زينب ياعلي زينب الخيل من اوصلت حدها
ليك اتوجهت تتنخـاك وتحشــمــك يوالـدها
ـــــ
زينب ياعلي زينب مـــن گـــــوضـــــت ولياها
طلعت والمـــهـــــر عـــــــاري ياحيــدر تلگـاها
صاحت طاح اخوي احسين صاح المهر وياها

يزينب طاح ابو اليمه
يزينب ســابـح ابدمه
يزينب خل نصل يمه

وناخذ ماي ويانه چبدته العطش ماردها
ـــــ
زينب للمهر گـــــالـــت وهي على الهظم جمضه
يمهر حسين اروح وياك اخاف احسين مايرضه
ومنطلع خيالي ايصير لعيــــون الزلم عـــــرضه

اخــوي حسين مايقبل
وخافـن يالمهر يــزعـل
لاچن اوچب على التل

وانده وين أخوي حسين بلچن يسمع الندها
ـــــ
گال المهر يازينب اضنج ما بگالـــــچ راي
ابن امچ وگع ويصيح اريداً يالهوادم ماي
دجيبي الماي يازينب وانه الاخـذچ وياي

ويشرب والـــد سكينه
ومن يشرب يفك عينه
ونجعده ويحـــــاچينه

وبمعصبچ يازينب اجروح التكلف انشدها
ـــــ
زينب للمهــــر گالـــــت يمكــدر مـــــردت چبـدي
تكـــــول حسين يطلب ماي وانه الماي مو عندي
يمهر حسين وحدك روح خبره وانه اضل وحدي

يمهر حسين أضل اتناك
انچــان اتــريـدني وياك
اريد اتريض بمـمــشــاك

يمكدر حيل مابيه المثلي الله يساعدها
ـــــ
مشـت وي المهر زينب يهــد الحـيــل ممشـاها
تبچي والمهـر يبچي يبو الحمله اعلى مبچاها
دلاها اعلى خوها حسين شگول اشلون دلاها

حـرمـه ولفـت واليها
عدها هموم تشچيها
تحاچيه ما يحاچيها

لاچن قسمت اعلى حسين بمها وعودها وجدها
ـــــ
يخويه ابجاه جدي اعليك وجاه امك تحاچيني
يخــوي من عــگــب عيــنــاك لهلـي من يوديني
يخوي اگــعــد وباصــرنـي واعلى الــراي دليني

يخـويه عيالنا هجت
يخويه طفالنا سجت
يخويه خيامنا وجت

يخويه اگعد وطفي النار وخيول العده ردها
ـــــ
فك عينه ابوجه زينب شگول اشلون فك عينه
شـــــاف النــار وي الخيــل بمــوسـط صواوينه
وتهيج صــاحــب الغيـره على هضمت نساوينه

مــا چــــــانت علــى باله
حــي وتنـــــولي اعيــاله
اعلى ابو السجاد هالحاله

امر من العطش والحر وامر من الجتل وادها
ـــــ
التفت لخته يحاجيها يزينب گــالهـا اشجابچ
يختي العيلــتــچ ردي تتيه الحـــــرم بغيـابچ
ردت لاچن أشردت على بن امها الجنه شابچ

والله الفخر الها وبس
بيهــا حــيــل تتنـفس
تــتــجــلــد وتتحمس

تشوف اطفال مذعوره وتشوف الخيل تطردها
ـــــ
زينب ردت من حسين تعال وشوفها بيا حال
تكفكف بيد دمعتها وبـيــد أمــوســره الــدلال
الف عفرن على زينب وعفيه الها جدم ينشال

حــرمـه غـــــدر بيها البين
وافكرها انشده بين اثنين
مابين الــحــرم وحــسـين

شتدبر اوشتعبر وهي حرمه وحرم عدها
ـــــ
لخــوهـــا راحــت وردت وبخيمها تشب النار
رادت من يطفي النار شـافــت ما حصل نغار
صاحت لچن مغتاضه اضخر لا يحامي الجار

شنهي من صبر صــبرك
علي يا والدي اشبصـرك
يبويه بهــاي ما عـــذرك

بناتك صارت ابشده ونت حاظر شدايدها
ـــــ
علي يا والدي منته الحمـه ويوم الشــــدد منــدوب
يبـويــه الصــبـر فصلته ثـــوب وركــد هــذا الثوب
يبويه حسين أخوي اچتل وعزي البالطنب منهوب

