🇲🇩 Молдова МДҲдан чиқиш жараёнини бошлади — Молдова ТИВ

Кишинёв Молдованинг Мустақил Давлатлар Ҳамдўстлиги (МДҲ)даги аъзолигига асос бўлиб келган учта асосий келишувни денонсация қилиш жараёнини бошлади. Бу ҳақда Молдова ташқи ишлар вазири Михай Попшой Radio Moldova эфирида маълум қилди.

"Ушбу келишувлар кучини йўқотгандан сўнг расмий ва юридик жиҳатдан Молдова МДҲ таркибига кирмайди. Шу билан бирга ташкилотга де-факто аъзолик аллақачон тўхтатилган", — деди Попшой.

"Эҳтимол, феврал ўртасигача биз ҳукуматдаги тартиб-таомилларни якунлаймиз, шундан кейин қарор парламент томонидан қабул қилинади", — дея вазирнинг сўзларини келтиради Моldpress давлат ахборот агентлиги.

Михай Попшой Молдованинг МДҲдаги аъзолигига оид келишувларни бекор қилишини “мамлакатнинг Европа йўналишини мустаҳкамлашдаги муҳим қадам” деб атади.

Мустақил Давлатлар Ҳамдўстлигидан 2008 йилда Грузия, 2018 йилда эса Украина чиқиб кетган эди.

Strategic Focus: LIVE

🇸🇾 Суриядаги қамоқхонадан ИШИД жангарилари қочиб кетди — Reuters

Сурия Ички ишлар вазирлиги мамлакат шимоли-шарқидаги Аш-Шаддада шаҳридаги қамоқхонадан ИШИД террорчилик гуруҳига мансуб тахминан 120 нафар маҳбус қочиб кетганини тасдиқлади.

Сурия Мудофаа вазирлиги жанггариларни озод қилишда курдларнинг “Сурия Демократик кучлари”ни (SDF) айблаб, гуруҳ раҳбариятини маҳбусларнинг қочишига ёрдам бериши мумкин бўлган ҳар қандай ўйламасдан ташланадиган қадамларнинг оқибатларидан огоҳлантирди. Курдлар эса бу ҳодисада Сурия ҳукуматининг ўзи айбдор эканини таъкидламоқда.

Reuters агентлигининг хабар беришича, Сурия Мудофаа вазирлиги қочиш воқеасидан сўнг Аш-Шаддада шаҳрига армия ва махсус бўлинмалар киритилганини эълон қилган. Вазирлик маълумотига кўра, хавфсизлик кучлари 81 нафар жангарини қўлга олган. Қолган маҳбусларни ҳам ҳибсга олиш бўйича ҳаракатлар давом этмоқда.

Якшанба куни кечқурун Сурия президенти Аҳмад аш-Шаръа ўт очишни тўхтатиш ва курдларнинг SDF гуруҳини давлат институтларига тўлиқ интеграция қилиш бўйича келишувни эълон қилган эди.

Strategic Focus: LIVE

🇺🇸🇩🇰🇬🇱 АҚШнинг Шимолий Америка ҳаво-космик мудофаа қўмондонлиги (NORAD) ўз самолётлари яқин орада Гренландиядаги Питуффик ҳарбий базасига етиб боришини маълум қилди  — BBC

NORAD X ижтимоий тармоғида эълон қилган баёнотига кўра, парвозлар аввалдан режалаштирилган турли тадбирлар доирасида амалга оширилади. Мазкур машғулотларда АҚШ ва Канаданинг континентал ҳудудларида жойлашган самолётлар ҳам иштирок этади.

Қайд этилишича, ушбу фаолият Дания Қироллиги билан келишилган, барча қўллаб-қувватловчи кучлар зарур дипломатик рухсатномалар асосида ҳаракат қилмоқда. Гренландия ҳукумати ҳам режалаштирилган тадбирлар ҳақида хабардор қилинган.

"Бу баёнот АҚШ президенти Доналд Трамп Гренландияни миллий хавфсизлик нуқтаи назаридан АҚШ учун муҳим деб атаб, Данияга тегишли ҳудуд устидан назоратни қўлга киритиш масаласида куч ишлатиш эҳтимоли ҳақидаги саволни очиқ қолдирганидан бир кун ўтиб эълон қилинди", деб ёзмоқда BBC.

Strategic Focus: LIVE

🇺🇸 Bloomberg Трампнинг Тинчлик кенгашига таклиф этилган давлатлар рўйхатини эълон қилди

Агентлик тақдим қилган рўйхатда жами 49 та давлат бор бўлиб, улар орасида Европа давлатларининг аксарияти, шунингдек, Ўзбекистон, Россия, Беларус, Украина, Исроил, Саудия Арабистони, Покистон, Уммон ва бошқа мамлакатлар мавжуд.  Рўйхатда Еврокомиссия алоҳида кўрсатилган.

Қайд этилишича, ҳозирча барча давлатлар ҳам таклифнома олганини расман эълон қилмаган ва рўйхат тўлиқ эмас.

Рўйхатда Хитой йўқ. Бироқ AFP маълумотларига кўра, Пекин ушбу кенгашга таклиф қилинганини тасдиқлаган. Бу ҳақда Хитой Ташқи ишлар вазирлиги вакили маълум қилган.

Агентлик, айрим давлатлар кенгаш фаолияти шартларини қайта кўриб чиқишни сўраган бўлсалар ҳам, Доналд Трамп Тинчлик кенгаши низомини 22 январ, пайшанба куни Давос Халқаро иқтисодий форумида имзолашни режалаштираётганини ёзган.

