني بس لاتعذبيني تعبت والله تعبت "

ردت " ليش هو انت شفتي شي .. اريد اتوبج حتى ماتغدريني بعد ولا تفكرين تشردين .. شنهي حسابلج ربحة شوية .. ولج يالغبرة اني من العيون اعرف الگبالي شيفكر .. ومن شفتج تفترين وتحومين على غرفه البيها رضوان عرفتج ناوية على مصيبة .. انت ردتي تبوگين ابن الشيخة ربحة واني الياخذ مني شي اخليه يتمنى الموت جيف بعد ابنها وانت شفتي يوم خذيتوا رضيوي شسويتلكم .. وهسا جايه تردين تاخذين ابني .. بس انت ثولة وعوبة لجن عبالج تكدرين تطلعين منا مثل ماخشيتي "

اشرت الجعمقة ومافاد بيها توسلاتي ..
اتقرب مني جعمقة .. وسحبني من شعري وغط راسي بالسطل ..
خلاني جوه الماي لمن گمت ارافس بعد مااتنفس ..
رجع طلعني بعدني مالحگت اجر نفس رجع غط راسي ونفس الشي .. لمن تريد تطلع روحي واختنگ اريد اموت يردون يطلعوها ويردوها الي ..

لا مرة ولامرتين ولاعشرة .. صرت اتوسل بيها تكتلني ولاتعذبني .. بس جانت تستمتع وهي تشوف روحي تطلع وترجع ..
الحد مااختنگت ومابقى بيه حيل بعد اقاوم ..

اشرتله يوگف صرت اخذ النفس بالگوة .. والماي جان برد ثلج احس راسي صار قطعه ثلج ..

ضربتني بعصتها " هاااا بعدج تردين تطلعين وتاخذين رضوان "

هزت راسي وبالكوة احجي .. " لا لا ابد "

ضحكت " وماتكدرين تسويها .. لان لو سوتيها بعد ..
احرگج ومايكفيني بيج الحرگ اشمرج بالنهر واخليج تحسين بنفس الاحساس الهيستيه هسا واكثر بعد ..

حجت هواي وماسمعتها اذاتي بيها ماي وطنين ومنا روحي رايحة..

اشرتله ..
خليها اليوم هنا بالبرد وبالضلمة .. بلكن تعقل وماتكررها

خلوني بيومها بمخزن العلف .. ضگت البرد والخوف والمرض مثل اول يوم اجيت بي ..

عرفت من يومها انه اني حياتي انتهت وماينفع بعد اقاوم الشي مايصير ابد ..

وحدة منهن لو ابقى خدامة الهم عمري كله لو اموت بأبشع صورة وارتاح ..

مرت الايام كالاشهر والاشهر كالسنين .. والسنين كـ عمر بحاله ..
والغريب انه من سنة 1967 لحد سنة 1970 ماصار عندي اي جاهل ..
لكن موحان مامل ولا تعب من افراغ نزواته الحيوانية
كانت غايته امام الشيخة هو الطفل اما بالحقيقه فأن غايته هو اشباع غرائزه لااكثر ..
في نفس هذا العام عادت لي نفس الاعراض والالم ..
ماحكمت الله ولما دعواتي استجابت لمدة ثلاث سنوات فقط .. كل ذلك كان بأرادة الله وحكمته ..
خبر كان مثل الصاعقة لي .. لكنه فرحة بالنسبة لغيري ..


#يتبع… ..