وهاي الحرم شيلمها
اوشبـت نـار بخيمها
وراح اللــي تــزمــها

يبويه الليل لو هود ياهو الي يهودها


خادم اهل البيت
الحاج مُعين السباك

#اللهم_عجل_لوليك_الفرج

(27)

گلـي يالميمـون ... وين والينه
راح أبو السجاد ... لو يرد لينه
ـــــــــــــــــــــــــــــ
آنه يالميمون بيـــدي جـــدمتك وإنخمـــش گلبي
ومن رحت بحسين بألله ودعتك والباري حسبي
وبگت روحي إتلوج وأنتظر جيتك وإعيوني تربي

جيتني خـالـي ... حسين چا وينه
راح إمن إدينه
ـــــــــــــــــــــــــــــ
بالله يالميمون رد عليـه إجـواب وإخفي ونيني
سرجك المگلوب صاب گلبي إصواب وأثگل حنيني
هـــذا دم حسين لـــو حَمـــار إخضاب ما تدليني

همهم الميمون ... وأهملت عينه
راح إمن إدينه
ـــــــــــــــــــــــــــــ
دم يهالميمون وجهك إخضـــابه والگلــب عطّب
من وريد حسين لو من إصوابه وجهك إتخضب
گلها سهم البين بالگلــب صـــابه إشمالچ يزينب

دم أخـوچ حسين ...ما تعرفينه
راح إمن إدينه
ـــــــــــــــــــــــــــــ
ليش يالميمون مندهش حالك مجبل عليه
تجر بلجامك وتصهـل إشمالك ونتك خفيه
جيتني خالـــي ويــن خيّـــالك عفته رميه

وين أخويه حسين ... عن صواوينه
راح إمن إدينه
ـــــــــــــــــــــــــــــ
بالله يالميمون لهفتي ردهـــا وهـــوّد عويلي
إگلـــوب هالأيتام لا تمـــردها هــدمت حيلي
هاي سكنه إتريد مني والدها وفجعت دليلي

چن أخويه حسين ... يتـّم إسكينه
راح إمن إدينه
ـــــــــــــــــــــــــــــ
ليش يالميمون إسبيتلي حـالــي وهدمّت داري
وإگطعت بيّه إبطيحـت الـــوالي آ ينكــســـاري
وإگطعت گلبي إبسرجك الخالي وهيّجت ناري

حــرم ظلينه ... ومن يحامينه
راح إمن إدينه



للشاعر المرحوم
كاظم المنظور الكربلائي

#اللهم_عجل_لوليك_الفرج

(28)

وين ساجي الظاميه دلوني
وين اخوي ايشوف حالي اولوني
ـــــــــــــــــــــــــــــ
من يدليني على ضنوة علي
الچابني ابعهده وگمت من منزلي
وين الشبول التباري محملي
وين خلهم بالذل ايشـوفوني
ـــــــــــــــــــــــــــــ
وين يا عباس راعي المرجله
گوم شوف العز يبو الشيمه انوله
هين اعليـكم سنان وحـــرمـــله
يبن ابوي او رغما ايسلبوني
ـــــــــــــــــــــــــــــ
سلبوني وسلبو سكنه او تلوع
والعيون اتسايلت منها الدموع
هاي المروه صفت يهل الدروع
امخدرتكم زينب او يسبوني
ـــــــــــــــــــــــــــــ
انسبي ترضه يبو درع الثجيل
ايتام عدي وحرم ومقيد عليل
كون يوفي الوعد من شان الچفيل
گوم يمشكر وچف من دوني
ـــــــــــــــــــــــــــــ
تعتذر مني يعباس اشتگول
والمحامل جدمت فوك الزمول
والدي حيدر علي وامي البتول
اشلون للشام الرجس يهدوني
ـــــــــــــــــــــــــــــ
اشلون يهدوني اليزيد اشلون اروح
والجثث منكــم على الغبره تلـــوح
من يجيم الكم عزه اومنهو الينوح
انه زينب يخوتي شچوني
ـــــــــــــــــــــــــــــ
ما تشچيني يطاعون الجبيل
منته ابو فاظل شبل حامي الدخيل
من يباري المحملي يوم اليميل
ريت عميت يبن ابوي اعيوني
ـــــــــــــــــــــــــــــ
عمت عيني اجسادكم ظلت رهن
اشلون رچبي والحـــرم يتواقعن
لو نشدني الشامت اعلى اهل الضعن
خل اگله الشامتي خلوني
ـــــــــــــــــــــــــــــ
خل اگولن والعتب ماضن يفيد
والدرب حزمه وهـــل عله يريد
يالعلي والله امن اطب مجلس يزيد
يگول من هاشم قضيت اديوني


