قصائد حسينية مكتوبه

محرم الحرام ١٤٤١ هجرية
الخدمة الحسينية المقدسة

روحي هواهه بمجلسك
مثـل الـــهــوه تتنفسك

عمري شمع ... يخلص دمع ... يا حسين

…………………………………………………………………………………………………………………………

عايــش بنـعـمــاك يا روح الزچيّه

گلبي طف وروحي كلها الغاضريه

سجّلت عمري بأسم هــاي القضيّه

خدمتك عنواني صـــارت والهويّه

للباري تبقه دعوتي ... وفقني ربي بخدمتي

أعظم شرف ... بيك إنوصف ... يا حسين

…………………………………………………………………………………………………………………………

منبرك يحسين مدرستي وكتابي

والســـواد بمأتمـــك هيبــة ثيابي

من مصابك نشأ بالمهجه مصابي

شما ردت تنطيني يالغالي جوابي

كل عِشره صح زاد وملح ..بس عشرتك دمعه وجرح

أقدس نحر ... بيك إنتصر ... يا حسين

…………………………………………………………………………………………………………………………

مملكة خدّامك تفــوق العنـاوين

بيهه كل الناس تتسمه سلاطين

سنين ناذرهن إلك يا كلّ السنين

يلي دمّك حفظ ماي الوجه للدين

ما بين خِدّامك أحس ... هيبه وسمو عزّة نَفس

من هيبتك ... من عِزّتك ... يا حسين

…………………………………………………………………………………………………………………………

بالوصف يحسين تحتار المشاعر

وبمحرّم بس إلك تحچي الحناجر

والمَيبْچي إعليك شِلّــــه بالنواظر

إنته مو ماضي إنتهى بل إنته حاضر

مستقبل وثارك عدل ... وشلون من عندك أمِلْ

نبض الگلب ... كل الگلب ... يا حسين

…………………………………………………………………………………………………………………………

ألف رحمه اعله المضه بهاي المسيره

خدمتك نعــمــه تـــره ونعمــه چبيره

يلي مجدك ماكـــو بالـعــالــــم نظيره

ومثل ديرةْ كربلــــه لا ماكــــو ديـــره

أُمّي وأَبويه الخدمتك ... نذروني وآنه بخدمتك

كاتب عهد ... ثق للأبد ... يا حسين

…………………………………………………………………………………………………………………………

بلا مجالس بيش أصبّر بالله گلبي

بكل زمان وكل مكان أنطيك تعبي

يا حسين بأمرك وروحـــــي التلبّي

هذا عهدي وهذا عمري وهذا دربي

سادس فرض يا سيدي ... خادم وهذا موعدي

إنته الأمل ... أفضل عمل ... يا حسين

…………………………………………………………………………………………………………………………

بمجلسك كل الشعور بروحي يكبر

أنعه لمصابك وأبچي وأرجع أفخر

آني أدري الطاهره المظلومه تحضر

تسجّل أسماء التخدمك عدهه دفتر

أعظم هديّه ومكرمه ... تسجّلني أُمّك فاطمه

هذا الفخر ... هذا الظفر ... يا حسين

………………………………………………………………………………………………………………
خادم الإمام الحسين عليه السلام
عمار هليل الواسطي
الكوت / ١٤٤١ هجرية

الناشر عباس التميمي
https://telegram.me/aabas78
قصائد لكل ايام محرم اشترك بالقناة👆👆

كروب قصائد والحان منبريه اشترك👇👇
https://tttttt.me/joinchat/AAAAAD7f0FNmkN2JjlNIBw

للتواصل مع الناشر 👈 @Abas747