Strategic Focus: LIVE

🇺🇦🇺🇸🇷🇺 Зеленский Давос Халқаро иқтисодий форумига бормаслиги мумкин

Украина оммавий ахборот воситаларининг хабар беришича, президент Зеленскийнинг Давос Халқаро иқтисодий форумидаги чиқиши бекор қилинган, у Россиянинг кенг кўламли зарбаларидан сўнг юзага келган энергетик инқироз билан шуғулланади.

"Зеленский фақатгина Трамп билан икки томонлама учрашув бўлиб, унда “тинчлик келишуви” имзоланиши режалаштирилган тақдирдагина Давосга бориши мумкин", дея ёзмоқда украин матбуоти.

Strategic Focus: LIVE

🇺🇸 Трамп Давос Халқаро иқтисодий форумида Ғазо сектори учун ташкил этилган Тинчлик кенгаши ваколатларини кенгайтириш ҳақида эълон қилади — Axios

Қайд этилишича, АҚШ президенти Давосга ҳар қачонгидан ҳам дадил ва катта мақсадлар билан йўл олмоқда.

Нашр манбаси сўнгги ҳафталарда Доналд Трамп энди фақат Қўшма Штатларда ҳукмронлик қилиш билан чекланишни истамаслигини намоён этганини, Тинчлик кенгаши фаолияти Ғазо сектори доирасида чекланиб қолмасдан бутун дунё миқёсидаги кенгаш бўлишини айтиб ўтган.

"АҚШнинг баъзи иттифоқчилари ушбу ташаббусни БМТ Хавфсизлик кенгаши билан рақобат қилишга уриниш сифатида баҳоламоқда. Уларнинг фикрича, мазкур тузилма доирасида Трамп қарорлар қабул қилишда мутлақ вето ҳуқуқига эга бўлиши мумкин", дея ёзмоқда Axios.

Strategic Focus: LIVE

🇺🇸 Трамп Тинчлик кенгашига 58 давлат раҳбарини таклиф қилган — Аxios

Маълумотларга кўра, Тинчлик кенгашининг доимий аъзоси бўлишни истаган давлатлар биринчи йил давомида 1 млрд доллар миқдорида бадал тўлаши керак. Вақтинчалик аъзолик эса бепул бўлиб, у мамлакатга уч йил муддатга берилади.

Strategic Focus: LIVE

🇬🇧🇺🇸🇲🇺 Трамп Буюк Британиянинг Чагос архипелаги бўйича келишувини “ожизлик ва ахмоқлик” деб атади — Reuters

АҚШ президенти Доналд Трамп Буюк Британиянинг Чагос архипелаги устидан суверенитетни Маврикийга топшириш бўйича қарорини ёқламаслигини билдирди. Унинг фикрича, архипелаг таркибидаги Диего-Гарсия оролида жойлашган АҚШ–Буюк Британия ҳарбий базаси билан боғлиқ ушбу келишув “мутлақ ожизлик” ва “катта аҳмоқлик” ҳисобланади.

Трамп Truth Social ижтимоий тармоғидаги постида Буюк Британияни танқид қилиб, Лондон ҳеч қандай асосли сабаб бўлмасдан стратегик аҳамиятга эга ҳудуддан воз кечаётганини таъкидлади. Унинг сўзларига кўра, бу ҳолат Хитой ва Россиянинг эътиборидан четда қолмайди. Трамп мазкур вазиятни Гренландияни қўлга киритиш зарурлигини асословчи омилларидан бири сифатида келтирди.

"Аввалроқ Трамп маъмурияти Ҳинд океанидаги Чагос архипелагини Маврикийга топшириш, бироқ Диего-Гарсия ҳарбий базасини Буюк Британия назоратида 99 йиллик ижара асосида сақлаб қолишни назарда тутган келишувни қўллаб-қувватлаган эди. Энди эса Трамп аввалги позициясини ўзгартирди", деб ёзмоқда Reuters.

Расмий Лондон суд қарорлари Диего-Гарсия базасининг келажакдаги фаолиятига хавф туғдирганини таъкидлаб, Чагос бўйича келишув айнан миллий хавфсизлик сабабларига кўра тузилганини билдирди. Буюк Британия расмийларига кўра, келишув аллақачон якунланган ва уни қайта кўриб чиқиш имконсиз.

Strategic Focus: LIVE

🇺🇸🇩🇰🇬🇱 Трампнинг Гренландия бўйича ҳаракатлари фонида олтин ва кумуш нархи рекорд даражада қимматлашди — Deutsche Welle.

Strategic Focus: LIVE

🇰🇿 Тўқаев Қозоғистонда вице-президент лавозимини жорий этишни таклиф қилди

Оммавий ахборот воситаларининг хабар беришича, Қозоғистон президенти Қосим-Жўмарт Тўқаев мамлакатда парламент ислоҳотини бошламоқда. Ислоҳот доирасида Қозоғистон парламенти икки палатадан бир палатага айлантирилади ва Қурултой деб номланади. Унда 145 та депутатлик ўрни бўлади.

Бундан ташқари, Қозоғистонда вице-президент лавозими жорий қилинади. Уни президент парламент розилиги билан тайинлайди.

Қозоғистон фуқаролари ушбу конституциявий ўзгаришлар учун шу йил баҳорда бўлиб ўтиши режалаштирилаётган референдумда овоз беришлари керак бўлади.

Strategic Focus: LIVE