للشاعر
عبد الامير الفتلاوي

#اللهم_عجل_لوليك_الفرج

(29)

وين الفاجده الشبان وين الضايگه اللوعه
هاي ام جاسم العريس بالعريس مفجوعه
ـــــ
وين الفاجـــــده الشبــان خــل وياي تتعنه
لأم جاسم نريد نروح نساعــدها على الونه
ونرد الحوفة العريس ونجيم بحوفته حنه

ونلگه ام الشباب اتجـول
على بنها العگـل مذهـول
وتتنعه على الولد وتكول

يشمامة المن سباح هرش الچبد مگطوعه
ـــــ
لگينه ام الشباب اتجول وگمنه نجول وياها
ام وفاجــــده اعله النــوح مايحتاج ننخاها
اولگينه شمعت العـريس مطفيه او علگناها

وشــدينه الطم والنـــوح
ابحرگه والگلب مجــروح
ومن شفنه الولد مطروح

شفنه چثه العريس أسهام ونبل مزروعه
ـــــ
بين الطـــــم والصـايح وبين الدمـعـه والحسره
اجتهن عمت العــريس زينب شـــــابچه العشره
ولگت شمع العرس داوي وصاحت لاچن ابعبره

شنهي الشــمـع وي البين
احنه وعرس جاسم وين
لايسمع اخــــوي احسين

ومن يسمع يجي بهمه ويطفي الشمع بدموعه
ـــــ
بالله الشمع طفنه نريد اعله الولد نلطم
انه عمته وامــه وهـــــاي اموجله وتهم
للطف جيت ماظنيت اليه البين متـولم

وثبت بالدلـيــل اســهــام
وهد حيلي بعرس جسام
آيا بـــــدر ســعــدي التام

راح وصورته ضلت وسط احشاي مطبوعه
ـــــ
من ايدي بن اخـويه راح راح الچــان الي ونسه
حسبت احساب ظني خاب عمته وتفرح بعرسه
راح العرس من جسام وضلت حــســرته بنفسه

ويا حسرت بني هــاشم
المفجرعه بعرس جاسم
مبــارك عــالــثــره نـايم

وعمك يبن اخوي عليك نار وسرت بضلوعه
ـــــ
يومك يبن اخوي يوم هد حيلي ولوه جيدي
وامــك بالخيام تصيح راح الــولــد من ايدي
اريــدن موتتي ويـــــاك ياعـــــريس يوليدي

يجاسم شوف حال امك
تــلــوج وجــاعــده يمك
تخضـب راسها بــدمــك

حكها ام الولد عنها حچاية العتب مرفوعه
ـــــ
هاي امك يجاسم هــاي بيك الدهر دوهنها
سهرت ربت اوتعبت وخاب من الربه ضنها
تصيح ارباي اريد ارباي گلي اشتعتذر منها

تصيح ارباي اريد ارباي
منـك يا ضـــــوه عيناي
يجاسم مو مروّه هـــاي

تروح وضلت اعله امك دواهي الحزن مجموعه

للشاعر المرحوم
معين السباك

#اللهم_عجل_لوليك_الفرج

(30)

