2.مؤسسة منبريون لنشر القصائد🧿

#قصائد_محرم_العشرة_الثانيه

#مـۄسسـﮫ_مــﻥــبـريۄن_للالـﺢــان

الناشر.احمد.الـــزوار.cc

ــــــــــــــــــــــــــــــــــــــــــــــــــــــــ

((آهات الرباب مع ولدها) )

بعدنه بأول المشوار
توه اعله الجفن خضر سهر ليلي
بعدنه وشو صرت تذكار
يل المفطوم يبني أنته لوليلي

يما تدري العشگ ذابح نياط أمك
على احبالي يعبدالله كتبت اسمك
يالمطَشرّ بروحي السهم لمك
يبو ثوب الزغير وبَللا دمك

يامن على الدنيا هجر
يالماخذ سنين العمر
يا أترف واجمل عشگ
مختنگه وعذيبي تمر

أخذني وياك ياروحي
يعبدالله يمذبوحي ..... يعبدالله

***

ما گاداك ابوك حسين
ولا شافك مشيت ولا گلت بابا
يمزيون الجفن والعين
ابوك بحيرته ضل ينعى لمصابا

يالمدلل ذكرتك وآنه عالناگه
وحگ گماطك المحروگ مشتاگه
نار الدمعه من فرگاك حراگه
يعبدالله أشوكت يايمه نتلاگه

بس گلي يمته يالولد
يمشيب عيون المهد
من الحلم ياريت أفز
واسمع يگلولي گعد

وأطيب ويستچن نوحي
يعبدالله يمذبوحي .....،يعبدالله

***

شما جابولي يبني الماي
اركض والمدامع تركض بخدي
أگلهم توه چان وياي
ليش تعوفني ياسلوتي وحدي

حلم ياوسفه ذاك أطلوگي وآلامي
تطَشر بزري وآنه مجمعه احلامي
گدامي أنذبح ياناس گدامي
وآنه أصرخ يضامي والسهم حامي

من شفته سديت النضر
وسنيني أنون للسفر
ياوسفه ياحد العمر
حد العمر يبني أنعبر

وطاحن كلهن صروحي
يعبدالله يمذبوحي .... يعبدالله

**

حلم غافي اعله سطح البال
چبير وأحسب العرسك يالمدلل
وأفزن والگه بيدي احبال
وهلهولت دمعتي صرخه تتحول

ويتبده السهر من عيني وأشكيلك
وأشكيلك يواحد نوبه ألوليلك
وسياط المتن ضليت أوديلك
يمارد گلبي يبني بهيده ودخيلك

ماتسوه أطيح من الضرب
عبدالله بخدوده ترب
هوه الغرب لمن رحت
متعوده يبني بغرب

يروحي للغرب روحي
يعبدالله يمذبوحي .... يعبدالله

***

يبو نحر الترف مشيول
وبرآس الرمح وتماشي خلانك
چبير ويا حلاةْ الطول
چنك والدك هم يابس لسانك

ترفع حاجبك لو شمرو حجاره
وآنه بكلي أباوع يبني محتاره
شسوي والگلب ماتنخمد ناره
وكل لحضه عليك أتوجه زياره

أمك يمر بيها الذبح
عايفني وأماشي الرمح
والضلمه طافت بالنفس
وينك يبو وجه الصبح

ابد لا مابطل نوحي
يعبدالله يمذبوحي .....،يعبدالله

عبد زينب
محمد الابراهيمي

▪️مؤسسة منبريون للالحان رقم 1
@ahmed_alziwar1

▪️مؤسسة منبريون لنشر القصائد 2
@ahmed_alziwar2

▪️مؤسسة منبريون للمقامات3
@ahmed_alziwar3

▪️مؤسسة منبريون للنعي4
@ahmed_alziwar55

(كروب مؤسسة منبريون)

#كروب الالحان👇👇👇👇👇
https://tttttt.me/joinchat/Dw92Dj9pmspR5uHfACGjlA