زيـنـب من الخيمه طلعت بيديها
جـود ونخت راعي العلم واليها
لـن گمـر هـاشـم عونچ يناديها
وبچفـه الـرايـه الـمـنـشوره
ــــــــــــــــــــــــــــــــــــــ
نـادت يـبـن مير النحل يمشكر
مشحون وادي كربلا من العسكر
مـدري شـتريد الگوم هالتتكاثر
جـيـمـان الـكـوفه الغداره
ــــــــــــــــــــــــــــــــــــــ
نـاداهـا يـختي لا تهمچ هالگوم
مـازال انـا الـمتكفلچ والملزوم
وانـه بـن عودچ بالحرايب معلوم
وبـيـوم الـكـون يـعـرفوني
ــــــــــــــــــــــــــــــــــــــ
نـادت فـلا هاب الخطر بوجودك
مـامـون گلبي يابن ابويه بزودك
ادريـك حاوي المرجله من عودك
يـاسـور الـمـانـع يـا هـيبه
ــــــــــــــــــــــــــــــــــــــ
ادريـك راضـع مـن ثدايه النيبه
والـحـرب لـو گل وكثر ماتهيبه
لاچن اخـبـرنـك خبر يا هيبه
مـن عگب الـزهـره الـمظلومه
ــــــــــــــــــــــــــــــــــــــ
عـودك نده عمك بدمع سچاب
عد لي انساب العرب يابن الأطياب
واخطب لي من عدهم زچية أنساب
ومـعـرب أصـلـك يـا عينه
ــــــــــــــــــــــــــــــــــــ


للمرحوم الشاعر
كاظم المنظور الكربلائي

#اللهم_عجل_لوليك_الفرج

(31)

مخمّساً بيتين هما لسان حال الحوراء زينب(ع)

تخاطب أخاها :
(بحر الكامل)

يا مـنْ يُجيْـرُ بقــولـــــهِ وبِفعلِـــهِ
هيهــاتَ أنْ يأتي الزّمـانُ بمثلـهِ
إنْ طاحَ حِمْلي منْ يقومْ بحمْلِـــهِ
قـد كُنـتَ لي جبــلا ألـوذُ بظلَّـهِ
فتَرَكْتني أمشـي بأجــرَدَ ضاحــي ١
نوبٌ أشابتْ قَبلَ فَقْدكَ مفْرقي
وذهبتَ حينَ رَحَلْتَ فيما قد بقي
قد كُنتُ في أعلى محلَّ أرتقي
واليــومَ أخْضَعُ للعـــدوّ وأتَّــقــي
منـه وأدفـــعُ ظالمــي بالــراحِ


للشاعر
السيد صالح الحلي «رحمة الله عليه»
ــــــــــــــــــــــــــــــــــــــ
١.الاجرد: الذي لا نبات فيه من الجبال والارضين
الضاحي : ما ليس له ظل

(32)

#تراث

أهـز  مهدك يـعـبـدالله
وعاين عالمهد خالي .. ..  يبني وثمر دلالي
أهـز   مهـدك  يـعـبـدالله
ـــــــــــــــ
يعبدالله  سهرت برباك
ياللي ربـاك هدّمني
يعبدالله جنـت أرجـاك
لدهري ولكبر سنّـي
يعبدالله  عگب عيناك
دهـري بيك سودنّي

بـسـهـم فـگـدك يـعـبـدالله
اومنـّي  غايب هلالي .. .. يبني وثمر دلالي
أهز      مهدك يـعـبـدالله
ــــــــــــــــــــــــــــــــــــــ
يـعـبدالله  شكثر باراك
گلبي وبصعِب حملك
يـعـبدالله  الگلب غذاك
وإنت سلــوته بوكتك
يـعـبـدالله شكثر ناغاك
يوم بناظـــري شفتك

اگول تـعـود يـعـبـدالله
ودهري  خيب آمالي .. .. يبني وثمر دلالي
أهـز  مــهــدك يـعـبـدالله
ــــــــــــــــــــــــــــــــــــــ
يعبدالله بـعد صـواب
گلبـــــي لا تظــن يلتـــم
يعبدالله الگلب لهـّاب
عليــك وعيني تهمـل دم
يعبدالله ياريح الهاب
يا چوچب ساعدي اليبسم

جفى سعدي  يعبدالله
و ريتك تنظر لحالي .. .. يبني وثمر دلالي
أهز مـهدك يعبدالله
ــــــــــــــــــــــــــــــــــــــ
يـعبدالله ثـدايه عليك
درت والگـلــب وجـّـر
سهم  البالنحر ما بيك
وسمّـه بالگــلــب أثــر
يعبدالله العطش مض بيك
ونيران العطش تسعـر

شيطفـيهـا  يعبـدالله
وانـظـر  شـخصك  گبالي .. ..  يبني وثمر دلالي
أهز      مهدك     يـعـبـدالله
ــــــــــــــــــــــــــــــــــــــ
يعبد الله اشيفيد النوح
لو شخصك خضيب الدم
يعبد الله الگلب مجروح
وگلبي الفـگــــدك اتجسم
يعبد الله يروح الروح
وحيلي ابفــگــــدك اتهـدم

انهدم حيلي يعبد الله
شحال التفگد الغالي .. .. .. يبني وثمر دلالي
أهز      مهدك     يـعـبـدالله


للشاعر المرحوم
الشيخ سعيد الهر الكربلائي

#اللهم_عجل_لوليك_الفرج

(34)

#تراث

إعيوني العلگمي والدمــــع جاريّه
يسيل إعله العلم وإچفوف راعيّه
ــــــــــــــــــــــــــــــــــــــ
العيــــن إتهيــــل دم إتسيـــل عبرتها
عله إصبيها السگط وإنطفت شمعتها
غاب الشـــوف عنها وسلت شحمتها
وأيام الدهر سارت لياليّه
ــــــــــــــــــــــــــــــــــــــ
أيام الدهـر صــــارت ليالي الســــود
من طاح العلم والسهم صاب الجود
والعامــود آ يا ضــــربة العــــامــــود
أشوف الفلك منها إنگلب عاليه
ــــــــــــــــــــــــــــــــــــــ
إنگلب عالي الفلك والفلك چان إيدور
حول إخدور منصوبه إبحمه المنطـور
شنهو الصار أشوفن لا حمه إو لخدور
شال الخدر وإتهدمت مبانيه
ـــــــــــــــــــــــــــــــــــــ
مباني إخدورنا طاحت إو سرها إنباح
من غـــــرّب ضعنــه والمــــگــــدر لاح
غــدت لمخــــدرات إتلوج دونه أرواح
تعتب عالنهر وإتلوم شاطيه
ــــــــــــــــــــــــــــــــــــــ
تعــــاتب والعتب نار إو سنــــاها النـوح
إو سهم اللوم يخلف بالچبود إجــــروح
البـدن لو فگد روحه ينسلي إعله الروح
وإتراب البله إيغير معانيه
ــــــــــــــــــــــــــــــــــــــ
المعاني إتغيرت وإختلف وضع الحـال
وأنه زينــــب المني ما يلــــوح إخيـال
عشت إمخــدره واليوم خــــدري شال
واعيش إمخدره بستار ماضيه
ــــــــــــــــــــــــــــــــــــــ
وأعيش إمخدره بستار خدري الفات
لو مــات ألأمــــل عــــز ألإبه ما مات
هــــدم بيتي عليّــــه هــــادم إللذات
نحرته بالصبر وأشگف مواضيّه
ــــــــــــــــــــــــــــــــ
ششاجف آه من دنياي حيـرتني
مراميها إبفگــــد ولياي صابتني
لو أشگف إسياط الوسِّمن متني
لو شفرة حچي اليگلون مسبيه
ــــــــــــــــــــــــــــــــــــــ
مسبيــــه إو علــــيـّــــه إيـهــــــون لا ميهـون
إشلون أمشي وأعوف إجسوم إخوتي إشلون
ششوف إمن الــــدروب ومالــــي بيها إعيون
عيوني إبكربله إو عالمشرعه إربيه
ــــــــــــــــــــــــــــــــــــــ
إعيوني إبكربله إو كربله الفجعتني
وأنه زينب إحــجــــور الصبر ربتني
إو ثداي العصمه در إبحلم رضعتني
إو فكرتي إتبصرت برموز علميه
ــــــــــــــــــــــــــــــــــــــ
برمــــوز العلم وإبقسمــة التكــــوين
أجاهد مثل إخوتي الجاهدت للــدين
وأگف للدين وگفه التگر عين حسين
وأخلد بالشرف آثار مرضيه ــــــــــــــــــــــــــــــــــــــ
لخــلــــد بالشــــرف آثار محمــــوده
وأجاهـد مثل أخويه البذل مجهوده
لعــــد هادين وأرصد بالإبه إحدوده
وأكفّ عن الدهر وأشگف مراميه


للمرحوم الشاعر
كاظم المنظور الكربلائي

#اللهم_عجل_لوليك_الفرج
(35)